གངས་ལྗོངས་ས་པཎ་ལྔ་རིག་ཚོཊ་ཆེན།

གངས་ལྗོངས་ས་པཎ་ལྔ་རིག་ཚོགས་ཆེན་སྐབས་བདུན་པ་དེ་འདི་ལོའི་ཕྱི་ཟླ་ ༧ ཚེས་ ༡༥ ཉིན་ནས་དབུ་འཛུགས་ཀྱིས་ལི་ཐང་མི་འགྱུར་བཤད་གྲྭར་ཚོགས་ཡོད་པ་དང་། སྐབས་དེར། གདན་ས་ཆེན་པོ་དཔལ་ལྡན་ས་སྐྱ་གོང་དང་། ངོར་ཨེ་ཝྃ་ཆོས་ལྡན། ནཱ་ལེནྡྲ་བཅས། གདན་ས་གསུམ་གྱི་སྐུ་ཚབ་རྣམ་པ་དང་། གཞན་ཡང་བོད་ཆོལ་ཁ་གསུམ་ཆར་ནས་ས་སྐྱའི་ཆོས་བརྒྱུད་འཛིན་པའི་བཤད་གྲཱ་ཁག་དང་། ལི་ཐང་དང་། མི་ཉག་ཁུལ་གྱི་དགོན་སྡེ་ཁག་གི་དགེ་འདུན་པ་བཅས་ཁྱོན་བསྡོམས་དགེ་འདུན་ཉིས་སྟོང་ལྷག་ཙམ་དང་བླ་སྤྲུལ་མཁན་པོ་བརྒྱ་ཕྲག་རྒལ་བ་བཅས་འཛོམས་ཡོད་པ་རེད།

 མཛད་སྒོའི་སྐབས་གདན་ས་གསུམ་གྱི་སྐུ་ཚབ་རྣམ་པ་དང་། ས་པཎ་ལྔ་རིིག་ཚོགས་ཆེན་གྱི་གཙོ་འཛིན་པ། གཞན་ཡང་མཁས་དབང་དང་། མཁན་པོ། ལས་སྣེ་བ་བཅས་ནས་བོད་བསྟན་པ་ཆབ་སྲིད་ཀྱི་ཆེད་དུ་ སློབ་གཉེར་བ་རྣམས་ལ་གཙོ་བོ་ནང་ཆོས་གོ་རྟོགས་ཀྱི་རྨང་གཞི་གཏན་པོ་ཟིན་ཐོག་ བོད་ཀྱི་སྐད་ ཡིག་དང་དེང་རབས་ཀྱི་ཤེས་ཡོན་སྤྲོད་རྒྱུ་གལ་ཆེན་ཡིན་ཚུལ་དང་། དེ་བཞིན་ཆོས་བརྒྱུད་ཁག་དང་། དགོན་སྡེ་ཁག དེ་བཞིན་མི་རིགས་ཀྱི་བར་གྱི་མཐུན་ལམ་དམ་ཟབ་དགོས་ཚུལ་བཅས་ཀྱི་སྐོར་ལ་གསུང་ བཤད་གནང་ཡོད་པ་རེད།

ཚོགས་ཆེན་གྱི་དངོས་གཞི་ཉིན་བཅོ་ལྔའི་རིང་ཕར་ཚད་གཉིས་ཀྱི་བཀའ་ཁྲིད་དང་གཞུང་ཆེན་བཀའ་པོད་དྲུག་གི་སྐོར་ལ་རྩོད་པ་དང་བགྲོ་གླེང་གནང་སྟེ། ཉིན་རེར་རྩོད་ཆེན་དང་རྩོད་ཆུང་གི་དུས་གཉིས་རེ་བྱས་ནས་རྩོད་ཆེན་གྱི་སྐབས་ཤེར་ཕྱིན་དང་ཚད་མ་གཉིས་གང་རུང་དང་། རྩོད་ཆུང་སྐབས་གཞུང་ཆེན་བཀའ་པོད་དྲུག་ཆ་ལ་རྩོད་པ་བྱས་ཡོད་ལ། ཡང་གཞུང་ཆེན་བཀའ་པོད་དྲུག་གཙོ་བོ་བརྗོད་གཞིར་བྱས་ནས་ཉིན་ལྔ་རེ་བཞིན་བགྲོ་གླེང་ཐེངས་རེ་གནང་སྟེ་བཤད་གྲྭ་ཁག་གི་སློབ་གཉེར་བ་རྣམས་ནས་རིག་ཡོད་པ་རེད།

གཞན་ཡང་ཉིན་བཅོ་ལྔའི་རིང་གྲྭ་ཚང་ཁག་གི་དགེ་འདུན་པ་རྣམས་ནས་༧གོང་ས་སྐྱབས་མགོན་ཆེན་པོ་མཆོག་དང་། གོང་མ་རིན་པོ་ཆེ་སོགས་རིས་སུ་མ་ཆད་པའི་སྐྱེས་ཆེན་རྣམ་པའི་ཆེད་དུ་ཞབས་རིམ་གནས་བརྟན་ཕྱག་མཆོད་དང་། འཛམ་གླིང་ཞི་བདེའི་ཆེད་འཕགས་པ་བཟང་པོ་སྤྱོད་པའི་སྨོན་ལམ་དང་། འཇམ་དཔལ་མཚན་བརྗོད་བཅས་བསགས་ཡོད་པ་རེད། བོད་ཟླ་བརྒྱད་པའི་ཚེས་གཅིག་གོང་མ་རིན་པོ་ཆེ་མཆོག་གི་སྐུའི་འཁྲུངས་སྐར་ཉིན་འདུས་ཚོགས་ནས་ཚེ་ལྷ་རྣམ་གསུམ་གྱི་ཆོ་ག་དང་། གོང་མ་རིན་པོ་ཆེའི་ཞབས་བརྟེན་བཅས་བསགས་བསྒྲུབས་ཀྱིས་མཐའ་མའི་འཇུག་སྒྲིལ་ཏེ་ས་པཎ་ལྔ་རིག་ཚོགས་ཆེན་སྐབས་བདུན་པ་ལེགས་གྲུབ་བྱུང་ཡོད་འདུག