བོད་རིཊ་གཞོན་སྐྱེས་ཚོའི་སློབ་ཡོན་ཐོག་རོགས་རམ་གནང་རོཊ།

དབྱིན་ཡུལ་གྱི་གྲོས་ཚོགས་འཐུས་མི་ཁག་ཅིག་བཞུགས་སྒར་ཁུལ་དུ་གཟིགས་སྐོར་ལ་ཕེབས་ཏེ། ༧གོང་ས་མཆོག་དང་བཀའ་བློན་ཁྲི་པ། བོད་མི་མང་སྤྱི་འཐུས་ཚོགས་གཙོ་གཞོན་བཅས་ལ་མཇལ་འཕྲད་གནང་ཡོད་ཅིང་། ༧གོང་ས་མཆོག་གིས་ཁོང་ཅག་ལ། བོད་རིགས་གཞོན་སྐྱེས་ཚོར་ཕྱི་རྒྱལ་གཙུག་ལག་སློབ་གྲྭ་ཁག་ཏུ་སློབ་ཡོན་རོགས་རམ་གནང་རོགས་ཞེས་འབོད་སྐུལ་ཞུས་ཡོད་འདུག

ཟླ་འདིའི་ཕྱི་ཚེས་ ༣ ནས་ཕྱི་ཚེས་ ༧ བར་དབྱིན་ཇིའི་བོད་དོན་རྒྱབ་སྐྱོར་ཚོགས་པའི་(Tibet Society)གོ་སྒྲིག་འོག དབྱིན་ཡུལ་གྱི་གྲོས་ཚོགས་འཐུས་མི་ ༥ བཞུགས་སྒར་ངྷ་སར་གཟིགས་སྐོར་དུ་ཕེབས་ཏེ། ༧གོང་ས་མཆོག་དང་བཀའ་ཁྲི། བོད་མི་མང་སྤྱི་འཐུས་ཚོགས་གཙོ་གཞོན་གཙོས་པའི་སྤྱི་འཐུས་རྒྱུན་ལས་ཁག་ཅིག་བཅས་ལ་མཇལ་འཕྲད་དང་གྲོས་བསྡུར། དེ་བཞིན་གཞུང་འབྲེལ་མིན་པའི་ཚོགས་པ་ཁག་དང་། དབུས་སྣེ་ལེན་ཁང་། བོད་ཁྱིམ་སློབ་གྲྭ དེ་བཞིན་ངྷ་ཁུལ་གྱི་རིག་གཞུང་བསྟི་གནས་ཁང་ཁག་ཅིག་བཅས་ལ་གཟིགས་སྐོར་གནང་ཡོད་འདུག་ལ། ངྷ་སའི་ཀིརྟི་དགོན་དུ་ཀིརྟི་རིན་པོ་ཆེ་དང་མཇལ་འཕྲད་གནང་སྟེ་ཉིན་འདི་གར་ཨ་མདོ་རྔ་པ་ཀིརྟི་དགོན་པའི་ཛ་དྲག་གི་གནས་སྟངས་སྐོར་ལ་གླེང་མོལ་བཅས་གནང་ཡོད་འདུག  

དེ་རིང་ཞོགས་པའི་ཆུ་ཚོད་ ༡༠ སྟེང་གངས་སྐྱིད་ཕྱི་དྲིལ་ཚོགས་ཁང་དུ་དབྱིན་ཡུལ་གྲོས་ཚོགས་འཐུས་མི་རྣམ་པ་དང་བོད་མི་མང་སྤྱི་འཐུས་ཚོགས་གཙོ་མཆོག དབྱིན་ཡུལ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་རེ་ཀེ་(Rike Hyde-Chambers)ལགས་དང་ཚོགས་མི་གཅིག་བཅས་ཕེབས་ཏེ་རྒྱ་གར་དང་བོད་རིགས་གསར་འགོད་པ་ཚོར། དབྱིན་བོད་འབྲེལ་ལམ་དང་རྗེས་ཕྱོགས་བོད་དོན་ཐད་རྒྱབ་སྐྱོར་རྒྱ་ཆེར་གཏོང་རྒྱུ། དེ་བཞིན། ཐེངས་འདིའི་གཟིགས་སྐོར་སྐབས་ཀྱི་མྱོང་ཚོར་དང་། ཁོང་ཚོ་ཕྱིར་ལོག་རྗེས་རྗེས་ཕྱོགས་ལས་དོན་ག་རེ་བསྒྲུབ་འདུན་ཡོད་པ་དང་གཞུང་ལ་གྲོས་གཞི་འབུལ་རྒྱུའི་ལས་འཆར་གཏན་འབེབ་བྱ་རྒྱུ་ཡིན་སྐོར་སོགས་བརྗོད་མཐར། གསར་འགོད་པ་དག་གི་དྲི་བར་ལན་འདེབས་གནང་སོང་།

བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་འཐུས་མི་རྣམ་པ་ངོ་སྤྲོད་དང་སྦྲགས། བོད་མི་མང་སྤྱི་འཐུས་ལྷན་ཚོགས་དང་འཛིན་སྐྱོང་བཀའ་ཤག ཕྱི་དྲིལ་ལས་ཁུངས་བཅས་ཀྱིས་དུས་ནས་དུས་སུ་རྒྱལ་སྤྱིའི་ནང་བོད་དོན་རྒྱབ་སྐྱོར་བྱེད་མཁན་ཀྱི་གྲོས་ཚོགས་འཐུས་མི་གདན་འདྲེན་ཞུ་བཞིན་པ་ལྟར། འདས་པའི་ཉིན་བཅོ་ལྔ་ཉི་ཤུའི་རིང་ཉི་ཧོང་དང་ཨི་ཊ་ལི་བཅས་ཀྱི་གྲོས་ཚོགས་འཐུས་མི་ཁག་ཅིག་སྔ་ཕྱིར་གཟིགས་སྐོར་དུ་ཕེབས་ཡོད་པ་དང་། ཐེངས་འདིར་དབྱིན་ཇིའི་གྲོས་ཚོགས་འཐུས་མི་ལྔ་ཕེབས་ཡོད་སྐོར། ༢༠༠༥ ལོ་ནས་བཙན་བྱོལ་བོད་མིའི་གྲོས་ཚོགས་འཐུས་མི་དབྱིན་ཡུལ་དུ་གཟིགས་སྐོར་ལ་ཕེབས་པ་དང་། དབྱིན་ཇིའི་གྲོས་ཚོགས་འཐུས་མི་ཚུར་གཟིགས་སྐོར་དུ་ཕེབས་པའི་ལས་གཞི་མགོ་འཛུགས་གནང་སྐོར་སོགས་ངོ་སྤྲོད་གནང་བྱུང་།

དབྱིན་ཇིའི་བོད་དོན་རྒྱབ་སྐྱོར་ཚོགས་པའི་འགན་འཛིན་ཧྥེ་ལེ་པཱ་(Philippa )ལགས་ཀྱིས་བརྗོད་པ་ལྟར་ན། ཕྱོགས་གཉིས་པར་གྲོས་ཚོགས་འཐུས་མི་ཕར་འགྲོ་ཚུར་ཡོང་གི་ལས་གཞི་འདིའི་དམིགས་ཡུལ་ནི། བོད་མིའི་དམངས་གཙོ་ལ་རྒྱབ་སྐྱོར་གོང་འཕེལ་དང་། དབྱིན་ཇིའི་གྲོས་ཚོགས་འཐུས་མི་དང་བཙན་བྱོལ་བོད་མིའི་གྲོས་ཚོགས་འཐུས་མིའི་བར་ཐད་ཀར་འབྲེལ་ལམ་གོང་འཕེལ་སྲ་བརྟན་བཟོ་རྒྱུ། ཕན་ཚུན་གྱི་གྲོས་ཚོགས་ལ་རྒྱུས་ལོན་ཤེས་རྟོགས་ཡོང་ཐབས་བཅས་ལ་དམིགས་པ་ཞིག་ཡིན་འདུག་ལ། ཐེངས་འདིའི་གསར་འགོད་གསལ་བསྒྲགས་སྟེང་དབྱིན་ཇིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཧཱ་མེལ་ཊོན་(Fabian Hamilton) ལགས་ཀྱིས། “དབྱིན་གཞུང་གིས་བོད་ཐོག་འཛིན་པའི་སྲིད་ཇུས་གོང་འཕེལ་སྲ་བརྟན་ཡོང་རྒྱུ་གྲོས་ཚོགས་འཐུས་མི་གལ་ཆེན་ཆགས་ཡོད་སྟབས། དབྱིན་ཡུལ་གྲོས་ཚོགས་འཐུས་མིའི་ཁྲོད་བོད་དོན་ཤེས་རྟོགས་དང་གླེང་སློང་གི་ཁོར་ཡུག་བསྐྲུན་རྒྱུ་གལ་ཆེན་ཡིན་”ཞེས་བརྗོད་བྱུང་། ཧཱ་མེལ་ཊོན་ད་སྔ་བོད་དང་ངྷ་ས་བཅས་སུ་ཕེབས་མྱོང་ཡོད་ཅིང་། འཐུས་མི་གཞན་བཞི་བོ་ངྷ་སར་ཕེབས་པ་ཐེངས་དང་པོ་ཆགས་ཡོད་འདུག

ཕྱི་ཚེས་ ༤ ཉིན་གྲོས་ཚོགས་འཐུས་མི་རྣམས་༧གོང་ས་མཆོག་དང་མཇལ་འཕྲད་གནང་ཡོད་ཀྱང་། སྐབས་དེར་༧གོང་ས་མཆོག་གིས་བོད་རིགས་གཞོན་སྐྱེས་ཚོར་སློབ་སྦྱོང་སྤྲོད་རྒྱུ་དེ་གལ་ཆེ་ཤོས་ཡིན་སྟབས། དབྱིན་ཡུལ་ཚུད་པའི་ནུབ་ཕྱོགས་རྒྱལ་ཁབ་དག་གིས་བོད་རིགས་ཚོར་སློབ་ཡོན་སྤྲོད་རྒྱུའི་འབོད་སྐུལ་དང་། ལྷག་པར་དུ་བོད་ནང་གི་བོད་རིགས་གཞོན་སྐྱེས་ཚོར་དབྱིན་ཡུལ་གྱི་གཙུག་ལག་སློབ་གྲྭ་ཁག་ཏུ་སློབ་ཞུགས་ཀྱི་གོ་སྐབས་སྤྲོད་རྒྱུར་འབད་བརྩོན་གནང་རྒྱུ། ཁོར་ཡུག་སྲུང་སྐྱོབ་ལ་དོ་ཁུར་བྱ་རྒྱུ། དེ་བཞིན་རྒྱལ་སྤྱིའི་དབུ་ཁྲིད་ཚོ་འདོད་རྔམ་དང་དབང་ཤུགས་ཀྱི་དབང་སྒྱུར་འོག་མ་ཚུད་པར་བཟང་སྤྱོད་ཀྱི་རྩ་འཛིན་སྟེང་ལང་ཕྱོགས་བརྟན་པོ་དགོས་པ་སོགས་ཀྱི་བཀའ་སློབ་གནང་ཡོད་འདུག དབྱིན་ཇི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ(All Party Parliamentary Group for Tibet) ནི་དབྱིན་ཇིའི་ཆབ་སྲིད་ཚོགས་པ་གཙོ་བོ་གསུམ་གྱི་གྲོས་ཚོགས་འཐུས་མི་ལས་གྲུབ་ཅིང་ཕྱི་ལོ་ ༡༩༨༦ ལོར་ཚུགས་པ་ཞིག་ཡིན་འདུག ཚོགས་པ་འདིའི་ལངས་ཕྱོགས་ནི། དབྱིན་ཡུལ་གྱི་རྒྱལ་མོའི་གཞུང་ལ་གནོན་ཤུགས་སྤྲད་དེ། བཙན་བྱོལ་བོད་གཞུང་དང་རྒྱ་ནག་གཞུང་བར་འབྲེལ་མོལ་བྱེད་དུ་འཇུག་རྒྱུ། བོད་ནི་བཙན་འཛུལ་འོག་ཤོར་པའི་རྒྱལ་ཁབ་ཅིག་དང་དེའི་རང་བཙན་ནི་དབྱིན་གཞུང་ལ་འབྲེལ་པ་ཡོད་པར་ངོས་འཛིན་བྱ་དགོས་པ་བཅས་ཡིན་འདུག

གསར་འགོད་པ། བནྡེ་སྐྱབས།