༸གོང་ས་མཆོག་དང་གྲོས་ཚོགས་ཀྱི་ཐ་དད་པའི་དགོངས་ཚུལ།

འཇིགས་མེད་ཚེ་རིང་།

ཕྱི་ཟླ་ ༩ ཚེས་ ༡༦ ཉིན་རྒྱབ་གྲོས་ཚོགས་ཀྱི་བཞུགས་མོལ་ཚོགས་འདུ་ཞིག་གི་སྟེང་གྲོས་འཆར་མ་འདྲ་བ་གཉིས་ལ་ རྒྱབ་སྐྱོར་མ་ཐོབ་པའི་གནས་ཚུལ་<<བོད་ཀྱི་དུས་བབ་>>དྲ་བ་ལས་ཤེས་རྟོགས་བྱུང་། གནད་དོན་འདི་གཉིས་ནི་བཙལ་བྱོལ་བོད་མིའི་ཁྲོད་གྲགས་འགུལ་ཅུང་ཆེ་བའི་གཞུང་གི་མིང་དང་། བཀའ་བློན་ཁྲི་བའི་མིང་གི་འདོག་ཐད་ཀྱི་གནད་དོན་ཞིག་རེད། གཞུང་གི་མཚན་གནས་ཐད་ཀྱི་འགྱུར་བ་འདི་ནི་ཁྲིམས་མཐུན་གྱི་དགོས་མཁོ་ལ་བརྟེན་ནས་འགྱུར་བ་སོང་བ་ཞིག་དང་། གཞུང་གི་སྤྱི་འབྲེལ་ (Public Relations ) ཐད་སྲུང་སྐྱོབ་ཀྱི་ལས་འགུལ་གང་ཡིན་ཡང་ང་ལ་དེའི་གནས་ལུགས་ཞིབ་བརྗོད་བྱེད་ཐུབ་པའི་རྗེས་དཔག་གི་གཏན་ཚིགས་ཅི་ཡང་མེད་པར་བརྩེ་དུང་གིས་ཉར་བའི་མཚན་གནས་ཤིག་འགྱུར་བ་ཐེབས་པ་དེ་ལྟར་ལགས་ཟེར་ཀྱང་མ་ཆོག་པ་མེད། 

འོན་ཀྱང་།  མཚན་གནས་བརྗེ་འགྱུར་གྱི་རིམ་པའི་ནང་དུ་ངའི་ཚོར་སྣང་ལ་སྔ་མོའི་བོད་ཀྱི་ཆབ་སྲིད་པའི་སྤྱོད་ཚུལ་དྲངས་པ་དེ་ནི་བོད་ཀྱི་རིག་གཞུང་གི་གནད་དོན་ཞིག་ཡིན་ཡང་སྲིད། གང་ལྟར་དེ་སྔ་དགའ་ལྡན་ཕོ་བྲང་གི་ཆེ་དྲག་ཁྲོད་དུ་ལས་དོན་བསྐོར་འཕེན་གྱི་གཤིས་ཀ་ཧ་ཅང་གཏིང་ཟབ་ཏུ་ཡོད་ཅིང་། ལས་དོན་གནང་སྟངས་འདི་སྐབས་དེའི་ཆབ་སྲིད་པའི “ དམིགས་གཏད ” འགྲུབ་ཐབས་ཀྱི་ཐབས་ལམ་མཆོག་ཏུ་གྱུར་བ་ཞིག་ཀྱང་ཡིན།  འདིའི་ཐད་རྒྱུ་མཚན་གཉིས་ཡོད་པའི་དང་པོ།  སྐབས་དེའི་མི་སྒེར་གྱི་སྤྱི་འབྲེལ་ནུས་པར་ཚད་མཇལ་ཏེ་ལས་དོན་བྱེད་པ་དང་།  གཉིས་པ། སྐབས་དེའི་ཆབ་སྲིད་པའི་ལས་དོན་སྤྱི་དམངས་ལ་ལྟོས་མེད་ཡིན་པས་ཡིན། དེ་ལྟ་བུའི་རྒྱུ་རྐྱེན་འོག་ཁུ་སིམ་སིམ་གྱིས་ལས་དོན་གྱི་མཇུག་འབྲས་ཐག་གཅོད་གནང་ཐུབ་པ་ནི་དེང་གི་བོད་ཀྱི་ཆབ་སྲིད་ཀྱི་འགྱུར་བ་འདིའི་ཁྲོད་འོས་འཚམས་མིན་ཡང་། མགོ་ཁྲིད་ཀྱི་དམིགས་གསལ་ནུས་པས་ཁ་ཕྱོགས་ཤིག་ཏུ་ཁྲིད་ཐུབ་པའང་ངོ་མཚར་ཆེ་བ་ཞིག་ཡིན་ཆོག

 དེ་ཡིན་ཡང་། ཚེས་ ༡༦ ཉིན་གྱི་བཀའ་ཁྲིའི་མཚན་གནས་ཀྱི་གནད་དོན་ནི་གཞན་ཞིག་སྟེ་བཀའ་བློན་ཁྲི་བའི་མཚན་གནས་ཀྱི་གནད་དོན་ཙམ་ལས་བརྒལ་ཏེ་ལོ་རྒྱུས་ལྡན་པའི་བོད་ཀྱི་སྲིད་དབང་གི་གནད་དོན་ལ་ཐུག་ཡོད་པ་རེད། གྲོས་ཚོགས་ཀྱི་བཞུགས་མོལ་ཚོགས་འདུའི་སྐབས་ཀྱི་བགྲོ་གླེང་གནས་ཚུལ་སྤྱི་འཐུས་རྨོག་རུ་བསྟན་པས་ངོ་སྤྲོད་གནང་བ་ལྟར་ན། བཀའ་བློན་ཁྲི་པ་སྲིད་སྐྱོང་གི་མཚན་གནས་ཐོག་བདམས་མེད་པ་ནི་ཐེངས་འདིའི་བཀའ་ཁྲིའི་མཚན་གནས་བརྗེ་བསྒྱུར་ཐད་ཀྱི་འགོག་རྐྱེན་ཆེ་ཤོས་ཆགས་ཡོད་པ་དང་། རྒྱུ་མཚན་གཞན་དེ་ནི་སྔ་མོའི་ལོ་རྒྱུས་ལ་རྒྱུས་མེད་ཀྱི་གནས་ཚུལ་ཞིག་ཡིན་པས་དོ་སྣང་བྱེད་རན་མེད་པ་རེད།  གཅིག་བྱས་ན་ཐེངས་འདིའི་བཞུགས་མོལ་ཚོགས་འདུའི་སྐབས་ཀྱི་བཀའ་ཁྲིའི་མཚན་བརྗེ་ཐད་ཀྱི་དགོངས་ཚུལ་འདི་འཕྱི་དྲགས་ཡོད་སྲིད། དེ་སྔ་བཀའ་བློན་ཁྲི་པའི་འོས་བསྡུ་ཆེན་མོའི་སྐབས་སུ་མི་མང་གིས་བདམས་པའི་བཀའ་བློན་ཁྲི་པའི་འགན་དབང་ནི་བཅའ་ཁྲིམས་ལས “ གོང་ས་ ༸སྐྱབས་མགོན་ཆེན་པོའི་དབུ་ཁྲིད་འོག་གཞུང་གི་ཆབ་སྲིད་ཀྱི་ལས་དོན་འགན་ཁུར་རྐང་ལེན་བྱེད་པོ་བཀའ་ཤག་ལྷན་ཚོགས་དང་། དེའི་མགོ་འདོམས་བཀའ་བློན་ཁྲི་པ་ཞིག་དགོས་པ་ཡིན ” ཞེས་འཁོད་ཡོད་པ་འདི་ཡིན་ཞིང་། ཚིག་བརྗོད་འདི་གཞི་ལ་བཞག་ནས་འོས་ཐོན་བྱུང་བའི་བཀའ་བློན་ཁྲི་པར་སྒྲིག་འཛུགས་ཀྱི་འགན་འཛིན་དབང་ཆ་རྩིས་སྤྲོད་གནང་བ་ཧེ་བག་ཆེན་པོ་མིན་པས་རྒྱུ་མཚན་ཁག་པོ་ཡིན། གྲོས་ཚོགས་ཀྱིས་ཐག་གཅོད་ནི་དབང་ཚད་ལྡན་པའི་ཐག་གཅོད་དུ་སོང་བས་ལས་སླ་བོར་འགྱུར་བ་འགྲོ་མི་ཐུབ་པའང་རྒྱུན་ལྡན་ཞིག་ཡིན་མོད།  ངས་སྐད་ཆ་འདི་རྗེས་ལུས་ཐེབས་པ་དང་ནུས་པ་ལྡན་མིན་ལ་མ་བལྟས་པར་བཤད་འདོད།

༸གོང་ས་མཆོག་གིས་སྲིད་སྐྱོང་སྟག་བྲག་ནས་བརྒྱུད་པའི་སྲིད་དབང་མི་མང་གིས་འོས་འདེམས་བྱས་པའི་བཀའ་བློན་ཁྲི་བར་གསོལ་བསྩལ་གནང་བ་གྲོས་ཚོགས་ཀྱིས་བཀག་ཡོད་པ་འདི་གླེང་དགོས་པ་ཞིག་རེད། འདིའི་ཐད་རྒྱུ་མཚན་གཉིས་ལ་བསམ་བློ་བཏང་ཆོག་པ་སྟེ་དང་པོ། ༸གོང་ས་མཆོག་གི་ལ་བཅའ་ཁྲིམས་ལས་གནང་བའི “ བླ་ན་མེད་པའི་དབུ་ཁྲིད ” ཀྱི་མཚན་གནས་ཕུལ་ཡོད་པ་རྒྱལ་ཁབ་བམ་སྒྲིག་འཛུགས་ཀྱི་འགན་འཛིན་ལ་ངོས་འཛིན་བྱེད་པ་དང་། གཉིས་པ།  དབུས་བོད་མིའི་སྒྲིག་འཛུགས་འདི་ཉིད་བོད་གཞུང་དགའ་ལྡན་ཕོ་བྲང་གི་རྒྱུན་མཐུད་གཞུང་ལ་ངོས་འཛིན་མ་གནང་བའི་གནད་དོན་འདི་གཉིས་རེད།  ང་ཚོས་ཤེས་གསལ་ལྟར་ན་དེ་གཉིས་ཀྱི་གང་ ལའང་ཁ་གསལ་གྱི་ཡིག་ཆ་མེད་པ་མ་ཟད་བཅའ་ཁྲིམས་ལས་སྒྲིག་འཛུགས་ཀྱི་འགན་འཛིན་དབང་ཆ་བཀའ་བློན་ ཁྲི་པར་ཡོད་པ་ངོས་ལེན་བྱས་ཡོད་པ་དང་།  མགོ་ཁྲིད་ཀྱི་གཏམ་བཤད་ནང་དུ་བོད་གཞུང་དགའ་ལྡན་ཕོ་བྲང་གི་རྒྱུན་མ་ཉམས་པར་བོད་མིའི་སྒྲིག་འཛུགས་སུ་སིམ་ཡོད་པ་བསྟན་ཡོད། དེ་སྔ་བོད་རྒྱལ་ཁབ་ཀྱི་འཛིན་སྐྱོང་སྒྲོམ་གཞི་ལྟར་ན་༸གོང་ས་མཆོག་སྐུ་འཚོ་བཞུགས་མིན་པའི་སྐབས་སུ་རྒྱལ་ཚབ་དང་སྐུ་ན་སོན་རྗེས་ཆོས་སྲིད་ཀྱི་ཐུགས་འགན་མ་བཞེས་པར་དུ་སྲིད་སྐྱོང་གིས་བོད་ཀྱི་ཆབ་སྲིད་སྐྱོང་བཞིན་ཡོད་པས་སྲིད་སྐྱོང་གི་མཚན་གནས་འདི་བོད་ལ་མཚོན་ན་རྩ་དོན་གྱི་ཟབ་སར་ཡོད་པ་ཞིག་རེད། དེའི་རྐྱེན་གྱིས་ངོ་བོ་རིམ་འགྱུར་གྱི་སྲིད་སྐྱོང་དབང་ཆ་འདི་༸གོང་ས་མཆོག་གིས་མི་མང་གིས་འོས་འདེམས་ཞུས་པའི་སྒྲིག་འཛུགས་ཀྱི་འགན་འཛིན་ལ་གནང་ཡང་གྲོས་ཚོགས་ཀྱིས་སྐབས་བཅུ་བཞི་བའི་བོད་མིའི་སྒྲིག་འཛུགས་ཀྱི་འགན་འཛིན་ལ་མཚན་གནས་འདི་མ་ཕུལ་བར “ དབྱིངས་འཇོག ” བྱས་ཡོད།

གྲོས་ཚོགས་ཀྱིས་ཅིའི་ཕྱིར་འདི་ལྟ་བུའི་ཐ་དད་པའི་ལངས་ཕྱོགས་བཟུང་ཡོད་པའི་ཐད་ཡང་བསྐྱར་བསམ་གཞིགས་བྱེད་པའི་དགོས་པ་ཧ་ཅང་ཆེ་ཞིང་།  རྒྱལ་ཡོངས་ཚོགས་ཆེན་ཐེངས་གཉིས་པའི་སྐབས་༸གོང་ས་མཆོག་གིས་ཞལ་དྲོན་མོ་ནས་གསུངས་པའི “ གངས་ལྗོངས་རང་དབང་མང་གཙོའི་སྒྲིག་འཛུགས ” ཞེས་པ་དེའང་སྐུ་སྒེར་ཡིག་ཚང་གི་ལས་ཤོག་སྟེང་འགྱུར་བ་ཐེབས་པའི་གནས་སྟངས་དེའི་རྗེས་སུ “ བོད་མིའི་སྒྲིག་འཛུགས “ ཞེས་པ་འདི་གྲོས་ཚོགས་ཀྱིས་༸གོང་ས་མཆོག་གི་བཀའ་མངགས་སུ་བསྐྱལ་བཞིན་པའིསྣང་ཚུལ་ཡོད་པ་རྩོམ་ཡིག་ཅིག་ཏུ་གསལ་འདོན་ཞུས་འདུག  སྲིད་སྐྱོང་གི་མཚན་གནས་ལ་འདི་ལྟ་བུའི་ཉེན་ཁ་འབྱུང་མི་སྲིད་པར་སྙམ་ནའང་།  གྲོས་ཚོགས་ཀྱིས་འགལ་ཟླ་འདི་ཁས་ལེན་མི་བྱེད་པ་ཧ་ཅང་གསལ་བོ་ཡིན།  ཁས་ལེན་བྱས་མིན་ལ་མ་ལྟོས་པར་༸གོང་ས་མཆོག་གིས་གནང་བ་དེ་གྲོས་ཚོགས་ཀྱིས་བཀག་ཡོད་པ་འདི་འགལ་ཟླ་ཞིག་ཏུ་ངོས་འཛིན་མི་བྱེད་ཐབས་མེད་ཡིན་པ་མ་ཟད།   གྲོས་ཚོགས་ཀྱི་འགོག་དགོས་པའི་ཐད་ཀྱི་རྒྱུ་མཚན་དེ་གཉིས་ཀྱང་ཡ་མཚན་པ་ཞིག་ཡིན།

ང་ཚོ་སུས་ཀྱང་གྲོས་ཚོགས་ཀྱི་ཆེ་མཐོང་དེ་རང་ཉིད་ཀྱི་ལ་རྒྱ་ཡིན་པ་ཁས་ལེན་ཐུབ་པ་མ་ཟད། དེའི་གཟི་བརྗིད་ ཀྱིས་མི་དམངས་ཀྱི་མངོན་འདོད་འཁྱེར་བཞིན་པ་ལ་བརྩི་བཀུར་ཡང་བྱེད་འོས། འོན་ཀྱང་། བླ་ན་མེད་པའི་དབུ་ཁྲིད་ཀྱིས་གནང་བའི་མཚན་གནས་འདི་ལྗིད་ཁོག་མེད་པའི་གཏན་ཚིགས་འདི་ལྟ་བུས་བཀག་པ་ཡིན་ན། དེ་ནི་དང་ལེན་དཀའ་བ་ཞིག་ཡིན་པ་མ་ཟད། བོད་གཞུང་དགའ་ལྡན་ཕོ་བྲང་ནས་བརྒྱུད་པའི་མཚན་གནས་འདི “ དབྱིངས་འཇོག ” བྱས་ཏེ་ནུས་ཤུགས་ལྡན་པའི་མཚན་གནས་སུ་འགྱུར་བར་བཀག་འགོག་བྱས་པ་ཅིའི་ཕྱིར་ཡིན་ནམ་ཞེས་དོགས་པ་ཡོང་ངེས།  དབྱིངས་འཇོག་གི་གནད་དོན་འདིས་ང་ཚོར་ཕོག་པའི་གྱོང་གུད་ནི་རྒྱ་ནག་པར་གོང་མའི་རྒྱུད་པ་གར་སོང་ཆ་མེད་དུ་གྱུར་ཏེ་རྒྱལ་ཁབ་རྙིང་བའི་ངོ་སོའི་མཚོན་རྟགས་མེད་པར་གྱུར་བ་ལས་ཀྱང་ཚབས་ཆེ་བ་ཡོད་པ་དང་། ལྷག་པར་ཏུ།  བོད་མིའི་སྒྲིག་འཛུགས་ཀྱི་མ་འོངས་པ་ནི་མི་མང་གི་ངོས་ལེན་གཅིག་བུར་བརྟེན་པ་ལས་ལོ་རྒྱུས་ཀྱི་རྒྱུན་མཐུད་གཞུང་གི་ངོ་བོ་དང་ཁ་བྲལ་ཏེ། བོད་ཀྱི་འཐབ་རྩོད་ལ་བརྟན་བརླིང་མེད་པའི་བྱུང་རབས་ཀྱི་དཀྱོགས་མཚམས་ཤིག་འཇོག་སྲིད།