ཆིག་སྒྲིལ་གྱི་སེམས་པ། གཅིག་གྱུར་གྱི་ངོ་རྒོལ། བདེན་དོན་གྱི་གཟི་བརྗིད། རྒྱལ་ཁ་ཡི་རེ་བ།
ཆབ་བྲག་ཕོ་ཉ།
ལོ་རྒྱུས་ཀྱི་གོད་ཆག་ཅི་འདྲ་ཞིག་བྱུང་བ་ལ་མ་ལྟོས་པར་མགོ་ནག་རྩམ་གཟན་ནམ་གདོང་དམར་བོད་པ་ཚང་གི་བུ་རབས་ཚ་རྒྱུད་དག་གིས་མི་རིགས་ཤིག་གི་ལར་ཞེན་དང་རིག་གཞུང་ཞིག་གི་སྤོབས་པ། བདེན་དོན་ཞིག་གི་སྙིང་སྟོབས་དང། ཡིད་ཆེས་ཤིག་གི་རེ་སྨོན་བཅས་ལ་བརྟེན་ནས་འཕག་འཚག་རྒྱུན་མར་བྱས་ཏེ་འགྱེལ་ས་ནས་ལངས་པར་ལན་དགུ་ཆད་དུ་འབད་ཡོད་ལ་གྲུབ་འབྲས་ཀྱང་ཆེན་པོ་བླངས་ཡོད། མ་མཐར་ཡང་ངས་བལྟས་ན་གཉིད་ལས་སད་དང་སད་བཞིན་པ་རེད། ད་དུང་མང་པོ་ཞིག་གིས་རེ་བ་ཆེ་ས་ཞིག་ལ་དམིགས་ཏེ་བློས་གཏོང་ཡང་ཆེན་པོ་ཞིག་གི་མགོ་ཚུགས་ཡོད། འདི་ནི་ཚེ་སྲོག་ཅིག་གི་ངོས་ནས་བལྟས་ན་ཡ་ང་བ་དང་སྙིང་རྗེ་བ་ཕངས་སེམས་ཆེ་བ་ཞིག་ཡིན་པར་མ་ཟད། ཆེས་གཟི་བརྗིད་དང་རླབས་ཆེན་ཞིག་ཀྱང་ཅི་ལ་མིན། ལྷག་པར་དུ་རང་རིགས་ལ་མཚོན་ན་དྲན་སྐུལ་ཟབ་མོ་ཞིག་དང་དགྲ་ཕྱོགས་ལ་མཚོན་ན་ངོ་རྒོལ་མཐུ་ཆེན་ཞིག་ཡིན་ངེས་པས། གངས་ཅན་པ་ཞེས་པ་དང་གདོང་དམར་བོད་པ་ཞེས་པ། ཆོས་ལྡན་བོད་མི་ཞེས་པ། འཚེ་མེད་ཞི་བ། བདེན་པའི་ཨུ་ཚུགས་ཟེར་བའི་ཁྱད་ཆོས་ཚང་མ་ཕྱོགས་བསྡུས་ཀྱིས་མཚོན་པའི་རྒྱ་མཚོའི་རླབས་དང་རླུང་གི་ཤུགས་བཞིན་བཟློག་ཏུ་མེད་ལ་ཡལ་དུ་མེད་པའི་ལས་འགུལ་ཞིག་ཏུ་འགྱུར་བཞིན་ཡོད།
སྤྱིར་ཡིན་ན་དཔའ་རྟུལ་ཁོང་རྣམས་པས་ཀྱང་དྲག་པོའི་ཐབས་རྩལ་ཅི་རིགས་ལ་བརྟེན་ནས་དགྲ་ཕྱོགས་ལ་འཇིགས་སྣང་དང་ཆག་སྒོ་དུ་མ་ཞིག་འབྱུང་འཇུག་ཐུབ་རྒྱུར་ཐེ་ཚོམ་སྤུ་ཙམ་མེད་ན་ཡང། འདི་ལྟར་གཞན་ལ་འཚེ་བ་དོར་ནས་རང་ལ་འཚེ་བའི་སྤྱོད་ཚུལ་ཐུན་མོང་མ་ཡིན་པ་འདི་ནི་འཛམ་གླིང་ཞི་བདེའི་དེད་དཔོན་ཆེན་པོ་གང་གི་རླབས་ཆེའི་དགོངས་དོན་ལ་དད་འདུན་གུས་བརྩི་གནང་ནས་བོད་ཀྱི་བསྟན་པ་ཆབ་སྲིད་དང་བཅས་པའི་སླད་དུ་ཡིན་པར་ཐག་གཅོད་ཐུབ་པ་ཞིག་རེད།
བདེན་པའི་སྟོབས་དང་ཞི་བའི་ཐབས་ཀྱི་རྒྱལ་ཐབས་དེ་ཡང་ཆིག་སྒྲིལ་གྱི་བསམ་བློའི་ནུས་པ་ཞིག་གིས་རྨང་གཞི་བྱས་ཏེ་གཅིག་གྱུར་གྱི་ལས་འགུལ་ཞིག་གིས་གཡོ་འགུལ་བསླངས་ན། ད་གཟོད་བདེན་པའི་གཟི་བརྗིད་ཅིག་གིས་རྒྱལ་ཁའི་རེ་བ་ཞིག་མཐོང་བར་འགྱུར་རྒྱུར་བདག་ནི་ཡིད་ཆེས་ཟབ་མོ་ཡོད། དེ་ཡང་་རྒྱལ་སྤྱིའི་རྒྱབ་སྐྱོར་དང་རྒྱལ་ནང་གི་རུལ་སུངས་དང་ངོ་རྒོལ་ཅི་རིགས་ཀྱིས་པེ་ཅིང་གཞུང་གི་རྒྱལ་སྲིད་ནི་ཡུན་རིང་བརྟན་དཀའ་ལ་གུང་ཁྲན་ཏང་གི་ཚེ་སྲོག་ཀྱང་ལོ་བརྒྱ་ལས་གནས་དཀའ་བའི་གནས་སྟངས་ཤིག་ཆགས་ཀྱིན་ཡོད་པས། བོད་དང་ཡུ་གུར། སོག་པོ་དང་རྒྱ་ནག་དམངས་གཙོ་པ་བཅས་པས་རང་གི་མི་རིགས་ཀྱི་ཚེ་སྲོག་སྲུང་སྐྱོབ་ཀྱི་གོ་སྐབས་དམ་འཛིན་གྱིས་མཚམས་མི་འཆད་པའི་ལས་འགུལ་ཅི་རིགས་མཉམ་སྤེལ་གྱི་མཛུབ་མོ་ལྔ་བཅངས་ནི་་སྲིད་དོན་གྱི་དམག་འཐབ་གལ་ཆེན་ཞིག་ཏུ་ཚོར།
རྒྱུ་མཚན་དེས་ན་བདག་གིས་འདིར་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚབ་བྱས་ཏེ་བཀུར་འོས་དཔལ་ལྡན་བོད་མིའི་སྒྲིག་འཛུགས་ཀྱིས་གཙོས་ཚོགས་སྡེ་སྤྱི་དངབྱེ་བྲག་བོད་མི་ཡོངས་ལ་གཞེན་སྐུལ་འགའ་ཞིགཞུ་རྒྱུ་ལགས་ན་ཅིས་ཀྱང་དགོངས་བཞེས་གནང་རྒྱུ་མཁྱེན་མཁྱེན།
ཀ༽ ཡུ་གུར་དང་སོག་པོ། རྒྱ་རིགས་སོགས་དམངས་གཙོ་དོན་གཉེར་ཅན་ཚང་མར་འབོད་སྐུལ་གྱིས་རྒྱལ་ཁབ་གང་རུང་ཞིག་ཏུ་མི་རིགས་སྐྱིད་སྡུག་མཉམ་མྱོང་གི་ཚོགས་ཆེན་ཞིག་བསྐོངས་ནས་མི་རིགས་མནའ་འབྲེལ་གྱི་ཚོགས་པ་ཆེན་པོ་ཞིག་བཙུགས་ནས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་མཉམ་སྤེལ་གང་མང་བྱེད་རྒྱུ། (བོད་མིའི་སྒྲིག་འཛུགས་ཀྱི་ཕྱི་དྲིལ་བློན་ཆེན་གྱིས་གཙོ་འགན་གནང་འོས་སྙམ)
ཁ༽ གཅིག་གྱུར་གྱི་ངོ་རྒོལ། འདི་ལ་གཅིག་ནས་གོང་གསལ་མི་རིགས་སྐྱིད་སྡུག་མཉམ་མྱོང་གི་མཉམ་འབྲེལ་ལས་གཞི་དག་གི་འཆར་གཞི་གཏན་འབེབས་བྱ་རྒྱུ་དང། གཉིས་ནས་བཙན་བྱོལ་བོད་མི་ཡོད་དོ་ཅོག་གི་སྐབས་བསྟུན་ངོ་རྒོལ་དུས་གཅིག་གམ་རྣམ་འགྱུར་ལྷན་སྤུངས་ཀྱི་ཐབས་ཚུལ་ཏེ། དཔེར་ན། ངོ་དེབ་དང་གནམ་ཡིག་སོགས་ཀྱི་པར་རིས་ལ་མཆོད་མེ་ལྟ་བུ་གཅིག་གྱུར་བཞག་ནས་མྱ་ངན་དང་གུས་འདུད་མཚོན་པ་དང། ཡང་ན་བདེན་པ་ཉིད་རྣམ་པར་རྒྱལ་གྱུར་ཅིག་ཅེས་པའི་ཁ གཡང་གཅིག་གྱུར། སྦྱར་རྒྱུ་དང་འདོགས་རྒྱུ་ལ་སོགས་པ་བཟོ་བ། ཡང་ན་ཉིན་གཅིག་དུས་གཅིག་ལ་དཔའ་བོར་གུས་འདུད་དང་མྱ་ངན་གྱི་ངག་བཅད་ཞུ་བ་དང། ཉིན་གཅིག་ལ་སྙུང་གནས་སྲུང་བ། དུས་གཅིག་ལ་མཆོད་མེ་སྦོར་བ། གསོལ་བ་སྨོན་ལམ་འདེབས་པ་ལ་སོགས་པ། དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱིས་ཐུགས་འགན་བཞེས་ཏེ་དུས་ནས་དུས་སུ་གསར་འགོད་གསལ་བསྒྲགས་དང་བཅས་ཏེ་གསལ་བརྡ་གནང་ན་དོན་ཕན་འབྱུང་ངེས་སྙམ།
ག༽ ཡིད་བཞིན་ནོར་བུའི་ཐབས་མཁས་ཐུགས་རྗེའི་གཟིགས་སྐྱོང་འོག་བོད་ཆོལ་ཁ་གསུམ་པོའི་ཆིག་སྒྲིལ་གྱི་སེམས་པ་སྔར་བྱུང་མ་མྱོང་བ་ཞིག་འབྱུང་བཞིན་པ་འདི་ང་ཚོའི་རྒྱལ་ཁའི་གཞི་རྩ་ཡིན་པས། དམ་ཚིག་གཙང་མ་མི་ཉམས་གོང་སྤེལ་ཆེད་དུ་དུས་འཁོར་དབང་ཆེན་སྐབས་སུ་བོད་མི་ཡོངས་ཀྱིས་མནའ་གན་ཆེན་པོ་ཞིག་ངེས་པར་འཇོག་གལ་ཆེ་བར་མཐོང། དེ་ཡང་སྔོན་གཤེགས་དཔའ་བོ་རྣམས་ལ་རྗེས་དྲན་དང་ལྷན་མ་འོངས་རྗེས་རབས་རྣམས་ལ་དྲན་གསོའི་རྟེན་དུ་མནའ་གན་རྡོ་རིང་ཆེན་མོ་ཞིག་བཞེངས་ཐུབ་ན་ལེགས། (འདི་ལ་ཆོལ་གསུམ་དབུས་སྤྱི་ཁྱབ་ཁང་དང་གཞོན་ནུ་ཚོགས་པ་དང་བུད་མེད་ཚོགས་པ་རྣམ་པས་དབུ་ཁྲིད་དེ་གཞུང་འབྲེལ་མ་ཡིན་པའི་ཚོགས་པ་ཆེ་ཆུང་ཚང་མ་མཉམ་འབྲེལ་གྱིས་ནུས་པ་འདོན་ཐབས་ཀྱི་ལས་འགུལ་སྤེལ་འོས)
ང༽ བོད་ཀྱི་ཆོས་ལུགས་དང་ཆོས་བརྒྱུད་ཁག་ཡོད་དོ་ཅོག་ལྷན་བཞུགས་ཀྱིས་ལོ་རེ་བཞིན་དུ་བོད་དོན་བདེན་མཐའ་མྱུར་གསལ་ལ་གསོལ་བ་སྨོན་ལམ་འདེབས་རྒྱུ། (ཆོས་དོན་ལས་ཁུངས་ཀྱིས་ཐུགས་འགན་རྐང་ལེན་གནང་འོས་སྙམ།)
ཅ༽ སྔོན་གཤེགས་དཔའ་བོ་རྣམས་ལ་བསྔོ་སྨོན་དང་ཤུལ་ལུས་ནང་མིའི་འཚོ་སྣོན་སོགས་ཀྱི་ཆེད་དུ་ལོ་རེ་བཞིན་དུ་བཙན་བྱོལ་བོད་མི་ཡོད་དོ་ཅོག་ནས་དང་བླང་ཞལ་འདེབས་འབུལ་རྒྱུ། (བདེ་སྲུང་ལས་ཁུངས་ནས་ཐུགས་འགན་གནང་འོས་སྙམ)
ཞོར་དུ། ཁ་སང་ནས་ངོ་དེབ་དང་གནམ་ཡིག་དག་གི་ནང་ལ་མཆོད་མེའི་པར་རིས་བཞག་ནས་བོད་ནང་གི་རང་སྲོག་བློས་གཏོང་གི་རྒྱལ་གཅེས་པ་རྣམ་པར་གུས་འདུད་དང་མྱ་ངན་ཞུ་བའི་མཚོན་རྟགས་ཤིག་སྤེལ་བཞིན་པ་འདི་ངོ་དེབ་དང་གནམ་ཡིག་ཡོད་པའི་བོད་མི་ཡོད་དོ་ཅོག་ནས་ཁྱབ་སྤེལ་གནང་རྒྱུའི་རེ་སྐུལ་དང་བཅས།
པེན་བོད་ཀྱི་རྩོམ་པ་པོའི་མཐུན་ཚོགས་ཚོགས་གཙོ་ཆབ་བྲག་ལྷ་མོ་སྐྱབས་ཀྱིས་ཧྥ་རན་སིའི་རྒྱལ་ས་དཔལ་རིས་ནས་༢༠༡༡་༡༠་༩་ཞོགས་པའི་ཆུ་ཚོད་གཉིས་པར་གུས་ཕུལ།
ཅ༽ ཁྱོད་ཀྱིས་མ་གཞི་ནས་ལས་དོན་ཅང་སྒྲུབ་རྩིས་མེད་པ་འདྲ། མ་དངུལ་བསྡུས་ན་མ་འགྲིགས་པ་ཅི་ཡང་མེད། འདས་ཟིན་པ་མང་པོར་ཁ་གསབ་བྱེད་མ་ཐུབ་ན་ཡང་ཡོང་བཞིན་པ་དག་ལ་གང་ལ་གང་འཚམ་གྱི་རོགས་རེ་ཐུབ་ན་ཡང་བཟང་ག ཀུན་ལ་ཆ་སྙོམ་གྱིས་གྲྭ་བ་ཚོར་འགྱེད་རྒྱག་རྒྱག་རང་ད་བྱེད་དགོས་གི་མ་རེད། འདིའི་ཐད་ལ་གཞུང་གིས་སྟངས་འཛིན་འོག་ཕྱི་རྒྱལ་རོགས་ཚོགས་ཁག་ལ་མཉམ་འབྲེལ་གནང་ན་བོད་ནང་ལ་འབྲེལ་བ་བྱེད་ཐུབ་ངེས་རེད། དེང་སང་འཛམ་གླིང་ཆུང་བས་ཐབས་ཤེས་མང་ནི་རེད། གཞི་རྩའི་བོད་མི་ཚང་མས་ལོ་རེར་དང་བླང་ཞལ་འདེབས་འབུལ་རྒྱུར་ཆབ་སྲིད་དང་མི་རིགས་ཀྱི་ཆིག་སྒྲིལ་གཉིས་ཐད་ནས་དོན་སྙོིང་ལྡན་ཡོད། དེའི་ཐོག་ལ་ཐབས་ཤེས་ཀྱིས་མ་དངུལ་ཇོ་མང་གཏོང་ཐབས་ལ་ཐབས་ཤེས་ཅི་ཡང་བྱེད་ཆོག་ད་ཆོག དོན་ཚན་འདི་དག་བསྡེབས་གཅིག་ཏུ་བཀོད་ན་མང་འགྲོ་བས་ཚན་པ་རེ་རེ་བཏང་བ་ཡིན། ཨ་བཱེ་ར་་མཚན་འདི་དག་བཏགས་རྗེས་མི་རང་ག་ཞིག་བྱེད་མི་འོས་པས་་་་ད་དུང་བསམ་ཚུལ་ཡོད་ན་འབྲི་རོགས། བཀའ་དྲིན་ཆེ།
ང༽ དེ་ལ་ཁག་མེད། ནང་ཆོས་ཀྱི་གོ་རྟོགས་དམའ་བས་ཡིན་རྒྱུ་རེད། ཡང་ན་དད་པ་མེད་པས་་་་་བསྔོ་བ་དང་སྨོན་ལམ་ཟེར་བ་འདི་དག་ནང་པའི་ཆོས་ཀྱི་རྟེན་ཅིང་འབྲེལ་འབྱུང་གི་ངོས་ཀྱང་ཧ་ཅང་གལ་ཆེ་ཚུལ་་་་་ད་གཡུག་ཞོག་གོ་རྒྱུ་མ་རེད།།
ག༽་གཞི་རྩའི་ཆིག་སྒྲིལ་གྱི་རྨང་གཞི་ཞིག་མེད་ན་མནའ་གན་ཞིག་འཇོག་ཐབས་མེད་པ་རེད། སྔོན་ཆད་ཀྱི་གནས་སྟངས་ལས་དེང་སང་ལྡབ་དུ་མས་ཆིག་སྒྲིལ་ཡག་པོ་ཆགས་ཡོད། ད་དུང་མ་འདང་ས་དང་ཉམས་ཆག་འགྲོ་བཞིན་པ་དང་འགྲོ་ཉེན་ཡོད་པ་མི་ཉུང་བ་ཞིག་ཡོད། དེ་བས་རང་སྐྱོན་ཁས་ལེན་དང་ལྷན་དུ་མ་འོངས་པར་བསམ་པ་སྔར་ལས་ཆིག་སྒྲིལ་དང་ནུས་པ་སྔར་ལས་ཆིག་སྒྲིལ་ཡོང་བ་བྱ་རྒྱུར་མནའ་གན་རྡོ་རིང་བཞེངས་ན་ཕན་ལས་གནོད་པ་ཅི། དཔེར་ན་ཁྱེད་རང་དང་མི་ཞིག་ངོ་ཤེས་རེད་ཡང་ན་གྲོགས་པོ་རེད། ཁྱེད་གཉིས་ཀྱིས་རྨང་གཞི་དེའི་ཐོག་ནས་མནའ་བཅད་གྲོགས་པོའམ་སྤུན་ཞིག་བསྒྲིགས་ན་དེ་ཇེ་བཟང་ལ་འགྲོ་བར་ཕན་ནམ་ཇེ་ངན་འགྲོ་བར་ཕན། རང་བཞིན་གཅིག་པ་རེད།
ཁ༽བོད་པ་ནང་ཁུལ་ལ་དྲིལ་བསྒྲགས་བྱེད་དགོས་པའི་དོན་མ་རེད། གཅིག་གྱུར་གྱི་ངོ་རྒོལ་གྱི་རྣམ་འགྱུར་འདི་ཤུགས་ཆེ་བ་ཡོད། ང་ཚོའི་ལས་དོན་ཚང་མ་དྲིལ་སྒྲོག་རང་གི་ཆེད་དུ་མིན་པ་ཧ་གོ་དགོས། ། གཉིས་་ནས་བོད་མི་སྤྱི་དང་ལྷག་པར་བོད་ནང་ལ་སེམས་ཤུགས་ཆེར་སྐྱེད་ལ་ཕན་ཐོགས་ཡོད། གསུམ་ནས་གཅིག་གྱུར་གྱུ་ངོ་རྒོལ་དེ་ཕྱི་ནང་ཚང་མས་མཐོང་སླ་བ་དང་ཚོར་སྣང་ཡང་དམིགས་བསལ་བ་སྐྱེ་འཇུག་ཐུབ་པ་ཞིག་ཡིན
ཨ་བཱེ་ར་ལགས། ཀ༽ འདི་རིགས་ཚང་མས་རྒྱ་ནག་གཞུང་ལ་ངོ་རྒོལ་གྱི་རྣམ་པ་ཅུང་མི་འདྲ་ཙམ་ལས་གུང་ཁྲན་ཏང་གི་དམངས་གཙོ་གཅིག་སྡུད་ལམ་ལུགས་ལ་དགའ་བོ་མེད་པར་དམངས་གཙོ་ངོ་མ་ཞིག་ཆགས་རྒྱུ་དེ་ཚང་མའི་དམིགས་ཡུལ་ཡིན། དེའི་འོག་ནས་མི་རིགས་སོ་སོའི་བྱེ་བྲག་གི་མདོན་འདོད་དང་རེ་བ་འགའ་རེ་འཇོག་ཆོག ལས་དོན་སྤེལ་དུས་ཀྱང་གཅིག་གཅིག་ལ་རྒྱབ་སྐྱོར་གྱིས་མཉམ་ཞུགས་བྱེད་དགོས། དཔེར་ན་མི་རིགས་སོ་སོའི་དུས་དྲན་དམིགས་བསལ་བ་རིགས་དང་་མི་རིགས་སོ་སོའི་ནང་ལ་ཆག་སྒོ་ཅི་རིགས་བྱུང་དུས་་གདུང་སེམས་མཉམ་སྐྱེད་ཀྱི་ལས་འགན་རིགས་མཉམ་དུ་སྤེལ་འོས། མ་གཞིའི་དེའི་སྐོར་ཚོགས་འདུ་རང་ནས་བགྲོ་གླེང་གནང་གིས་གྲོས་ཆོད་འཇོག་དགོས་པ་ཞིག་རེད།
ནད་པ་ལགས་ཀྱིས་བསམ་འཆར་ལྷུག་བརྗོད་གནང་བ་དགའ་བོ་བྱུང། མི་རིགས་སྐྱིད་སྡུག་ལྷན་ཚོགས་ཀྱི་གྲུབ་ཆའི་ཐད་ལ་ཚོགས་ཐོག་ནས་གླེང་མོལ་གནང་འོས། གང་ལྟར་ཐོག་མར་དེ་འདྲ་ཞིག་འཚུགས་པར་ཕྱི་དྲིལ་ནས་འགན་ཞིག་ཁུར་ན་ལས་དོན་ལམ་ལྷོང་ཐད་ལ་ཕན་ཐོགས་ཆེ་བསམས། ངས་བལྟས་ན་འཛམ་གླིང་ཞི་བདེའི་དེད་དཔོན་ཁ་ཤས་རེ་སློབ་སྟོན་དུ་སྤྱན་འདྲེན་ཞུ་རྒྱུ་གལ་ཆེ་སྙམ་གྱིན་ཡོད།
དུས་དེབ་ཚད་ལྡན་བཅུ་ལབ་མེད། རྩོམ་ཡིག་ཚད་ལྡན་བཅུ་གྲངས་ལབ་ཡོད། དུས་དེབ་ཚད་ལྡན་དག་ནི་ལྗང་གཞོན་དང། རྩམ་པ། ལྡུམ་ར། བློ་གསལ་རྩོམ་རིག་དགའ་ཚལ། ཁ་བ། གཞན་ཡང་ཤེས་རབ་དགའ་ཚལ་གླིང་དང་ས་ར་མཐོ་སློབ་ཁང། ནོར་གླིང་མཐོ་སློབ་སོགས་ཀྱི་རྩོམ་རིག་དུས་དེབ་ཁག་ཅིག་ལ་ངོས་འཛིན་བྱེད་ཀྱིན་ཡོད། ཡིན་ན་ཡང་གཙོ་བོ་རྩོམ་ཡིག་རང་ལ་ལྟ་གི་རེད། ཅི་ཞིག་བཤད་ཡོད་པར་ཡག་པོ་ཞིག་དོ་སྣང་ཡང་མི་བྱེད་པར་་་མི་འདི་ལ་ང་ཉོབ་སོང།
ཆབ་བྲག་ལགས་ཀྱིས་དགོངས་ཚུལ་བཏོན་པ་ལྟར་དོན་ཚན་ཀ་པའི་ནང་དུ་ཡུ་གུར་དང་། སོག་པོ། རྒྱ་རིགས་དམངས་གཙོ་དོན་གཉེར་ཅན། ཆོས་འཁོར་རྩ་རླུང་སྒོམ་སྒྲུབ། ངེད་ཅག་བོད་རིགས་ལ་སོགས་པ་ཚང་མས་ཐོག་མར་མི་རིགས་སྐྱིད་སྡུག་མཉམ་མྱོང་གི་འཚོགས་ཆེན་ཞིག་ཚོགས་ཐུབ་ན་ཞེ་དྲག་གི་ཡག་པོ་རེད།
དེ་དུས་མི་རིགས་མི་འདྲ་བ་འདི་དག་མཉམ་འཛོམས་བྱས་ཏེ་མི་རིགས་སྐྱིད་སྡུག་མཉམ་འབྲེལ་ལྷན་ཚོགས་ཞིག་གསར་འཛུགས་བྱེད་དགོས།
ལྷན་འཚོགས་དེ་བརྒྱུད་དེ་རྒྱ་ནག་དང་། བོད་ལྗོངས། ཡུ་གུར། སོག་ཡུལ་བཅས་ཀྱི་ནང་དཀའ་ངལ་གང་ཞིག་འཕྲད་ཀྱང་ཕྱི་སྡོད་ཀྱི་ལྷན་ཚོགས་འདུ་བསྐོང་བྱས་ཏེ་དུས་ཐོག་འཛམ་གླིང་སྟེང་གསལ་བསྒྲགས་སྤེལ་ཏེ་སྐབས་བབ་ཀྱི་མི་རིགས་མཉམ་འབྲེལ་གྱི་ལས་འགུལ་མེ་ལྟར་ཚ་ཐག་ཆོད་དུས་བབ་ལྟར་སྤེལ་ཐུབ་པ་དགོས།
ཡིན་ནའང་ལྷན་ཚོགས་འདིའི་ནང་དུ་ཆབ་བྲག་ལགས་ཀྱིས་གསུངས་པའི་བཙན་བྱོལ་སྒྲིག་འཛུགས་ཀྱི་ཕྱི་འབྲེལ་བློན་ཆེན་གྱི་འགན་འཁུར་ཐུབ་ན་དགེ་མཚན་ཆེ་བ་བཤད་པ་དེར་ངོས་ལེན་བྱེད་མི་ཐུབ་པ་ཞིག་རེད།
གང་ཡིན་ཟེར་ན་བོད་མིའི་སྒྲིག་འཛུགས་ཀྱིས་ངོས་ནས་བཤད་ན་མི་རིགས་མཉམ་འབྲེལ་སྐྱིད་སྡུག་ཚོགས་པ་དེའི་འགན་འཁུར་བླངས་ན་དགེ་ལས་སྐྱོན་ཆེ་བའི་གནས་སྟངས་ཆགས་སྲིད་པ་རེད།
དེར་བརྟེན་ལྷན་ཚོགས་དེའི་གཙོ་འཛིན་མི་རིགས་མཉམ་འབྲེལ་ལྷན་ཚོགས་སྐབས་སུ་མང་མོས་ཀྱིས་འོས་འདེམས་བྱེད་དགོས་ལ་ལྷན་ཚོགས་དེའི་ནང་གི་འོས་གཞིར་བོད་ཀྱི་གཞོན་ནུ་ལྷན་ཚོགས། དགུ་བཅུ་གསུམ། བུད་མེད་ལྷན་ཚོགས། བོད་རྒྱལ་ཡོངས་དམངས་གཙོ་ཚོགས་པ་གང་རུང་ཞིག་གི་འོས་མི་བཞུགས་དགོས།
ང་ཚོས་ཤ་དང་རུས་པའི་འབྲེལ་ཐག་དམ་པོར་བཅིངས་པའི་ཤ་རུས་གཅིག་པའི་བོད་མི་རིགས་ཀྱི་སོ་སོའི་སྤུན་ཟླའི་མི་རིགས་ཀྱི་གཅེས་པའི་ཚེ་སྲོག་མེ་ལ་སྒྲོན་པའི་དུས་དེར་ཕྱི་ནང་བོད་རིགས་ཡོངས་ཀྱིས་ཀྱང་ངུ་སྐད་གཅིག་ལས་བརྒྱབ་མ་ཐུབ་ནའང་གནས་ཡུལ་གྱི་རྒྱལ་ཁབ་གང་ཞིག་གི་ཁྲིམས་དང་མཐུན་པའི་འོག་ནས་ངར་གི་མི་རིགས་ཀྱི་ཐོབ་ཐང་རྩོད་དགོས་ལ་འཛམ་གླིང་མི་དམངས་ཀྱིས་ཤེས་རྟོགས་ཐུབ་པ་བྱེད་དགོས།
ཉེ་བའི་ཆར་གཞོན་ནུའི་དབུ་འཁྲིད་འོག་ལྡི་ལིའི་མཐོ་རིམ་བོད་རིགས་སློམ་མ་འགས་རྒྱ་ནག་གི་གཞུང་ཚབ་ནང་ཞི་བའི་སྐད་འབོད་དུས་ཐོག་ཆར་པ་ལྟར་བབས་ཐུབ་པ་དེས་ང་ཚོའི་ངོས་ནས་བཤད་ན་ཆེས་རླབས་ཆེན་གྱི་གཟི་བརྗིད་གཅིག་རེད་ལ་ངོ་ཚ་མེད་པའི་རྒྱ་ནག་དམར་གཞུང་འདིར་མཚོན་ན་འཛམ་གླིང་སྤྱི་དང་ལྷག་དོན་ཆེན་པོ་རྒྱ་གར་རྒྱལ་ཁབ་འདི་ནང་ཅུང་ཟད་ངོ་ནོམ་དགོས་པའི་གདོང་འབག་དེ་ཤུས་ཐུབ་ཡོད།
བཙན་བྱོལ་སྒྲིག་འཛུགས་ཀྱི་སྲིད་གཞུང་འདིས་དུས་ལྟར་བྱ་མ་འདྲོགས་པར་ང་ཚོར་དགོས་པའི་སྒོ་ངའང་ལེན་ཐུབ་པའི་ཐབས་ཇུས་བཏོན་ཐུབ་པ་བྱེད་དགོས། མི་རིགས་འདི་གནད་དོན་ཐད་སྤྱི་ཚོགས་ནང་དུས་བབ་ལྟར་བསྟུན་ནས་འགྲོ་ཐུབ་པ་བྱེད་དགོས་ལ། གནས་ཚུལ་གསར་པར་དབྱེ་ཞིབ་དང་། གནད་དོན་གསར་པར་ཐག་གཅོད། ལས་དོན་འགངས་ཆེར་ཐབས་ཇུས་བཅས་ཀྱི་བསམ་བློ་གཏོང་དགོས། སྐད་ཆ་བཤད་དགོས། བྱ་བ་བྱེད་དགོས། ལས་འགུལ་སྤེལ་དགོས། ཐབས་ཤེས་བཏོན་དགོས། མི་དམངས་སྣེ་འཁྲིད་བྱེད་ཐུབ་པ་དགོས།
བོད་རྒྱལོ།།
སྐུ་ཞབས་ཆབ་བྲག་ལགས།
ཁྱེད་ཀྱིས་མ་མཐའའི་ཆ་རྐྱན་དུ་བཏོན་པའི་ཚད་ལྡན་གྱི་དུས་དེབ་བཅུ་དེ་གང་ཡིན་ནམ།
ངས་ཀྱང་དུས་དེབ་ཚོའི་ནང་དུ་རྩོམ་ཡིག་མང་པོ་བྲིས་མྱོང་ཡང་ཚད་ལྡན་གྱི་དུས་དེབ་གང་ཡིན་ཤེས་མ་སོང།
ཁྱེད་ཀྱིས་རྩོམ་པ་པོ་ཡིན་མིན་གྱི་ས་མཚམས་དེ་གང་ཞིག་ལ་འཇོགས་ཀྱི་ཡོད་གཅིག་གསུངས་རོགས་ཞུ།