ཆིག་སྒྲིལ་གྱི་སེམས་པ། གཅིག་གྱུར་གྱི་ངོ་རྒོལ། བདེན་དོན་གྱི་གཟི་བརྗིད། རྒྱལ་ཁ་ཡི་རེ་བ།
ཆབ་བྲག་ཕོ་ཉ།
ལོ་རྒྱུས་ཀྱི་གོད་ཆག་ཅི་འདྲ་ཞིག་བྱུང་བ་ལ་མ་ལྟོས་པར་མགོ་ནག་རྩམ་གཟན་ནམ་གདོང་དམར་བོད་པ་ཚང་གི་བུ་རབས་ཚ་རྒྱུད་དག་གིས་མི་རིགས་ཤིག་གི་ལར་ཞེན་དང་རིག་གཞུང་ཞིག་གི་སྤོབས་པ། བདེན་དོན་ཞིག་གི་སྙིང་སྟོབས་དང། ཡིད་ཆེས་ཤིག་གི་རེ་སྨོན་བཅས་ལ་བརྟེན་ནས་འཕག་འཚག་རྒྱུན་མར་བྱས་ཏེ་འགྱེལ་ས་ནས་ལངས་པར་ལན་དགུ་ཆད་དུ་འབད་ཡོད་ལ་གྲུབ་འབྲས་ཀྱང་ཆེན་པོ་བླངས་ཡོད། མ་མཐར་ཡང་ངས་བལྟས་ན་གཉིད་ལས་སད་དང་སད་བཞིན་པ་རེད། ད་དུང་མང་པོ་ཞིག་གིས་རེ་བ་ཆེ་ས་ཞིག་ལ་དམིགས་ཏེ་བློས་གཏོང་ཡང་ཆེན་པོ་ཞིག་གི་མགོ་ཚུགས་ཡོད། འདི་ནི་ཚེ་སྲོག་ཅིག་གི་ངོས་ནས་བལྟས་ན་ཡ་ང་བ་དང་སྙིང་རྗེ་བ་ཕངས་སེམས་ཆེ་བ་ཞིག་ཡིན་པར་མ་ཟད། ཆེས་གཟི་བརྗིད་དང་རླབས་ཆེན་ཞིག་ཀྱང་ཅི་ལ་མིན། ལྷག་པར་དུ་རང་རིགས་ལ་མཚོན་ན་དྲན་སྐུལ་ཟབ་མོ་ཞིག་དང་དགྲ་ཕྱོགས་ལ་མཚོན་ན་ངོ་རྒོལ་མཐུ་ཆེན་ཞིག་ཡིན་ངེས་པས། གངས་ཅན་པ་ཞེས་པ་དང་གདོང་དམར་བོད་པ་ཞེས་པ། ཆོས་ལྡན་བོད་མི་ཞེས་པ། འཚེ་མེད་ཞི་བ། བདེན་པའི་ཨུ་ཚུགས་ཟེར་བའི་ཁྱད་ཆོས་ཚང་མ་ཕྱོགས་བསྡུས་ཀྱིས་མཚོན་པའི་རྒྱ་མཚོའི་རླབས་དང་རླུང་གི་ཤུགས་བཞིན་བཟློག་ཏུ་མེད་ལ་ཡལ་དུ་མེད་པའི་ལས་འགུལ་ཞིག་ཏུ་འགྱུར་བཞིན་ཡོད།
སྤྱིར་ཡིན་ན་དཔའ་རྟུལ་ཁོང་རྣམས་པས་ཀྱང་དྲག་པོའི་ཐབས་རྩལ་ཅི་རིགས་ལ་བརྟེན་ནས་དགྲ་ཕྱོགས་ལ་འཇིགས་སྣང་དང་ཆག་སྒོ་དུ་མ་ཞིག་འབྱུང་འཇུག་ཐུབ་རྒྱུར་ཐེ་ཚོམ་སྤུ་ཙམ་མེད་ན་ཡང། འདི་ལྟར་གཞན་ལ་འཚེ་བ་དོར་ནས་རང་ལ་འཚེ་བའི་སྤྱོད་ཚུལ་ཐུན་མོང་མ་ཡིན་པ་འདི་ནི་འཛམ་གླིང་ཞི་བདེའི་དེད་དཔོན་ཆེན་པོ་གང་གི་རླབས་ཆེའི་དགོངས་དོན་ལ་དད་འདུན་གུས་བརྩི་གནང་ནས་བོད་ཀྱི་བསྟན་པ་ཆབ་སྲིད་དང་བཅས་པའི་སླད་དུ་ཡིན་པར་ཐག་གཅོད་ཐུབ་པ་ཞིག་རེད།
བདེན་པའི་སྟོབས་དང་ཞི་བའི་ཐབས་ཀྱི་རྒྱལ་ཐབས་དེ་ཡང་ཆིག་སྒྲིལ་གྱི་བསམ་བློའི་ནུས་པ་ཞིག་གིས་རྨང་གཞི་བྱས་ཏེ་གཅིག་གྱུར་གྱི་ལས་འགུལ་ཞིག་གིས་གཡོ་འགུལ་བསླངས་ན། ད་གཟོད་བདེན་པའི་གཟི་བརྗིད་ཅིག་གིས་རྒྱལ་ཁའི་རེ་བ་ཞིག་མཐོང་བར་འགྱུར་རྒྱུར་བདག་ནི་ཡིད་ཆེས་ཟབ་མོ་ཡོད། དེ་ཡང་་རྒྱལ་སྤྱིའི་རྒྱབ་སྐྱོར་དང་རྒྱལ་ནང་གི་རུལ་སུངས་དང་ངོ་རྒོལ་ཅི་རིགས་ཀྱིས་པེ་ཅིང་གཞུང་གི་རྒྱལ་སྲིད་ནི་ཡུན་རིང་བརྟན་དཀའ་ལ་གུང་ཁྲན་ཏང་གི་ཚེ་སྲོག་ཀྱང་ལོ་བརྒྱ་ལས་གནས་དཀའ་བའི་གནས་སྟངས་ཤིག་ཆགས་ཀྱིན་ཡོད་པས། བོད་དང་ཡུ་གུར། སོག་པོ་དང་རྒྱ་ནག་དམངས་གཙོ་པ་བཅས་པས་རང་གི་མི་རིགས་ཀྱི་ཚེ་སྲོག་སྲུང་སྐྱོབ་ཀྱི་གོ་སྐབས་དམ་འཛིན་གྱིས་མཚམས་མི་འཆད་པའི་ལས་འགུལ་ཅི་རིགས་མཉམ་སྤེལ་གྱི་མཛུབ་མོ་ལྔ་བཅངས་ནི་་སྲིད་དོན་གྱི་དམག་འཐབ་གལ་ཆེན་ཞིག་ཏུ་ཚོར།
རྒྱུ་མཚན་དེས་ན་བདག་གིས་འདིར་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚབ་བྱས་ཏེ་བཀུར་འོས་དཔལ་ལྡན་བོད་མིའི་སྒྲིག་འཛུགས་ཀྱིས་གཙོས་ཚོགས་སྡེ་སྤྱི་དངབྱེ་བྲག་བོད་མི་ཡོངས་ལ་གཞེན་སྐུལ་འགའ་ཞིགཞུ་རྒྱུ་ལགས་ན་ཅིས་ཀྱང་དགོངས་བཞེས་གནང་རྒྱུ་མཁྱེན་མཁྱེན།
ཀ༽ ཡུ་གུར་དང་སོག་པོ། རྒྱ་རིགས་སོགས་དམངས་གཙོ་དོན་གཉེར་ཅན་ཚང་མར་འབོད་སྐུལ་གྱིས་རྒྱལ་ཁབ་གང་རུང་ཞིག་ཏུ་མི་རིགས་སྐྱིད་སྡུག་མཉམ་མྱོང་གི་ཚོགས་ཆེན་ཞིག་བསྐོངས་ནས་མི་རིགས་མནའ་འབྲེལ་གྱི་ཚོགས་པ་ཆེན་པོ་ཞིག་བཙུགས་ནས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་མཉམ་སྤེལ་གང་མང་བྱེད་རྒྱུ། (བོད་མིའི་སྒྲིག་འཛུགས་ཀྱི་ཕྱི་དྲིལ་བློན་ཆེན་གྱིས་གཙོ་འགན་གནང་འོས་སྙམ)
ཁ༽ གཅིག་གྱུར་གྱི་ངོ་རྒོལ། འདི་ལ་གཅིག་ནས་གོང་གསལ་མི་རིགས་སྐྱིད་སྡུག་མཉམ་མྱོང་གི་མཉམ་འབྲེལ་ལས་གཞི་དག་གི་འཆར་གཞི་གཏན་འབེབས་བྱ་རྒྱུ་དང། གཉིས་ནས་བཙན་བྱོལ་བོད་མི་ཡོད་དོ་ཅོག་གི་སྐབས་བསྟུན་ངོ་རྒོལ་དུས་གཅིག་གམ་རྣམ་འགྱུར་ལྷན་སྤུངས་ཀྱི་ཐབས་ཚུལ་ཏེ། དཔེར་ན། ངོ་དེབ་དང་གནམ་ཡིག་སོགས་ཀྱི་པར་རིས་ལ་མཆོད་མེ་ལྟ་བུ་གཅིག་གྱུར་བཞག་ནས་མྱ་ངན་དང་གུས་འདུད་མཚོན་པ་དང། ཡང་ན་བདེན་པ་ཉིད་རྣམ་པར་རྒྱལ་གྱུར་ཅིག་ཅེས་པའི་ཁ གཡང་གཅིག་གྱུར། སྦྱར་རྒྱུ་དང་འདོགས་རྒྱུ་ལ་སོགས་པ་བཟོ་བ། ཡང་ན་ཉིན་གཅིག་དུས་གཅིག་ལ་དཔའ་བོར་གུས་འདུད་དང་མྱ་ངན་གྱི་ངག་བཅད་ཞུ་བ་དང། ཉིན་གཅིག་ལ་སྙུང་གནས་སྲུང་བ། དུས་གཅིག་ལ་མཆོད་མེ་སྦོར་བ། གསོལ་བ་སྨོན་ལམ་འདེབས་པ་ལ་སོགས་པ། དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱིས་ཐུགས་འགན་བཞེས་ཏེ་དུས་ནས་དུས་སུ་གསར་འགོད་གསལ་བསྒྲགས་དང་བཅས་ཏེ་གསལ་བརྡ་གནང་ན་དོན་ཕན་འབྱུང་ངེས་སྙམ།
ག༽ ཡིད་བཞིན་ནོར་བུའི་ཐབས་མཁས་ཐུགས་རྗེའི་གཟིགས་སྐྱོང་འོག་བོད་ཆོལ་ཁ་གསུམ་པོའི་ཆིག་སྒྲིལ་གྱི་སེམས་པ་སྔར་བྱུང་མ་མྱོང་བ་ཞིག་འབྱུང་བཞིན་པ་འདི་ང་ཚོའི་རྒྱལ་ཁའི་གཞི་རྩ་ཡིན་པས། དམ་ཚིག་གཙང་མ་མི་ཉམས་གོང་སྤེལ་ཆེད་དུ་དུས་འཁོར་དབང་ཆེན་སྐབས་སུ་བོད་མི་ཡོངས་ཀྱིས་མནའ་གན་ཆེན་པོ་ཞིག་ངེས་པར་འཇོག་གལ་ཆེ་བར་མཐོང། དེ་ཡང་སྔོན་གཤེགས་དཔའ་བོ་རྣམས་ལ་རྗེས་དྲན་དང་ལྷན་མ་འོངས་རྗེས་རབས་རྣམས་ལ་དྲན་གསོའི་རྟེན་དུ་མནའ་གན་རྡོ་རིང་ཆེན་མོ་ཞིག་བཞེངས་ཐུབ་ན་ལེགས། (འདི་ལ་ཆོལ་གསུམ་དབུས་སྤྱི་ཁྱབ་ཁང་དང་གཞོན་ནུ་ཚོགས་པ་དང་བུད་མེད་ཚོགས་པ་རྣམ་པས་དབུ་ཁྲིད་དེ་གཞུང་འབྲེལ་མ་ཡིན་པའི་ཚོགས་པ་ཆེ་ཆུང་ཚང་མ་མཉམ་འབྲེལ་གྱིས་ནུས་པ་འདོན་ཐབས་ཀྱི་ལས་འགུལ་སྤེལ་འོས)
ང༽ བོད་ཀྱི་ཆོས་ལུགས་དང་ཆོས་བརྒྱུད་ཁག་ཡོད་དོ་ཅོག་ལྷན་བཞུགས་ཀྱིས་ལོ་རེ་བཞིན་དུ་བོད་དོན་བདེན་མཐའ་མྱུར་གསལ་ལ་གསོལ་བ་སྨོན་ལམ་འདེབས་རྒྱུ། (ཆོས་དོན་ལས་ཁུངས་ཀྱིས་ཐུགས་འགན་རྐང་ལེན་གནང་འོས་སྙམ།)
ཅ༽ སྔོན་གཤེགས་དཔའ་བོ་རྣམས་ལ་བསྔོ་སྨོན་དང་ཤུལ་ལུས་ནང་མིའི་འཚོ་སྣོན་སོགས་ཀྱི་ཆེད་དུ་ལོ་རེ་བཞིན་དུ་བཙན་བྱོལ་བོད་མི་ཡོད་དོ་ཅོག་ནས་དང་བླང་ཞལ་འདེབས་འབུལ་རྒྱུ། (བདེ་སྲུང་ལས་ཁུངས་ནས་ཐུགས་འགན་གནང་འོས་སྙམ)
ཞོར་དུ། ཁ་སང་ནས་ངོ་དེབ་དང་གནམ་ཡིག་དག་གི་ནང་ལ་མཆོད་མེའི་པར་རིས་བཞག་ནས་བོད་ནང་གི་རང་སྲོག་བློས་གཏོང་གི་རྒྱལ་གཅེས་པ་རྣམ་པར་གུས་འདུད་དང་མྱ་ངན་ཞུ་བའི་མཚོན་རྟགས་ཤིག་སྤེལ་བཞིན་པ་འདི་ངོ་དེབ་དང་གནམ་ཡིག་ཡོད་པའི་བོད་མི་ཡོད་དོ་ཅོག་ནས་ཁྱབ་སྤེལ་གནང་རྒྱུའི་རེ་སྐུལ་དང་བཅས།
པེན་བོད་ཀྱི་རྩོམ་པ་པོའི་མཐུན་ཚོགས་ཚོགས་གཙོ་ཆབ་བྲག་ལྷ་མོ་སྐྱབས་ཀྱིས་ཧྥ་རན་སིའི་རྒྱལ་ས་དཔལ་རིས་ནས་༢༠༡༡་༡༠་༩་ཞོགས་པའི་ཆུ་ཚོད་གཉིས་པར་གུས་ཕུལ།
ཆབ་བྲག་གི་འཆར་གཞིའི་ནང་བཟང་སྣ་གཅིག་ཀྱང་མེད་པ་མིན་ཡང་། ངས་དེ་རིང་སྐྱོན་ཆ་དག་བཤད་རྒྱུ་ཡིན།
(ཀ) དོན་ཚན་འདིའི་ཐད་ལ། སྤྱི་ཡོངས་ནས་ཆབ་སྲིད་ཀྱི་ཆུ་ཚད་སྐྱོ་བ་དང་། བྱེ་བྲག་གིས་མང་གཙོའི་སྲིད་ལུགས་ལ་གོམ་བྱང་མེད་པའི་ཆ་ཞིག་འདུག མི་རིགས་འདི་གསུམ་གྱིས་མནའ་འབྲེལ་ཚོགས་པ་འཛུགས་རྒྱུ་དེ་སོ་སོའི་མངོན་འདོད་གང་ཞིག་བསྒྲུབ་ཆེད་ཡིན་ན། ཐོག་མར་ཐུན་མོང་གི་ལྟ་གྲུབ་ཅིག་དགོས་པ་ཚོགས་པ་གང་ཞིག་འཛུགས་རྒྱུའི་ཆ་རྐྱེན་ཨང་དང་པོ་ཡིན། བོད་དང་སོག་པོ། ཡུ་གུར་གསུམ་རྒྱ་ནག་གི་གྲངས་ཉུང་མི་རིགས་གྲས་རེད། ད་སྔ་ཡོངས་ཁྱབ་ཐོག་བོད་མིས་རང་སྲིད་རང་སྐྱོང་རྩོད་ཀྱི་ཡོད། སོག་པོའི་དགོས་འདུན་ཅི་ཞིག་རེད། ཡུ་གུར་བས་ད་བར་གང་ཞིག་བརྩད་པ་རེད།
རྒྱ་ནག་གཞུང་མགོ་རྟིང་སློག་རྒྱུ་དང་། ཡང་ན་རྒྱ་ནག་གཞུང་དམངས་གཙོར་འགྱུར་ཆེད་ཡིན་ན། ཕྱི་ཕྱོགས་ཀྱི་རྒྱ་རིགས་དམངས་གཙོ་དོན་གཉེར་བ་དང་། ཆོས་འཁོར་རྩ་རླུང་སྒོམ་སྒྲུབ་པ་རིགས་ཅིའི་ཕྱིར་མནའ་འབྲེལ་ཚོགས་པ་འདིའི་ནང་མ་ཚུད་པ་རེད།
(ཁ) དོན་ཚན་འདིའི་ཐད་ལ། བོད་མི་ཡོངས་ཀྱིས་ངོ་དེབ་དང་གནམ་ཡིག་སོགས་ཀྱི་པར་རིས་ལ་མཆོད་མེ་འཇོག་པ་དང་། བདེན་པ་ཉིད་རྣམ་པར་རྒྱལ་གཅིག་ཅིག འདས་པར་ངག་བཅད་གུས་འདུད་དང་མཆོད་མེ་སྒྲོན་པ། གསོལ་བ་སྨོན་ལམ་འདེབས་པ། འདི་དག་ནི་བོད་པ་ནང་ཁུལ་ལ་ཁ་ཕྱོགས་པའི་ལས་འགུལ་ཞེ་གཅིག་རེད། བོད་དོན་ཕྱི་ལ་བསྒྲག་རྒྱུ་གལ་ཆེ་བ་ལས་བོད་པ་ནང་ཁུལ་ནས་མ་གོ་མ་ཐོས་པའི་དཀའ་ངལ་ད་བར་བྱུང་མྱོང་མེད།
( ག ) དོན་ཚན་འདིའི་ཐད་ལ། ད་ལྟའི་དུས་ཚོད་འདི་ལ་བོད་ཆོལ་ཁ་གསུམ་ཁ་མ་འཆམ་པ་དང་། བོད་ཕྱི་ནང་གཉིས་ཀྱི་མངོན་འདོད་མ་གཅིག་པ། རྒན་གཞོན་གྱི་ལྟ་བ་མ་མཐུན་པ། སྐྱ་སེར་གཉིས་ཀྱི་ལངས་ཕྱོགས་མ་འདྲ་བ། ཕོ་མོ་གཉིས་ཀྱི་ཐོབ་ཐང་མ་འདྲ་བ། དགེ་སློབ་གཉིས་ཀྱི་དམ་ཚིག་མ་གཙང་པ་སོགས་ཀྱི་དཀའ་ངལ་གང་ཡང་མེད་ལ། ལྷག་པར་དུ་ད་ལྟའི་ཛ་དྲག་གི་དུས་ཚོད་འདི་ལ་དོན་ཆེན་བཞག་སྟེ་དོན་ཆུང་ཐོག་དེ་འདྲའི་ཟང་ཟིང་བྱས་བསྡད་ན་འོས་འཚམ་མིན་ལ། ལྷག་པར་དུ་དུས་འཁོར་དབང་ཆེན་ཐོབ་བོད་ནང་ནས་མི་མང་པོ་ཕེབས་ཀྱི་ཡོད་སྟབས། དུས་ཚོད་འདི་འདྲ་ཞིག་ལ་དེ་ལྟ་བའི་ལས་ཀ་འདྲ་བྱས་བསྡད་ན་དགེ་དང་སྐྱོན་གང་གི་ངོ་བོར་འགྲོ་བ་བཤད་མ་ཐུབ་པ་ཞིག་རེད་ལ། ལྷག་པར་དུ་བོད་ནང་གི་བོད་མི་ཚོའི་ཞེ་ན་མེད་པའི་གནས་ཚུལ་ཞིག་ལ་དྲན་སྐུལ་ལྟ་བུ་བྱས་ན་གང་འདྲ་ཡིན་ནམ་དྲན་གྱི་འདུག
(ང ) དོན་ཚན་འདིའི་ཐད་ལ་ངས་གང་ཡང་བཤད་ཤེས་མ་སོང་། བྱིས་པ་བསམ་མེད་ཅིག་གམ། ཕྱུགས་རྗེས་ནས་མི་ཚེ་བསྐྱལ་ཟིན་པའི་རྒན་འཁོགས་ཡིག་རྨོངས་པ་ཞིག་གི་སྐད་ཆ་ལས་མཐོང་མ་སོང་།
( ཅ ) ༢༠༡༠ ལོའི་ཟླ་ ༦ པར་རྒྱ་ནག་གཞུང་གི་གསལ་བསྒྲགས་ལྟར་ན། བོད་ནང་དུ་བོད་མི་ས་ཡ་ ༥།༧ འདུག ཉིད་ཀྱིས་སྔོན་གཤེགས་ཟེར་བ་དེ་མཚམས་གང་ཞིག་ཏུ་འཛིན་དགོས་ཤེས་མ་སོང་མོད། གལ་སྲིད་བཙན་བྱོལ་བོད་གཞུང་བདེ་སྲུང་ལས་ཁུངས་ཀྱིས་ཆ་གསུམ་དུ་དབྱེ་ཡོད་པ་ལྟར། ས་མཚམས་བར་མ་སྤྱི་ལོ་ ༡༩༧༨ ཚུན་ལ་ངོས་འཛིན་ཞུ་རྒྱུ་ཡིན་ན། ཉུང་མཐར་བོད་མི་རིགས་དང་རྒྱལ་ཁབ་ཆེད་སྐུ་གཤེགས་པ་ ༥༠༠༠ ལས་བརྒལ་ཡོད། ས་མཚམས་ཕྱི་མ་ལྟར་སྤྱི་ལོ་ ༢༠༠༢ ཚུན་ལ་ངོས་འཛིན་བྱས་ཀྱང་། སྐུ་གཤེགས་པ་ ༥༠༠ ལས་བརྒལ་ཡོད་ལ། ད་ཆར་བཙོན་འོག་ཏུ་ཡོད་པའང་ ༡༠༠ ལྷག་ཡོད་ངེས་ཡིན། བཙན་བྱོལ་སྤྱི་ཚོགས་ཁྱོན་ཡོངས་སུ་བོད་མི་ཆིག་འབུམ་གཞི་ཁྲི་ལྷག་ཡོད། བོད་ནང་དུ་ཞལ་འདེབས་ཕར་ཟད་དང་བླངས་དཔྱ་དངུལ་འབུལ་མཁན་ཡང་བརྒྱ་ཆ་ཅུང་ཉུང་ཉུང་རེད། བཙན་བྱོལ་བོད་མིའི་དཔལ་འབྱོར་གནས་བབ་སྤྱི་ཡོངས་ལ་བལྟས་ན་ལོ་རེར་དཔྱ་དངུལ་ཧིན་སྒོར་ 45 འབུལ་མ་ཐུབ་པ་མེད་ཀྱང་། གཞིས་ཆགས་རེ་ཟུང་ནང་ད་ལྟ་ཉིན་རེར་ཆ་སྙོམས་བྱས་ན་ཧིན་སྒོར་ 16 རེ་ལས་རེག་གི་མེད་ས་ཡོད་པ་ཐོས་ལ། བོད་ནས་གསར་པ་ཕེབས་མཁན་མང་པོ་ཞིག་ལའང་ལོ་གཉིས་གསུམ་བར་ཟླ་རེར་ཧིན་སྒོར་ 2000 ཙམ་ལས་མེད་པའི་གླ་བྱས་ཏེ་བསྡད་ཡོད། བཙན་བྱོལ་བོད་མི་ཆིག་འབུམ་བཞི་ཁྲི་མི་རེ་ངོ་རེ་ནས་བཙན་བྱོལ་བོད་མིའི་དང་བླངས་དཔྱ་དངུལ་གྱི་སྒང་ལ་ལོ་རེར་ཧིན་སྒོར་ 45 རེ་བོད་ནང་ལ་ཞལ་འདེབས་སུ་སྤྲོད་རྒྱུ་བྱོས། སྡོམ་པའི་ཧིན་སྒོར་ 6300000 རེད། དེ་རྒྱ་ནག་གི་དམངས་སྒོར་ལ་གཞལ་ན། དམངས་སྒོར་འབུམ་ 9 ཙམ་ལས་མེད། དེ་བོད་ནང་གི་སྐུ་གཤེགས་པ 600 ལ་བགོས་ན། རྒྱ་སྒོར་ 1500 ཪེ་ལས་ཐོབ་ཀྱི་མེད། དངུལ་འདི་དག་དུས་ཐོག་ལ་ཁུངས་སོ་སོར་འཕྲོད་རྒྱུར་ཡང་དཀའ་ངལ་ཡོད། སྔར་ལོའི་ཡུལ་ཤུལ་ས་ཡོམ་སྐབས་སུ་ངྷ་རམ་ས་ལར་ཞལ་འདེབས་འབུམ་ཁ་ཤས་བསྡུས་པ་ད་དུང་ཡང་འཕྲོད་མེད་པའི་རྙོག་གླེང་ལྷག་ཡོད། སྤྱིར་བོད་ནང་བོད་མིའི་བདེ་རྩའི་ཆེད་ལས་འགུལ་སྤེལ་མཁན་ཚོར་དངོས་ཤུགས་བརྒྱུད་གསུམ་ནས་དངུལ་གྱི་རོགས་རམས་གནང་རྒྱུར་འདོད་པ་ཤིན་ཏུ་ཡོད། འོན་ཀྱང་། དེ་ནི་བཙན་བྱོལ་བོད་མི་ཚོར་ཞལ་འདེབས་བསྡུ་བ་ལས་བཙན་བྱོལ་བོད་མི་ཚོས་ཕྱི་རྒྱལ་ཁག་གི་གཞུང་དང་ཕྱུག་བདག་སྒེར་བ་རིགས་ཀྱི་ཁྲོད་ནས་སྦྱིན་བདག་འཚོལ་དགོས། འདི་ལྟར་བྱས་ན་བོད་ནང་གི་ཁུངས་སོ་སོར་སྤྲོད་རྒྱུར་ཡང་སྟབས་བདེ་ཡིན།
ཆབ་བྲག་ལྷ་མོ་སྐྱབས་ལགས་ཀྱིས་བཏོན་པའི་དགོངས་ཚུལ་ལ་མོས་མཐུན་བྱེད་རྒྱུ་ཡིན།
དུས་དེབ་ཚད་ལྡན་རིགས་སུ་རྩོམ་ཡིག་ཚད་ལྡན་བཅུ་གྲངས་རེ་བཀོད་ཡོད་དགོས་པ་འདི་མ་མཐའི་ཆ་རྐྱེན་རེད། ཁྱོད་ཅག་ལ་བཏོན་པ་ཡང་མ་མཐའི་ཆ་རྐྱེན་རང་ཡིན། ཁྱོད་དང་བཅས་པར་རྩོམ་གྲོགས་དེ་འདྲ་མང་པོ་ཞིག་ཡོད་ན་ཚོགས་ཞུགས་སྙན་ཞུ་སྐུར་རོགས།
ང་ཚོའི་ཚོགས་མི་ཚང་མར་མ་མཐའི་ཆ་རྐྱེན་དེ་ཚང་ཡོད།་ས་དེའི་ཚོད་ཀྱི་ནགས་དང་ནགས་དེའི་ཚོད་ཀྱི་རི་དྭགས་འདྲ་བོ་ཆགས་ཡོད་པའི་ངོས་འཛིན་ཞུ་གིན་ཡོད།
མནའ་ཚིག་ལ་འཇིགས་པ་དང་རང་ཉིད་ལ་ཡིད་ཆེས་མེད་པ། བོད་མི་དམངས་ལ་ཡིད་ཆེས་མེད་པ། མཉམ་ཞུགས་ཀྱང་བྱེད་མི་ཐུབ་པ་ཚོས་ངོ་མ་མནའ་མ་བསྐྱལ་ན་བཟང།
བོད་ཀྱ་པེན་ཚོགས་པ་འདི་ཕྱི་སྡོད་བོད་མིའི་རྩོམ་པ་པོའི་མཐུན་ཚོགས་ཤིག་རེད། དེ་བས་བོད་ཁྱོན་ཡོངས་ཀྱི་རྩོམ་པ་པོ་ཞུགས་ཐབས་བྲལ་ཡོད། གནས་སྟངས་འདི་ཡང་ཤེས་མེད་པ་འདྲ།
བདག་གིས་དེ་སྔ་ལས་ཆིག་སྒྲིལ་གྱི་བསམ་བློ་ཤུགས་ཆེ་ད་དུང་མ་ཉམས་པ་དག་སླར་གསོ་དང་མ་ཉམས་པ་དག་གོང་སྤེལ་ཕྱིར་མནའ་གན་རྡོ་རིང་བཞེངས་དགོས་ཚུལ་བརྗོད་ཀྱིན་ཡོད་པ་ཧ་གོ་བར་གྱིས།
ཁས་ལེན་དམ་བཅའ་ནི་འགྲོ་བ་མིའི་རིགས་ཀྱི་ཐུན་མོང་ལུགས་སྲོལ་ཞིག་ཡིན་ལ་ཆོས་ལྡན་བོད་མི་རིགས་ལ་མཚོན་ན་དར་སྲོལ་དང་ནུས་པ་ཆེ་བ་ཞིག་ཀྱང་ཡིན། སྡོམ་པ་ལེན་པ་ཟེར་བ་དེ་ཡང་དོན་ལ་དམ་བཅའ་བ་ཞིག་རེད།
བདག་གི་དམིགས་འབེན་ཆེ་ས་ནི་བོད་གཞིས་བྱེས་སེར་སྐྱ་མི་དམངས་སྤྱི་ཡིན་པ་ལས་བོད་མི་རྫུན་མ་དང་ཅོལ་ཆུང་ཁྲེལ་མེད་སོགས་མིན། བཅོས་སུ་མེད་པ་དག་ནི་བཅོས་སུ་མེད་པ་རེད། བཅོས་སུ་ཡོད་པ་དག་ནི་བཅོས་པར་རིགས་པས་སོ།
མནའ་ནག་བཞགས་རྒྱུ་ལ་མོས་མཐུན་མེད་ཟེར་ནས་བཅོས་རོགས་ཡིག་ནོར་བྱུང་འདུག
ཆབ་བྲག་ལགས།
ད་ལྟའི་བར་དུ་མནའ་གན་མང་པོ་བཞགས་མྱོང་ཡོད་སྤྱི་འཐུས་དང་བཀའ་བློན་བཀའ་བློན་ཁྲི་པ་རེ་འཕོ་འགྱུར་བྱ་དུས་དཀོན་མཆོག་དཔང་དུ་བཙུགས་ཕྱོགས་རེས་མི་བྱེད་པར་བོད་སྤྱི་བའི་མི་ཞིག་བྱ་གི་ཡིན་ཟེར་ནས་མནའ་བསྐྱལ་གི་ཡོད་ཀྱང་མནའ་ཚིག་གི་ནང་དོན་བཞིན་ལས་ཀ་བྱ་གི་ཡོད་མེད་ཤེས་གསལ་རེད།
དཔེར་ན་སྤྱི་འཐུས་གྲོས་ཚོགས་ནང་དུ་གནས་ཚུལ་གང་འདྲ་བྱུང་སོང་ཁྱེད་ཀྱི་མཁྱེན་གསལ་རེད།
དེ་དང་དེ་འདྲའི་གནས་ཚུལ་མང་པོ་ཡོད།
མ་འོངས་པར་བོད་པའི་མི་ཚང་མ་མནའ་ཚིག་དང་འགལ་བའི་ལས་ཀ་བྱ་མཁན་རྐྱང་རྐྱང་ཆགས་ན་མི་གཞན་གྱི་མཐོང་ཕྱོགས་ཡང་ཡག་པོ་མེད་པར་ཆགས་ཀྱི་རེད།
དོན་ངོ་མའི་ལས་ཀ་བྱ་མཁན་ཚོ་ལ་མནའ་བསྐྱལ་བཅུག་དགོས་བ་མ་རེད།
ངོ་ལྐོག་རྒྱབ་མདུན་གྱི་ལས་ཀ་བྱ་མཁན་ཚོ་ལ་མནའ་བསྐྱལ་དུ་བཅུག་ཀྱང་མནའ་ཚིག་བཞིན་ལས་ཀ་བྱ་གི་མ་རེད་རྒྱུ་མཚན་དེས་མནའ་གན་ཟེར་བ་དེ་བཞགས་རྒྱུ་མ་ལ་མོས་མཐུན་མེད་ལ་གལ་སྲིད་བཞགས་སོང་ན་ང་རང་མནའ་གན་དེའི་ནང་དུ་འཛུལ་རྒྱུ་མིན།
ཆབ་བྲག་ལགས།
ཁྱེད་ཀྱིས་རྩོམ་པ་པོ་མང་ཉུང་གི་ཆ་ནས་བོད་ཁྱོན་ཡོངས་ནས་ཚོགས་མི་མང་ཉུང་ཆགས་པ་རེད་གསུངས་འདུག་པེན་རྩོམ་པ་པོ་ཚོགས་པ་ལ་མི་བརྒྱ་ལྷག་ཡོད་གསུངས་འདུག་་་་་་ཚོ་མི་དེ་ཚོ་ཡོངས་རྫོགས་རྩོམ་པ་པོ་རྐྱ་རྐྱང་རེད་དམ།
གལ་སྲིད་དེ་ཡིན་ན་རྩོམ་པོ་ཡིན་མིན་གྱི་ས་མཚམས་གང་ལ་བཞགས་དགོས་ལགས།
ཁྱེད་ཀྱིས་ང་ལ་བཏོན་པའི་ཆ་རྐྱེན་བཞིན་དུས་དེབ་ཤས་ནང་དུ་རྩོམ་ཡིག་རེ་ཟུང་བྲིས་མྱོང་བ་རྩམ་གྱི་རྩོམ་པ་པོ་ཆགས་སོང་བ་རེད་དམ།
དེ་འདྲ་ཡིན་ན་ང་དང་ངའི་གྲོགས་པོ་ཚང་མ་རྩོམ་པ་པོ་ཆགས་ཚར་སོང་་་་་་་་ང་ཚོ་ཚང་མ་ལ་རྩོམ་པོའི་ཆ་རྐྱེན་ཚང་འདུག་་་་་་་་་ཚོགས་མིའི་ཆ་རྐྱེན་ཡོངས་རྫོགས་ཚང་འདུག་་་་་་རྩོམ་ཡིག་རེ་ཟུང་བྲི་ཤེས་བའི་ང་ལྟ་བུ་ལ་རྩོམ་པ་པོའི་མིང་བྱང་རྫིག་པོ་དེ་གནང་བཞགས་ན་རྩོམ་པ་པོ་ཟེར་བ་དེ་ལ་རིན་ཐང་གང་ཡང་མེད་པར་ཆགས་སོང་བ་མ་རེད་དམ།
འདི་ངོས་ལེན་ཞུ་ཐུབ་མ་སོང་།
མནའ་གན་རྡོ་རིང་གི་དམ་ཚིག་ནང་དོན་རགས་ཟིན།
མནའ་གན་གྱི་དཔང་པོ། ༡།༸རྒྱལ་བ་ཡིད་བཞིན་ནོར་བུ། ༢། དམངས་གཙོའི་བཅའ་ཁྲིམས་རིན་པོ་ཆེ། སྔོན་གཤེགས་དཔའ་རྟུལ་རྣམ་པ།
མནའ་ཚིག་གི་ནང་དོན། ༡༽ ༸གོང་ས་མཆོག་གི་བཀའ་དྲིན་རྗེས་སུ་དྲན་བཞིན་ནམ་ཡང་གང་གི་བཀའ་དགོངས་དང་འགལ་བར་མི་བྱ། ༢༽བཅའ་ཁྲིམས་ལ་བརྩི་སྲུང་གིས་དམངས་གཙོའི་ལམ་ལུགས་ལག་བསྟར་ཡོང་བར་འབད་བརྩོན་བྱ་རྒྱུ། ༣༽ཕ་སྤྲེའུ་དང་མ་བྲག་སྲིན་ལས་མཆེད་པའི་ཤ་ཁྲག་གདུང་རྒྱུད་གཅིག་པའི་ལོ་རྒྱུས་རྗེས་སུ་དྲན་བཞིན་བོད་ཆོལ་ཁ་གསུམ་པོ་ནམ་ཡང་ཁྱིམ་ཚང་གཅིག་གི་སྤུན་ཟླར་བརྩི་རྒྱུ། ༤༽ ཆོས་ལུགས་སམ་ཆོས་བརྒྱུད་དང་ཆབ་སྲིད་ཀྱི་ལྟ་ཚུལ་མི་འདྲ་བ་སོགས་ཀྱང་ནམ་ཡང་ཕན་ཚུན་དགྲ་ཟླར་མི་འཛིན་པར་འཆམ་མཐུན་ལ་འབད་རྒྱུ། ༥༽ བོད་ཀྱི་རྩ་དོན་ཐད་ལ་མངོན་ལྐོག་རྒྱབ་མདུན་མེད་པར་བསམ་པ་རྣམ་དག་གིས་རང་གི་ནུས་པ་གང་ཡོད་འདོན་རྒྱུ།
མནའ་གན་འདི་ནི་རྒྱལ་གཅེས་དཔའ་རྒོད་རྣམ་པར་གུས་འདུད་རྗེས་དྲན་ཡིན་ལ་ད་ལྟའི་བོད་མིའི་སེམས་པ་པ་དང་ནུས་པ་ཆིག་སྒྲིལ་དང་མ་འོངས་རྗེས་རབས་རྣམས་ལ་དྲན་གསོའི་སྐུལ་ལྕག་བཅས་ཀྱི་ཆེད་དུ་ཡིན།
ནང་དོན་གཙོ་བོ་འདི་འདྲ་ཞིག་བཀོད་ན་འགབ་མིན་ཐད་ལ་ལྷག་བསམ་དང་རྣམ་དཔྱོད་ལྡན་པ་རྣམས་ཀྱིས་བསམ་གཞིགས་གནང་བར་འཚལ།
འགྱུར་མེད་བསྟན་འཛིན་སོགས་ང་ཚོའི་མཐུན་ཚོགས་ཞུགས་འདོད་ཡོད་ན་ཞུགས་ཆོག ཆ་རྐྱེན་གཅིག་ནི་དུས་དེབ་སོགས་སུ་རྩོམ་ཡིག་ཚད་ལྡན་བཅུ་གྲངས་ཤིག་སྤེལ་ཡོད་པ་དང། ཚོགས་པའི་སྒྲིག་གཞི་བརྩི་སྲུང་བྱེད་པ་གཉིས་ལས་ཅང་མེད། ཐ་ན་མང་པོ་ཞིག་གིས་པེན་ཨ་མ་ལ་ཚོགས་དངུལ་སྤྲོད་དགོས་པས་་ཚོགས་དངུལ་ལོ་གསུམ་རེར་མི་གནང་མཁན་མང་གི དེ་འདྲ་བྱུང་ན་པེན་ཨ་མས་ཚོགས་དངུལ་སྤྡད་མེད་པའི་མི་དེ་ཚོགས་ཁུངས་ནས་རང་བཞིན་ཕྱིར་འབུད་ལ་བརྩི་གི་རེད་ཡ་་་ང་ཚོ་ལ་ཐབས་ཤེས་ཅི་ཡོད། དང་པོ་ནས་ཚོགས་པར་ཞུགས་ན་ཚོགས་དངུལ་ཞིག་སྤྲོད་དགོས་པ་སུས་ཀྱང་ཧ་གོ་དོན་གསལ་རེད་པ།
མི་ཉག་བཙན་པོ་ལགས། ངས་འདི་ན་ང་ཚོའི་མཐུན་ཚོགས་ཀྱི་ཚབ་བྱས་ནས་་དམག་སྤྱི་ཞིག་གི་ཚུལ་དུ་ལས་བགོས་དང་འབོད་སྐུལ་ཞུ་བཞིན་པ་འདི་མཉམ་ཞུགས་དང་ལས་འགུལ་ཞིག་མ་རེད་དམ།
འགྱུར་མེད་ལགས། ཁྱོད་ཀྱིས་ང་ཚོའི་ཚོགས་མིའི་ནང་ལ་ཆོལ་ཁ་གསུམ་གྱི་མི་མེད་པའི་རྒྱུ་མཚན་ཅི་རེད་ཅེས་དྲིས་སོང་ང། ངས་ཆོལ་ཁ་གསུམ་གྱི་མི་ཡོད། མང་ཉུང་ཆེན་པོ་ཡོད་ལབ་པ་ཡིན། མ་གཞི་རང་གིས་མགོ་ཚོས་ལ་མ་ཚོས་ལའི་སྐད་ཆ་བཤད་གི་ཡོད་ས་རེད། ཡིན་ན་ཡང་ང་འདིའི་འགོ་འཛིན་འདྲ་བོ་ཞིག་ཡིན་པའི་ཆ་ནས་གསལ་བཤད་བྱེད་དགོས་པ་ངའི་འོས་འགན་རེད།
ད་བརྗོད་གཞི་དངོས་ཐོག་ལ་ཕན་པ་རེ་བཤད་རྒྱུ་མེད་དམ།
འདྲེ་མགོ་རྡོས་དབུས་གཙང་དང་ཁམས་ལ་ཡིག་གེ་བྲི་མཁན་དང་རྩོམ་ཡིག་བྲི་མཁན་མཛུབ་མོ་ཐོག་ལ་བརྩི་གི་ཡིན་ན་གཅིག་བརྩིས་དང་དྲ་གྲོགས་ཚོས་ཟུར་ནས་ལྟད་མོ་ལྟ་གི་རེད།
འདྲེ་མགོ་རྡོ་དང་ལྷ་མོ་སྐྱབས་གཉིས་ལ་ཞུ་རྒྱུ།
པེན་རྩོམ་པོ་མཐུན་ཚོགས་དེ་ནུས་པ་དང་གྲུབ་འབྲས་མི་ཐོན་པ་ཞིག་རེད་བཤད་མེད་ལ་བཤད་འདོད་ཀྱང་མེད་གནས་ཚུལ་དེའི་ཐོག་ལ་རྒྱུས་ལོན་ཡང་གང་མེད།
པེན་བོད་ཀྱི་རྩོམ་པ་པོ་ཟེར་བའི་མིང་འདི་ཁུར་བའི་རྒྱུ་མཚན་གྱིས་བོད་ཁྱོན་ཡོངས་ཀྱི་མི་ཡོད་ན་མཚམས་པོ་འདུག་ཞུ་གི་ཡོད།
མང་ཉུང་ཀྱི་སྐད་ཆ་བཤད་བ་དེ་ཅུང་ཧམ་པ་ཆེ་བ་མིན་འགྲོ།
འགྱུར་མེད་ཟེར་བ་ལགས།
མི་མེད་པ་མ་ཞུགས་པས་རེད། ལར་ནས་དབུས་གཙང་ལྟ་བུར་མཚོན་ན་ཡི་གེ་འབྲི་མཁན་ཉུང་ཉུང་རེད་ལ། ཁམས་པ་ཚོའང་དེ་བཞིན་ཞེ་དྲག་རང་རྩོམ་རིགས་རིག་པ་འདི་ལ་དགའ་བོ་མི་འདུག་བསམས་སོང་། བཙན་བྱོལ་ནང་དེ་བས་ཀྱང་ཉིན་སྐར་ལྟར་ཆགས་ཟིན་པ་མཛུབ་མོ་བཀུགས་ནས་རྩིས་ན་ལོས་ཤེས་བསམས།
ང་ཚོགས་མི་མིན་ལ། དེའི་ཁྱད་ནུས་ཀྱང་ཚང་མེད། འོན་ཀྱང་རྩོམ་པ་པོའི་དཔུང་ཁག་ཅིག་གིས་ཛ་དྲག་ངང་ཀླད་པ་བརྡར། སྒོར་སྒོར་བྱས་ཏེ་གྲོས་ལ་འདུས་ན། གཅིག་བྱས་ན་མ་འདྲ་བ་རེ་སྟོན་རྒྱུ་ཡོད་སྲིད་པ་རེད། ད་ཐེངས་མཐུན་ཚོགས་ཀྱིས་དབུ་བརྩམས་པ་ཡིན་ཙང་། ཡི་གེ་ཁ་ཤས་བྲིས་པ་ཙམ་མིན་པར་ཅིག་བྱེད་རྒྱུ་ཨེ་ཡོད་ལ་ལྟོས་ན་འདི་རབ་ཅིག་ཏུ་མཐོང་གི་ཡོད། དེ་མིན་ཤོག་ལྷེ་མང་རོགས་རེད།
མི་ཉག་བཙན་པོ་ལགས། ཚོགས་པ་ཞིག་གི་རིན་ཐང་དེ་ཚོགས་པ་རང་ནས་བསྐྲུན་དགོས་ཟེར་བ་བདེན་པ་རེད། ངས་བལྟས་ན་ང་ཚོའི་ཚོགས་པ་ཡང་ཚོགས་པ་གཞན་ལ་འགྲན་དུ་མེད་པའི་གནས་སྟངས་ཤིག་མཐོང་གིན་མེད། དེ་བཞིན་ང་ཚོས་ཆབ་སྲིད་དང་འབྲེལ་བའི་ལས་དོན་ལ་ཁ བྲལ་ཡང་མེད། འོན་ཀྱང་རྩོམ་པ་པོ་རྣམ་པའི་ལས་ཀ་འདི་མིག་ཡོད་ཙམ་གྱིས་མཐོང་སླ་བ་ཞིག་མིན། ང་ཚོའི་ཚོགས་མི་ཚོས་རང་རང་ས་ན་རྩོམ་འབྲི་ཅི་རིགས་སྤེལ་གྱིན་ཡོད། གལ་ཏེ་ང་ཚོའི་ཚོགས་པོ་སྙུག་ཐོགས་པ་ཚོས་སྙུ་གུ་དོར་འདུག རྩོམ་པ་དང་ཁ་བྲལ་འདུག་ན་དེ་ང་ཚོའི་ལས་དོན་གཙོ་བོ་མ་འགྲུབ་པ་རེད། དེ་བས་ཁྱེད་ཅག་གིས་ང་ཚོའི་རྩོམ་པ་པོའི་ཚོགས་པ་དང་ཚོགས་པ་གཞན་དག་བར་ལ་ངོས་འཛིན་བྱེད་སྟངས་མ་ནོར་རོགས།
རྒྱལ་སྤྱིའི་པེན་ཟེར་ན་རྒྱལ་ཁབ་བརྒྱ་ལྷག་གི་ཚོགས་སྡེ་ཆེ་ཆུང་འཛོམས་པའི་རླབས་ཆེན་དང་གཟི་བརྗིད་ཀྱི་རང་དབང་ཚོགས་པ་ཞིག་ཡིན། འདི་དག་གིས་ང་ཚོར་མཐོང་ཆུང་མ་བྱས་ད་་་ད་དུང་རྒྱབ་སྐྱོར་དང་མཐུན་འགྱུར་ཇེ་ལེགས་རེད། སྤྱི་ཚོགས་མེ་ལོང་ཚགས་པར་ཞིག་ཟླ་རེ་བཞིན་འདོན་གྱིན་ཡོད། བོད་ཡིག་དྲ་རྒྱ་ཞིག་ཀྱང་ཡོད། ཚོགས་མི་ཡང་བརྒྱ་ཁ ལོངས་ཙམ་ཡོད། ང་ཚོས་མི་འཇོན་ས་གཙོ་བོ་སྤྱི་ཚོགས་ཀྱི་གར་སྟེགས་སུ་འཁྲབ་སྟོན་བྱེད་མི་ཤེས་པ་དེ་རེད། འོན་ཀྱང་མཁས་དབང་ཁྲི་ཟུར་ཟམ་གདོང་རིན་པོ་ཆེ་མཆོག་དང་བཀའ་ཟུར་སྐལ་བཟང་ཡེ་ཤེས་མཆོག་སོགས་ཀྱིས་ང་ཚོར་མཐུན་འགྱུར་དང་གདེང་འཇོག་གནང་གིན་ཡོད་པས། དེས་བདག་ཡིད་ཅུང་ཚིམ་ཡོད།
འགྱུར་མེད་བསྟན་འཛིན་ལགས། པེན་བོད་ཀྱི་མཐུན་ཚོགས་སྔ་རྗེས་ཚང་མའི་ནང་ན་ཆོལ་ཁ་གསུམ་གྱི་མི་ཡོད། འོན་ཀྱང་དབུས་གཙང་པ་ཉུང་ལ་ཁམས་པ་དེ་བས་ཀྱང་ཉུང།
ཐོག་མར་ཁ་བྱང་འདི་ལྟར་གྲུབ་དགོས་ན་ཆིག་སྒྲིལ་གྱི་སེམས་པ་དང་གཅིག་གྱུར་གྱི་ངོ་རྒོལ་ཟེར་བ་ལ་འོག་ཏུ་སྔོན་གཤེགས་དཔའ་བོ་རྣམས་ལ་རྗེས་དྲན་དང་ལྷན་མ་འོངས་རྗེས་རབས་རྣམས་ལ་དྲན་གསོའི་རྟེན་དུ་མནའ་གན་རྡོ་རིང་ཆེན་མོ་ཞིག་བཞེངས་ཐུབ་ན་ལེགས། (འདི་ལ་ཆོལ་གསུམ་དབུས་སྤྱི་ཁྱབ་ཁང་དང་གཞོན་ནུ་ཚོགས་པ་དང་བུད་མེད་ཚོགས་པ་རྣམ་པས་དབུ་ཁྲིད་དེ་གཞུང་འབྲེལ་མ་ཡིན་པའི་ཚོགས་པ་ཆེ་ཆུང་ཚང་མ་མཉམ་འབྲེལ་གྱིས་ནུས་པ་འདོན་ཐབས་ཀྱི་ལས་འགུལ་སྤེལ་འོས་ཞེས་བགོད་འདུག་པས་བསམ་བློ་ཞིབ་ཏུ་གཏོང་རོགས་མི་མང་ནང་ཆིག་སྒྲིལ་མི་ཡོངས་རྐྱེན་གཙོ་བོ་དེ་འདི་དག་ཡིན།
ཆབ་བྲག་ལགས་པེན་གྱི་ཚོགས་པ་འདིའི་ནང་དུ་ཆོལ་ཁ་གསུམ་གྱི་མི་མེད་པའི་རྒྱུ་མཚན་གང་ལ་ཐུག་ཡོད།
དྲི་བ་དེ་ལ་ལན་ཞིག་གནང་རོགས།
རྒན་ཆབ་བྲག་ལ་བསྐྱར་དུ་ཞུ་རྒྱུར།
བོད་ཀྱི་རྩོམ་པ་པོའི་མཐུན་ཚོགས་དེ་དབུ་འཛུགས་བྱས་ནས་ལོ་མང་སོང་ཡོད་ན་ཡང་ད་དུང་མི་དམངས་དང་
དབུས་གཞུང་ནས་གདེང་འཇོག་སླེབས་མ་ཐུབ་པ་དང་ངོས་ལེན་མེད་པའི་རྒྱུ་མཚན་ནི་ཚོགས་པ་རང་ཉིད་ནས་
ཚོགས་པ་དེ་ལ་གདེང་འཇོག་སླེབས་ཐུབ་པའི་ཕྱག་ལས་གནང་མེད་པ་དེ་ཉིད་དོན།
ལྷ་མོ་སྐྱབས་ལ་ཞུ་རྒྱུར།
སྤྱིར་བཏང་རྒྱལ་ཁབ་ཁག་ཡོད་དོ་ཅོག་ལ་གཞུང་འབྲེལ་མིན་པའི་རང་སྐྱོང་གི་ཚོགས་པ་ཆེ་ཕྲ་ཆུང་གསུམ་མང་པོ་ཡོད་པ་དང་རང་སྐྱོང་གི་ཚོགས་པ་ཁག་ལ་དབུ་གཞུང་ངོས་ནས་དམིགས་བསལ་ལྟ་རྟགས་མི་འདྲ་བ་ཡོད་ཀྱང་རུང་མེད་ཀྱང་རུང་།རང་སྐྱོང་གི་ཚོགས་པ་ཁག་གི་རྐང་འཛིན་པ་འགོ་གཙོ་རྣམས་ནས་རང་སྐྱོང་ཚོགས་པ་དེའི་དམིགས་ཡུལ་དང་སྒྲུབ་བྱ་ལངས་ཕྱོགས་དང་མཚན་གནས་གཞི་བཟུང་གི་ཚོགས་པ་དེ་ལ་རང་ཆས་སུ་ཡོད་པའི་ནུས་པ་དང་ཐོ་ཐང་རང་དབང་རྣམས་བེད་སྤྱོད་གཏོང་ཐུབ་པ་དགོས་རྒྱུ་དེ་གཅིག་མཚུངས་རེད།ཚོགས་པ་དེ་ལ་མི་དམངས་དང་གཞུང་གིས་གདེང་འཇོག་དང་མཚན་ཐོག་སླེབས་མིན་ཚོགས་པ་རང་ཉིད་ལ་རག་ལས་པ་རེད།
དབུ་གཞུང་ངོས་ནས་ཚོགས་པ་ཆེ་ཆུང་ཚང་མ་ལ་རང་དབང་དང་ཐོ་ཐང་འདྲ་མཉམ་སྤྲད་དགོས་པ་དེ་རྒྱལ་ཁབ་ཁག་གི་ལངས་ཕྱོགས་གཅིག་མཚུངས་རེད།
བོད་མི་རྣམས་ལ་ལས་དབང་དེ་འདྲ་འཕྲད་བཞིན་པའི་སྐབས་ལ་གཞན་གྱི་གདེང་འཇོག་བྱེད་མིན་ལ་མ་སྙད་པར་ཚོགས་པ་ཡོད་དོ་ཅོག་ནས་ནུས་པ་འདོན་རྒྱུ་དང་ལེགས་སྐྱེས་གང་ལེགས་འབུལ་རྒྱུའི་དུས་ཚོད་སླེབས་ཡོད།
སྲིད་དོན་གྱི་ལས་འགུལ་གཙོ་བོར་བྱས་པའི་ཚོགས་པ་ཤིག་མིན་ཀྱང་ལས་འགུལ་སྣ་མང་ཞིག་སྤེལ་རྒྱུ་ཡོད་།
དཔེ་ན་གདན་ས་ཁག་གི་གྲྭ་པ་རྣམས་ཆབ་སྲད་པ་མིན་ལ་གདན་ས་ཁག་ཆབ་སྲིད་ཚོགས་པ་དེ་བས་མ་རེད།
ལས་འགུལ་སྣ་ཚོགས་ཀྱི་གཙོ་འགན་བཞེས་བཞིན་པ་ནི་གུས་ཉིད་ནས་མི་མཐོང་པ་ག་ལ་སྲིད།
ཡིན་ན་ཡང་དུས་སྐབས་ཀྱི་དབང་གིས་ཚོགས་པ་ཡོད་ཚད་དང་བོད་མི་རྩམ་ཟན་ཡོད་དོ་ཅོག་ཆབ་སྲིད་པ་དང་དེའི་ཚོགས་པ་ཡིན་མིན་ལ་མི་ལྟོས་པར་ལས་འགུལ་ནང་མཉམ་ཞུགས་དགོས་པ་དེ་བོད་ཀྱི་རྩ་དོན་མིན་ནམ།
མི་ཉག་བཙན་པོའི་བཀའ་འདྲི་ཡང་ཚ་སེ་འདུག དགའ་བོ་བྱུང། གཞེན་སྐུལ་འདི་ཡང་ལས་འགུལ་ཞིག་ཡིན་སྙམ་ཡོད། འདི་མཐུན་ཚོགས་ཚབ་བྱས་ནས་ཚོགས་གཙོའི་མིང་ཐོག་ན་སྤེལ་གྱིན་ཡོད།
གཞུང་གིས་ནམ་རྒྱུན་ནས་གཞུང་འབྲེལ་མ་ཡིན་པའི་ཚོགས་པ་ཆེན་པོ་བརྒྱད་ཅེས་པ་ལས་་ཚོགས་སྡེ་གཞན་དག་གདེང་འཇོག་་མི་བྱེད་པ་རེད། དཔེར་ན་བོད་གཞུང་དམངས་ཚོགས་ཆེན་སྔ་ཕྱི་གང་ཡིན་ནང་ལ་ཡང་པེན་བོད་ཀྱི་རྩོམ་པ་པོའི་མཐུན་ཚོགས་ལྟ་བུ་ཡང་ངོས་ལེན་བྱེད་ཀྱིན་མེད།
དེ་བས་འདིར་ཡང་ང་ཚོས་བློ་འདོན་འདྲ་བོ་བྱས་ནས་ཚོགས་པ་ཆེན་པོ་བརྒྱད་ཀྱིས་མཉམ་འབྲེལ་གྱིས་ཚོགས་སྡེ་གཞན་དག་ལ་མཐུན་ལམ་འཛིན་པའི་རེ་བ་ཞུ་གིན་ཡོད།
མ་གཞི་ནས་ཚོགས་པ་འདི་སྲིད་དོན་གྱི་ལས་འགུལ་གཙོ་བོར་བྱས་པའི་ཚོགས་པ་ཞིག་མིན་པ་ཤེས་དགོས། གཙོ་བོ་ལོ་རེའི་རྒྱལ་སྤྱིའི་པེན་གྱི་ཚོགས་ཆེན་ནང་ལ་མཉམ་ཞུགས་ཀྱིས་བོད་དོན་གླེང་སློང་དང་ལྷག་པར་བོད་ཀྱི་བཙོན་ནང་གི་རྩོམ་པ་པོའི་གནས་སྟངས་ཡར་ཞུ་དང་གྲོས་ཆོད་འཇོག་ཐུབ་བྱུང་ཡོད། དེ་མིན་དཔྱད་རྩོམ་གྱིས་གཙོས་རྩོམ་འབྲིའི་ལམ་ནས་ལས་ཀ་བྱེད་བཞིན་པ་རེད།
བཀུར་འོས་ལྷ་མོ་སྐྱབས་ལགས་ལ་ཞུ་རྒྱུར།
གུས་ཉིན་ནས་སྤེལ་བའི་དགོངས་འཆར་དག་ལ་རྒྱབ་སྐྱོར་དང་མོས་འདུན་ཡོད།
གུས་ཉིད་ཀྱི་དགོངས་འཆར་གྱི་ནང་ལས་དོན་ཁག་ལྔ་ནས་དང་པོ་(ཀ)དེ་ཕྱི་དྲིལ་བཀའ་བློན་ནས་གཙོ་འགན་བཞེས་རྒྱུ་དང་།
ལས་དོན་གཉིས་པ་(ཁ)་དེ་སྤྱི་མཐུས་ལྷན་ཚོགས་ནས་གཙོ་འགན་བཞེས་རྒྱུ་དང་།
ལས་དོན་གསུམ་པ་(ག)དེ་ཆོལ་གསུམ་དབུས་སྤྱི་ཁྱབ་ཁང་དང་གཞོན་ནུ་ཚོགས་པ་དང་བུད་མེད་ཚོགས་པ་རྣམ་པས་བཞེས་རྒྱུ་དང་།
ལས་དོན་བཞི་པ་(ང)་དེ་ཆོས་དོན་ལས་ཁུངས་ཀྱིས་ཐུགས་འགན་རྐང་ལེན་གནང་འོས་སྙམ་ཞེས་དང་།
ལས་དོན་ལྔ་པ་(ཅ)་དེ་བདེ་སྲུང་ལས་ཁུངས་ནས་ཐུགས་འགན་གནང་འོས་སྙམ་ཅེས་གསུངས་འདུག་ན་བདེན་པ་ལྟར་ངོས་འཛིན་བྱས་ཆོག།
གུས་ཉིད་ནས་ཚོགས་པ་ཁག་ལ་ལས་དོན་རྣམས་ཆ་བགོས་གང་ལེགས་བྱས་འདུག་མོད། གུས་ཉིད་ལ་ཞུ་རྒྱུར།
གུས་ཉིད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་ཡིན་པས་རྩོམ་པ་པོ་མཐུན་ཚོགས་ནས་གཙོ་འགན་བཞེས་ནས་ལས་འགུལ་འདྲ་སྤེལ་འཆར་མེད་དམ་ཅེས་
པའི་དྲི་གཅིག་དང།
བོད་ཀྱི་རྩོམ་པ་པོ་མཐུན་ཚོགས་ནས་འགན་བཞེས་ནས་ལས་འགུལ་དེ་དག་དང་ཡང་ན་ལས་འགུལ་གཞན་ནང་མཉམ་ཞུགས་ཀྱིས་ལས་འགུལ་སྤེལ་འཆར་མེད་པ་ཨེ་ཡིན་ཅེས་པའི་དྲི་གཉིས་རེད།བོད་ཀྱི་རྩོམ་པ་པོའི་མཐུན་ཚོགས་ངོས་ནས་འཆར་གཞི་དང་གོ་སྒྲིག་གང་གནང་འཆར་ཡོད་ཅེས་དྲི་བ་གསུམ་པ་དེ་རེད།
གལ་སྲིད་མེད་ན་ཚོགས་གཙོའི་མཚན་སྙན་པོ་དེ་དང་ཚོགས་པ་དེ་རང་དོན་ཁོ་ནའི་ཆེད་དུ་བེད་སྤྱོད་གཏོང་རྒྱུ་ཡིན་ནམ་ཅེས་དྲི་བཞི་པ་དེ་རེད།
འདས་པའི་ལོ་རབས་ནང་བོད་ཀྱི་རྩོམ་པ་པོའི་མཐུན་ཚོགས་ནས་བོད་ཀྱི་རྩ་དོན་ལ་ཕན་པའི་ཆབ་སྲིད་ཀྱི་ལས་འགུལ་འདྲ་སྤེལ་མྱོང་ཡོད་དམ་ཅེས་དྲི་བ་ལྔ་པ་དེ་རེད།
བཀུར་འོས་བོད་མི་ཞིག་ནས་འགན་ཁུར་མི་དགོས་པའི་དགོངས་འཆར་དང་མཉམ་ཞུགས་མི་དགོས་པའི་ལས་འཆར་དང་། ཟུར་བཞུགས་མི་མངོན་པའི་ཚོགས་གཙོ་ཞིག་གནང་ན་མི་འགྲིག་སྙམ།གཞན་ལ་བཤད་རྒྱུ་རྐྱང་རྐྱང་ཨེ་ཡིན།
བློ་མཐུན་འདྲེ་མགོ་རྡོ་ལ་སླར་ཡང། ཤེས་ཡོན་པ་དང་རྩོམ་པ་པོ་རྣམ་པས་གནད་དོན་ལ་བསམ་གཞིགས་ཀྱིས་ལེགས་ཉེས་དང་བྱེད་ཐབས་སོགས་ཡར་ལ་སྙན་ཞུ་དང་མར་ལ་སྣེ་ཁྲིད་ཀྱི་འགན་འཁུར་དགོས་པར་མཐོང། བསམ་ཚུལ་འདི་ཡང་མཐུན་ཚོགས་ཀྱི་ཚབ་བྱས་ནས་ཞུ་གིན་ཡོད།
གཞན་དམིགས་བསལ་མི་རིགས་ཁག་གི་རང་དབང་རྩོམ་པ་པོ་རྣམ་པ་དང་མཉམ་འབྲེལ་དང་ཚོགས་འདུ་བསྡུ་སྐོང་བྱེད་འོས་པ་དང་དགོས་ངེས་སུ་མཐོང། ཁྱེད་རང་ཡང་ཚོགས་མི་ཞིག་ཡིན་ནམ།
སྒྲོལ་མ་ལགས། ཁྱེད་དང་རོགས་པ་སྐོར་ཞིག་བགྲོ་གླེང་འདིའི་ཐོག་ལ་ཕེབས་པར་དགའ་སྤྲོ་ཆེ། དམིགས་བསལ་སྐུ་མགྲོན་ཡིན། གྲལ་མགོ་ལ་བཞུགས། དགོངས་འཆར་ལྷུག་བརྗོད་ཡོང་བའི་རེ་བ་ཡོད།
དགེ་རྒན་ཆབ་བྲག་ལྷ་མོ་སྐྱབས་ལགས། གུས་མོས་སྤྱི་ལོ་ 2008 ཡས་མས་སུ་ནམ་རྒྱུན་བོད་ཀྱི་དུས་བབ་དྲ་ཚིགས་ནང་འཛུལ་ཏེ། ཕྱི་སྡོད་བོད་མི་ཚོ་དང་བསམ་ཚུལ་བརྗེ་རེས་དང་མཚམས་རེར་རྩོད་པ་ཡང་ཐེངས་མང་བྱས་མྱོང་ཡོད། བར་སྐབས་ཤིག་ལ་བདག་གི་ལས་གནས་ལ་འཕོ་འགྱུར་ཕྱིན་སོང་ལ། དུས་དེ་ནས་བཟུང་བརྡ་འཕྲིན་ལ་ཡང་ཁ་གྱེས་དགོས་བྱུང་སོང་བས་ཕྱི་ཕྱོགས་སུ་གླེང་མོལ་བྱ་རྒྱུར་ཡང་སྟབས་བདེ་མེད་པར་གྱུར་སོང་། འོན་ཀྱང་ཐབས་བརྒྱ་ཇུས་སྟོང་གིས་གཟའ་འཁོར་རེའི་ནང་བོད་ཀྱི་དུས་བབ་དྲ་བའི་སྟེང་སྐོར་གཡེང་རེ་བྱ་རྒྱུ་ཆད་མྱོང་མེད་ལ། གསར་འགྱུར་དང་རྩོམ་ཡིག་གི་གཤམ་དུ་དྲ་དམངས་ཚོའི་དཔྱད་གཏམ་ལའང་བམ་ཀློག་རེ་བྱེད་ཀྱི་ཡོད།
ད་ལྟ་གུས་མོ་སླར་ཡང་ཁུ་སིམ་ཁོད་ཡང་གི་ཁོར་ཡུག་ཅིག་དབང་སོང་བས་བྱེས་བཞུགས་སྤུན་ཟླ་ཚོ་དང་ལྷོད་ཀྱིས་བསམ་ཚུལ་རྗེས་རེས་བྱ་ཆོག་ལ། ང་དང་མཉམ་དུ་ཁྱེད་ཅག་ལ་སྙིང་གཏམ་གླེང་བར་སྒུག་ཡོད་པའི་གྲོགས་མོ་གཞན་སྐོར་ཞིག་དང་ཡོད།
འདྲེ་མགོ་རྡོ་ལགས། བདག་གི་རེ་བ་ནི་གཞུང་དང་ཚོགས་སྡེ་ཁག་གིས་དོན་འདིར་བགྲོ་གླེང་རེ་བྱས་ནས་མོས་མཐུན་བྱུང་ན་མཉམ་ལས་གནང་རྒྱུ་ལས་སླ་སྙམ། གལ་ཏེ་ཚོགས་སྡེ་ཁག་གིས་ཁ་མ་གྲགས་པར་བསྡད་ན་དོན་འདི་ང་ཚོའི་བོད་ཀྱི་པེན་ཁོ་ནས་སྒྲུབ་ཐུབ་པ་ཞིག་ག་ལ་ཡིན། བདག་ལ་མཚོན་ན་དྲ་ནང་གི་བགྲེ་གླེང་འདི་ཡང་དོན་གྱིས་ཚོགས་ཆེན་ཞིག་ལ་ངོས་འཛིན་གྱིན་ཡོད། དེ་བས་རང་ཉིད་ཀྱང་གཙོ་སྐྱོང་བའི་འགན་ཡོད་བསམས་ནས་ཧུར་ཐག་གིས་ཁྱེད་ཅག་ལ་ལན་འདེབས་བྱེད་ཀྱིན་ཡོད།
འགྱུར་མེད་བསྟན་འཛིན་ལགས། ངོ་་ལྐོག་རྒྱབ་མདུན་གྱི་ལས་ཀ་སོགས་སྔོན་འགོག་དང་མེད་པ་བཟོ་བར་ཡང་ལོས་ཕན། བདག་གི་བསམ་ཚུལ་ལ་བོད་མི་མཐོ་དམའ་བར་གསུམ་གང་མང་མཉམ་ཞུགས་དང་མཉམ་ཞུགས་དངོས་མ་ཐུབ་ཀྱང་དུས་ཚོད་དེ་ཡོངས་ཁྱབ་གསལ་བསྒྲགས་ཀྱིས་བོད་མི་སོ་སོ་གང་ན་ཡོད་པའི་གནས་དེ་ནས་མི་གཉིས་གསུམ་བརྒྱ་སྟོང་སོགས་ག་ཚོད་ཅིག་མཉམ་འཛོམས་ཐུབ་ན་ལྷན་འཛོམས་དང་མི་ཐུབ་པ་དག་གིས་སོ་སོའི་ཁྱིམ་ནས་ཀྱང་མནའ་གན་ནང་ལ་སེམས་པས་མཉམ་ཞུགས་གནང་ཐུབ་རྒྱུ་རེད།
དེ་རྗེས་ལོ་རེ་བཞིན་དུ་ཉིན་མོ་དེར་དྲན་གསོ་དང་ཉིན་མོ་དེར་མཉམ་འབྲེལ་ཆེན་མོས་ལས་གཞི་སྤེལ་རྒྱུ་སོགས་བདག་ལ་འཆར་སྣང་གི་ས་ཁྲ་མང་ཡ།
གྲྭ་རྒོད་ལགས། བསམ་ཚུལ་དེ་ཡང་མ་རེད་ཟེར་རྒྱུ་མི་འདུག་མོད། གལ་ཏེ་ཐུན་མོང་གི་མོས་མཐུན་ཡོད་པ་ཞིག་ཡིན་ན་ཐུན་མོང་གིས་བྱེད་རྒྱུ་དང། གལ་ཏེ་ཐུན་མོང་གི་མོས་མཐུན་མི་ཡོང་བ་ཞིག་ཡིན་ན་ཐུན་མིན་གྱིས་ལས་ཀ་བྱེད་རྒྱུ་གཉིས་ཡོད་པས། དོན་ཆེན་འདི་འདྲར་ཐུན་མོང་གི་མོས་མཐུན་དང་མཉམ་ལས་མ་གནང་ཚེ་མནའ་གན་རྡོ་རིང་གི་དོན་སྙིང་ཡང་ཆུང་བར་གྱུར་བ་རེད།
དྲག་པོའི་ངོ་རྒོལ་བྱེད་འདུན་ཡོད་པ་ཚོས་ཀྱང་དེ་འདྲ་བྱེད་རྒྱུར་ཐོབ་ཐང་ལོས་ཡོད། འཇིག་རྟེན་སྤྱི་སྲོལ་ལ་ཚུར་དམག་དྲངས་ན་ཕར་དམག་གིས་རྒོལ་བ། དྲག་པོ་ལ་དྲག་པོ་དང་ཞི་བ་ལ་ཞི་བ་ཟེར་བ་ཡང་ཡོད་པ་རེད། འོན་ཀྱང་བདག་གིས་ཡིད་བཞིན་ནོར་བུའི་ལམ་སྟོན་གྱི་འཚེ་མེད་ཞི་བའི་འཐབ་ཇུས་ལ་དོན་སྙིང་ཆེ་བར་ངོས་འཛིན་བྱེད་ཀྱིན་ཡོད།
གལ་ཏེ་དྲག་པོ་རང་ལས་ཞི་བ་བྱེད་འདོད་མེད་མཁན་ཞིག་ཡིན་ན་དེ་ཡང་ལོགས་སུ་དྲག་རྒོལ་ཚོགས་པ་འཛུགས་མི་ཆོག་པ་ཅི་ལ་ཡོད།
མི་ཉག་ལགས་ཀྱིས་མཐོང་སྣང་ངོ་མའི་བསམ་ཚུལ་གླེང་བར་དགའ་བོ་བྱུང། འདི་ན་ཡང་སོག་ལྡོམ་མི་ཉུང་བ་རེ་འདུག ང་ཚོའི་བོད་རྒྱ་ཚོགས་པའི་ནང་ལ་ཡང་ཞུགས་ཡོད། མི་གྲངས་ཀྱི་མང་ཉུང་གཙོ་བོ་མིན། མི་རིགས་ཁག་གི་སྐྱིད་སྡུག་མཉམ་མྱོང་གི་སྒྲིག་འཛུགས་གསར་བ་སྟོབས་དང་ལྡན་པ་ཞིག་འཛུགས་ཐུབ་ངེས་ཡིན། འདིའི་ཐད་ལ་མི་རིགས་གཞན་དག་གིས་ཏཱ་ལའི་བླ་མཆོག་གིས་དབུ་ཁྲིད་དམ་སློབ་སྟོན་པ་གནང་རོགས་ཞུ་མཁན་ཡང་ཡོང་ངེས། ཡིད་བཞིན་ནོར་བུས་ཀྱང་འཚེ་མེད་ཞི་བའི་ལམ་སྟོན་གནང་ངེས་རེད། དེའི་མཚུངས་མིང་དོན་གཉིས་ལྡན་གྱི་སྒྲིག་འཛུགས་ཆེ་ཞིག་ཆགས་རྒྱུ་རེད། ལས་ཀ་ཡང་མང་ཙམ་སྤེལ་ཐུབ་རྒྱུ་རེད། བདག་ལ་འདིའི་ཐད་ན་དེ་སྔ་ཞིག་ནས་ཚོར་སྣང་དང་སེམས་ཤུགས་སྐྱེས་མྱོང།
མཛའ་བརྩེ་ལྡན་པའི་ཀློག་པ་པོ་རྣམ་པ་དང་ལྷག་པར་བསམ་ཚུལ་མཆན་འགོད་པ་རྣམ་པར་དགའ་བསུ་ཞུ། ངས་བསམ་ཚུལ་ཚང་མའི་ནང་དོན་ཟིན་བྲིས་འདེབས་ཀྱིན་ཡོད། ཁ་བརྡ་ནང་ལ་བདག་གིས་བསམ་ཚུལ་མི་མཐུན་པའི་རིགས་ལ་གསལ་བཤད་མང་ཙམ་རེ་བྲིས་ཡོད་པས་དེར་གཟིགས་རོགས། འདིར་བསྐྱར་འབྲི་མི་བྱེད།
ཆབ་བྲག་གིས་མཐུན་འབྲེལ་གྱི་མནའ་གན་བཞགས་དགོས་ཟེར་བའི་ནང་དུ་བཙན་བྱོལ་ནང་གི་ཁྱིམ་ཚང་གསུམ་དེ་ངེས་པར་དུ་ཚུད་དགོས།
ཁོང་ཚོ་གསུམ་གྱི་རྒྱབ་ལོགས་སུ་ཆོས་ལུགས་ལུང་ཚན་གྱི་ལག་པ་སྦྲེལ་ནས་བཙན་བྱོལ་སྤྱི་ཚོགས་དེ་གོང་བུ་ནུས་པ་ཆིག་སྒྲིལ་མེད་བ་ཆགས་ཡོད།
མི་ཚང་གསུམ་དེས་མཐུན་འབྲེལ་བྱ་བའི་མནའ་གན་བཞགས་ན་གཞན་ཚོ་རང་བཞིན་དུ་མཐུན་འབྲེལ་ཤུགས་ཀྱིས་ཆགས་རྒྱུ་རེད།
དགེན་ལྷ་མོ་ལགས་ཀྱི་ལས་འཆར་དང་བསམ་ཚུལ་དེར་ཡིག་ངག་གཉིས་ཐོག་ནས་རྒྱབ་སྐྱོར་བརྒྱ་ཆ་བརྒྱ་ཐམ་ཡོད། ལྷག་པར་དུ་ང་ཚོས་ཡུ་གུར་དང་སོག་པོའི་མང་གཙོ་དོན་གཉེར་བ་ཚོ་དང་ལྷན་དུ་མཉམ་འབྲེལ་ཀྱིས་ནུས་པ་ཆེ་རུ་གཏོང་དགོས་པའི་དུས་ལ་བབ་འདུག ང་རང་ཕྱིར་སོག་ཏུ་ཡོད་སྐབས་ཕྱིར་སོག་དང་ནང་སོག་གི་མང་གཙོ་དོན་གཉེར་བ་མི་ཉུང་བ་ཞིག་གིས་མངོན་ལྐོག་རྒྱབ་མདུན་གཉིས་ནས་རྒྱབ་སྐྱོར་དང་སྐུལ་མ་ཡང་ཡང་བྱས་མྱོང་། འོན་ཀྱང་ད་ནི་ང་རང་རྒྱ་གཞུང་ལ་ཞི་བའི་ངོ་རྒོལ་ཁོ་ནའི་ལམ་དུ་ནམ་ཡང་བསྐྱོད་འདོད་མེད་ལ། ངའི་འདི་ལྟར་གྲོགས་པོ་གྲོགས་མོ་མང་པོ་དང་ལྷན་དུ་སྐད་ཆ་ཞིག་བཤད་མྱོང་། རྒྱ་གཞུང་ལ་དྲག་པོའི་གཏོར་རྒོལ་གཏོང་དགོས་པ་ནི་སྨོས་མེད་རེད། གལ་ཏེ་ནམ་ཞིག་ཡུ་གུར་དང་སོག་པོའི་མང་གཙོ་དོན་གཉེར་བ་ཚོ་དང་ལྷན་དུ་ཕྱི་སོག་གི་རྒྱལ་སར་ཨུ་ལན་པྰ་ཐར་ནང་ཆེ་གསང་བའི་སྒོ་ནས་སྐྱིད་སྡུག་མཉམ་མྱོང་གི་ཚོགས་ཆེན་ཞིག་བསྐོངས་ནས་རྒྱ་ནག་གཞུང་ལ་དྲག་པོའི་གཏོར་བཅོམ་གྱིས་ལས་འགུལ་ཞིག་སྤེལ་དགོས་ཀྱིན་འདུག
ཆབ་བྲག་ལགས། ལས་འཆར་ཐོག་མ་(ཀ) དང་། མཐའ་མ་(ཅ)གཉིས་ལ་མོས་མཐུན་ཡོད། དེ་ཡང་མོས་མཐུན་ཡོད་པ་ཙམ་ཡིན། ལག་ལེན་དངོས་འབེབས་བྱེད་པར་བར་ཐག་གིས་ཆོད་པའི་ཕུགས་བསམ་ལེགས་པོ་ཙམ་ཞིག་རེད། གང་ཡིན་ཟེར་ན་འདས་ཟིན་པའི་ལོ་རྒྱུས་ཀྱི་ཉམས་མྱོང་གཞི་ལ་བཞག་ཅིང་། མདུན་དུ་ལྷགས་པའི་དངོས་ཡོད་གནས་བབ་དཀྱིལ་སྙིང་དུ་བླངས་ཏེ་རགས་ཙམ་དཔྱད་ན། ( ཀ ) “ ཡུ་གུར་དང་སོག་པོ། རྒྱ་རིགས་སོགས་དམངས་གཙོ་དོན་གཉེར་ཅན་ཚང་མར་འབོད་སྐུལ་གྱིས་རྒྱལ་ཁབ་གང་རུང་ཞིག་ཏུ་མི་རིགས་སྐྱིད་སྡུག་མཉམ་མྱོང་གི་ཚོགས་ཆེན་ཞིག་བསྐོངས”ཞེས་པ་འདིའི་ཐད། ཡུ་གུར་ལ་མཚོན་ན་ཕྱི་ཕྱོགས་སུ་སྟོབས་ཤུགས་གང་ལ་གང་འཚམ་ཡོད་ལ། སྒྲིག་འཛུགས་དང་མགོ་ཁྲིད་མཁན། རྒྱབ་སྐྱོར་བ། སྤྱི་འབྲེལ་སོགས་འགྲིག་ཙམ་ཡོད། འོན་ཀྱང་སོག་པོར་མཚོན་ན་ད་ལྟའི་ཆ་ལ་ཕྱི་ཕྱོགས་སུ་སྟོབས་ཤུགས་གང་ཡང་མེད་ལ། ཐ་ན་ཡུ་རོབ་ཤར་མ་དང་ཨེ་ཤ་ཡའི་རྒྱལ་ཁབ་རེ་ཟུང་ནང་ཆོས་ཚོགས་དང་ཚོང་པ་སྒེར་པ་རེ་ཟུང་གིས་གྲུབ་པའི་ཚོགས་པ་ཆུང་ཙག་རེ་ལས་འཐུས་སྒོ་ཚང་བའི་སྒྲིག་འཛུགས་དང་། ཡོངས་ཁྱབ་དང་མང་མོས་རྒྱབ་སྐྱོར་ཡོད་པའི་མགོ་ཁྲིད་དེ་འདྲ་གང་ཡང་མེད། ཨ་རི་དང་ཡུ་རོབ། དབྱིན་ཡུལ་བཅས་སུ་སོག་རིགས་ཕྱི་གྱར་བ་དག་ཀྱང་ཐོག་མ་ཆབ་སྲིད་དང་ཉེས་ཁྲིམས་དེ་འདྲའི་འོག་ནས་ཕྱི་གྱར་གནང་དགོས་བྱུང་ཡོད་ཀྱང་། ཕྱི་ཕྱོགས་སུ་རྟིང་སྐུལ་དང་རྒྱབ་རྟེན་སྣེ་ཁྲིད་གང་ཡང་མེད་སྟབས་རིམ་གྱིས་སེམས་ཤུགས་ཉམས་ཏེ། དེང་སྐབས་ཆབ་སྲིད་ལ་དོ་སྣང་མེད་པར་ཚོང་པ་དང་རྒྱལ་ཁབ་དེ་དང་དེའི་སྤྱི་དམངས་ལས་འཚོལ་བ་དཀྱུས་མ་ཆགས་འདུག
( ཅ ) “ སྔོན་གཤེགས་དཔའ་བོ་རྣམས་ལ་བསྔོ་སྨོན་དང་ཤུལ་ལུས་ནང་མིའི་འཚོ་སྣོན་སོགས་ཀྱི་ཆེད་དུ་ལོ་རེ་བཞིན་དུ་བཙན་བྱོལ་བོད་མི་ཡོད་དོ་ཅོག་ནས་དང་བླང་ཞལ་འདེབས་འབུལ་རྒྱུ ” ཞེས་པ་འདིའི་ཐད། ཉིས་སྟོང་བརྒྱད་ལོར་ས་བྱི་ཞི་རྒོལ་བྱུང་བ་རེད། མདོ་དབུས་ཁམས་གསུམ་གྱི་བོད་མི་ཉིས་བརྒྱ་དྲུག་ཅུ་བརྒལ་ཙམ་རྒྱ་དམར་གྱིས་བཀྲོངས་སོང་། སྐོར་ཞིག་རྒྱ་ནག་གིས་འཛིན་བཟུང་བྱས་ཏེ་སྲོག་ཁྲིམས་བཅད་སོང་། ཡོངས་ཁྱབ་ཐོག་བསད་སོང་། དེ་ལས་མང་བ་ད་ལྟའང་ཞིག་བཙོན་ཁང་དུ་ཡོད་པ་ཚང་མས་མཁྱེན་གྱི་ཡོད། ཞི་རྒོལ་སྐབས་ལྷ་སའི་ཁྲོམ་ནས་བསད་ཟིན་པ་མང་པོ་ཞིག་ངོ་རྟགས་ཆོད་དཀའ་ཡང་། རྔ་པ་དང་དཀར་མཛེས་ཕྱོགས་ནས་བསད་པ་མང་ཆེ་བའི་ཕ་མ་ནང་མི་གཉེན་ཉེ་དང་བཅས་པ་གསལ་བོར་ཤེས་ཀྱི་ཡོད། སྐབས་དེར་བཙན་བྱོལ་བོད་གཞུང་གིས་མཚོན་པའི་ཚོགས་པ་སྒྲིག་འཛུགས་ཁག་དང་། བོད་དོན་རྒྱབ་སྐྱོར་ཚོགས་པ་ཁག་སུ་གང་གིས་ཀྱང་ཁ་ཡོད་ལག་ཡོད་ཀྱིས་འདས་པོ་དེ་དག་དང་མནར་སྡུག་མྱོང་བཞིན་པ་དེ་དག་ལ་དངུལ་དངོས་ཀྱིས་རྒྱབ་སྐྱོར་བྱས་པ་གོ་མ་སོང་། མི་སྒེར་རེ་ཟུང་གིས་དངུལ་ཕུལ་བ་གསལ་ཆ་ཡོད། ཕྱི་ཕྱོགས་ཀྱི་གཞུང་འབྲེལ་མ་ཡིན་པའི་ཚོགས་པ་རེ་ཟུང་གིས་དེ་དག་ལ་བསྔོ་སྨོན་གྱི་ཆེད་དུ་ཞལ་འདེབས་ཕྲན་བུ་རེ་བསྡུས་ཀྱང་། དེ་ཡང་མི་སྒེར་དང་ཚོགས་པའི་གཞུང་དངུལ་ནང་ཉར་གྱི་ཡོད་པ་གོ་ཐོས་བྱུང་། ཡུལ་ཤུལ་ས་ཡོམ་དང་འབྲུག་ཆུའི་རི་སྙིལ་འདམ་ཟེགས་ཀྱི་སྐབས་སུ་བསྔོ་སྨོན་གསུངས་སོང་། ཞལ་འདེབས་བསྡུས་སོང་།
ལྷག་པར་དུ་ཉིས་སྟོང་བརྒྱུད་ཚུན་དུ་བོད་ནང་གི་རྩོམ་པ་པོ་དང་སྒྱུ་རྩལ་པ་མང་པོ་ཞིག་སྔ་རྗེས་སུ་རྒྱ་ནག་གི་ཉེས་ཅན་ཆགས་སོང་། ལས་ཀ་ཤོར་སོང་། འཚོ་བ་ཚུན་ལ་དཀའ་ངལ་འཕྲད་སོང་། ཕྱི་ཕྱོགས་ནས་སྦྱིན་བདག་མི་གཅིག་འཐོན་མ་སོང་། ཞལ་འདེབས་ཐེངས་གཅིག་བསྡུས་མ་སོང་། ཁོང་ཅག་གི་དེབ་རེ་ཟུང་བསྐྱར་དཔར་བྱས་པ་ཙམ་ལས། ཁ་ཡོད་ལག་ཡོད་ཀྱིས་རོགས་རམ་ཐུབ་མ་སོང་། ཐ་ན་ཁོང་རྣམ་པས་ཁྲག་གིས་བྲིས་པའི་བརྩམས་ཆོས་དཔར་སྐྲུན་གྲོན་དངུལ་ཆེད་ཕྱི་ཕྱོགས་སུ་འབོད་སྐུལ་གནང་བར་ཡང་ངོས་ལེན་ཡག་པ་མ་བྱས་པ་དང་། ངོས་ལེན་ཙམ་བྱུང་ཡང་ལབ་རྒྱུ་གླེང་རྒྱུ་མང་པོ་ལྷག་པ་སོགས་བྱུང་ཡོད། རྩོམ་རིག་དང་སྐད་ཡིག་གི་ཐད་ནས་ཕྱི་ཕྱོགས་ནས་བོད་ནང་གཟིགས་རྟོགས་ཐུབ་ས་མང་པོ་ཞིག་ཡོད་ཀྱང་། ད་བར་འབུར་དུ་ཐོན་པའི་ལས་དོན་སྣ་གཅིག་ཀྱང་བྱ་ཐུབ་མ་སོང་། འདིའི་ནང་པེན་བོད་ཀྱི་རྩོམ་པ་པོའི་མཐུན་ཚོགས་ཀྱང་ཚུད་ཡོད།
དབུ་མའི་ལམ་གྱི་བློ་མཐུན་ཆབ་བྲག་ལགས་སུ་ཁ་སང་ཁ་བརྡར་ཞུས་ཡོད། ཁྱེད་ནས་ངའི་བསམ་ཚུལ་གོ་མི་འདུག གོང་གི་འདི་ལས་རྩོམ་པ་པོ་རྣམས་ཀྱིས་ཅིག་བྱེད་རྒྱུ་ཡོད་ཀ་མེད་ཀ། ལྷག་པར་ཏུ་མཐུན་ཚོགས་ཀྱི་ཚོགས་མི་རྣམས་ཀྱིས་ཀླད་པ་དཀྲུག་ནས་ཛ་དྲག་གི་ཚོགས་འདུ་ཞིག་བསྡུས་ན། དེ་ཡག་གི་རེད།
དེ་མིན་ཁྱེད་རང་ལོ་གཞོན་གཞོན་ཆགས་གྲབས་འདུག
རྒན་ལྷ་མོ་སྐྱབས་ལགས་ཀྱི་དགོངས་འཆར་ལ་མོས་མཐུན་ཡོད། རྒན་ཁྱེད་ཀྱི་འགྱུར་མེད་ཀྱི་རང་གཤིས་དང་ལྷག་བསམ། ཤེས་ཡོན་བཅས་ནི་རི་རབ་བཞིན་ལྗིད་ཁོག་ཆེ། རྒྱ་མཚོ་བཞིན་གཏིང་ཟབ། མ་ཚད་ཁྱེད་ཀྱིས་བསམ་དོན་ཐམས་ཅད་ཡིད་བཞིན་དུ་འགྲུབ་པ་ཤོག།
ེད་དུང་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གིས་ཡང་གང་གི་གསུང་འདི་དག་ལ་སྣང་མེད་དུ་མི་བཏང་བར་ཅི་ནས་ཀྱང་ཐུགས་བསམ་བཞེངས་རོགས།
ཆབ་བྲག་ཕོ་ཉའི་སྐད་ཆ་འདི་ཚོས་ཅི་ཞིག་བཤད་ཀྱི་ཡོད
ནམ་རྒྱུན་དུ་ཆོས་ལུགས་ལུང་ཚན་བར་དུ་སྐྱེ་བོ་སྒེར་སོ་སོའི་ངོས་ནས་དམ་ཚིག་གཙང་མ་ཉིན་རྒྱུ་འཚོ་བའི་ཁྲོད་ནས་ངོ་ལྐོག་མེད་པའི་ལས་ཀ་བྱ་ཐུབ་ན་མནའ་གན་ཞིག་བཞགས་དགོས་བ་བསམ་གྱི་མེད།
ངོ་ལྐོག་དང་དམ་ཚིག་གཙང་མའི་ལས་ཀ་མ་བྱས་ན་མནའ་གན་གྱི་རྡོ་རིང་གིས་གོ་ཆོད་ཀྱི་མ་རེད།
ཡུལ་ཤོར་བ་ཚོས་མཉམ་དུ་རྒྱ་ནག་དམར་པོ་ལ་ཁ་གཏད་བྱ་ཆེད་དུ་མནའ་གན་ཞིག་བཞགས་ན་ནུས་པ་འདོན་ཐུབ་ཀྱི་རེད།
་
སྤྱིའི་ཆ་ལ་འཆར་འགོད་ཡག་པོ་གནང་འདུག་མོས་མཐུན་ཡོད། འོན་ཀྱང་རྡོ་རིང་འཛུག་རྒྱུ་ཟེར་བ་དེ་སྤྱིར་ཡག་པོ་རེད་ཡིན་ནའང་གཞོན་ནུ་དང་བུ་མེད་གཞུང་འབྲེལ་མིན་པའི་ཚོགས་པ་དག་གི་སྣེ་ཁྲིད་ཟེར་བ་དེ་མོས་མཐུན་མེད་གང་ཡིན་ཟེར་ན་འདི་འདྲ་བྱས་ན་བོད་མི་དམངས་གྱི་ཁ་ཕྱོགས་གཅིག་གྱུར་ལ་གནོད་སྐྱོན་ཆེན་པོར་མཐོང་བས་ཡིན། ལས་འགལ་གང་ཡིན་སྤེལ་སྐབས་ལངས་ཕྱོགས་མཐུན་པའི་ཚོགས་པ་ཁ་གཙང་རེ་ཉམས་ཏུ་ལས་འགལ་སྤེལ་རྒྱུ་ལས་ལངས་ཕྱོགས་མི་མཐུན་པའི་ཚོགས་པ་ཁག་དང་ཉམས་ཏུ་ལས་དོན་སྤེལ་བ་ཡིན་ཆིག་སྒྲིལ་ལ་སྐྱོན་ཏུ་མཐོང།
མོས་མཐུན་ཡོད་ངོ་མ་དེ་འདྲ་ཞིག་གནང་ཐུབ་ན་དགེ་མཚན་ཆེན་པོ་རེད། མདོ་དབུས་ཁམས་གསུམ་གྱི་སྐྱིད་སྡུབ་མཉམ་མྱོང་གནང་བཞིན་པ་འདི་ནི་དགའ་འོས་པ་ཞིག་ལ་གནང་དགོས་པ་ཞིག་འང་རེད། ཚང་མས་བསམ་ཚུལ་གསུང་རོགས་གནང་།
དགོངས་དག བོད་སོག་ཡུ་གུར་དབྱིན་གསུམ་གྱི་ཞེས་པ་དེ་བོད་སོག་ཡུ་གུར་དབྱིན་བཞིའི་སྐད་
བཞི་ཤན་སྦྱར་ཞེས་གོ་བ་ལེན་རྒྱུ།
ཀ༽ ཡུ་གུར་དང་སོག་པོ། རྒྱ་རིགས་སོགས་དམངས་གཙོ་དོན་གཉེར་ཅན་ཚང་མར་འབོད་སྐུལ་གྱིས་རྒྱལ་ཁབ་གང་རུང་ཞིག་ཏུ་མི་རིགས་སྐྱིད་སྡུག་མཉམ་མྱོང་གི་ཚོགས་ཆེན་ཞིག་བསྐོངས་ནས་མི་རིགས་མནའ་འབྲེལ་གྱི་ཚོགས་པ་ཆེན་པོ་ཞིག་བཙུགས་ནས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་མཉམ་སྤེལ་གང་མང་བྱེད་རྒྱུ། (བོད་མིའི་སྒྲིག་འཛུགས་ཀྱི་ཕྱི་དྲིལ་བློན་ཆེན་གྱིས་གཙོ་འགན་གནང་འོས་སྙམ)
ལས་འགུལ་འདིའི་ནང་བོད་ཀྱི་རང་དབང་གི་རྩོམ་པ་པོ་མང་བོས་རྒྱ་ནག་སྲིད་གཞུང་གིས་བོད་གཙོས་གྲངས་ཉུང་མི་རིགས་ལ་འཛིན་པའི་བྱུས་ཡང་དག་མིན་སྐོར་གྱི་རྩོམ་ཡིག་ཚད་ལྡན་གང་མང་སྤེལ་ནས།དེ་དག་རྒྱལ་སྤྱི་དང་ལྷག་པར་གྲངས་ཉུང་མི་རིགས་དེ་དག་གི་བསམ་བློའི་ནང་འཛུལ་ཐབས་བྱ་དགོས།རྒྱ་གཞུང་གི་དབང་སྒྱུར་འོག་ཡོད་པའི་གྲངས་ཉུང་མི་རིགས་ཁག་གི་ཕན་ཚུན་བསམ་ཚུལ་རྒྱུས་ལོན་ཡོང་
ཐབས་སུ།བོད་སོག་ཡུ་གུར་དབྱིན་གསུམ་གྱི་སྐད་བཞི་ཤན་སྦྱར་ཐོག་ཟླ་གསུམ་མམ་ཡང་ན་ཟླ་དྲུགདེ་མིན་ལོ་དེབ་སོགས་གང་རུང་གི་ཆབ་སྲིད་དུས་དེབ་ཅིག་གྲངས་ཉུང་མི་རིགས་དེ་དག་གི་ངོ་ཚབ་ཡོད་པའི་རྩོམ་སྒྲིག་ཚོགས་ཆུང་ཞིག་གི་ངོས་ནས་འདོན་སྤེལ་ཐུབ་ན།དེས་གྲངས་ཉུང་མི་རིགས་དེ་རྣམས་ཆིག་སྒྲིལ་ཡོང་རྒྱུའི་ཟམ་ཆེན་ཞིག་ཏུ་གྱུར་ནས་རིམ་བཞིན་གྲངས་ཉུང་མི་རིགས་བར་གྱི་མཛའ་འབྲེལ་ཇེ་རྒྱས་དང་།རྒྱལ་སྤྱིའི་ཐོག་ཏུའང་གནད་དོན་འདི་རྒྱལ་སྤྱིའི་གནད་དོན་ཞིག་ཏུ་འགྱུར་རྒྱུའི་རེ་བ་ཡོད་པ་ཡིན།
ཡག་པོ་གནང་འདུག་ཐུགས་རྗེ་ཆེ།
རྩོམ་པ་པོ་དང་བསམ་བློ་བ་སྤྱི་ཟུར་ཆབ་བྲག་ལགས་ཀྱིས་ཡང་དག་པའི་དགོངས་འཆར་ཞིག་བཏོན་པར་རྒྱབ་སྐྱོར་དང་ཡི་རང་མོས་མཐུན་ཡོད། བཙན་བྱོལ་སྒྲིག་འཛུགས་དང་ཚོགས་པ་ཁག་ནས་ཀྱང་དགོངས་ཚུལ་དེར་སྣང་མེད་མི་གནང་པར་ལག་ལེན་གང་ཐུབ་གནང་རྒྱུར་འབོད་སྐུལ་ཞུ།།
མཆན་འགོད་ཀློག་མཁན་ཐོག་མ་བོན་རྒྱ་ལགས་དང། རཱ་རྒྱ་བློ་དབང་ལགས། རྒྱང་ལྟ་ལགས་གསུམ་གྱིས་མོས་མཐུན་རྒྱབ་སྐྱོར་གནང་བ་འདི་དམག་སྤྱི་ཞིག་ལ་མཚོན་ན་སྐུ་སྲུང་བ་ཡག་ཤོས་འགའ་རྙེད་པ་དང་མི་འདྲའམ། དགའ་བོ་བྱུང།
ལས་གཞི་འཚམས་ན་ཡང་ལས་དོན་བྱེད་ཕྱོགས་ཐད་གནད་འགགས་ཤིག་ཡིན་པས་དེའི་ཐད་ནས་ཀྱང་བསམ་འཆར་འདོན་རྒྱུ་གལ་ཆེ།
རྒན་ལྷ་མོ་སྐྱབས་ལགས་ཀྱི་དགོངས་འཆར་ལ་མོས་མཐུན་ཡོད། རིམ་བཞིན་བསམ་ཚུལ་འབུལ་རྒྱུ་ཡིན།རྒན་ཁྱེད་ཀྱི་འགྱུར་མེད་ཀྱི་རང་གཤིས་དང་ལྷག་བསམ། ཤེས་ཡོན་བཅས་ནི་རི་རབ་བཞིན་ལྗིད་ཁོག་ཆེ། སྐུ་ཚེ་རིང་བར་ཤོག
མོས་མཐུན་ཡོད། མར་མེའི་ལས་འགུལ་མགོ་བརྩམས་ནས་ཉིན་གསུམ་འགྲོ་གི་འདུག འོན་ཀྱང་། ཚང་མ་རྡོག་ལ་འགྲིལ་རྒྱུ་གལ་ཆེན་པོ་འདུག
རྒྱ་ཆེའི་ཀློག་མཁན་རྣམ་པས་དགོངས་ཚུལ་འདོན་པའི་རེ་བ་ཞུ། མ་མཐར་ཡང་མོས་མཐུན་ཡོད་དང་མེད་ཙམ་ཞིག་གི་ལན་རེ་འཇོག་རོགས།
ནང་དོན་ཐད་ནས་གསལ་བཤད་དགོས་རིགས་ལ་ཡང་ལན་འདེབས་འབད་བརྩོན་ཞུ་གི་ཡིན།
འཆར་འགོད་ཡག་པོ་གནང་འདུག ཐུགས་རྗེ་ཆེ།