དེ་རིང་བོད་གཞུང་ཟློས་གར་དབུ་བརྙེས་ནས་ལོ་ ༥༢ འཁོར་པའི་མཛད་སྒོ་དང་། ཟློས་གར་ཁང་ཚན་ནང་ཁུལ་གཞས་སྣ་འཁྲབ་སྟོན་འགྲན་བསྡུར་བཅས་གོ་སྒྲིག་བྱས་ཡོད་ཀྱང་། བོད་ནང་དུ་རང་ལུས་མེ་བསྲེགས་ཀྱི་ཛ་དྲག་གི་གནས་ཚུལ་སྔ་ཕྱིར་བྱུང་ཡོད་སྟབས། མྱ་ངན་གུས་འདུད་དང་བདེན་ཚིག་སྨོན་ལམ་གྱོར་ཏེ་མཛད་རིམ་མཇུག་བསྡུས་སོང་།
བོད་གཞུང་ཟློས་གར་དབུ་བརྙེས་ནས་ལོ་ ༥༢ འཁོར་པའི་མཛད་སྒོ་དེ་རིང་ཕྱི་ཟླ་ ༡༠ ཚེས་ ༡༡ ཉིན་འཚོགས་གཏན་གྱིས། སྐུ་མགྲོན་གཙོ་བོར་ཆོས་རིག་བཀའ་བློན་པད་མ་ཆོས་འབྱོར་མཆོག་དང་། དེ་བཞིན་ཉེ་འཁོར་སློབ་གྲྭ་ཁག་དང་དགོན་སྡེ་ཁག་ཁག གཞུང་དང་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་མཛད་གཙོ་རྣམ་པ་བཅས་སྐུ་མགྲོན་དུ་མགྲོན་འབོད་བྱས་ཡོད་ཀྱང་། བཙན་བྱོལ་སྒྲིག་འཛུགས་ཀྱི་ཆོས་རིགས་ལྷན་ཁང་གིས་བོད་ནང་གི་ཛ་དྲག་གནས་བབ་འདི་ལ་བརྟེན་རྐང་བྲོ་གཞས་སྣ་འཁྲབ་སྟོན་མི་གནང་རྒྱུའི་འབོད་སྐུལ་གནང་ཡོད་པ་ལྟར་མཛད་རིམ་ཁག་ཕྱིར་བསྡུ་བྱས་སོང་།
སྐུ་མགྲོན་རྣམས་ཚོགས་ཁང་དུ་འཛོམས་འཕྲལ་སྐུ་མགྲོན་གཙོ་བོ་ཤེས་རིག་དྲུང་ཆེ་ཡུ་ཐོག་ཀརྨ་དགེ་ལེགས་ཀྱིས་ཉེ་ལམ་བོད་ནང་རྒྱལ་ཁབ་དང་མི་རིགས་བསྟན་སྲིད་ཀྱི་དོན་དུ་རང་ལུས་མཆོད་འབུལ་གྱིས་རྒྱ་གཞུང་ལ་ངོ་རྒོལ་གནང་སྟེ་རྐྱེན་འདས་སུ་སོང་པ་རྣམས་ལ་མྱ་ངན་གུས་འདུད་དང་། ཁོང་ཅག་གི་ནང་མི་གཉེན་ཉེ་རྣམས་ལ་གདུང་སེམས་མཉམ་སྐྱེད་མཚོན་ཕྱིར། མར་མེ་སྒྲོན་པ་དང་སྐར་མ་གཅིག་རིང་ངག་བཅད་མྱ་ངན་ཞུས་སོང་ལ། དེའི་རྗེས་བོད་གཞུང་ཟློས་གར་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་དུས་ཆེན་ངོ་སྤྲོད་དང་སྦྲགས། ཉེ་ལམ་བོད་ནང་དུ་རྒྱལ་ཁབ་དང་མི་རིགས་ཀྱི་ཆེད་དུ་མི་མང་པོ་ཞིག་གིས་སོ་སོའི་སྲོག་ལ་མ་འཛེམས་པར་རང་ལུས་མེར་བསྲེགས་བཏང་པ་དང་། ལྷག་པར་དུ་ཁོང་ཚོ་ནི་བོད་རིགས་གཞོན་སྐྱེ་རྐྱང་ཡིན་པའི་གནས་ཚུལ་དེ་བོད་གཞུང་ཟློས་གར་གྱི་མགོ་ལས་ཚང་མས་ཤེས་ཀྱི་ཡོད་པ་མ་ཟད། མྱ་ངན་གུས་འདུད་ཀྱང་ཞུ་བཞིན་ཡོད་པ་དང་། བོད་གཞུང་ཟློས་གར་དབུ་བརྙེས་པའི་མཛད་སྒོ་ནི་འདས་པའི་ལོ་ལྔ་བཅུ་ལྷག་རིང་འགྲོ་བསྡད་ཅིང་། རྐང་བྲོ་གཞས་སྣ་འདི་ཡང་བོད་མིའི་ཟློས་གར་གྱི་སྒྱུ་རྩལ་རྒྱུན་འཛིན་དང་གོང་སྤེལ་གྱི་ལས་དོན་གལ་ཆེན་ཞིག་ཡིན་ཡང་། བོད་མིའི་སྒྲིག་འཛིགས་ཀྱི་བཀའ་ཁྱབ་ལམ་སྟོན་བྱུང་སྟབས། རྟེན་འབྲེལ་མཛད་སྒོ་དང་གཞས་སྣ་འགྲན་བསྡུར་རིགས་ཕྱིར་བསྡུ་བྱས་པ་ཡིན་སྐོར་ངོ་སྤྲོད་གནང་རྗེས། སྐུ་མགྲོན་ཡོངས་སྐུ་བཞེངས་ཐོག བོད་པའི་བདེན་དོན་ཆེད་རང་ལུས་མེར་བསྲེགས་བཏང་པའི་དཔའ་བོ་རྣམས་ལ་བསྔོ་སྨོན་དང་བདེན་ཚིག་སྨོན་ལམ་སྐྱོར་བཞིན་མཛད་སྒོ་གྲོལ་སོང་།
ཟློས་གར་ལྷ་མོའི་དགེ་རྒན་བསོད་ནམས་ཕུན་ཚོགས་ལགས་སུ་ལོ་ལྟར་ཟློས་གར་དབུ་བརྙེས་པའི་མཛད་སྒོ་དང་བསྟུན་ཏེ། ཟློས་གར་ཁང་ཚན་ཁག་བར་གཞས་སྣ་འགྲན་བསྡུར་གནང་གི་ཡོད་ཀྱང་། ད་ལོ་བོད་ནང་གི་སྤུན་ཟླ་ཚོར་གདུང་སེམས་མཉམ་སྐྱེད་མཚོར་ཕྱིར་ལས་རིམ་ཁག་ཕྱིར་བསྡུ་གནང་བར་ཚོར་སྣང་གང་འདྲ་བྱུང་མིན་དྲིས་པར་ཁོང་གིས། “གཞས་སྣ་འཁྲབ་སྟོན་འགྲན་བསྡུར་འདི་ཟླ་གཅིག་གི་གོང་ནས་སྦྱོང་བརྡར་དང་གྲ་སྒྲིག་བྱས་པ་རེད། འོན་ཀྱང་། བོད་ནང་གི་གནས་ཚུལ་འདི་ཛ་དྲག་དང་གལ་ཆེན་པོ་རེད། གཞས་སྣ་འཁྲབ་སྟོན་རིགས་ག་དུས་ཚོགས་ཀྱང་ཆོག་པ་དང་། ཐེངས་འདིའི་མཛད་སྒོ་དང་གཞས་སྣ་འཁྲབ་སྟོན་ཕྱིར་བསྡུ་བྱས་པ་དེས། དེ་རིང་འདིར་ཕེབས་པའི་སྐུ་མགྲོན་ཡོངས་ལ་སེམས་ཚོར་ཞིག་དང་བརྡ་ལན་ཞིག་སྤྲད་ཡོད་ངེས་རེད། ཁོང་ཚོ་ཕྱིར་ལོག་རྗེས་བསམ་བློ་གཏོང་ས་དང་། དུས་སྐབས་འདི་འདྲ་ཞིག་གི་ནང་མ་མཐར་ཡང་སྤྲོ་སྐྱིད་དང་གཞས་སྣ་རིགས་ཀྱི་ལས་དོན་ནང་ཞུགས་མི་རུང་པའི་ངེས་ཤེས་རེ་རྙེད་དགོས་པ་རེད ” ཅེས་ངག་འདར་བཞིན་མིག་མཐར་མཆི་མ་འཁོར་བྱུང་།
དེ་བཞིན་གཞས་སྣ་སྦྱོང་བརྡར་ནང་ཞུགས་མཁན་བུ་མོ་རིག་འཛིན་མཚོ་མོ་ལགས་ལ། བོད་ནང་བྱུང་པའི་གནས་ཚུལ་དང་ཟླ་གཅིག་ལྷག་ལ་དཀའ་ལས་བརྒྱབ་ཏེ་སྦྱོང་བརྡར་བྱས་པ་འཁྲབ་སྟོན་བྱ་མ་ཐུབ་པ་བཅས་ལ་མྱོང་ཚོར་གང་འདྲ་བྱུང་ཞེས་དྲིས་པར། མོ་རང་རྒྱ་གར་དུ་སྐྱེས་པ་ཞིག་ཡིན་སྟབས་བོད་ནང་གི་དངོས་ཡོད་གནས་ཚུལ་ཤེས་ཀྱི་མེད་ན་ཡང་། བོད་ནང་གི་བོད་མི་ཚོས་སོ་སོའི་སྲོག་ལ་མ་འཛེམས་པར་རང་ལུས་མེར་བསྲེགས་བཏང་པ་དེར་བཤད་མི་ཐུབ་པའི་ཚོར་པ་ཞིག་ཡོད་པ་དང་། ཁོང་ཚོ་རང་ཉིད་ཀྱི་ཕ་མ་སྤུན་མཆེད་ཅིག་གི་ས་ནས་བསམ་བློ་བཏང་ན་དངོས་ནས་སེམས་སྐྱོ་རྒྱུ་འདུག་ཟེར་ལ། ཟླ་གཅིག་ལྷག་ལ་དཀའ་ལས་བརྒྱབ་པ་དེ་དུས་སྐབས་གཞན་ཞིག་ཏུ་འཁྲབ་སྟོན་བྱས་ན་ཕྱིས་དྲགས་པ་གང་ཡང་ཡོད་པ་མ་རེད་ཅེས་ལན་འདེབས་གནང་བྱུང་།
གསར་འགོད་པ། བནྡེ་སྐྱབས།
འདི་ནི་དོན་དམ་པར་བོད་མི་རིགས་ལ་བཅངས་པའི་སེམས་ཚོར་ཡོད་པའི་རྟགས་མཚན་ཤིག་ལ་ངོས་འཛིན་གྱི་ཡོད། ཐུགས་རྗེ་ཆེ། གཞན་གྱིས་ཀྱང་ལས་འགུལ་དེ་ལྟ་བུ་ལ་བསྔགས་བརྗོད་བྱེད་དགོས། ཡང་འགའ་ཞིག་ནི་བཙན་བྱོལ་ནང་གི་བོད་མི་རྣམས་ཀྱི་ནོར་འཁྲུལ་ཆུང་ཚགས་རིགས་བྱུང་མ་ཐག་ལམ་སེང་སྐྱོན་བརྗོད་ཆར་བ་བབས་བབས་ཕབ་བཞིན་འདུག ཡང་དེ་ལས་ལྡོག་སྟེ་བྱ་བ་ལེགས་པོ་ཞིག་བསྒྲུབས་ཚེ་དེ་ལ་བསྟོད་བསྔགས་བྱེད་རྒྱུར་དོགས་ཟོན་བྱེད་བཞིན་འདུག་པ་དེ་བྱ་སྤྱོད་ཡག་པ་ཞིག་གཏན་ནས་མིན། དེ་སྔོན་མོན་རྒུ་གཞིས་ཆགས་ཀྱི་ནང་དུ་གཞས་སྣ་འཁྲབ་སྟོན་སྤེལ་བ་ལ་མི་འགྲིག་པ་རེད་ཟེར་ནས་རྙོག་དྲ་ཆེན་པོ་མ་སློང་ཙམ་དུ་བཟོས་སོང་།
བཙན་བྱོལ་ནང་གི་གཞས་ལེན་བྲོ་ཁྲབ་བྱས་པ་སོགས་བོད་ནང་ལ་གོ་འདུག་ལ། ད་དུང་གསར་འགོད་པ་དག་གི་ངོ་གདོང་གི་འཛུམ་ཤིག་ཤིག་དེ་དག་ཀྱང་མཐོང་འདུག འདི་དག་ལ་ཕ་ཡུལ་མི་མང་གིས་དགའ་མོས་བྱེད་ཀྱི་མི་འདུག་པ་གོ་སོང་ལ། ང་ཚོ་ས་དེ་ནས་འོང་བའི་མི་དག་གི་སེམས་ངོས་ལའང་འཚམ་པ་མི་འདུག གང་ལྟར་བོད་གཞུང་ཟློས་ཁང་གིས་བྱེད་སྟངས་དེ་ལ་དགའ་ནས་ཡོད། ཐུགས་རྗེ་ཆེ། གདོང་སེམས་མཉམ་བསྐྱེད་ཟེར་ན་དེ་འདྲ་ཞིག་ཡིན་ངེས་རེད།
ལེགས་སོ་བསྔགས་བརྗོད་ཡོད།
དོན་དམ་གདུང་སེམས་མཉམ་བསྐྱེད་ཟེར་པ་འདི་འདྲ་རེད། འདི་ནི་མིག་དཔེ་ཡག་པོ་ཞིག་པས་ན་ཚང་མའི་རྗེས་སུ་ཡིད་རིང་ཞུ་རྒྱུ་ཞིག་རེད། བོད་ནང་དུ་བོད་མི་ཚོས་ཚེ་སྲོག་ཤོར་གྱི་ཡོད་པས་རེན་ཐང་ཧ་གོ་རེད་ངོ་མ་ཡག་པོ་རེད།
དེ་ནས་དེ་རིང་ལས་བྱེད་རྣམ་པ་ཚང་མའི་ཐུགས་ཁུར་ཆེ་བཞེས་ཀྱིས་གཞས་སྣ་འགྲན་བསྡུར་ཕྱིར་བསྡུ་གནང་བ་དེ་ལ་ཐུགས་རྗེས་ཆེ་ཞུ་།གཞས་པ་རྣམས་པ་ཚང་མ་ལོའི་སྦྱང་གནང་བ་དེ་དུས་ཚད་རན་པ་ཞིག་ལ་ཁྲབ་ཆོག་གི་རེད་།རང་རེའི་ཐུབ་ཡ་དེ་རྣམས་ལ་ལག་བསྟར་བྱས་ན་བོད་ནང་ལ་གཞུགས་མཁན་དེ་ཚོའི་ཐོས་ན་ཁོང་རྣམས་པ་ཚོའི་ཐུགས་ལ་རང་ཅག་ལ་རྒྱབ་བསྐྱོར་འདུག་བསམ་བསམ་ཞིག་ཤར་ཐུབ་ན་འགྲིག་གི་རེད་།སྤྱི་གཏང་བྱས་ན་ང་ཚོའི་ལས་འགུལ་ནང་ལ་མཉམ་ཞུགས་བྱེད་དགོས་རེད་དེ་ཚང་མ་ལོ་ཞུགས་ཐུབ་ཡ་རྩ་བ་ནས་ཡོད་མ་རེད་པ་།སོང་ཙ་ནས་རང་རེའི་རྒྱབ་བསྐྱོར་བྱེད་ཡ་དང་རྒྱབ་བསྐྱོར་འཚོལ་ཡ་དེ་ནི་ང་ཚོའི་ང་ཚོའི་ཕྲག་ལ་བབས་པའི་ལས་དོན་རེད་དྲན་གི་འདུག་།དཀོན་མཆོག་མཁྱེན་ཡངས་སྐུ་གཞུགས་ཁོང་ཕེབས་ཚར་འདུག་བ་།དགས་པའི་ཞིང་དུ་སྐྱེ་བ་ཤོག་།
གདུང་སེམས་མཉམ་བསྐྱེད་མཛད་དགོས་དང་དགོས། དཔེ་ཡག་པོ་རེད། གཞིས་བྱེས་གཉིས་ཆིག་བསྒྲིལ་ངོ་མ་མཚོན་འདུག སྤྱིར་གཅིག་པ་ལས་གཉིས་པ་མེད་ཀྱང་ད་རེས་དམིགས་གསལ་གྱིས་བྱ་བ་ལུགས་མཐུན་བྱུང་འདུག སློབ་ཕྲུག་རྣམ་པའི་དཀའ་ལས་རྒྱབ་པ་ལ་དོན་མེད་རྩ་ནས་མ་རེད། དོན་ཆེན་པོ་མཚོན་ཡོད།
ལེགས་སོ་དེ་རྗེས་སུ་ཡི་རང་ཡོད།
མངོན་པར་བསྟོད་དོ། ཕྱིན་ཆོད་ཀྱང་དུས་སྐབས་དེ་འདྲ་ལ་ཚང་མས་ཐུགས་མཉམ་འཇོག་རོག