བོད་ཀྱི་དུས་བབ་སྤྱིའི་འདོན་ཐེངས་ ༥༡༨ པའི་སྟེང་གི་རྩོམ་སྒྲིག་པའི་གཏམ།
སེར་སྦྲེངས་ སྙན་སྐུལ་ཞི་བའི་གོམ་བགྲོད་འདིས་ལས་འགུལ་ནང་ཞུགས་མཁན་དང་། ལས་འགུལ་གོ་སྒྲིག་ཞུ་མཁན་གཞན་མང་པོ་ཞིག་གི་མིག་དབང་ཕྱེས་སོང་། བློ་སྐྱེད་སྦྱིན་སོང་། ཡིད་དབང་འཕྲོགས་སོང་། ལས་འགུལ་འདིའི་ཐོག་མའི་དགོས་འདུན་ནས་མཐའ་མའི་མཇུག་བསྡོམས་བར། མི་སུ་ཞིག་གིས་མཐོང་ཡང་སེམས་འགུལ་ཐེབས་པ་དང་། གདུང་སེམས་འཆོར་བའི་ལས་འགུལ་ནུས་ལྡན་ཞིག་ཆགས་ཡོད། ལས་འགུལ་ནང་མཉམ་ཞུགས་གནང་མཁན་ཁྲོད། སྐྱ་བོ་དང་སེར་མོ་མ་འདྲེས་བར་དགེ་འདུན་པའི་ལས་འགུལ་ཁེར་རྒྱུག་ཅིག་དང་། འབོད་ཚིག་དང་རེ་འདུན་ཁྲོད་རང་བཙན་དང་དབུ་མ་མ་བསྲེས་པར་རང་དབང་གི་འབོད་ཚིག་ ཁེར་གཙང་ཞིག་ཆགས་ཡོད།
ཐེངས་ འདིའི་དགོས་འདུན་དོན་ཚན་གསུམ་ལས་དང་པོ། ཞི་བདེ་དང་དྲང་བདེན་ལ་དགའ་བའི་འཛམ་གླིང་མི་མང་དང་སྲིད་གཞུང་། གྲོས་ཚོགས། གཞུང་འབྲེལ་མིན་པའི་ཚོགས་པ་དང་། ཁྱད་པར་དུ་སྟོན་པ་དང་བསྟན་པ་གཅིག་པའི་འཛམ་གླིང་ཤར་ནུབ་ཀྱི་ནང་པ་ཡོངས་ཀྱིས་ རྔ་པ་ཀིརྟི་དགོན་པ་རྒྱ་ནག་གི་དྲག་གནོན་འོག་ནས་མྱུར་དུ་སྐྱོབ་ཐབས་ལ་ཛ་དྲག་ གི་ལས་འགུལ་སྤེལ་དགོས། གཉིས་པ། ཀུན་གཟིགས་པཎ་ཆེན་ཆུང་སྲིད་མཆོག་གིས་གཙོས་པའི་བཙོན་འོག་ཏུ་ཡོད་པའི་བོད་མི་ ཆབ་སྲིད་བཙོན་པ་རྣམས་དང་། རྔ་པ་ཀིརྟི་དགོན་གྱི་དགེ་འདུན་པ་རྣམས་གང་མགྱོགས་ཀློད་གྲོལ་ཡོང་དགོས། གསུམ་པ། རྒྱ་གཞུང་གིས་བོད་མི་ཚོར་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་དད་རང་མོས་བཅས་ཀྱི་ཐོབ་ཐང་སྤྲད་དེ། རིས་མེད་དགོན་སྡེ་ཁག་གི་ཆོས་ལུགས་བྱེད་སྒོ་ཁག་གུ་ཡངས་གཏོང་དགོས་པ་བཅས་རེད།
ནམ་ རྒྱུན་བོད་པ་ཚོའི་ལས་འགུལ་རེ་རེའི་སྐབས་ཀྱི་དགོས་འདུན་ཁག་ནི་ཉ་དང་ཉུང་མ་ མཉམ་སྲེས་བྱས་ཤིང་། འབོད་ཚིག་གི་ནང་དོན་ཁག་ཀྱང་སྔ་འགལ་ཕྱི་འཁྲུལ་དང་། ཞི་དྲག་གོ་འཛོལ་གྱི་ཞན་ཆ་མི་ཉུང་བ་ཞིག་ཡོང་གི་ཡོད་ཀྱང་། ཐེངས་འདིའི་དགོས་འདུན་ཁག་མདོར་བསྒྲིལ་ན། ཀིརྟི་དགོན་གྲོང་གཉིས་མྱུར་སྐྱོབ་ཆེད་རྒྱལ་སྤྱིས་གནོན་ཤུགས་ཡོང་བའི་འབོད་ སྐུལ་དང་། རྔ་པ་ས་ཁུལ་གཙོས་པའི་བོད་ནང་གི་ཆབ་སྲིད་བཙོན་པ་རྣམས་ཀློད་གྲོལ་ཡོང་བའི་རེ་ འདུན། བོད་ནང་སྨྲ་བརྗོད་རང་དབང་དང་ཆོས་དད་རང་མོས་དགོས་པའི་ཞུ་སྐུལ་བཅས་རེད། འདི་ནི་རྒྱ་གཞུང་གིས་དང་ལེན་བྱ་མི་ཐུབ་པ་མེད་ལ། རྒྱལ་སྤྱིས་རྒྱབ་སྐྱོར་གནང་མ་བདེ་བ་དེ་བས་ཀྱང་མིན།
དགེ་ འདུན་པའི་འདུལ་ཁྲིམས་དང་མཐུན་པར་སྐད་ཅོར་དང་ཟང་ཟིང་མེད་པར་ཁུ་སིམ་སིམ་འཇམ་ ཐང་ཐང་བཞུགས་སྒར་ངྷ་རམ་ས་ལས་ནས་རྒྱ་གར་གྱི་རྒྱལ་ས་ལྡི་ལི་གསར་བའི་བར་ བསྐྱོད་དེ། ལབ་རྒྱུ་དང་གླེང་རྒྱུ་མེད་པར་ལས་འགུལ་རྒྱལ་ཁའི་ངང་མཇུག་བསྡུས་ཡོད་ལ། ལས་འགུལ་འདིའི་གོ་རིམ་ཁྲོད་བོད་པའི་རྩ་དོན་སྤྱི་དང་། ཡང་སྒོས་རྔ་པའི་དཀའ་ངལ་ལ་ནུས་པ་ཆེན་པོ་ཐོན་ཡོད་པ་མ་ཟད། བོད་བརྒྱུད་ནང་བསྟན་པའི་ཞི་དུལ་སྤྱོད་བཟང་གི་ཚུལ་ཁྲིམས་ཁྱབ་བསྒྲགས་དང་། ཆོས་ལུགས་འཆམ་མཐུན་གྱི་མཛའ་གཅིགས་ལག་རྡང་མཉམ་སྒྲིལ་གྱི་ལས་དོན་ཞིག་ཀྱང་ འགྲུབ་ཡོད།
གོམ་ བགྲོད་ཀྱི་བརྒྱུད་རིམ་ཁྲོད་དུ་གནས་ཚུལ་མཁོ་གཏོང་བ་ཚོས་དུས་ནས་དུས་སུ་སྐད་ ཡིག་འདྲ་མིན་ཐོག་དཔར་དང་གནས་ཚུལ་དུས་ཐོག་ཏུ་ཁྱབ་སྤེལ་གནང་བ་དང་། འབྲེལ་མཐུད་པ་ཚོས་ས་ཚིགས་རེ་རེ་བཞིན་གསར་འགོད་གསལ་བསྒགས་དང་། གནད་ཡོད་མི་སྣ་འབོད་འགུག་གིས་རྩོ་དོན་ཁྱབ་བསྒྲགས་དང་བོད་དོན་ལ་རྒྱབ་སྐྱོར་ ཡོང་བའི་རེ་འབོད་ཞུས་ཡོད། ཐེངས་འདིའི་ལས་འགུལ་ལ་སློབ་སྦྱོང་བྱས་ཏེ། འབྱུང་འགྱུར་ཡང་བཙན་བྱོལ་བོད་མིའི་དགོན་སྡེ་ཁག་དང་སློབ་གྲྭ་ཁག དེ་བཞིན་གཞུང་འབྲེལ་མིན་པའི་ཚོགས་སྡེ་ཁག་གིས་འདི་ལྟ་བུའི་ལས་འགུལ་བསྟུད་མར་ སྤེལ་རྒྱུ་གལ་ཆེན་ནང་གི་འགངས་ཆེན་དུ་མཐོང་སོང་།།
