བོད་ཀྱི་དུས་བབ་སྤྱིའི་འདོན་ཐེངས་ ༥༢༦ པའི་སྟེང་གི་རྩོམ་སྒྲིག་པའི་གཏམ།
བོད་ལ་ངག་རྒྱུན་ལ་གྲགས་པའི་“བོད་རེ་བས་ཕོངས། རྒྱ་དོགས་པས་ཕོངས།” ཞེས་པའི་གཏམ་དཔེ་འདི་བོད་ལ་དར་བའི་དུས་དེ་ནི། ཏག་ཏག་བོད་ཕོངས་ལམ་དུ་གོམ་ཁ་ཕྱོགས་པའི་ཉི་མ་དང་པོ་དེ་ཡིན་ངེས། ཡིན་ནའང་། ལོ་ངོ་དྲུག་ཅུའི་བོད་རྒྱའི་འཐབ་རྩོད་ཀྱི་གར་སྟེགས་སྟེང་། གཏམ་དཔེ་འདི་མི་རབས་གསར་རྙིང་གཉིས་ཀྱི་རྣ་བར་འཇགས་ཤིང་སྙིང་ལ་སིམ་ནས་ཡོད། ཐ་ན། གཏམ་དཔེ་འདི་འུ་ཅག་གི་སྤྱི་ཚོགས་ཁྲོད་རང་གི་འཐུས་ཤོར་གྱི་ངོ་གདོང་འགེབས་བྱེད་དང་། ཕམ་ཉེས་དང་གྱོང་གུད་ཀྱི་སྣ་འདྲེན། གླེན་ལྐུགས་དང་ན་ཟུག་གི་ཚོར་བ་སྦྲིད་བྱེད་ཀྱི་ལས་དབང་གི་ལུང་བསྟན་དུ་གྱུར་ཡོད།
ཡིན་ནའང་། ལོ་དང་ཟླ་བ། མི་རབས་དང་དུས་རབས་བྱས་ཏེ་ཕོངས་བྱེད་ཀྱི་རེ་སྟོང་འདིས་ད་ལྟའི་བར་གྲིབ་མ་བཞིན་འུ་ཅག་བཅིངས་འགྲོལ་བཏང་མྱོང་མེད། ལོ་དྲུག་ཅུའི་ཡར་སྔོན་ལ་དམར་པོ་མའོ་ཡིས་མེ་མདའི་སོ་ཁ་ནས་ཞི་བའི་བཅིངས་འགྲོལ་ཁྱེར་ཡོང་དུས་ཀྱང་། འུ་ཅག་གིས་ཞི་འགྲིག་གི་རྨི་ལམ་ཞིག་ལ་སེམས་རྩ་བསྙེས་ཏེ། བཤད་ཤེས་དང་བསྟུན་ཤེས་ཟེར་བའི་ལོ་རྒྱུས་བྲིས་མྱོང་ཡོད། ལོ་ཉི་ཤུའི་ཡར་སྔོན་ལ་ཏིན་གྱིས་ཉི་མ་ལྷ་སར་ཁྲག་གི་འཁོར་ལོ་སྐོར་ཞིང་། བོད་མིའི་བྲང་ཁོག་ན་ལྷོག་ལྷོག་ཏུ་ལྡིང་བཞིན་པའི་ཡིག་འབྲི་ཁྲི་བདུན་གྱི་སྙིང་སྟོབས་བཀུམས་དུས་ཀྱང་། འུ་ཚོས་རང་བཙན་མ་ཡིན་པར་ཡོད་ཚད་གླེང་ཆོག་པའི་ཁ་རླངས་དྲོན་མོ་ཞིག་ལ་གློ་སྙིང་མཆིན་གསུམ་གཏད་དེ། ཕྱིར་རང་ཡུལ་ལ་ལོག་ཆོག་པའི་ཉིན་དཀར་གྱི་རྨི་ལམ་ཞིག་ལ་རེ་ཕུགས་བཅོལ་མྱོང་། དེ་བཞིན། འདས་མ་ཐག་པའི་ལོ་བཅུའི་ནང་ལ་རྒྱ་དཔོན་ཧུའུ་ཡིས་བོད་མི་སྐྱ་སེར་རྒན་གཞོན་མེད་པར་དམར་གསོད་གཏོང་བཞིན། མེ་མདའི་སོ་བར་ནས་བོད་ཡུལ་བརྟན་ལྷིང་གི་ཆོ་འཕྲུལ་སྟོན་དུས་ཀྱང་། འུ་ཅག་གིས་འཆམ་མཐུན་གྱི་ཁ་གཡང་སྙན་མོ་དེར་རྣ་བ་གཡར་བཞིན། དམར་ཤོག་རྩ་ཁྲིམས་ཀྱི་སྒྲོམ་གཞིའི་འོག་ནས་མིང་དོན་མཚུངས་པའི་རང་སྐྱོང་ལ་སྐྱ་ཐིག་ཕབས་མྱོང་། འདི་དག་ཚང་མ་བོད་རེ་བས་ཕུངས་དགོས་པའི་ལུང་བསྟན་དེ་ཏག་ཏག་མངོན་དུ་གྱུར་བ་རེད།
ད་ལྟ་ཞིས་ཅིན་ཕིན་རྒྱ་ནག་གི་སྲིད་སྟེགས་ལ་གོམ་པ་སྤོ་བཞིན་པའི་སྐབས་འདིར་ཡང་། འུ་ཅག་གིས་སླར་ཡང་རང་སེམས་འཁྲུལ་བྱེད་ཀྱི་རྨི་ལམ་གསར་བ་ཞིག་གི་ཞིང་ཁམས་བཞེངས་སྐྲུན་བྱེད་བཞིན་ཡོད། མ་གཞི་མཚན་རིང་ན་རྨི་མང་པ་ཆོས་ཉིད་ཡིན་སྲིད་མོད། འུ་ཅག་གི་རྨི་ལམ་འདིའི་འཆར་སྒོ་ནི་ཞིས་ཅིན་ཕིན་གྱི་གློ་སྙིང་མཆིན་གསུམ་གྱི་འགུལ་སྐྱོད་ལག་པར་བླངས་ཏེ། མ་འོངས་པར་གོ་སྐབས་གང་འདྲ་ཞིག་རག་མིན་ལ་དཔྱད་ཞིབ་བྱ་འདུན་མ་ཡིན་པར། ཞིས་ཅིན་ཕིན་ནི་ཁོང་གི་ཕ་དམ་པ་ཞིས་ཀྲུང་ཞོན་གྱི་ལམ་ཕྱོགས་རྒྱུན་འཛིན་མཁན་ཞིག་ཡོང་རྒྱུར་མུན་ནག་མདའ་འཕེན་གྱི་གསོལ་འདེབས་བྱེད་བཞིན་ཡོད། འདི་ཡང་བོད་རེ་བས་ཕོངས་བྱེད་ཀྱི་ལུང་བསྟན་དེའི་གྲིབ་གཟུགས་སུ་གྱུར་ཡོད།
ལོ་ངོ་དྲུག་ཅུའི་ཡར་སྔོན་ལ་བོད་དུ་དམར་དམག་ཐེངས་དང་པོར་སླེབས་སྐབས། ཕ་དམ་པ་ཞིས་ཀྲུང་ཞོན་གྱིས་ནུབ་བྱང་ཁུལ་གྱི་མགོ་གཙོའི་མིང་ཐོག་ནས་པེ་ཅིན་ལ་གློག་འཕྲིན་བཏང་སྟེ། བོད་སྐྱོད་རྒྱ་དམག་ཚོས་༸ཏཱ་ལའི་བླ་མ་དང་༸པཎ་ཆེན་བླ་མ་གཉིས་གཙོས་པའི་བོད་མི་རིགས་ལ་མཐུན་ལམ་ཡག་པོ་བཟུང་སྟེ། བོད་རྒྱ་གཉིས་འཐབ་ཕྱོགས་གཅིག་གི་ལམ་ལ་མཉམ་སྐྱོད་ཐུབ་དགོས་པའི་རེ་སྐུལ་བཏོན་ཚུལ་འདུག ཡིན་ནའང་། ཉེ་ཆར་ཞིས་ཅིན་ཕིན་གྱིས་རྒྱ་གཞུང་གི་མ་འོངས་སྲིད་འཛིན་གྱི་མིང་ཐོག་ནས་པོ་ཏ་ལའི་མདུན་ཐང་དུ་ལངས་ཏེ། འདས་པའི་ལོ་ངོ་དྲུག་ཅུར་བོད་མི་ཚོར་དྲག་གནོན་བྱེད་མཁན་གྱི་དམག་དཔུང་ལ་ཁ་ཕྱོགས་ནས་ཏཱ་ལའི་རུ་ཚོགས་ལ་མཐའ་གཅིག་ཏུ་ཁ་གཏད་གཅོག་དགོས་ཞེས་བཀའ་རྒྱ་བཏང་སོང་། སྔོན་མ་ཕ་དམ་པ་ཞིས་ཀྲུང་ཞོན་གྱིས་བོད་ཀྱི་མཐའ་འདབས་ནས་པེ་ཅིན་ལ་སྐུར་བའི་རེ་སྐུལ་དེ་དང་། ད་ལྟ་བུ་བཙན་པོ་ཞིས་ཅིན་ཕིན་གྱིས་པེ་ཅིན་དཀྱིལ་འཁོར་ནས་བོད་ཡུལ་ལ་བཏང་པའི་བཀའ་རྒྱ་འདི་གཉིས་ཀྱི་ཁ་དོག་འདྲ་ཡང་ནང་དོན་མི་འདྲ་ལ། འུ་ཅག་ལ་ཕ་བུ་གྲོངས་འཇུག་གི་བསོད་དེ་ཞིག་གནང་མེད་པ་དེ་ཡང་མཐོང་དགོས། ཏང་གི་གཏོ་སྒྲོམ་དམར་པོ་དེའི་ནང་ན་འུ་ཅག་ལ་དུས་ནམ་ཡང་རྨི་ལམ་སྐྱིད་པོ་ཞིག་གཏོང་ས་ཡེ་ནས་མེད་པ་ཚོར་དགོས།
གོ་ཐོས་ལ་ཞིས་ཀྲུང་ཞོན་བཙོན་ཁང་དུ་ལོ་ ༡༦ བསྡད་དེ་ཕྱིར་སླེབས་སྐབས། སྔོན་ཆད་༸གོང་ས་མཆོག་གིས་རང་ཉིད་ལ་གནང་བའི་ལག་འདོགས་ཕྱག་ཚོད་ཞིག་ལ་རྩིས་འདང་ཆེན་པོས་ཉར་ཚགས་བྱས་ཡོད་པར་མ་ཟད། ཁོ་རང་ནད་མནར་གྱིས་མལ་ལ་ལྷུང་དུས་ཀྱང་ལག་པའི་སོར་མོ་སྤྱི་བོར་བཀོད་དེ། ང་རང་༸རྒྱལ་བ་༸པཎ་ཆེན་རྣམ་གཉིས་ལ་དད་གུས་ཡོད་ཅེས་བརྗོད་ཡོད་པར་སྐད། བོད་པ་ཚོས་ཡང་བསྐྱར་སྣང་བ་སྐྱིད་པའི་རྨི་ལམ་ཞིག་བཏང་ན། ཕྱག་ཚོད་དེ་ཞིས་ཅིན་ཕིན་གྱི་གསང་བའི་མཆོད་སྒྲོམ་ནང་ཡོད་སྲིད་ལ། ཉིན་ཞིག་ཞིས་ཅིན་ཕིན་གིས་ཀྱང་ཉལ་ཁྲི་མཐའ་མིའི་སྟེང་ནས། ཏཱ་ལའི་བླ་མའི་ལྷ་སྡེ་མི་སྡེ་ལ་ཡ་ང་བའི་ལས་དོན་སྤེལ་རྒྱུ་མང་དྲགས་སོང་ཞེས་ལག་པ་ཐལ་མོ་སྦྱོར་སྲིད།
