ཟླ་འདིའི་ཕྱི་ཚེས་ ༡༨ ནས་ ༢༡ བར་རྒྱལ་ས་ལྡི་ལིར་བཀའ་སྤྱི་ཐུན་མོང་གི་སྣེ་ཁྲིད་འོག་རྒྱ་བལ་འབྲུག་གསུམ་གྱི་མི་མང་ ༣༥༠༠ ལྷག་གི་འདུ་འཛོམས་ཀྱིས་ཞི་བའི་གོམ་བགྲོད་དང་ཟས་བཅད་སྨྱུང་གནས། བསྔོ་སྨོན་མཆོད་འབུལ། མར་མེ་ཁྲོམ་སྐོར་སོགས་ཀྱི་ལས་འགུལ་སྤེལ་ཡོད་པ་བཞིན། བོད་མི་མང་སྤྱི་འཐུས་ལྷན་ཚོགས་ཀྱིས་ཆེད་འཛུགས་གནང་བའི་གསར་ལམ་འབྲེལ་མཐུད་རྣམ་པར་བཅར་འདྲི་ཞུས་ཡོད།
རྒྱ་ཡིག་གི་གསར་འགྱུར་འབྲེལ་མཐུད་པ་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་སུ། ཐེངས་འདིའི་གཞུང་འབྲེལ་གདུང་སེམས་མཉམ་སྐྱེད་དང་འབྲེལ་བའི་གནས་ཚུལ་ཁག་རྒྱ་ཡིག་གི་བརྒྱུད་ལམ་གང་དག་ཏུ་ཐོན་ཡོད་མེད་དང་ལས་འགུལ་འདིའི་ཤུགས་རྐྱེན་ག་ཚོད་ཐེབས་མིན་དྲིས་པར་ཁོང་གིས། “ཐེངས་འདིའི་གཞུང་འབྲེལ་གདུང་སེམས་མཉམ་སྐྱེད་དང་འབྲེལ་བའི་གནས་ཚུལ་ཁག་རྒྱ་ནག་ཕྱི་ཕྱོགས་ཀྱི་རྒྱ་ཡིག་གི་བརྙན་འཕྲིན་དང་རླུང་འཕྲིན། ཚགས་པར། དྲ་རྒྱ་བཅས་བརྒྱུད་ལམ་ཁག་མང་པོ་ཞིག་ཏུ་ཐོན་ཡོད་པར་མ་ཟད། ཨ་རིའི་རླུང་འཕྲིན་དང་ཨེ་ཤ་ཡ་རང་དབང་རླུང་འཕྲིན་ཁང་གི་ཀོང་ཏུང་དང་པེ་ཅིན་སྐད་སྡེ་ཚན་གཉིས་ཀྱིས་གནས་ཚུལ་ཐད་གཏོང་དང་བོད་ནང་གི་གནས་ཚུལ་མང་པོ་ཞིག་ལུང་འདྲེན་བྱས་སོང་། དེ་བཞིན་ཧྤ་རན་སི་གསར་ཁང་གི་རྒྱ་ཡིག་སྡེ་ཚན་གྱིས་ཆེད་བརྗོད་ལེ་ཚན་དང་འཇར་མན་གསར་ཁང་གི་རྒྱ་ཡིག་སྡེ་ཚན་བཅས་ཀྱིས་ང་ལ་བཅར་འདྲི་བྱས་སོང་། གཞན་པོ་ཞོན་དྲ་བ་དང་དུས་རབས་གསར་བའི་གསར་འགྱུར་དྲ་བ། རྩ་རླུང་སྒོམ་སྒྲུབ་ཚོགས་པའི་རྒྱ་སྐད་ཀྱི་བརྙན་འཕྲིན་བཅས་སུ་གནས་ཚུལ་བཀོད་འདུག་ལ། དྲ་རྒྱ་ཁག་ཅིག་བརྒྱུད་དེ་བྷི་བྷི་སེ་གསར་ཁང་སོགས་རྒྱ་ཡིག་གི་གསར་འགྱུར་བརྒྱུད་ལམ་མང་པོ་ཞིག་གིས་གནས་ཚུལ་སྤེལ་འདུག ཁོང་ཚོའི་ངོས་ནས་ད་དུང་མུ་མཐུད་དུ་གཏོང་འཆར་ཡོད་སྐོར་ཡང་རྗོད་ཀྱི་འདག ” ཅེས་བརྗོད་བྱུང་།
ཡང་ཁོང་ལ་ཐེངས་འདིའི་ལས་འགུལ་གྱིས་སྤྱི་ཚོགས་ནང་ཤུགས་རྐྱེན་གང་འདྲ་ཐེབས་མིན་དྲིས་པར། “ཐེངས་འདིའི་ལས་འགུལ་དེ་གཙོ་བོ་བོད་ནང་གི་ཛ་དྲག་གི་གནས་སྟངས་ལ་གཞིགས་ཏེ་སྤེལ་བ་རེད། ཡིན་ནའང་། གཞུང་ངོས་ནས་ཁྲོམ་གཞུང་དུ་ངོ་རྒོལ་ཁྲོམ་སྐོར་བྱེད་དགོས་མིན་དེ་གནས་ཚུལ་ཞིག་རེད་བསམ་གྱི་འདུག ང་རང་གི་ངོས་ནས་གཞུང་གི་ལས་འགན་གཙོ་བོ། བོད་ནང་གི་ཛ་དྲག་གནས་སྟངས་འཛམ་གླིང་རྒྱལ་ཁབ་ཁག་དང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚན་པ། ཨ་རི་གཙོས་པའི་རང་དབང་དང་དམངས་གཙོའི་གཞུང་ཁག་ལ་ཞུ་རྒྱུ་དེ་གལ་ཆེ་ཤོས་རེད་བསམ་གྱི་འདུག མང་ཚོགས་རང་བཞིན་གྱི་ལས་འགུལ་དེ་གཞུང་འབྲེལ་མིན་པའི་ཚོགས་པ་མང་པོ་ཡོད་པ་དེ་དག་གིས་སྤེལ་ན་ཡག་གི་རེད་དེ། བར་ལམ་ཞིག་ནས་གཞུང་འབྲེལ་མིན་པའི་ཚོགས་པ་ཁག་གིས་ལས་འགུལ་ཉམ་ཡོད་པའི་རྣམ་པ་ཞིག་མཐོང་སོང་། ཐེངས་འདིར་གཞུང་འབྲེལ་གྱི་ཐོག་ནས་ལས་འགུལ་སྤེལ་བ་དེས་གཞུང་འབྲེལ་མིན་པའི་ཚོགས་པ་ཁག་ལ་ལས་འགུལ་སྤེལ་དགོས་པའི་བརྡ་ལན་ཞིག་སྤྲད་ཡོད་པ་རེད་བསམ་གྱི་འདུག གཙོ་བོ་རྒྱལ་ཁབ་ཁག་གི་རྒྱབ་སྐྱོར་རེག་རྒྱུ་དང་རྒྱ་ནག་གཞུང་ལ་བརྡ་ལན་སྤྲད་དེ་བོད་ནང་བཟང་ཕྱོགས་ཀྱི་འགྱུར་བ་འགྲོ་རྒྱུ་དེ་རེད། རྒྱ་ཡིག་གི་བརྒྱུད་ལམ་ཁག་གི་གནས་སྟངས་ལ་གཞིགས་ན་ལས་འགུལ་འདི་བརྒྱུད་དེ་མ་འོངས་པར་བརྒྱུད་ལམ་ཁག་གི་དོ་སྣང་ཆེ་རུ་འགྲོ་ངེས་པ་རེད་བསམ་གྱི་འདུག” ཅེས་བརྗོད་བྱུང་།
དབྱིན་སྐད་དང་ཧིན་སྐད་འབྲེལ་མཐུད་པ་སྤྱི་འཐུས་དབུ་དཀར་ཚང་གཡུ་སྒྲོན་ལགས་སུ། ཐེངས་འདིའི་གཞུང་འབྲེལ་གདུང་སེམས་མཉམ་སྐྱེད་ཀྱི་ལས་འགུལ་བརྒྱུད་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཁྱབ་སྤེལ་གང་འདྲ་ཐུབ་ཡོད་མེད་དྲིས་པར་ཁོང་མོས། “ ང་རང་ལ་མཚོན་ན་ཐེངས་འདིའི་ལས་འགན་གཙོ་བོ། དབྱིན་ཡིག་དང་ཧིན་སྐད་ཀྱི་གསར་ལམ་འབྲེལ་མཐུད་པ་རེད། ཉིན་འདི་དག་གི་ལས་འགུལ་སྐབས་ཁྱོན་བསྡོམས་རྒྱ་གར་དང་ཕྱི་རྒྱལ་གྱི་བརྒྱུད་ལམ་མི་འདྲ་ ༡༢ ལྷག་གི་གསར་འགོད་པ་བསླེབས་སོང་། དེ་དག་ནང་གཙོ་བོ་འཇར་མན་རླུང་འཕྲིན་དང་སི་པན་བརྙན་འཕྲིན། ཧིན་རྡུ་དུས་བབ། རྒྱ་གར་གྱི་བང་ཆེན་གསར་ཁང་། ཨེ་པེ་གསར་ཁང་། རོའུ་ཁྲིར་བཅས་ཀྱི་གསར་འགོད་པ་རེད། གསར་འགྱུར་བརྒྱུད་ལམ་ཁག་ཅིག་ཉིན་ལྟར་ལས་འགུལ་སྤེལ་ཡུལ་དུ་ཡོང་གི་འདུག དེ་མིན། ང་ཚོ་སྒེར་ངོས་ནས་ཀྱང་ཊའུ་ཊིར་དང་ངོ་དེབ་སོགས་བརྒྱུད་དེ་ཉིན་རེའི་གནས་ཚུལ་ཁྱབ་བསྒྲགས་བྱས་པ་ཡིན། དབྱིན་ཇི་སྐད་དང་ཧིན་རྡུ་སྐད་ཡིག་གཉིས་ལས་དབྱིན་ཇིའི་བརྒྱུད་ལམ་ཁག་གིས་དོ་སྣང་ཆེན་པོ་བྱེད་ཀྱི་འདུག རྒྱ་གར་གྱི་གསར་འགོད་པ་ཚོར་མཚོན་ན། ཁོང་ཅག་གི་ས་གནས་ཁག་ཏུའང་གནས་ཚུལ་མང་པོ་ཞིག་འཐོན་གྱི་ཡོད་པ་རེད། ང་ཚོའི་ལས་འགུལ་ལ་དོ་སྣང་མེད་པའི་རྣམ་པ་མཐོང་གི་འདུག ང་རང་གི་ལས་འགན་གྱི་ནང་ནས་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཤུགས་ཆེར་འགྲོ་ཐུབ་མ་སོང་། གཙོ་བོ། གསར་འགོད་པ་ཁོ་ཚོ་ནང་ཁུལ་དུ་ཡང་རྙོག་དྲ་མང་པོ་ཞིག་ཡོང་གི་ཡོད་ཚོད་འདུག” ཅེས་བརྗོད་བྱུང་།
ཡང་ཁོང་ལ་ཐེངས་འདིའི་ལས་འགུལ་བརྒྱུད་རྒྱལ་སྤྱི་དང་རྒྱ་གར་གྱི་བརྒྱུད་ལམ་ཁག་དོ་སྣང་དང་ཤུགས་རྐྱེན་གང་འདྲ་ཞིག་ཐེབས་ཐུབ་མིན་དྲིས་པར་ཁོང་གིས། “ གཙོ་བོ་ང་ཚོའི་ངོས་ནས་མུ་མཐུད་ལས་འགུལ་སྤེལ་རྒྱུ་གལ་ཆེན་པོ་རེད་བསམ་གྱི་འདུག བརྒྱུད་ལམ་ཁག་ཏུ་གནས་ཚུལ་བསླེབས་མིན་དེ་ང་ཚོའི་གནད་དོན་གལ་ཆེན་ཡིན་པ་དེ་ཕྱི་ལ་སྟོན་ཐུབ་པ་ཞིག་དགོས་པ་རེད་ལ། གལ་སྲིད་ང་ཚོའི་གནད་དོན་དེ་བརྒྱུད་ལམ་འདྲ་མིན་ནང་ཤུགས་ཆེ་རུ་ཕྱིན་པ་ཡིན་ན། གནས་སྐབས་ཀྱི་ལས་འགུལ་སྤེལ་བའི་དུས་ཙམ་མིན་པར་ནམ་རྒྱུན་ནས་གསར་འགོད་པ་དང་བརྒྱུད་ལམ་ཁག་ལ་འབྲེལ་བ་འཛུགས་རྒྱུ་གལ་ཆེན་རེད། དེ་བཞིན། ཐེངས་འདིར་གཞུང་འབྲེལ་གྱི་ཐོག་ནས་གོམ་བགྲོད་ལས་འགུལ་སྤེལ་ཡོད་ཀྱང་། དེ་ལས་གལ་ཆེ་བ་དེ་རྒྱལ་སྤྱིའི་གཞུང་དང་གྲོས་ཚོགས། མཉམ་འབྲེལ་རྒྱལ་ཚོགས་བཅས་ཀྱི་གནད་ཡོད་མི་སྣར་འབྲེལ་བ་བྱ་རྒྱུ་གལ་ཆེན་པོ་རེད་བསམ་གྱི་འདུག ད་ལྟའི་ཆར་ཨ་རི་གཙོས་པའི་རྒྱལ་ཁབ་ཁག་གིས་བོད་ཀྱི་གནད་དོན་གླེང་སློང་གང་འཚམ་བྱེད་ཀྱི་འདུག རྒྱ་གར་གྱི་གནད་ཡོད་མི་མང་པོ་མཉམ་ཞུགས་བྱས་ཡོད་སྟབས། ཐེངས་འདིའི་ལས་འགུལ་གྱིས་རྒྱལ་སྤྱི་དང་རྒྱ་གར་ནང་ཤུགས་རྐྱེན་ཆེན་པོ་ཐེབས་འདུག་བསམ་གྱི་ཡོད ” ཅེས་བརྗོད་བྱུང་།
བོད་སྐད་གསར་ལམ་འབྲེལ་མཐུད་པ་སྤྱི་འཐུས་ཐུབ་བསྟན་ལུང་རིགས་ལགས་སུ། ཐེངས་འདིའི་ལས་འགུལ་སྐབས་བོད་པའི་བརྒྱུད་ལམ་ཁག་གི་དོ་སྣང་དང་གནས་ཚུལ་གཏོང་ཕྱོགས་གང་འདྲ་ཡོད་མེད་དྲིས་པར་ཁོང་གིས། “ ང་ཚོའི་ངོས་ནས་གང་ཐུབ་ཀྱིས་བོད་པའི་རླུང་འཕྲིན་དང་བརྙན་འཕྲིན། དྲ་རྒྱ། ཚགས་ཤོག་ཡོངས་རྫོགས་ལ་གནས་ཚུལ་མཁོ་གཏོང་བྱས་ཡོད། རྒྱ་གར་གྱི་གསར་འགོད་པ་དང་བལ་ཡུལ་གྱི་གསར་འགོད་པ་ཁག་ཅིག་གིས་ཁ་པར་བརྒྱུད་དེ་བཅར་འདྲི་བྱས་སོང་ལ། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་སྐད་རླུང་འཕྲིན་དང་ཨེ་ཤ་ཡ་རང་དབང་རླུང་འཕྲིན་ཁང་བཅས་ཀྱིས་ཆེད་མངགས་དང་ཁ་པར་གྱི་ལམ་ནས་ཉིན་གསུམ་ལྷག་གི་གནས་ཚུལ་གྱི་བྱུང་རིམ་མཐའ་དག་བཅར་འདྲི་བྱས་སོང་། བཞུགས་སྒར་ནས་གསར་འགོད་པ་སྐོར་ཞིག་ཆེད་དུ་ལྡི་ལིར་ཕེབས་ཏེ། ཉིན་རེར་འདིར་ཡོང་སྟེ་འགན་འཁུར་བའི་ཐོག་གནས་ཚུལ་མཁོ་གཏོང་བྱེད་བཞིན་འདུག” ཅེས་བརྗོད་བྱུང་།
ཡང་ཁོང་ལ་ཐེངས་འདིའི་གཞུང་འབྲེལ་གྱི་ལས་འགུལ་བརྒྱུད་ཀྱིས་རྒྱལ་སྤྱི་དང་རྒྱ་ནག་ནང་ཤུགས་རྐྱེན་གང་འདྲ་ཐེབས་མིན་དྲིས་པར་ཁོང་གིས། “ ལས་འགུལ་ཤུགས་ཆེ་རུ་འགྲོ་མིན་དེ་སྐབས་དང་དུས་ལ་བསྟུན་དགོས་པ་ཞིག་ཡིན་ཡང་། ཐེངས་འདིའི་ལས་འགུལ་ལས་བོད་མི་ཚོ་དང་ལྷག་པར་དུ་གཞོན་སྐྱེས་ཚོར་སེམས་ཤུགས་ཆེན་པོ་ཡོད་ཀྱང་། སྣེ་འཁྲིད་མཁན་མེད་པའི་དཀའ་ངལ་དང་ལས་འགུལ་གྱི་ཕན་གནོད་གང་ཡོང་ཐེ་ཚོམ་ཡོད་པའི་རྣམ་པ་གསལ་བོ་འདུག གལ་སྲིད། སྣེ་འཁྲིད་མཁན་ཞིག་ཡོད་པ་ཡིན་ན་མི་མང་གི་ངོས་ནས་འདིའི་ཐད་རྒྱབ་སྐྱོར་གྱི་རྣམ་པ་ཆེན་པོ་ཡོད་པའི་ཚོར་སྣང་བྱུང་སོང་། ལས་འགུལ་གྱི་ཤུགས་རྐྱེན་གྱི་ཐད། རྒྱ་གར་གྱི་གནད་ཡོད་མི་སྣ་དང་ཚོགས་སྡེ་ཁག་གི་འཐུས་མི་མང་པོ་ཕེབས་ཏེ་ལས་འགུལ་ནང་མཉམ་ཞུགས་ཀྱིས་གཏམ་བཤད་གནང་བ་ལ་གཞིགས་ན། བོད་དོན་ལ་རྒྱབ་སྐྱོར་ཤུགས་ཆེན་པོ་རེད། རྒྱ་གར་བའི་རིས་མེད་ཆོས་ལུགས་ཀྱི་དབུ་ཁྲིད་དང་གཞུང་ཚབ་ཁང་ཚང་མས་རྒྱབ་སྐྱོར་གནང་སོང་ལ། ལས་འགུལ་རིམ་པར་སྤེལ་བའི་དབང་གིས་རྒྱ་ནག་གཞུང་གིས་ཀྱང་ཚུར་རང་ལུས་མེར་བསྲེགས་བཏང་བའི་གནས་ཚུལ་ལ་ཞིབ་འཇུག་བྱ་རྒྱུ་ཡིན་པའི་བརྡ་ལན་སྤྲད་ཡོད་པ་སོགས་ལས། ཐེངས་འདིའི་ལས་འགུལ་གྱིས་རྒྱལ་སྤྱི་དང་རྒྱ་ནག་མི་མང་བཅས་ལ་ཤུགས་རྐྱེན་ཆེན་པོ་ཞིག་ཐེབས་འདུག་བསམ་གྱི་ཡོད། “ ཅེས་བརྗོད་བྱུང་།
གནས་ཚུལ་མཁོ་སྒྲུབ་པ་སྤྱི་འཐུས་རྨོག་རུ་བསྟན་པ་ལགས་སུ། ཐེངས་འདིའི་ལས་འགུལ་སྐབས་གནས་ཚུལ་མཁོ་སྒྲུབ་གནང་ཕྱོགས་སྐོར་དྲིས་པར། “ ད་རེབ་ང་དང་སྤྱི་འཐུས་གསེར་རྟ་ཚུལ་ཁྲིམས་གཉིས་ཀྱིས་གནས་ཚུལ་མཁོ་སྒྲུབ་བྱེད་ཀྱི་ཡོད། ལས་འགན་གཙོ་བོ་བོད་ནང་གི་ཛ་དྲག་གི་གནས་ཚུལ་མཁོ་སྒྲུབ་དང་མཉམ་དུ་གཞུང་འབྲེལ་ལས་འགུལ་གྱི་ཉིན་རེའི་གསར་འགྱུར་ཁག་བོད་མི་མང་སྤྱི་འཐུས་ལྷན་ཚོགས་ཀྱི་དྲ་རྒྱ་གཙོས་བརྒྱུད་ལམ་ཁག་ཏུ་གཏོང་དགོས་པ་རེད། དེ་བཞིན། ལས་འགུལ་ཐོག་ཕེབས་པའི་རྒྱ་གར་སྐུ་མགྲོན་རྣམ་པའི་གསུང་བཤད་བོད་བསྒྱུར་དང་རྒྱ་གར་གསར་ལམ་ཁག་ནང་བཀོད་པའི་གནས་ཚུལ་རྒྱུས་ལོན་བྱས་པ་ཡིན། དབྱིན་ཇིའི་བརྒྱུད་ལམ་དུ་གནས་ཚུལ་མཁོ་གཏོང་བྱེད་མཁན་སྤྱི་འཐུས་ཤར་གླིང་ཟླ་སྒྲོན་རེད། ཁྱོན་ཡོངས་ཀྱི་གནས་ཚུལ་ལ་བལྟས་ན་ཐེངས་འདིའི་གསར་འགྱུར་དེ་བོད་པའི་བརྒྱུད་ལམ་མང་པོའི་ནང་ཁྱབ་བསྒྲགས་ཤུགས་ཆེན་ཕྱིན་སོང་ལ། དབྱིན་ཇིའི་བརྒྱུད་ལམ་ཡང་མང་པོ་ཞིག་ལ་གནས་ཚུལ་མཁོ་གཏོང་བྱས་ཡོད། ཡིན་ནའང་བརྒྱུད་ལམ་ཁ་ཤས་ནང་དྲ་འབུ་རེ་ཟུང་གིས་སྐད་ཆ་འདྲ་མིན་བཤད་ཀྱི་འདུག ད་ལྟའི་ཛ་དྲག་གི་དུས་ཚོད་ནང་དེ་རིགས་ཡག་པོར་མཐོང་མ་སོང་” ཞེས་བརྗོད་བྱུང་།
ལྡི་ལི་ནས་གསར་འགོད་པ་དོན་གོ
དྲ་གྲོགས་རྣམ་པ་ལགས།
གཞིས་བཞུགས་བོད་མིའི་སྙིང་སྟོབས་དང་ཆོད་སེམས། བློས་བཏང་དང་གྲུབ་འབྲས་དེ་ངོས་འཛིན་ཡང་དག་པ་ཞིག་ཡོང་བའི་ཆེད་དུ། བཙན་བྱོལ་བའི་གཞུང་མང་ཚོགས་པ་ཚང་མའི་ངོས་ནས་མཉམ་རུབ་བྱེད་དགོས་པ་གལ་ཆེན་དོན་ཆེན་ཞིག་རེད། ཉིས་སྟོང་བརྒྱད་ནས་བཟུང་ད་ལྟའི་བར་དུ་དཀའ་ངལ་ཞིག་ལྷགས་བསྡད་པ་ནི། ཟུར་དུ་ཛ་དྲག་འབྲེལ་མཐུད་ཞིབ་འཇུག་ཚོགས་ཆུང་ཞིག་མ་ཡོད་པས་རེད་བསམས་སོང་། གལ་སྲིད། དེ་འདྲའི་བརྒྱུད་ལམ་ཞིག་གཞུང་གི་ངོས་ནས་སྔ་ས་ནས་གྲ་སྒྲིབ་བྱས་ཡོད་རྒྱུ་ཡོད་ན། དགོན་སྡེ་དང་མི་སྒེར་བྱེ་བྲག་པའི་མིང་ཐོག་ནས་ཁྱབ་སྤེལ་བྱེད་མི་དགོས་པར་གཞིས་བཞུགས་བོད་མིའི་ཛ་དྲག་གི་གནས་ཚུལ་དེ། རྒྱལ་སྤྱིའི་ཐོག་ལ་དྲིལ་བསྒྲགས་བྱེད་ཕྱོགས་དེ་མགོ་རྔ་ཡོད་པ་ཞིག་དང་གྲུབ་འབྲས་ཡོད་པ་ཞིག་ཏུ་འགྱུར་གི་རེད་འདོད་དོ།།
གལ་སྲིད། དེ་འདྲའི་ཛ་དྲག་འབྲེལ་མཐུད་ཞིབ་འཇུག་ཚོགས་ཆུང་ཞིག་ཡོད་ན། གཞུང་ངོས་ནས་བཀོད་ཁྱབ་བཏང་ནས། བོད་ནང་གི་ཛ་དྲག་གི་གནས་ཚུལ་སུས་སྔ་སུས་མགྱོགས་མི་བྱེད་པར་གོ་རིམ་དང་འཆར་གཞི་ཡོད་པའི་སྒོ་ནས་གཞུང་ངོས་ནས་གསར་འགོད་ལྷན་ཚོགས་རེ་དུས་ཐོག་ཏུ་བསྐོངས་ནས་ཛ་དྲག་གི་གནས་ཚུལ་རྣམས་ངོ་འཕྲོད་བདེ་བ་དང་། ཁུངས་བཙན་པ་སོགས་ལ་རང་བཞིན་གྱིས་འགྱུར་འགྲོ་གི་མ་རེད་དམ།
ལྷག་པར་དུ། དེ་འདྲའི་བརྒྱུད་ལམ་ཞིག་བསྐྲུན་པ་ཡིན་ན། འབྲེལ་མཐུད་ཉམས་ཞིབ་ཚོགས་ཆུང་གི་ནང་དུ། བོད་རྒྱ་དབྱིན་ཧིན་སྐད་སོགས་ཀྱི་བསྒྱུར་ཐུབ་མཁན་མི་སྣ་གང་མང་ཞིག་བསྡུ་རུབ་བྱས་ནས། དུས་གཅིག་ཉིན་གཅིག་ལ་ཛ་དྲག་གི་གནས་ཚུལ་སྤེལ་བ་ཡིན་ན། དམིགས་བསལ་གྱིས་བོད་གཞུང་གི་ཆེ་མཐོང་དང་ཛ་དྲག་གི་གནས་ཚུལ་དེ་ཚད་གཞི་ཇེ་ཡག་ཏུ་འགྲོ་ངེས་པས་ན། དེ་ལྟར་ཡོང་བར་དྲ་གྲོགས་ཚང་མའི་ངོས་ནས་བསམ་ཚུལ་རེ་འདོན་རོགས་ཞུ།
མ་གཏོགས་ཉིས་སྟོང་བརྒྱད་ནས་ད་ལྟའི་བར་དུ། བཙན་བྱོལ་བའི་གནས་ཚུལ་སྤེལ་ཕྱོགས་ནི། དགོན་པ་ཞིག་དང་མི་སྒེར་ཞིག་གི་ཁ་ལ་ཉན་བསྡད་པའི་གནས་ཚུལ་དེ་ཆེས་མཚར་བོ་ཞིག་རེད། ལྷག་པར་གོ་རིམ་དང་འཆར་གཞི་མེད་པའི་སྒོ་ནས་གང་འདོད་འདོད་དུ་གནས་ཚུལ་སྤེལ་ཕྱོགས་དེས་རང་རང་གི་མིང་འགྲོ་ཕྱོགས་ལ་སྙོབས་ཀྱིན་པའི་བཟོ་ཞིག་མི་འདུག་གམ།
བཀའ་ཁྲི་བློ་བཟང་སེངྒེས་ཁངས་བླངས་ཟིན་པ་ལྟར། ད་ཡིན་ན། ཉིས་སྟོང་བརྒྱད་ལོའི་ཞི་རྒོལ་ལ་བསྐྱར་ཞིབ་བྱས་ཟིན་ཡོད་རྒྱུ་རེད། ཡོད་ན། ད་ནས་བཟུང་། གཞིས་བཞུགས་སྤུན་ཟླ་རྣམ་པའི་ངོས་ནས་རང་ལུས་མེར་བསྲེགས་ཀྱིས་ཞི་རྒོལ་བྱེད་སྟངས་ཀྱི་གནས་ཚུལ་དེ་རྒྱལ་སྤྱིའི་ཐོག་ཏུ་ཞིབ་ཚགས་དང་གོ་རིམ་ཡོད་པའི་སྐྱེལ་རན་པའི་དུས་ཚོད་གཡོལ་གྱིན་པ་མ་ཡིན་ནམ།
བཀའ་སྤྱི་ཟུང་འབྲེལ་གྱིས་ལས་འགུལ་སྤེལ་བ་དང་ཆབས་ཅིག མི་དམངས་བྱིངས་ནས་ཀྱང་ཚ་ཚ་འུར་འུར་ངང་མཉམ་ཞུགས་གནང་ནས་གང་ལ་གང་འཚམ་གྱི་གྲུབ་འབྲས་བྱུང་ཤག་རེད། འོན་ཀྱང་ཁྱེད་གསུམ་གྱིས་གསུངས་པ་ལྟར་ཡིན་མིན་མི་ཤེས།
ལྷག་པར་དུས་བབ་དང་བང་ཆེན་གསར་འགོད་པས་དུས་ཐོག་ཏུ་གསར་འགྱུར་མཁོ་འདོན་གནང་བར་བསྔགས་བརྗོད་ཡོད།
ཉེ་སྔོན་བཀའ་བློན་ཁྲི་པ་བློ་བཟང་སེངྒེས་དུས་ཚོད་དང་བསྟུན་ཏེ་གོ་སྐབས་དམ་འཛིན་བྱ་དགོས་ཞེས་གསུང་པ་བཞིན་རྒྱུན་སྲིང་རྒྱུ་དེ་གལ་ཆེ་ནང་གི་གལ་ཆེར་མཐོང་བས་དེ་དོན་གཞིས་བྱེས་བོད་རིགས་གངས་ཅན་པ་ཡོངས་ནས་ཡིད་བཞག་གིས་ལས་འགུལ་མུ་མཐུད་སྤེལ་དགོས།
ད་ལོའི་བོད་ནང་གི་རང་ལུས་མེར་བསྲེགས་ཀྱི་ཛ་དྲག་གི་དཀའ་ངལ་འདི་སེལ་ཐབས་སུ། གཞུང་མང་མཉམ་འབྲེལ་གྱིས་ལས་འགུལ་སྤེལ་སྐབས་སུ། བོད་ཀྱི་དུས་བབ་ཀྱི་གསར་འགོད་པ་རྣམ་པའི་ངོས་ནས་ཉིན་མཚན་དབྱེ་མེད་སྦྲེལ་ནས། ལས་འགན་དུས་ཐོག་ཏུ་བསྒྲུབས་པར་ཡི་རངས་ཞུ།
ཐེངས་འདིའི་གཞུང་མང་ལས་འགུལ་ནང་ང་རང་མཉམ་ཞུགས་བྱས་པ་ཡིན། སྐབས་དེར་འབྲེལ་མཐུད་པ་རྣམ་པའི་བཤད་པ་ལྟར། གསར་འགོད་པ་དང་བརྒྱུད་ལམ་ཁག་ལ་དེ་འདྲ་ཞིག་འགྲོ་གི་ཡོད་མེད་ཏག་ཏག་ཤེས་མ་སོང་། གང་ལྟར། ལས་འགུལ་མ་སྤེལ་བར་ལྟོས་ཏེ་ཡག་པོ་བྱུང་ཡོད་པ་བདེན་པ་རེད།
ལས་འགུལ་འདིའི་གྲུབ་འབྲས་ད་རུང་བྱུང་ཡོད་པ་མ་རེད་དེ། ལས་འགུལ་རྣམ་གྲངས་གཞན་པའི་ཐོག་ནས་སྤེལ་དགོས་པ་རང་ཤུགས་ཀྱིས་འཁྲི་བའི་འགན་འཁུར་ཞིག་རེད། སོང་ཙང་། གཞུང་མང་ཐུན་མོང་གི་སྣེ་ཁྲིད་པ་རྣམ་པའི་ངོས་ནས། ད་རུང་ཕྱོགས་ཡོངས་ནས་ཅམ་འཇོག་མི་བྱེད་པར་ལས་འགུལ་སྤེལ་དགོས་པ་གལ་ཆེན་དོན་ཆེན་རེད།
ལས་འགུལ་སྤེལ་ཕྱོགས་སྐོར་ལ་བསམ་ཚུལ་ཞིག་རྗེས་སུ་སྤེལ་གི་ཡིན་ནོ།།
ད་ཐེངས་དོན་བཟང་མང་པོ་བཤད་རྒྱུ་འདུག ཐུགས་རྗེ་ཆེ། མི་རེའི་འགན་དེ་འདྲ་་ཁུར་ན་ང་ཚོ་ལ་རེ་བ་དང་འོད་སྣང་རེ་ཡོད་ངེས།
མུ་འཐུད་ནས་རྒྱུན་སྐྱོང་དགོས་པ་གལ་ཆེན་པོ་འདུག
ལས་འགུལ་གཅིག་སྤེལ་ནས་ཁུ་སིམ་པོ་བསྡད་ན་ཡང་ཚང་མ་ཉོབ་འགྲོ་བ་རེད།
དེར་བརྟེན་ཚ་རླབས་འདི་ནུས་ཆུང་དུ་གཏན་ནསའགྲོ་མ་བཅུགས་རོགས་གནང་།