ཕྱི་ལོ་ ༢༠༡༢ ལོར་རྒྱ་ནག་གི་སྲིད་འཛིན་དང་སྲིད་བློན་ལ་འཕོ་འགྱུར་འགྲོ་བཞིན་ཡོད་པ་དང་། ཉེ་ལམ་ཞིག་ནས་རྒྱ་ནག་དབུས་ཆབ་སྲིད་སྡེ་ཚན་ནང་གི་མི་སྣ་སྐོར་ཞིག་ལ་འཕོ་འགྱུར་ཕྱིན་ཡོད་སྟབས། བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་དང་། ཕྱི་དྲིལ་རྒྱ་ཡིག་སྡེ་ཚན་གྱི་འགན་འཛིན་གཞོན་པ་སངས་རྒྱས་སྐྱབས་ལགས་རྣམ་གཉིས་ལ་གནད་དོན་ཁག་ཅིག་གི་ཐོག་གཅིག་གྱུར་གྱི་དྲི་བ་བཏོན་ཡོད།
གསར་འགོད་པ། ལོ་རྗེས་མར་རྒྱ་ནག་དམར་ཤོག་ཚོགས་པའི་ཆབ་སྲིད་སྡེ་ཚན་གྱི་རྒྱུན་ལས་ཚོར་འཕོ་འགྱུར་འགྲོ་བཞིན་པའི་གནས་སྟངས་ཐོག ཁྱེད་རང་རྒྱ་ནག་ཉམས་ཞིབ་པ་ཞིག་ཡིན་པའི་ངོས་ནས་གཟིགས་ཚུལ་ག་རེ་ཡོད་དམ།
སངས་རྒྱས་སྐྱབས། ད་ལྟ་རྒྱ་ནག་ཆབ་སྲིད་སྡེ་ཚན་གྱི་རྒྱུན་ལས་གཏན་འཁེལ་ཡོད་པ་ནི་ཞིས་ཅིན་ཕིན་དང་ལཱི་ཁི་ཆིང་གཉིས་རེད། རྒྱུན་ལས་གཞན་པ་ཚོ་ཕྱིར་བསྒྲགས་བྱས་ཡོད་མེད་ཙམ་ལས་སྔ་ས་ནས་གཏན་འཁེལ་བྱུང་ཡོད་པ་རེད། ཁོང་ཚོའི་ནང་ཁུལ་ལ་ཆབ་སྲིད་ཕྱོགས་ཁག་ཡོད་ཀྱང་རྒྱུན་ལས་གདམ་མ་ཐུབ་པའི་དཀའ་ངལ་དེ་འདྲ་འཕྲད་སྲིད་ཀྱི་མ་རེད། རྒྱུན་ལས་རྣམས་ཀྱང་རྒྱལ་ཡོངས་འཐུས་མི་ཚོགས་ཆེན་དང་ཀྲུང་དབྱང་ཨུ་ཡོན་རིམ་པ་བརྒྱུད་དེ་ཡོང་དགོས་པ་རེད། ཡིན་ནའང་། དབང་ཆ་འཛིན་མཁན་ཚོ་དམར་ཤོག་སྒྲིག་གཞི་ལྟར་བང་བསྒྲིགས་ཏེ་ཡོང་དགོས་པ་ཞིག་ལས། ནུབ་ཕྱོགས་དམངས་གཙོའི་རྒྱལ་ཁབ་ཁག་གི་འགྲོ་སྟངས་ལྟར་འོས་བླུགས་ནས་ཡོང་བ་དེ་འདྲ་མ་རེད།
སྐལ་བཟང་རྒྱལ་མཚན། ད་ཆར་རྒྱ་ནག་དབུས་ཆབ་སྲིད་སྡེ་ཚན་གྱི་རྒྱུན་ལས་གཉིས་གཏན་འཁེལ་བྱུང་ཡོད་ཀྱང་། ཆབ་སྲིད་སྡེ་ཚན་གྱི་རྒྱུན་ལས་གཞན་གསལ་ཁ་མེད་པ་དེ་ཆབ་སྲིད་འཐབ་རྩོད་དང་ཕྱོགས་ཁག་ཕན་ཚུན་གྱི་འགལ་ཟླ་དེ་འདྲ་མ་རེད། རྒྱ་ནག་ཆབ་སྲིད་སྡེ་ཚན་གྱི་འཐུས་མི་ ༢༥ ནང་མི་ཁ་ཤས་ཧ་གོ་གི་ཡོད་པ་རེད། དཔེར་ན། ཁྲུང་ཆིན་དམར་ཤོག་དྲུང་ཆེ་པཱོ་ཞི་ལེ་དང་། ཀོང་ཏུང་དམར་ཤོག་དྲུང་ཆེ་ཝང་ཡང་། སོག་པོ་དམར་ཤོག་དྲུང་ཆེ། ཧུའུ་ལན་དམར་ཤོག་དྲུང་ཆེ་བཅས་ཞིས་ཅིན་ཕིན་རྗེས་ཀྱི་རིམ་པ་དང་པོའི་དཔོན་རིགས་གྲས་སུ་བསླེབ་རྒྱུར་རེ་བ་རྒྱག་གི་ཡོད། མ་གཞི་ཆབ་སྲིད་སྡེ་ཚན་གྱི་རྒྱུན་ལས་ཚོ་འདི་རེད་ཅེས་སྔ་ས་གསལ་ཁ་འདོན་རྒྱུའི་ལམ་སྲོལ་དེ་ཡོད་པ་མ་རེད།
གསར་འགོད་པ། ཁྱེད་ཀྱིས་ད་ལྟའི་རྒྱ་ནག་གཞུང་གི་ཆབ་སྲིད་ལམ་ཕྱོགས་དང་སྤྱི་ཚོགས་ཀྱི་གནས་བབ་གཉིས་གང་འདྲ་ཞིག་ཏུ་མཐོང་གི་ཡོད་དམ།
སངས་རྒྱས་སྐྱབས། དཔྱད་བརྗོད་པ་མང་པོ་ཞིག་གིས་རྒྱ་ནག་ལ་ངོས་འཛིན་གནང་སྟངས་རིགས་གཉིས་འདུག ཕྱོགས་གཅིག་གིས་རྒྱ་གཞུང་གིས་མུ་མཐུད་སྲིད་དབང་བཟུང་ནས་འགྲོ་རྒྱུ་ཡིན་པ་མ་ཟད། དཔལ་འབྱོར་དེ་ཡང་མུ་མཐུད་ཡར་རྒྱས་འགྲོ་རྒྱུ་རེད་ཅེས་བཤད་ཀྱི་ཡོད། ཕྱོགས་གཞན་པ་དེས་རྒྱ་ནག་གིས་ངེས་པར་དུ་བསྒྱུར་བཅོས་མ་བཏང་ན། ཆབ་སྲིད་ཐོག་འགྲོ་ས་མེད་པ་མ་ཟད། དཔལ་འབྱོར་ཐོག་ལའང་འགྲོ་ས་མེད་པ་ཆགས་ཀྱི་རེད་ཟེར་གྱི་ཡོད། ད་ལྟ་རྒྱ་ནག་གཉིས་ཆགས་ཡོད་ལ། དེའི་དང་པོ། རྒྱ་ནག་དབུས་བརྙན་འཕྲིན་( CCTV )དང་མི་དམངས་ཚགས་པར་ཐོག་གི་རྒྱ་ནག་དེ་ཡིན་པ་དང་། རྒྱ་ནག་གཞན་དེ་རྒྱ་ནག་ཏུ་དངོས་སུ་འཚོ་བ་རོལ་བཞིན་པའི་རྒྱ་ནག་མི་དམངས་རྣམས་རེད། མི་མང་པོ་ཞིག་གིས་བརྙན་འཕྲིན་དང་ཚགས་ཤོག་ཐོག་ཡར་རྒྱས་འགྲོ་བཞིན་པའི་རྒྱ་ནག་དེ་མ་གཏོགས་མི་དམངས་ཀྱི་དཀའ་སྡུག་དངོས་མཐོང་གི་ཡོད་པ་མ་རེད། ད་ལྟའི་དམར་ཤོག་གཞུང་འདི་དབང་ཆ་དང་ཁེ་ཕན་ཟུང་དུ་འབྲེལ་བའི་ཚོགས་པ་ཆེན་པོ་ཞིག་ཆགས་ཡོད། ཁོང་ཚོར་ཡོད་པ་དབང་ཆ་དང་ལྐོག་ཟ་རུལ་སུངས་ཀྱི་ཁེ་ཕན་གཉིས་ཆགས་ཡོད། དབང་ཆ་ཡོད་ན་ཁེ་ཕན་ཡོད་སྟབས། ཁོང་ཚོས་དབང་ཆ་རྩ་བ་ནས་གློད་ཀྱི་ཡོད་པ་མ་རེད།
སྐལ་བཟང་རྒྱལ་མཚན། རྒྱ་ནག་ལ་དམངས་གཙོའི་རྒྱལ་ཁབ་གཞན་ལྟར་འོས་ལྡུག་རྒྱུའི་ལམ་ཁ་ཡོད་པ་མ་རེད། ཡིན་ནའང་། དེ་སྔོན་ནང་བཞིན་མའོ་ཙེ་ཏུང་གིས་ངའི་རྗེས་འཛིན་པ་འདི་ཡིན་ཟེར་བ་དང་ཏུན་ཞའོ་ཕིན་གྱི་སྐབས་སུ། དམར་ཤོག་དྲུང་ཆེ་ཅིང་ཙེ་མིན་ཡིན་ཟེར་ནས་གཏན་འབེབས་བྱེད་པའི་དུས་སྐབས་ཡོལ་ཟིན་པ་རེད། སྤྱི་ཡོངས་རྒྱ་ནག་ནང་དམངས་གཙོ་མེད་ནའང་། མཐོ་རིམ་དཔོན་རིགས་ནང་ཕན་ཚུན་བགྲོ་གླེང་དང་གྲོས་བསྡུར་བྱས་ཏེ། ཁོང་ཚོའི་གྲས་ནས་གཅིག་འདེམ་གྱི་ཡོད་པ་རེད་ལ། འདེམ་སྟངས་དེའང་དམངས་གཙོའི་ལུགས་སྲོལ་ཆགས་མེད་ཀྱང་། ཐོག་མའི་དབང་ཆ་གཅིག་སྡུད་ལམ་ལུགས་དང་བསྡུར་ན་ཅུང་ཡག་ཏུ་ཕྱིན་ཡོད།
གསར་འགོད་པ། མ་འོངས་པའི་རྒྱ་ནག་དཔོན་རིགས་ཚོའི་སྲིད་དབང་འཐབ་རྩོད་ཁྲོད་གཞུང་གི་སྲིད་བྱུས་ལ་འགྱུར་བ་འགྲོ་སྲིད་དམ།
སངས་རྒྱས་སྐྱབས། ཁ་ཤས་ཀྱིས་ཧུའུ་ཅིན་ཐའོ་དང་ཅིང་ཙི་མིན་བར་མི་མངོན་པའི་ཚུལ་གྱི་སྲིད་དབང་འཐབ་རྩོད་ཡོད་སྟབས། ལོ་རྗེས་མར་རྒྱ་ནག་ལ་འགྱུར་བ་ཡོང་སྲིད་ཀྱི་རེད་ཟེར་མཁན་འདུག་ཀྱང་། གཞི་རྩའི་དམར་ཤོག་གི་ལངས་ཕྱོགས་གཅིག་པ་ཡིན་དུས་ཕན་ཚུན་མ་མཐུན་པའི་དཀའ་ངལ་ཆེན་པོ་ཡོད་པ་མ་རེད། སྐབས་ཤིག་ལ་ཅིང་ཙི་མིན་གྱིས་འདི་ལྟར་བཤད་ཡོད། “ ང་ཚོ་ཚང་མ་གྲུ་གཟིངས་གཅིག་ལ་བསྡད་ཡོད། གྲུ་གཟིངས་དེ་ཁ་སློག་ན་ང་ཚོ་ཚང་མར་གྱོང་རག་གི་རེད ” ཅེས་བཤད་ཡོད། ད་ལྟའི་དམར་ཤོག་གཞུང་འདིའི་མགོ་ནས་མཇུག་བར་དུ་ལྐོག་ཟ་རུལ་སུངས་དང་། དབང་ཆ་སྒེར་གཅོད་བྱེད་མཁན་དང་ཁེ་ཕན་རག་མཁན་ཕྱོགས་གཅིག་ཆགས་ཡོད་སྟབས། རྒྱ་ནག་ལ་འགྱུར་བ་ཆེན་པོ་འགྲོ་རྒྱུ་ཧ་ཅང་ཁག་པོ་རེད།
སྐལ་བཟང་རྒྱལ་མཚན། དེར་ཁྱད་པར་རྩ་བ་ནས་འགྲོ་ཐུབ་ཀྱི་ཡོད་པ་མ་རེད། རྒྱ་ནག་དམར་ཤོག་དེ་སོ་སོའི་ཁེ་ཕན་ཆེད་ཐག་པ་གཅིག་གིས་བསྡམས་པའི་ཆབ་སྲིད་ཚོགས་པ་ཞིག་ཆགས་ཡོད། ཆབ་སྲིད་ཚོགས་པ་དེས་རྒྱལ་ཁབ་སྐྱོང་བའི་སྐབས་ལ། གུང་གཞོན་ཚོགས་པ་དང་ཅིང་ཙི་མིན་གྱི་ཚོགས་པ། རྒྱ་ནག་དཔོན་རིགས་མི་བརྒྱུད་ཚོགས་པ་བཅས་ཚོགས་ཁག་སྐོར་བཤད་སྲོལ་ཞིག་ཡོད། རྒྱ་ནག་གི་གནད་འགག་ཆེ་ཤོས་ཁོང་ཚོར་དབང་ཆ་འཛིན་རྒྱུའི་ཕྱོགས་ལ་བསམ་ཚུལ་མཐུན་མིན་ཡོང་གི་ཡོད་པ་ལས། ཁོང་ཚོའི་དཀའ་ངལ་དེ་ཆབ་སྲིད་གུ་ཡངས་དང་དམངས་གཙོ་བཅོས་བསྒྱུར་གྱི་འགལ་ཟླ་དེ་འདྲ་གང་ཡང་མ་རེད། ད་ལོར་དཀྱིལ་ཤར་ཡེ་ཤ་ཡའི་ནང་འགྱུར་བ་ཆེན་པོ་ཞིག་འགྲོ་བཞིན་ཡོད་ཀྱང་། རྒྱ་ནག་གི་གནད་འགག་ཆེ་ཤོས་སྤྱི་ཚོགས་བརྟན་ལྷིང་དང་དཔལ་འབྱོར་ཡར་རྒྱས་གཉིས་ཆགས་ཡོད་དུས། གང་གི་ཆ་ནས་བལྟས་ཀྱང་རྒྱ་གཞུང་གི་གནོན་ཤུགས་འོག་མང་ཚོགས་ཀྱིས་རྒྱལ་ཁབ་མགོ་རྟིང་སློག་རྒྱུའི་ལས་འགུལ་སྤེལ་ཐུབ་ཀྱི་ཡོད་པ་མ་རེད།
གསར་འགོད་པ། སྲིད་བློན་ཝུན་ཅཱ་པའོ་ཡིས་རྒྱ་ནག་གི་ཆབ་སྲིད་བཅོས་བསྒྱུར་སྐོར་ཡང་ཡང་བརྗོད་པ་དེར་ལྟ་ཚུལ་གང་འདྲ་ཡོད།
སངས་རྒྱས་སྐྱབས། ཝུན་ཅཱ་པའོ་ཡི་མིང་ལ་རྒྱ་ཡིག་ནང་༼ ཟློས་གར་འཁྲབ་མཁན་གྱི་རྒྱལ་པོ ༽ཟེར་གྱི་ཡོད། ཁོང་གི་ལས་གནས་དེ་ལོ་རྗེས་མའི་ནང་འགྱུར་བ་འགྲོ་དགོས་དུས། ཁོས་ག་རེ་བཤད་ནའང་ཁྱད་པར་དེ་ཙམ་ཡོད་པ་མ་རེད། ཧུའུ་ཅིན་ཐའོ་དང་ཁོང་གཉིས་ཀྱིས་ཆབ་སྲིད་འཁྲབ་ཀྱི་ཡོད་པ་རེད། སྐབས་རེར་མི་གཅིག་གིས་གདོང་ནག་པོ་བསྟན་ན། གཅིག་གིས་གདོང་དཀར་པོ་སྟོན་གྱི་ཡོད་པ་རེད། ད་ལྟའི་རྒྱ་ནག་གི་གནས་སྟངས་ལ་བལྟས་ན་ཝུན་ཅཱ་པའོ་ལྟ་བུའི་མི་སྒེར་བ་ཞིག་གིས་རྒྱ་ནག་ཆབ་སྲིད་ལ་འགྱུར་བ་གཏོང་རྒྱུ་ཧ་ཅང་ཁག་པོ་རེད། སྔོན་མ་ཀྲའོ་ཙི་ཡང་དང་ཧུའུ་ཡའོ་པང་ལྟ་བུའི་མགོ་ཁྲིད་གུ་ཡངས་པོ་རེ་ཟུང་བྱུང་ཡོད་ཀྱང་། ཁོང་ཚོར་ཡང་ཕམ་ཁ་བྱུང་ཡོད་པ་གསལ་པོ་ཤེས་ཀྱི་ཡོད་པ་རེད།
སྐལ་བཟང་རྒྱལ་མཚན། ཝུན་ཅཱ་པའོ་ཡིས་ད་བར་ཐེངས་བདུན་བརྒྱད་ཙམ་ལ་རང་དབང་དམངས་གཙོའི་སྐོར་བཤད་ཡོད་པ་རེད། ཁོང་གིས་བཤད་པ་ཚང་མ་ཆབ་སྲིད་འཁྲབ་སྟོན་ཁོ་ན་ཞིག་ལ་ང་རང་གིས་ངོས་འཛིན་བྱེད་ཀྱི་མེད། ཝུན་ཅཱ་པའོ་སྒེར་གྱི་ངོས་ནས་རྒྱ་ནག་དཔོན་རིགས་ཚོའི་ནང་མང་ཚོགས་ལ་བསམ་བློ་གཏོང་མཁན་ཞིག་ཡིན་པར་མཐོང་གི་ཡོད། གནད་དོན་གཙོ་བོ་དེ་ཝུན་ཅཱ་པའོ་མི་གཅིག་གིས་ག་ཚོད་བཤད་ཀྱང་། རྒྱ་ནག་དབུས་གཞུང་གི་ཆབ་སྲིད་ལངས་ཕྱོགས་ལ་འགྱུར་བ་གཏོང་ཐུབ་ཀྱི་མེད་པར། དམར་ཤོག་གི་ལྟ་བ་དེ་ཚོགས་མི་མང་ཆེ་བར་སྐབས་བསྟུན་དགོས་པ་ཞིག་ཆགས་ཡོད།
གསར་འགོད་པ། ལོ་རྗེས་མར་ཞིས་ཅིན་ཕིན་རྒྱ་ནག་གི་སྲིད་འཛིན་དུ་བསླེབ་པ་ཡིན་ན། དམིགས་བསལ་བོད་དོན་ཐོག་ཕན་གནོད་གང་འདྲ་འབྱུང་བར་ཚོད་དཔག་བྱེད་ཀྱི་ཡོད་དམ།
སངས་རྒྱས་སྐྱབས། ཞིས་ཅིན་ཕིན་བསམ་བློ་གུ་ཡངས་པོ་འདུག་ཟེར་གྱི་ཡོད་ཀྱང་། རྒྱ་གཞུང་ནི་རང་གི་ཁེ་ཕན་གཙོ་བོར་འཛིན་པའི་སྒེར་གཅོད་ཚོགས་པ་ཞིག་ཡིན་སྟབས། ཁོང་རྒྱ་ནག་སྲིད་འཛིན་དུ་བསླེབ་ནའང་བོད་དོན་ཐོག་དམིགས་བསལ་འགྱུར་བ་གང་ཡང་འགྲོ་ཐུབ་རྒྱུ་མ་རེད། བོད་ཀྱི་གནད་དོན་དེ་རྒྱ་ནག་གི་དཔོན་རིགས་རེ་ཟུང་གིས་ཐག་གཅོད་ཐུབ་པ་ཞིག་ཆགས་ཀྱི་མེད་ལ། བོད་ཀྱི་གནད་དོན་ཛ་དྲག་ཏུ་འགྱུར་བཞིན་པ་འདིར་ཧུའུ་ཅིན་ཐའོ་ཡིས་ཤུགས་རྐྱེན་ཆེན་པོ་ཐེབས་ཡོད་སྟབས། ཞིས་ཅིན་ཕིན་སྲིད་འཛིན་དུ་བསླེབ་ཀྱང་ཉུང་མཐར་ལོ་ ༡༠ ཙམ་ནང་ཁོང་ཧུའུ་ཡི་གྲིབ་ནག་ནང་སྡོད་དགོས་ཀྱི་ཡོད། ཆབ་སྲིད་དབྱེ་ཞིབ་པ་ཚོས་མ་འོངས་པའི་ལོ་བཅུའི་ནང་རྒྱ་ནག་ལ་འགྱུར་བ་ཞིག་ཡོང་གི་རེད་ཟེར་གྱི་ཡོད། དེའི་རྒྱུ་མཚན་ཏིན་གྱི་ཁྱིམ་བརྒྱུད་དང་། ཅང་གི་ཁྱིམ་བརྒྱུད་གཉིས་ཧ་ལམ་རྫོགས་བཞིན་པ་དང་། ཧུའུ་ཡི་ཁྱིམ་བརྒྱུད་ཀྱང་དེ་ཙམ་ལྷག་མེད་པ། དེ་བཞིན། རིག་གནས་གསར་བརྗེ་སྐབས་ཀྱི་མི་རབས་རྒན་པ་རྣམས་རྫོགས་ན། མི་རབས་གསར་པ་ཚོ་རང་དབང་དམངས་གཙོ་ལ་དགའ་བ་དང་། ཁོང་ཚོར་ནུབ་ཕྱོགས་ཀྱི་ཤུགས་རྐྱེན་ཆེན་པོ་ཐེབས་ཡོད་སྟབས། ཏན་ཏན་འགྱུར་བ་ཡོང་རྒྱུའི་དུས་ཤིག་ཡོང་སྲིད་པའི་ཚོད་དཔག་བྱེད་ཀྱི་ཡོད།
སྐལ་བཟང་རྒྱལ་མཚན། གང་ཟག་བྱེ་བྲག་པ་གཅིག་རྒྱ་ནག་སྲིད་འཛིན་དུ་བསླེབ་པ་ཙམ་གྱིས་བོད་ཀྱི་སྲིད་བྱུས་གུ་ཡངས་སུ་འགྲོ་བ་དང་། སྲིད་བྱུས་ལ་འགྱུར་བ་ཐེབས་ཐུབ་ཀྱི་རེད་བསམ་གྱི་མེད། ད་བར་ཅིང་ཙི་མིན་དང་ཧུའུ་ཅིན་ཐའོ་གཉིས་བསྡུར་ན། ཅིང་གི་སྐབས་ཅུང་གུ་ཡངས་བ་དང་། ཧུའུ་ཡི་སྐབས་སུ་མངོན་གསལ་དོད་པོས་མཁྲེགས་ཏུ་འགྲོ་བ་དང་སྡུག་ཏུ་ཕྱིན་ཡོད། བོད་ཀྱི་གནད་དོན་དེ་རྒྱ་ནག་རྒྱལ་ཁབ་ཀྱི་བརྟན་ལྷིང་སྲུང་སྐྱོབ་དང་། འཐབ་ཇུས་ངོ་བོའི་ཐོག་གལ་ཆེ་ཤོས་ཤིག་ལ་རྩི་བཞིན་ཡོད་སྟབས། མི་གཅིག་གིས་སྲིད་བྱུས་གུ་ཡངས་གཏོང་ཐབས་ཡོད་པ་མ་རེད། རྒྱ་ནག་གིས་སྲིད་བྱུས་ཇི་ལྟར་མཁྲེགས་བཟུང་བྱས་མིན་ལ་མ་ལྟོས་པར། བོད་ནང་གི་བོད་པ་ཚོས་སེམས་ཤུགས་མ་ཆག་པར་ངོ་རྒོལ་རབ་དང་རིམ་པར་གནང་གི་ཡོད་ལ། བཙན་བྱོལ་ནང་དུའང་ལས་འགུལ་སྤེལ་ཕྱོགས་ཐོག་མུ་མཐུད་ཤུགས་བརྒྱབ་ན། རྒྱ་གཞུང་ཇི་ལྟར་མཁྲེགས་ཀྱང་བོད་ཀྱི་གནད་དོན་ནི་གནད་དོན་ཞིག་ལ་བརྩིས་ཏེ། ང་ཚོར་སྐད་ཆ་བཤད་རྒྱུའི་ཐབས་ལམ་ཞིག་མི་འཚོལ་རང་འཚོལ་ཆགས་ཡོང་གི་རེད།
གསར་འགོད་པ། དཔལ་ལྡན།
![Li Pengxin, a former senior official of the Xinjiang Uygur autonomous region, is sentenced to life imprisonment [Photo/CCTV]](https://tibettimes.net/wp-content/uploads/2025/04/680845dea3104d9fd15678e1-360x180.jpeg)
དགོང་དྲོ་བདེ་ལེགས། ཆབ་བྲག་ལགས་་་སྐུ་ཁམས་བཟང་།
རྡེའུ་དཀར་ནག་ཡིན་ཡང་སྔ་བཞུག་ཡོད། །
དཀར་ནག་རིལ་རིལ་ཡིན་རུང་འགོ་འཇུག་ཡོད། །
སྲིད་ཇུས་འཇིག་པ་དོན་གྱི་སྙིང་པོ་ཡིན། །
སྟག་ཤར་འཇིག་པས་ཀླད་པ་དཀྲུག་ནས་རྒྱལ། །
་་་་་་་་་་་་་་བྱས་ཙང་་་་་དེང་སང་ནི་་་་དེང་སང་སྟེ། ཀླད་པའི་དུས་ཚོད་རེད་་་བོད་ཀྱི་གནད་དོན་དེ་་་་་ངེས་པར་དུ་ཀླད་པ་དཀྲུག་ནས་ནུས་པ་ཐོན་ཐབས་བྱེད་དགོས་ཀྱི་འདུག་་་་་མ་རེད་པས་་་་ཨཱ་་་་
བཙན་བྱོལ་གཞུང་དང་མི་སྒེར་གྱི་ངོས་ནས། རྒྱ་གཞུང་དང་དེའི་སྲིད་ཇུས་ལ་ཞིབ་འཇུག་དང་རྒྱུས་ལོན་གྱི་ཧ་ཅང་ཞན་པ་གོང་གི་མི་སྣ་གཉིས་ཀྱིས་གསལ་བཤད་བྱས་འདུག གང་ཡིན་ཟེར་ན། བཤད་སྒྲོས་ཙམ་དང་བྱུང་བ་ཙམ་གྱིས་རྒྱ་གཞུང་དང་དེའི་ངན་བྱུས་ལ་རྒྱུས་ལོན་དང་ཚོད་དཔག་བྱེད་ཐུབ་ཀི་མ་རེད།
ནམ་ཞིག་ཡིན་རུང་། རྒྱ་གཞུང་དང་དེའི་སྲིད་ཇུས་འཛིན་མཁན་སུ་ཞིག་ཡིན་མིན་བོད་ལ་མཚོན་ན། དེ་འདྲའི་གལ་འགངས་ཆེན་པོ་ཞིག་མ་རེད་སྙམ། གཙོ་བོ་རྒྱལ་སྤྱིའི་ཐོག་ཏུ་རྒྱ་གཞུང་གི་རྣམ་འགྱུར་འདི་མི་བསྒྱུར་རང་བསྒྱུར་བྱེད་ཐབས་སུ་བཙན་བྱོལ་གཞུང་དང་མི་མང་ཚོགས་པ་སོགས་ཀྱིས་འབོད་ཚིག་གཅིག་དང་ལངས་ཕྱོགས་གཅིག འཐབ་ཕྱོགས་གཅིག་དང་དགོས་འདུན་གཅིག་སོགས་ཀྱིས་ཐབས་བྱུས་སྤྱད་ནས་རང་གར་འདུག་གི་འཇུག་མི་ཉན་པ་དེ་རེད།
སེར་སྨད་བློ་དགའ་ལགས། དེང་སང་མིག་མངས་འདེད་མི་ཤེས་པ་མང་པོས་རྡེའུ་དཀར་ནག་གང་བྱུང་དུ་སྒྲིག་གིན་ཡོད། ངས་བལྟས་ན་ཁྱེད་རང་འཇིག་པ་ཞིག་ཡིན་ཚོད། ཝུན་ཅ་པོ་ནི་ང་ཚོའི་འཇིག་རྡེའུ་གལ་ཆེན་ཞིག་ཡིན་པ་ཤེས་འདུག
གཅིག་གིས་གཅིག་ལ་སྤྲེལ་ལད་བཤད་ནས་ཅི་བྱེད། དངོས་ཡོད་གནས་ཚུལ་དང་མཐུན་པའི་བྱ་སྤྱོད་སྤེལ་རྒྱུ་གལ་ཆེ། འདས་པའི་ལོ་ངོ་ལྔ་བཅུ་ལྷག་གི་ཉམས་མྱོང་ལ་གཞིགས་པའི་སྟ་གོན་བྱེད་རྒྱུ་རེད།
སྔ་དྲོ་བདེ་ལེགས། དངོས་གནས་རེད། ཆབ་བྲག་ལྷ་མོ་སྐྱབས་ལགས་ཀྱིས་གསུངས་པ་བཞིན། སྔོན་མ་ཝུན་ཅ་པའོ་ཡི་གསུང་བཤད་དང་དགོངས་ཚུལ་དེར་བོད་རྒྱ་ཕྱོགས་གཉིས་ཀྱིས་དོགས་འདྲོགས་ཆེན་པོ་བྱས་ཡོད་ལ། དུས་ཚོད་མང་པོ་ཕྱིན་པའི་རྗེས་ཏེ་ད་ལྟའང་ཐེ་ཚོམ་ངང་ཕྱོགས་གཉིས་ཀས་ཁ་བརྡུང་དྲག་པོས་ཝུན་ཅ་པའོ་འུ་ཐུག་བཅུག་གི་ཡོད་པ་རེད། འགྲོ་སྟངས་ཡོད་པ་ཞིག་བྱེད་ན། ང་ཚོའི་ཕྱོགས་ནས་ཝུན་ཅ་པའོ་ཡི་སྐད་ཆ་དེ་ཚོར་རྒྱབ་སྐྱོར་ཆེན་པོས་ཡོངས་ཁྱབ་ཀྱིས་ཁྱབ་བསྒྲགས་ཙམ་མ་ཟད། ཁོང་ཕྱི་ཕྱོགས་སུ་ཕེབས་ཚེ་རྒྱབ་སྐྱོར་རྣམ་པས་ང་ཚོའི་ཕྱོགས་ནས་ནུས་ཤུགས་ཡོད་ཚད་ཀྱིས་ཁོང་གི་གསུང་བཤད་རྣམས་འབོད་ཚིག་བྱས་ཏེ་གུང་ཁྲན་ལ་ངོ་རྒོལ་བྱེད་དགོས་ཀྱི་འདུག དཔེར་ན། སྔོན་མ་ཝུན་ཅ་པའོ་ལ་རྒྱ་ནག་གི་དཔོན་རིགས་ནས་ཁ་བརྡུང་ཆེན་པོ་ཞིག་བཏང་བའི་རྗེས་སུ་ཝུན་ཁོང་ཕྱི་ཕྱོགས་སུ་ཕེབས་པའི་སྐབས་ཤིག་ལ། བོད་ཀྱི་གཞོན་ནུས་ཁོང་གི་པར་ལ་བཟོ་ལྟ་འདྲ་མིན་བཟོས་ཏེ་ངོ་རྒོལ་ཆེན་པོ་བྱས་བྱུང་། སྐབས་དེ་དུས་ངས་གཞོན་ནུའི་མཐོ་རིམ་མི་སྣ་ཞིག་ལ་ཆབ་སྲིད་ཀྱི་ལས་ཀ་ཚད་དང་ལྡན་པ་ཞིག་བྱེད་དགོས་ན། ངེས་པར་དུ་ད་རེས་ཁོང་གི་གུ་ཡངས་གསུང་བཤད་ཀྱི་འབོད་ཚིག་འཕྱར་ནས་ཁོང་ལ་རྒྱབ་སྐྱོར་གྱིས་གུང་ཁྲན་ལ་ངོ་རྒོལ་བྱེད་དགོས་ཀྱི་འདུག་ཅེས་སྐད་གསང་མཐོ་པོས་བསམ་ཚུལ་ཞུས་པ་ཡིན། ཁོང་གིས་ད་རེས་ལས་འཆར་བཟོས་ཚར་བ་རེད་ཅེས་ལན་བཏབ་སོང་། སོང་ཙང་། དེ་ལྟ་བུའི་ཐོག་ནས་ཆབ་བྲག་ལྷ་མོ་སྐྱབས་ལགས་ཀྱིས་གསུང་པ་ལྟར། ང་ཚོས་དམག་རྒྱག་དུས་དགྲ་ཕྱོགས་ཀྱི་མཐུན་རྐྱེན་གང་ཡོད་དེ་འཆོར་མི་ཉན། ཞེས་པ་དེ་གནད་འགག་ཆེན་པོ་ཞིག་དང་ལམ་སྟོན་ཆེན་པོ་ཞིག་རེད། ཨ་ཟླ་ཚོ་ངེས་པར་དུ་གནད་དོན་སེམས་ལ་ཞོགས་་་་་་་་་་་་་་་་་་་་་་་་་་་་་་་རྗེས་ནས་་་་་་་་་་་་་
ཝུན་ཅ་པའོ་སོགས་ཀྱིས་ཀྲུང་གོའི་ཆབ་སྲིད་ལེགས་བཅོས་ཀྱི་གསུང་བཤད་ཇེ་མང་དང་ཤུགས་ཆེར་སྤེལ་གྱིན་ཡོད་ལ། མི་དམངས་ཉིན་རེའི་ཚགས་ཤོག་གི་གླེང་བརྗོད་ནང་ལ་ཡང་གནད་དོན་དེ་གླེང་སློང་ཐུབ་ཀྱིན་ཡོད། འདི་ལྟར་གླེང་ཕོད་པ་ཙམ་གྱིས་ཀྱང་རྒྱབ་རྩ་མཐུག་པོ་ཞིག་ཡོད་པ་ཚོར་ཐུབ།
དོན་དམ་པའི་དམངས་གཙོ་ལ་ཕྱོགས་པའི་དབུ་ཁྲིད་ཁྱུ་གཅིག་སླེབས་ཐུབ་མིན་དེ་གནད་དོན་ཀུན་གྱི་རྩ་བ་ཆགས་ཡོད། ངས་བལྟས་ན་ཝུན་ཅ་པོའོ་ལགས་ཀྱིས་མུ་མཐུད་འཇོན་ཐང་ངོམ་ཐུབ་ན་ལྟད་མོ་ཆེ་ཙམ་མཐོང་ཐུབ་ངེས། ང་ཚོས་དམག་རྒྱག་དུས་དགྲ་ཕྱོགས་ཀྱི་མཐུན་རྐྱེན་གང་ཡོད་དེ་འཆོར་མི་ཉན།
མའོ་ནས་མགོ་བཙུགས། ཏིང་། ཅང་། ཧུའུ་བཅས་གཅིག་རྗེས་གཉིས་འཐུད་ནས་ངོས་གངས་ཅན་པའི་གནས་སྟངས་ཇེ་ངན་ཇེ་སྡུག་ཏུ་ཕྱིན་པ་རེད། ཞིས་ཟེར་བ་དེ་ཡང་སྤྱང་བརྒྱུད་གཅིག་པ་ཡིན་པས་རེ་བ་རྒྱབ་ས་ཁབ་མིག་ཙམ་ཡང་མེད་པ་རེད།
བོད་རེ་བས་ཕུང་། །རྒྱ་དོགས་པས་ཕུང་། །ཞེས་བཟོ་བཅོས་གནོངས་རོགས།
བོད་རེ་བས་འཕོངས། །རྒྱ་དོགས་པས་འཕོངས། །ཞེས་པ་ལྟར་རེད། རྒྱ་ནག་གི་སྲིད་འཛིན་གསར་པ་སུ་འདྲ་ཞིག་འཁོད་ཀྱང་བོད་དོན་ལ་དེ་ཙམ་འགྱུར་བ་འགྲོ་གི་མ་རེད། སྲིད་འཛིན་མའོ་ནས་དུས་ད་ལྟ་བར་དུ་ང་ཚོས་རེ་བ་རྒྱབ་པ་རེད། འཇུག་འབྲས་ཅི་ཞིག་བྱུང་སོང་། གཅིག་གིས་གཅིག་མནན་ནས་འགྱུར་བ་གཏོང་ཆོག་ཆོག་ག་ལ་ཡོད། དེ་ལས་ང་ཚོས་ཐབས་ཤེས་གཞན་དག་འཚོལ་དགོས་པ་རེད།
ཞིས་ཅིན་ཕིན་གྱིས་བོད་ཀྱི་གནད་དོན་ལ་ཕན་ཐོགས་ཀྱི་རེད་དང་མ་རེད་ཀྱི་སྐད་ཆ་མ་རེད། ཁོ་རྒྱ་ནག་གི་སྲིད་འཛིན་དུ་ཐོན་ནའང་ཁོ་ལ་དབང་ཆ་ཡོད་པ་མ་རེད།
ཁོང་རྣམ་གཉིས་ཀྱིས་རྒྱ་ནག་དང་ཐེ་ཝེན་གསར་ཤོག་བཀླགས་ནས་དཔྱད་ཞིབ་པ་གཞན་གྱི་བསམ་ཚུལ་ཙམ་ལད་ཟླུས་ཀྱིས་སྐྱར་བཤད་བྱས་པ་ལས། རང་རང་སོ་སོ་རྒྱ་ནག་གི་ཆབ་སྲིད་ལ་ཞིབ་འཇུག་གནང་མཁན་ཞིག་གི་ངོས་ནས་རང་ཉིད་ཀྱི་ལྟ་གྲུབ་དང་དཔྱད་ཞིབ་ཞིག་མེད་པ་གང་ཡིན་ནམ།