ཆོས་ལུཊ་ལ་བརྟེན་ཏེ་བཟང་སྤྱོད་སྤེལ་བ་དེ་རྒྱ་ཆུང་ཆུང་ཆཊ་ཡོད།

ཉིན་འདི་འགར་༧གོང་ས་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ལྷོ་ཀོ་རི་ཡ་གཙོས་པའི་འཛམ་གླིང་རྒྱལ་ཁབ་ ༥༩ ཙམ་གྱིས་དད་ལྡན་པ་ ༤༣༣༦ ཙམ་ལ་རྗེ་ཙོང་ཁ་པས་མཛད་པའི་ལམ་རིམ་ཞི་ལྷག་གི་སྐོར་བཀའ་ཁྲིད་གནང་བཞིན་ཡོད། 

ཀོ་རི་ཡའི་ནང་པའི་དད་ལྡན་པ་ཆོས་ཞུ་བ་སྐོར་ཞིག་གིས་ཇི་ལྟར་གསོལ་འདེབས་ཞུས་དོན་ལྟར། ཟླ་འདིའི་ཕྱི་ཚེས་ ༢༣ ཉིན་༧གོང་ས་མཆོག་གིས་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཀོ་རི་ཡའི་ནང་པའི་ཆོས་ཞུ་བ་ ༣༥༠ གཙོས་པའི་འཛམ་གླིང་རྒྱལ་ཁབ་ཁག་ ༥༩ ཙམ་གྱིས་ཆོས་ཞུ་བ་ ༡༠༨༢ དང་། དེ་བཞིན། ངྷ་ས་ཁུལ་གྱི་བོད་སེར་སྐྱ་བཅས་ཁྱོན་མི་ ༤༣༣༦ བརྒལ་བར། དུས་ཡུན་ཉིན་གསུམ་རིང་རྗེ་ཙོང་ཁ་པ་ཆེན་པོས་མཛད་པའི་༼བྱང་ཆུབ་ལམ་རིམ་ཆེན་མོའི་༽ཞི་གནས་དང་ལྷག་མཐོང་སྐོར་བཀའ་ཁྲིད་གནང་མགོ་བཙུགས་ཡོད་ཅིང་། གསུང་ཆོས་དབུ་འཛུགས་མ་གནང་གོང་༧གོང་ས་མཆོག་གིས་མང་ཚོགས་ལ་ནང་ཆོས་ངོ་སྤྲོད་གནང་ཡོད།  

སྐབས་དེར་༧གོང་ས་མཆོག་གིས་ཆོས་བྱེད་མཁན་ཚོས་ཆོས་རྣམ་དག་ཅིག་བྱ་དགོས་པ་དང་། འདས་པའི་ལོ་རྒྱུས་དང་ད་ལྟ་བཅས་སུ་ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ། འཁྲུག་པ་རྒྱག་པ་དང་སྤྱི་ཚོགས་ལ་རྙོག་དྲ་བཟོ་མཁན་སོགས་ཡོང་གི་ཡོད་པས། དེ་དག་གིས་ཆོས་ཀྱི་ནང་དུ་བཤད་པའི་བསླབ་བྱ་ཉམས་ལེན་མ་བྱས་པར། ཆོས་ལུགས་ལ་ཞེན་ཁོག་བྱེད་ཀྱི་ཡོད་ཅིང་། སྤྱིར་ཡེ་ཤུ་གཙོས་པའི་ཆོས་ལུགས་ཚང་མའི་ནང་ཞེན་ཆགས་ཞེ་སྡང་སྤང་དགོས་པ་དང་། གཞན་ལ་བཟོད་པ་སྒོམ་དགོས་པའི་བསླབ་བྱ་གནང་ཡོད་ཅིང་། ཁོང་ལ་ཁ་ཆེ་ཆོས་པ་ཞིག་གིས་ “ང་ཚོ་འཇིག་རྟེན་བཀོད་པ་པོ་ཨཱ་ལཱ་ཡིས་བཀོད་པ་ཡིན་སྟབས། སེམས་ཅན་ཐམས་ཅན་ལ་བརྩེ་བ་བྱ་དགོས་པ་རེད” ཅེས་བརྗོད་ཡོད་སྐོར་བཀའ་གནང་སྟེ། ཆོས་ལུགས་ཁག་ཏུ་གསུངས་པའི་བསླབ་བྱ་རྣམས་དངོས་གནས་ལག་བསྟར་བྱ་རྒྱུ་ཡིན་ན། གཞན་ལ་བྱམས་བརྩེ་བྱ་དགོས་པ་དང་། འགལ་ཟླར་བཟོད་པ་སྒོམ་དགོས་པ། འདོད་རྔམ་གྱིས་གཞན་དབང་དུ་མ་སོང་བར་ཆོག་ཤེས་བསྟེན་དགོས་པ། མངོན་ལྐོག་རྒྱབ་མདུན་མེད་པར་དྲང་པོ་བྱ་དགོས་པ་དེ་རེད། འོན་ཀྱང་རེ་ཟུང་གིས་ཆོས་ལུགས་བེད་སྤྱད་དེ་རྙོག་དྲ་བཟོ་བཞིན་ཡོད་པ་རེད་ཅེས་གསུངས་སོང་།

ཁོང་གིས་མུ་མཐུད་དུ་ནང་པ་ཚོའི་ཁྲོད་བཅོམ་ལྡན་འདས་ཀྱི་བསླབ་བྱས་སོ་སོའི་སེམས་འདུལ་རྒྱུའི་ཚབ་ཏུ་ཆགས་སྡང་གི་ལག་ཆར་སྤྱོད་མཁན་ཡོང་གི་ཡོད་པ་དང་། ཆོས་བྱེད་དང་མི་བྱེད་སོ་སོའི་རང་དབང་ཡིན་ཡང་། གལ་སྲིད་ཆོས་བྱ་རྒྱུ་ཡིན་ན། ཆོས་ནས་གསུངས་པའི་བསླབ་བྱ་ཁག་ཉི་མ་རེ་རེ་བཞིན་ལག་ལེན་བསྟར་དགོས་པ་དང་། ལྐོག་ཟ་རུལ་སུངས་བྱེད་མཁན་ཞིག་གིས་དཀོན་མཆོག་ལ་སྨོན་ལམ་བརྒྱབ་ན་ཧ་ལམ་དཀོན་མཆོག་ལ་ངས་ཁྱེད་ཀྱི་དགོངས་པ་དང་འགལ་བའི་ལས་ཀ་བྱེད་ཀྱིོ་ཡོད། དེ་ལམ་འགྲོ་ཡོང་བར་སྐྱབས་འཇུག་གནང་རོགས་ཟེར་བའི་བཟོ་འདྲ་བོ་ཆགས་ཀྱི་ཡོད་པ། གང་བྱུང་མང་བྱུང་གིས་དངུལ་བསགས་ཏེ་ལྐོག་ཟ་བྱེད་པ་དཀོན་མཆོག་གི་བཀའ་དང་འགལ་གྱི་ཡོད་པས་དེ་ལ་ཆོས་མེད་ལབ་ན་ཡག་ཤོས་ཡིན་ཞིང་། ཆོས་ལ་ངོ་རྒོལ་བྱེད་མཁན་ཚོས་ལྐོག་ཟ་རུལ་སུངས་བྱས་ན་དེ་ནི་མིང་དོན་མཚུངས་པ་ཞིག་ཡིན་ཞིང་། ཆོས་པ་ཚོས་མ་རབས་བྱ་རྒྱུར་ཡ་ང་འཚར་སྣང་མེད་ན། སོ་སོ་ཙམ་ཏུ་མ་ཟད་ཆོས་དེ་ལའང་མཚན་ཤས་སུ་འགྲོ་བཞིན་ཡོད་ཚུལ་སོགས་བཀའ་གནང་བྱུང་།

༧གོང་ས་མཆོག་གིས་ཡ་རབས་བཟང་སྤྱོད་ནི་ཆོས་ལུགས་དང་མ་འདྲེས་བར་སྤེལ་སྐོར་གསུངས་དོན།  “ སྤྱོད་པ་ཡག་པོ་བྱ་རྒྱུ་གལ་ཆེན་པོ་ཆགས་ཡོད། སྤྱོད་པ་ཡག་པོ་ཆགས་དགོས་ན་ཆོས་དད་ལ་བརྟེན་དགོས་ཟེར་ན། དེར་བསམ་བློ་གཏོང་དགོས་པ་ཞིག་ཆགས་ཡོད། ཆོས་པ་ཁག་ཅིག་གིས་ཡ་རབས་སྤྱོད་བཟང་ངེས་པར་དུ་ཆོས་དད་ཅིག་ལ་བརྟེན་དགོས་སྐོར་གསུང་གི་འདུག དེ་ལྟར་གསུང་པ་ཡིན་ན་རྒྱ་ཆུང་ཆུང་ཆགས་པ་རེད། འཛམ་གླིང་འདིར་ཆོས་བརྒྱུད་ཆེན་པོ་གང་འདྲ་ཞིག་ཡིན་རུང་། འཛམ་གླིང་ཀུན་ལ་ཁྱབ་པ་ཞིག་ཡོང་གི་མ་རེད། ཡ་རབས་ཀྱི་སྤྱོད་པ་འཛམ་གླིང་ཡོངས་ལ་ཁྱབ་ཐུབ་པ་ཞིག་དགོས་པ་རེད། འཛམ་གླིང་ཡོངས་ལ་ཁྱབ་རྒྱུའི་བསླབ་བྱ་དེ་ཆོས་དད་ཅིག་གི་ཐོག་བཞག་ན། ཆོས་དད་དེ་འཛམ་གླིང་ཀུན་ལ་ཁྱབ་ཐུབ་པ་ཞིག་ཡོང་གི་མ་རེད། ཡ་རབས་སྤྱོད་བཟང་འཛམ་གླིང་ལ་དགོས་པ་རེད། དེ་དགོས་པར་ཆོས་དད་ལ་བརྟེན་ན་ཁག་པོ་ཆགས་ཀྱི་རེད། དེ་ཡིན་དུས། ཡ་རབས་བཟང་སྤྱོད་ཟེར་བ་འདི། ཕྱོགས་གཅིག་ནས་ཆོས་དད་དང་འབྲེལ་ནས་སྤེོལ་དགོས་པ་རེད། སངས་རྒྱས་པའི་ཆོས་ལ་ཆ་བཞག་ན། ཆོས་དད་དང་འབྲེལ་བའི་ཐོག་ལས་བཟང་པོ་བསགས་དགོས་པ་རེད་ཟེར་བའི་སྐབས་ལ། ཚེ་འདི་ཙམ་དུ་མ་ཟད། སྐྱེ་བ་ཕྱི་མ་མངོན་མཐོ་དང་ངེས་ལེགས་བསྒྲུབ་རྒྱུའི་དམིགས་ཡུལ་ཞིག་བཟུང་སྟེ། བླང་དོར་བྱ་རྒྱུ་ཞིག་ཡོང་གི་ཡོད་པ་རེད། སངས་རྒྱས་པའི་ཆོས་ཀྱི་མངོན་འདོད་བདེ་སྐྱིད་དེ་བསྒྲུབ་བྱར་འཇོག་གི་ཡོད་ལ། བསྒྲུབ་བྱ་དེ་མངོན་འདོད་ལ་འཇོག་པའི་སྐབས་སུ། ཕྱི་མའི་མངོན་འདོད་ཙམ་མ་ཡིན་པར། ད་ལྟ་མངོན་འདོད་ཡོད་བཞིན་པ་དེའང་བདེ་སྐྱིད་བསྒྲུབ་དགོས་པ་ཞིག་ཆགས་ཡོད། ང་ཚོས་སྐྱེ་བ་ཕྱི་མ་དང་ཐར་པ་ཐམས་ཅད་མཁྱེན་པའི་སྐད་ཆ་ཕར་བཞག་སྟེ། ཚེ་འདི་ལ་སེམས་སྐྱིད་པ་དང་བག་ཕེབས་པ་ཞིག་དང་།  དེ་ནས་ཁྱིམ་ཚང་གཅིག་ནས་བཅུ། བཅུ་ནས་བརྒྱ། བརྒྱ་ནས་སྟོང་། དེ་ནས་ཁྲི་ཕྲག་བར་གྱི་ཁྱིམ་ཚང་བདེ་ཞིང་སྐྱིད་པ་དང་། བག་ཕེབས་པ་ཡོང་བ་བསྒྲུབ་དགོས་པ་ཆགས་ཡོད། ཆོས་ཕྱོགས་ནས་གསུངས་བའི་དམིགས་ཡུལ་རྒྱ་ཆེན་པོ་བཞག་སྟེ། ངོས་ནས་ནམ་རྒྱུན་ཆོས་དད་དང་མ་འདྲེས་བའི་ཐོག་ནས་མང་ཚོགས་ནང་བཟང་སྤྱོད་ཡར་རྒྱས་གཏོང་རྒྱུར་འབད་བརྩོན་ཞུ་བཞིན་ཡོད། ” ཅེས་གསུངས་བྱུང་།

༧གོང་ས་མཆོག་གིས་ལོ་རེའི་ཕྱི་ཟླ་ ༡༠ པའི་ནང་ལྷོ་ཀོ་རི་ཡ་ནས་ཕེབས་པའི་དད་ལྡན་ཆོས་ཞུ་པ་ཚོར་ཆོས་འབྲེལ་གནང་བཞིན་ཡོད།

གསར་འགོད་པ། དཔལ་ལྡན།