བུ་ཆུང་བསོད་ནམས་བརྩམས། ས་དཀར་བཀྲ་ཤིས་ཀྱིས་བསྒྱུར།
བོད་༼བཅིངས་འགྲོལ༽་བཏང་སྟེ་ལོ་འཁོར་༦༠ ལོན་པའི་མཛད་སྒོའི་སྟེང་ཞིས་ཅིན་ཕིན་གྱིས་གཏམ་བཤད་བྱས་དོན་༼ང་ཚོས་ངེས་པར་ཏུ་ཏྰ་ལའི་རུ་ཚོགས་ཀྱིས་མེས་རྒྱལ་ཁ་བྲལ་གྱི་ལས་འགུལ་སྤེལ་བར་འཐབ་རྩོད་བྱ་དགོས་བ་དང་། རིགས་སོ་སོའི་ལས་བྱེད་མང་ཚོགས་དང་ལྷན་དུ་བོད་ཀྱི་བརྟན་ལྷིང་ལ་གཏོར་བརླག་དང་། མེས་རྒྱལ་གོང་བུ་གཅིག་གྱུར་ལ་གནོད་འཚེ་གཏོང་བའི་འཆར་གཞི་ཐ་དག་ཐལ་བའི་རྡུལ་དུ་བརླག་དགོས།༽ ཁོང་གིས་མུ་མཐུད་དུ་༼བོད་ཀྱི་མི་ལོ་ ༦༠ ཡི་ཆེས་སྤྱིར་བཏང་མ་ཡིན་པའི་ཡར་རྒྱས་བརྒྱུད་རིམ་གྱིས་འགྱུར་མེད་ཀྱི་གཏན་ཚིགས་ཤིག་བཞེངས་ཡོད་དེ། ཀྲུང་གོ་གུང་ཁྲན་ཏང་མེད་ན་ཀྲུང་གོ་གསར་བ་མེད་ལ། བོད་ལྗོངས་གསར་བའང་མེད༽ཅེས་བརྗོད།
ལོ་རྗེས་མར་ཞིས་ཅིན་ཕིན་གྱིས་ཧོའུ་ཅིན་ཐོ་ཡི་རྒྱུད་བཟུང་སྟེ་རྒྱ་ནག་གི་སྲིད་འཛིན་དང་དམར་ཤོག་ཚོགས་པའི་འགོ་ཁྲིད་ཆགས་རྒྱུ་རེད། ཡིན་ནའང་། ངྷ་རམ་ས་ལའི་མཐོ་རིམ་མགོ་ཁྲིད་ཁྲོད་བརྗོད་མི་ཤེས་པའི་སྤྲོ་སྣང་དང་རེ་བ་ཞིག་འཁྱིལ་འདུག་ལ། རེ་བའི་འོད་སྣང་དེ་ཕལ་ཆེར་པེ་ཅིན་ཕྱོགས་ནས་ཡོང་བ་འདྲ། བློ་བཟང་སེང་གེ་ཡིས་བཙན་བྱོལ་བོད་ཀྱི་སྲིད་བློན་འོས་མིའི་འགྲན་བསྡུར་སྐབས་༼ཁོང་ད་ལྟ་སྲིད་བློན་དུ་བདམས་ཟིན༽ཐེངས་མང་པོིར་ ༢༠༡༢ ལོར་ཞིས་ཅིན་ཕིན་གྱིས་སྣེ་ཁྲིད་པའི་དཔོན་རིགས་ཚོ་སྡིངས་ཆའི་སྟེང་སླེབས་རྗེས་གནས་ཚུལ་ལ་འགྱུར་ལྡོག་འབྱུང་ངེས་བ་རེད་ཅེས་བརྗོད་ལ། དེ་དང་མཚུངས་བར། ད་ལྟའི་བཀའ་ཁྲི་ཟམ་གདོང་རིན་པོ་ཆེ་ཡིས་གྲོས་ཚོགས་སྐབས་བཅོ་ལྔ་བའི་ཚོགས་འདུ་ཞིག་གི་སྟེང་ཁོང་གི་ཆེས་མཐའ་མའི་གཏམ་བཤད་སྤེལ་སྐབས་འདི་ལྟར་བརྗོད་ཡོད་དེ་༼འཛམ་གླིང་གི་གནས་སྟངས་ལ་འགྱུར་ལྡོག་འགྲོ་བཞིན་ཡོད། ལྷག་པར་དུ་དཀྱིལ་ཤར་ཡུལ་གྲུ་ཁག་ལ་འགྱུར་བ་འགྲོ་བཞིན་པ་རེད། མ་འོངས་བའི་ལོ་འགའི་ནང་རྒྱ་ནག་ལའང་འགྱུར་བ་འགྲོ་སྲིད་པ་རེད།༽ཞེས་གསུངས་ཡོད།
ཡིན་ནའང་། མིག་སྔར་གྱི་གནས་སྟངས་ལ་གཞིགས་ཚེ། བོད་རང་དབང་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་བསྟན་འཛིན་རྡོ་རྗེ་ཡིས་རེ་བ་ཆེན་པོ་བཟུང་ཡོད་པ་དེ་ལ་མོས་མཐུན་མེད་པ་དང་། བོད་རང་དབང་སློབ་ཕྲུག་ཚོགས་པའི་ལས་ཁུངས་ལྟེ་བ་ནེའུ་ཡོག་ཏུ་ཡོད་ལ། ཚོགས་པ་འདིས་འཚེ་མེད་ཞི་བའི་སྒོ་ནས་ལས་འགུལ་སྤེལ་ཏེ་བོད་རང་དབང་རྩོད་ལེན་བྱེད་ཀྱི་ཡོད། བསྟན་འཛིན་རྡོ་རྗེ་ཡིས་༼ཞིས་ཅིན་ཕིན་གྱི་ཕ་རྒན་ནི་བཅོས་བསྒྱུར་མཁན་ཞིག་རེད། ཁོང་གི་ཆུང་མ་ནི་སྒྱུ་རྩལ་བ་ཞིག་རེད། ཁྱིམ་རྒྱུད་ཀྱི་འབྲེལ་བ་འདིས་མི་ཁ་ཤས་ཤིག་ལ་ཁོ་རང་མགོ་ཁྲིད་ཆགས་རྗེས་འགྱུར་བ་ཞིག་ཡོང་གི་རེད་བསམ་པའི་རེ་བ་ཞིག་སླེབས་ཏུ་འཇུག་མོད། ཡིན་ནའང་ཞིས་ཅིན་ཕིན་ནི་མཁྲེགས་འཛིན་ཅན་གྱི་ཆབ་སྲིད་པ་ཞིག་རེད་ལ། རྒྱ་ནག་དང་བོད་གཉིས་གར་མཚོན་ན་ཁོང་གིས་རླབས་ཆེ་བའི་བསྒྱུར་བཅོས་ཞིག་བྱ་རྒྱུའི་རེ་བ་དང་འཆར་སྣང་ཡོད་མི་སྲིད་པ་ཞིག་རེད།༽ཅེས་བརྗོད།
ཞིས་ཅིན་ཕིན་གྱི་ཕ་རྒན་ཞིས་ཀྲོན་ཡན ་ནི་རྒྱ་ནག་གི་སྲིད་བློན་ཟུར་བ་ཞིག་ཡིན་ལ། ༡༩༥༤དང་༥༥ལོའི་དབར་པེ་ཅིན་དུ་ཏྰ་ལའི་བླ་མ་དང་ལྷན་མཇལ་འཕྲད་གནང་མྱོང་བ་དང་། ཏྰ་ལའི་བླ་མས་ཁོ་ལ་Rolex རྟགས་ཅན་གྱི་ཆུ་ཚོད་ཞིག་ལག་རྟགས་སུ་སྤྲད་ཡོད་པར་བརྗོད། དུས་རབས་སྔ་མའི་ལོ་རབས་༨༠ནང་། རྡ་རམ་ས་ལའི་སྐུ་ཚབ་ཚོགས་པ་པེ་ཅིན་དུ་གཟིགས་སྐོར་ལ་བསྐྱོད་སྐབས། ཞིས་ཀྲོན་ཡན་ནི་རྒྱ་ནག་གཞུང་འབྲེལ་གྱི་གྲོས་མོལ་གནང་མཁན་ཡིན་ལ། ཁོ་ཉིད་རང་དབང་གི་ལྟ་བ་དང་བསམ་བློ་ལྡན་མཁན་ཞིག་ཡིན་པར་གྲགས། ཡིན་ནའང་ཞིས་ཅིན་ཕིན་སྒེར་གྱི་ཆབ་སྲིད་ལྟ་བ་ནི་རབ་རིབ་ཅིག་ཡིན་ལ། ལོ་རྗེས་མ་ཁོ་རང་རྒྱ་ནག་གི་འགོ་ཁྲིད་ཆགས་ནའང་མུ་མཐུད་དེ་ལྟར་ཡིན་ངེས་རེད།
ཞིས་ཅིན་ཕིན་གྱི་ཆབ་སྲིད་ལྟ་བ་ད་རུང་གསལ་བོ་མིན་པས་ཁོང་གིས་རང་ཉིད་ཀྱི་དབང་ཆའི་རྨང་གཞི་སྲ་བརྟན་གཏོང་དགོས་བ་དང་། ཁོང་གིས་ཉེ་ཆར་ལྷ་སར་སྤེལ་བའི་གཏམ་བཤད་ལས་ཁོ་རང་ལྡིངས་ཆའི་སྟེང་སླེབས་རྗེས་མུ་མཐུད་པེ་ཅིན་གྱིས་བོད་ལ་འཛིན་པའི་དམ་དྲག་གི་སྲིད་བྱུས་ལག་བསྟར་བྱ་རྒྱུ་ཡིན་པ་རེད། དངོས་ཡོད་གནས་ཚུལ་འདི་དག་ལ་གཞིགས་ནས་བཙན་བྱོལ་བོད་གཞུང་གི་ཕྱི་དྲིལ་བཀའ་བློན་ཐུབ་བསྟན་བསམ་འཕེལ་གྱིས་བརྗོད་དོན། ༼ཞིས་ཅིན་ཕིན་གཅིག་པུ་ཡིས་བོད་ཐོག་འཛིན་པའི་སྲིད་བྱུས་གུ་ཡངས་ཏུ་གཏོང་མི་ཐུབ་ལ། ཁོང་གིས་ངེས་པར་ཏུ་དབུས་ཆབ་སྲིད་ལྷན་ཁང་གི་ལས་རོགས་ཚོ་ལ་བསྟུན་མཁས་བྱེད་དགོས་བ་དང་། ཁོང་ཚོས་བསམ་འཆར་ལ་ཉན་དགོས། ངས་འདོད་ཚུལ་ནི་ཞིས་ཅིན་ཕིན་དང་ཁོང་གི་ལས་གྲོགས་ཚོའི་མུ་མཐུད་དུ་མིག་སྔར་བོད་ལ་བཟུང་བའི་མཁྲེགས་འཛིན་སྲིད་བྱུས་དེ་རྒྱུན་འཁྱོངས་དང་བརྟན་སྲུང་བྱ་རྒྱུ་ཡིན་པ་རེད།༽ཅེས་བརྗོད།
དེ་ལྟར་ན་ཐེངས་རྗེས་མའི་བོད་རྒྱ་འབྲེལ་མོལ་གྱི་རེ་བ་ནི་ཤིན་ཏུ་ཕྲ་ལ། ཞིས་ཅིན་ཕིན་གྱིས་ད་རུང་གདོང་ལེན་བྱ་དགོས་བའི་གནད་དོན་ཚབས་ཆེན་མང་སྟེ། ལོ་ངོ་བཅུ་ཕྲག་རིང་ཚད་བཀག་མེད་པར་ལང་ཤོར་ཏུ་བཏང་བའི་དཔལ་འབྱོར་འཕེལ་རྒྱས་དང་། ཐོན་ཁུངས་ཆུད་ཟོས་སུ་བཏང་བ་དེས་ཁོར་ཡུག་ཉམས་གསོ་དཀའ་བའི་གཏོེར་བརླག་ཚབས་ཆེན་བཏང་བ། སྤྱི་ཚོགས་ཀྱི་ཟུངས་ཟད་ཅིང་། བོད་དང་ཞིན་ཅིང་། ནང་སོག་ལས་གཞན། ལོ་ལྟར་ཁྲི་ ༡༠ ལས་བརྒལ་བའི་སྤྱི་ཚོགས་སྟེང་གི་ངོ་རྒོལ་ལས་འགུལ། དཔལ་འབྱོར་ལ་ཁྱོན་ཡོངས་ནས་སྙོམས་སྒྲིག་བྱེད་དེ་མུ་མཐུད་གོང་འཕེལ་གཏོང་དགོས་བ་སོགས་ཡོད།
བཙན་བྱོལ་བོད་མིའི་མཐོ་རིམ་མགོ་ཁྲིད་ཚོའི་ང་ཚོས་གདེང་ཚོད་ལྡན་པ་དང་འགན་འཁྲི་ཡོད་པའི་རྒྱ་ནག་ཞིག་དང་འབྲེལ་བ་གནང་གི་ཡོད་ལ། དེ་ནི་དཔལ་འབྱོར་སྟོབས་ཤུགས་ཀྱིས་རྒྱབ་རྩ་བྱེད་ཅིང་ཆེ་མཐོང་ལྡན་པའི་རྒྱལ་ཁབ་ཞིག་ཡིན་པར་ཚོད་དཔོག་བྱེད་ཀྱི་ཡོད། ང་ཚོས་རྒྱུན་དུ་གླེང་བཞིན་པ་དང་། ད་ལྟ་ད་དུང་བསྐྱར་བཟློས་བྱེད་བཞིན་པའི་སྐད་ཆ་ཞིག་ནི། གལ་སྲིད་བོད་འདི་རྒྱ་ནག་དང་མཉམ་གནས་བྱེད་ཚེ་བོད་ཀྱི་དཔལ་འབྱོར་འཕེལ་རྒྱས་ལ་ཁེ་ཕན་ཡོད་པ་རེད་ཅེས་བརྗོད་ཀྱིན་ཡོད། ཡིན་ནའང་། ཚོད་དཔོག་འདི་དང་དངོས་ཡོད་གནས་ཚུལ་དབར་ཁྱད་པར་ཤིན་ཏུ་ཆེ། དེ་རིང་གི་རྒྱ་ནག་ནི་སྤྱི་ཚོགས་ཀྱི་སྒྲིག་གཞི་ཚད་མཐོའི་འདྲ་མཉམ་མིན་པ་དང་། ན་ཚོད་མ་སྨིན་པའི་རྒྱལ་ཁབ་ཞིག་རེད་ལ། ཧྥི་མེའུ་ཞེ་ཡིས་༼ཕྱོགས་ཞེན་ཅན་གྱི་མགོ་ཁྲིད་ཚོའི་ནམ་ཡང་རང་ཉིད་ཀྱི་སྲིད་དབང་དེ་སོ་སོའི་རྒྱལ་ཁབ་ཀྱི་མི་མང་གིས་མགོ་རྟིང་སློག་གི་རེད་བསམ་སྟེ་བློ་འཚབ་སྐྱེས་བཞིན་པ་རེད་༽ཅེས་བརྗོད།
ངྷ་རམ་ས་ལའི་སྤྲོ་སྣང་དང་རེ་བ་དེ་རྒྱ་ནག་ནང་ཆབ་སྲིད་བསྒྱུར་བཅོས་ཤིག་སླེབས་པར་རེ་ལྟོེས་བཅོལ་ཡོད་ལ། དེ་ལྟར་ན་བོད་རྒྱ་འབྲེལ་མོལ་ལ་ཤུགས་རྐྱེན་ཅུང་ཙམ་འབྱུང་ལ། བོད་ཀྱི་གནད་དོན་ཐད་ལའང་རྣམ་པ་གསར་བ་དང་དོན་ཕན་ལྡན་པའི་ཡར་རྒྱས་ཤིག་འབྱུང་སྲིད་པ་རེད། དོན་དངོས་སུ། རྒྱ་ནག་གི་མགོ་ཁྲིད་ཚོས་ཆབ་སྲིད་བསྒྱུར་བཅོས་གླེང་ནས་ལོ་ངོ་སུམ་ཅུ་འགྲོ་བཞིན་ཡོད་ནའང་ཡར་རྒྱས་ཏིལ་བྲུལ་ཙམ་ཕྱིན་མེད་ལ། སྲིད་བློན་བིན་ཅྰ་པོ་ཡིས་རྟག་ཏུ་ཆབ་སྲིད་བསྒྱུར་བཅོས་དགོས་བའི་འབོད་སྐུལ་བྱེད་ཀྱིན་ཡོད། ཁོང་གིས་ད་རུང་དམར་ཤོག་མཐོ་རིམ་མགོ་ཁྲིད་ཚོའི་ལས་ཡུན་རྒྱས་བཅད་དགོས་བའི་འབོད་སྐུལ་བྱེད་ཀྱི་ཡོད་མོད། རང་དབང་རིང་ལུགས་ཀྱི་འབོད་སྐད་འདི་ལ་ནུས་ཤུགས་ཅི་ཡང་ཐོན་གྱི་མེད་པ་རེད། ༢༠༡༠ ལོའི་ཟླ་ ༡༠ པར་དམར་ཤོག་ཚོགས་ཆེན་ཐེངས་ལྔ་བ་ཚོགས་ཏེ་ཡིག་འབྲུ་ ༤༦༠༠ ཅན་གྱི་སྙན་ཐོ་ཞིག་བཏོན་པ་དང་། རྒྱ་ནག་སྤྱི་ཚོགས་རིང་ལུགས་ཀྱི་ཆབ་སྲིད་ལམ་ལུགས་ནི་ཁྱད་དུ་འཕགས་པ་ཞིག་ཡིན་པར་གཏན་དུ་འཁེལ། འདི་ལྟར་ཆབ་སྲིད་བསྒྱུར་བཅོས་གང་ཡིན་རུང་མཐའ་གཅིག་ཏུ་ངོ་རྒོལ་ཡོད་པའི་གནས་སྟངས་འོག ཞིས་ཅིན་ཕིན་གྱིས་མུ་མཐུད་ད་ལྟའི་གནས་སྟངས་འདི་རྒྱུད་འཛིན་བྱ་ངེས་ལ། དེ་ལྟར་ན་ངྷ་རམ་ས་ལའི་རེ་བའང་བློ་འཚབ་ངང་ནས་བློ་ཕམ་དུ་གྱུར་ངེས་སོ།།
༼རྩོམ་པ་པོ་ནི་ངྷ་རམ་ས་ལར་བཞུགས་པའི་སྙན་ངག་པ་ཞིག་ཡིན།༽
མ་རྩོམ་འབྲེལ་ཐག http://www.phayul.com/news/article.aspx?id=29798&t=1
http://www.rangzen.net/2011/07/27/xi-is-no-different/
བསྒྱུར་མཁན་གྱི་གསལ་བཤད། གོང་གི་དཔྱད་བརྗོད་དེ་ནི་ཞིས་ཅིན་ཕིན་ལྷ་སར་བསྐྱོད་པའི་སྐབས་ཐོག་སྲིད་དོན་དཔྱད་བརྗོད་ཞིག་རེད། འདིའི་སྐོར་ལ་ད་རུང་རྒྱ་གར་གྱི་དྲ་རྒྱ་གྲགས་ཅན་(Rediff )ཡིས་ཁ་བྱང་ལ་༼ཅིའི་ཕྱིར་ཞིས་ཅིན་ཕིན་བོད་དུ་བསྐྱོད་པ་གལ་ཆེན་ཡིན་ནམ། ༽ཅེས་བའི་དཔྱད་བརྗོད་རིང་པོ་ཞིག་སྤེལ་ཡོད་པ་དང་། (The New York Review of Books)ཞེས་བའི་དྲ་རྒྱའི་སྟེང་བོད་དོན་དཔྱད་བརྗོད་པ་གྲགས་ཅན་སྐུ་ཞབས་(Robert Barnett )ཡིས་ཁ་བྱང་ལ་༼རྒྱ་ནག་གིས་བོད་བཅིངས་འགྲོལ། རྩེད་མོའི་སྒྲིག་གཞི་༽ཞེས་བའི་དཔྱད་གཏམ་ཞིག་སྤེལ་འདུག དེ་ལྟར་ལགས་མོད་བོད་མིའི་ཁྲོད་འདིའི་སྐོར་ལ་དཔྱད་བརྗོད་སྤེལ་བ་ད་སྔ་གོང་གི་དབྱིན་རྩོམ་དེ་ལས་མཐོང་མ་སོང་ལ། ལྷག་པར་བོད་ཡིག་སྟེང་ནས་དཔྱད་བརྗོད་སྤེལ་བ་ཞིག་མིག་ལ་ཐོགས་མ་སོང་། དེ་བས་གནད་དོན་འདིའི་ཁ་སྐོང་ཕྱིར་ཆེད་དུ་བོད་བསྒྱུར་བྱས་པ་ཡིན།
(Rediff) སྟེང་གི་དཔྱད་བརྗོད་འབྲེལ་ཐག http://www.rediff.com/news/slide-show/slide-show-1-why-xi-jinpings-visit-to-tibet-is-important/20110725.htm
སྐུ་ཞབས་(Robert Barnett)ཡིས་སྤེལ་བའི་དཔྱད་བརྗོད་འབྲེལ་ཐག http://www.nybooks.com/blogs/nyrblog/2011/aug/22/chinas-liberation-tibet-rules-game/
རྒྱ་ནག་གི་དབུ་ཁྲིད་གཅིག་གཉིས་རེས་བཟང་ངན་གྱི་གཡོ་འགུལ་ཆེན་པོ་ཞིག་བསླངས་དཀའ། གཙོ་བོ་ཆབ་སྲིད་ཀྱི་རྒྱབ་རྫོང་མཐུག་པའི་དཔོན་རབས་དག་ལ་རེ་བ་ཆེ། ང་ཚོའི་འོས་འགན་དང་རེ་བ་གཙོ་བོ་དེ་རྒྱ་ནག་དམར་གཞུང་ལ་མི་དགའ་བའི་མི་རིགས་ཁག་གམ་མི་དམངས་ཡོངས་ལ་མཐུན་སྒྲིལ་གྱིས་རྒྱ་ནག་དམངས་གཙོ་ཅན་འགྱུར་རྒྱུར་མང་ཚོགས་ཀྱི་རྨང་གཞི་འདིང་རྒྱུ་འདི་རང་ཡིན།
རྩོམ་པ་པོ་དང་སྒྱུར་བ་པོ་གཉིས་ཀ་ལ་ཡི་རངས་ཞུ་རྒྱུ་ཡིན།
རྒྱ་ནག་གི་སྲིད་འཛིན་གསར་རྙིང་འཕོར་སྒྱུར་འགྲོ་བའི་འབྱུང་འགྱུར་གྱི་ལོ་རྒྱུས་ཀྱི་རྒྱུད་རིང་ནང་རྒྱ་ནག་དམར་གཞུང་གི་སྲིད་བྱུས་ལ་འགྱུར་བ་མི་འགྲོ་ཅེས་ཐག་བཅད་པ་ནི།འབྱུང་འགྱུར་ལ་དཔྱད་པའི་མཁས་པའི་གཏམ་ཞིག་མིན་ལ་རྒྱུ་མཚན་དེ་བས་མེད།མ་འོང་པ་ལ་དངོན་སུམ་པ་མ་ཡིན་ཏེ།དེ་ལ་འཁྲུལ་པའི་ཕྱིར་ཞེས་གསུངས་པ་ལྟར་མ་འོང་པར་འདི་ཡོང་དང་མི་ཡོང་ཅེས་ཁ་ཚོན་གཅོད་ནས་བཤད་པ་ནི་དོན་དངོས་དང་མཐུན་པའི་གཏམ་ཞིག་ཏུ་སྣང་མི་སྲིད་།
ཆོས་ལུགས་ཀྱི་དཔྱད་གཞུང་དང་འཇིག་རྟེན་སྲིད་ལུགས་ཀྱི་དཔྱད་གཞུང་གང་ལ་གཞིག་བཅོལ་ནས་ལྟས་ཀྱང་འབྱུང་འགྱུར་རྒྱ་ནག་གི་ཆབ་སྲིད་མི་སྣ་འགྱུར་བ་འགྲོ་བའི་སྐབས་ཆབ་སྲིད་ལ་ཡང་འགྱུར་བ་འགྲོ་རྒྱུར་རེ་བ་རྒྱབ་ཆོག་པ་རེད།
མ་ཟད་༸་གོང་ས་མཆོག་ནས་གྲ་སྒྲིག་སྡུག་ས་དང་རེ་བ་བཟང་ས་རྒྱབ་དགོས་གསུངས་པ་ལྟར་བོད་ཀྱི་སྲིད་ལུགས་ལ་མཁས་པ་རྣམས་ནས་འབྱུང་འགྱུར་སྐབས་དེར་འགྱུར་བ་འགྲོ་བའི་རེ་རྒྱབ་པ་ནི་རྒྱུ་མཚན་ལྡན་ཡོད།
རེ་བ་རྒྱབ་པ་བཞིན་ཡོང་གི་ཡོད་མེད་སུ་གང་གིས་ཐག་བཅད་མི་ཐུབ་ལ་ཐག་གཅོག་མཁན་ཡང་བྱུང་མེད།
འཛམ་གླིང་སྒང་གི་འདས་ཟིན་པའི་ལོ་རྒྱུས་དག་ལ་གཞིགས་ན་བོད་པ་ཚང་ལ་རེ་བ་ཡོད་པ་ཞིག་ཡིན།འགྱུར་བ་གཏན་ནས་མེད་པའི་རྟག་པའི་རང་བཞིན་དུ་གནས་པའི་སྲིད་ལུགས་ཤིག་བྱུང་མྱོང་མེད།དུས་ཚོད་ལ་ངེས་པ་མེད་མོད་སྲིད་ལུགས་ཡོད་ཚད་འགྱུར་བ་འགྲོ་རྒྱུ་རེད།དེ་ནི་འཇིག་རྟེན་གྱི་ཆོས་ཉིད་རེད་ལ་མི་རྟག་པའི་རང་བཞིན་ལས་མ་འདས་པ་ཤིག་རེད།
རྒྱུ་མཚན་དེ་དག་ལ་བསམ་ན་རེ་བ་ཡོད་ལ་རེ་བ་རྒྱབ་ཆོག།རྒྱ་ནག་གི་ལོ་རྒྱུས་ནང་ཏང་གཉིས་བར་འཕོར་འགྱུར་དང་ཨོ་རུ་སུའི་སྲིད་ལུགས་འཕོར་འགྱུར་སོགས་ནི་མི་རྣམས་ཀྱིས་འཆར་སྣང་བྱུང་བའི་འཕོར་འགྱུར་ལས་བརྒལ་ཡོད།འཆར་སྣང་བྱུང་བ་རྣམས་སྐབས་རེ་དོན་དངོས་དང་མཐུན་པ་དང་སྐབས་རེ་དོན་དངོས་དང་མི་མཐུན་པ་ཡོང་གི་ཡོད་པ་ནི་ཆོས་ཉིད་རེད་ཅེས་བཤད་རྒྱུ་ཡིན།
སྤྱིར་བཏང་བསྒྱུར་མཁན་དང་རྩོམ་མཁན་ལ་རྗེས་སུ་ཡི་རངས་ཡོད།
འོན་ཀྱང་། དཔྱད་པ་གནད་ལ་མ་ཁེལ་བ་རེ་ཟུང་རེ་འདུག་ཀྱང་བཤད་དགོས་དོན་མི་འདུག བསམ་འཆར་ཞིག་ལ། གོང་དུ་༼བུ་ཆུང་བསོད་ནམས་བརྩམས་༽ཞེས་པ་བུ་ཆུང་བསོད་ནམས་ཀྱིས་བརྩམས་ཞེས་པར་བཅོས་ན་ལེགས་པར་མཐོང་།
རྩོམ་མཁན་དང་ཡིག་བསྒྱུར་མཁན་གཉིས་ཆ་ལ་ཐུགས་རྗེ་ཤིན་ཏུ་ནས་ཆེ་ཞུ་འདོད་བྱུང་། དེ་ཡང་ཡིག་བསྒྱུར་ལགས་ཀྱིས་གསལ་འགྲེལ་༼བོད་མིའི་ཁྲོད་འདིའི་སྐོར་ལ་དཔྱད་བརྗོད་སྤེལ་བ་ད་སྔ་གོང་གི་དབྱིན་རྩོམ་དེ་ལས་མཐོང་མ་སོང་ལ། ལྷག་པར་བོད་ཡིག་སྟེང་ནས་དཔྱད་བརྗོད་སྤེལ་བ་ཞིག་མིག་ལ་ཐོགས་མ་སོང་། དེ་བས་གནད་དོན་འདིའི་ཁ་སྐོང་ཕྱིར་ཆེད་དུ་བོད་བསྒྱུར་བྱས་པ་ཡིན། ༽ འདི་ནི་ཁ་སང་དེ་རིང་གི་དཔྱད་བརྗོད་པ་དག་ལ་མཁོ་བའི་བསླབ་བྱ་ཞིག་ཅི་ལ་མིན། དེ་བཞིན་དཔྱད་བརྗོད་འདི་རིགས་ཅིས་ཀྱང་མང་ཙམ་སྤེལ་ཐུབ་པ་ནས་མཐོང་ཆེན་བྱེད་འོས་མོད། རུལ་དྲི་ཁ་ས་ལ་འཁོར་འགྲོ་བའི་སྦྲང་ནག་དཔྱད་མཆན་པ་དག ཆེས་གལ་ཆེ་ས་དང་གནད་ལ་བབ་པའི་བརྗོད་གཞི་འདི་རིགས་དང་རང་དུ་གྱེས་ནས་གྲགས་མེད་འགུལ་མེད་དུ་རང་རང་ས་ལ་འཕུར་འགྲོ་བ་ཡིན། རྒྱུ་མཚན་སྦྲང་ནག་གི་ལས་བླངས་བའི་དཔྱད་མཆན་པ་དག་གིས་རུལ་དྲི་དྲོ་བའི་ཁ་ཟས་མ་གཏོགས་ལོངས་སྤྱོད་ཀྱི་ནུས་བ་དེ་མེད་པའི་རྟགས་རེད།
རྩོམ་པ་པོ་དང་ཡིག་བསྒྱུར་མཁན་གཉིས་ལགས། སྐབས་དོན་དང་འགྲེལ་མེད་ཀྱི་ཚིག་རེ་ཟུང་ཤོར་སོང་མོད་དགོངས་འགལ་མེད་པ་ཞུ། བརྗོད་གཞི་དང་འབྲེལ་བའི་གླེང་སློང་ཞིབ་འདང་རེ་བརྒྱབ་རྗེས་ག་ལེར་ཞུ་ཆོག་བ་བྱས།