གནད་ལ་ཁེལ་བའི་ལས་འགུལ་དངོས་ལ་ཞུགས་རོགས།

                                                      སད་མི་ཅོང་ཐོགས།

ཕྱི་ཟླ་བཅུ་གཅིག་པའི་ཚེས་གསུམ་སྟེ་དེ་རིང་བོད་ནང་དུ་ཡང་བསྐྱར་རང་ལུས་མེར་བསྲེགས་ཀྱི་དོན་དག་བྱུང་འདུག སང་ཉིན་ད་དུང་སུ་ཞིག་གིས་རང་ལུས་བསྲེག་ཨེ་ཡོང་སྙམ་ན་སེམས་ཁོང་ལ་ཟུག་གཟེར་བརྒྱབ་སྟེ་སྡོད་མི་ཚུགས་པ་ཞིག་རེད་ཨང་།  བོད་ནང་དུ་དབལ་ཚ་ཞིང་རྔམ་སྟུག་པའི་ལས་འགུལ་སྤེལ་རིམ་བཞིན། བྱེས་པ་ཚོས་ཀྱང་འདོན་པ་རྗེས་ཟློས་ལྟ་བུའི་ལས་འགུལ་རེ་སྤེལ་བཞིན་ཡོད། འོན་ཀྱང་ད་བར་ཡིད་ལ་འབབ་པའི་གྲུབ་འབྲས་ཤིག་ཐོབ་མྱོང་མེད། གཅིག་བྱས་ན་དེ་ནི་སྐབས་དུས་ཏག་ཏག་ཅིག་མ་ཁེལ་བས་ཡིན་སྲིད་ལ། ཡང་གཅིག་བསམ་ན། དེ་ནི་གནད་ལ་ཐུག་ཅིང་རྒྱུན་བརྟན་པའི་ལས་དོན་ཞིག་སྤེལ་མ་ཐུབ་པས་ཀྱང་ཡིན་འདུག ད་ནི་གཞིས་པ་ཚོར་བལྟ་ཞིང་འགྱིག་གི་གདོང་འབག་གྱོན་པའི་རྐང་བྲོ་རེ་འཁྲབ་པ་དང་། ཡུན་དང་གཏིང་མེད་པའི་བྱིས་པའི་ངུ་འབོད་ཀྱི་དུས་དྲན་རེ་བྱེད་ནས་འདུག་པའི་སྐབས་མ་ཡིན་པར། གནད་ལ་ཁེལ་ཞིང་གཏིང་ཟབ་པའི་ལས་འགུལ་དངོས་ལ་ཞུགས་པའི་དུས་ལ་བབ་ཡོད།

གཅིག་རྗེས་གཉིས་མཐུད་དུ་རང་ལུས་མེར་བསྲེགས་བྱེད་པའི་བོད་ནང་གི་ཛ་དྲག་གནས་སྟངས་འདི་དང་། སྟོབས་ཆེན་རྒྱལ་ཁབ་ཉི་ཤུའི་ཚོགས་ཆེན་སྐོང་ཚོགས་ཀྱིས་འཛམ་གླིང་མི་མང་གི་མིག་ཟུང་ཧྲིག་གེར་སྡོད་པའི་སྐབས་འདིར། ང་ཚོའི་ངོས་ནས་འཛམ་གླིང་མི་མང་ལ་སྐུལ་སློང་བྱེད་ཐུབ་པ་ཅིག་དང་། མཉམ་འབྲེལ་རྒྱལ་ཚོགས་ཀྱིས་བདག་མི་བྱེད་ཀ་མེད་ཆགས་པའི་ལས་འགུལ་གཅིག་ཡོད་པ་ནི། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྒོ་དྲུང་དང་སྟོབས་ཆེན་རྒྱལ་ཁབ་ཉི་ཤུའི་ཚོགས་འདུའི་ཚོགས་དྲུང་བཅས་སུ། བོད་ནང་གི་ལས་འགུལ་དང་གཅིག་མཚུངས་ཀྱི་རང་ལུས་མེར་བསྲེགས་ཀྱི་ལས་དོན་སྤེལ་རྒྱུ་དེ་ཡིན། དེ་ཡང་རབ་ཡིན་ན་རང་རེའི་བཀའ་བློན་ཁྲི་བ་གཙོ་བྱས་པའི་བཀའ་བློན་ལས་ཐོགས་པ་རྣམ་པ་དང་། སྤྱི་འཐུས་ཚོགས་གཙོ་གཞོན་གཙོས་པའི་སྤྱི་འཐུས་རྣམ་པ། བོད་ཀྱི་གཞོན་ནུ་དང་བུད་མེད་གཙོ་བྱས་པའི་ཚོགས་པ་རྣམས་ཀྱི་ཚོགས་གཙོ་གཞོན་རྣམ་པས་སྣེ་ཁྲིད་དགོས་པ་ཡིན། གལ་སྲིད་དེ་མ་བྱུང་ན། རྒྱལ་ཚོགས་དང་རྒྱལ་ཁབ་ཉི་ཤུའི་ཚོགས་འདུའི་ས་གནས་སུ་འགྲོ་བདེའི་ཆ་རྐྱེན་འཛོམས་པ་རྣམས་ཀྱིས་ལས་དོན་སྤེལ་དགོས་པ་ཡིན།

 གནད་ཡོད་དང་ནུས་པ་ལྡན་པའི་མགོ་ཁྲིད་རྣམ་པས་ལས་འགུལ་མགོ་བཙུགས་ཚེ། རྒྱ་ཆེའི་མང་ཚོགས་རྣམས་རྗེས་སུ་ཞུགས་རྐྱང་ཡིན་པ་ནི་སྨྲ་མི་དགོས་པ་ཞིག་ཡིན། ང་ཚོས་འདི་ལྟ་བུའི་སྐབས་སུ་བབ་ཅིང་གནད་ལ་ཁེལ་བ་དང་ནུས་པ་ལྡན་པའི་ལས་འགུལ་སྤེལ་ཐུབ་སོང་ཚེ། བོད་མི་དམངས་ལ་གཞི་ནས་མངོན་འདོད་ཀྱི་འབྲས་བུ་ཐོབ་ངེས་པ་ནི་ཟུར་བལྟས་ལེབ་མཐོང་ཡིན། ད་དུང་ང་ཚོའི་རེ་འདུན་གྱི་འབོད་སྒྲ་ཡང་གཅིག་གི་སྟེང་འབབ་དགོས་ཏེ། བཙན་གནོན་མཚམས་འཇོག་དང་འགྲོ་བ་མིའི་ཐོབ་ཐང་ཞེས་པ་འདི་ཡིན། བོད་ལ་རེ་བ་ཞིག་ཡོད་ན་མེད་ན་ད་ཐེངས་ཀྱི་གོ་སྐབས་འདི་ཡིན་པས། ཆེས་གནད་འགག་གི་སྐབས་སུ་རང་རེའི་དབུ་ཁྲིད་རྣམ་པས་གོ་ཐག་མི་སློད་རྒྱུར་མི་མང་ལ་ཡིད་ཆེས་གཙང་མ་ཡོད། དེར་མ་ཟད། དབུ་ཁྲིད་རྣམ་པས་ཀྱང་སྔར་ནས་ད་བར་ཡང་དང་བསྐྱར་དུ་གསུངས་ཡོད་པ་སྟེ། གལ་ལ་ཐུག་ཚེ་རང་སྲོག་བློས་གཏོང་སོགས་ཅི་ཞིག་བྱ་དགོས་རུང་བྱེད་ངེས་པ་དང་། རང་ཉིད་ཀྱི་ཡོད་ཚད་བོད་མི་དམངས་ལ་འབུལ་ངེས་ཡིན་པའི་ཞལ་བཞེས་གཙང་མ་གནང་ཡོད། བོད་དུ་བཞུགས་མཁན་ཚོ་ད་བར་འགུལ་སྐྱོད་གནང་སྟེ་ད་ལྟའི་སྐབས་འདིར་གཏུག་ཡོད་ལ། ད་ནི་བྱེས་པ་ཚོར་རེས་སུ་བབ་ཡོད་པས། ཡུལ་དུས་ཀྱི་ཆ་རྐྱེན་ཚང་བའི་རྣམ་པ་ཚོའི་ཕྱག་ལེན་དངོས་ལ་རེ་བ་ཤུགས་དྲག་བྱེད་བཞིན་ཡོད་ལགས།