དེ་རིང་ཉིན་གུང་ཆུ་ཚོད་༡༡།༣༠སྟེང་བཞུགས་སྒར་ངྷ་རམ་ས་ལའི་རླངས་འཁོར་འབབ་ཚིགས་སུ་བོད་རང་བཙན་སློབ་ཕྲུག་ཚོགས་པས་གསར་འགོད་གསལ་བསྒྲགས་ཤིག་སྤེལ་ཏེ། རྒྱ་གར་གྱི་གློག་བརྙན་ཞིབ་བཤེར་ལྷན་ཚོགས་སེན་སོར་སྦོར་ཊིར་སི(CENSOR BOARD’S) ཡིས།རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རེམ་བྷིར་ཀཱ་པོར་ (Ranbir Kapoor) ལགས་ཀྱིས་འཁྲབ་སྟོན་དང་། སྐུ་ཞབས་ཨེམ་ཁྲེལ་ཙི་ཨ་ལེལ་( ImtiazAli) ལགས་ཀྱིས་འཁྲབ་འཁྲིད་བྱས་པའི་གློག་བརྙན་ (ROCKSTAR) ཞེས་པའི་གློག་བརྙན་ནང་བོད་དོན་དང་འབྲེལ་བའི་གླུ་གཞས་དང་། བོད་ཀྱི་རྒྱལ་དར་བསྒྲེངས་པའི་བརྙན་རིས་འཁོད་ཡོད་པ་དག་གློག་བརྙན་ལས་བཏོན་རྒྱུའི་ཐག་གཅོད་དང་གཏན་འབེབས་ལ་བློ་ཕམ་དང་། རྒྱ་གར་གཞུང་ཕྱོགས་ནས་ཐག་གཅོད་དེར་བསྐྱར་ཞིབ་བྱ་དགོས་པའི་འབོད་སྐུལ་གནང་ཡོད་པ་རེད། 
དེ་རིང་གི་གསར་འགོད་གསལ་བསྒྲགས་ཐོག་ཕྱི་རྒྱལ་དང་རྒྱ་གར།བོད་པའི་གསར་འགོད་པ་དང་མི་མང་བཅས་མི་གྲངས་ ༡༠༠ མ་ཟིན་ཙམ་འདུ་འཛོམས་བྱུང་འདུག སྐབས་དེར་བོད་རང་བཙན་སློབ་ཕྲུག་ཚོགས་པའི་ངོས་ནས་གློག་བརྙན་གྱི་པར་རིས་དང་བོད་ཀྱི་རྒྱལ་དར་འཕྱར་དེ་གློག་བརྙན་ཞིབ་བཤེར་ཚན་པའི་བྱ་སྤྱོད་དེར་ངོ་རྒོལ་ལས་འགུལ་སྤེལ་བ་དང་། བོད་རང་བཙན་སློབ་ཕྲུག་ཚོགས་པའི་ས་གནས་ཚོགས་གཙོ་རྡོ་རྗེ་ཚེ་བརྟན་ལགས་ཀྱིས། “ ཉེ་ཆར་རྒྱ་གར་གྱི་གློག་བརྙན་ཞིབ་བཤེར་ཚོགས་པ་སེན་སོར་སྦོར་ཊིར་སི་ཡིས། བོད་ནང་རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་ཏེ་བོད་མི་མང་པོ་འདས་གྲོངས་སུ་གྱུར་བའི་ཛ་དྲག་གི་སྐབས་འདིར། (ROCKSTAR) ཞེས་པའི་གློག་བརྙན་ནང་བོད་དོན་དང་འབྲེལ་བའི་གླུ་གཞས་དང་བོད་ཀྱི་རྒྱལ་དར་ཡོད་པ་དག་ཕྱིར་འདོན་རྒྱུའི་ཐག་གཅོད་ལ་བློ་ཕམ་ཡོད་པ་དང་།ང་ཚོའི་ངོས་ནས་ད་ལྟའི་བར་རྒྱ་གར་གཞུང་གིས་བོད་དོན་འཐབ་རྩོད་ལ་རྒྱབ་སྐྱོར་གནང་བ་ལྟར། རྒྱ་གར་ནི་འཛམ་གླིང་ནང་དམངས་གཙོའི་རྒྱལ་ཁབ་ཆེ་ཤོས་ཤིག་ཆགས་ཡོད་སྟབས།མ་འོངས་པར་ཡང་དུས་ནམ་ཡང་རྒྱ་ནག་གི་གནོན་ཤུགས་འོག་མི་འགྲོ་བའི་རེ་བ་དང་། རྒྱ་གར་གློག་བརྙན་ཞིབ་བཤེར་ལྷན་ཚོགས་ཀྱི་ངོས་ནས་ཐེངས་འདིའི་ཐག་གཅོད་ལ་བསྐྱར་ཞིབ་བྱ་དགོས་པའི་འབོད་སྐུལ་ཞུ་བཞིན་ཡོད། ” ཅེས་བརྗོད་བྱུང་།
སྐུ་ཞབས་ཨེམ་ཁྲེལ་ཙི་ཨ་ལེལ་ལགས་ཀྱིས་འཁྲབ་འཁྲིད་བྱས་པའི་(ROCKSTAR) ཞེས་པའི་གློག་བརྙན་དེ་ནི། ཟླ་འདིའི་ཕྱི་ཚེས་ ༡༡ ཉིན་རྒྱ་གར་རྒྱལ་ཡོངས་ནང་དངོས་སུ་དབུ་འབྱེད་གནང་འཆར་ཡོད་སྟབས། དེ་རིང་བོད་རང་བཙན་སློབ་ཕྲུག་ཚོགས་པས་བཞུགས་སྒར་ཁུལ་དུ་གསར་འགོད་གསལ་བསྒྲགས་དང་འབོད་སྐུལ་གྱི་ལས་འགུལ་ཞིག་སྤེལ་ཡོད་པ་དང་། སང་ཉིན་ཕྱི་ཚེས་ ༧ ནས་ ༡༡ བར་བོད་རང་བཙན་སློབ་ཕྲུག་ཚོགས་པ་དང་རྒྱ་གར་བོད་དོན་རྒྱབ་སྐྱོར་བ་མཉམ་འབྲེལ་ཐོག་རྒྱ་གར་གྱི་གློག་བརྙན་ཞིབ་བཤེར་ལྷན་ཚོགས་ཀྱི་ཚོགས་གཙོ་དང་། རྒྱ་གར་གཞུང་གི་དཔོན་རིགས་བཅས་ལ་ཐུག་འཕྲད་བྱ་འཆར་ཡོད་པ་མ་ཟད། རྒྱ་གར་གྱི་གྲོང་ཁྱེར་མུམ་བྷེ་དང་བྷེང་ལོར། ཅི་ནེ། ཀཱ་ལི་ཀ་ཏ། རྒྱལ་ས་ལྡི་ལི་བཅས་ས་གནས་མི་འདྲ་བའི་ནང་གསར་འགོད་གསལ་བསྒྲགས་དང་འབོད་སྐུལ་གྱི་ལས་འགུལ་སྤེལ་འཆར་ཡོད་འདུག
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
རྙིང་རྗེ་རྒྱལ་གར་རྒྱ་ནག་ལ་དེ་འདྲའི་སྐྲག་གི་ཡོད་རེད་ བོད་པ་བླུན་པོ་ཚོ་ང་ཚོའི་མི་རིགས་ཀྱི་གནད་དོན་དེ་སུ་ལ་ཡང་རེ་བ་མ་རྒྱག།
དེ་རིང་གི་གསར་འགྱུར་འདི་དང་འབྲེལ་ནས་གལ་ཆེ་བའི་ལོ་རྒྱུས་ཀྱི་གནད་དོན་ཁ་ཤས་དྲན་གསོ་དང་འབྲེལ་བསམ་ཚུལ་ཐུང་ཐུང་ཞིག་ཤོད་འདོད་བྱུང་།
༡ ཕྱི་ལོ་ ༡༩༤༩ ལོར་རྒྱ་ནག་དམར་དམག་བོད་བསྐྱོད་དཔུང་སྡེས་མདོ་ཁམས་ཁུལ་དུ་བཙན་འཛུལ་འགོ་འཛུགས་ཀྱིས་བོད་ཁུལ་ཡོངས་ཀྱི་ཡུན་རིང་གི་བདེ་འཇགས་ལ་ཉེན་ཁ་བྱུང་། བོད་གཞུང་དགའ་ལྡན་ཕོ་བྲང་གི་ངོས་ནས་རྒྱལ་སྤྱིར་ཞུ་གཏུགས་གནང་། ཡིན་ནའང་ཕྱི་ལོ་ ༡༩༥༠ ཕྱི་ཟླ་ ༡༡ ཚེས་ ༢༤ ཉིན་བོད་ཀྱི་བདེ་སྡུག་སྙན་ཞུ་དེ་འཇམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྟེང་སླེབས། ཡིན་ནའང་བོད་ལ་རྒྱུས་མངའ་དང་འབྲེལ་བ་ཆེ་ཤོས་ཡིན་པའི་དབྱིན་དང་རྒྱ་གར་གྱིས་ཚོགས་ཆེན་ཐོག་བོད་ཀྱི་ཁྲིམས་མཐུན་གྱི་གནས་བབ་དེ་ནི་གསལ་ཁ་མེད་པར་བཤད་པར་བརྟེན་ཟུར་འཇོག་བྱས། དུས་དེ་ནས་བཟུང་རྒྱལ་སྤྱིའི་བོད་ཀྱི་གནད་དོན་ལ་ཆབ་སྲིད་ཀྱི་ཐོག་ནས་མཐུན་ཕྱོགས་ཚོས་བདག་སྤྲོད་བྱེད་མི་བདེ་བ་ཆགས།
༢ ཕྱི་ལོ་ ༡༩༥༤ ཕྱི་ཟླ་ ༤ ཚེས་ ༢༩ ཉིན་རྒྱ་གར་དང་རྒྱ་ནག་དབར་བསླབ་པ་ལྔ་ཟེར་བའི་ཚོང་དོན་གྱི་མིང་ཐོག་ནས་ཆིངས་ཡིག་གཅིག་བཞག ཆིངས་ཡིག་དེའི་ནང་རྒྱ་གར་གྱི་ངོས་ནས་རྒྱ་ནག་གི་མངའ་ཁོངས་ཡིན་པའི་བོད་ཀྱི་ས་ཁུལ་དུ་ཟེར་བ་བྲིས་པ་འདི་རྒྱལ་ཁབ་གཅིག་གིས་གཞུང་འབྲེལ་ཆིངས་ཡིག་གི་ལམ་ནས་བོད་རྒྱ་ནག་གི་ཆ་ཤས་ཡིན་པར་ཁས་བླངས་པ་དང་པོ་ཆགས་ཀྱི་ཡོད།
༣ ཕྱི་ལོ་ ༡༩༥༩ ཕྱི་ཟླ་ ༤ ཚེས་ ༢༤ ཉིན་༸གོང་ས་མཆོག་གིས་བཙན་བྱོལ་དུ་བོད་གཞུང་གི་ལས་དོན་རྒྱུན་སྐྱོང་གི་བྱེད་སྒོ་དབུ་འཛུགས་བསྐྱངས་པར་རྒྱ་གར་གཞུང་གིས་ངོས་ལེན་མེད་པའི་གསལ་བསྒྲགས་བསྐྱངས། སྔ་ཕྱིར་བོད་ཀྱི་རྒྱལ་གླུ་ཞལ་འདོན་ཡིན་སྐོར་སོགས་ལས་དོན་སྣེ་མང་ཞིག་བྱེད་དགོས་བྱུང་། ༤ ༡༩༦༢ ལོར་རྒྱ་ནག་གིས་རྒྱ་གར་ལ་བཙན་འཛུལ་བྱས། ལོ་དེའི་གཡས་གཡོན་དུ་ནེ་རུ་སྙིང་རྩ་གས་ནས་གྲོངས་པར་གྲགས། རྒྱ་གར་གྲོས་ཚོགས་ཀྱིས་རྒྱ་དམར་ནས་རྒྱ་གར་གྱི་ས་ཆ་བཟུང་བ་ཕྱིར་ལེན་བྱེད་རྒྱུའི་སྤྱི་མོས་གྲོས་ཆོད་བཞག ༡༩༧༠ དོན་གྲངས་ནང་རྒྱ་གར་གྲོས་ཚོགས་སུ་༸གོང་ས་མཆོག་བོད་ཀྱི་ཆབ་སྲིད་ཀྱི་དབུ་ཁྲིད་དུ་ངོས་འཛིན་མིན་ཐད་འོས་བསྡུ་བྱས་པ་བརྒྱུད་བོད་ལ་རྒྱལ་ཁ་མ་ཐོབ། དེ་ནས་བཟུང་བོད་ཀྱི་གནད་དོན་ལ་རྒྱ་གར་ནང་གི་ཆབ་སྲིད་པ་ཚོ་དོ་སྣང་དེ་ཙམ་མེད་པ་ལྟ་བུར་གྱུར།
༥ དེ་རྗེས་ར་ལྗིབ་གྷན་དྷི་སྲིད་བློན་དུ་སླེབས་ནས་བསླབ་པ་ལྔའི་ཆིངས་ཡིག་གི་ནང་དོན་བསྐྱར་གསོ་བྱས། དེ་ནས་བཟུང་ད་བར་ལོ་ལྟར་ཕྱི་ཟླ་བཞི་པའི་ནང་ཕན་ཚུན་ལ་སྐུ་མགྲོན་འགྲོ་རེས་བྱེད། ལྡི་ལི་རྒྱ་ནག་གཞུང་ཚབ་ཁང་ཡོད་སའི་ལམ་ཆེན་གྱི་ཁུག་མཚམས་གཅིག་ལ་ PACHSHEEL MARG ཟེར། དེས་ཆིངས་ཡིག་ལ་དྲན་གསོ་བྱེད། མཐའ་ན་རྒྱ་གར་གྱི་ངོས་ནས་རང་གི་དཀའ་ངལ་ལ་མ་ལྟོས་པར་༡༩༡༤ ཕྱི་ཟླ་ ༣ ཚེས་ ༡༤ ལ་གཏན་འཁེལ་བའི་རྒྱ་གར་དང་བོད་ཀྱི་ས་མཚམས་གསལ་བར་བཟོས་པའི་མེག་མོ་ཧན་ས་ཐིག་ལ་ཆ་འཇོག་མེད་པར་བརྗོད་ཅིང་། དེང་སང་Actual control line ཟེར་བ་གཞི་ལ་འཇོག འདི་ལྟར་རྒྱ་གར་རང་ཉིད་ལ་ཁེ་ཕན་ཡོད་མེད་ལ་མ་ལྟོས་པར་ནེ་རུའི་ཆབ་སྲིད་ལངས་ཕྱོགས་རྒྱུན་བསྐྱངས། གནད་དོན་དེའི་དབང་གིས་རྒྱ་གར་དུ་ཡོད་པའི་བཙན་བྱོལ་བོད་གཞུང་ཟེར་བ་དེ་ཡང་བེད་སྤྱོད་མུ་མཐུད་བྱེད་རྒྱུར་དཀའ་ངལ་འཕྲད་སྲིད་པར་དགོངས་ནས་འདི་ལོ་བཙན་བྱོལ་བོད་གཞུང་ཟེར་བའི་མིང་བྱང་ཕྱིར་བསྡུ་བྱས།
བཀའ་སྤྱི་གཉིས་ཀྱིས་ཀྱང་གནད་འདིའི་ཐོག་ཏུ་ཤུགས་རྒྱབ་དགོས་པ་རེད་བསམ་གྱི་འདུག སྤྱི་ཚོགས་ནང་དུ་ཤུགས་རྐྱེན་སྤྲོད་ཐུབ་པའི་གློག་བརྙན་གལ་ཆེན་འདི་སྟོན་ཐུབ་བྱུང་ན་ཅི་འདྲ་ཡག་བ་ལ་ཨང་།
ཤུགས་རྒྱབ་རོགས།
བོད་མི་ཚོར་རྐྱེན་ངན་གོད་ཆག་འབྱུང་བཞིན་པའི་དུས་འདིར།
གནས་ཚུལ་འདི་ལྟ་བུ་ནི་འགྱེལ་བའི་སྒང་ལ་རྡོག་བརྗིས་ཞེས་པའི་དཔེ་དོན་དུ་སོང་འདུག
འདི་དང་འདི་འདྲ་བའི་གནས་སྟངས་མང་པོ་ཞིག་འབྱུང་འགྱུར་ཡང་ཆུ་ཡི་གཉེར་རིས་བཞིན་འཐོན་ངེས་པས། བོད་མི་དང་བོད་དོན་རྒྱབ་སྐྱོར་བ་ཚོས་གདོང་ལེན་མཐའ་གཅིག་ཏུ་བྱ་དགོས་པར་སེམས་སོ། །
རྒྱ་གར་གཞུང་གིས་བོད་དོན་འདི་ཙམ་ལའང་ཐག་གཅོད་བྱེད་ཡོད་པའི་གནས་ཚུལ་འདིའི་ཐད་ནས་ང་ཚོས་རྟོགས་དགོས་བ་ནི།རྒྱ་གར་གཞུང་གིས་བོད་དོན་རྒྱབ་སྐྱོར་བྱེད་སྟངས་ལ་ད་བར་དུ་བོད་དང་རྒྱ་ནག་བར་ལ་ཁ་དྲང་བདེན་ཅི་ཡང་གྲགས་མེད་པ་དེའི་སྟེང་ནས།འདས་བའི་མི་ལོ་དྲུག་ཅུའི་རིང་བོད་པས་རྒྱ་གར་ལ་རྒྱབ་བསྟོད་བྱེད་ནས་དོན་འབྲས་ཅི་ཡང་སྨིན་མེད་པ་མ་ཟད།མ་འོངས་བར་ཡང་རྒྱ་གར་གྱིས་རྒྱ་ནག་གི་ཁ་ཕྱོགས་སུ་གཡོན་ཐལ་དུ་འགྲོ་བའི་མངོན་རྟགས་རང་རེད།
དུས་ད་ལྟའི་བར་བོད་དོན་འདི་འཛམ་གླིང་དུ་ཁྱབ་དང་ཁྱབ་བཞིན་པ་འདི་ཡང་༸གོང་ས་མཆོག་གི་བླ་ན་མེད་པའི་མཛད་འཕྲིན་ཁོ་ན་ལ་བརྟེན་པ་མ་གཏོགས་རྒྱ་གར་གཞུང་གིས་བོད་ཀྱི་སྲིད་དོན་ཐད་ནས་ཅི་ཡང་མི་སྙམ་པར་རང་ས་རུ་གཞག་ཡོད་པ་གསལ་བོ་ཡིན།
གློག་བརྙན་དེ་རིགས་ཧ་ཅང་གལ་ཆེན་རེད། གློག་བརྙན་འཁྲབ་སྟོན་གྱི་རང་དབང་བཀག་ན་དེ་ཡང་སྨྲ་བརྗོད་རང་དབང་བཀག་པ་དང་གཅིག་པ་རེད། ད་ལྟའི་སྤྱི་ཚོགས་ཀྱི་བསམ་སྤྱོད་དེ་གློག་བརྙན་གྱིས་གསལ་བཤད་དང་ཁྱབ་བསྒྲགས་བྱེད་ཀྱིན་པས། གློག་བརྙན་ནི་སྤྱི་ཚོགས་ཀྱི་ཐུན་མོང་གི་སྨྲ་བརྗོད་རང་དབང་རེད་ལབ་ན་ཆོག
ངས་བལྟས་ན་གནད་དོན་དེ་རྒྱ་དམར་གྱི་ཤོག་དངུལ་ལ་ཐུག་ལོས་ཡོད་སྙམ།
གང་ལྟར་འདི་ལ་ངོ་རྒོལ་ཤུགས་ཆེན་བྱེད་དགོས།