དེ་རིང་སྔ་དྲོ་དྷ་ས་ཀིརྟི་དགེ་རྩ་ཚོགས་པའི་ཚོགས་ཁང་དུ། འོད་དཀར་དྲ་ཚིགས་དང་བོད་ཀྱི་སྐད་ཡིག་རྒྱུན་འཛིན་ཚོགས་པ་གཉིས་ཀྱི་གོ་སྒྲིག་འོག བོད་ཀྱི་སྐད་ཡིག་དང་རྩོམ་རིག་གི་སྐོར་ལ་བགྲོ་གླེང་དབུ་འཛུགས་གནང་སོང་།
འོད་དཀར་དྲ་ཚིགས་དང་བོད་ཀྱི་སྐད་ཡིག་རྒྱུན་འཛིན་ཚོགས་པ་གཉིས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༡༡ དང་ ༡༢ ཉིན་གཉིས་རིང་བོད་ཀྱི་སྙན་ངག་དང་རྩོམ་རིག སྐད་ཡིག་གི་གསོན་རྩ། བཙན་བྱོལ་གྱི་བོད་སྐད་ཡིག་བཅས་ཀྱི་སྐོར་ལ་བརྗོད་གཞི་གཏན་འབེབས་ཐོག་བགྲོ་གླེང་བ་ཆེད་དུ་གདན་ཞུ་གནང་སྟེ་༼བོད་ཀྱི་སྐད་ཡིག་ཚོགས་འདུ་༽ཞེས་པ་ཞིག་གོ་སྒྲིག་གནང་བཞིན་པ་ལྟར། དེ་རིང་སྔ་དྲོ་ཆུ་ཚོད་ ༩ པའི་སྟེང་ཀིརྟི་དགེ་རྩ་ཚོགས་པའི་ཚོགས་ཁང་དུ་དངོས་སུ་བགྲོ་གླེང་དབུ་འཛུགས་གནང་སོང་། བགྲོ་གླེང་གི་ཐོག་མར་གོ་སྒྲིག་གནང་མཁན་ཤིང་བཟའ་རིན་པོ་ཆེ་མཆོག་གིས་ཉིན་གཉིས་རིང་གི་བགྲོ་གླེང་ལས་རིམ་ངོ་སྤྲོད་གནང་རྗེས། གདན་ཞུའི་བགྲོ་གླེང་བ་སྤྱི་ཟུར་བེ་རི་འཇིགས་མེད་དབང་རྒྱལ་ལགས་ཀྱིས་འོད་དཀར་དྲ་ཚིགས་ཀྱིས་རྩོམ་སྒྲིག་པར་སྐྲུན་བྱས་པའི་༼མྱི་སྐད༽དཔེ་ཚོགས་སྒོ་འབྱེད་དང་སྦྲགས། ༼སྲོལ་རྒྱུན་སྙན་ངག་གི་སྒུལ་ཤུགས་དང་དེང་རབས་སྙན་ངག་གི་དགེ་སྐྱོན༽ཞེས་པའི་བརྗོད་གཞིའི་ཐོག་བགྲོ་གླེང་གཏམ་བཤད་དང་། ཕྱི་དྲོ་གདན་ཞུའི་བགྲོ་གླེང་པ་ཀིརྟི་གྲྭ་ཚང་གི་སློབ་སྤྱི་སོ་རུ་དར་རྒྱས་ལགས་ཀྱིས་༼རྩོམ་པ་པོའི་འགན་འཁྲི་དང་དེང་རབས་རྩོམ་རིག་གི་དགེ་སྐྱོན༽ཞེས་པའི་བརྗོད་གཞིའི་ཐོག་བགྲོ་གླེང་གཏམ་བཤད་གནང་བ་དང་། བགྲོ་གླེང་ཚོགས་ཞུགས་པ་རྣམས་ཀྱིས་ཀྱང་བརྗོད་གཞིའི་གཏམ་བཤད་ཐད་དོགས་འདྲི་དང་སོ་སོའི་བསམ་ཚུལ་བཅས་བརྗོད་སོང་། དེ་རིང་གི་བགྲོ་གླེང་ཚོགས་འདུའི་ཐོག་བོད་ཀྱི་སྐད་ཡིག་རིག་གནས་ཐད་དོ་སྣང་ཅན་གྱི་གདན་ཞུའི་ཤེས་ལྡན་པ་དང་། ཐེངས་འདིའི་འོད་དཀར་དྲ་ཚིགས་ཀྱི་སྙན་ངག་སྒྲོག་སྦྱང་རྟིང་རྩོད་འགྲན་ཞུགས་པ་རྣམས་གཙོས་པའི་རང་མོས་ཟུར་ཞུགས་གནང་མཁན་བཅས་ཁྱོན་བསྡོམས་མི་ ༡༠༠ ཙམ་མཉམ་ཞུགས་གནང་འདུག 
ཐེངས་འདིའི་བགྲོ་གླེང་ཚོགས་འདུའི་དམིགས་ཡུལ་སྐོར་ལ་ཚོགས་འདུའི་གོ་སྒྲིག་པར་བཅར་འདྲི་གནང་པར། འོད་དཀར་དྲ་ཚིགས་ཀྱི་སྤྱི་ཁྱབ་རྩོམ་སྒྲིག་པ་ཤིང་བཟའ་རིན་པོ་ཆེ་མཆོག་གིས། “ད་ལྟའི་ཆར་ང་ཚོ་འོད་དཀར་དྲ་ཚིགས་ཀྱི་ངོས་ནས་སྙན་ངག་སྒྲོག་སྦྱང་འགྲན་བསྡུར་ཞིག་ཚོགས་བསྡད་ཡོད་པ་རེད། དེ་དང་སྟབས་བསྟུན་ནས་བོད་ཀྱི་སྐད་ཡིག་རྒྱུན་འཛིན་ཚོགས་པ་དང་ང་ཚོ་འོད་དཀར་དྲ་ཚིགས་གཉིས་མཉམ་འབྲེལ་ཐོག་སྐད་ཡིག་གི་ཚོགས་འདུ་ཞིག་འཚོགས་ཐུབ་ན་བསམ་སྟེ་གོ་སྒྲིག་གནང་བ་ཡིན། ཚོགས་འདུ་ཚོགས་དགོས་པའི་དམིགས་ཡུལ་གཙོ་བོ་ནི། བཙན་བྱོལ་སྤྱི་ཚོགས་ནང་ལ་སྐད་ཡིག་ཟེར་བ་དེ་ག་འདྲ་ཞིག་ལ་ངོས་འཛིན་བྱེད་ཀྱིན་ཡོད་མེད་དང་། འདིར་ཕེབས་པའི་རྩོམ་པ་པོ་ཚང་མའི་ངོས་ནས་འགན་ཁུར་ཏེ་རྩོམ་ཡིག་འབྲི་རྒྱུ་དང་། དེ་བཞིན་དྲ་རྒྱ་སོགས་ཀྱི་ཐད་ལའང་ང་ཚོས་འགན་ཞིག་ཁུར་དགོས་ཀྱི་འདུག་བསམ་པའི་ཀུན་སློང་དང་། དེ་མིན་གཞན་བགྲོ་གླེང་ཚོགས་འདུ་འདི་བརྒྱུད་དེ་ང་ཚོའི་ངོས་ནས་ཐབས་ལམ་འདྲ་བཙལ་ཏེ། མ་འོངས་པར་བཙན་བྱོལ་སྤྱི་ཚོགས་ནང་སྐད་ཡིག་ཡར་རྒྱས་གཏོང་ཕྱོགས་ཀྱི་ལམ་ཁ་ཞིག་གཏན་འབེབས་བྱ་ཐུབ་ན་བསམ་པའི་ཐོག་ནས་ཚོགས་འདུ་གོ་སྒྲིག་གནང་བ་ཡིན།” ཞེས་གསུངས་སོང་ལ། དེ་བཞིན་བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་གྲགས་ལགས་ཀྱིས་ཀྱང་། “ མ་འོངས་པར་བཙན་བྱོལ་ནང་སྐད་ཡིག་དང་རྩོམ་རིག་བཅས་འཛིན་སྐྱོང་སྤེལ་གསུམ་ཅི་ལྟར་བྱེད་དགོས་མིན་དང་། ལྷག་པར་དུ་སྤྱི་ཚོགས་ནང་སྐད་ཡིག་གི་ཁྱབ་རྒྱ་ཆེ་རུ་གཏོང་བར་གཞུང་དང་སློབ་གྲྭ་ཁག་གི་ངོས་ནས་ག་རེ་གནང་དགོས་མིན་ཐད་ཐབས་ལམ་ཕྱོགས་བསྡོམས་བྱས་ཏེ། འབྲེལ་ཡོད་ཤེས་རིག་ལས་ཁུངས་གཙོས་པའི་ཚོགས་སྡེ་ཁག་ལ་སྙན་འབུལ་གྱིས་ཚང་མས་མཉམ་རུབ་འབད་བརྩོན་གནང་རྒྱུར་རེ་སྐུལ་ཞུ་ཆེད་ཡིན། ” ཞེས་བརྗོད་སོང་། 
བགྲོ་གླེང་ཚོགས་འདུར་མཉམ་ཞུགས་གནང་མཁན་སློབ་ཕྲུག་སངས་རྒྱས་དོན་འགྲུབ་ལགས་ནི། གྷོལ་པ་པུར་སློབ་གྲྭའི་སློབ་ཕྲུག་འགས་རང་ངོས་ནས་རྩ་འཛུགས་བྱས་པའི་ཕ་སྐད་དང་བླངས་ཚོགས་པའི་ཚོགས་མི་ཡིན་ལ། ཁོང་གིས་ཐེངས་འདིའི་བགྲོ་གླེང་ལ་མཉམ་ཞུགས་གནང་རྗེས་ཀྱི་ཚོར་སྣང་བརྗོད་དོན། “ ང་རང་སློབ་ཕྲུག་ཅིག་ཡིན། ནམ་རྒྱུན་སོ་སོའི་སྐད་ཡིག་རིག་གནས་ཀྱི་སྒང་ལ་རང་གི་ནུས་ཚོད་ཀྱིས་དོ་སྣང་གནང་བཞིན་ཡོད། ད་ཐེངས་བོད་ཀྱི་སྐད་ཡིག་ཚོགས་འདུའི་སྟེང་མགྲོན་འབོད་བྱས་པར་སེམས་གཏིང་ནས་དགའ་བོ་བྱུང་ལ། བགྲོ་གླེང་ཚོགས་འདུ་འདིར་མཉམ་ཞུགས་ཀྱི་གོ་སྐབས་བརྒྱུད་སོ་སོའི་མ་ཤེས་པ་མང་པོ་ཞིག་གི་ཐད་སློབ་སྦྱོང་རག་གི་རེད་དྲན་བྱུང་། དེ་བཞིན་བགྲོ་གླེང་ལ་དངོས་སུ་ཞུགས་སྐབས་ཀྱང་མཁས་དབང་དང་ཤེས་ཡོན་པ། རྩོམ་པ་པོ་བཅས་དང་མཉམ་དུ་བགྲོ་གླེང་དང་ཕན་ཚུན་བསམ་ཚུལ་བརྗེ་རེས་ཀྱི་གོ་སྐབས་བརྒྱུད་དེ་སོ་སོའི་སེམས་ནང་གི་དོགས་པ་མང་པོ་ཞིག་སངས་སོང་ལ། སློབ་སྦྱོང་མང་པོ་ཞིག་རག་སོང་། མ་འོངས་པར་ཡང་སྐད་ཡིག་དང་རིག་གནས་སྐོར་ལ་མི་མང་པོ་མཉམ་འཛོམས་ཐོག་བགྲོ་གླེང་ཞུ་ཐུབ་པ་ཡིན་ན། མི་མང་པོ་ཞིག་ལ་ལྟ་རྒྱ་ཐོས་རྒྱ་ཆེ་རུ་འགྲོ་བར་ཕན་ཐོགས་ཆེན་པོ་ཡོང་གི་རེད་བསམ།” ཞེས་བརྗོད་སོང་། 
དེ་བཞིན། ཐེངས་འདིའི་འོད་དཀར་དྲ་ཚིགས་ཀྱི་སྙན་ངག་སྒྲོག་སྦྱང་རྟིང་རྩོད་འགྲན་བསྡུར་ཁྲོད་ཞུགས་བཞིན་པའི་སྦེལ་ཀོབ་བོད་ཁྱིམ་སློབ་གྲྭའི་སློབ་མ་སྨོན་ལམ་སྒྲོལ་མ་ལགས་སུ། སྙན་ངག་སྒྲོག་སྦྱང་འགྲན་བསྡུར་དུ་ཞུགས་རྒྱུའི་འདུན་པ་ཅི་ལྟར་བྱུང་མིན་དང་། འགྲན་བསྡུར་དང་བགྲོ་གླེང་ཁྲོད་མཉམ་ཞུགས་བྱས་པ་བརྒྱུད་སོ་སོའི་བསམ་བློའི་ནང་འགྱུར་ལྡོག་ག་རེ་བྱུང་ཡོད་མེད་སྐོར་དྲིས་པར། ཁོ་མོས་ “ རྟིང་རྩོད་འགྲན་བསྡུར་ཁྲོད་རྒྱལ་ཁ་ཐོབ་ཐུབ་མིན་ལ་མ་བལྟས་པར། སོ་སོར་གོ་སྐབས་འདི་འདྲ་བཟང་པོ་ཞིག་ཐོབ་པ་ཙམ་གྱིས་དགའ་བོ་ཞེ་དྲག་བྱུང་། ད་ལྟ་ང་རང་འཛིན་གྲྭ་བཅུ་གཉིས་ཡིན་པས་ཡིག་རྒྱུགས་ཀྱང་གཏོང་དགོས་ཀྱི་ཡོད་པར་མ་ཟད། སྤྱིར་བཏང་འཛིན་གྲྭ་བཅུ་གཉིས་ཀྱི་ཡིག་རྒྱུགས་དེ་གལ་ཆེན་པོ་ཆགས་ཀྱི་ཡོད་པ་རེད། ཡིན་ནའང་། གོ་སྐབས་འདི་ལྟ་བུའི་ནང་འཛུལ་ཞུགས་བྱེད་རྒྱུ་གལ་ཆེན་པོར་བརྩིས་ཏེ་འདིར་སླེབས་པ་ཡིན། ལྷག་པར་དུ་དེ་རིང་གི་བགྲོ་གླེང་འདི་བརྒྱུད་ནས་རྩོམ་པ་པོ་དང་ཤེས་ལྡན་པ་མང་པོ་ཞིག་དང་དངོས་སུ་མཇལ་ཏེ་ངོ་ཤེས་རྒྱུའི་གོ་སྐབས་ཡག་པོ་བྱུང་ལ། ཁོང་ཚོའི་གཏམ་བཤད་ལ་ཉན་པ་དང་། ཁོང་ཚོ་དང་ལྷན་དུ་ཕན་ཚུན་བགྲོ་གླེང་དང་བསམ་ཚུལ་བརྗེ་རེས་གནང་ཡོང་དུས། སོ་སོའི་གནས་ཚད་དེ་ག་འདྲ་ཞིག་ན་ཡོད་མེད་དང་། རང་ཉིད་ཀྱི་བོད་ཡིག་གི་གནས་ཚུལ་སྐྱོ་བོ་ཡོད་པ་ཚོར་སོང་། མ་འོང་པར་ཡང་སོ་སོའི་ངོས་ནས་མུ་མཐུད་དུ་ཤུགས་རྒྱུག་དགོས་པའི་སེམས་ཚོར་ཤུགས་ཆེན་པོ་སླེབས་སོང་། གཞན་བགྲོ་གླེང་སྐབས་མང་ཆེ་བས་ཨམ་སྐད་གསུང་བཞིན་པར་བརྟེན་གོ་བ་ལེན་རྒྱུར་ཅུང་ཙམ་དཀའ་ཁག་འཕྲད་བྱུང་། ཡིན་ནའང་། རྩོམ་པ་པོའི་འགན་འཁྲི་གང་ཡིན་མིན་སྐོར་ལ་ཁོང་རྣམ་པས་བསམ་ཚུལ་ཧ་ཅང་ཡག་པོ་གསུང་སོང་ལ། སོ་སོར་མཚོན་ན་ཕན་ཐོགས་ཆེན་པོ་བྱུང་སོང་།” ཞེས་བརྗོད་སོང་། སང་ཉིན་ཕྱི་ཚེས་ ༡༢ ཉིན་གྱི་སྔ་དྲོ་གདན་ཞུའི་བགྲོ་གླེང་པ་སྤྲེལ་ནག་པ་བློ་གྲོས་དཔལ་བཟང་ལགས་ཀྱིས་༼སྐད་ཡིག་མི་རིགས་ཀྱི་གསོན་རྩ་ཡིན་མིན་དང་དེ་སྲུང་སྐྱོབ་བྱ་ཐབས་སྐོར༽ཞེས་པའི་བརྗོད་གཞིའི་ཐོག་བགྲོ་གླེང་གཏམ་བཤད་དང་། ཕྱི་དྲོ་༼བཙན་བྱོལ་བོད་མིའི་སྐད་ཡིག་དང་སློབ་གསོ༽ཞེས་པའི་བརྗོད་གཞིའི་ཐོག་ཚོགས་ཞུགས་པ་ཡོངས་ཀྱིས་རང་མོས་བགྲོ་གླེང་གནང་རྒྱུ་ཡིན་འདུག གཞན་ཡང་། འོད་དཀར་དྲ་ཚིགས་ཀྱིས་གོ་སྒྲིག་གནང་བཞིན་པའི་ཐེངས་འདིའི་སྙན་ངག་སྒྲོག་སྦྱང་གི་རྟིང་རྩོད་རིམ་པའི་འགྲན་བསྡུར་དེ། ཁ་སང་ཕྱི་ཚེས་ ༡༠ ཉིན་གྱི་དགོང་མོར་མགོ་འཛུགས་ཀྱིས་འགྲན་ཞུགས་པ་ ༢༦ གིས་སོ་སོས་བདམས་པའི་སྙན་ངག་གྱེར་འདོན་བྱས་ཡོད་པ་དང་། ཕྱི་ཚེས་ ༡༢ ཉིན་གྱི་དགོང་མོ་འགྲན་བསྡུར་གོ་སྒྲིག་པའི་ངོས་ནས་དམིགས་འཛུགས་བྱས་པའི་སྙན་རྩོམ་གཅིག་འགྲན་ཞུགས་པ་ཡོངས་ཀྱིས་གྱེར་འདོན་འགྲན་བསྡུར་བྱས་རྗེས། སྔ་ཕྱི་འགྲན་བསྡུར་ཐེངས་གཉིས་ཀྱི་བརྒྱ་ཆ་ཕྱོགས་བསྡོམས་ཀྱིས་འགྲན་ཞུགས་པ་ ༨ རྩེ་བཏོག་འདེམས་ཐོན་གྱིས། ཕྱི་ཚེས་ ༡༣ གྱི་དགོང་མོར་མཐའ་མའི་རྟིང་རྩོད་འགྲན་བསྡུར་གནང་རྒྱུ་ཡིན་འདུག
འོད་དཀར་དྲ་ཚིགས་ཀྱིས་གོ་སྒྲིག་གནང་བའི་སྙན་ངག་སྒྲོག་སྦྱང་འགྲན་བསྡུར་འདིར། ཐོག་མའི་སྔོན་འགྲོ་དང་དངོས་གཞི། མཐའ་མའི་རྟིང་རྩོད་རིམ་པ་བཅས་འགྲན་བསྡུར་ཐེངས་གསུམ་གནང་ཡོད་པ་དང་། ཐོག་མའི་སྔོན་འགྲོའི་འགྲན་བསྡུར་སྐབས་མི་ ༢༡༥ འགྲན་ཞུགས་གནང་ཡོད་འདུག
གསར་འགོད་པ། ཚེ་རིང་རྒྱལ།
བོད་མི་རིགས་ཀྱི་དོན་དུ་ལུས་སྲོག་ལེག་སྐྱེད་ཕུལ་མ་ཐུབ་མི་ཡང་རང་ཉིད་ཀྱི་ཁ་ཡི་ནང་སྐད་ཆ་དེ་བོད་སྐད་གཙང་མ་ཞིག་རྒྱག་རོག
་་་བཀྲ་ཤིས་བདེ་ལེགས། ་་་་་ལྷན་ཚོགས་གཉིས་ཀྱི་དམིགས་ཡུལ་ལ་སྔ་ས་ནས་རྒྱབ་སྐྱོར་ཞུ་མྱོང་ལ། ད་ཐེངས་ཀྱི་འདུ་འཛོམས་འདི་ཡང་ཡི་རངས་འོས་པ་ཞིག་འདུག མ་འོངས་པར་ཡར་རྒྱས་དང་བྱ་བ་ལམ་འགྲོ་ཡོང་བའི་རེ་སྨོན་ཆེ། སྐད་ཡིག་གལ་ཆེ་སྐོར་ཙམ་བཤད་པ་ཁོ་ན་མ་གཏོགས་ལག་ལེན་ཐོག་འགྲོ་ཐུབ་ངེས་ཉུང་ཉུང་རེད། ལག་ལེན་རང་གི་ཐོག་མདུན་སྐྱོད་བྱ་འཕུར་བ་ལྟབུ་མ་བྱུང་ཡང་གོམ་ཁ་སྤོ་དགོས་པ་དེ། སྐད་ཡིག་གཉིས་ཀྱི་སྲོག་སྐྱོབ་ངོ་མ་ཡིན་ནི་རེད། ད་བདེ་མོ་བྱོས་་་་་་
ཚང་མ་ལ། བཀྲ་ཤེས་བདེ་ལེགས་ཞུ། ད་རེས་བོད་ཀྱི་སྐད་ཡིག་སྐོར་ལ་ཚོགས་འདུ་ཚོགས་པ་ལ་མཐའ་གཅིག་ཏུ་རྗེས་སུ་ཡི་རང་ཞུ་རྒྱུ་དང་། གོ་འགྲིག་གནང་མཁན་ཁྱེད་ལ་ཐུགས་རྗེ་ཆེ་ཞུ། མ་འོང་པར་གང་ཟགས་སུ་་ཞིག་གིས་རང་རེའི་སྐད་ཡིག་སྐོར་ལ་ལས་འགུལ་སྤེལ་མཁན་བྱུང་ན། གུས་པའི་རྒྱབ་སྐྱོར་ཞུ་གི་ཡིན། རང་རེའི་གནས་འབབ་ལ་སྟས་ན་སྐད་ཡིག་གི་ལས་འགུལ་འདི་མང་ཙམ་སྤེལ་དགོས་པ་མཐོང་།
ལས་རིམ་གོ་སྒྲིགས་དང་དཔལ་འབྱོར་རོགས་འདེབས་གནང་མཁན་ཡོངས་ལ་དཀའ་དྲིན་ཆེན་ཞེས་ཞུ་འདོད་བྱུང་།
བོད་ཀྱི་སྐད་ཡིག་གི་འགོ་འཛིན་དང་ཚོགས་མིར་གདན་ཞུ་བྱེད་པ་སོགས་ལ་ཐུགས་རྗེ་ཆེ་ཞུ་བཞིན་ཡོད་ལ།བོད་ཀྱི་དུས་བབས་ཚང་གིས་བགྲོ་གླེང་འདིར་དོ་སྣང་མི་ཆུང་བ་བྱེད་པར་ཡང་ཐུགས་རྗེ་ཆེ་ཞུ་བཞིན་ཡོད།
བགྲོ་གླེང་ངོ་མ་རིན་ཐང་ལྡན་གྱི།
ཤིང་བཟའ་རིན་པོ་ཆེ་མཆོག་ལ་བཀའ་དྲིན་ཆེ་ཞུ་རྒྱུ་ཡིན། ཁོང་ནི་བོད་པའི་རིན་པོ་ཆེའི་ཁྲོད་སོ་སོའི་སྤྱི་ཚོགས་སུ་མཐོན་ནས་ཕྱག་ལས་མི་ཉུང་བ་ཞིག་གནང་གི་འ྄དུག་པར་བཀའ་དྲིན་ཆེ། དེ་དང་ཕྱོགས་མཚ྄ུངས་ད་རེས་ཀྱི་ཚོགས་འདུ་དེ་ལྟ་བུ་གོ་སྒྲིག་གནང་མཁན་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། ད་ལྟའི་དུས་ཚོད་འདིར་མི་ཡུལ་དུ་དེ་ལྟ་བུའི་ཚོགས་འདུ་ཚོགས་ཐུབ་པ་དེ་ཡག་པོ་རེད། འོན་ཀྱང་ཚོགས་འདུ་དེ་ལྟ་བུ་ཞིག་ཚོགས་རྗེས་དེའི་གྲུབ་འབྲས་ལའང་དགོངས་པ་བཞེས་དགོས་པར་སེམས། ྄ངའི་བསམ་པར་རིག་གཞུང་ཚོགས་འདུ་དེ་ལྟ་བུ་ཚོགས་སྐབས་ཚོགས་བཞུགས་པ་བཙན་བྱོལ་ནང་ཚར་ལོངས་བྱུང་བའི་གཞོན་སྐྱེས་གང་མ྄ང་དགོས་པར་སེམས། དམིགས་ཡུལ་དེ་གཙོ་བོར་བཟུང་ཚེ་ཚོགས་འདུ་དེ་ལྟ་བུའི་ནང་སྙན་ངག་གྱེར་འདོན་གཙོེ་ཆེར་འཛིན་པ་ལས་རང་མི་རིགས་ཀྱི་འབྱུང་ཁུངས་དེད་པའི་ལོ་རྒྱུས་དང་བོད་ཀྱི་ཕམ་ཉེས་ཀྱི་འབྱུང་རྩ་སོགས་ལ་བ྄གྲོ་གླེང་མང་ཙམ་གནང་ན་དགེ་མཚན་ཆེ་བར་མངོན། དེ་ཡང་དེ་སྔོན་དང་མི་འདྲ་བར་བོད་རིགས་གཞོན་སྐྱེས་མི་ཉུང་བ་ཞིག་ནུབ་གླིང་ཡུལ་དུ་འགྲོ་གི་ཡོད་ཅིང་ཁོ་ཚོའི་ལས་དབང་དེ་ཡང་བོད་མི་རིགས་ཀྱི་ལས་དབང་དང་འབྲེལ་ནས་གླེང་དགོས་ཀྱི་ཡོད། དེ་གཅིག་ཡིན། གཞོན་སྐྱེས་དེ་རིགས་ལ་མི་རིགས་མི་འདྲ་བ་སྣ་ཚོགས་ཐུག་གི་ཡོད་ལ་ཁོ་ཚོ་དང་བསམ་བློ་བརྗེ་རེས་བྱ་རྒྱུའི་གོ་སྐབས་ཀྱང་རག་གི་ཡོད་པ་རེད། བསམ་བློ་བརྗེ་རེས་ཀྱི་྄སྔོ་འགྲོ་ལྟ་བུ་དེ་ར྄ང་ཉིད་ཀྱི་འབྱུང་ཁུངས་དེད་རྒྱུ་དེ་རེད། འོན་ཀྱང་བློ་ཕམ་པ་ཞིག་ལ་ང་ཚོའི་ན་གཞོན་མི་ཉུང་བ་ཞིག་གིས་སོ་སོའི་འབྱུང་ཁུངས་ཤེས་ཀྱི་མེད་ཁར་ཐ་ན་བོད་ལ་རྒྱས་བཙན་འཛུལ་ག་དུས་བྱས་མིན་ཉེ་དུས་ཀྱི་ལོ་རྒྱུས་ཤེས་བྱའང་མེད་མཁན་ཉུང་ཉུང་གཏན་ནས་མིན། གནས་སྟངས་དེ་འདྲའི་འོག་ང་ཚོས་གཞིས་ལུས་རྒྱ་ཆེའི་མི་མང་གི་ཐུགས་ཀྱི་ཐུགས་ཚབ་དང་གསུང་གི་གསུང་ཚབ་བྱེད་ཐུབ་རྒྱུ་དེ་ཡང་ཁག་ཙམ་ཡོད་པ་འདྲ། དེ་འདྲ་ཡིན་པ་སོང་ཙང་མ་འོངས་པའི་རིག་གཞུང་ཚོགས་འདུ་དེ་རིགས་སྐབས་གནད་དོན་དེ་རིགས་ལ་གདོང་གཏད་ནས་ཕྱག་ལས་གནང་ན་དགེ་མཚན་ཆེ་བར་སེམས།
བེ་རི་འདི་བཙན་བྱོལ་ནང་གི་མཁས་པ་རྒན་ཤོས་ཤིག་རེད་འདིས་ཆབ་སྲིད་བཞགས་ནས་རིག་གཞུང་དང་ཤེས་ཡོན་ཕྱོགས་ལ་ཚུར་གོམ་ཁྱོགས་པ་དེ་ཡག་པོ་བྱུང་སོང་་ཧོར་གཙང་འཇིག་མེད་དང་་་བེ་རི་འཇིག་མེད་ཆབ་མདོ་ཤེས་རབ་གསུམ་དེ་བཙན་བྱོལ་ནང་གི་མཁས་པ་རྣམ་གསུམ་ལབ་ན་མ་ཆོག་པ་མེད་་་་་་་་
ཁ་བརྡའི་དྲ་བར་རྒྱུན་དུ་བལྟ་ཀློག་ཐུབ་ན། འཚམས་འཚམས་ལ་བོད་ཀྱི་སྐད་ཡིག་ཚོགས་འདུ་འཚོགས་པ་དང་ཁྱད་མི་འདུག
ཤིང་བཟའ་རིན་པོ་ཆེ་ཚང་གཙོས་ག་སྒྲིག་པ་ཡོངས་ལ་སྙིང་ནས་ཐུགས་རྗེ་ཆེ་ཞུ་རྒྱུ་ཡིན།
ཡག་པོ་རེད་བློ་གཅིག་གི་ལས་འགུལ་མ་ཡིན་པའི་ཕུགས་རྒྱང་ཞིག
ཐུགས་རྗེ་ཆེ་ངོསནས་ཡག་གི
བོད་ཀྱི་སྐད་ཡིག་ཚོགས་འདུ་འདི་ལྟར་ཚོགས་འདུག་དགེ་སྐྱོན་གླེང་བར་ཕེབས་ཤོག ད་ཕ་སྐད་གཙང་མ་ཟེར་བའི་གལ་ཆེན་དེ་གླེང་མེད་པ་ཡིན་ནམ། ད་ཐབས་ལམ་དང་ཉེན་ཁ་མ་གླེང་བར་བགྲོ་གླེང་གང་གླེང་བ་ཡིན་ན།
༄། ཤིང་བཟའ་རིན་པོ་ཆེ་མཆོག་གི་སེམས་ཤུགས་དང་ཐུགས་སྨོན་ལ་ཕ་རོལ་མི་མིན་གྱིས་བསམ་སྦྱོར་ངན་པ་སྤུ་ཙམ་མི་འབྱུང་བར་ཅི་བསམ་ཐུགས་རེས་བཞིན་འགྲུབ་པའི་སྨོན་འདུན་དང་བཀྲ་ཤིས་བདེ་ལེགས་གྲངས་མེད་ཞུ་རྒྱུ་ཡོད།
ཨ་ལགས་ཤིང་བཟའ་ཚང་འབྲོག་རུ་སོགས་ལ་ཐུགས་རྗེ་ཆེ་ཞུ.
གཙོ་བོ་སྐད་གདངས་གཅིག་གྱུར་ཕྱོགས་ལ་མག་ལེ. སྐྱབས་སུ་མཆིའོ
ཤིན་བཟང་རིན་པོ་་ཆེ་ཟེར་བ་འདི་སུ་ཞིག་ཡིན་ཅི་ཞིག་བཤད་ཀྱི་ཡོད་མེད་གཞི་ནས་ལྟ་རྒྱུ་ཡིན་་་མི་ཚོས་ཟེར་ཚུལ་ལ་གོ་ཡ་མང་པོ་འདུག
༧སྐྱབས་རྗེ་ཤིང་བཟའ་རིན་པོ་ཆེའི་དབུ་ཚོགས་འདུ་པ་རྣམས་ལ་བཀྲ་ཤིས་བདེ་ལེགས་ཞུ་རྒྱུ་དང་ལས་གཞི་རྣམས་ལམ་འགྲོ་ཡོངས་བའི་སྨོན་འདུན་ཞུ།
ཚོགས་འདུ་ལ་བཀྲ་ཤིས་བདེ་ལེགས་ཞུ་བ་དང་ལྷག་པར་ཚོགས་འདུ་རྒྱལ་ཁའི་ངང་ནས་གྲོལ་ཐུབ་པའི་སྨོན་འདུན་ཞུ།