དེ་རིང་གཞོན་ནུ་ལྷན་ཚོགས་ཀྱིས་ངྷ་རམ་ས་ལར་གསལ་བསྒྲགས་སྤེལ་ཏེ། བོད་ཕྱི་ནང་གི་བོད་མི་ཚོས་ད་ལོའི་ལོ་གསར་མི་གཏོང་བའི་འབོད་སྐུལ་ཞུས་སོང་ལ། ལོ་གསར་སྐབས་དང་བསྟུན་ཏེ་གནས་ཁག་ ༨༠ ནང་བོད་རྒྱལ་ཁབ་འཛུགས་བསྐྲུན་གྱི་མ་དངུལ་ཞལ་འདེབས་བསྡུ་རུབ་རྒྱུ་ཡིན་འདུག
དེ་རིང་ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་ ༡༡ དང་ཕྱེད་ཀའི་ཐོག ངྷ་ས་དབུས་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་རྒྱུན་ལས་ཚོགས་ཁང་དུ། གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས་དང་དྲུང་ཆེ་བསྟན་འཛིན་ཆོས་སྐྱིད་རྣམ་གཉིས་ཀྱིས་གསར་འགོད་གསལ་བསྒྲགས་ཤིག་བསྐྱངས་ཏེ། ད་ལོར་བོད་ཕྱི་ནང་གི་བོད་མི་ཚོས་བོད་ཆུ་འབྲུག་ལོའི་ལོ་གསར་མི་གཏོང་རྒྱུའི་འབོད་སྐུལ་ཞུས་པ་མ་ཟད། ལོ་གསར་གྱི་སྐབས་དང་བསྟུན་ཏེ་གཞོན་ལྷན་གྱི་ངོས་ནས་བོད་རྒྱལ་ཁབ་འཛུགས་བསྐྲུན་གྱི་མ་དངུལ་ཐེབས་རྩ་གསར་འཛུགས་བྱས་ཐོག ས་གནས་གཞོན་ནུའི་ཡན་ལག་ཁག་ ༨༠ ནང་མ་དངུལ་བསྡུ་རུབ་གནང་རྒྱུ་ཡིན་སྐོར་བརྗོད་སོང་།
གསར་འགོད་ལྷན་ཚོགས་ཐོག་ཚོགས་གཞོན་དོན་གྲུབ་ལྷ་དར་ལགས་ཀྱིས་གནས་ཚུལ་སྒྲོག་སྦྱངས་གནང་བའི་ནང་བཀོད་དོན། “ འདི་ལོར་གསེར་རྟ་དང་ལི་ཐང་། རྟའུ། རྔ་པ། དཀར་མཛེས། ཆབ་མདོ་སོགས་སུ་བོད་མི་ཚོས་རྒྱ་ནག་གི་བཙན་གནོན་ལ་ངོ་རྒོལ་རིམ་པར་བྱས་ཡོད་ལ། ལྷག་པར་དུ་ད་ལོའི་ཕྱི་ཟླ་ ༣ ཚེས་ ༡༦ ཉིན་ཀིརྟི་དགོན་པའི་དགེ་འདུན་པ་བློ་བཟང་ཕུན་ཚོགས་ལགས་ཀྱིས་རང་ལུས་མེས་བསྲེགས་བཏང་ནས་ཟླ་འདིའི་ཚེས་ ༣ ཉིན་རྟའུ་བཙུན་མ་དཔལ་ལྡན་ཆོས་མཚོ་ལགས་ཀྱིས་རང་ལུས་མེར་བསྲེགས་མ་བཏང་བར། བོད་མི་ན་གཞོན་ ༡༡ གིས་བོད་རྒྱལ་ཁབ་ཀྱི་རང་དབང་སླར་གསོ་དང་། ༧གོང་ས་མཆོག་བོད་དུ་གདན་ཞུ་ཆེད་རང་སྲོག་བློས་གཏོང་གནང་ཡོད་ཅེས་ ” འཁོད་འདུག
ཡང་གསལ་བསྒྲགས་དེའི་ནང་མུ་མཐུད་དུ། “ རླབས་ཆེན་གྱི་ཡར་ལངས་འདི་དག་ནི། རྒྱ་ནག་བཙན་རྒྱལ་རིང་ལུགས་ཀྱིས་བོད་བཅིངས་འགྲོལ་བཏང་སྟེ་ལོ་ ༦༠ དང་། གུང་ཁྲན་ཏང་དབུ་བརྙེས་ཏེ་ལོ་ ༩༠ འཁོར་བའི་དུས་དྲན་སྲུང་གཙི་དང་། ༧གོང་ས་མཆོག་གིས་བོད་ཀྱི་ཆབ་སྲིད་འགན་དབང་རྩིས་སྤྲོད་སྐབས་བྱུང་བ་ཤ་སྟག་ཆགས་ཡོད་སྟབས། ལས་འགུལ་འདིར་དམིགས་བསལ་གྱི་ནུས་པ་དང་གྲུབ་འབྲས་བྱུང་ཡོད་པ་རེད། གངས་ཅན་པའི་རྒྱལ་ཁབ་ཀྱི་བདག་དབང་སླར་གསོའི་འཐབ་རྩོད་འདི་ནི། རང་ངོ་རང་ཤེས་དང་རང་འགན་རང་འཁུར་ཞིག་ཡིན་པ་ལས་དེར་གཞན་གྱིས་བརྒྱུད་སྐུལ་བྱས་མྱོང་མེད་པར། མགོ་ཁྲིད་དང་མི་རབས་ལ་འགྱུར་བ་འགྲོ་བཞིན་ཡོད་ཀྱང་བདག་དབང་སླར་གསོའི་ཆོད་སེམས་ལ་འགྱུར་བ་འགྲོ་མི་སྲིད་པའི་བརྡ་ལན་གསལ་པོ་སྤྲད་ཡོད། འདི་ནི་རྒྱ་ནག་གི་ལོ་ངོ་ལྔ་བཅུའི་བོད་དོན་དྲིལ་བསྒྲགས་ཀྱི་ཕམ་ཁ་ཆེན་པོ་ཞིག་དང་། བོད་རང་དབང་སླར་གསོའི་རྒྱལ་ཁ་ཞིག་ཆགས་ཡོད་ཅེས་ ” འཁོད་འདུག
མཐའ་མར་གསལ་བསྒྲགས་དེར། “ འདི་ལོར་བོད་རྒྱལ་ཁབ་ཀྱི་བདག་དབང་དང་མདུན་ལམ་ཆེད། སྐུ་སྲོག་ཤོར་བའི་རྒྱལ་གཅེས་དཔའ་པོ་དཔའ་མོ་ཚོར་མྱ་ངན་གུས་མདུད་མཚོན་ཆེད། གཞོན་ལྷན་ཀྱིས་ད་ལོའི་བོད་ཆུ་འབྲུག་ལོའི་ལོ་གསར་མི་གཏོང་བར་ལོ་གསར་སྐབས་གྱོན་ཆས་གསར་པ་དང་དམིགས་བསལ་ཁ་ལག་འགྲོ་གྲོན་རྣམས། བོད་རང་བཙན་སླར་གསོའི་མ་དངུལ་ཐེབས་རྩ་གསར་འཛུགས་ཆེད་ཞལ་འདེབས་གནང་རྒྱུ་དང་། མ་དངུལ་བསྡུ་རུབ་ཀྱི་ལས་འགུལ་དེ་ལོ་གསར་དང་སྟབས་བསྟུན་ས་གནས་གཞོན་ནུ་ཁག་ཏུ་སྤེལ་རྒྱུ་ཡིན་ལ། མ་དངུལ་བསྡུ་རུབ་བྱས་རྗེས་དངུལ་ཡོངས་རྫོགས་དབུས་གཞོན་ལྷན་བརྒྱུད་བཙན་བྱོལ་བོད་གཞུང་ལ་འབུལ་རྒྱུ་ཡིན། འདི་ནི་དངུལ་གྱི་གནད་དོན་ཙམ་མིན་པར་བོད་མིའི་ཕུགས་བསམ་དང་འགན་འཁུར་གྱི་རིམ་པ་གལ་ཆེན་ཞིག་ཡིན་སྟབས། བོད་རིགས་རྩམ་གཟན་ཡོངས་ནས་རང་འགན་རང་འཁུར་གྱིས་ལས་འགུལ་དེར་ཆ་ཤས་ལེན་རོགས་ཞེས་ ” ཞེས་འཁོད་འདུག
མཇུག་ཏུ་གསར་འགོད་པས་གཞོན་ལྷན་གྱིས་མང་ཚོགས་ལ་ཞལ་འདེབས་བསྡུས་རྗེས་དངུལ་དེ་ཇི་ལྟར་ཉར་རྩིས་ཡོད་མེད་དྲིས་པར། “ ༢༠༠༨ ལོར་བོད་ནང་བོད་མི་མང་པོ་ཞིག་འདས་གྲོངས་སུ་ཕྱིན་སྐབས། ང་ཚོས་ ༢༠༠༩ དེ་ལོ་ནག་གི་ལོ་ཞིག་ལ་སྲུང་གཙི་ཞུས་པ་རེད། ད་ལོར་བོད་ནང་བོད་མི་མང་པོ་ཞིག་བོད་རྒྱལ་ཁབ་ཆེད་འདས་གྲོངས་ཕྱིན་ཡོད་དུས། ད་ལོར་ལོ་གསར་མི་གཏོང་བའི་ལས་འགུལ་འདི་མྱ་ངན་གྱི་ངོ་བོ་མཚོན་པ་ཞིག་དང་། རེ་བའི་མཚོན་རྟགས་ཞིག་ཀྱང་ཡིན་པ་རེད། ལོ་གསར་སྐབས་ཚང་མས་རང་ཉིད་བོད་པ་ཞིག་ཡིན་བསམ་པའི་ཐོག་སྤྲོ་སྐྱིད་མི་གཏོང་བ་དང་། ལོ་གསར་སྐབས་གཞོན་ནུའི་མ་དངུལ་བསྡུ་རུབ་ཀྱི་ལས་འགུལ་ནང་ཆ་ཤས་གང་མང་ལེན་རོགས་ཟེར་རྒྱུ་ཡིན། དངུལ་དེ་གཞོན་ལྷན་གྱི་ངོས་ནས་བཙན་བྱོལ་བོད་གཞུང་ལ་འབུལ་རྩིས་ཡོད་ཀྱང་། དངུལ་དེ་གཞུང་གིས་མ་བླངས་བར་དུ་གཞོན་ལྷན་གྱི་ངོས་ནས་ཉར་རྒྱུ་ཡིན། ” ཞེས་བརྗོད་བྱུང་།
ཡང་གསར་འགོད་པས་བོད་ནང་རང་ལུས་མེར་བསྲེགས་བཏང་བའི་ཛ་དྲག་གནས་སྟངས་ཐོག་གཞོན་ལྷན་ལ་ལས་འགུལ་སྤེལ་འཆར་ཡོད་མེད་དྲིས་པར། གཞོན་ནུ་ལྷན་ཚོགས་ཀྱི་ངོས་ནས་མི་འགྱངས་བར་ས་གནས་ཁག་ཏུ་གཞི་རྒྱ་ཆེ་བའི་ལས་འགུལ་ཞིག་སྤེལ་འཆར་ཡོད་ལ། ལས་འགུལ་དེར་མང་ཚོགས་ཀྱིས་མཉམ་ཞུགས་གནང་རོགས་ཞེས་འབོད་སྐུལ་ཞུས་སོང་།
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དྲྭ་གྲོགས་ཚོ། ང་རང་ཚོར་ལོ་གསར་གཏོང་བའི་དུས་གཅིག་ནམ་རག་གི་རེད།
སེམས་པ་མི་བདེ་བའི་ལྷང་ལྷང་ཐོག་ནས་བཤད་མི་དགོས་པ་དེ་བཤད་ཚར་བ་ཙམ་མ་ཟད་དུས་བབས་ཀྱིས་བཀོད་འདུག་པར་ཐུགས་རྗེ་ཆེ། འདི་ཡང་བཀོད་རོགས་གནོངས།
ད་ལྟའི་གཞོན་ལྷན་གྱིས་དམིགས་ཡུལ་གཙོ་བོ་བོད་རང་བཙན་ལ་རྒྱབ་སྐྱོར་མེད་ཀྱང་། སྤྱི་དོན་ལས་འགུལ་ཆེ་ཕྲ་ཆུང་གསུམ་ཐམས་ཅད་ལ་རྒྱབ་སྐྱོར་དང་རྗེས་སུ་ཡི་རང་། ཐུགས་རྗེ་ཆེ་ཞེས་ཞུ་འདོད་བྱུང་ལགས།
བོད་རང་བཙན་བོད་ནས་དང་། དེ་ཡང་ལྷ་སའི་ལས་བྱེད་བྱམས་པ་འཕྲིན་ལས་དང་། རྒྱལ་མཚན་ནོར་བུས་དབུ་འཁྲིད་ནས་ལེན་དགོས་རེད། བཙན་བྱོལ་ནས་དབུ་མའི་ལམ་གཞིར་བཟུང་ནས་བོད་རྒྱ་གཉིས་སྨན་ཡོངས་ཐབ་འདི་ལས་འགུལ་མཛེས་པོ་ཡོད་རེད། བྱེས་འབྱོར་དུ་བོད་རང་བཙན་ལེན་མཁན་འཇམ་དབྱང་ནོར་བུ་དང་། ལྷག་བསམ་སོགས་ཡོད་རེད།
༢༠༡༡ལོའི་རྒྱལ་གཅེས་དཔའ་བོ་རྣམ་པའི་མཚན་གཞུང་།
བློ་བཟང་ཕུན་ཚོགས། ལོ ༢༠ ཨ་མདོ། དེང་གི་སི་ཁྲོན་རྔ་པ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༣ ཚེས་ ༡༦ཉིན།
ཚེ་དབང་ནོར་བུ། ལོ་ ༢༩ ཁམས། དེང་གི་སི་ཁྲོན་དཀར་མཛེས་ཁུལ་ཉ་མཚོ་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༩ ཚེས་ ༢༦ཉིན།
དློ་བཟང་སྐལ་བཟང་། ལོ་ ༡༨ ཨ་མདོ། དེང་གི་སི་ཁྲོན་རྔ་བ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༩ ཚེས་ ༢༦ ཉིན།
བློ་བཟང་དཀོན་མཆོག ལོ་ ༡༨ ཨ་མདོ། དེང་གི་སི་ཁྲོན་རྔ་བ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༩ ཚེས་ ༢༦ཉིན།
སྐལ་བཟང་དབང་ཕྱུག ལོ་ ༡༧ ཨ་མདོ། དེང་གི་སི་ཁྲོན་རྔ་བ་ཁུལ་ཀརྟི་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༡༠ཚེས་ ༧ཉིན།
ཆོས་འཕེལ། ལོ་ ༡༩ ཨ་མདོ། ༢༠༡༠ ལོར་བྱ་བའི་ཚན་ཆུང་གིས་དགོན་པ་ནས་བསྐྲད་དེ་བཙན་ཚུགས་ཀྱིས་སྐྱ་སར་ཕབ་པའི་ཀརྟི་དགོན་པའི་དགེ་འདུན་པ་ཟུར་བ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༧ ཉིན།
མཁའ་དབྱིངས། ལོ་ ༡༨ ཨ་མདོ། ༢༠༡༠ ལོར་བྱ་བའི་ཚན་ཆུང་གིས་དགོན་པ་ནས་བསྐྲད་དེ་བཙན་ཚུགས་ཀྱིས་སྐྱ་སར་ཕབ་པའི་ཀརྟི་དགོན་པའི་དགེ་འདུན་པ་ཟུར་བ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༧ ཉིན།
ནོར་བུ་དགྲ་འདུལ། ལོ་ ༡༩ ཨ་མདོ། ༢༠༡༠ ལོར་བྱ་བའི་ཚན་ཆུང་གིས་དགོན་པ་ནས་བསྐྲད་དེ་བཙན་ཚུགས་ཀྱིས་སྐྱ་སར་ཕབ་པའི་ཀརྟི་དགོན་པའི་དགེ་འདུན་པ་ཟུར་བ། ཕྱི་ལོ་ ༢༠༡༡ ལོའི་ཟླ་ ༡༠ཚེས་ ༡༥ཉིན།
བསྟན་འཛིན་དབང་མོ། ལོ་ ༢༠ ཨ་མདོ། དེང་གི་སི་ཁྲོན་རྔ་བ་ཁུལ་མ་མའི་བཙུན་དགོན་གྱི་བཙུན་མ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༡༧ཉིན།
ཟླ་བ་ཚེ་རིང་། ལོ ༣༨ ཁམས། དེང་གི་སི་ཁྲོན་དཀར་མཛེས་ཁུལ་དཀར་མཛེས་དགོན་པའི་དགེ་འདུན་པ། ཕྱི་ལོ་ ༢༠༡༡ ལོའི་ཟླ་ ༡༠ ཚེས་ ༢༥ ཉིན།
དཔལ་ལྡན་ཆོས་མཚོ། ལོ་ ༣༥ ཁམས། དེང་གི་སི་ཁྲོན་དཀར་མཛེས་ཁུལ་རྟའུ་བྱང་ཆུབ་ཆོས་གླིང་དགོན་པའི་བཙུན་མ། ཕྱི་ལོ་ ༢༠༡༡ ལོའི་ཟླ་ ༡༡ཚེས་ ༣ ཉིན།
རྩོམ་ཡིག་འདི་བྲིས་ནས་མཇུག་རྫོགས་ལ་ཉེ་སྐབས། བོད་ཕྱི་ལོགས་སུ་བོད་མི་གཉིས་ཀྱིས་རང་ཉིད་མེར་བསྲེགས་ལ་བཏང་ནས་ངོ་རྒོལ་བྱས་པའི་གནས་ཚུལ་ཐོས་སོང་ལ། ང་ཚོའི་སྐྱོ་སེམས་དང་གུས་བརྩི་ཧི་མ་ལ་ཡ་བརྒྱུད་ནས་ཁོང་གཉིས་ཀྱི་འགྲམ་དུ་སྐྱེལ་རྒྱུ་ཡིན། ཁོང་རྣམ་གཉིས་ནི།
ཤེས་རབ་རྡོ་རྗེ། བོད་ཀྱི་གཞོན་ནུ་ལྷན་ཚོགས་ཀྱི་ལྡི་ལི་ས་གནས་གཞོན་ནུ་ཚོགས་པའི་ཟུང་དྲུང་། ཕྱི་ལོ་ ༢༠༡༡ ལོའི་ཟླ་ ༡༡ ཚེས་ ༤ ཉིན་གྱི་ཞོགས་པའི་ཆུ་ཚོད་ ༡༠ སྟེང་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་རང་ལུས་མེར་བསྲེགས་ཀྱིས་ངོ་རྒོལ་གནང་ཡོད་ཅིང་། སྐབས་དེར་རྒྱ་གར་ཉེན་རྟོགས་པས་འཇུས་ནས་མེ་བསད་ཡོད་པ་དང་ལྡི་ལི་སྨན་ཁང་ཞིག་ཏུ་བསྐྱལ་འདུག
གཞན་མིང་མི་ཤེས་པའི་དགེ་འདུན་པ་ཞིག་གིས་ཕྱི་ལོ་ ༢༠༡༡ ལོའི་ཟླ་ ༡༡ ཚེས་ ༡༠ ཉིན་གྱི་ཞོགས་པའི་ཆུ་ཚོད་ ༧ ཡས་མས་ཙམ་ལ་བལ་ཡུལ་རྒྱལ་སའི་མཆོད་རྟེན་བྱ་རུང་ཁ་ཤོར་གྱི་འགྲམ་དུ་རང་ལུས་མེར་བསྲེགས་ཀྱིས་ངོ་རྒོལ་གནང་འདུག འོན་ཀྱང་། གནས་ཚུལ་ཞིབ་ཕྲ་ལག་སོན་བྱུང་མ་སོང་།
གཞོན་ནུས་རྒྱལ་གཅེས་དཔའ་བོ་དང་དཔའ་མོའི་ཚོའི་ཆེད་མྱ་ངན་གུས་འདུད་མཚོན་བྱེད་ལོ་གསར་ལ་སྤྲོ་སྐྱིད་མ་གཏོང་རོགས་ཟེར་བའི་འབོད་བསྐུལ་བཞུས་པ་དེར་བསྔགས་བརྗོད་ཡོད།
ཡིན་ནའང་གཞོན་ནུ་ཚོགས་པའི་ངོས་ནས་བོད་རྒྱལ་ཁབ་སླར་གསོའི་ཆེད་ས་གནས་ཁག་ ༨༠ ནས་མ་དངུལ་བསྡུ་རུབ་བྱ་རྒྱུ་ཡིན་ཟེར། དངུལ་དེ་དག་བཙན་བྱོལ་སྒྲིག་འཛུགས་ལ་ཕུལ་རྒྱུ་ཡིན་ཟེར་བའི་ཚིག་འདི་མི་དམངས་ལ་མགོ་སྐོར་གཏོང་རྒྱུའི་བྱ་བ་ལྟ་བུ་ཞིག་མཐོང་།
བོད་རྒྱལ་ཁབ་སླར་གསོའི་ཆེད་མ་དངུལ་བསྡུ་རུབ་ཀྱི་དགོས་གལ་ཞིག་ཤར་ཚེ་གཞོན་ནུས་གཅིག་པུས་དེར་མ་དངུལ་བསྡུ་རུབ་བྱ་ཐུབ་ཐབས་མེད། གལ་ཏེ་གཞུང་གིས་རྩིས་བཞེས་བྱ་རྒྱུ་མིན་ཟེར་ན་དེ་ནས་མ་དངུལ་གང་བྱུང་བ་རྣམས་གཞོན་ནུས་བདག་ཉེར་བྱ་རྩིས་ཡོད་པ་འདྲ།
དེ་ལས་སྐད་ཆ་དྲང་པོར་བཤད་དེ་མ་འོངས་བོད་དོན་ཆེད་གཞོན་ནུས་ལས་འགུལ་སྣ་མང་སྤེལ་ཐུབ་ཆེད་མ་དངུལ་བསྡུ་རུབ་བྱ་རྒྱུ་ཡིན་ཟེར་ན་ངས་ཀྱང་མང་ཉུང་ལ་མ་ལྟོས་པར་ཞལ་འདེབས་འབུལ་རྒྱུ་ཡིན།
བཙན་བྱོལ་སྒྲིག་འཛུགས་ལ་ཕུལ་རྒྱུ་ཡིན་ན་དང་པོ་ནས་གཞུང་དང་སྐད་ཆ་ཡག་པོ་བཤད་དེ་གོ་བསྡུར་ལྷུག་པོ་བྱུང་རྗེས་མ་དངུལ་བསྡུ་རུབ་བྱ་དགོས། མི་དམངས་ལ་མགོ་སྐོར་གཏོང་བའི་བྱ་བ་ལྟ་བུ་རྐྱང་རྐྱང་བྱས་ཚེ་མ་འོངས་པར་བོད་ཀྱི་གཞོན་ནུའི་སྒྲིག་འཛུགས་དེར་མི་དམངས་ཀྱིས་ཡིད་ཆེས་མེད་པ་ཞིག་རྒྱུ་འགྱུར་རྒྱུ་རེད།
ལས་དོན་གང་ཞིག་བྱས་ཀྱང་ཏན་ཏན་ཏིག་ཏིག་བྱ་རྒྱུ་གལ་ཆེ་བར་མངོན།
ལོ་གསར་མ་གཏོང་རོགས་ཟེར་བ་ལ་རྒྱབ་སྐྱོར་མེད། འོན་ཀྱང་ལོ་གསར་མངོན་ཆུང་གཏང་རོགས་ཟེར་ན་གོ་རྒྱུ་ཞིག་འདུག སྤྱིར་བཏང་ལས་འགུལ་སྤེལ་སྟངས་རྣམ་པ་མི་འདྲ་བ་མང་པོ་ཡོད། སྐད་འབོད་དང་། རྒྱུ་རྩལ་། འབོད་སྐུལ་སོགས་སྣ་ཚོགས་ཡོད། ཕྱི་རྒྱལ་ཁབ་ཁག་ལ་མཚོན་ན་གཞས་སྣ་ཁྲབ་སྟོན་གྱི་ལམ་ནས་ཁྱབ་བསྒྲགས་སྤེལ་བ་ནི་ལས་འགུལ་ཤུགས་ཆེ་ཤོས་ཞིག་ཡིན། གང་ཡིན་ཟེར་ན། དེ་འདྲིའ་སྐབས་སུ་མི་འདུ་འཛོམས་ཆེན་པོ་ཡོང་གིན་ཡོད། བྱས་ཙང་ངོས་རང་གིས་བསམས་ན་དུས་འཁོར་དབང་ཆེན་གྱི་སྐབས་སུ་གཞས་སྣ་འཁྲབ་སྟོན་གྱི་ལམ་ནས་བོད་མི་རིགས་མྱ་ངན་རྗེས་དྲན་ཞིག་སྐོང་ཐུབ་ན་ཡག་པོ་ཡོད་རེད་བསམ་གྱི།
དུག་མདའ་ལགས་ཀྱི་ཞབས་མཆན་དེ་ཅིས་མ་བདེན་བསམ་པ་ཞིག མི་དཔྱོད་ལྡན་ཞིག་གིས་ཚིག་ཁ་ཤས་བྲིས་ནའང་དམིགས་བསལ་ཀྱི་རིན་ཐང་འདུག
རྟག་པར་ལོ་གསར་མ་བཏང་བ་འདིས་བོད་དོན་ལ་ཕན་པ་ཞིག་ཡོང་གི་མ་རེད། དེ་འདྲ་བྱས་ན་རྒྱ་མིའི་འདོད་ཐོག་ལ་སླེབས་སོང་བ་རེད། ལོ་སར་ནི་ཡུལ་ལུང་ཀུན་གྱིས་གལ་ཆེར་འཛིན་པ་དང་ལྷག་པར་དུ་རྒྱ་མིས་ལོ་གཅིག་གི་དུས་ཆེན་གལ་ཆེ་ཤོས་དེ་ལ་བརྩི་བཞིན་ཡོད་རེད། ཁོག་རྒྱ་ཆུང་བའི་ལས་དོན་དེ་འདྲ་བྱས་ནས་མི་འདུག་པར་རྣམ་དཔྱོད་ཅིག་ངོམ་རན་འདུག
ད་དངོས་གནས་བོད་ཀྱི་གཞོན་ལྷན་ཚོགས་ཀྱི་བསམ་བློ་གཏོང་སྟངས་དཔེ་སྐྱོ་བོ་ཆགས་འདུག ལོ་གསར་སྐབས་དངུལ་བསྡུས་ནས་གཞུང་ལ་རྩིས་སྤྲོད་ཀྱི་ཡིན་ཟེར་ན་ག་རེ་ལབ་ཀྱི་ཡོད་རེད། གཞོན་ནུ་ལྷན་ཚོགས་སོ་སོའི་མ་འོངས་པའི་ལས་གུལ་ལ་འགྲོ་སོང་གཏོང་ཆེད་དུ་དངུལ་ཞལ་འདེབས་བསྡུ་ཡི་ཡིན་ཟེར་ན་འགྲིགས་པ་ལྟ་བུ་རེད། ཡིནའང་དངུལ་བསྡུས་ནས་གཞུང་ལ་འབུལ་གྱི་ཡིན་ཟེར་བ་དེ་དངོས་ནས་ག་རེ་རེད། གཞོན་ནུ་དང་གཞུང་གཉིས་མཉམ་སྦྲེལ་བྱེད་རྩིས་རེད་པས། ཆོབ་ཚར་བ་ལ།་་་གཞུང་ལ་སོ་སོའི་དཔལ་འབྱོར་བསྡུ་རུབ་བཟོ་ལྟངས་ཤིག་ཡོད་རེད།
གཉིས་ནས་ལོ་གསར་མ་གཏོང་རོགས་ཟེར་བ་ག་རེ་རེད། ལོ་གང་དཀའ་ལས་རྒྱབ། ལོ་གསར་ཉིན་གསུམ་ཞིག་ཡོད་རེད། དེའི་རིང་ལྷོད་ལྷོད་སྐྱིད་པོ་གཏོང་མི་བཅུག་པ་ག་རེ་རེད། བོད་ཀྱི་འཐབ་རྩོད་དེ་མྱ་ངན་རྐྱང་རྐྱང་དང་ཟས་བཅད་ངོ་རྒོལ་རྐྱང་རྐྱང་གི་ཡོང་གི་མ་རེད།་་་་་རྒྱ་ཆེ་ཙམ་བསམ་བློ་གཏོང་རོགས།
གཞོན་ལྷན་གྱི་བྱེད་ཕྱོགས་བརྒྱ་ཆ་བདུན་ཅུ་ལ་རྩ་བ་ནས་རྒྱབ་སྐྱོར་བྱེད་ཐུབ་ཀྱི་མི་འདུག །ཁོང་ཚོས་ཅིག་བྱེད་ཀྱི་ཡིན། ཉིག་བྱེད་ཀྱི་ཡིན་ཟེར་ནས་མི་མང་འགོ་སྐོར་བཏང་བ་རིམ་པ་མང་པོ་ཡིན། དང་པོ་ངེད་ཀྱིས་ཀྱང་ཡིད་ཆེ་བྱས་ནས་རྒྱབ་སྐྱོར་གང་མང་བྱེད་མྱོང་། རྗེས་སུ་ཡིད་ཐང་ཆད་སོང་།
ཞིབ་ཕྲ་བསམ་བློ་བཏང་དུས་བཙན་བྱོལ་གཞུང་དང་༸གོང་ས་མཆོག་གི་བྱེད་ཕྱོགས་ལ་འགོག་རྐྱེན་བཟོ་མཁན་གསུམ་པ་དེ་ཕལ་ཆེར་གཞོན་ལྷན་རེད་འདུག །ཁོང་ཚོ་མགོ་བདེ་བ་ལ་ནི་ཧང་སང་ཡ་རེད། ཁ་ནས་༸གོང་ས་མཆོག་དང་བཙན་བྱོལ་བ་ཟེར་ཁུལ་བྱས། ལག་ལེན་ལ་རྒྱབ་འགལ་བྱེད་མཁན་སྡིག་ཤོས་དེ་རེད། གཞོན་ལྷན་གྱི་ཚོགས་མི་མང་ཆེ་བས་ཤེས་ཀྱི་མེད་པར་མཆོངས་བཞིན་ཡོད། ཁ་ཤས་ཀྱིས་ཧ་གོ་ནས་ཚོགས་མི་ཕྱིར་འཐེན་བྱས་འདུག།།
དོན་དངོས་ཐོག་གཞོན་ལྷན་གྱི་བྱེད་སྟངས་ཀྱིས་་་བོད་མི་རིགས་ལ་ཕན་ཐོག་གི་ཡོད་དམ། གནོད་ཀྱི་ཡོད་་་་དྲི་བ་ཆེན་པོ་ཞིག་རེད།
གཞན་ཡང་ལོ་མ་གཏོང་ཟེར་བ་ལ་རྒྱུ་མཚན་མཐོང་མ་སོང་། འདས་པོ་རྣམས་ཀྱི་ཆེད་དུ་གཞིས་བྱེས་གཉིས་ཀྱིས་དངོས་ནས་མ་བྱས་པ་གང་ཡང་མི་འདུག།།
བོད་ཀྱི་གཞོན་ནུའི་ལྷན་ཚོགས་ཀྱིས་བོད་ནང་གི་རྒྱལ་གཅེས་དཔའ་བོ་རྣམས་ཀྱིས་རང་སྲོག་བློས་བཏང་བའི་མཛད་རྗེས་རྣམས་རང་གི་ཁེ་ཕན་གྱི་ཆེད་དུ་ཞབས་འདེབས་བསྡུ་བར་ཐབས་ཤེས་འདྲ་མིན་གྱི་ཐོག་ནས་བེད་སྤྱོད་བྱེད་པ་འདི་ནི་ཐབས་སྐྱོ་བའི་ལས་ཀ་རེད།
བོད་རྒྱལ་ཁབ་ཀྱི་ཁྱེད་དུ་སྐུ་སྲོག་ཤོར་བའི་དཔའ་བོ་དཔའ་མོ་རྣམས་ལ་མྱང་ངན་ཞུ་ཁྱད་དུ་ལོ་གསར་མ་བཏང་ན་མ་འགྲིག་པ་གང་ཡང་མཐོང་མ་སོང་། ཡིན་ནའང་རྒྱ་ནག་གི་ལོ་གསར་དང་བསྟུན་ཏེ་བོད་མི་རྣམས་ཀྱི་མྱང་ངན་གྱི་ལས་འགུལ་ཤུགས་ཆེར་ཞིག་སྤེལ་ན་དགེ་མཚན་ཆེ་པོ་འདུག་སྙམ།།
ཡིན་དང་ཡིན་རྒྱབ་སྐྱོར་ཡོད་དེ་ནི་བོད་མིའི་མྱ་ངན་མཚོན་བྱེད་ཡིན་པར་མ་ཟད་དངོས་ཡོད་མྱ་ངན་རེད།
བོད་རྒྱལ་ཁབ་ཀྱི་ཁྱེད་དུ་སྐུ་སྲོག་ཤོར་བའི་དཔའ་བོ་དཔའ་མོ་རྣམས་ལ་མྱང་ངན་ཞུ་ཁྱད་དུ་ལོ་གསར་མ་བཏང་ན་མ་འགྲིག་པ་གང་ཡང་མཐོང་མ་སོང་། ཡིན་ནའང་རྒྱ་ནག་གི་ལོ་གསར་དང་བསྟུན་ཏེ་བོད་མི་རྣམས་ཀྱི་མྱང་ངན་གྱི་ལས་འགུལ་ཤུགས་ཆེར་ཞིག་སྤེལ་ན་དགེ་མཚན་ཆེ་པོ་འདུག་སྙམ།།
ཨ་མའི་བུ་ལགས་ལོ་གསར་བོད་ཀྱི་རིག་གཞུང་ཡིན་ན་ལོ་གསར་མ་གཏོང་བར་མྱ་ངན་བྱེད་པ་ཡང་བོད་ཀྱི་རིག་གཞུང་ཡིན་དགོས། གང་ལྟར་ལོ་གསར་སྐབས་གཞིས་བྱེས་གཉིས་ནས་དགའ་དགའ་སྤྲོ་སྤྲོ་མི་གནང་བར་བོད་མི་རིགས་ཀྱི་དཔའ་བོ་རྣམས་རྗེས་དྲན་དང་དཀོན་མཆོག་ལ་གསོལ་འདེབས་བསྔོ་སྨོན་བྱེད།
ཨ་མའི་བུ་ལགས་ལོ་གསར་བོད་ཀྱི་རིག་གཞུང་ཡིན་ན་ལོ་གསར་མ་གཏོང་བར་མྱ་ངན་བྱེད་པ་ཡང་བོད་ཀྱི་རིག་གཞུང་ཡིན་དགོས། གང་ལྟར་ལོ་གསར་སྐབས་གཞིས་བྱེས་གཉིས་ནས་དགའ་དགའ་སྤྲོ་སྤྲོ་མི་གནང་བར་བོད་མི་རིགས་ཀྱི་དཔའ་བོ་རྣམས་རྗེས་དྲན་དང་དཀོན་མཆོག་ལ་གསོལ་འདེབས་བསྔོ་སྨོན་བྱེད།
ལོ་གཞོན་ཁ་ཤས་ལ་མཚོན་ན་དགོང་རེ་བཞིན་ལོ་གསར་ལྟ་བུ་ཡིན་པས་དེ་བཏང་དང་མ་བཏང་ལ་ཁྱད་པར་འདྲ་མི་འདུག རྒས་བོ་ཁ་ཤས་ལ་མཚོན་ན་འགྲོ་སོང་ལྷག་མ་ཞིག་ཡིན་པས་གཏན་ནས་མེད་ན་དགའ། བྱིས་པ་ཚོར་མཚོན་ན་དེ་ནི་མི་ཚེ་འདིས་ནང་བསྒུགས་བསྒུགས་ནས་བསྡད་པའི་ཡོད་ན་མེད་ན་དེ་ཡིན་པས། མཐའ་མཇུག་གི་ཞག་མ་འགའ་ལའང་སྒུག་ཚོད་མེད་པ་ལྟ་བུ་དེ་རྒད་པོ་ཚོས་བོད་ཟེར་ཁུལ་འདྲ་རྒྱ་ཟེར་ཁུལ་འདྲ་ཉ་ཉོག་ཧ་མི་གོ་བ་ཞིག་བཤད་ནས་མེད་པར་བཟོས་པ་ཡིན་ན། དང་ཐོག་བྱིས་པའི་ཐོབ་ཐང་རྡོག་རོལ་དུ་བཏང་ཡོད་མེད་བཀའ་ཁྲི་མཆོག་ལ་སྐད་ཆ་ཞིག་དྲིས། དེ་ནས་བྱིས་པ་ཚོར་བོད་རྒྱ་ཐ་དད་ཀྱི་སློབ་སྦྱོང་སྣ་གཅིག་མ་སྤྲད་པར་མེ་མཆོད་དང་འདྲ་བའི་ལོ་གསར་མཚམས་འཇོག་ལ་འདེད་པར་སྙིང་གིས་བཟོད་མི་བཟོད་ལྟོས། མིག་ཕྱེས་ན་རྒྱ་རྒན་ཁྲིན་ལུང་དང་བཙུམས་ན་རྒྱ་རྒན་ལས་ལེན་ཅི་མ་གཏོགས་མཐོང་ས་མེད་པའི་བྱིས་པ་ཚོར་གོང་ས་མཆོག་གི་སྐུ་པར་དང་བོད་པའི་ལྷ་མཆོད་མཐོང་སའི་གོ་སྐབས་ཉག་གཅིག་ཡོད་པ་དེ་ཡང་བཀག སྐོར་དང་སྐོར་བྱས་ནས་ལོ་གསར་ལ་འགྲོ་བ་དང་ཤོག་པག་འགད་པ་སོགས་བྱིས་པའི་ཡིད་ངོར་མི་ཚེ་གང་བོར་བརྗེད་དུ་མེད་པའི་བོད་རང་གི་ལོ་གསར་གྱི་བག་ཆགས་ཞིག་འཇོག་རྒྱུ་ཡོད་པ་དེ་ཡང་ཅི་མི་སྙམ་པར་གཡུགས། དེ་ནས་ཁྲལ་སེལ་ལྟ་བུའི་སྐད་འབོད་ཤི་མ་གསོན་ཞིག་བྱས་ཏེ་ཤོར་བ་ཡོད་དོ་ཅོག་གི་གིན་བསབ་ཏུ་བསམ་ན་འགྲིག་པར་མི་འདོད་དོ།། ལོ་གསར་མི་གཏོང་བའི་ལས་འགུལ་ཞིག་བཤད་སྐབས་ཨང་དང་པོ་བོད་མི་ཡོད་དོ་ཅོག་ལ་འདིའི་ཕྱོགས་ནས་བྱིས་པ་དང་དར་མའི་ཁྱད་པར་ཞིག་ཕྱེ་ཤེས་པ་ཞིག་བཟོ་དགོས་པ་རེད་སྙམ། དགོན་པ་གྲ་ཚང་ལ་མཚོན་ན་ལོ་གསར་ཟེར་བ་ནི་ཉིན་སུམ་བརྒྱ་དྲུག་ཅུའི་ནང་ནས་གཟའ་ཉི་མ་བཅུ་ཕྱོགས་གཅིག་ཏུ་བསྡུས་ནས་སོས་དལ་བག་ཕེབས་ཀྱི་གློག་བརྙན་ཞིག་ལྟ་ཆོག་པར་བཟོས་པ་ཙམ་ཡིན་པས། ཉིན་སུམ་བརྒྱ་དྲུག་ཅུར་གློག་བརྙན་ལྟ་བཞིན་པའི་མི་སྐྱ་དག་ལ་ཁོང་ཚོས་གོ་སྐབས་དེ་ལེན་པའི་ཐོབ་ཐང་ཅི་ཡོད།
སྤྱིར་བཏང་ལས་འགུལ་ག་རེ་སྤེལ་བ་ཡིན་ནའང་ཡག་པོ་རེད། ཡིན་ནའང་། ཉེ་བའི་ལོ་འགའི་ནང་བོད་ནང་གི་བོད་མི་ཚོས་ལས་འགུལ་གཞི་རྒྱ་ཆེ་རུ་དང་། རྣམ་པ་སྔར་བའི་ཛ་དྲག་ཏུ་གྱུར་བ་སྐབས་བསྟུན་ནས། བཙན་བྱོལ་གཞོན་ལྷན་གྱི་ནུས་པ་ཇེ་གཉོམ་དང་ལངས་ཕྱོགས་མོག་མོག་ཏུ་འགྱུར་གྱིན་འདུག་ལ། སྔར་གྱི་ཁ་ཕོ་རྣམས་ཞི་འཇགས་སུ་གྱུར་བ་དང་། མང་ཚོགས་ཀྱི་སེམས་ནང་གི་གཞོན་ལྷན་གྱི་གདེངས་འཇོག་དེའང་གས་ཆགས་འཆོར་བཞིན་འདུག དེ་ནི་གཞོན་ལྷན་གྱི་ངོས་ནས་མྱ་ངན་དང་དངུལ་བསྡུ་རུབ་ཀྱི་ལས་འགུལ་ཙམ་ལ་མགོ་འཁོར་ཏེ་མི་འདུག་པར། བོད་ནང་གི་ཛ་དྲག་ལས་འགུལ་དག་གི་གཤོག་ཡས་ཆད་དུ་མི་འཇུག་པར་རྒྱ་དམར་པོ་བསྡད་ན་འདུག་བཟོད་མི་བདེ་བ་ཞིག་དང་། འགྲོ་ན་འགྲོ་བཟོད་མི་བདེ་པ་ཞིག་བཟོས་ཏེ། བོད་དོན་ཐོག་སྐད་ཆ་མི་བཤད་རང་བཤད་ཀྱི་གནས་སུ་འདེད་རྒྱུར་རེ་སྐུལ་ཞུ།
ད་ལོ་ལོ་སར་མ་གཏོང་རོགས་ཞེས་འབོད་སྐུལ་ཞུས་པར་རྒྱབ་སྐྱོར་ཡོད།
འོན་ཀྱང་”ལོ་གསར་སྐབས་དང་བསྟུན་ཏེ་གནས་ཁག་ ༨༠ ནང་བོད་རྒྱལ་ཁབ་འཛུགས་བསྐྲུན་གྱི་མ་དངུལ་ཞལ་འདེབས་བསྡུ་རུབ་རྒྱུ་ཡིན་འདུག” ཅེས་པ་དེར་ཅུང་མགོ་འཐོམས་སོང་། གང་ལ་ཞེ་ན། བོད་རྒྱལ་ཁབ་འཛུགས་སྐྲུན་གང་འདྲ་སུ་བྱེད་དམ།
ཁ་དེར་གཡོར་བ་ལས་ཞབས་འདེབས་བསྡུ་རུབ་བྱེད་ནས་མ་འོངས་པའི་ལས་འགུལ་ཁག་ལ་འགྲོ་གྲོན་གཏོང་གི་ཡིན་ཞེས་བརྗོད་ན་ཅུང་སྙན་མོ་འདུག་ག
གང་ལྟར་མགོ་འཐོམས་སོང་།
ལགས་སོ་གཞོན་ནུ་ལྷན་ཚོགས་ལ་རྒྱབ་སྐྱོར་དང་ཡིད་རང་སྔགས་བརྗོད་ཡོད།
བོད་མི་རིགས་ཀྱི་དོན་དུ་དཀའ་སྡུག་དང་བློས་གཏོང་ཆེན་པོ་དེ་འདྲ་མི་ཐུབ་ན་ཡང་ནང་ཁུལ་ལ་བཟོད་སྲན་དང་སྤྱི་དོན་ལ་ཧུར་ཐག་བྱེད་རོགས
ལོ་སར་ཡང་བོད་ཀྱི་རིག་གཞུང་ཞིག་རེད། འདི་ལྟར་ལོ་སྟག་པར་ལོ་སར་མེད་ན་བོད་མིས་རིགས་གཞུང་ཞིག་ནུབ་སོང་ན་དེ་ཡང་བསམ་བློ་བཏོང་དགོས་བསྙམ།
ཕྱིར་ན་གཞོན་ནུ་སྔ་ཕྱི་ཀུན་ཏུ་ཡིད་ཆེས་རྒྱབ་སྐྱོར་བྱེད་མྱོང་མོད་་བོད་རང་བཙན་སླར་གསོའི་མ་དངུལ་ཐེབས་རྩ་གསར་འཛུགས་ཆེད་ཞལ་འདེབས་གནང་རོགས་བྱོས་གསུངས་་འོང་ཀྱང་གཉིས་པ་་་དངུལ་དེ་གཞོན་ལྷན་གྱི་ངོས་ནས་བཙན་བྱོལ་བོད་གཞུང་ལ་འབུལ་རྩིས་ཡོད་གསུངས་ག་རེ་བཤད་གི་ཡོད་ནི་རེད་ད་ཡོད་དབུས་བོད་མིའི་སྒྲིག་འཛུག་གོ་ལྟ་་བ་དབུ་མའི་རྗེས་སུ་འབྲང་ཟེར་ནི་རེད་དམ་གཞོན་ནི་རང་ཉིད་ཀྱི་རང་བཙན་ལྟ་བ་དོར་ཟེར་ནི་རེད་ངོ་མ་འགོ་འཐུམ་སོང་་་་་་་་་་་་་་་་་་་་་་་་་་བོད་རང་བཙན་སླར་དསོའི་མ་དངུལ་ཐེབས་རྩ་གསར་འཛུགས་བྱེད་དགོས་པར་དབུས་བཙན་བྱོལ་བོད་མིའི་སྒྲིག་འཛུགས་ཀྱིས་ཁས་ལེན་གྱི་རེད་དམ་ཞེས་པའི་དྲི་བ་འདི་ངས་ཀྱང་དྲི་གི་ཡོད་གལ་སྲིད་ཁས་ལེན་བྱས་རྒྱ་མ་ལ་བདེན་ཁ་སྤྲད་མ་ཡིན་ནམ????????????????????????
ཕྱི་ལོ་གསར་ཚེས་ལ་མི་རོལ་ཞེས་པ་ནི་འགྲིགས་པ་རེད། ང་ཚོས་རྒྱལ་གཅེས་དཔའ་བོ་དང་དཔའ་མོ་ཚོར་མྱ་ངན་གུས་བཏུད་ཞུ་དགོས་ངེས་རེད།
འོན་ཀྱང་བོད་རང་བཙན་སླར་གསོའི་མ་དངུལ་ཞེས་པ་དང་། བོད་རྒྱལ་ཁབ་འཛུགས་སྐྲུན་གྱི་མ་དངུལ་བསྡུ་རུབ། ཅེས་པ་ནི་ཅུང་དགོད་དྲོ་བའི་སྐད་ཆ་རེད།
ད་དུང་དངུལ་དེ་དབུས་བོད་མིའི་སྒྲིག་འཛུགས་ལ་འབུལ་རྒྱུ་ཞེས་པ་ནི་དེ་བས་ཀྱང་དགོད་དྲོ་བའི་སྐད་ཆ་རེད། སྡུག་ཕྱོགས་ནས་བཤད་ན། དབུས་བོད་མིའི་སྒྲིག་འཛུགས་དང་གཞོན་ལྷན་གཉིས་ཉ་ཉུང་མཉམ་བསྲེས་བྱེད་པའམ། ཡང་ན་རྒྱ་ཕྱོགས་ཀྱི་མིག་སྔར་མཐོང་སྣང་གསར་པ་ཞིག་བསྐྲུན་འདོད་རེད།
དེ་ལས་གཞོན་ལྷན་གྱི་མ་འོངས་པའི་ལས་འཆར་ཆེད་མ་དངུལ་བསྡུ་རུབ་ཅེས་བརྗོད་ན་འོས་ཞིང་འཚམས་པ་ཡོད།
ད་ལྟ་ང་ཚོའི་ལས་འགུལ་སྤེལ་ཕྱོགས་དེ་འདྲ་ཡིན་པ་རེད།
ཀུན་སློང་དང་རྒྱལ་ཞེན་ལ་ཡི་རང་ཞུ། ལོ་གསར་རྒྱས་སྤྲོས་མི་གཏོང་བའི་འབོད་སྐུལ་ཞུ་འོས། ཞལ་འདེབས་ཀྱི་དངུལ་གཞུང་ལ་འབུལ་རྩིས་ཡིན་ན་ཐོག་མ་ནས་སྙན་ཞུ་ཕུལ་ནས་གསལ་བོ་བཟོས་ན་ཡག་གི་རེད། གལ་ཏེ་་ལེན་གི་མིན་ཟེར་ན་ཡང་ཅི་བྱེད་ལ་བསམ་བློ་གཏོང་ཆོག་ག
སྒོ་དྲུག་སྐལ་བཟང་ཕུན་ཚོགས་འཁྲབ་དགོས་བསམ་གི་ཡོད་ས་རེད། ལོ་སར་མ་བཏང་ནའང་དེའི་སྐབས་སུ་ཁྱོད་ཚོས་ཞལ་འདེབས་བསྡུ་དགོས་པ་ཅི་ཡོད། ཡང་གོ་སྐབས་ཤིག་རེག་ས་རེད་བསམ་གི་འདུག་གམ།
བོད་རང་བཙན་སླར་གསོའི་མ་དངུལ་ཐེབས་རྩ་གསར་འཛུགས་ཆེད་ཞལ་འདེབས་གནང་རོགས་བྱོས་གསུངས་འདུག་པ་དང་གཅིག
གཉིས་པ་་་དངུལ་དེ་གཞོན་ལྷན་གྱི་ངོས་ནས་བཙན་བྱོལ་བོད་གཞུང་ལ་འབུལ་རྩིས་ཡོད་གསུངས་པར་གཉིས་སུ་དཔྱད་ན་་་བོད་རང་བཙན་སླར་དསོའི་མ་དངུལ་ཐེབས་རྩ་གསར་འཛུགས་བྱེད་དགོས་པར་དབུས་བཙན་བྱོལ་བོད་མིའི་སྒྲིག་འཛུགས་ཀྱིས་ཁས་ལེན་གྱི་རེད་དམ་ཞེས་པའི་དྲི་བ་འདི་རེད།
གལ་སྲིད་་དབུས་བཙན་བྱོལ་སྒྲིག་འཛུགས་ཀྱིས་ངོས་ནས་བོད་རང་བཙན་སླར་གསོའི་མ་དངུལ་ཐེབས་རྩ་གསར་འཛུག་བྱེད་རོགས་བྱེད་ཀྱི་རེད་པས།་ཧཧཧཧཧཧཧཧ
འགོ་མཇུག་མེད་པའི་སྐད་ཆ་འདི་་་་་་་་ཧཧཧཧ
ཞལ་འདེབས་ཞལ་འདེབས་ཟེར་ནས་བསྡུས་བསྡུས་ཀྱིས།
ཞལ་འདེབས་གླེང་དུས་ལྐོག་ཟས་མིག་མདུན་ཤར།
རོགས་སྐྱོབ་རོགས་སྐྱོབ་ཟེར་ནས་འབོད་འབོད་ཀྱིས།
རོགས་སྐྱོབ་གླེང་དུས་ཚོང་དཔོན་མིག་མདུན་ཤར།
ཡིན་དང་ཡིན་་་་རྒྱབ་སྐྱོར་ཡོད་ཆ་ཤེས་ལེན་དང་ལེན་ང་རང་གི་ངོ་ནས་ཨ་སྒོར་༡༠༠༠་ཡོད། དྲྭ་གྲོགས་ཚོ་ཆ་ཤེས་ལེན་རོགས།