བོད་
དྷ་རམ་ས་ལ་ནས་སླར་ཡང་སྙན་ངག་གི་ཁྲོམ་ར་གསར་པ་ཞིག་ཉམས་ཆུང་གིས་སྒོ་འབྱེད་བྱས་ཤིང་། སེམས་ཤུགས་ཅན་སྐོར་ཞིག་གིས་སྣེ་འཁྲིད་དེ་སྙན་ངག་གྱེར་འདོན་དང་། སྙན་ངག་སྒྲོག་སྦྱོང་། སྙན་ངག་འཁྲབ་སྟོན། སྙན་ངག་འཛིན་སྐྱོང་། སྙན་ངག་ཉོ་ཚོང་གི་ལས་འགུལ་སྤེལ་ཞིང་། སྙན་ངག་ལ་དགའ་མཁན་སྐོར་ཞིག་གིས་ཀྱང་དེ་ལ་རམ་འདེགས་བྱས་ཏེ། སྙན་ངག་གི་བགྲོ་གླེང་ཚོགས། སྙན་ངག་གི་གཏམ་བརྗོད་འཁྲབ། སྙན་ངག་གི་གློག་བརྙན་བཟོས། སྙན་ངག་གི་གསར་འགྱུར་སྤེལ་ཏེ་རྩ་དོན་འཐབ་རྩོད་ཅིག་ལ་སྙན་ངག་གིས་ཁ་གཏད་ལྕོག་རྒྱུར་སྟ་གོན་བྱེད་ཀྱིན་ཡོད།
དུས་རབས་སྔ་མའི་ལོ་རབས་བརྒྱུད་ཅུ་དང་དགུ་བཅུའི་ནང་དུ་དཔལ་དོན་གྲུབ་རྒྱལ་གྱི་ལང་འཚོའི་རྦབ་ཆུས་བཙན་བྱོལ་སྤྱི་ཚོགས་ནང་སྙན་ངག་གི་གསར་བརྗེ་བསླངས་ཏེ། “མཚར་སྡུག་འོད་སྟོང་འབར་བའི་སྔོན་ཆད་ཀྱིས་ད་ལྟའི་ཚབ་བྱེད་མི་རུང་ལ། བ་ཚྭའི་དྲི་དང་འགྲོགས་པའི་ཁ་སང་གིས་དེ་རིང་གི་སྐོམ་པ་ག་ལ་སོད། རྙེད་པར་དཀའ་བའི་ལོ་རྒྱུས་ཀྱི་བེམ་པོའི་ལུས་པོ་ལ། དུས་དང་མཐུན་པའི་སྲོག་གི་དབང་བོ་མ་ཞུགས་ན། ཡར་རྒྱས་ཀྱི་འཕར་རྩ་ལྡིང་མི་སྲིད་ལ། སྔོན་ཐོན་གྱི་སྙིང་ཁྲག་རྒྱུ་མི་ཐུབ་ཅིང༌། མདུན་བསྐྱོད་ཀྱི་གོམ་པ་ནི་དེ་བས་ཀྱང་ངོ” ཞེས་སྐད་འབོད་ཡང་ཡང་བརྒྱབ་ཡོད།
འོན་ཀྱང་བར་ལམ་ཞིག་ཏུ་བཙན་བྱོལ་སྤྱི་ཚོགས་དང་སྙན་ངག་གི་བར་ཐག་སྔར་ལས་ཀྱང་ཇེ་རིང་ནས་ཇེ་རིང་དུ་སོང་སྟེ། མི་དགའ་ས་དང་མི་མཐུན་ས་ཐམས་ཅད་སྙན་ངག་པ་རེད་ཟེར་ནས་མཐའ་རུ་སྤྱུགས་ཤིང་། མི་ཤེས་པ་དང་མི་གོ་བ་ཡོངས་རྫོགས་སྙན་ངག་རེད་ཟེར་ནས་གཙང་ཕྱག་བྱས་ཡོད་ཀྱང་། འགྲོ་བ་མི་ཇི་སྲིད་བར་གནས་པ་དེ་སྲིད་དུ་དགའ་སྤྲོའི་དགོད་སྒྲ་ཁོང་བུར་འབྱིན་པའི་གདངས་དབྱངས་ཤིག་དང་། སྐྱོ་གདུང་མིག་ཆུ་འོད་དུ་འཚེར་བའི་རླབས་རྒྱུན་ཞིག་དུས་ནམ་ཡང་འཇགས་མི་སྲིད་པ་བཞིན། སྙན་ངག་པ་དང་སྙན་ངག་ཀྱང་མིའི་སྤྱི་ཚོགས་དང་ཁ་མི་འབྲལ་བར་འཚང་ནས་ཡོང།
ན་ནིང་དང་ད་ལོ་སླར་ཡང་བཙན་བྱོལ་སྤྱི་ཚོགས་ཀྱི་ས་གནས་ཁག་ཅིག་ནང་སྙན་ངག་གི་རང་སྐྱོང་འོས་ལངས་ཤིག་བྱུང་དང་འབྱུང་བཞིན་འདུག་ལ། དེ་དག་ཁྲོད་སྙན་ངག་གི་རང་བཙན་འབོད་སྒྲ་སྒྲོག་མཁན་ཡང་རེ་གཉིས་ཐོན་དང་འཐོན་བཞིན་འདུག འདི་ནི་བཙན་བྱོལ་བོད་མིའི་སྤྱི་ཚོགས་ཁྲོད་སྙན་ངག་གི་གསར་བརྗེ་འོས་ལངས་ཐེངས་གཉིས་པ་དེ་ཡིན་ལ། ས་བྱི་ཞི་རྒོལ་ཆེན་མོ་དང་ཡུལ་ཤུལ་ས་འགུལ་ཆེན་མོས་བོད་ཕྱི་ལོགས་སུ་སྙན་ངག་གི་སེམས་ཁམས་ངང་གིས་བསྐྲུན་ཏེ། རྩོམ་པ་པོ་ཐེའུ་རིང་ལགས་ཀྱི་ཁྲག་ཡིག་གིས་བཙན་བྱོལ་བོད་མིའི་སྙན་ངག་གི་རྨི་ལམ་ཁད་ཀྱིས་དཀྲོགས་ཡོད།
བོད་པའི་མཁས་དབང་ཞིག་ཞིག་གིས། སྙན་ངག་ནི་དགའ་སྐྱོ་ཆགས་སྡང་ཁོང་ནས་རྡོལ་བའི་རླབས་དང་། རང་བྱུང་ལྷུན་གྲུབ་གདངས་སུ་འཕོས་བའི་དབྱངས། ཡིད་ཀྱི་མཚོ་མོ་སྐྱོམ་བྱེད་བསྐལ་བའི་རླུང་། བརྗོད་འདས་ཞིང་དུ་རྣམ་ཤེས་འཕོ་བའི་ལམ་ཡིན། ཞེས་གསུངས་པ་ལྟར། སྙན་ངག་ལ་དུང་བའི་མི་རིགས་འདི་དང་། སྙན་ངག་གིས་བཟི་བའི་མི་རབས་འདིས་རྒྱ་ནག་གི་མེ་མདའ་དང་ལྕགས་སྒྲོག་གི་སོ་བར་ནས་ཀྱང་ཁྲག་གིས་སྙན་ངག་བྲིས། མིག་ཆུས་སྙན་ངག་བྲིས། ཚེ་སྲོག་གིས་ཀྱང་སྙན་ངག་བྲིས་ཏེ། མིའི་རིགས་ཀྱི་བདེན་དོན་དང་སྙན་ངག་གི་རང་དབང་རྩོད་ཀྱི་ཡོད།
བོད་ནང་གི་སྙན་ངག་པས་ད་ཆར་བྱེས་སུ་སྨྱུག་ཁ་གཏད་དེ། “རུས་རྐང་དུ་རྩམ་དྲི་བོར་བའི་དབུས་གཙང་པ་ཚོ། བསམ་བློར་མུ་གེ་ཐེབས་པའི་ཁམས་པ་བ་ཚོ། ནང་འཁྲུག་གི་གཏམ་རྒྱུད་གྱེར་བའི་མདོ་སྨད་པ་ཚོ” ཞེས་ཚ་འདྲི་མཚང་འབྱིན་བྱས་ཤིང་། “ཨ་རིའི་རང་བཙན་བསྒྲགས་གཏམ་འདྲ་བའི། ཧིན་རྡིའི་རང་སྲིད་རང་སྐྱོང་ལྟ་བུའི། ཧྥེ་གླིང་གི་མི་ནག་བཅིངས་གྲོལ་ལྟ་བུའི་ཡིག་འདྲི་གཉིས་ཀྱི་ཚ་འདྲི་སློང་གིན་འདུག རྟུལ་ཕོད། དཔའ་མཛངས། བྲན་གཡོག གཉའ་གནོན། བཙན་པོའི་རལ་གྲུ་ཐོགས་དང་བདག་གི་གདོང་དམར་བ ”ཞེས་འབོད་སྒྲ་ཤུགས་ཀྱིས་བསྒྲགས་ཏེ། ད་ཆར་ངྷ་རམ་ས་ལའི་ཆབ་སྲིད་པ་ཚོས་ཀྱང་སྙན་ངག་གི་གཏམ་བཤད་ཆལ་ཆོལ་རེ་གནང་སྟེ། སྙན་ངག་པར་ཡི་རངས་བཅོས་མ་རེ་སྟོན་མགོ་བརྩམས་ཡོད།
