སློབ་ཁྲིད་གསལ་བསྒྲགས།

སེར་བྱེས་མཁས་སྙན་གྲྭ་ཚང་གི་གོ་སྒྲིག་འོག ཕྱི་ལོ་༢༠༡༠ ལོ་ནས་བཟུང་ཕྱོགས་མཐའ་ཁག་གི་སློབ་གྲྭའི་ལོ་རེའི་གུང་སེང་དང་སྟབས་བསྟུན།  བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་ཆེད།  སུམ་རྟགས་དག་གསུམ་གྱིས་གཙོས་རིག་གནས་འཆད་ཁྲིད་དང་། ནང་ཆོས་ངོ་སྤྲོད་ཀྱི་སློབ་ཚན་སློབ་ཁྲིད། གཞན་ཡང་དབྱིན་སྐད་ཐོག་ནང་ཆོས་ངོ་སྤྲོད་དང་། བགྲོ་གླེང་དང་འབྲེལ། སློབ་ཚན་ཐོན་མཚམས་སུ་ཕྱག་ཁྱེར་ཞིག་ཀྱང་འབུལ་རྒྱུའི་ལས་གཞི་ཞིག་སྔར་ལོ་ནས་གོ་སྒྲིག་ཞུ་མུས་ལྟར། འདི་ལོ་ཡང་ཕྱི་ལོ་༢༠༡༢ ཕྱི་ ཟླ་༡ ཚེས་༢༠ ནས་བཟུང་འཛིན་གྲྭ་འགོ་འཛུགས་ཀྱིས། སེར་བྱེས་དགེ་བཤེས་སྐལ་བཟང་ཨེ་ལགས་མཆོག་ནས་འཛིན་གྲྭ་དྲུག་པ་ཡན་ཆད་ལ་སུམ་ རྟགས་དག་གསུམ་དང་། དྲུག་པ་མན་ཆད་ལ་ཡིག་གཟུགས་ཀྱིས་གཙོས་རང་བློ་དང་མཚམས་པའི་སློབ་ཚན་སློབ་ཁྲིད་དང་།   རྒན་བྱམས་པ་ཆོས་གྲུབ་ལགས་ནས་ནང་ཆོས་དང་། རིགས་ལམ་བཅས་འཆད་ ཁྲིད། སེར་བྱེས་སྐད་སྒྱུར་སྡེ་ཚན་ནས་དབྱིན་སྐད་ཐོག་ནང་ཆོས་ངོ་སྤྲོད་དང་། བགྲོ་གླེང་གནང་རྒྱུ་ཡིན་ཞིང་། ལས་རིམ་གོ་སྒྲིག་དང་། སྤྱི་ཡོངས་བལྟ་རྟོགས་འགན་འཛིན་པ་རྒན་ཚེ་དབང་ལགས་ནས་གནང་གཏན་འཁེལ་བས།  ཕྱོགས་མཐའ་ཁག་གི་སློབ་ཕྲུག་རྣམས་ཀྱིས་དབུས། ས་གནས་སློབ་གྲྭ་ཁག་གི་སློབ་ཕྲུག གཞན་ཡང་རིག་གནས་ལ་དོན་བརྩོན་ཅན་གྱི་གཞོན་སྐྱེས་སྐྱ་སེར་ཕོ་མོ་སུ་ཞིག་ནས་ འཛུལ་ཞུགས་བྱེད་འདོད་ཡོད་ཚེ་ཕྱི་ལོ་༢༠༡༢ ཟླ་བ་༡ ཚེས་༡༨ ནང་ཚུན་སེར་བྱེས་ཕྱག་མཛོད་ཁང་དུ་ཐོ་འགོད་གནང་ཟིན་པ་དགོས་རྒྱུ་མ་ཟད།     སློབ་ཕྲུག་རྣམས་སློབ་ཚན་ཡོད་སྐབས་མ་གཏོགས། འདི་ག་གྲྭ་ཚང་ནས་བདག་སྐྱོང་དང་འགན་ལེན་བྱེད་རྒྱུ་མིན་པ་བཅས་ཀྱི་གསལ་བསྒྲགས་སུ། སེར་བྱེས་མཁས་སྙན་གྲྭ་ཚང་ཕྱག་མཛོད་ཁང་ནས་༢༠༡༡  ཟླ་ ༡༡ ཚེས་༡༧  ལ།

 གསལ་བཤད། ( གོང་གི་གསལ་བསྒྲགས་དེའི་ནང་གི་ཡི་གེ་ནག་འབུར་བཟོས་ཡོད་པ་དག སེར་བྱེས་མཁས་སྙན་གྲྭ་ཚང་ཕྱག་མཛོད་ཁང་ནས་ ༢༠༡༡ ཟླ་ ༡༡ ཚེས་ ༢༡ ཉིན་གསལ་བསྒྲགས་འདི་ལ་བསྐྱར་དུ་ཁ་སྣོན་དག་བསྒྲིགས་གནང་སྟེ་འབྱོར་བ་ཡིན་སྟབས།  བོད་ཀྱི་དུས་བབ་ཚགས་པར་སྤྱིའི་འདོན་ཐེངས་ ༥༣༧ སྟེང་བཀོད་ཟིན་པའི་གསལ་བསྒྲགས་ལའང་དེ་ལྟར་ངོས་འཛིན་ཡོང་བའི་དགོངས་འཇགས་འཚལ། )