ཁ་སང་འཇར་མན་དུ་རྒྱ་སོག་མི་རིགས་དང་དམངས་གཙོའི་གནད་དོན་སྐོར་གྱི་ཚོགས་འདུ་ཞིག་ཚོགས་ཏེ། རྒྱལ་སྤྱིའི་ཐོག་ལྷོ་སོག་པོའི་གནས་སྟངས་ཐད་དོ་སྣང་ཡོང་ཐབས་ལ་བགྲོ་གླེང་གནང་འདུག
ཟླ་འདིའི་ཕྱི་ཚེས་ ༢༡ ཉིན་ལྷོ་སོག་པོའི་མི་དམངས་ཚོགས་པ་དང་ཡུ་རོབ་ཀྱི་བོད་སོག་ཡུ་རྒྱ་བཞིའི་མཛའ་འབྲེལ་ཚོགས་པ་གཉིས་ཀྱི་གོ་སྒྲིག་འོག འཇར་མན་གྱི་ཀོ་ལོ་ནའེ་མངའ་སྡེའི་གྲོང་ཁྱེར་ལིས་ཝར་ཁའོ་སིན་དུ་རྒྱ་སོག་མི་རིགས་དང་དམངས་གཙོའི་གནད་དོན་བགྲོ་གླེང་ཚོགས་འདུ་ཞེས་པ་ཚོགས་ཡོད་པ་དང་། ཚོགས་འདུའི་མཛད་སྒོའི་ཐོག་བཙན་བྱོལ་བོད་མིའི་སྒྲིག་འཛུགས་ཀྱི་ཡུ་རོབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་ཀྱིས་༸གོང་ས་མཆོག་གིས་ཚོགས་འདུར་བསྩལ་བའི་ཕྱག་ཡིག་སྒྲོག་སྦྱང་གནང་ཡོད་པ་རེད། ཚོགས་འདུའི་སྟེང་ལྷོ་སོག་པོའི་མི་དམངས་ཚོགས་པའི་ཚོགས་གཙོ་ཞིས་ཧའེ་མིན་དང་། འཛམ་གླིང་ཡུ་གུར་འཐུས་ཚབ་ཚོགས་པའི་དྲུང་ཆེ་ཏའོ་ལིས་ཧྲིན། རྒྱ་ནག་དམངས་གཙོ་ཚོགས་པའི་ཚོགས་གཙོ་ཧྥའེ་ལིང་ཡུང་། སྤྱི་དམངས་སྟོབས་ཤུགས་རྩ་འཛུགས་གནང་མཁན་ཡཱང་ཅན་ལིས་བཅས་ཀྱི་གཏམ་བཤད་གནང་ཡོད་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་དང་གནོད་འཚེ་ཕོགས་ཡུལ་མི་རིགས་མཐུན་ཚོགས་ཀྱི་འགན་འཛིན་སྒྲེ་ལའོ་སི་(Delius)ལགས་ཀྱིས་ཚོགས་འདུ་དེར་རྒྱབ་སྐྱོར་གྱི་གཏམ་བཤད་སྤེལ་ཡོད་འདུག
ལྷོ་སོག་པོའི་མི་དམངས་ཚོགས་པའི་ཚོགས་གཙོ་ཞིས་ཧའེ་མིན་གྱིས། ད་ལོ་ཕྱི་ཟླ་ ༥ པའི་ནང་ལྷོ་སོག་པོའི་ཁུལ་དུ་གཞི་རྒྱ་ཆེ་བའི་མི་མང་གི་ངོ་རྒོལ་ལས་འགུལ་བྱུང་བ་ནས་བཟུང་། འཛམ་གླིང་ཐོག་ལྷོ་སོག་པོའི་གནད་དོན་ཐད་དོ་སྣང་གནང་མཁན་ཇེ་མང་དུ་འགྲོ་བཞིན་ཡོད་པ་དང་། ཐེངས་འདིའི་བགྲོ་གླེང་ཚོགས་འདུ་བརྒྱུད་ནས་རྒྱལ་སྤྱིའི་སྤྱི་ཚོགས་དང་འཛམ་གླིང་མི་མང་གིས་སྔར་ལས་ལྷག་པར་ལྷོ་སོག་པོའི་གནས་སྟངས་ཤེས་རྟོག་ཡོང་བ་དང་། ལྷོ་སོག་པོའི་མི་དམངས་ཀྱིས་རྩོད་ལེན་གནང་བཞིན་པའི་སོག་པོ་མི་རིགས་ཀྱི་རིག་གནས་དང་རང་བྱུང་རྩྭ་ཐང་སྲུང་སྐྱོབ། མི་རིགས་ཀྱི་བདག་དབང་དང་དམངས་གཙོའི་ལས་འགུལ་བཅས་ལ་རྒྱབ་སྐྱོར་གནང་རྒྱུར་རེ་སྐུལ་ཞུས་ཡོད་འདུག
ཐེངས་འདིའི་བགྲོ་གླེང་གི་གླེང་གཞི་གཙོ་བོ་ནི་སོག་པོ་མི་རིགས་ཀྱི་རིག་གནས་དང་ལོ་རྒྱུས། དེང་དུས་དཔལ་འབྱོར་འཕེལ་རྒྱུས་ཁྲོད་སོག་པོའི་སྐྱེས་ཁམས་ཁོར་ཡུག་གི་ཉམས་ཆག དེ་བཞིན། ད་ལྟའི་རྒྱ་དམར་གྱི་མི་སེར་དབང་སྒྱུར་གྱི་སྲིད་ཇུས་འོག་སོག་པོའི་རིག་གནས་དང་ཆོས་ལུགས་དད་མོས་རང་དབང་གི་གནས་སྟངས། ཉེ་ཆར་འཛམ་གླིང་སྟེང་འབྱུང་བཞིན་པའི་དམངས་གཙོའི་ལས་འགུལ་གསར་བའི་ཁ་ཕྱོགས་བཅས་ཀྱི་སྐོར་ལ་བགྲོ་གླེང་གནང་ཡོད་འདུག
གསར་འགོད་པ། ཚེ་རིང་རྒྱལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
འཆམ་མཐུན་གྱིས་འཁྲུག་རྩོད་ཞི་ཞིང་རང་རང་གི་འདོད་དོན་གེགས་མེད་འགྲུབ་པའི་སྨོན་འདུན་གྲངས་མེད་ཡོད། དེ་མིན་བོད་མི་མང་པོ་ཞིག་ཤི་འགྲོ་ས་རེད།
འདི་འདྲ་བའི་ཚོགས་འདུ་ལ་རྒྱབ་སྐྱོར་ཡོད་པར་མ་ཚད་ད་དུང་ཕྱོགས་གང་ས་ནས་འདི་འདྲ་ལ་འབད་རྩོལ་བྱས་ནས་བོད་སོག་ཡུ་རྒྱའི་མི་རིགས་འཆམ་མཐུན་དང་ཁོར་ཡུག་སྲུང་སྐྱོབ་སོགས་ལ་ལས་འགུལ་སྣ་མང་སྤེལ་དགོས་པ་གལ་ཆེ་བ་མཐོང་།
ཆབ་བྲག་ཀྱིས་གསུང་པ་ལྟར་རྒྱབ་སྐྱོར་ཡོད།
ད་དུང་མ་འོངས་པ་ཡང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་གོ་སྒྲིག་ཀྱིས་འདི་འདྲ་བའི་མི་རིགས་མཉམ་འབྲེལ་ཚོགས་འདུ་ཚོགས་རྒྱུ་ལ་ཤིན་ཏུ་གལ་ཆེ། འདིས་གྲུབ་འབྲས་ཆེན་པོ་ཐོན་པའི་ཡིད་ཆེས་བྱས་ཆོག
རབ་ཏུ་བྱུང་ན་རྒྱ་སྤྱིའི་མཁས་དབང་ཁག་དང་དམངས་གཙོ་ལ་དགའ་བའི་དྲང་བདེན་ཀྱི་མི་དག་གདན་འདྲེན་ཞུས་ན་ཕན་ནུས་ཐོན་གྱི་རེད་སྙམ།
དམར་གཞུང་གི་དྲག་གནོན་འོག་ཏུ་ཡོད་བའི་མི་རིགས་ཀྱི་མཉམ་འབྲེལ་གྱི་བགྲོ་གླེང་ཚོགས་འདུ་ཞིག་རེད། འདི་ནི་ངོ་མ་གདུང་སེམས་མཉམ་སྐྱེད་ཀྱི་ལས་འགུལ་ཞིག་ཡིན་དུས་ངེས་པར་གླེང་རིན་ཡོད་ཞིག་ཡིན། མ་ཟད་ངེས་པར་འདི་འདྲ་གནང་དགོས་པ་ཞིག་རེད། ཚོགས་པ་འདི་རྒྱ་སྐྱེད་དང་བྱས་ནས་དྲང་བདེན་ཕྱོགས་ལ་ཞེན་གྱི་གལ་ཆེན་པོ་ཡིན་པས་རྒྱབ་སྐྱོར་ཞུ་རྒྱུ་ཡིན།
མི་རིགས་མཉམ་འབྲེལ་གྱི་གདུང་སེམས་མཉམ་སྐྱེད་དང་གནད་དོན་བགྲོ་གླེང་གི་ཚོགས་འདུ་འདི་རིགས་ཧ་ཅང་བཟང། མཉམ་འབྲེལ་ཚོགས་པ་འདི་རྒྱ་སྐྱེད་རྒྱུ་གལ་ཆེན་པོ་རེད། བཀའ་དྲིན་ཆེ་ཞུ་དང་འབྲེལ་མུ་མཐུད་ལས་དོན་རྒྱ་ཆེར་སྤེལ་རྒྱུར་རེ་སྐུལ་དང་རྒྱབ་སྐྱོར་ཞུ།