རེས་གཟའ་ཟླ་བའི་ཉིན་མཉམ་འབྲེལ་རྒྱལ་ཚོགས་ཡེ་ཤུ་ཆོས་ཚོགས་བསྟི་གནས་ཁང་གི་གོ་སྒྲིག་དང་། ཨ་རིའི་སྐུ་ཚབ་དོན་གཅོད་ཁང་དང་བཞུགས་སྒར་ནས་ཆེད་དུ་ཕེབས་པའི་བཀའ་ཟུར་ཀིརྟི་རིན་པོ་ཆེ་མཆོག་བཅས་ཀྱིས་རོགས་འདེགས་འོག ཆོས་ཚོགས་དེའི་ཚོགས་ཁང་དུ་ཁ་ཆེ་དང་ཡེ་ཤུ། རྗེའུ། ཧིན་རྡུ། ནང་བཅས་ཆོས་ལུགས་འདྲ་མིན་གྱི་སྐུ་ཚབ་ལྷན་འཛོམས་གནང་སྟེ། བོད་ནང་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་དག་ལ་མྱ་ངན་གུས་འདུད་ཀྱི་སྨོན་ལམ་ཞིག་ཚོགས་ཡོད་འདུག
སྨོན་ལམ་དབུ་འཛུགས་ཐོག་བསྟི་གནས་ཁང་དེའི་ཆོས་དཔོན་ཁཱ་ཐི་ལེན་སི་ཊོན་(Kathleen Stone)མཆོག་གིས་བོད་མི་སེར་སྐྱ་བཅུ་གཅིག་གིས་འུ་ཐུག་གི་ལམ་ཁ་ཞིག་བདམས་དགོས་བྱུང་བའི་ཁྲོད། འདས་གྲོངས་སུ་ཕྱིན་པ་རྣམས་ཀྱི་ཆེད་དུ་དེ་རིང་འདིར་ཆོས་ལུགས་འདྲ་མིན་གྱི་སྐུ་ཚབ་དང་བོད་མི་ཚོ་མཉམ་ཞུགས་ཀྱིས་སྨོན་ལམ་གནང་གི་ཡོད་པས། བྱེད་སྒོ་འདིའི་ཆ་ཤས་ལེན་མཁན་ཡོངས་ལ་འཚམས་འདྲི་ཞུ་བཞིན་ཡོད་ཅེས་གསུངས་འདུག
སྐབས་དེར་སྐུ་ཚབ་དོན་གཅོད་བློ་བཟང་སྙན་གྲགས་མཆོག་གིས་བོད་ནང་རང་ལུས་མེར་བསྲེགས་གཏོང་མཁན་དག་གི་སྐུ་པར་ཞལ་འབྱེད་ཀྱིས་ཁོང་ཅག་གི་གནས་ཚུལ་ངོ་སྤྲོད་དང་། བཀའ་ཟུར་ཀིརྟི་རིན་པོ་ཆེ་མཆོག་གིས་ཆོས་ལུགས་ཁག་གི་སྐུ་ཚབ་རྣམ་པས་བོད་ནང་བདེན་དོན་འཐབ་རྩོད་ཆེད་རང་ལུས་མཆོད་འབུལ་གནང་མཁན་དག་ལ་མྱ་ངན་གུས་འདུད་ཀྱི་སྨོན་ལམ་གསུངས་པར་ཐུགས་རྗེ་ཆེ་ཞུས་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བཀའ་ཟུར་ཀིརྟི་རིན་པོ་ཆེ་མཆོག་ནི་ཨ་མདོ་ཙམ་མ་ཟད་བོད་མི་ཡོངས་ཀྱི་སྤོབས་པ་བྱེད་འོས་པའི་ཆེས་བོད་བརྒྱུད་ནང་བསྟན་གྱི་སྐྱེས་བུ་དམ་པ་ཞིག་དང་། ཡང་སྒོས་༸ གོང་ས་མཆོག་གི་ཐུགས་རྗེའི་ཞབས་འབྲིང་དུ་བོད་མི་རིགས་དང་། བོད་ཀྱི་བསྟན་སྲིད་སླད་སྲི་ཞུ་རྣ་དག་བསྒྲུབས་དང་སྒྲུབ་བཞིན་པའི་དམ་པ་ཞིག་ཡིན།
ཆོས་ལུགས་འདྲ་མིན་གྱི་ཐུགས་སྨོན་མཚམས་སྦྱོར་གནང་བ་སོགས་བཀའ་དྲིན་ཆེ། སྐུ་ཁམས་བཟང་བའི་སྨོན་ལམ་ཞུའོ།
གུ་ཡངས་དང་རྟེན་འབྱུང་གི་ལྟ་གྲུབ་ལ་གཞི་བཅོལ་བའི་སངས་རྒྱས་པའི་ཆོས་ལུགས་ཀྱི་ཕན་ནུས་དར་ཁྱབ་ཧ་ཅང་ཇེ་འཕེལ་དང་ཇེ་རྒྱས་འགྲོ་བཞིན་པའི་སྐབས་འདིར། ང་ཚོས་ཆོས་ལུགས་མི་འདྲ་བའི་ཆོས་བརྒྱུད་འཛིན་མཁན་ཚོ་དང་ལྷན་དུ་འདི་འདྲ་བའི་གདུང་སེམས་མཉམ་བསྐྱེད་ཀྱི་ཚོགས་འདུ་འཚོགས་ཐུབ་པ་ནི་ང་ཚོ་བོད་པའི་རྒྱབ་སྐྱོར་བླ་ན་མེད་པ་ཞིག་དང་། ༧གོང་ས་༧མཆོག་གི་ཆོས་ལུགས་རིས་མེད་ཀྱི་མཛད་འཕྲིན་བསྐྱངས་བའི་གྲུབ་འབྲས་ཞིག་དང་། རྒྱལ་གཅེས་དཔའ་བོ་རྣམས་ཀྱི་སྙིང་སྟོབས་ཀྱི་ཕྱག་རྗེས་བླ་ན་མེད་པ་ཞིག་ཏུ་གྱུར་འདུག་པས། མ་འོངས་པར་ཡང་འདི་འདྲ་བ་འཚོགས་ཐུབ་ན་དགེ་མཚན་ཆེ་བ་མཐོང་།
འདིར་འཛོམས་ཆོས་ལུགས་ཀུན་གྱི་སྐུ་ཚབ་ལ་གུས་འདུད་ཞུའོ།
ཆོས་ལུགས་མི་མཐུན་པ་ཁག་གིས་གདུང་སེམས་མཉམ་སྐྱེད་ཀྱི་སྨོན་ལམ་འདི་འདྲ་ཧ་ཅང་དཀོན། འདི་ནི་རྒྱལ་གཅེས་དཔའ་རྒོད་ཁོང་ཚོའི་འགུགས་ཤུགས་ཁོ་ན་མིན་པར་ཡིད་བཞིན་ནོར་བུས་ད་བར་ལ་ཆོས་ལུགས་རིས་མེད་ཀྱི་དྲང་བདེན་སྐྱོང་བའི་ཕན་ནུས་ཡིན། ད་ལྟ་བོད་ལ་ཚན་རིག་པ་དང་ཆོས་ལུགས་པ་ཁག། ཚབ་སྲིད་པ་ཁག མི་རིགས་ཁག མདོར་ན་ལས་རིགས་འདྲ་མིན་གྱི་མི་སྡེ་སྣ་ཚོགས་ཀྱིས་དོ་སྣང་དང་ཡིད་ཆེས། གདུང་སེམས་མཉམ་སྐྱེད་དང་རོགས་ཕན་ཅི་རིགས་གནང་དང་གནང་བཞིན་པ་འདི་ཀུན་ཡིད་བཞིན་ནོར་བུའི་ཐབས་མཁས་ཐུགས་རྗེ་ཁོ་ནའི་མཐུ་ཅི་ལ་མིན། གང་ལ་གང་འདུལ་དེ་ལ་དེར་སྟོན་པའི་སྤྱན་རས་གཟིགས་དབང་ལ་བསྟོད་དོ། འདུད་དོ། སྐྱབས་སུ་མཆིའོ།
ཡིན་ན་ཡང་ང་རང་ཚོའི་ནང་ན་ཁོང་གི་མཛད་པ་ལ་ཡིད་མ་རངས་པ་དང་འདོད་པ་མ་ཁེངས་པ། ཐ་ན་ལོག་པར་མཐོང་མཁན་མི་ཉུང་བ་ཞིག་ཡོད་པ་མིན་ནམ། དམ་པ་དམ་པར་ངོས་མི་ཟིན་པའི་གླེན་རྟགས་འདི་རིགས་ནམ་ཞིག་ལ་མཇུག་རྫོགས་སམ།
བྱང་ཆུབ་སེམས་མཆོག་རིན་པོ་ཆེ། རྨོངས་པ་མ་ལུས་སད་པར་ཤོག བདེན་པ་མ་ལུས་རྒྱལ་བར་ཤོག དམ་པའི་འགྲོ་དོན་མཐར་ཕྱིན་ཤོག།
སྔོན་བྱུང་མ་མྱོང་བའི་ཆོས་ལུགས་འདྲ་མིན་གྱི་སྐུ་ཚབ་མང་པོ་མཉམ་འཛོམས་ཀྱིས་སྨོན་ལམ་ཞིག་ཚོགས་ཐུབ་པ་ནི་ང་ཚོའི་བོད་མིའི་གཟི་བརྗིད་རེད་ལ། འདས་གྲོངས་སུ་ཕྱིན་ཟིན་པའི་བོད་ཀྱི་དཔལ་བོ་དཔལ་མོ་རྣམས་ཀྱི་ཕྱག་རྗེས་ཡིན་པས། ཁོང་རྣམས་ལ་གདུང་སེམས་མཉམ་བསྐྱེད་དང་ཁོང་རྣམས་ཀྱི་ཕྱག་རྗེས་ལ་ཡིད་རང་མི་བྱེད་པའི་བོད་མི་སུ་ཞིག་ཡོད།
ཡང་ན་གཞུང་འབྲེལ་དང་ཚོགས་པ་གང་རུང་གིས་རྒྱ་གར་གཞུང་ལ་བོད་ནས་ཕེབས་མཁན་ཚོའི་ཆེད་དུ་དམིགས་བསལ་གྱི་ཆོག་མཆན་གང་ཡང་རུང་བ་ཞིག་ཞུ་དགོས་པ་རེད། གང་ལྟར་བོད་ནས་ཕེབས་མཁན་ཚོར་ཡིད་ཆད་དུ་མ་འཇུག
བོད་ནས་ཕེབས་མཁན་རྣམ་པས་གཅིག་ནས་སྐད་མ་གོ གཉིས་ནས་ས་མཚམས་ཁག་ཏུ་དངུལ་ཁྱེར་སྟངས་སོགས་མ་མཁྱེན་པའི་དབང་གིས་ཁ་ཤས་ཀྱིས་རྒྱ་གར་གྱི་ཤོག་དངུལ་ལྔ་བརྒྱ་དང་སྟོང་ལོ་མང་པོ་ཁྱེར་ནས་ས་མཚམས་ནས་རྒྱ་བལ་གྱི་ཉེན་རྟོགས་པས་འཕྲོག་བཅོམ་བྱེད་པ་དང་། ཁག་ཅིག་གིས་བལ་ཡུལ་ནང་ནས་དངུལ་བརྗེས་རྒྱུ་མ་རགས་པར་རྒྱ་བལ་གྱི་ས་མཚམས་སུ་སླེབས་སྐབས་བལ་ཡུལ་གྱི་མི་རྣམས་ཀྱི་ལག་ནས་དངུལ་བརྗེས་ནའང་། ཚུར་ལྔ་བརྒྱ་དང་སྟོང་ལོ་སྤྲད། དེ་ཁྱེར་ནས་ས་མཚམས་ཀྱི་འགག་སྒོར་སླེབས་སྐབས། ཉེན་རྟོག་པས་བསྔོགས་གཤེར་བྱས་ནས་མཐོང་ན་འཕྲོག་བཅོམ་བྱས། དེ་ཡང་དངུལ་བརྗེས་ས་དང་ས་མཚམས་ཀྱི་ཉེན་རྟོག་པ་ཁོག་སྡོངས་ནས་འཕྲོག་བཅོམ་བྱས་པའི་གནས་ཚུལ་ཐབས་སྡུག་དེ་འདྲའང་འབྱུང་བཞིན་པ་རེད། ཡང་བོད་ནས་ཕེབས་མཁན་ཁག་ཅིག་གིས་བོད་ནས་ཕེབས་སྐབས་འབྲེལ་ཡོད་སོ་སོས་༧གོང་ས་༧སྐྱབས་མགོན་རིན་པོ་ཆེར་བསྔོ་རྟེན་དང་སྐྱབས་རྟེན་བསྐུར་བཞག་པ་དེ་ཚོ་རྒྱ་ནག་གི་དངུལ་རང་བརྗེས་བོ་མ་རྒྱབ་པར་ཁྱེར་ནས་དེ་ཡང་ས་མཚམས་ནས་ཉེན་རྟོག་པས་འཕྲོག་བཅོམ་བྱས་བཞག་པ་དེ་འདྲ་འདུག གོ་ཐོས་ལྟར་ན་ཉེ་ཆར་རང་ཕ་ཡུལ་མདོ་སྨད་ཕྱོགས་ནས་ཡིན་པའི་ཨ་མ་ཞིག་གི་ལག་ནས་རྒྱ་མིའི་སྒོར་མོ་ཁྲི་གཅིག་ས་མཚམས་ནས་ཉེན་རྟོག་པས་བཅོམ་འདུག་ཟེར་པ་སོགས་ཐབས་སྐྱོ་བོའི་གནས་ཚུལ་བྱུང་དང་འབྱུང་བཞིན་པ་རེད། དེས་ན་བཙན་བྱོལ་བོད་མིའི་སྒྲིག་འཛུགས་སམ་ཡང་ན་ཚོགས་པ་སྤྱི་སྡུག་གང་རུང་གིས་འདི་ཚོའི་ཐོག་ཐུགས་འགན་བཞེས་ནས་བོད་ནས་ཕེབས་མཁན་རྣམ་པའི་དཀའ་ངལ་སེལ་བའི་ཐབས་ཤེས་རེ་ཡོད་ན་འདོན་རན་པའི་དུས་ལ་སླེབས་འདུག
རྐྱང་ཕྲུག་གི་ཟིན་བྲིས་ལས་བཤུས།
གོ་སྒྲིག་གནང་མཁན་དང་། རོགས་མགོན་མཛད་མཁན། མཉམ་ཞུགས་གནང་མཁན་ཚང་མར་བཀའ་དྲིན་ཆེ་ཞུ་རྒྱུ་དང་།
སླད་མར་ཡང་བོད་དང་བོད་མི་རྣམས་ཀྱི་དཀའ་སྡུག་དང་ཉག་ཕྲའི་གནས་སྟངས་སོགས་ཐུགས་བརྩེ་བས་གཟིགས་ཏེ། མགོན་དང་སྐྱབས་དང་དཔུང་གཉེན་མཛད་པར་མཛོད་ཅིག་ཅེས་རེ་འབོད་ཀྱང་ཞུ་བར་ཐལ་ལོ།།
དོན་སྙིང་ལྡན་པའི་ལས་འགུལ་འདི་ལ་སྙིང་ནས་བཀའ་དྲིན་ཞུ།