མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

གླུ་དབྱངས་བརྙན་འཁོར་འགར་བལྟས་རྗེས་ཀྱི་སེམས་ཚོར།

བོད་ཀྱི་དུས་བབ།
༢༠༡༡/༡༡/༢༧
Share on FacebookShare on TwitterShare on EmailShare on Whatsapp

༼ སྙིང་དབུས་ནས་གངས་ཅན་གྱི་གླུ་བ་དང་གླུ་མ་རྣམས་ལ་རྗེས་དྲན་དུ་ཕུལ༽

ཆབ་མདོ་ངག་དབང་ཕུན་ཚོགས།  

“ བོད་གངས་ཅན་ནི་གླུ་གར་གྱི་རྒྱ་མཚོ་ཞིག་ཡིན” ཞེས་བཤད་སྲོལ་ཡོད་པ་ལྟར། དེང་སྐབས་བོད་གངས་ཅན་ལྗོངས་སུ་གླུ་གར་ལ་མཁས་པ་བགྲང་ལས་འདས་པ་ཞིག་འཚར་ལོངས་བྱུང་དང་འབྱུང་བཞིན་ཡོད་ལ། དེ་དག་ཁྲོད་སྐད་ངག་སྙན་པོ་དང་ཚིག་དོན་ཟབ་མོ་ཡོད་མེད་ལ་མ་ལྟོས་པར་སོ་སོའི་སེམས་ཀྱི་འདུན་མ་དང་མ་འོངས་པའི་རེ་བ་མཚོན་པའི་གླུ་གཞིས་ཀྱི་བརྙན་འཁོར་ཡང་དུ་མ་ཞིག་འགྲེམས་སྤེལ་བྱེད་བཞིན་འདུག ལྷག་པར་དུ་གཞས་ལུས་རྒྱ་ཆེ་མི་མང་ལ་མཚོན་ན། རྒྱ་དམར་གྱི་གདུག་རྩུབ་དྲག་སྤྱོད། གཉའ་གནོན་དང་བརྙས་བཅོས་འོག་མི་ལོ་དྲུག་ཅུར་ཉེ་བ་བསྐྱལ་ཞིང་། ལྷག་པར་དུ་ “རིག་གནས་གསར་བརྗེ”ཟེར་བ་སོགས་ཀྱི་སྐབས་སུ། བོད་མི་རིགས་ཀྱི་ཆོས་དང་རིག་གཞུང་སྐད་ཡིག་སོགས་ཆེས་རྗེས་ལུས་དང་། ཆེས་མུན་ནག་ཡིན་རབས་བརྗོད་དེ་འཇམ་རྩུབ་གཉིས་ཐོག་ནས་ཁྱབ་བསྒྲགས་དང་ལག་བསྟར་བྱས་ཡོད་ཀྱང་། གཞིས་ལུས་མི་མང་གི་ལྷག་བསམ་དང་སྙིང་སྟོབས་ཉམས་པ་མེད་པར་བོད་པའི་སྐད་ཡིག་རིང་གཞུང་སྲུང་སྐྱོབ་དང་རྒྱུན་འཛིན་བྱས་ཡོད་ལ། འཛམ་གླིང་གི་ཆབ་སྲིད་འཕོ་འགྱུར་དང་བསྟུན་ཏེ་བོད་ནང་དུའང་སྲིད་ཇུས་ཕྲན་བུ་གུ་ཡངས་ཕྱིན་པ་དང་བསྟུན། གཞིས་བཞུགས་མཁས་དབང་བགྲེས་སོང་འགས་བོད་མི་རིགས་ཀྱི་སྐད་ཡིག་སྲུང་སྐྱོབ་ཆེད་ཡོད་ཚད་བློས་གཏོང་གིས་ཕྱག་རྗེས་རླབས་ཆེན་བཞག་ཡོད།

རྒྱ་གཞུང་གི་དྲག་རྩུབ་ཀྱི་སྲིད་བྱུས་དེ་རིམ་གྱིས་བོད་པའི་དགོན་སྡེའི་ཐོག་བསྐོར་ཏེ། མདོ་དབུས་ཁམས་གསུམ་གྱི་དགོན་སྡེ་ཁག་ཏུ་རྒྱལ་གཅེས་ཆོས་གཅེས་ཀྱི་སློབ་གསོ་སྤྲོད་དགོས་ཚུལ་བརྗོད་དེ། བོད་མི་རིགས་ཀྱི་ཁོག་པའི་སྙིང་དང་དཔྲལ་བའི་མིག་ལྟ་བུའི་༧གོང་ས་ཡིད་བཞིན་ནོར་བུའི་སྐུ་དཔར་ཙམ་ཡང་བཞུགས་མི་ཆོག་པ་དང་། ཁོང་ལ་གསོལ་འདེབས་ཙམ་ཡང་ཞུ་མི་ཆོག་པའི་བཙན་དབང་གིས་ཁྲིམས་ལུགས་བཟོས་ཏེ། བོད་མི་མང་པོ་དམར་གསོད་དང་བཙོན་འཇུག་གིས་ཉིན་མཚན་གཉིས་ཀར་འཇིགས་སྐྲག་གིས་འཚོ་བ་སྐྱེལ་དགོས་བྱུང་ཡོད་ཀྱང་། བོད་ནང་གི་གླུ་བ་གླུ་མ་ཚོའིི་སྙིང་སྟོབས་ལ་འགྱུར་བ་མེད་པར་མངོན་གསལ་འདོད་པོའི་ཐོག་ནས་༸རྒྱལ་བ་རིན་པོ་ཆེ་མཆོག་སྐུ་ཚེ་བརྟན་པའི་གསོལ་འདེབས་དང་། གཞིས་བྱེས་མཉམ་འཛོམས་ཡོང་བའི་སྨོན་ལམ། བོད་མི་རིགས་ཀྱི་ལས་དབང་དང་འབྲེལ་བའི་སྐྱོ་གདུང་སོགས་གདངས་སུ་གྱེར་ཏེ། མི་མང་ལ་དྲན་སྐུལ་དང་བསླབ་བྱ་གནང་བ་འདི་ཅི་འདྲའི་བསྟོད་བསྔགས་ཞུ་འོས་པའི་རླབས་ཆེན་གྱི་ལས་དོན་ཞིག་རེད་ཨང་།

ངས་བརྙན་འཁོར་དེ་དག་ལ་ཡང་ཡང་ཞིབ་ལྟ་བྱས་པའི་རྒྱུད་རིམ་ཁྲོད་ཚོར་སྣང་ཟབ་མོ་ཞིག་དང་འབྲེལ་བསམ་ཚུལ་ཐུང་ཙམ་ཞིག་གླེང་འདོད་བྱུང་སོང་། ཕ་ཡུལ་གངས་ལྗོངས་ཀྱི་གླུ་བ་གླུ་མ་ཚོ་དེ་དག་གི་དབྱངས་རྟ་སྙན་མོའི་འགྱུར་ཁུག་རེ་རེ་ངའི་རྣ་བའི་བུ་གར་འཛུལ་བ་དང་། ལུས་ཀྱི་ཉམས་འགྱུར་གཞས་ཚིག་གི་ནང་དོན་དང་མཐུན་པར་སྟངས་སྟབས་བསྒྱུར་དུས། སེམས་ཀྱི་རྟ་ཕོ་དབུགས་རྒྱུན་ཆད་ལ་ཉེ་བར་གསོན་ཤུགས་གསར་པའི་ངར་ཆུ་བླུད་པ་དང་ཀུན་ནས་མཚུངས་བར་སེམས་ཁུངས་སུ་རེ་བ་གསར་པའི་གཟུགས་རིས་གསོན་པོ་ཞིག་བསྐྲུན་སོང་། གངས་ཅན་གྱི་གླུ་པ་དང་གླུ་མ་རྣམས། ཁྱེད་རྣམས་བཀའ་དྲིན་ཤིན་ཏུ་ཆེ།

ཁྱེད་ཅག་གིས་དབྱངས་རྟ་སྙན་མོར་དྲངས་པའི་ཚོར་ཤུགས་དྲག་པོའི་ཉམས་འགྱུར་དང་། ཚིག་དོན་ཟབ་མོར་བསྡུས་པའི་ལ་ཞེན་ཆེན་པོའི་གདོང་མདོག་དེ་དག་ལས། ཁྱེད་རྣམ་པའི་སེམས་ཁོངས་སུ་གང་ཞིག་སྒོམ་ནས་སྙན་མོ་གླུ་ཡི་མཆོད་པ་འབུལ་བཞིན་ཡོད་པ་ང་ཚོས་ཚོར་ཐུབ་ཀྱི་འདུག་ལ། ད་ལྟའི་བོད་མི་རིགས་ཀྱི་ལས་དབང་ལ་སེམས་གསོ་དང་སྐུལ་འདེད། བོད་མི་རིགས་ཀྱི་མ་འོངས་པའི་སོན་རྩའི་ན་གཞོན་རྣམས་ལ་དྲན་སྐུལ་དང་ཁ་བརྡ་བསླབ་བྱ་གནང་གི་ཡོད་པའང་ང་ཚོས་རྟོགས་ཐུབ་ཀྱི་འདུག གངས་ལྗོངས་ལ་མཛེས་སྡུག་དང་དཔྱད་དཔལ་སྐྲུན་མཁན་གླུ་བ་གླུ་མ་རྣམས། ཁྱེད་རྣམས་ལ་སྙིང་དབུས་ནས་བཀའ་དྲིན་ཆེ། ང་ཚོའི་མི་རིགས་ཀྱི་རྩ་དོན་འདི་ནི་མི་ཁ་ཤས་ཀྱི་ཁེ་ཕན་དང་ཐོབ་ཐང་ཆེད་གཏན་ནས་མིན་ལ། ང་ཚོའི་འཐབ་རྩོད་ཀྱི་རྩ་དོན་ནི་བོད་མི་རིགས་ཡོངས་རྫོགས་ཀྱི་ལུས་སེམས་ལ་རང་དབང་དང་། འགྲོ་བ་མིའི་ཐབ་ཐང་། མེས་བོ་གོང་མ་རྣམས་ཀྱིས་ངལ་བ་བརྒྱ་ཕྲག་དང་དུ་བླངས་ཏེ་མེད་པ་ནས་ཡོད་པ་དང་ཡོད་པ་ནས་འཕེལ་རྒྱས་སུ་བཏང་བའི་བོད་མི་རིགས་ཀྱི་གཅེས་ནོར་སྐད་ཡིག་རིག་གཞུང་འདི་མི་རབས་ནས་མི་རབས་བར་འཛིན་སྐྱོང་སྤེལ་གསུམ་ཡོང་ཆེད་ཡིན་པ་ལས་མི་རིགས་གཞན་ཞིག་ལ་མཐོང་ཆུང་དང་། དམའ་འབེབས། གཅིག་འོག་གཅིག་བསྡུ་ཡི་དམིགས་ཡུལ་གཏན་ནས་མིན།

བོད་མི་རིགས་འདི་ནི་ཡུན་རིང་གི་ལོ་རྒྱུས་ལྡན་ཞིང་མཐོ་སྒང་ལ་འཚོ་སྡོད་བྱས་ཏེ་ཀྱག་ཀྱོག་གི་འཕྲེང་ལམ་མང་པོ་བརྒྱུད་མྱོང་བའི་བཟོད་སྲན་དང་། དཀའ་སྡུག་ལ་གདོང་ལེན་གྱིས་གཡུལ་ས་ལས་རྣམ་པར་རྒྱལ་བའི་བཙན་པོའི་མི་རིགས་རླབས་ཆེན་ཞིག་ཡིན་ལ། ལྷག་པར་དུ་གོང་བརྗོད་ལྟར་བོད་མི་རིགས་ཀྱང་མི་རིགས་གཞན་ལྟར་སེམས་ལ་རང་དབང་དང་། མི་མང་གི་ཁེ་ཕན་ལ་སྲུང་བརྩི། སོ་སོའི་མི་རིགས་ཀྱི་ཡ་རབས་བཟང་པོའི་གོམས་གཤིས་གཅེས་སྲུང་། མི་རིགས་ཀྱི་ཐུན་མོང་མིན་པའི་ཁྱད་ཆོས་རྣམས་སྲུང་སྐྱོབ་དང་བདག་འཛིན། རང་ས་རང་སྲུང་བཅས་ཀྱི་ཆེད་ཁོ་ན་ཡིན་ཞིང་། ཐོབ་ཐང་དེ་དག་རྩོད་ལེན་ཐུབ་མིན་ནི་བོད་མི་ཡོད་དོ་ཅོག་གི་ཕྲག་ཏུ་བབ་པའི་ལས་འགན་ཡིན་པས། སོ་སོ་བོད་མི་ཡིན་སྙམ་པའི་འདུ་ཤེས་དེ་མ་དོར་བའི་ཐོག་ནས་ཐོབ་ཐང་རྩོད་ལེན་བྱ་དགོས་པ་ལས་མི་རེ་གཉིས་ཀྱི་རྩོད་ཐུབ་པ་ཞིག་གཏན་ནས་མིན།

རང་དབང་དེ་དག་རྩོད་པར་འཇིགས་སུ་རུང་བའི་རྐང་ལམ་ཀྱག་ཀྱོག་དུ་མ་བརྒྱུད་དགོས་པའི་སྔོན་དཔག་བསམ་བློའི་གྲ་སྒྲིག་གིས་བོད་མི་ཡོངས་ཀྱིས་དཔུང་གདང་ཆིག་བསྒྲིལ་བྱས་ཏེ། ད་ནི་འགྱེལ་ས་ནས་ལངས་ཐུབ་པའི་དཔའ་ངར་ཞུམ་མེད་ཀྱིས་འཚེ་མེད་ཞི་བའི་ཐབས་ལམ་ལ་ཡིད་ཆེས་བློས་གཏོང་བྱེད་དགོས་པ་ལས་ལྷོད་གཡེང་དང་ཕྱི་བཤོལ་དང་འཐུས་ཤོར་ཕྲ་མོ་ཙམ་ཡང་འགྲོ་མི་རུང་། ད་ནི་ང་ཚོས་ཕྱི་བཤོལ་དང་འཐུས་ཤོར་ཕྱིན་པ་ཡིན་ན་སླར་མི་རིགས་འདི་བཙན་གནོན་དང་དཀའ་སྡུག་འོག་ནས་ནམ་ཡང་གསོན་ཐབས་མེད་ལ། བུ་རབས་ཚ་རྒྱུད་རྣམས་ཀྱི་མདུན་ལ་ངོ་གནོང་དགོས་པའི་ལོ་རྒྱུས་ནང་ནམ་ཡང་གསབ་ཏུ་མེད་པའི་ནག་ཐིག་འབབ་ངེས་ཡིན། སྤྱིར་མི་རིགས་སོ་སོའི་རང་དབང་དང་ཐོབ་ཐང་འཐབ་རྩོད་བྱེད་ཆོག་པ་ཞིག་དང་། རྩོད་དགོས་པ་ཞིག་ཀྱང་ཡིན་མོད། ང་ཚོའི་འཐབ་རྩོད་བྱེད་སའི་ཁ་གཏད་ལ་གནས་ལུགས་དང་རྒྱུ་མཚན་ཡེ་ནས་བགྲང་ས་མེད་པ་ཞིག་ཡིན་རུང་། ང་ཚོའི་སེམས་ཤུགས་ནམ་ཡང་ཆགས་མི་རུང་ལ། ག་ཚད་ས་ལ་འགྱེལ་དགོས་བྱུང་ཡང་དེ་ཙམ་སླར་འགྲེངས་ཐུབ་པའི་སེམས་ཤུགས་བསྐྱེད་དེ་མདུན་བསྐྱོད་བྱ་དགོས་སོ།། གནས་སྟངས་དེ་དག་ལ་བརྟེན་ནས་གངས་ལྗོངས་ཀྱི་མི་རབས་གསར་པའི་གླུ་བ་གླུ་མ་དེ་དག་གིས་སྙིང་སྟོབས་ཞུམ་པ་མེད་པར། བརྒྱུད་ལམ་སྣ་ཚོགས་ནས་བློས་གཏོང་ཆེན་པོས་བདེན་དོན་གླེང་མཁན་མང་དུ་འགྲོ་བཞིན་ཡོད་ཅིང་། དེ་ནི་རྒྱ་ནག་གི་དྲག་རྩུབ་དང་གཉའ་གནོན། མཐོང་ཆུང་ཅི་ཙམ་བྱས་ཀྱང་གཞན་འོག་ཏུ་མགོ་བོ་མི་སྒུར་བའི་རྣམ་པ་གསལ་པའི་མཚོན་རྟགས་ཤིག་ཀྱང་ཡིན་པས་སོ།

གངས་ཅན་པའི་གླུ་བ་གླུ་མ་དེ་དག་གི་དབྱངས་རྟ་སྙན་མོའི་འགྱུར་ཁུག་རེ་རེ་ནས་བོད་མི་རིགས་ཀྱི་འདས་པའི་ལོ་རྒྱུས་དང་། མ་འོངས་པའི་རེ་བ་མཚོན་པའི་དྭངས་གཙང་ལྷད་མེད་ཀྱི་འདུན་མ་དེ་ལ་ཡི་རངས་མི་ཞུ་མཁན་སུ་ཞིག་ཡོད། གངས་ཅན་གྱི་གླུ་པ་གླུ་མ་རྣམས། ད་དུང་མུ་མཐུད་དུ་བོད་མི་རིགས་ལ་ཕན་པའི་དབྱངས་རྟ་སྙན་པོ་རེ་མཐོང་དང་། གངས་ཅན་པ་རྣམས་གཉིད་ལས་དཀྲོག་པའི་ཕན་ཐོགས་བླ་མེད་དུ་ཆེ་ཞིང་། གླུ་པ་གླུ་མ་ཚོ་ཁྱེད་ཅག་གི་དབྱངས་རྟ་སྙན་པོས་གངས་ལྗོངས་ཀྱི་འདས་གསོན་གཉིས་ལ་དྲན་གསོ་དང་། རྩ་བའི་བླ་མར་བསྟོད་དབྱངས་རེ་འཕུལ་དང་། དེ་ནི་ང་ཚོ་བོད་མི་རིགས་ཡོད་དོ་ཅོག་ལ་གཡོལ་ཐབས་མེད་པའི་ལོ་རྒྱུས་ཀྱིས་བསྐུར་བའི་འགན་ཁྲི་ཞིག་ཀྱང་ཡིན། དེ་ཡང་“ང་བོད་པའི་བུ་ཡིས་བོད་ཡིག་སྦྱོང་“ཞེས་པའི་སྙན་དབྱངས་དེ་དང་དེས་མཚོན་པའི་སྙན་དབྱངས་དེ་དག་གི་ངའི་སེམས་ཁོངས་སུ་ནམ་ཡང་གསུབ་ཏུ་མེད་པའི་སྙིང་སྟོབས་ཤིག་འོང་ཞིང་། ངས་གངས་ཅན་གྱི་གླུ་བ་གླུ་མ་ཁྱེད་རྣམས་ལ་སྙིང་དབུས་ནས་བཀའ་དྲིན་རྗེས་དྲན་ཞུའོ།།

དེ་ཡང་“གླུ་ནི་དགའ་སྡུག་སྐྱོ་གསུམ་ཤུགས་ཆེར་འབྱུང་བའི་གནས་སྐབས་སུ་མགུལ་ནས་རང་དབང་མེད་པར་ལུད་ཡོང་བས་ན་མགུར་གླུ་ཞེས་ཟེར་ཞིང་། གར་ནི་འཕགས་མཆོང་དང་བཅས་པ་མྱུར་བར་རྒྱུག་པའི་དོན་དང་། འཆམ་ནི་རྒྱང་རིང་པོ་མི་འགྲོ་པར་འཁོར་ས་གཅིག་ཕར་འགྲོ་ཚུར་འོང་བྱེད་པའི་དོན། གཞས་ནི་བཞེས་དང་ཡང་ན་བཞད་ཀྱི་དོན་ཡིན་ནམ་སྙམ་ལ། ཡང་ན་གནའ་བོའི་བྲོ་ཤོན་ཞེས་པ་ཟུར་ཆག་ནས་བྲོ་གཞས་གྱུར་པ” སོགས་གསུངས་པ་ལྟར་རེད། བོད་མི་རིགས་ནི་གླུ་བྲོ་ལ་དགའ་བ་རིགས་ཤིག་ཡིན་ལ། ཁ་དཔེ་ལའང་དགའ་ན་ཇ་ཆང་མཚར་གླུ་དང་སྡུག་ན་རང་སེམས་གསོ་གླུ་སོགས་བརྗོད་པ་ལྟར་དོན་དངོས་དང་མཐུན་པ་ཡིན།

རྩོམ་འཐུང་འདི་ནི་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་སོ་གཉིས་པ་ཚུགས་ལ་ཉེ་བའི་དུས་དེར་གཞུང་དོན་དུ་ཕྱིན་པའི་སྐབས། ཟ་ཁང་ཞིག་ཏུ་(མཚོ་སྔོན་བརྙན་འཕྲིན་ཁང་ནས་འགྲེམས་སྤེལ)ཞེས་པའི་གློག་བརྙན་ལས། བོད་ནང་གི་གླུ་བ་གླུ་མ་སྐོར་ཞིག་གིས་བོད་སྐད་གཙང་མ་མ་གཏོགས་རྒྱ་སྐད་ཚིག་གཅིག་ཀྱང་སྲེས་ལྷད་མེད་ཅང་། བོད་པའི་ལ་རྒྱ་དང་༧གོང་ས་ཡིད་བཞི་ནོར་བུར་དད་འདུན་དམ་ཚིགས་གཙང་མ། འཐབ་རྩོད་ཀྱི་སྙིང་སྟོབས་དང་མ་འོངས་པར་རེ་བ་འཆང་བའི་གླུ་གཞས་དེ་དག་མཐོང་བས་དགའ་སྤྲོ་འབུམ་གྱིས་སྨྱོས་ཏེ། སྟོན་པ་སངས་རྒྱས་པའི་གནས་མཆོག་རྡོ་རྗེ་གདན་གྱི་མཆོད་རྟེན་འགྲམ་དུ་བྱང་ཆུབ་ཤིང་སྡོང་གི་སིལ་གྲིབ་འོག་ནས་བྲིས་པ་དང་། ཕྱིར་བཞུགས་སྒར་ངྷ་རམ་ས་ལར་འབྱོར་རྗེས་བསྐྱར་དུ་ཕྲན་བུ་བཟོས་བཅོས་བཏང་སྟེ། ཕྱི་ལོ་ ༢༠༡༡ ཟླ་ ༡༡ ཚེས་ ༢༢ ཉིན་མོར་ཕུལ།

འབྲེལ་ཡོད་གསར་འགྱུར།

བོད་དོན་ལས་འགུལ་འཇམ་དབྱངས་བསྟན་འཛིན་ལགས་དྷ་མ་ས་ལ་འབྱོར། ༢༠༢༥།༠༥།༢༥ དུས་བབ་ཀྱི་པར།
Mobile App

རྒྱ་གར་ཧི་མ་ཅལ་མངའ་སྡེའི་ནང་བོད་དོན་དྲིལ་བསྒྲགས་གནང་བཞིན་འདུག

ཆུ་ཚོད་ ༦ སྔོན་ལ།
Mobile App

བཙན་འོག་གི་གྲོས་མཐུན་དོན་ཚན་ ༡༧ ནུས་མེད་ཆགས་པ་རྒྱལ་སྤྱིའི་ཐོག་ཁ་གསལ་བཟོ་དགོས།

༢༠༢༥/༠༥/༢༣
དབྱིན་ཇིའི་རྒྱལ་ཁབ་སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་གནད་དོན་ཐད་ལངས་ཕྱོགས་གསལ་བོ་བཟོས་འདུག བོད་ཀྱི་དུས་བབ་གསར་ཁང་གིས་པར་སྒྲིག་སྦྱོར་བྱས། ༢༠༢༥།༥།༢༣
Mobile App

སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་ལངས་ཕྱོགས་བརྟན་པོ་བཟོས་འདུག

༢༠༢༥/༠༥/༢༣
ཧཱ་ཝར་ཌི་གཙུག་ལག་སློབ་གཉེར་ཁང་། དྲ་ལམ་གྱི་པར།
Mobile App

ཧཱ་ཝར་ཌི་གཙུག་ལག་སློབ་གྲྭར་རྒྱལ་སྤྱིའི་སློབ་མ་བཀག་སྡོམ་གནང་འཆར་ཡོད་འདུག

༢༠༢༥/༠༥/༢༣
དྷ་ས་ས་གནས་མགོ་འཛིན་དཀོན་མཆོག་མིག་དམར། དུས་བབ་ཀྱི་པར། ༢༠༢༢།༦།༤
Mobile App

དཀོན་མཆོག་མིག་དམར་ལགས་བསྐྱར་དུ་དྷ་ས་ས་གནས་མགོ་འཛིན་དུ་འདེམས་ཐོན་བྱུང་།

༢༠༢༥/༠༥/༢༣
བོད་ཀྱི་གནས་མཆོག་གངས་རིན་པོ་ཆེ། དྲ་ལམ་གྱི་པར།
Mobile App

རྒྱ་གར་གྱི་གནས་མཇལ་བ་ ༧༥༠ གངས་རིན་པོ་ཆེར་གནས་མཇལ་དུ་གཏང་རྒྱུ་ཡིན་འདུག 

༢༠༢༥/༠༥/༢༢

མཆན། 14

  1. ཚ་ཕྲུག་རྒྱལ། says:
    ལོ་ 13 སྔོན།

    གླེང་གཞི་ཡག་ལ་གླེང་སྟངས་ཡང་ཡག་འདུག། འོན་ཀྱང་ལྷ་མོས་རང་སྟོད་དང་ཟློས་པ་མང་བ་ལས་རང་ཚུགས་ཀྱིས་དྲི་ལན་གནད་ལ་ཁེལ་བའི་རིགས་ལ་འབད་དགོས།

    Reply
  2. ཆབ་བྲག་ལྷ་མོ་སྐྱབས། says:
    ལོ་ 13 སྔོན།

    ཅོ་རི་ལགས། མི་མཐུན་ས་བརྒྱ་དང་མཐུན་ས་བརྒྱ་ལོས་ཡོད། གཙོ་བོ་མི་མཐུན་ས་ནས་མི་དགའ་བ་བྱེད་མི་ཉན་པ་དང། མཐུན་ས་ནས་ཡང་ཁས་ལེན་བྱེད་ཐུབ་པ་འདི་མི་དྲང་མོའི་མཚོན་རྟགས་ཡིན་སྙམ། དེ་བས་ང་ཚོས་གཅིག་གཅིག་ལ་བསམ་ཚུལ་བཤད་དུས་ཕར་ཚུར་གཉིས་ཀས་གཅིག་གཅིག་བསམ་ངན་ཞིག་དང་མ་རབས་ཤིག་ཡིན་པའི་འདུ་ཤེས་འཛིན་མི་རུང། ང་ཚོས་མུ་མཐུད་དུ་བསམ་ཚུལ་བརྗེ་རེས་བྱད་དགོས། མི་ཉུང་བ་ཞིག་གིས་མི་ཉུང་བ་ཞིག་ལ་དྲ་འབུ་ཟེར་ནས་སྡིགས་ཚུལ་དེ་ངའི་སྣང་བར་མི་འོས་པ་ཞིག་རེད། སུ་ཞིག་དྲ་འབུ་ཡིན་ན་མིན་ན་ངའི་དམིགས་ཡུལ་ནི་ཚང་མ་འདྲ་མཉམ་དང་ཚང་མ་འཆམ་མཐུན་གྱི་ངང་ནས་རང་རང་གི་ལྟ་ཚུལ་ཤུགས་ཀྱིས་གླེང་རེས་བྱེད་དགོས་པར་འདོད། དེ་བས་ངས་ང་ལ་སྡིགས་མཁན་དང་གཤེ་མཁན་སུ་ཞིག་ཡིན་ཡང་མ་དགའ་བ་སྤུ་ཙམ་བྱེད་ཀྱིན་མེད་པར་མ་ཟད། གལ་ཏེ་ཉིན་ཞིག་ལ་ངོ་ཐུག་ནས་ཆང་ཞིག་འཐུང་ནས་སྐད་ཆ་ལྷོད་ལྷོད་རེ་བཤད་ནས་ཉི་མ་འགའ་རེར་འགྲོགས་ནས་སྡོད་པའི་གོ་སྐབས་རེ་བྱུང་ན་རང་བཞིན་གྱིས་འཆམ་མཐུན་ཡོང་བར་ཡིད་ཆེས་ཡོད། འདི་ངས་རང་གི་ཉམས་མྱོང་མང་པོ་ཞིག་གི་ཐོག་ནས་ངེས་པ་རྙེད་པ་ཞིག་ཡིན། དེ་བས་ང་ངོ་མི་ཤེས་པའི་རྩོད་ཟླ་བ་སུ་ཞིག་ཡིན་ཡང་གལ་ཏེ་ཧྥ་རན་སིར་སླེབས་ན་ང་བཙལ་ནས་ཡོང་རོགས། ང་ཚོ་སྙུ་གུ་ཐོགས་པ་ཚོས་རང་ངོས་ནས་དོན་དམ་གྱི་གུ་ཡངས་དང་བཟོད་བསྲན་གྱིས་ལག་འཇུ་ངོ་མ་རེ་བྱེད་མ་ཐུབ་ན་ང་ཚོས་ཆིག་སྒྲིལ་ཟེར་བའི་སྐད་ཆ་རྣམས་ནི་ཅི་འདྲའི་སྙིང་བོ་མེད་པ་ཞིག་མ་རེད་དམ།

    Reply
  3. ཅོ་རི་ཉི་མ། says:
    ལོ་ 13 སྔོན།

    ཀྭི་ཀྭི་གསོལ་གསོལ་ལྷ་རྒྱལ་ལོ་་་་་དེ་རིང་ཡིན་ན་ལྷ་མོ་སྐྱབས་ངེད་གཉིས་མཐུན་སའི་བརྗོད་གཞི་ཞིག་རག་འདུག་་་་་་ཧཧཧཧཧ
    ངས་བསམ་པ་སྔར་ནས་གླེང་དགོས་ཀྱི་བསམ་ཀྱང་གླེང་ཕོད་མ་སོང་། བཙན་བྱོལ་ནང་ནས་བཅུག་བཤད་བསྡད་ན་ཁོང་རྣམ་པ་ཚོའི་སྐུ་ཚེ་ལ་བར་ཆད་འཕྲོད་ཡོང་དོགས་ཀྱིས་བཞག་དགོས་བྱུང་།

    དེ་རིང་འདི་ནས་ཆབ་མདོ་བས་ཚོར་བ་ཡོད་པའི་ཐོག་ནས་གསུངས་ཡོང་དུས་སུ་བཅུག་གླེང་ཁུལ་བྱས་པ་ཡིན། ཡ་ཏང་བཤད་འདུག་ཀྱང་་་་ངས་ཀྱང་ཁོང་བོད་མི་རིགས་སུ་ཕན་ཐོག་ཡོད་པའི་གླུ་བ་ཞིག་རེད་བསམ་གྱི་མེད།
    བོད་མི་རིགས་ཀྱི་གླུ་བ་ཟེར་དུས་བོད་མི་རིགས་ཀྱི་རྩ་དོན་དང་ཁེ་ཕན་གཞིར་བཟུང་གི་ཐོག་ནས་ཕ་སྐད་གཙང་མའི་གླུ་དབྱངས་ལེན་མཁན་ཞིག་ཡིན་དགོས་སོ།

    Reply
  4. ཆབ་བྲག་ལྷ་མོ་སྐྱབས། says:
    ལོ་ 13 སྔོན།

    ཅོ་རི་ཉི་མས་དོ་སྣང་བྱས་པ་བློ་བཟང་ཟེར་བ་ལས་ལྡབ་འགྱུར་གྱིས་བཟང་གི ངས་གླུ་བ་འདི་རིགས་ལ་དོ་སྣང་དང་བསྔགས་བརྗོད་བྱས་པ་དུས་ཀྱི་རྗེས་ཟིན་ཡོད་སྙམ། འདི་དེ་རིང་གཞི་ནས་གླེང་རྒྱུ་ཞིག་མ་རེད། སྔ་མོ་ནས་གླེང་དགོས་ངེས་ཤིག་རེད། ངས་ཐ་ན་གྲོས་ཚོགས་ནང་ནས་ཀྱང་གླུ་ཚིག་རང་ལུང་འདྲེན་གྱིས་གདེང་འོག་བྱས་ཡོད། ཡ་དུང་ལགས་གླུ་བ་མ་རེད་ཞུས་མེད། ལ་རྒྱའི་གླུ་རེ་ཡང་ཡོད་མོད། གཞས་ཚིག་དང་ཕ་སྐད་སོགས་ནས་བསྡུར་ན་ངས་ཁོང་མི་རིགས་ཀྱི་གླུ་བའི་ནང་ལ་འདེམས་ཐབས་བྲལ་བ་ཞིག་རེད།

    Reply
  5. བློ་བཟང་། says:
    ལོ་ 13 སྔོན།

    ཆབ་བྲག་བླུན་པོ་ཡིན་པའི་རྒྱུ་མཚན་འདི་ནས་བསྟན་འདུག གླུ་བ་རིག་དགའ་སོགས་ལ་བསྟོད་ནས་དུས་དེབ་ཀྱི་མདུན་ངོས་བཞག་པ་དེ་ནས་ངས་ཁོར་ཅང་མེད་པ་ཤེས་སོང་།བོད་ཀྱི་ས་ཆ་ཁ་ཤས་ན་དེ་ལས་ཡན་གྱི་གླུ་བ་ཚད་ལྡན་ཡར་དུང་སོགས་ཡོད་པ་སེ་པར་གྱིས།

    Reply
  6. དུག་མདའ། says:
    ལོ་ 13 སྔོན།

    དེང་སང་བོད་པའི་གླུ་བ་ལ་རྒྱ་རིགས་རྒྱ་སྐད་ལ་ཐན་དུ་བརྩི་བ། སྐད་དང་གྱོན་ཆས་ཚུན་ཆད་ནས་འབྲོག་པ་རང་གི་ཁྱད་ཆས་འཛིན་མཁན་གྱི་རིགས་གཅིག་དང་། བོད་པའི་གྲས་ལ་སླེབས་ན་བོད་པའི་ཁྱད་ཆོས་དང་། རྒྱ་གྲལ་ལ་སླེབས་ན་རྒྱ་ལས་ཏེ་དཔའ་འདྲ་བོ་ཡོང་དགོས་བསམ་མཁན་གྱི་རིགས་གཉིས་ཡོད་པ་རེད། 
    ཡང་མཚོ་སྔོན་རླུང་འཕྲིན་ལྟ་བུ་བོད་རང་གི་བྱ་དགའ་ལ་གཙིགས་སུ་བྱེད་མཁན་དང་། ཚོགས་པ་ག་གེ་མོ་ནས་གྲངས་ཉུང་མི་རིགས་ཀྱི་གཞས་པ་ཨང་ཅི་མ་ཞིག་གི་བྱ་དགའ་ཟེར་བ་ལ་མཐོང་ཆེན་བྱེད་མཁན་གྱི་རིགས་གཉིས་ཡོད་པ་རེད། 
    ཡང་རྒྱ་གཞས་རྒྱ་འདྲ་བ་ལངས་ན་བོད་མི་རིགས་ཀྱི་བླ་སྒུལ་དུ་བརྩི་བ་དང་གཟི་བརྗིད་དུ་བརྩི་བའི་རིགས་གཉིས། 
    ཡང་ང་བོད་པའི་བུ་ཡིས་བོད་གླུ་ལེན་ཟེར་བཞིན་མི་རབས་བརྒྱད་ལ་རྒྱ་སྐད་མི་ཁྱོང་བར་སྨོན་ལམ་འདེབས་མཁན་གྱི་རིགས་གཅིག་དང་། དེ་རིང་ང་བོད་པའི་བུ་ཡིས་བོད་གླུ་ལེན་ཟེར་བཞིན་སང་ཉིན་ཧ་ཧ་ཏོ་ཏོ་པ་པ་པོ་ཟེར་མཁན་གྱི་རིགས་གཉིས། 
    དེ་བཞིན་མི་རིགས་ཀྱི་ཞེན་ཁོག་འཛིན་མཁན་ལའང་། ཨ་ལག་ཚང་གི་སྐུ་མཁྱེན་ནོ་ཟེར་མཁན་དང་དྷི་ཚ་སྐམ་པོས་འདི་སྐད་གསུངས་ཟེར་མཁན་གྱི་རིགས་གཉིས། སངས་རྒྱས་བསྟན་པའི་ཟེར་མཁན་དང་སངས་རྒྱས་ཆོས་ལུགས་ཟེར་མཁན་གྱི་རིགས་གཉིས། མ་ཎི་ཁ་ཏོན་གྱི་གྲངས་ཀ་གསོག་མཁན་དང་བཀའ་པོད་ལྔ་བོ་བམ་ཀློག་བྱེད་མཁན་གྱི་རིགས་གཉིས། སྔོན་བྱོན་གྲུབ་ཆེན་གྱི་གཏམ་རྒྱུད་བཤད་མཁན་དང་། མཁས་པ་ལུའུ་ཞུན་ཡང་ཡང་གླེང་མཁན་གྱི་རིགས་གཉིས། 

    Reply
  7. ཅོ་རི་ཉི་མ། says:
    ལོ་ 13 སྔོན།

    1་་གླུ་བ་བདུད་བྷེ་ལགས་་་་་་་བོད་མི་རིགས་ཀྱི་ཕོ་ཉ་ཡིན།
    2་་གླུ་བ་རི་དགའ་ལགས་་་་་་་བོད་མི་རིགས་ཀྱི་མཚོན་རྟགས་ཡིན།
    2་་གླུ་བ་སྨོན་ལམ་གྲྭ་ལོག་་་་་་བོད་མི་རིགས་ཀྱི་ལམ་སྟོན་ཡིན།
    4་་གླུ་བ་སྒྲོལ་མ་སྐྱབས་ལགས་་བོད་མི་རིགས་ཀྱི་ཕོ་རྒོད་ཡིན།
    5་་གླུ་བ་ཤེར་བསྟན་ལགས་་་་་བོད་མི་རིགས་ཀྱི་ལ་རྒྱ་ཡིན།
    6་་གླུ་བ་བློ་བཟང་ལགས་་་་་་་་བོད་མི་རིགས་ཁུ་བྱུག་ཡིན།

    1་་གླུ་མ་རིག་འཛིན་སྒྲོལ་མ་ལགས་་་་བོད་མི་རིགས་ཀྱི་དགེ་རྒན་ཡིན།
    2་་གླུ་མ་ཚེ་དབང་ལྷ་མོ་ལགས་་་་་་་་་་བོད་མི་རིགས་ཀྱི་འཆམ་མཐུན་ཡིན།
    3་་གླུ་མ་འོ་བཞུགས་སྐྱིད་ལགས་་་་་་་་བོད་མི་རིགས་ཀྱི་མཛེས་མ་ཡིན།
    4་་་་་་་་
    གླུ་བ་གླུ་མ་འདི་དག་ངས་དོ་སྣང་བྱས་ས་དང་གླུ་དབྱངས་ཉན་ས་ཡིན། མི་ཡུལ་ས་མཐའ་སེམས་པ་སྐྱོ་སྐབས་སུ་གླུ་རེར་ཉན་ནས་མིག་ཆུ་ཡང་ཤོར་མྱངས་ཡོད། ངོ་མ་་་ཁ་འཐོར་རུ་ཡོད་པའི་བཙན་བྱོལ་བ་ཚོ་ལ་བོད་ཀྱི་གླུ་བ་གླུ་མ་རྣམས་བཀའ་དྲིན་ཆེ་པོ་ཡིན།
    བོད་མི་རིགས་ཀྱི་འདུ་ཤེས་དང་ལ་རྒྱ་བཅས་གོང་འཕེལ་འགྲོ་བ་ལ་གྲུབ་འབྲས་ཆེན་པོ་ཐོན་སོང་སྙམ་པ་ཞིག་རེད། རིགས་རུས་སུ་བསྟོད་མཁན་གླུ་བ་གླུ་མ་རྣམས་སུ་ཐུགས་རྗེ་ཆེ་ཞུ་རྒྱུ་ཡིན།

    Reply
  8. རྡོ་རྗེ་ཚེ་རིང་། says:
    ལོ་ 13 སྔོན།

    གནས་ཚུལ་དང་ཡུལ་རང་ག་བའི་གནས་སྟངས་ལ་མི་ལྟ་བར་རྟག་ཏུ་ཞེན་ཁོག་སྐམ་པོའི་སྐད་ཆ་ཤོད་མཁན་རིགས། དོན་དུ་སོ་སོའི་ནང་སྙིང་ངོ་མ་ཕྱི་ནང་ཀློག་བཞིན་འདུག
    འོན་ཀྱང་ལ་རྒྱ་ཅན་གྱི་གླུ་པ་མདོ་དབུས་ཁམས་སུ་གྲགས་ལ། གླུ་བ་རྒྱ་དགའ་གང་མང་ཞིག་བོད་ས་ཡོངས་རྫོགས་སུ་མཆིས། ནམ་ནམ་ཞར་ཞར་ལ་འདི་དང་གན་ཞེས་དབྱེ་འབྱེད་མཁན་རིགས་ལ་ངོ་མ་སུན་གི

    Reply
  9. སྤྲོ་ཚིགས་དགེ་འདུན says:
    ལོ་ 13 སྔོན།

    གླུ་བ་དཔལ་མགོན་དང་བདུད་བྷེ་རིག་དགའ་སོགས་སྔ་རབ་པ་ཡིན་པ་ཁས་རྒྱུ་བྱོས། དེ་ཙམ་རེད། དེ་བས་ལ་རྒྱའི་གླུ་བ་ཕུལ་བྱུང་སོགས་གླེང་རིན་ཡོད་ཡ།
    དེ་མ་གཏོགས་པས་་་་ང་ཁྱོད་ལ་དགའ་ཁྱོད་སྙིང་རྗེ་མོ་འདུག་ལ་སོགས་པ་ལེན་བཞིན་གླུ་བ་ཡིན་རློམ་མཁན་གྱི་གཞེས་ཆགས་ཁག་གི་གླུ་བ་ཚོར་ཉན་ན་མི་འདོད་གི། གཏད་ནས་ཉན་ན་མི་འདོད་གི ་

    Reply
  10. རིན་ཆེན་གྲགས་པ། says:
    ལོ་ 13 སྔོན།

    གླུ་བ་གླུ་མ་ཟེར་བ།།
    སྙན་པའི་ངལ་གསོ་རྟེན་ས།།
    སེམས་དང་སེམས་པ་མཐུན་ན།།
    དཀའ་དྲིན་ཆེའོ་ཞུས་ཆོག།

    Reply
  11. ཆབ་བྲག་ལྷ་མོ་སྐྱབས། says:
    ལོ་ 13 སྔོན།

    གླུ་བ་བདུད་བྷེ་ལགས་དང་ནམ་མཁའ་རིག་དགའ་སོགས་ཀྱིས་མགོ་བརྩམས་ཤིང་གླུ་བ་ཤེར་བསྟན་ལགས་དང་བཀྲ་ཤིས་དོན་གྲུབ་སོགས་ཀྱིས་མཇུག་སྐྱོང་ནས་དཔའ་བོའི་གླུ་སྐད་ཀྱིས་བོད་ཀྱི་གནམ་ས་བཀང་ཡོད། གཞིས་ལུས་མི་དམངས་ཀྱི་རེ་སྨོན་གྱི་ཚབ་མཚོན་ཐུབ་པའི་་ཁོང་ཅག་གི་གླུ་སྒྲ་དེས་རྒྱུན་ཆད་མེད་པར་བོད་མིའི་སེམས་ལ་གཡོ་འགུལ་ཐེབས་ཀྱིན་ཡོད། ཁོང་ཚོ་ནི་དུས་རབས་གསར་བའི་བོད་ཀྱི་དྲིལ་བསྒྲགས་རུ་ཁག་སྟོབས་ལྡན་ཞིག་ཀྱང་ཅི་ལ་མིན།
    བདག་གིས་ནི་དེ་སྔ་ཞིག་ནས་རྩམ་པ་དུས་དེབ་ཐོག་ལ་རྒྱལ་གཅེས་དཔའ་བོ་འདི་རིགས་ཀྱི་གླུ་གཞས་ཁག་ཅིག་རིམ་འགོད་བྱས་ཡོད། དེང་གི་གཞས་ཚིག་གི་ནང་དོན་ནི་སྣ་ཇེ་མང་དང་དོན་ཇེ་ཟབ་ཏུ་འགྱུར་བཞིན་ཡོད། འདིའི་ཐད་ལ་ཆེད་དུ་ཞིབ་འཇུག་གནང་མཁན་ཡང་ཡོང་གིན་ཡོད། འོན་ཀྱང་བོད་ཀྱི་ས་ཁུལ་མི་ཉུང་བ་ཞིག་ལ་གླུ་བ་འདི་རིགས་ད་དུང་འཁྲུངས་མྱོང་མེད། ཕལ་ཆེར་ད་དུང་དུས་ཡུན་རིང་ཙམ་ལ་་་་་

    Reply
  12. ཨ་འདུས་མིག་ཆུ། says:
    ལོ་ 14 སྔོན།

    གྲོགས་ཕུན་ཚོགས་ལགས། ཉིད་ཀྱིས་བོད་ཀྱི་སྤྱི་ཚོགས་གནས་བབ་ལ་ཕན་ཐོགས་པའི་རྩོམ་ཡིག་སྤེལ་དང་སྤེལ་བཞིན་པ་ལགས་ན་ཡི་རིང་སེམས་གཏིང་ནས་ཞུ། ད་སྐབས་ཀྱང་སུས་ཀྱང་འབྲི་མ་མྱོང་བའི་བོད་གཞིས་བཞུགས་ཀྱི་གླུ་བ་གླུ་མ་དག་གི་མཛད་རྗེས་དང་དཔའ་སྙིང་དོད་པ་དེ་བྲིས་འདུག་པ་ནི་དོན་ལ་རན་པ་ཞིག་དང་གནད་ལ་ཕོག་པ་ཞིག་རེད་འདོད་ཡོད། ལྷག་པར་གཞིས་གཞུགས་མང་ཚོགས་ཀྱི་སེམས་ཀྱི་ཚོར་འདུ་ཟབ་ས་ནས་གྱེར་མཁན་ཞིག་འཚོལ་དགོས་ཚེ། ད་དུང་རྡུང་ལེན་སྒྱུ་རྩལ་ལ་ཡིད་ཕྱོགས་པའི་གླུ་བ་གླུ་མ་དག་ཡིན་པས་འདི་དག་ལ་ངེས་པར་དུ་འབུར་དུ་ཐོན་པའི་རྩོམ་ཡིག་ཞིག་ཀྱང་འབྲི་ཐུབ་ན་དགེ་མཚན་འདུག་སྙམ། དེ་དང་ཞོར་དུ་བཙན་བྱོལ་གླུ་བ་གླུ་མ་དག་གིས་ད་ལོ་ལྟ་བུའི་མེ་སྲེག་དོན་རྐྱེན་བྱུང་བའི་སྐབས་སུ་འདི་དག་གིས་དགུན་གཞུང་གི་བྱ་ཁུ་བྱུག་གི་རྟུལ་བཞུགས་བཟུང་བ་ལའང་དགག་རྩོམ་ཚ་ཐག་ཆོད་ཅིག་འབྲི་དགོས་པར་སྙམ། འདི་དག་ཚང་མ་བསམ་ཚུལ་ཙམ་ཡིན་གཞན་དམིགས་བསལ་གང་ཡང་མེད། ཐུགས་རྗེ་ཆེ། ཁྱེད་ཀྱི་རྩོམ་ཡིག་དེ་བདག་ལ་འབྱོར་སོང། བཀའ་དྲིན་ཆེ།

    Reply
  13. ཀརྨ་རྡོ་རྗེ། says:
    ལོ་ 14 སྔོན།

    བོད་ཀྱི་
    གླུ་པ་གླུ་མའི་མཆོད་སྤྲིན་རྒྱ་མཚོ་ནི།

    དགའ་བའི་མཚར་གླུ་སྡུག་་པའི་གསོ་གླུ་སོགས། །
    རོལ་གཞས་འདི་ནི་འཛམ་གླིང་སྤྱི་སྐད་བསྒྲགས། །
    གོང་མར་བསྟོད་དང་མི་རིགས་ལ་རྒྱ་སོགས། །
    དབྱངས་རྟའི་གདངས་གྱེར་མཆོད་སྤྲིན་རྒྱ་མཚོ་ལགས། །

    བོད་ཀྱི་
    གཞས་པ་གཞས་མའི་གླུ་ཡིས་བློ་སྒུགས་ཤོག །

    Reply
  14. བརྩོན་རྒྱམ། says:
    ལོ་ 14 སྔོན།

    བོད་མི་རིགས་འདི་ནི་གླུ་གར་གྱི་རྒྱ་མཚོ་ཡིན་ཟེར་པ་བཞིན་གནའ་ནས་ད་བར་གླུ་གར་ལ་དུངས་བའི་མི་རིགས་ཤིག་ཡིན།  མ་ཟད་དེང་དུས་ཀྱི་གླུ་པ་གླུ་མ་དེ་ཚོ་ནི་སྤྱི་ཚོགས་ཀྱི་སློབ་གསོ་མཁན་དང་ལམ་བསྟོན་གནང་མཁན་ཡིན་ཟེར་ན་མི་ཆོག་པ་མེད་པ་འདྲ།  མི་རིགས་ཀྱི་ལ་རྒྱ་དང་མི་རིགས་ལ་དུངས་བའི་སེམས་ཁམས་ཡོད་མཁན་རྣམས་ཡིན་པས་དགའ་འོས་པ་ཞིག་མ་ཡིན་ནམ།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese