བོད་ནང་ཕྱི་ལོ་ ༢༠༠༨ ལོར་ས་ཕྱི་ཞི་རྒོལ་ཆེན་མོ་བྱུང་བ་ནས་བཟུང་ཕྱི་ལོ་ ༢༠༡༡ བར་རྒྱ་གཞུང་ལ་འཚེ་མེད་ཞི་བའི་ངོ་རྒོལ་ཆེད་བོད་མི་གཞོན་སྐྱེས་ཚོས་རང་ལུས་ཞུགས་འབུལ་གནང་བའི་གནས་ཚུལ་ཇེ་མང་ནས་ཇེ་མང་འཐོན་བཞིན་པའི་རྒྱུ་རྐྱེན་གཙོ་བོ་ནི། ད་ལྟའང་རྒྱ་ནག་གཞུང་གིས་བོད་ནང་ཆབ་སྲིད་ཀྱི་དམ་བསྒྲགས་དང་བོད་ཀྱི་ཆོས་རིགས། མི་བརྒྱུད་དང་བཅས་པ་རིམ་བསྒྱུར་གྱི་མི་སེར་སྤེལ་བའི་སྲིད་བྱུས་ལག་བསྟར་བྱེད་བཞིན་པར་བརྟེན་བོད་མི་ཚོས་འུ་ཐུག་ཐབས་ཟད་ཀྱི་བྱ་སྤྱོད་དེ་རིགས་མ་སྤེལ་ཐབས་མེད་དུ་གྱུར་བ་རེད།
དེའི་རྐྱེན་རང་རེའི་བཙན་བྱོལ་ནང་ནས་ཀྱང་ཛ་དྲག་ཐོག་རྒྱལ་སྤྱིའི་སྤྱི་ཚོགས་ཀྱི་དོ་སྣང་འགུག་ཐུབ་པ་ཞིག་དང་། རྒྱ་ནག་གཞུང་ལ་འགུལ་དཀྱོག་རྒྱག་ཐུབ་པའི་བོད་ནང་ཞི་བའི་གོམ་བགྲོད་ཀྱི་ལས་འགུལ་གཞི་རྒྱ་ཆེན་པོ་ཞིག་སྤེལ་རྒྱུའི་དུས་ལ་སླེབས་འདུག ཕྱི་ལོ་ ༡༩༩༤ ཟླ་ ༣ ཚེས་ ༡༠ གསུམ་བཅུའི་དུས་དྲན་གསུང་འཕྲིན་ནང་༧གོང་ས་མཆོག་ནས་རྒྱ་ནག་གཞུང་དང་མཉམ་དུ་བོད་ཀྱི་དཀའ་རྙོག་སེལ་བའི་དོན་དུ་དབུ་མའི་ལམ་གྱི་ཐབས་ཤེས་འབད་བརྩོན་ལོ་བཅུ་བཞིར་བྱས་རིང་། དོན་འབྲས་གང་ཡང་མ་སོན་ཞེས་གསལ་བསྒྲགས་ཕེབས་དང་བཙན་བྱོལ་བོད་མི་རྣམས་ཀྱིས་རང་རེའི་རྩ་དོན་སྒྲུབ་རྒྱུ་རང་ཐོག་ཏུ་འགན་ཁུར་ཆེན་པོ་ལེན་དགོས་པའི་དུས་ཚོད་སླེབས་པ་ཤེས་ཏེ། བོད་ཀྱི་གནས་སྟངས་ཉག་ཕྲ་བ་ལས་སྐྱོབ་ཕྱིར་དང་བོད་ཀྱི་དཀའ་རྙོག་ཞི་བའི་ལམ་ནས་སེལ་བའི་དོན་དུ་དབུས་གཙང་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གིས་སྣ་དྲངས་པ་ལ་བརྟེན་ནས། བཙན་བྱོལ་དུ་ཡོད་པའི་གཞུང་འབྲེལ་མ་ཡིན་པའི་ཚོགས་པ་བརྒྱད་ཀྱིས་བོད་ཀྱི་རྒྱལ་ས་ལྷ་ས་བར་དུ་ཞི་བའི་གོམ་བགྲོད་བྱ་རྒྱུའི་འཆར་གཞི་བཀོད་དེ་རང་སྲོག་བློས་གཏོང་གི་ཆོད་སེམས་བརྟན་པོས་བོད་མི་ ༥༠༨ ཙམ་གྱིས། ལོ ༡༩༩༥ ཟླ ༣ ཚེས ༡༠ ཉིན་གོམ་བགྲོད་བྱ་རྒྱུའི་གཏན་འཁེལ་དེ་གྲ་སྒྲིག་ཡོངས་སུ་ཟིན་ཡང་། ༧གོང་ས་མཆོག་ནས་དུས་སྐབས་རན་ཞིང་འཚམས་པ་ཞིག་མ་སྨིན་པས་སླར་ཡང་བྱ་ཕྱོགས་ཇི་དགེ་བསམ་ཞིབ་གྲོས་བསྡུར་བྱ་ལེགས་ཀྱི་ལམ་སྟོན་བཀའ་སློབ་ཕེབས་དགོངས་ལྟར། བསྐྱར་གྲོས་གནང་སྐབས་གནས་སྐབས་རིང་ལྷ་ས་བར་གོམ་བགྲོད་བསྐྱོད་འཆར་ཕྱིར་འཐེན་གྱིས་དེའི་ཚབ་ཏུ། བཞུགས་སྒར་ནས་ལྡི་ལི་བར་གོམ་བགྲོད་བྱ་རྒྱུ་ཐག་བཅད་པ་བཞིན། ལོ་དེའི་ཟླ ༣ ཚེས ༡༠ ཉིན་༧གོང་ས་མཆོག་གོམ་བགྲོད་དབུ་འཛུགས་དང་། ཕྱི་ཟླ ༣ ཚེས ༢༨ ཉིན་མཇུག་སྒྲིལ་བཅས་སུ་ཆེད་ཕེབས་གནང་། མཇུག་སྡོམ་མཛད་སྒོའི་སྟེང་སྤྱི་འཐུས་ཚོགས་གཙོ་ཟམ་གདོང་རིན་པོ་ཆེས་”ང་རང་གི་མཐོང་ཚུལ་ལ་ང་ཚོའི་གོམ་བགྲོད་འདི་འགོ་འཛུགས་བྱས་པ་མ་གཏོགས་དེ་རིང་མཇུག་སྡོམ་རྒྱབ་རྒྱུའི་གནས་ཚུལ་ཞིག་ལ་སླེབས་པ་རྩ་བ་ཉིད་ནས་ངོས་ལེན་ཞུ་གི་མེད”། ཅེས་འབྱུང་འགྱུར་བྱེད་ཕྱོགས་ཐད་ལམ་སྟོན་གསལ་བོ་ཕེབས་ཡོད།
༡༩༩༥ ཕྱི་ཟླ ༣ ཚེས ༣༠ ཉིན་ལྡི་ལིར་ཐེངས་དང་པོའི་གོམ་བགྲོད་མཇུག་སྒྲིལ་སྐབས་གོམ་བགྲོད་པ་ ༥༠༨ ཚང་འཛོམས་གོ་བསྡུར་ཞུས་པའི་གྲོས་ཆོད་དོན་ཚན་གསུམ་པའི་དགོངས་དོན་དུ་འབྱུང་འགྱུར་འཛམ་གླིང་སྤྱི་དང་། བྱེ་བྲག་རྒྱ་ནག་གཞུང་གི་ཆབ་སྲིད་འགྱུར་འགྲོས་དང་བསྟུན་གོ་སྐབས་རན་ཞིང་འཚམས་པ་ཞིག་ལ་ལྷ་ས་བར་དང་རྒྱ་གར་ནང་ཁུལ་བཅས་སུ་ཞི་བའི་གོམ་བགྲོད་ཀྱིས་མཚོན་ལས་འགུལ་རྣམ་གྲངས་འདྲ་མིན་སྤེལ་རྒྱུ་འཁོད་ཡོད་པ་མ་ཟད། སྐབས་དེའི་འགན་ཡོད་རྣམས་ལས་གནས་ནས་འཕོས་མིན་ལ་མ་ལྟོས་པར་མི་མང་ལས་འགུལ་གྱི་ཆེད་དུ་གྲ་སྒྲིག་ཟིན་པའི་དངུལ་རྣམས་མ་འོངས་པའང་མི་མང་རང་གི་ལས་འགུལ་ཆེད་ནར་གཏོང་དགོས་ཚུལ་ཀྱང་འཁོད་ཡོད།
སྐབས་དེར། གྲོས་ཆོད་དེར་མཚན་རྟགས་བསྐྱོན་མཁན། ཚོགས་གཙོ་དབུས་གཙང་སྐུ་ཚབ་ཡོན་ཏན་རྒྱ་མཚོ། ཚོགས་གཞོན་བུད་མེད་སྐུ་ཚབ་ངག་དབང་ལྷ་མོ། དྲུང་ཆེ་གཞོན་ལྷན་སྐུ་ཚབ་བློ་བཟང་སྙན་གྲགས། དངུལ་གཉེར་མདོ་སྨད་སྐུ་ཚབ་བློ་བཟང་བསྟན་འཛིན། རྒྱུན་ལས་ཆིག་ཚོགས་སྐུ་ཚབ་ཕྱག་མཛོད་ངག་དབང་བསྟན་པ། དབུས་གཙང་སྐུ་ཚབ་ཕྲེང་ཟུར་རྡོ་ལགས། གཞོན་ལྷན་སྐུ་ཚབ་དབྱངས་ཅན་སྒྲོལ་དཀར། མདོ་སྨད་སྐུ་ཚབ་སྤེན་པ་ཚེ་རིང་། རྡ་ས་མདོ་སྟོད་སྐུ་ཚབ་རྡོ་རྗེ་ཚེ་རིང་། རྡ་ས་མདོ་སྟོད་སྐུ་ཚབ་རྒྱ་རི་བུ་ཕྲུག མངའ་རི་སྤྱི་མཐུན་སྐུ་ཚབ་བློ་བཟང་གྲགས་པ། བུད་མེད་སྐུ་ཚབ་ཆོས་ཉིད་བཟང་མོ། ཆིག་ཚོགས་སྐུ་ཚབ་ཨ་མདོ་ཀུན་དགའ། དགུ་བཅུ་གསུམ་སྐུ་ཚབ་ཨ་ཎི་དཔའ་ཆེན། དགུ་བཅུ་གསུམ་སྐུ་ཚབ་ཡེ་ཤེས་རྟོགས་ལྡན། མངའ་རི་སྤྱི་མཐུན་སྐུ་ཚབ་པདྨ་ཀུན་བཟང་བཅས་འདུས་པའི་སྐུ་ཚབ་མི ༡༦ ཡོད།
སྐབས་དེར་ཞི་བའི་གོམ་བགྲོད་ཀྱི་ཆེད་དུ་རྒྱལ་གཅེས་ལྷག་བསམ་ཅན་གྱི་མི་མང་ནས་ཞལ་འདེབས་གནང་བའི་དངུལ་ལྷག་རྣམས་མ་འོངས་ལས་འགུལ་གྱི་ཆེད་དུ་རང་གཞུང་དཔལ་འབྱོར་ལས་ཁུངས་སུ་བསྐྱེད་བཅོལ་ཞུས་ཡོད། རྗེས་སུ་དཔལ་འབྱོར་ལས་ཁུངས་ནས་མ་བསྐྱེད་གྲངས་གཙང་བསྡོམས་ཧིན་སྒོར་ས་ཡ་བཞི་དང་འབུམ་ལྔ་ ༤༥༢༠༡༨༤ གོང་གསལ་ཚོགས་པ་བརྒྱད་ལ་ཕྱིར་སློག་གནང་། ཚོགས་པ་བརྒྱད་ཀྱིས་དངུལ་དེ་དག་ཆ་བགོས་ཀྱིས་ཧིན་སྒོར་ ༥༦༥༠༢༣ རེ་རྒྱ་གར་དངུལ་ཁང་དུ་བསྐྱེད་འཇོག་བྱས་ཡོད་པ་རེད།
ད་ཆ་དུས་ཚོད་གང་ནས་ལྟོས་ཀྱང་། སྔར་ཡོད་འབྲུ་དོན་དུ་གསལ་བའི་ལས་འགུལ་སྤེལ་བའི་དུས་སྐབས་རན་ཞིང་འཚམས་པ་ཞིག་ཏུ་སོང་། བོད་ཀྱི་རྩ་དོན་ལ་ཕན་པའི་མི་མང་རང་བཞིན་གྱི་ལས་འགུལ་ཞིག་སྤེལ་རོགས་ཞེས་རྒས་པོས་ལྷག་བསམ་ཟོལ་མེད་ཀྱིས་འབོད་སྐུལ་ཞུ་རྒྱུ་ཡིན་ལ། ལས་འགུལ་ནང་རང་ངོས་ནས་མཐུན་འགྱུར་གང་ཡོང་ཞུ་རྩིས་ཡོད་པ་བཅས།
སྤྱི་ཟུར་དྭང་ཤར་ཡོན་ཏན་རྒྱ་མཚོ་ནས།
༢༠༡༡ ། ༡༡། ༢༥། ཉིན།
