གཉན་ནད་རེག་དུག་ནད་པ་ཚོར་མཐོང་ཆུང་བྱེད་ཀྱི་འདུག

ད་ནངས་གངས་སྐྱིད་སྤྱི་ཐབ་ཚོགས་ཁང་དུ་འཛམ་གླིང་རེག་དུག་ཉིན་མོ་སྲུང་གཙི་བྱས་ཏེ། འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་མང་ཚོགས་ལ་རེག་དུག་སྔོན་འགོག་གི་གཏམ་བཤད་དང་། རེག་དུག་ནད་གཞི་ཕོག་མཁན་བློ་བཟང་ལགས་ཀྱིས་རང་གི་མྱོང་ཚོར་སྐོར་བཤད་ཡོད།

དབུས་བོད་མིའི་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག དེ་རིང་ཕྱི་ཚེས་ ༡ ཉིན་གྱི་ཞོགས་པའི་ཆུ་ཚོད་ ༩ པའི་སྟེང་། ངྷ་ས་གངས་སྐྱིད་སྤྱི་ཐབ་ཚོགས་ཁང་དུ་འཛམ་གླིང་གཉན་ནད་རེག་དུག་ཉིན་མོ་སྲུང་གཙིའི་མཛད་སྒོ་ཞིག་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་དབུས་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གཙོས་པའི་སྨན་རྩིས་ཁང་གི་སྨན་རམས་པ་བསོད་ནམ་སྒྲོལ་མ་ལགས་དང་། བདེ་ལེགས་སྨན་ཁང་གི་ཕྱི་ལུགས་སྨན་པ་བསོད་ནམས་དོན་གྲུབ་སོགས་ཕེབས་འདུག མཛད་སྒོར་དེར་དབུས་བོད་མིའི་སྒྲིག་འཛུགས་ཀྱི་ལྷན་ཁང་གི་དྲུང་ཆེ་དང་སྡེ་ཚན་འགན་འཛིན། གཞུང་ཞབས་ལས་བྱེད་སོགས་ཁྱོན་མི་ ༡༠༠ ཙམ་མཉམ་ཞུགས་བྱས་ཡོད།

མཛད་སྒོའི་སྟེང་འཕྲོད་བསྟེན་བཀའ་བློན་ཚེ་རིང་དབང་ཕྱུག་ལགས་ཀྱིས་གཉན་ནད་རེག་དུག་གི་བྱུང་རིམ་དང་། ནད་གཞི་དེའི་ངོ་བོ་དང་བྱེད་ལས་སྐོར་མང་ཚོགས་ལ་ངོ་སྤྲོད་གནང་སྟེ། དེང་སྐབས་འཛམ་གླིང་སྟེང་རེག་དུག་ནད་འབུ་ཡོད་པའི་ནད་པ་ས་ཡ་ ༣༢ ཙམ་ཡོད་པ་དང་། ནད་གཞི་གསར་པ་ཕོག་མཁན་ས་ཡ་གཉིས་དང་འབུམ་བདུན།  གསར་སྐྱེས་བྱིས་པ་སུམ་འབུམ་དགུ་ཁྲི་ལྷག་ཡོད་པའི་ཁྲོད། ལོ་ལྟར་མི་ས་ཡ་གཉིས་དང་ཁྲི་བདུན་ཙམ་ནད་གཞི་དེའི་དབང་གིས་རྐྱེན་འདས་སུ་འགྲོ་བཞིན་ཡོད་སྐོར། རེག་དུག་ནད་གཞི་གཙོ་བོ་རྒྱ་དཀར་ནག་གཉིས་གཙོས་པའི་ཡར་རྒྱས་འགྲོ་བཞིན་པའི་རྒྱལ་ཁབ་ཁག་ཏུ་ཁྱབ་བརྡལ་འགྲོ་བཞིན་ཡོད་སྐོར་སོགས་གསུངས་ཏེ། རྒྱ་གར་གྲོང་ཁྱེར་འདྲ་མིན་དུ་ཁ་ཐོར་གནས་སྡོད་བྱེད་པའི་བོད་མི་ཚོས་རེག་དུག་གི་ཉེན་ཁར་གཡོལ་དགོས་པ་མ་ཟད། ཉེན་ཁ་དེ་ལས་བཟློག་ཆེད་ཕོ་མོ་ཕན་ཚུན་བར་འཁྲིག་པ་སྤྱོད་པ་དང་སྨན་ཁབ་རྒྱག་པ། གཞན་ལ་ཁྲག་སྤྲོད་སྐབས་བཅས་ལ་གཟབ་གཟབ་གནང་དགོས་ཚུལ། རེག་དུག་ནད་གཞི་ཡོད་མཁན་ཚོས་ནད་གཞི་དེར་སྦ་གསང་མ་བྱས་པར་དུས་ཐོག་སྨན་ཁང་དུ་བརྟག་དཔྱད་གནང་རྒྱུ་དང་། མང་ཚོགས་ཀྱི་ངོས་ནས་ཀྱང་རེག་དུག་ཕོག་མཁན་ཚོར་སྙིང་རྗེའི་བསམ་པའི་ཐོག་སེམས་གསོ་དང་རོགས་རམ་གང་ཐུབ་གནང་དགོས་པ་ལས་མཐོང་ཆུང་དང་ཁྱད་གསོད་བྱས་ཏེ། སྤྱི་ཚོགས་ནང་ཕྱིར་ཕུད་བཏང་ན་ཡག་པོ་མེད་སྐོར་སོགས་གསུངས་སོང་།

དེའི་རྗེས་སྨན་རམས་པ་བསོད་ནམས་སྒྲོལ་མ་ལགས་ཀྱིས་ལོ་རྒྱུས་ཐོག་གི་བོད་ལུགས་གསོ་རིག་གི་ཕན་ཡོན་དང་བོད་སྨན་གྱིས་རེག་དུག་ནད་གཞི་བཅོས་ཐབས་སྐོར་ངོ་སྤྲོད་དང་། བོད་པའི་སྤྱི་ཚོགས་ནང་རེག་དུག་ཕོག་མཁན་ཚོར་ན་ཚའི་སྡུག་བསྔལ་དང་། དཔལ་འབྱོར་དཀའ་ངལ་གཉིས་ལས་གཞན་ད་དུང་། གྲོང་པ་ཁྱིམ་མཚེས་དང་ལས་རོགས། དགའ་ཉེ་གྲོགས་པོ། སྤྱི་ཚོགས་བཅས་ཀྱིས་གནོན་ཤུགས་རིམ་པར་སྤྲད་དེ་མི་གྲལ་ནས་ཕུད་པ་སོགས་ནི། རེག་དུག་ཕོག་པའི་ནད་པ་ཚོར་ན་ཚ་ལས་སྡུག་པའི་གནོན་ཤུགས་ཆེན་པོ་ཞིག་སྤྲོད་ཀྱི་ཡོད་ཚུལ་དང་། གནོན་ཤུགས་དེའི་འོག་རེག་དུག་ཕོག་མཁན་ཚོའི་ནད་གཞི་དྲག་སྐྱེད་ཡོང་བར་འགོག་རྐྱེན་བཟོ་བཞིན་ཡོད་སྐོར་བཅས་བརྗོད་བྱུང་།

སྨན་པ་བསོད་ནམས་དོན་གྲུབ་ལགས་ཀྱིས་ཕྱི་ལུགས་སྨན་གཞུང་དུ་རེག་དུག་ལ་ངོས་འཛིན་དང་བཅོས་ཐབས་ཅི་ཡོད་ངོ་སྤྲོད་གནང་རྗེས། གཉན་ནད་རེག་དུག་ནི་འཛམ་གླིང་ཧྲིལ་པོའི་ཐུན་མོང་གི་དཀའ་ངལ་ཞིག་ཡིན་ཚུལ་བརྗོད་དེ། ད་བར་རེག་དུག་ནད་གཞི་དེའི་རྐྱེན་གྱིས་འཛམ་གླིང་ནང་མི་ས་ཡ་ ༥༠ ཙམ་ལ་ཤུགས་རྐྱེན་སྤྲད་ཡོད་པ་དང་། ས་ཡ་ ༣༥ ཙམ་འདས་གྲོངས་སུ་ཕྱིན་ཡོད་སྐོར། ལྷག་པར་དུ་རྒྱ་བལ་གཉིས་ཀྱི་བོད་མིའི་ཁྲོད་རེག་དུག་ཕོག་མཁན་བརྒྱ་ཆ་ (༠.༠༤%)  ཆགས་ཡོད་སྐོར་གསལ་བཤད་གནང་སོང་ལ། རེག་དུག་ནད་གཞིའི་ཡོང་ཁུངས་གཙོ་བོ་འཁྲིག་སྤྱོད་ཡིན་སྟབས། མ་འོངས་པར་རེག་དུག་ནད་གཞི་སྔོན་འགོག་ཆེད་ཕོ་མོའི་ལུས་འབྲེལ་དང་མཚན་མཐུན་ཆགས་སྤྱོད་གང་ཡིན་རུང་འགྱིག་ཤུབ་བེད་སྤྱོད་གཏོང་རྒྱུ་ཧ་ཅང་གལ་ཆེན་ཡིན་སྐོར་སོགས་བརྗོད་བྱུང་།  

མཐའ་མར་སཱོ་ལཎ་གཞིས་ཆགས་ནས་ཡིན་པའི་གཉན་ནད་རེག་དུག་ཕོག་མཁན་སྐུ་ཞབས་བློ་བཟང་ལགས་ཀྱིས། ཁོང་དང་ཁོང་གི་ཆུང་མ་གཉིས་ལ་ཐོག་མར་རེག་དུག་ནད་གཞི་ཇི་ལྟར་ཕོག་མིན་དང་། བར་དུ་དཀའ་ངལ་ཇི་ལྟར་འཕྲད་ཚུལ་སོགས་ངུ་བཞིན་དུ་མང་ཚོགས་ལ་ངོ་སྤྲོད་བྱས་སོང་ལ། སྤྱི་ཚོགས་ནང་རེག་དུག་ཕོག་མཁན་ཚོར་མཐོང་ཚུལ་ཇི་འདྲ་ཡོད་མེད་ཐད་ཁོང་གིས། གྲོང་པ་ཁྱིམ་མཚེས་རྣམས་ཀྱིས་ཁོང་བཟའ་ཟླ་གཉིས་ལ་རེག་དུག་ན་ཚ་ཡོད་པ་རེད་ཟེར་ནས་མཐོང་ཆུང་དང་ཁྱད་གསོད་བྱེད་ཀྱི་ཡོད་སྟབས། གཞིས་གྲོང་ནང་སྡོད་མ་ཐུབ་པའི་དཀའ་ངལ་འཕྲད་ཀྱི་འདུག ང་རང་རེག་དུག་ཉིན་མོའི་མཛད་སྒོར་ཡོང་དོན་ནི། བོད་པའི་སྤྱི་ཚོགས་ནང་རེག་དུག་ནད་པ་ཚོར་ལྟ་སྟངས་ཡག་པོ་ཡོང་ཆེད་དང་། རེག་དུག་ནད་པ་ཚོས་ཀྱང་སོ་སོའི་ན་ཚ་སྦ་གསང་མ་བྱས་པར་དུས་ཐོག་སྨན་ཁང་ལ་སྟོན་རྒྱུའི་ཆེད་དུ་ཡིན་ཞེས་བརྗོད་བྱུང་། 

འདི་གའི་གསར་ཁང་གིས་ཤེས་རྟོགས་བྱུང་གསལ་ལ།  ༢༠༠༨ ལོར་ངྷ་རམ་ས་ལར་གཉན་ནད་རེག་དུག་གི་ནད་གཞི་ཕོག་མཁན་བོད་མི་ ༣༠༠ ཙམ་ཡོད་འདུག