ཉེ་སྔོན་ཧན་ཆིག་དུས་བབ་གསར་ཤོག་གིས་རྒྱ་ནག་མི་མང་གི་བསམ་ཚུལ་བསྡུ་རུབ་སྐབས། བརྒྱ་ཆ་ ༩༠ དམངས་གཙོ་ནི་སྤྱི་ཚོགས་ལམ་ལུགས་ཡག་ཤོས་ཡིན་པའི་ངོས་འཛིན་བྱས་འདུག
ཟླ་སྔོན་མའི་ནང་རྒྱ་ནག་ཧན་ཆིག་དུས་བབ་གསར་ཤོག་གིས་རྒྱ་ནག་མང་ཚོགས་ཁྲོད་དམངས་གཙོའི་བཅོས་སྒྱུར་ཐད་བསམ་ཚུལ་བསྡུ་ལེན་གྱི་ཉམས་ཞིབ་བྱ་འགུལ་ཞིག་སྤེལ་ཡོད་པ་དང་། ཉམས་ཞིབ་ཀྱི་མཇུག་འབྲས་ལ་མི་མང་བརྒྱ་ཆ་ ༩༠ ཡིས་དམངས་གཙོ་ནི་སྤྱི་ཚོགས་ལམ་ལུགས་ཡག་ཤོས་ཡིན་པའི་ངོས་འཛིན་གནང་ཡོད་འདུག ཧན་ཆིག་དུས་བབ་གསར་ཤོག་ནི་རྒྱ་ནག་གཞུང་འབྲེལ་མི་དམངས་ཉིན་རེའི་གསར་ཤོག་གི་སྟེང་འཛིན་འོག་ཡོད་པའི་རྒྱལ་སྤྱི་རང་བཞིན་གྱི་གསར་ཤོག་ཅིག་ཡིན་པར་མ་ཟད། ལྷག་པར་དུ་འབྱུང་འགྱུར་གྱི་ལོ་རྗེས་མའི་ནང་རྒྱ་གཞུང་གི་མཐོ་རིམ་མགོ་ཁྲིད་ཚོ་བརྗེ་སྤོར་བྱེད་དགོས་ཀྱི་ཡོད་སྟབས། དུས་མཚམས་གནད་འགག་ཅན་དེ་འདྲ་ཞིག་ལ་རྒྱ་ནག་ནང་དམངས་གཙོའི་བཅོས་སྒྱུར་ཐད་བསམ་ཚུལ་བསྡུ་ལེན་གྱི་བྱ་འགུལ་སྤེལ་ཏེ་གྲངས་འབོར་ཕྱིར་བསྒྲགས་བྱས་པ་དེར། རྒྱལ་སྤྱིའི་གསར་ལམ་ཁག་གིས་དོན་སྣང་ཤུགས་ཆེན་བྱེད་བཞིན་ཡོད་འདུག
ཧན་ཆིག་དུས་བབ་གསར་ཤོག་གིས་མང་ཚོགས་ཁྲོད་བསམ་ཚུལ་བསྡུ་ལེན་གྱི་བྱ་འགུལ་དེ་ནི། ད་ལོའི་ཕྱི་ཟླ་ ༡༡ ཚེས་ ༢༥ ནས་ ༢༩ བར་ཉིན་ལྔའི་རིང་། རྒྱ་ནག་པེ་ཅིན་དང་། ཧྲང་ཧེ། ཀུང་ཀྲིག ཁྲང་ཧྲ། ཁྲིན་ཏུ། ཞི་ཨན། ཧྲན་ཡཱང་སོགས་གྲོང་ཁྱེར་ཆེ་ཁག་ ༧ ནང་སྤེལ་ཡོད་པ་དང་། ཁྱོན་བསྡོམས་བསམ་ཤོག་ ༡༠༠༩ ལྷག་བསྡུ་རུབ་བྱས་ཡོད་འདུག
ཧྥ་རན་སིའི་རླུང་འཕྲིན་གསར་ཁང་གིས་ཧན་ཆིག་དུས་བབ་གསར་ཤོག་གི་དམངས་གཙོའི་བསམ་ཚུལ་བསྡུ་རུབ་སྐོར་གྱི་གནས་ཚུལ་སྤེལ་བའི་ནང་། དེང་སྐབས་དམངས་གཙོའི་ཐ་སྙད་དེ་རྒྱ་ནག་སྤྱི་ཚོགས་ནང་སྔར་ལས་ལྷག་པར་ཤུགས་ཆེ་རུ་འགྲོ་བཞིན་ཡོད་པ་དང་། ཐེངས་འདིར་དམངས་གཙོ་བཅོས་བསྒྱུར་དང་འབྲེལ་བའི་རྣམ་གྲངས་ཁ་ཤས་ཐད་མང་ཚོགས་ཀྱི་བསམ་ཚུལ་བསྡུ་རུབ་བྱས་སྐབས། མཉམ་ཞུགས་གནང་མཁན་མང་ཚོགས་ཀྱི་བརྒྱ་ཆ་ ༨༧་༢ ཀྱིས་དམངས་གཙོ་ནི་སྤྱི་ཚོགས་ལམ་ལུགས་ལེགས་པོ་ཞིག་ཡིན་པའི་ངོས་འཛིན་དང་། བརྒྱ་ཆ་ ༧༧་༢ ཀྱིས་དམངས་གཙོ་ནི་རྒྱལ་སྤྱིའི་འཕེལ་འགྱུར་གྱི་ཁ་ཕྱོགས་ཤིག་ཡིན་པའི་ངོས་འཛིན་བྱས་ཡོད་པར་མ་ཟད། མི་མང་ཚོགས་ཕྱེད་ཀ་ལྷག་གིས་རྒྱ་ནག་གི་གོམ་པ་རིམ་འགྱུར་གྱི་དམངས་གཙོའི་བཅོས་བསྒྱུར་དེ་ནི། ད་ལྟའི་རྒྱ་ནག་གི་འཕེལ་རྒྱས་ཀྱི་གནས་སྟངས་དང་འཚམ་པོ་མེད་པའི་བསམ་ཚུལ་བཏོན་ཡོད་འདུག
གཞན་ཡང་། ཉེ་བའི་ཨ་རབ་ཀྱི་དམངས་གཙོའི་གསར་བརྗེ་ལས་འགུལ་གྱི་ཐད་ལ། མང་ཚོགས་ཁྲོད་ཨ་རབ་ཀྱི་དམངས་གཙོའི་རླབས་རྒྱུན་གྱིས་དཀྱིལ་ཤར་ཡུལ་གྲུའི་ནང་ཤུགས་རྐྱེན་སླེབས་ཐུབ་མིན་ཐད་བསམ་ཚུལ་བསྡུ་ལེན་བྱས་པར། བརྒྱ་ཆ་ ༤༡་༧ གྱིས་སླེབས་དཀའ་བའི་ངོས་འཛིན་དང་། བརྒྱ་ཆ་ ༡༥་༩ ཡིས་ངེས་པར་དུ་སླེབས་སྲིད་པའི་ངོས་འཛིན་བྱས་ཡོད་པ་དང་། དེ་མིན་གྱི་བརྒྱ་ཆ་ ༤༢་༤ ཙམ་གྱིས་ཁ་མཚོན་གཅོད་དཀའ་བའི་བསམ་ཚུལ་བཏོན་ཡོད་འདུག
སྙིང་རྗེ། དགྱ་ནག་མི་མང་གིས་དམངས་གཙོ་ཟེར་བའི་ལམ་ལུགས་འདི་དངུལ་མང་པོ་བཟོ་ཐུབ་ཀི་རེད་བསམ་གྱི་ཡོད་རེད། གད་མོ་ཤོར་བ་རང་རེད།
དམངས་གཙོ་འདོད་མིན་ལ་མང་མོས་ཤིག་བསྡུ་ཅི་ལ་དགོས། དེ་ནི་ཚོད་དཔག་ཐུབ་པ་ཞིག་རེད།
་་་བསམ་ཤོག་ ༡༠༠༩ ལྷག་་་་ཅེས་པའི་གོ་དོན་ཅི།
ཧན་ཆིག་དུས་བབས་གསར་ཤོག་ལ་བསྔགས་བརྗོད་ཡོད།་ ལས་འགུར་དེ་མི་མཐུན་ནས་སྤེལ་རོགས་གནང་། སྙིང་ཐགས་པ་ནས་བཀའ་དྲིན་ཆེ་ཞུ་བཞིན་ཡོད་།
ཧན་ཆིག་དུས་བབ་གསར་ཤོག་ལ་སེམས་སྡིང་ནས་བསྔགས་བརྗོད་ཡོད། ལས་ཁུར་དེ་རིགས་མང་པོ་སྤེལ་རོགས། ཐུགས་རྗེ་ཆེ།