ཚངས་སར་འཕྲིན་ལས།
ཡང་བསྐྱར་ངས་སྐད་ཆ་ཁ་ཤས་བཤད་འདོད་པ་ནི་འུ་ཚང་གི་མྱི་བུ་དག་གི་ཤ་དང་རུས་གསེང་དུ་ཐིམ་པའི་གུ་དོག་པའི་བསམ་བློའི་འཆིང་ཐག་དང་། ཕ་མེས་ཡང་མེས་ནས་བརྒྱུད་ཡོང་བའི་ལུས་ཀྱི་དབང་རྩའི་གསེང་ནས་རྒྱུ་བཞིན་པའི་ཆོལ་ཁ་ཆོས་ལུགས་ཀྱི་འཐེན་ཁྱེར་འདི་ལ་འཐབ་རྒོལ་ཐེངས་གཅིག་བྱེད་འདོད་པ་དེ་ཡིན། འདིའི་ཕུང་དཀྲུགས་དང་ཉམས་རྒུད་གཏོང་བའི་དོན་སྙིང་རྣམས་ལོ་རྒྱུས་ཀྱི་གླེགས་བམ་ཁྲོད་ནས་མཐོང་ཐེངས་རེར། ང་ཚོའི་མི་རིགས་འདི་དྲང་བདེན་དང་ཞི་བདེ་ལ་དགའ་ཞིང་དཔྱོད་ཤེས་ཀྱི་བློ་མིག་རྣོ་བའི་ཕུལ་བྱུང་གི་མི་རིགས་ཤིག་ཡིན་ཞེས་ཤོད་བཞིན་པའི་སྐད་ཆ་འདི་དག་རང་མཇེ་རང་བསྟོད་དང་རང་མགོ་རུལ་བ་དེ་རང་སྣས་མ་ཚོར་བའི་གནས་བབ་ལས། དོན་དངོས་རྨོངས་དད་ལ་དགའ་ཞིང་དཔྱོད་ཤེས་ཀྱི་བློ་མིག་དང་རང་རྟོན་གྱི་བསམ་བློ་བྲལ་བའི་མི་རིགས་ཤིག་ཡིན་པར་ཁ་ཕྱོགས་ལ་རྒྱུས་ལོན་བྱས་ན་ཤེས་རྟོགས་ཐུབ་པ་ཞིག་རེད། མ་ཟད་སྐབས་དང་དུས་ཁེལ་ན་ཁག་དཀྲི་ལ་དགའ་ཞིང་གཞན་གྱི་ཚེ་སྲོག་དང་མི་གཞི་ལ་རིན་ཐང་འཇོག་མི་ཤེས་མཁན་གྱི་མི་རིགས་ཤིག་ཡིན་པ་ནི་ཁ་སང་དེ་རིང་གི་གནས་ཚུལ་དག་ལ་གཞིགས་ན་ཤེས་ངེས་པ་ཞིག་རེད།
གསོན་ཚུགས་མེད་པའི་རྣམ་ཤེས་གླེང་བ།
འུ་ཚང་ལ་ཡོད་ངེས་པའི་སྟོབས་ཤུགས་དང་ནུས་ཤུགས་ནི་སྤུན་ཟླའི་བར་གྱི་ཚེ་སྲོག་གི་ཤ་འཁོན་དང་ཆོལ་ཁ་ཆོས་ལུགས་ཀྱི་འགལ་འདུའི་རྩོད་རྙོག་གླེང་ནས་ཁུ་ཚུར་གནམ་དུ་འཕྱར་རྒྱུ་ལས། ཁ་ཕར་ལ་འཁོར་ཏེ་སྤུན་ཟླ་ནང་ཁུལ་དུ་སྙིང་དམར་བསྟན་ནས་མི་རིགས་ཀྱི་བདེ་སྡུག་དང་། མ་འོངས་པའི་འུ་ཚང་གི་ཁྱིམ་གཞིས་འཚོ་གནས་ཐག་གཅོད་གང་འདྲ་བྱེད་དགོས་མིིན་གྱི་སྐོར་གླེང་མཁན་ཞིག་ཕལ་ཆེར་མེད་པ་འདྲ། གལ་སྲིད་རེ་གཉིས་ཡོད་པའི་དབང་དུ་བཏང་ནའང་དེ་རྣམས་ཀྱི་རང་རིགས་ཀྱི་བདེ་སྡུག་དང་འབྲེལ་བའི་སྐད་ཆ་ཁ་ཤས་གླེང་བ་དང་མཉམ་དུ་ས་འོག་གཤིན་རྗེའི་འཇིག་རྟེན་དུ་རྫོང་ལ་ཁད་བྱེད་པ་མ་ཟད་བདུད་དང་འདྲེ། ལྟ་ལོག་དང་བསྟན་བཤིག་སོགས་ཟེར་ནས་ཞྭ་མོ་ནག་པོ་གཡོགས་ནས་དངོས་ཤུགས་བརྒྱུད་གསུམ་ནས་གནོད་ཤུགས་སྤྲོད་ཅི་ཐུབ་བྱེད་པའི་ཐལ་ཆ་ཆེ་བའི་བྱ་སྤྱོད་འདི་རེད། ངོ་གདོང་སྐྱོ་བོ་འདི་དག་ལ་ཞིབ་བལྟ་ཐེངས་རེ་བྱས་ཚེ་འུ་ཚང་གི་སྒེར་ཚུགས་དང་མི་གཞིའི་སྙིང་སྟོབས་དེ་བོར་ཟིན་པ་གཞི་ནས་ངེས་ཤེས་རྙེད་པ་མ་ཟད་བསྟོད་པ་ལ་དགའ་བའི་འུར་སྒྲོག་རིང་ལུགས་པ་ཞིག་ཡིན་པ་ཤེས་ནུས། བལྟས་ཚོད་ལ་ཁ་འོ་མ་ལས་དཀར་ཞིང་བུ་རམ་ལས་མངར་བའི་སྙན་ལ་འབྲེལ་ཆགས་པའི་སྐད་ཆ་རེ་སྟོང་བཤད་བྱེད་པ་ལས་སྤྱིར་དམངས་ཀྱི་བདེ་སྡུག་ལ་བློ་ཕྱོགས་ཤིང་དུས་རབས་ཀྱི་སྲོག་དབང་འཚོལ་ཤེས་མཁན་ནི་ཕལ་ཆེར་ཉུང་ཉུང་རེད། གང་ལྟར་གཅིག་གྱུར་མེད་པའི་འདུ་ཤེས་འདིས་ང་ཚོའི་གཅིག་གྱུར་གྱི་གོང་བུ་དང་བུ་རབས་ཚ་རྒྱུད་ཀྱི་ཁྱིམ་གཞིས་འཚོ་བརྟེན་ཡོད་ཚད་ཁྱུར་མིད་བྱས་ཟིན་པ་མ་ཚད་དཔྱོད་ཤེས་ཀྱི་བློ་མིག་གདང་རན་པའི་དུས་ཚིགས་ཀྱི་སོ་མཚམས་འདི་ལ་སླེབས་ཀྱང་ད་དུང་ང་ཚོའི་མི་རིགས་འདི་ནར་སོན་གྱི་མེད་པའི་ལོ་རྒྱུས་ཀྱི་གོ་རིམ་ཁྲོད་དུ་ལུས་འདུག་པ་འདི་རེད། འདི་ལྟར་ང་ཚོ་རྒན་འཁོགས་སུ་གྱུར་སོང་བའི་ལོ་རྒྱུས་དང་། རྩ་བ་རུལ་སོང་བའི་དོན་སྙིང་དག་བཤད་ཀྱང་རྫོགས་རྒྱུ་མེད་པའི་ལོ་རྒྱུས་ཀྱི་དཔང་རིང་མོ་ཡོད་པ་འདི་དག་བསྐྱར་བཤད་རྒྱག་པ་ལས་སང་ཉིན་གྱི་ཁྱིམ་གཞིས་དྲོན་མོ་འཚོལ་ཐབས་ཀྱི་ནུས་ཤུགས་ཤིག་མཉམ་དུ་བཙལ་ན་ཅི་འདྲའི་མི་འོས་སམ།
ཡང་སྙིང་འཐོབ་དགོས་པའི་མ་རྩ་གླེང་བ།
མདོ་དོན་མི་རིགས་ཤིག་ལ་གསོན་ཤུགས་དང་ངར་ཤུགས་ཡོད་མེད་ནི་མི་རིགས་དེའི་མྱི་བུ་དག་གི་མི་གཞི་སྙིང་སྟོབས་དང་མི་རིགས་རིང་ལུགས་ཀྱི་ལྟ་བ་རང་རྐྱ་འཕེར་བ་ཡོད་མེད་དེའི་ཐོག་ནས་འཇོག་དགོས་པ་མ་ཟད་དམིགས་འདུན་གཅིག་གི་ཆེད་རྒྱག་མཆོངས་ཕོད་པའི་འགུལ་ཤུགས་ཡོད་མེད་སོགས་ལ་རག་ལས་པས། ང་ཚོའི་ཐོབ་ཤོར་གྱི་ལོ་རྒྱུས་ཇི་ལྟར་གཟེངས་རིང་ན་དེའི་ཚོད་ཀྱིས་ང་ཚོ་གཅིག་གྱུར་གྱི་ནུས་ཤུགས་དང་གསར་གཏོད་ཀྱི་སྙིང་སྟོབས་མེད་ན། ཆོལ་ཁ་ཆོས་ལུགས་ཀྱི་གཡས་འཐེན་གཡོན་འཐེན་བྱས་པའི་མཇུག་འབྲས་དེའི་ཁྲོད་དུ་ང་ཚོ་ལ་རྒྱལ་ཁའི་ལམ་བུ་ཞིག་མེད་པ་བོད་སིལ་བུའི་དུས་སྐབས་ནས་ད་ལྟའི་བར་གྱི་ལོ་རྒྱུས་ངོ་གདོང་དག་རེ་རེ་ནས་མིག་ཉུལ་ཞིག་བྱོས་དང་རྟོགས་ནུས་པ་ཞིག་རེད། ད་ནི་མི་བུ་སྒེར་ལ་མཚོན་ན་བོད་པ་ཟེར་བའི་ཡིག་འབྲས་གཉིས་པོ་འདི་ཤ་དང་རུས་པའི་བར་གསེང་དང་། རྣམ་ཤེས་ཀྱི་གོ་རིམ་ཁྲོད་དུ་ཐིམ་ཡོད་ནས་བཟུང་སྟེ་ས་ཡ་དྲུག་གི་བདེ་སྡུག་གླེང་བ་ལས། ནང་ཁུལ་དུ་ང་དང་ཁྱོད་ཀྱི་ཁ་ཕོར་རྩོད་པའི་དུས་ཚོད་ཀྱི་སོ་མཚམས་ཞིག་ཕལ་ཆེར་ལྷག་མེད་པར་འདྲ།
འགྱེལ་མ་ལང་གི་ང་ཚོ་གླེང་བ།
འདིར་ལྟར་ང་ཚོ་ངོ་མ་གཉིད་ལས་སད་རན་པའི་དུས་ཚིགས་ཤིག་གི་དཀྱོག་མཚམས་ན་བསླེབ་དགོས་པ་མ་ཟད་ཕྱིས་དྲགས་སོང་བ་རེད། གཡས་གཡོན་གྱི་རང་བཙན་ཡོད་པའི་རྒྱལ་ཁབ་འབྲུག་དང་བ་ཡུལ་འབར་མ་ཕྱི་སོག་སོགས་ང་ཚོ་ལས་མི་འབོར་ཉུང་བའི་རྒྱལ་ཁབ་འདི་དག་གཟིགས་དང་། ཁོང་ཚོ་ད་ལྟ་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྐུབ་སྟེགས་ཡོད་པ་མ་ཟད་རྒྱལ་ཁབ་ཀྱི་ངོ་བོའི་ཐོག་ནས་འཚོ་སྡོད་བྱེད་ཐུབ་པའི་རྒྱུ་རྐྱེན་ལ་གཞིགས་དང་། ཧམ་པ་ཆེ་དྲགས་པ་མིན་ན་བདག་གི་མཐོང་ཚུལ་དུ་དཔལ་འབྱོར་དང་མི་འབོར་རིག་གཞུང་སོགས་གང་ཐད་ནས་གཤིབ་བསྡུར་བྱས་པ་ཡིན་ན། ང་ཚོ་ཚད་མཐོ་བ་མེད་ན་དོ་མཉམ་པ་ཞིག་ཕལ་ཆེར་ཡིན་ཚོད་རེད། འོན་ཀྱང་ང་ཚོར་རྒྱལ་ཁབ་ཀྱི་ཐོབ་མིང་མེད་པར་མ་ཟད་རང་ས་རང་ཡུལ་དེ་ཡང་གཞན་ལག་ལ་ཤོར་ནས་ཡུལ་ཕྱོགས་གང་ས་ནས་ཐུབ་ཚོད་དང་བརྙས་བཅོས་སྣ་ཚོགས་མྱངས་ཏེ་སྲན་མ་ཐང་ལ་གཏོར་བ་བཞིན་འཛམ་གླིང་གི་ས་ཕྱོགས་གང་སར་ཁ་འཐོར་ནས་འཁྱམ་སྡོད་བྱེད་དགོས་བྱུང་བའི་རྒྱུ་རྐྱེན་གཙོ་བོ་ནི། མཐུན་སྒྲིལ་གྱི་བརྟན་ལྷིང་མེད་པའི་དབང་གིས་བྱུང་བ་ཡིན་པ་མིག་དང་ཚོར་ཤེས་ཡོད་མཁན་ཞིག་ཡིན་ནས་བཟུང་སྟེ་ཤེས་ཡོད་ཚོད་རེད། དེ་བས་རེ་བ་གཞན་ལ་མ་བཅོལ་བར་ད་ནི་ང་ཚོ་འགྱེལ་ས་ནས་ལང་རན་སོང་ལ། རྨ་ཁ་ཡོད་སར་དུས་ཐོག་གི་སྨན་བཅོས་བྱེད་རན་སོང་། གང་ལྟར་ང་ཚོ་རྨི་ལམ་གཅིག་ལས་གཉིས་མེད་པས་དུས་དང་མཐུན་པའི་སྲོག་དབང་ཞིག་བཙལ་ན་ཅི་འདྲའི་མི་ཡིས་བྱེད་སྟངས་ཤིག་རེད།
སྙིང་སྟོབས་མེད་པའི་སྙིང་སྟོབས་གླེང་བ།
ང་ཚོ་དོན་དངོས་བཙན་པོའི་རྣམ་ཤེས་ཀྱི་དྲོད་མ་ཡལ་བའི་མི་རིགས་ཤིག་ཡིན་ཞེས་ལོ་རྒྱུས་ཀྱི་ཡིག་ཆ་ཚད་ལྡན་དག་ནས་གནམ་བཤད་ས་བཤད་མང་པོ་ཞིག་བྱས་འདུག་པ་ནི། བཙན་པོའི་དུས་རབས་ཡོལ་ནས་ཐ་སྙད་དེ་དོན་གྱིས་སྟོང་བའི་ཐ་སྙད་ཅིག་ལ་ལོག་སོང་བ་ལས་ད་ལྟ་ང་ཚོའི་མགོ་ཐོག་ཏུ་ཐ་སྙད་དེ་བཞག་ན་ཤིག་གི་ཐོག་སྟ་རེ་ཟེར་བའི་དཔེ་ལས་གླེང་རིན་ཡོད་པ་ཞིག་ཕལ་ཆེར་མ་ཡིན། དོན་དངོས་ཐོག་འུ་ཚོར་སྙིང་སྟོབས་མེད་པའི་སྙིང་སྟོབས་ཙམ་ལས་དྲན་ཤེས་ཀྱི་ཁྲོད་དུ་མི་ཤོང་བའི་ལོ་རྒྱུས་ཀྱི་ཤོག་ལྷེ་གསར་པ་ཞིག་བསྐྲུན་མྱོང་མེད་ལ། བཤད་རྒྱུ་ཡང་མེད་སོང་བ་རེད། གོ་རིམ་མེད་པའི་བསྟོད་ར་རྐྱང་རྐྱང་གི་ཁྲོད་ནས་འུ་ཚང་གི་མྱི་བུ་ཚོས་སྡོམ་ཚིག་བཀོད་མྱོང་མེད་པ་མ་ཟད་ལྟོ་བ་ཟས་ཀྱིས་འགྲངས་ཚེ་ལྷ་སྒྲུང་རེ་བཤད་དེ་སྡོད་རྒྱུ་ལས་ཅི་ཡང་མེད་ངེས། “སྤྱིར་བསམ་གཞིག་ལ་གོམས་མེད་པའི་མི་རིགས་དེ་ནི་མི་རིགས་སྐྱོན་ཅན་ཞིག་ཡིན་ངེས་པ་དང་། རང་མཐོང་གི་མིག་ཤེས་ཉམས་ཤིང་རང་སྐྱོན་མི་ཚོར་བའི་མི་རིགས་ལ་གཏན་དུ་འཕེལ་རྒྱས་མི་སྲིད་”ཅེས་གསུངས་པ་ལྟར་བདེན་ཁ་སྟེར་འོས་པའི་གལ་ཆེན་རང་བཞིན་གྱི་སྡོམ་ཚིག་ཅིག་རེད།
རང་ཉིད་ཀྱི་ཚོར་ཤེས་ཀྱིས་བཞེངས་པའི་མཐའ་མཇུག་གི་སྐད་ཆ།
སྤུན་ཟླ་ཚོ། ཡང་སྙིང་མནོ་བསམ་ཞིག་ཐོངས་དང་། ས་སྤར་མོ་གང་གི་བདག་དབང་མེད་པའི་འུ་ཚོའི་ནང་ཁུལ་གྱི་ཞེན་ཁོག་དང་ལ་རྒྱ་དེ། མི་རིགས་ཤིག་གི་བདེ་སྡུག་དང་འཐབ་རྩོད་ལ་ཕན་པའི་བསམ་བློའི་ཀུན་རྟོག་གི་ངོ་བོ་ཞིག་ལ་བསྒྱུར་ན་ཅི་འདྲའི་གཟི་བརྗིད་དང་ནུས་ཤུགས་ཤིག་མེད་དམ། རེད་ཡ་སྤུན་ཟླ་ལགས། ངས་འདི་ལྟར་མེད་མུག་གཉིས་ཀྱི་སོ་མཚམས་གླེང་དགོས་དོན་གཙོ་བོ་ནི། ཁ་སང་གི་ལོ་རྒྱུས་ལ་ནག་ཐིག་མང་བའི་རྐྱེན་གྱིས་བཤད་པ་ལས་དོན་དངོས་མི་གཞི་ལ་ཚད་བཀག་དང་། རང་རིགས་ལ་སྨད་པ་མ་ཡིན་པ་དེ་ཉན་བྱེད་ཀྱི་རྣ་བ་དང་། བསམ་བྱེད་ཚོར་ཤེས་ཡོད་མཁན་ཞིག་ཡིན་ནས་བཟུང་སྟེ་ཕལ་ཆེར་ཤེས་ཚོད་རེད། བཤད་བཤད་པའི་མཐར་འདིར་ལྟར་སོང་ཤུལ་ནས་”འདི་ལྟ་བུའི་ཁ་བྱང་<གླེང་བ་གང་མང་>ཞིག་བཏགས་ཏེ་རྒྱུ་འབྲས་བློ་མིག་དང་ལྡན་པའི་སྐད་ཆ་ཞིག་བཤད་རྒྱུ་ཟེར་ན། མི་བུ་མང་དག་ཅིག་གིས་སྤྱི་ཚོགས་ཁྲོད་དུ་ཞུགས་མ་མྱོང་ཞིང་ཉམས་མྱོང་ཅི་ཡང་མེད་པའི་ན་གཞོན་ཞིག་གིས་སྐྱིད་པོ་ཤོད་ཀྱིན་འདུག་ཅེས་མགོ་བོ་འཕྲེད་དུ་གཡུག་མི་སྲིད་པའི་ངེས་པ་མེད་ལ། དེའང་གནས་ལུགས་གཏན་ནས་མེད་པའི་བྱེད་ཕྱོགས་ཤིག་མ་ཡིན་ཀྱང་གནས་ལུགས་ཁྱོན་ནས་ཡོད་པ་ཞིག་ཀྱང་ག་ལ་ཡིན་’’
བཀུར་འོས་ལྷ་མོ་སྐྱབས་དང་བོད་རང་བཙན་གྱི་ཕྱོགས་སུ་མ་གྲོས་བསམ་པ་གཅིག་མཐུན་དུ་ཡོད་པའི་བོད་རིགས་སྤུན་ཟླ་རྣམས་པ་ལགས།
བོད་རང་བཅན་ལེན་སྟངས་ཀྱི་འཆར་སྣང་ཁྲིམས་གཏུག་མ་ཞེས་པའི་རྩོམ་ཡིག་ཞིག་བྲིས་ནས་དུས་བབ་ཚང་ལ་བསྐུར་ཡོད། ཚང་མས་དུས་བབ་ཚང་ལ་བསམ་ཚུལ་ནང་དུ་བཀོད་རོགས་ཞུ་རོགས་བྱོས་དང་།
དྲ་ཐོག་ཏུ་བགྲོ་གླེང་བྱ་འདོད་ཆེན་པོ་ཡོད། མུ་མཐུད་ཅི་ཤེས་གང་འཇོན་བཤད་ཀྱི་ཡིན།། སྤུན་ཟླ་ཚོ་ངེས་པ་ཏུ་ཕེབས་རོགས་ཞུ་ཞུ།།
ལྷ་མོའི་ལགས་ཕེབས་པ་བཟང་། འདི་དང་འདི་ཟེར་ནས་ངོས་བཟུང་དགོས་ན་ཚད་འཛིན་ཚོད་ཡོད་ཁག་པོ་རེད། ང་ཚོའི་སྤྱི་ཚོགས་རེ་གཉིས་ཙམ་མ་གཏོགས་ཕལ་ཆེར་བའི་རང་གཤིས་དེ་འདི་འདྲ་རང་རེད།
དེང་སང་སྤྱིར་བཏང་དང་ཁྱོན་ཡོངས་ཀྱི་གནས་ལུགས་རེ་བཤད་པས་དེ་ཙམ་ཕན་ཐོགས་དཀའ་བས། གདོང་ལ་གཏད་ནས་མཛུབ་མོ་བཙུགས་ནས་དེ་དང་འདི་ཞེས་དབྱེ་ཞིབ་དང་བཅས་ལེགས་པར་བཤད་དགོས་པའི་དུས་ལ་བབས་འདུག་སྙམ་མོ།
མི་རིགས་ཤིག་ཡར་རྒྱས་ཀྱི་ལམ་བུར་སྙེག་དགོས་ན་མི་གཞི་ལ་ལེགས་བཅོས་བྱེད་དགོས་པའི་གནས་ལུགས་དེ་སྔར་ཞིག་ནས་མཁས་དབང་འཇམ་དབྱངས་ནོར་བུས་ཐེངས་མང་གསུང་ཡོད་ཀྱང་དོན་དངོས་ཐོག་ལག་ལེན་བྱེད་མཁན་སུ་ཞིག་ཡོད་ཨང་། རེད་་་་་ཉིད་ཀྱིས་ཀྱང་ཡག་པོ་ཞེ་དྲག་བྲིས་འདུག འདི་སྐོར་གྱི་དཔྱད་བརྗོད་ལེགས་པོ་ཞིག་ནི་བོད་ནང་ནས་འབྲི་གུང་ར་སེ་དཀོན་མཆོག་རྒྱ་མཚོའི་༼བོད་རེ་བ་ཅན།༽ཅེས་པ་དེ་རེད། གཅིག་བྱས་ན་ཉིད་ཀྱིས་བཀླགས་ཟིན་ན་ཐང་མོད། བཀླགས་མ་ཚར་ན་ངེས་པར་དུ་གཅིག་ཀློག་པའི་ངལ་བ་རྟེན་དགོས་པར་སྣང་། འདི་ནི་ཞོར་འཕྲོས་ཡིན།
མྱི་བུ།
དཔྱོད་ཤེས།
གསོན་ཚུགས།
སྒེར་ཚུགས།
མི་གཞི།
འགུལ་ཤུགས།
མི་བུ།།
བསམ་བློའི་ཀུན་རྟོག
རྒྱུ་འབྲས་བློ་མིག
ཁྲི་སྲོང་བཙན་གྱིས་ཚིག་མཛོད་དག་ཏུ་འཚོལ་ཅིག་ཟེར་བ་ལྟར་ངས་ཚིག་མཛོད་ཁག་མང་པོའི་ནང་གོང་གི་ཚིག་དེ་དག་བཙལ་ཀྱང་རག་མ་སོང་། ཚིག་མཛོད་གང་གི་ནང་ཡོད་པ་རེད་དམ། ད་ང་ཚོའི་གསར་རྒོད་འདི་ཚོ་མཁས་དྲགས་ནས་བོད་ཀྱི་ཚིག་མཛོད་ནང་མི་རྙེད་པའི་མིང་ཚིག་འབྲི་གི་འདུག་ག།
ཨ་ལགས་དམུ་དགེ་ཚང་གིས་སྔོན་ཆད་ཡི་གེས་སྐད་ལ་ཞབས་ཞུ་བསྒྲུབ་པ་རེད། ད་སྐད་ཀྱིས་ཡི་གེ་ལ་ཞབས་ཞུ་དགོས། སྔོན་མ་སྐད་གཞིར་བཞག་ནས་ཡི་གེ་བཟོས་པ་རེད། ད་སྐད་དེ་ཡི་གེ་ལ་བསྟུན་དགོས། དེ་མ་བྱས་པར་ལུང་ཚན་རེ་རེས་སོ་སོའི་སྐད་སོར་བཞག་བྱས་ན་རྗེས་མ་ཕ་མེས་ཡང་མེས་བཞག་པའི་བོད་ཀྱི་རིག་གཞུང་རྩ་ཆེ་དེ་ཚོ་གོ་ཡ་ཚོར་ཡ་མི་འདུག་ཟེར་ནས་གད་རྙིགས་གཡུག་རྒྱུའི་ཉེན་ཁ་མེད་པ་མ་རེད་ཅེས་གསུངས་པ་བདེན་པ་རེད།
མྱི་བུ།
དཔྱོད་ཤེས།
གསོན་ཚུགས།
སྒེར་ཚུགས།
མི་གཞི།
འགུལ་ཤུགས།
མི་བུ།།
བསམ་བློའི་ཀུན་རྟོག
རྒྱུ་འབྲས་བློ་མིག ཐ་སྙད་འདི་དག་མ་ཤེས་ཁུལ་བྱེད་ཀྱི་མ་འདུག་ལོ། བོད་གངས་ཅན་པའི་རྟོགས་སད་ཀྱི་དེད་དཔོན་དུ་འབོད་པའི་སྐུ་ཞབས་ཞོགས་དུང་སོགས་ཀྱིས་བཀོལ་སྤྱོད་བྱས་པ་རྒྱུ་མཚན་དུ་བྱས་ནས་རྣར་མ་སོང་མ་མདོག་མདོག་འདྲ་བྱས་པ་ཡིན་འདུག་ཀྱང་། དེང་སང་དུས་རབས་དང་མཐུན་པའི་ཐ་སྙད་འདི་དག་བཀོལ་སྤྱོད་བྱེད་ཐུབ་ན་དགེ་མཚན་འདུག་ལ། མི་རབས་གསར་བ་ཞིག་ཡིན་པའི་གསར་རྟགས་ཀྱང་འདི་ལ་མངོན་འདུག་སྙམ་མོ།
སྟག་རྩེ་དཔལ་ལྡན་ལགས་ཟིན་བྲིས་ཀྱི་བརྗོད་དོན་དངོས་ལ་གཞིག་ནས་དགོངས་ཚུལ་གནང་བར་རྗེས་སུ་ཡིད་རངས་ཡོད།
ཐོག་མའི་ཆར་དྲྭ་གྲོགས་ཚང་མ་ལ་འཚམས་འདྲི་ཞུ་བ་མ་ཟད། འདིར་ཕེབས་ནས་དགོངས་ཆར་གནང་བར་ཐུགས་རྗེ་ཆེ་ཞུ་རྒྱུ་ཡིན། སྤྱིར་རྩོམ་ཡིག་ལེགས་ཉེས་ལ་མ་ལྟོས་པར་རྩོམ་ཡིག་དེ་རོ་མྱོང་བྱེད་པ་ལ་སྒེར་རང་ངོས་ནས་མྱོང་གོམས་ཀྱི་ནུས་པ་དང་སྦྱོང་གོམས་ཀྱི་བག་ཆག་གང་འཚམ་ཞིག་མེད་ན་རྩོམ་ཡིག་དེའི་ལེགས་ཉེས་ལྕི་ཡང་གི་དབྱེ་འབྱེད་ཀྱི་ནུས་པ་མེད་པ་མ་ཟད་ཐ་སྙད་ཙམ་ལ་རྨོངས་མཁན་ཞིག་ལ་མཚོན་ན་ཡང་སྙིང་བརྗོད་དོན་མི་རྟོགས་པར་ཁག་མེད་ལ། དེ་འདྲ་བཤད་པ་དེ་དངོས་ཡོད་ཀྱི་བདེན་དོན་ཞིག་རེད། དྲྭ་གྲོགས་བསྟན་འཛིན་ཤེས་རབ་ལགས། སྐུ་ཉིད་ཤེས་རློམ་གྱི་ང་རྒྱལ་ལྕི་མོའི་གཞན་དབང་དུ་མ་སོང་བར་ཐ་སྙད་འདི་ཚོ་དོན་དངོས་མཁྱེན་འདོད་ཡོད་ན་འབྲོང་བུ་ཚེ་རིང་རྡོ་རྗེས་རྩོམ་སྒྱུར་བྱས་པའི་( ནུབ་ཕྱོགས་ཤེར་རྟོགས་རིག་པའི་ཚིག་བུམ་) ཞེས་པ་དེ་ལ་བསམ་གཞིག་གནད་དུ་བསྣུན་ནས་གཟིགས་དང་མཁྱེན་རྟོགས་ཐུབ་ངེས་རེད། གལ་སྲིད་དེ་ནས་མ་གོ་བ་ཡིན་ན་རྗེས་སུ་ཨ་ར་པཱ་ཙ་གསུང་ནས་འཇམ་དབྱངས་ལ་གསོལ་བ་འདེབས་བཞིན་རྗེས་སུ་ང་ལ་ཡིག་འབྲེལ་བྱོས་དང་ངས་གང་ཤེས་ཞུ་ཆོག
འགྱུར་མེད་བསྟན་འཛིན་ཟེར་བ་འདིས་ནར་མ་སོན་པའི་ཡིག་ནོར་ཀྱག་ཀྱོག་འབྲི་བཞིན་སྨྱོ་བཤད་རྒྱབ་པ་ལ་ལན་འབྲི་བའི་དོན་གོ་ཆུང་།
གངས་སྨྱུག་ལགས། རང་ཉིད་ཀྱི་བྲིས་པའི་ཚིག་རྡོག་ལ་འགོ་དང་མཇུག་ཡོད་མེད་མ་ཤེས་པར་མི་གཞན་གྱི་རྩོམ་ཡིག་ལ་དེ་འདྲ་ཡོད་མེད་ཤེས་ཁག་པོ་རེད།
མདོ་དོན་རང་གི་རྩོམ་ཡིག་འདིའི་འབྲི་དགོས་དོན་དང་ཁ་ཕྱོགས་ནི་”ཡང་བསྐྱར་ངས་སྐད་ཆ་ཁ་ཤས་བཤད་འདོད་པ་ནི་འུ་ཚང་གི་མྱི་བུ་དག་གི་ཤ་དང་རུས་གསེང་དུ་ཐིམ་པའི་གུ་དོག་པའི་བསམ་བློའི་འཆིང་ཐག་དང་། ཕ་མེས་ཡང་མེས་ནས་བརྒྱུད་ཡོང་བའི་ལུས་ཀྱི་དབང་རྩའི་གསེང་ནས་རྒྱུ་བཞིན་པའི་ཆོལ་ཁ་ཆོས་ལུགས་ཀྱི་འཐེན་ཁྱེར་འདི་ལ་འཐབ་རྒོལ་ཐེངས་གཅིག་བྱེད་འདོད་པ་དེ་ཡིན། ”
ཚངས་སར་ལགས་ཀྱི་ཕུལ་བྱུང་གི་རྩོམ་ཡིག་འདིར་ཐེམས་གཅིག་གཉིས་ཀྱིས་ཞིབ་ཀློག་ཅིག་བྱས་རྗེས་མྱོང་ཚོར་འདི་ལྟར་བྱུང་།
རེད། དངོས་གནས་རེད། བདེན་པ་རེད། ཡང་སྙིང་ཁྱེད་ཀྱི་རྩོམ་ཡིག་རིང་མོ་འདིས་བསྟན་དོན་གཉིས་སུ་བསྡུས་ན། ༼གུ་དོགས་པའི་བསམ་བློ་དང་༽༼ཕྱོགས་རིས་འཐེན་ཁྱེར་༽འདི་གཉིས་རེད། མི་རིགས་འདིའི་ཤུལ་བཞག་ལོ་རྒྱུས་ཀྱེ་གླེགས་བམ་དུ། ཅི་ཞིག་བཞེངས་འདུག་གམ་ཞེས་ན། བཙན་པའི་དུས་རབས་སྟོབས་འབྱོར་མངར་ཐང་རྒྱས་སྟེ་གནམ་སྔོན་པོར་ཁྱུད་མུད་གཏོང་ཚུལ་དང་། ས་ཟླུམ་པོར་ལག་མཐིལ་བཅུག་པའི་བརྗིད་ཉམས་ཅན་གྱི་ལོ་རྒྱུས་ཅིག་འདུག་ལ། རིག་པའི་སྒྱུ་འཕྲུལ་ལ་རྟེན་ནས་རྒྱ་ཡི་ཀོང་ཇོ་བསུ་མར་བྱས་པའི་མི་མིན་ལྷ་སྒྲུང་ལྟ་བུ་ལོ་རྒྱུས་ཞིག་ཀྱང་འདུག། རེད་དེ། ཐོར་བརྒལ་གྱི་དུས་རབས་ཞིག་གིས་བར་བཅད་བྱས་སྟེ། མགོ་དེ་ནས་བཟང་། བོད་ཀྱི་བཙན་པོ་མགོ་ལྟིང་བསློག་ཏེ། བོད་ཁམས་ཁྲག་གིས་བསྒྱུར་བའི་མུན་ནག་གི་དུས་རབས་ཞིག་སྐྱེས་མགོ་བརྩམས། མཐེན་ཁྱེར་གྱིས་ནང་དམེ་བྱས་པའི་ནད་ཡམས་ཞིག་དར་མགོར་བརྩམས། དེ་ལྟར་བྱས་བྱས་ནས་དུས་མཚམས་འདིའི་བར་མི་རིགས་འདིའི་བྱས་ངན་རེ་རེ་བསམ་བློ་ཞིག་གཏོང་དུས་དངོས་གནས་ངུ་བྲོ་བ་ཞིག་རེད་ལ། དགོད་བྲོ་བ་ཞིག་ཀྱང་ཇི་ལྟར་མིན། ངུ་དགོད་འདྲེས་མའི་བསྐྱར་སྐོར་ཡང་སྐོར་རེ་རྒྱག་དུས་མགོ་བོ་ན་ཞིང་སྙིང་རྩྭ་འཕར་ཡོང་བ་ཞིག་རེད་ལ། ཅི་བྱེད་མེད་པར་ཡིད་ཐང་ཆད་འགྲོ་བ་ཞིག་ཀྱང་རེད་བཞག དེ་ལྟར་ཡང་སྙིང་བླུན་པོ་ངས་བསྐྱར་བརྡར་བྱེད་མི་དགོས་པར་ཚངས་སར་ལགས་ཀྱིས་གོང་བརྗོད་བསྟན་དོན་གཉིས་སུ་བརྗོད་པར་དེ་ནི་མི་རིགས་འདིའི་སྐེད་རྩྭ་བསྡམས་སྟེ་འཆི་ལམ་དེད་མཁན་རེད་ལ། མི་རིགས་འདིའི་ཡན་ལག་བཀོག་ཏེ་རྩ་བར་བྲེལ་པའི་སྟ་གྲི་ངར་མ་ཞིག་ཀྱང་རེད་བཞག །འདིར་ཆེན་པོ་རྒྱ་མཚོ་ལས་ཆུང་ཆུང་ཆུ་ཐིག་ཙམ་ཞིག་བརྗོད་ན། སྔ་ལོར་གཅིག་པོའི་ནང་སྤུན་ཟླ་མི་རིགས་ནང་ཁུལ་འཐབ་རེ་བྱས་སྟེ་ཕན་ཚུན་མགོ་བོར་གྲི་ཡིས་བཅད་པའི་གནས་ཚུལ་མི་ཉུང་བ་ཞིག་གོ་ཐོས་རིག་རིག་འདི་རེད།
འདོར་དོན་མཐོ་སྒོང་གི་བུ་རྒོད་ཚོར། ཁྱེད་ཅགས་ལ་དོན་དངོས་པོའི་མི་བུ་སྒེར་ཚུགས་དང་མི་གཞི་དངོས་མ་ཞིག་ཡོད་ན་བསམ་གཞིགས་ལེབ་མོ་རེར་བྱས་སྟེ་འོད་སྟོང་ལྡན་པའི་ལམ་བུ་ཞིག་ཏུ་འགྲོ་མགོ་རྩོམས་དང་ཅིའི་མི་བཟང་། །
ཚངས་སར་ལགས་ཀྱི་ཕུལ་བྱུང་གི་རྩོམ་ཡིག་འདིར་ཐེམས་གཅིག་གཉིས་ཀྱིས་ཞིབ་ཀློག་ཅིག་བྱས་རྗེས་མྱོང་ཚོར་འདི་ལྟར་བྱུང་།
རེད། དངོས་གནས་རེད། བདེན་པ་རེད། ཡང་སྙིང་ཁྱེད་ཀྱི་རྩོམ་ཡིག་རིང་མོ་འདིས་བསྟན་དོན་གཉིས་སུ་བསྡུས་ན། ༼གུ་དོགས་པའི་བསམ་བློ་དང་༽༼ཕྱོགས་རིས་འཐེན་ཁྱེར་༽འདི་གཉིས་རེད། མི་རིགས་འདིའི་ཤུལ་བཞག་ལོ་རྒྱུས་ཀྱེ་གླེགས་བམ་དུ། ཅི་ཞིག་བཞེངས་འདུག་གམ་ཞེས་ན། བཙན་པའི་དུས་རབས་སྟོབས་འབྱོར་མངར་ཐང་རྒྱས་སྟེ་གནམ་སྔོན་པོར་ཁྱུད་མུད་གཏོང་ཚུལ་དང་། ས་ཟླུམ་པོར་ལག་མཐིལ་བཅུག་པའི་བརྗིད་ཉམས་ཅན་གྱི་ལོ་རྒྱུས་ཅིག་འདུག་ལ། རིག་པའི་སྒྱུ་འཕྲུལ་ལ་རྟེན་ནས་རྒྱ་ཡི་ཀོང་ཇོ་བསུ་མར་བྱས་པའི་མི་མིན་ལྷ་སྒྲུང་ལྟ་བུ་ལོ་རྒྱུས་ཞིག་ཀྱང་འདུག། རེད་དེ། ཐོར་བརྒལ་གྱི་དུས་རབས་ཞིག་གིས་བར་བཅད་བྱས་སྟེ། མགོ་དེ་ནས་བཟང་། བོད་ཀྱི་བཙན་པོ་མགོ་ལྟིང་བསློག་ཏེ། བོད་ཁམས་ཁྲག་གིས་བསྒྱུར་བའི་མུན་ནག་གི་དུས་རབས་ཞིག་སྐྱེས་མགོ་བརྩམས། མཐེན་ཁྱེར་གྱིས་ནང་དམེ་བྱས་པའི་ནད་ཡམས་ཞིག་དར་མགོར་བརྩམས། དེ་ལྟར་བྱས་བྱས་ནས་དུས་མཚམས་འདིའི་བར་མི་རིགས་འདིའི་བྱས་ངན་རེ་རེ་བསམ་བློ་ཞིག་གཏོང་དུས་དངོས་གནས་ངུ་བྲོ་བ་ཞིག་རེད་ལ། དགོད་བྲོ་བ་ཞིག་ཀྱང་ཇི་ལྟར་མིན། ངུ་དགོད་འདྲེས་མའི་བསྐྱར་སྐོར་ཡང་སྐོར་རེ་རྒྱག་དུས་མགོ་བོ་ན་ཞིང་སྙིང་རྩྭ་འཕར་ཡོང་བ་ཞིག་རེད་ལ། ཅི་བྱེད་མེད་པར་ཡིད་ཐང་ཆད་འགྲོ་བ་ཞིག་ཀྱང་རེད་བཞག དེ་ལྟར་ཡང་སྙིང་བླུན་པོ་ངས་བསྐྱར་བརྡར་བྱེད་མི་དགོས་པར་ཚངས་སར་ལགས་ཀྱིས་གོང་བརྗོད་བསྟན་དོན་གཉིས་སུ་བརྗོད་པར་དེ་ནི་མི་རིགས་འདིའི་སྐེད་རྩྭ་བསྡམས་སྟེ་འཆི་ལམ་དེད་མཁན་རེད་ལ། མི་རིགས་འདིའི་ཡན་ལག་བཀོག་ཏེ་རྩ་བར་བྲེལ་པའི་སྟ་གྲི་ངར་མ་ཞིག་ཀྱང་རེད་བཞག །འདིར་ཆེན་པོ་རྒྱ་མཚོ་ལས་ཆུང་ཆུང་ཆུ་ཐིག་ཙམ་ཞིག་བརྗོད་ན། སྔ་ལོར་གཅིག་པོའི་ནང་སྤུན་ཟླ་མི་རིགས་ནང་ཁུལ་འཐབ་རེ་བྱས་སྟེ་ཕན་ཚུན་མགོ་བོར་གྲི་ཡིས་བཅད་པའི་གནས་ཚུལ་མི་ཉུང་བ་ཞིག་གོ་ཐོས་རིག་རིག་འདི་རེད།
འདོར་དོན་མཐོ་སྒོང་གི་བུ་རྒོད་ཚོར། ཁྱེད་ཅགས་ལ་དོན་དངོས་པོའི་མི་བུ་སྒེར་ཚུགས་དང་མི་གཞི་དངོས་མ་ཞིག་ཡོད་ན་བསམ་གཞིགས་ལེབ་མོ་རེར་བྱས་སྟེ་འོད་སྟོང་ལྡན་པའི་ལམ་བུ་ཞིག་ཏུ་འགྲོ་མགོ་རྩོམས་དང་ཅིའི་མི་བཟང་། །
ཚངས་སར་ལྷ་ཡི་གདུང་རྒྱུད་ཀྱིས་གནས་ལུགས་ཀྱི་འབོད་སྒྲ་སྒྲོགས་པ་བཟང་།
ད་དུང་བསམ་བློའི་གོ་རྟོགས་དང་ཤེས་ཡོན་སོགས་འགྲོ་བ་མིའི་བཟང་སྤྱོད་རྣམས་
དབྱར་མཚོ་ལྟར་རྒྱས་པའི་རེ་བ་དང་ཡིད་ཆེས་བྱེད་བཞིན་ཡོད།
བཀྲ་ཤིས་བདེ་ལེགས།
ཚངས་སར་འཕྲིན་ལས་འདིས་འགོ་ག་བ་ནས་འཛུགས་ཀྱི་ཡོད། འཇུག་ག་བ་ནས་བསྡུས་ཀྱི་ཡོད་རྩ་ནས་མི་ཤེས། མ་ཟད་བརྗོད་བྱའི་གནས་འགག་ཅི་ཞིག་ཡིན་དེ་བས་ཀྱང་མི་ཤེས། སྤྱི་སྟངས་འདི་འདྲའི་རིགས་ཁ་ཤས་ཡོང་སྲོལ་འདུག ཧཧཧ།
ཐ་སྙད་འདི་དག་ཕྱིས་སུ་དེང་རབས་རྩོམ་པ་པོར་གྲགས་པ་དག་ལས་ཐོན་པ་འདྲ། རྩོམ་སྲོལ་གསར་གཏོད་ཡིན་ལབ་ན་ངོས་ལེན་ཞུ་དགོས་རྒྱུ་རེད་པ། ཡང་གཅིག་བཤད་ན་བོད་པ་ཚོར་རྩོམ་ཡིག་ལ་སྤྱིར་བཏང་གི་ཚིག་སྤྱད་ནས་ཚང་མས་གོ་ཆོག་ཆོག་ཅིག་ཆགས་ན། ངའི་རྩོམ་འདི་ལ་རྩོམ་ཉམས་མི་འདུག་བསམ་ནས་གང་ཐུབ་ཐུབ་ཀྱིས་ཐ་སྙད་བཙན་སྒྲིག་ལ་དགའ་བོ་ཡོད་པ།
ཧེ་རང་ཉིད་ཀྱིས་ཅི་བཤད་བདེན་པ་དང་ཚད་མ་འཛིན་པའི་བསམ་ཚུལ་འདི་ནར་མ་སོང་བའི་བྱིན་པའི་བསམ་ཚུལ་ཞིག་རེད།
བསམ་ཚུལ་འདི་སྔོན་མ་ང་ལ་ཡང་བྱུང་མྱོང་་་་་་ཁྱོད་ལ་ཡང་ཁག་མེད་་་་ག་ལེར་ཡར་རྒྱས་འགྲོ་གི་རེད།
བསྟན་འཛིན་ཤེས་རབ་ཁྱོད་ལ་ཁག་མེད་དཔེར་ན་ང་ཚོའི་བོད་ཡིག་ནང་ཡོད་པའི་ཀུན་རྟོག་གྱི་དོན་དང་ཚོར་བ་སྨྲ་བའི་རིང་ལུགས་འཛིན་མཁན་ཚོའི་ཀུན་རྟོག་གཉིས་ལ་ཡང་དོན་ཁག་ཁག་སོ་སོར་ཡོད་པ་རེད་ད། དེ་བཞིན་ཁོ་བ་ཚོའི་བོད་ཡིག་དང་བོད་ཡིག་གཉིས་ལོ་ཤས་རྗེས་ནས་དབྱིན་ཡིག་བོད་ཡིག་ལྟར་ཁག་ཁག་ཆགས་རྒྱུ་ཐེ་ཚོམ་མེད། ཨ་ལགས་དམུ་དགེ་ཚང་གིས་སྔོན་ཆད་ཡི་གེས་སྐད་ལ་ཞབས་ཞུ་བསྒྲུབ་པ་རེད། ད་སྐད་ཀྱིས་ཡི་གེ་ལ་ཞབས་ཞུ་དགོས་གསུངས་པ་དེ་ངོ་མ་གསུངས་ཚད་མ་རེད།
ཚིག་མཛོད་དག་ཏུ་འཚོལ་ཤིག
མྱི་བུ།
དཔྱོད་ཤེས།
གསོན་ཚུགས།
སྒེར་ཚུགས།
མི་གཞི།
འགུལ་ཤུགས།
མི་བུ།།
བསམ་བློའི་ཀུན་རྟོག
རྒྱུ་འབྲས་བློ་མིག
མིང་ཚིགས་འདི་དག་གི་དོན་དག་ཅི་ཞིག་རེད། ངོ་མས་ཡིན། འདི་དག་ལ་མཆན་འགྲེལ་ཞིག་མེད་ཚེ་མི་གོ་ཁོ་ཐག་རེད། ད་དུང་ཚིག་གྲུབ་རང་ཉིད་དེ་ལྟར་ཡིན་ནམ་ཡང་ན་ཡིག་ནོར་ཡིན་གང་ཡིན་མི་ཤེས་མོད། གང་ལྟར་རྩོམ་ཡིག་འདིས་ཅི་ཞིག་བཤད་ཀྱིན་པ་ངོ་མས་གོ་མ་སོང་། ད་ལྟ་བར་ངས་རང་ཉིད་ཀྱིས་བོད་ཡིག་ཅུང་ཙམ་ཤེས་སྙམ་བཞིན་ཡོད། ད་བལྟས་ཡོད་དུས་རང་ཉིད་ནོར་ཡོད་པ་འདྲ་འདུག