བོད་ནང་ཆོས་བྱས་ཀྱང་རྒྱ་གཞུང་གིས་ཆབ་སྲིད་ལ་ལྟ་སྟངས་ཤིག

༧གོང་ས་མཆོག་གིས་ལྷོ་ཕྱོགས་རྒྱུད་སྨད་གྲྭ་ཚང་དུ་བོད་ནས་ཕེབས་པའི་གསར་འབྱོར་བ་ ༥༠༠ གཙོས་པའི་འཛམ་གླིང་ཕྱོགས་མཐའ་ཁག་ནས་ཕེབས་པའི་ཆོས་ཞུ་བ་ ༡༠༠༠༠ བརྒལ་བར། པཎ་ཆེན་བློ་བཟང་ཆོས་རྒྱན་གྱིས་མཛད་པའི་གསང་འདུས་རིམ་ལྔའི་འགྲེལ་བ་བཀའ་ཁྲིད་གནང་བཞིན་ཡོད་འདུག

རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་རྒྱུད་སྨད་གྲྭ་ཚང་གིས་ཇི་ལྟར་གསོལ་འདེབས་ཞུས་དོན་ལྟར། ཟླ་འདིའི་ཕྱི་ཚེས་ ༤ ཉིན་༧གོང་ས་མཆོག་དགའ་ལྡན་གསེར་ཁྲི་དང་ཤར་བ་ཆོས་རྗེ་རྣམ་གཉིས་གཙོས་པའི་རྒྱུད་སྨད་གྲྭ་ཚང་གི་མཁན་པོ་དང་། དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ། སྤྱི་འཐུས། ས་གནས་འཐུས་ཚོགས་དང་མགོ་འཛིན། སོག་རིགས་དང་བོད་རིགས་མང་ཚོགས་བཅས་ཀྱི་ཕེབས་བསུའི་ཁྲོད་ལྷོ་ཕྱོགས་རྒྱུད་སྨད་གྲྭ་ཚང་དུ་ཆིབས་བསྒྱུར་བསྐྱངས་ཡོད་འདུག

ཐོག་མར་༧གོང་ས་མཆོག་གིས་གཞིས་ཆགས་དེའི་དགོན་པའི་གནས་སྟངས་དང་དགེ་འདུན་པའི་གྲངས་འབོར། ད་ལོའི་གཞིས་ཆགས་ཀྱི་སྟོན་འབྲས་ཅི་བྱུང་དང་མང་ཚོགས་ཀྱི་འཚོ་བའི་གནས་སྟངས་སྐོར་རྒྱུས་ལོན་གནང་རྗེས། བོད་ནས་གསར་དུ་ཕེབས་པའི་བོད་མི་ ༥༠༠ ལྷག་ལ་དམིགས་བསལ་བཀའ་སློབ་བསྩལ་དོན། “ ཁྱེད་ཚོར་སོ་སོའི་ལུང་པའི་ནང་ཕྱིའི་ལྟར་སྣང་ཙམ་ལས་དོན་དམ་ཐོག་ནང་ཆོས་ལ་སློབ་སྦྱོང་བྱ་རྒྱུའི་གོ་སྐབས་ཡོད་པ་མ་རེད། ཆོས་བྱས་ནའང་བོད་མི་རིགས་ཀྱི་ཞེན་ཁོག་སླེབ་ཀྱི་ཡོད་སྟབས། དེ་ཆབ་སྲིད་ཀྱི་གནད་དོན་ལ་ཐུག་འགྲོ་ཡི་ཡོད་པ་རེད། དེ་ཡིན་དུས་རྒྱ་གཞུང་གིས་ཆེད་དུ་གཉེར་ནས་དམ་དྲག་བྱེད་ཀྱི་ཡོད་པ་རེད། བོད་ནས་ཕེབས་མཁན་ཚོར་ཡང་ཡང་སངས་རྒྱས་ཀྱི་ཆོས་ཉན་རྒྱུའི་གོ་སྐབས་རག་གི་ཡོད་པ་མ་རེད། ཁྱེད་ཚོས་དཀའ་ལས་བརྒྱབ་སྟེ་འདིར་ཡོང་བར་དམིགས་བསལ་འཚམས་འདྲི་དང་དགའ་བསུ་ཡོད་ ” ཅེས་གསུངས་འདུག  

༧གོང་ས་མཆོག་གིས་མུ་མཐུད་དེ་གསང་འདུས་རིམ་ལྔའི་འགྲེལ་བ་ལྗགས་ལུང་ཞུ་བར་གསང་བ་འདུས་པའི་དབང་འཐོབ་དགོས་ཀྱང་། གཙོ་བོ་དད་པ་ལ་རག་ལས་ཡོད་པའི་ཐད་ལ།  “ དེ་རིང་འདིར་ཕེབས་པ་མང་ཆེ་བ་དད་པས་ཀུན་ནས་བསླངས་ཏེ་ཡོང་བ་ཤ་སྟག་ཡིན་སྟབས། གཙོ་བོ་དེ་དད་པ་ཆགས་ཡོད་པ་རེད། གཉིས་ནས་ཁྱེད་རང་ཚོར་དབང་ཡང་ཡང་འཐོབ་རྒྱུ་ཁག་པོ་ཡིན་དུས། མཐའ་གཅིག་ཏུ་གསང་པ་འདུས་པའི་དབང་ཐོབ་མེད་ནའང་། བླ་མའི་དབང་གཞན་པ་དེ་འདྲ་ཐོབ་ཡོད་ཀྱང་འགྲིག་གི་ཡོད་པ་རེད། གཙོ་བོའི་ནང་གི་གཙོ་བོ་དེ་རང་ཉིད་ལ་དད་པ་རྩེ་གཅིག་པ་ཞིག་དགོས་རྒྱུ་དེ་ཧ་ཅང་གལ་ཆེན་པོ་རེད་ ” ཅེས་གསུངས་ཡོད།  

ཕྱི་ཚེས་ ༧ ཉིན་ཧོན་སུར་གཞིས་ཆགས་སེར་སྐྱ་མང་ཚོགས་ཀྱིས་༧གོང་ས་མཆོག་ལ་བརྟན་བཞུགས་རྒྱས་པ་ཞིག་འབུལ་རྒྱུ་དང་། དེའི་རྗེས་༧གོང་ས་མཆོག་གིས་གཞིས་ཆགས་དེར་གསར་འཛུགས་གནང་པའི་༼རྒྱུད་སྨད་གངས་ཅན་རིག་གནས་སློབ་གྲྭ་༽ཞེས་པ་ཞིག་དབུ་འབྱེད་གནང་རྒྱུ་ཡིན་འདུག

ཧོན་སུར་དུ་ཆིབས་བསྒྱུར་མ་གནང་གོང་༧གོང་ས་མཆོག་ཟླ་འདིའི་ཕྱི་ཚེས་ ༣ ཉིན་རྒྱལ་ས་ལྡི་ལིར་རྟེན་གཞི་བྱས་པའི་ཤཱུག་ཤཱ་ཁེན་ཌི་རཱ་ཤེས་ཡོན་བསྟི་གནས་ཁང་དུ་ (Shiksha  Kendra) ཆིབས་བསྒྱུར་བསྐྱངས་ཏེ། དབུལ་ཕོངས་ཁྱིམ་ཚང་ཁག་ནས་འབྱོར་བའི་སློབ་གྲྭ་དེའི་སློབ་ཕྲུག་བརྒྱ་ཕྲག་བརྒལ་བར། སེམས་ཤུགས་བསྐྱེད་དེ་ཤེས་ཡོན་ཐོག་འབད་བརྩོན་བྱ་དགོས་པའི་སྐུལ་བ་གནང་སྟེ། སློབ་གྲྭའི་ཤེས་ཡོན་སྡེ་ཚན་ལ་ཧིན་སྒོར་ལྔ་འབུམ་ ༥༠༠༠༠༠ ལྷག་ཞལ་འདེབས་གནང་བ་དང་། མ་འོངས་པར་སློབ་གྲྭའི་འཛིན་སྐྱོང་ངོས་ནས་སློབ་གྲྭ་དེའི་ནང་དབུལ་ཕོངས་སློབ་ཕྲུག་མང་ཙམ་བསྡུ་ཐུབ་པ་ཡིན་ན། ༧གོང་ས་མཆོག་ཁོང་གིས་བྲིས་པའི་དེབ་ཀྱི་རིན་པ་རྣམས་སློབ་གྲྭའི་སློབ་ཕྲུག་ཚོར་ཞལ་འདེབས་གནང་རྒྱུ་ཡིན་པའི་ཁས་ལེན་སོགས་གནང་འདུག

མཇུག་ཏུ་༧གོང་ས་མཆོག་གིས་ཤེས་ཡོན་བསྟི་གནས་ཁང་དེའི་འགན་འཛིན་ལས་བྱེད་ཚོའི་སློབ་གྲྭའི་ལས་དོན་བྱེད་ཕྱོགས་ཐོག་བསྔགས་བརྗོད་དང་འབྲེལ། ལྷོ་ཨ་ཧྥི་རི་ཁ་དང་ལྷོ་ཨ་མེ་རི་ཁའི་རྒྱལ་ཁབ་ཁག་གི་དབུལ་ཕྱུག་དང་ལྐོག་ཟ་རུལ་ཟུངས་ཀྱི་དཀའ་ངལ་དང་དེའི་ཉེན་ཁ་སོགས་ངོ་སྤྲོད་གནང་སྟེ། མ་འོངས་པར་རྒྱ་གར་གྱི་དབུལ་ཕྱུག་དང་ལྐོག་ཟ་རུལ་སུངས་ཀྱི་དཀའ་ངལ་ཉུང་དུ་གཏོང་ཐབས་སྐོར་འབད་བརྩོན་གནང་དགོས་པའི་བཀའ་སློབ་སོགས་བསྩལ་ཡོད་འདུག   

ཟླ་འདིའི་ཕྱི་ཚེས་ ༡༩ ནས་ ༢༡ ཉིན་བར་༧གོང་ས་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཨུ་རུ་སུ་ནང་པ་ ༢༠༠༠ ཙམ་ལ། རྗེ་ཙོང་ཁ་པ་ཆེན་པོས་མཛད་པའི་རྟོགས་བརྗོད་མདུན་ལེགས་མ་དང་། བཀའ་གདམས་དགེ་བཤེས་གླང་རིང་ཐང་པས་མཛད་པའི་བློ་སྦྱོང་ཚིག་བརྒྱད་མ་གཉིས་འཆད་ཁྲིད་གནང་རྒྱུ་ཡིན་འདུག

གསར་འགོད་པ། དཔལ་ལྡན།

༼ ཞིབ་ཕྲའི་གནས་ཚུལ་བོད་ཀྱི་དུས་བབ་ཚགས་ཤོག་སྟེང་གཟིགས་རོགས། ༽