ཉེ་སྔོན་རྒྱ་ནག་རྒྱལ་སྲིད་སྤྱི་ཁྱབ་ཁང་གི་ཚོགས་མི་དང་ཉེན་རྟོག་སྡེ་ཁག་གི་མགོ་གཙོ་མིན་ཅན་ཀྲུའུ་རྔ་པ་ཀིརྟི་དགོན་པར་རྟོག་ཞིབ་ཏུ་བསྐྱོད་དེ། ས་གནས་སྲིད་གཞུང་དང་དྲག་ཆས་དཔུང་དམག དགོན་པའི་ལས་འཛིན་ཚོགས་བསྡུ་བསྐངས་ཏེ། རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་ཐོག་མུ་མཐུད་ཤུགས་རྒྱག་དགོས་ཚུལ་བརྗོད་འདུག
ཟླ་འདིའི་ཕྱི་ཚེས་ ༣ ཉིན་རྒྱ་གཞུང་དབུས་ཉེན་རྟོག་སྡེ་ཁག་གི་དྲ་བའི་སྟེང་གནས་ཚུལ་སྤེལ་ཏེ། ཕྱི་ཟླ་ ༡༡ ཚེས་ ༢༦ ནས་ ༣༠ བར་རྒྱ་ནག་རྒྱལ་སྲིད་སྤྱི་ཁྱབ་ཁང་གི་ཚོགས་མི་དང་ཉེན་རྟོག་སྡེ་ཁག་གི་མགོ་གཙོ་མིན་ཅན་ཀྲུའུ་རྔ་པ་ཀིརྟི་དགོན་དུ་སོང་སྟེ། དགོན་པའི་ཆོས་ལུགས་དོམ་དམ་མི་སྣ་དང་རྔ་པ་རྫོང་ཆོས་ལུགས་ལས་ཁུངས་ཀྱི་མི་སྣ་བཅས་ཐུག་ཡོད་པ་དང་། སྐབས་དེར་མིན་ཅན་ཀྲུའུ་ཡིས་དགོན་པའི་ནང་མུ་མཐུད་དུ་རྒྱལ་གཅེས་ཆོས་གཅེས་ཀྱི་སློབ་གསོ་གཏིང་ཟབ་སྤེལ་དགོས་པའི་སྐོར་བརྗོད་ཡོད་པ་རེད། རྒྱ་ནག་དབུས་བརྙན་འཕྲིན་སའེ་སའེ་ཌེ་ཝེ་ (CCTV)དང་ཟི་ཁྲོན་ཞིང་ཆེན་བརྙན་འཕྲིན་ཁང་སོགས་རྒྱ་ནག་གཞུང་འབྲེལ་གསར་ལམ་ཁག་གིས། མིན་ཅན་ཀྲུའུ་རྔ་པ་ཀིརྟི་དགོན་དུ་རྟོག་ཞིབ་ཏུ་བསྐྱོད་པའི་དྲིལ་བསྒྲགས་སྐོར་གྱི་བརྙན་འཕྲིན་ནང་། དགོན་པའི་དོ་དམ་མི་སྣ་རེ་འགའ་མ་གཏོགས་དགོན་པའི་ཁོར་ཡུག་གང་སར་གྲྭ་བཙུན་གཅིག་ཀྱང་མཐོང་རྒྱུ་མེད་པ་མ་ཟད། དགོན་པའི་འདུ་ཁང་གི་ཟུར་ཅིག་བརྙན་འཕྲིན་ནང་ཐོན་པ་དེར་གྲྭ་བཙུན་གཅིག་ཀྱང་མེད་པར་འདུ་ཁང་སྟོང་པ་ཆགས་ཡོད་པ་རེད། ལྷག་པར་དུ་ཟི་ཁྲོན་བརྙན་འཕྲིན་ཁང་གིས་དེའི་སྐོར་གྱི་གནས་ཚུལ་མང་ཚོགས་ལ་དྲིལ་བསྒྲགས་བྱས་སྐབས། དྲག་ཆས་དམག་དཔུང་རུ་སྒྲིག་གི་འཇིགས་རྔམས་འབུར་དུ་བཏོན་ཡོད་པ་རེད།
གཞན་ཡང་། མིན་ཅན་ཀྲུའུ་ཡིས་ཟི་ཁྲོན་ཞིང་ཆེན་གྱི་ཁོངས་སུ་ཡོད་པའི་རྔ་པ་རྫོང་དང་ཁྱུང་མཆུ་རྫོང་། ཟུང་ཆུ་རྫོང་སོགས་སུ་འབྲོག་དམངས་གྲོང་རྡལ་དུ་སྒྱུར་བཞིན་པའི་ལས་གཞི་ཁག་དང་། དེ་བཞིན་ས་ཁུལ་དེ་དག་ནང་བོད་མིར་དྲག་གནོན་ཆེད་གཏན་སྡོད་བྱས་ཡོད་པའི་རྒྱ་ནག་བཅིངས་འགྲོལ་དམག་གི་འཐབ་ཇུས་རུ་དཔོན་དང་། དྲག་ཆས་ཉེན་རྟོག་དམག་དཔོན། སྤྱི་བདེ་ཉེན་རྟོག་རུ་ཁག སྐོར་སྐྱོད་ལྟ་སྲུང་རུ་ཁག་སོགས་ཀྱི་ལས་ཀར་རྟོག་ཞིབ་བྱས་ཡོད་པ་དང་། སྐབས་དེར་མིན་ཅན་ཀྲུའུ་ཡིས་ “ འདས་པའི་ལོ་མང་རིང་ས་ཁུལ་འདིར་བཅའ་སྡོད་དམག་མི་རྣམས་ཀྱིས་དཀའ་ཁག་ལ་མ་འཛེམས་པར་དཔའ་ངར་ལྡན་པའི་སྒོ་ནས་སྤྱི་ཚོགས་བདེ་འཇགས་དོ་དམ་ཐད་གྲུབ་འབྲས་ཆེན་པོ་བླངས་ཡོད་པ་དང་། ད་ལྟའི་བར་རྒྱ་གཞུང་དམར་ཤོག་གི་མཛུབ་སྟོན་འོག་ཆེས་གནད་འགག་གི་དུས་སྐབས་སུ་རྒྱུག་ཕོད་པ་དང་། འཛིང་ཕོད་པ། རྒྱལ་ཐུབ་པ་བཅས་བྱས་ཏེ། རྒྱ་གཞུང་དམར་ཤོག་དང་མང་ཚོགས་ཀྱིས་ཡིད་ཆེས་བཅོལ་ཆོག་པ་དང་། དམར་ཤོག་དང་མང་ཚོགས་ལ་ནམ་ཡང་གྱོང་མི་སྐུར་བའི་སྲུང་སྐྱོབ་རུ་དཔུང་ཞིག་ཆགས་ཡོད་སྟབས། མ་འོངས་པར་ཡང་དམག་མི་ཚང་མས་མགོ་མཇུག་བར་གསུམ་དུ་ཆབ་སྲིད་ཀྱི་ལངས་ཕྱོགས་བརྟན་པོ་དང་བློ་རིག་ལྡན་པའི་སྒོ་ནས་ནུས་ཤུགས་ཡོད་རྒུ་འདོན་དགོས་ལ། ཁྱོད་ཚོ་ནི་རྒྱ་དམར་གཞུང་གི་ཁྲིམས་ལྟར་ངོ་ལོག་པར་རྡུང་བརྡེག་བཏང་སྟེ་སྤྱི་ཚོགས་བདེ་འཇགས་སྲུང་སྐྱོབ་བྱེད་མཁན་དང་། ཏང་གི་ལམ་ཕྱོགས་སྲིད་ཇུས་དྲིལ་བསྒྲགས་བྱེད་མཁན་གྱི་རུ་དཔུང་ཡིན། ”སོགས་བརྗོད་འདུག ཐེངས་འདིར་མིན་ཅན་ཀྲུའུ་ཡི་རྟོག་ཞིབ་ལས་གཞི་གཙོ་བོ་གཅིག་ནི། སྤྱི་ཚོགས་དོ་དམ་ནི་གཞི་རིམ་ཁྱིམ་ཚང་ནས་མགོ་བརྩམས་ཏེ་ས་ཁུལ་ཡོངས་སུ་དངོས་འབེབ་བྱེད་དགོས་པ་དང་། ཞིང་འབྲོག་ཁུལ་གྱི་སྤྱི་ཚོགས་དོ་དམ་ལས་གཞི་རྨང་གཞིར་བཟུང་སྟེ་གཞི་རིམ་ས་ཁུལ་གྱི་སྤྱི་ཚོགས་དོ་དམ་ལ་ཤུགས་སྣོད་དགོས་པ་དེ་ཡིན་འདུག
མིན་ཅན་ཀྲུའུ་ཡིས་རྔ་པ་ཀིརྟི་དགོན་གཙོས་ཟི་ཁྲོན་ཞིང་ཆེན་ཁོངས་སུ་ཡོད་པའི་བོད་ཀྱི་ས་ཁུལ་ཁག་ཏུ་རྟོག་ཞིབ་ཏུ་བསྐྱོད་སྐབས། ཟི་ཁྲོན་ཞིང་ཆེན་དམར་ཤོག་དྲུང་ཆེ་གཞོན་པ་དང་མངའ་སྡེ་བློན་ཆེན་ཅཱང་ཅུས་ཧྥུན་དང་། རྒྱ་ནག་ཆབ་སྲིད་ལྷན་ཁང་གི་དྲུང་ཆེ་ཝང་ཡོན་ཆིན། རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་ཀྱི་མགོ་གཙོ་གཞོན་པ་སྲི་ཐར། ཟི་ཁྲོན་ཞིང་ཆེན་ཆབ་སྲིད་ལྷན་ཁང་གི་རྒྱུན་ལས་དང་ཁྲིམས་སྲིད་ལྷན་ཁང་གི་དམར་ཤོག་དྲུང་ཆེ་ལིག་ཡུས་ཧྲོན། མངའ་སྡེ་བློན་ཆེན་གཞོན་པ་ཆིས་མའོ་ཧྲི་ཧཱ། ཟི་ཁྲོན་ཞིང་ཆེན་ཉེན་རྟོག་ལས་ཁུངས་ཀྱི་མགོ་གཙོ་ཙིན་ཧྲིན་ཆོན་སོགས་ཀྱང་མཉམ་དུ་རྟོག་ཞིབ་ཆེད་བསྐྱོད་ཡོད་པ་རེད།
རྒྱལ་སྤྱིའི་གསར་ལམ་ཁག་ཏུ་སྤྱི་ཚོགས་དབྱེ་ཞིབ་དག་གིས་དཔྱད་བརྗོད་སྤེལ་པའི་ནང་། ད་ལོའི་ཕྱི་ཟླ་ ༣ ནས་བཟུང་བོད་ནང་དུ་དགེ་འདུན་པས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་ལས་འགུལ་སྤེལ་བ་དེར་པེ་ཅིན་གཞུང་བློ་འཚུབ་སྐྱེ་བཞིན་ཡོད་པར་མ་ཟད། རང་ལུས་མེར་བསྲེགས་ཀྱི་ངོ་རྒོལ་ལས་འགུལ་དེ་བོད་ཁུལ་ཡོངས་སུ་རྒྱ་ཁྱབ་ཏུ་གྱུར་ཏེ་བོད་མི་མང་པོས་རྒྱ་གཞུང་ལ་ངོ་རྒོལ་གྱི་ལས་འགུལ་ཤུགས་ཆེན་འབྱུང་ཉེན་ཡོད་པའི་འཇིགས་སྐྲག་སྐྱེ་བཞིན་ཡོད་པ་དང་། ཐེངས་འདིར་རྒྱ་གཞུང་དབུས་ཉེན་རྟོག་སྡེ་ཁག་གི་མགོ་གཙོ་ཐད་ཀར་རྔ་པ་ཀིརྟི་
དགོན་དུ་ཡོང་བ་དེ་ནི། ཕྱིའི་རྣམ་པས་ཐོག་ནས་བོད་མིར་སེམས་གསོ་དང་། དོན་གྱིས་སྤྱི་ཚོགས་དོ་དམ་ལ་ཤུགས་སྣོན་དང་དམག་མིས་ཕྱོགས་ཡོངས་ནས་སྤྱི་ཚོགས་ལ་དམ་དྲག་བྱེད་པའི་སྒྲིག་གཞི་རྩ་བརྟན་དུ་གཏོང་ཆེད་ཡིན་པ་བརྗོད་འདུག
ད་ལོའི་ཕྱི་ཟླ་གསུམ་པའི་ཚེས་ ༡༦ ཉིན་རྔ་པ་ཀིརྟི་དགོན་གྱི་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་པ་ནས་བཟུང་། བོད་མདོ་སྨད་རྔ་པ་གཙོས་ཁམས་དཀར་མཛེས་དང་། རྟའུ། ཆབ་མདོ་བཅས་སུ་སྔ་ཕྱིར་སྐྱ་སེར་ ༡༢ ཀྱིས་རང་ལས་མེར་བསྲེགས་བཏང་སྟེ་རྒྱ་གཞུང་གི་དབང་སྒྱུར་སྲིད་ཇུས་ལ་ངོ་རྒོལ་བྱས་ཡོད་པར་མ་ཟད། བལ་ཡུལ་དང་རྒྱ་གར་གྱི་ནང་དུའང་བོད་མི་གཉིས་རང་ལུས་མེར་བསྲེགས་ཀྱིས་གཞིས་ལུས་བོད་མིའི་རང་དབང་འཐབ་རྩོད་ལ་གདུང་སེམས་མཉམ་སྐྱེད་གནང་ཡོད་པ་རེད།
གསར་འགོད་པ། ཚེ་རིང་རྒྱལ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
ད་ཁོ་ཚོས་ཞི་དྲག་གང་ཞིག་གི་ཐབས་ཚུལ་སྤྱད་ཀྱང་ང་ཚོ་མགོ་མི་འཐོམ་པར་”དོགས་ཟོན་མཐོར་འདེགས་ཀྱིས་རང་རིགས་སྲུང་སྐྱོབ”བྱ་རྒྱུ་རང་ཡིན་ནོ།
གང་ལྟར་གཡོ་སྒྱུ་སྣ་ཚོགས་ཀྱི་དབང་གི་ད་སྐབས་ཡང་ལྟ་སྐོར་དུ་སོང་པ་ཞིག་ཡིན་རྒྱུ་རེད། ཁོང་ཚོས་བཤད་སྟངས་ལ་ལྟས་ན་དགའ་འོས་དོན་བཟང་ཞིག་མ་ཡིན་པར་གསལ་བོ་རེད་གང་ཡིན་ཟེར་ན་རྒྱལ་གཅེས་ཆེས་གཅེས་ཀྱི་སལ་འགུལ་མུ་མཐུད་སྤེལ་དགོས་ཚུལ་བརྗོད་པ་ཙམ་གྱི་དོན་སྙིང་གོ་ཚར་བ་མ་ཡིན་ནམ། ཧུའུ་མ་ཟད་མོའོ་ཤི་ས་ནས་ཡོང་རུང་ཕན་ཐོག་ཞིག་ཡོད་ནི་མ་རེད། དམར་ཕྱོགས་ཀྱིས་གསར་ལམ་ཁག་ཏུ་སྐད་ཆ་སྙིང་རྗེ་འདྲ་བོ་བཤད་པ་རེད་མ་གཏོག་དོན་གཡོ་སྒྱུའི་གང་ནས་ཡོད་པ་ཡིན་དུས་ཡིད་ཆས་མི་འདུག
ཧུའུ་ཅན་ཐོ་ཁོ་རང་དངོས་སུ་ཕེབས་ནས་བཀའ་སློབ་ཅིག་གནང་ན་ཅུང་ཕན་གི་མེད་འགྲོ་་་་དེ་མིན་ཁག་པོ་རེད་ཡ་་་་་
འདི་ན་གསེར་འདོག་ཉི་མའི་དྲོད་ངར་འཐིམ་མྱོང་ད་ལྟར་གཤེན་པའི་དུར་ས་འགྱུར་སོང་།།
འདི་ན་ཤེས་བྱ་རིག་པའི་ཆུ་གཏེར་བཞུར་མྱོང་ད་ལྟར་ཀླ་ཀློའི་རྨོངས་བ་འཚུབ་སོང་།།
འདི་ན་རིགས་མཐུན་སྤུན་ཟླའི་མཛའ་བརྩེ་ཟབ་མྱོང་ད་ལྟར་དགྲ་བོའི་གཡུལ་ས་འགྱུར་སོང་།།
འདི་ན་མནོ་པའི་བློ་རྩེ་རྣ་རུ་ཕབ་ནས་བསམ་གཞིགས་བྱས་པའི་ཡིད་ག་མི་འདུག །། །།
དཔོན་རིགས་དེའི་མིང་ལ་མུན་ཅན་ཀྲོའུ་ཟེར་བར་བཤད། ཕལ་ཆེར་ལིས་ཅན་ཀྲོའུ་མིན་པ་འདྲ། གང་ལྟར་གསར་འགྱུར་བཀོད་པར་ཐུགས་རྗེ་ཆེ།