རྒྱ་ནག་གཞུང་གིས་བོད་ནང་གི་དགོན་སྡེ་དང་གྲོང་གསེབ་ཁག་ཏུ་༸རྒྱལ་བ་རིན་པོ་ཆེའི་སྐུ་པར་སྒྲིག་བཤམ་བཀག་སྡོམ་བྱེད་ཀྱི་ཡོད་སྟབས། གཞོན་སྐྱེས་རེ་ཟུང་གིས་་༧རྒྱལ་བ་རིན་པོ་ཆེ་ཞུ་བ་དེ་ལྷ་སྐུ་ཞིག་གམ། ཐང་ག་ཞིག་མིན་ནམ་སྙམ་པའི་ཚོར་སྣང་ཡོང་གི་ཡོད་འདུག
རྒྱ་ནག་གཞུང་གིས་ད་ལྟའི་བར་བརྒྱུད་ལམ་ཁག་ཏུ་བོད་ནང་གི་འབྲོག་ཁུལ་དང་གྲོང་གསེབ་ཁག་ཏུ་དགོན་པ་དང་སློབ་གྲྭ་གསར་རྒྱག་གི་ལས་གཞི་སྤེལ་ཡོད་ཚུལ་དང་། ཞིང་འབྲོག་མང་ཚོགས་ཀྱི་འཚོ་བ་ཡར་རྒྱས་ཕྱིན་ཡོད་པའི་དྲིལ་བསྒྲགས་ཤུགས་ཆེན་བྱེད་ཀྱི་ཡོད་ཀྱང་། གཞིས་ཀ་རྩེ་ས་འབྲོང་པ་རྫོང་ཁོངས་ཀྱི་གྲོང་གསེབ་ཁག་ཏུ་རྒྱ་ནག་གིས་དྲག་གནོན་གྱི་སྲིད་བྱུས་ལག་བསྟར་གྱིས་མི་མང་གི་འཚོ་བའི་ཐད་ལ་དཀའ་ངལ་རིམ་པར་འཕྲད་ཀྱི་ཡོད་པ་མ་ཟད། དགོན་པ་དང་སློབ་གྲྭ་གཅིག་ཀྱང་མེད་པར་གཞོན་སྐྱེས་རྣམས་ཡིག་རྨོངས་ཆགས་ཀྱི་ཡོད་འདུག
འདིའི་ཐད་གསར་འགོད་པས་ཉེ་ཆར་བོད་གནས་གསར་དུ་འབྱོར་ཞིང་ད་ལྟའི་བཞུགས་སྒར་དབུས་སྣེ་ལེན་ཁང་དུ་ཡོད་པའི་གཞིས་ཀ་རྩེ་འབྲོང་པ་རྫོང་སྐྱིད་སྨད་ཞང་མེར་ཁ་གྲོང་ཚོའི་རྡོ་རྗེ་ཚེ་རིང་ལགས་སུ་བཅར་འདྲི་བརྒྱུད་རྒྱུས་ལོན་བྱས་པ་ལྟར་ན། ཁྱིམ་ཚང་ ༧ ལས་མེད་པའི་འབྲོང་པ་རྫོང་མེར་ཁ་གྲོང་ཚོ་ནི། ཕྱུགས་ཟོག་ཁོ་ནར་བརྟེན་པའི་གྲོང་ཚོ་ཆུང་ཆུང་ཞིག་ཡིན་ཞིང་། སྔོན་ཆད་གྲོང་དེའི་ཁྱིམ་ཚང་མང་ཆེ་བར་ལུག་ ༡༠༠༠ ཡས་མས་དང་ནོར་ ༡༠༠ ལྷག་ཡོད་ཀྱང་། ༢༠༠༧ ལོའི་ལོ་མཇུག་ཏུ་རྒྱ་གཞུང་གི་ལས་བྱེད་ཡོང་སྟེ། ཁྱིམ་ཚང་རེས་ནོར་ ༥༠ དང་ལུག་ ༥༠ ལས་ཉར་མི་ཆོག་པའི་བཙན་བཀའ་བཏང་ཡོད་སྟབས། ས་གནས་བོད་མི་ཚོ་དངངས་སྐྲག་འོག་ཕྱུགས་ཟོག་མང་ཆེ་བ་གཞན་ལ་བཙོང་ཡོད་པ་དང་། དེའི་རྗེས་ནས་བཟུང་ཁྱིམ་ཚང་གི་འཚོ་ཐབས་ལ་དཀའ་ངལ་འཕྲད་དེ་དཔྱིད་ཀ་སླེབས་ཡོང་སྐབས། གྲོང་པ་དེའི་རྒན་གཞོན་ཚང་མ་དབྱར་རྩ་དགུན་འབུ་བརྐོ་རུ་སོང་སོང་སྟེ་འཚོ་བ་སྐྱེལ་བཞིན་ཡོད་འདུག
གསར་འགོད་པས་ཁོང་ལ་ས་གནས་ཀྱི་དགོན་པ་དང་སློབ་གྲྭའི་གནས་སྟངས་གང་འདྲ་ཡིན་མིན་དང་། གཞོན་སྐྱེས་ཚོའི་ལས་ཀའི་སྐོར་དྲིས་པར་ཁོང་གིས། “ ཕ་མ་དང་རྒན་མགོ་ཚོའི་ཁ་ནས་སྔོན་མ་མེར་ཁ་དགོན་པ་ཟེར་བ་ཞིག་ཡོད་པ་དེ་ང་ཚོའི་གྲོང་པའི་མང་ལ་ཐོགས་པ་རེད་ཟེར་བ་ལས། ཆུང་དུས་ནས་སྡེ་བའི་ཉེ་ཁུལ་ན་དགོན་པའི་ཤུལ་ཙམ་ཡང་མཐོང་རྒྱུ་མི་འདུག གཅིག་བྱས་ན་གྲོང་ཚོའི་ནང་གི་ཆོས་པ་མང་ཆེ་བ་སྔགས་ཆོས་ཡིན་དུས། དམིགས་བསལ་དགོན་པ་དང་རབ་བྱུང་བ་མེད་པ་ཡིན་རྒྱུ་རེད། དེ་བཞིན་སློབ་གྲྭའི་ཕྱོགས་ནས། ང་ཚོའི་ཉེ་འཁོར་ལ་སློབ་གྲྭ་ཡང་མཐོང་རྒྱུ་ཡོད་པ་མ་རེད། ང་རང་ལོ་ ༢༡ ལ་སོན་པའི་བར་དུ་ཕྱུགས་ཟོག་འཚོ་སྐྱོང་བྱས་བསྡད་པ་ཡིན། སློབ་གྲྭར་འགྲོ་མ་ཐུབ་པ་དེ་ཆ་རྐྱེན་གྱིས་མ་འདང་བ་དེ་འདྲ་མ་རེད། གཙོ་བོ་ང་ཚོའི་ས་ཆར་སློབ་གྲྭ་མེད་པ་དང་། གལ་སྲིད་ས་གནས་གཞན་ལ་སློབ་གྲྭར་ཕྱིན་ཡང་རྒྱ་ཡིག་ལས་བོད་ཡིག་ཡག་པོ་སློབ་ཀྱི་མེད་པ་དང་། རྗེས་མ་སློབ་མཐར་ཕྱིན་ཡང་བྱ་བ་རག་གི་མེད་པའི་སྐད་ཆ་ཕ་མ་ཚོས་ཐོས་ཏེ་ཕྲུ་གུ་སློབ་གྲྭར་གཏོང་རྒྱུར་དགའ་བོ་ཡོད་པ་མ་རེད། དེར་བརྟེན། ང་ཚོའི་གྲོང་ཚོར་ང་དང་གཅིག་མཚུངས་ཀྱི་གཞོན་སྐྱེས་ ༣༠ མ་ཟིན་ཙམ་ཞིག་ཡིག་རྨོངས་ཆགས་ཡོད་པ་རེད། “ཅེས་བརྗོད་བྱུང་།
ཡང་ཁོང་ལ་ ༢༠༠༨ ལོར་བོད་ཀྱི་ས་ཁུལ་ཁག་ཏུ་ཞི་རྒོལ་བྱས་པའི་གནས་ཚུལ་དང་༸གོང་ས་མཆོག་དང་བཙན་བྱོལ་བོད་གཞུང་གི་སྐོར་གོ་ཐོས་ཡོད་མེད་དྲིས་པར “ ༢༠༠༨ ལོར་ཁམས་དང་ལྷ་སར་ཡར་ལངས་བྱེད་ཀྱི་ཡོད་པ་ཞིག་ཕྱུགས་འཚོ་རོགས་དག་གི་ཁ་ནས་གོ་སོང་། ཡིན་ནའང་། ང་ཚོ་ས་ཆ་ཁུག་ཀྱོག་ཅིག་ཏུ་ཡོད་པས་ལས་རྒྱུ་གང་ཡང་མི་འདུག ང་ཆུང་དུས་༧རྒྱལ་བ་རིན་པོ་ཆེའི་སྐུ་པར་མཇལ་བ་རབ་རིབ་ཅིག་དྲན་གྱི་འདུག་ལ། ཕ་མ་རྒན་མགོ་ཚོས་ཀྱང་ “༧རྒྱལ་བ་རིན་པོ་ཆེ་མཁྱེན” ཞེས་གསོལ་བ་འདེབས་པ་ཐོས་མྱོང་ཡོད། ཕྱིས་སུ་རྒྱ་གཞུང་གིས་༸རྒྱལ་བ་རིན་པོ་ཆེའི་སྐུ་པར་བཤམ་མི་ཆོག་པ་བཟོས་པ་རེད་ཟེར་གྱི་འདུག ངས་༧རྒྱལ་བ་རིན་པོ་ཆེ་ལྷ་སྐུ་ཞིག་དང་ཐང་ག་ཞིག་ཡིན་པའི་ཚོར་སྣང་ཙམ་ལས་དངོས་སུ་མཇལ་རྒྱུ་ཡོད་པ་ཞིག་ཏུ་བསམ་མྱོང་མེད། ཡིན་ནའང་། ཕྱིས་སུ་མི་གཞན་གྱི་ཁ་ནས་ཁོང་རྒྱ་གར་དུ་བཞུགས་ཡོད་ཚུལ་དང་རྒྱ་གར་ནང་དགོན་པ་དང་སློབ་གྲྭ བོད་གཞུང་གི་སྒྲིག་འཛུགས་སོགས་ཡོད་པ་གོ་སོང་ལ། བལ་ཡུལ་སྣེ་ལེན་ཁང་དུ་སླེབས་སྐབས་ཁོང་དངོས་སུ་རྒྱལ་ཁབ་གཞན་ནང་ཕེབས་ཀྱི་ཡོད་གློག་བརྙན་ནང་མཇལ་བྱུང” ཞེས་བརྗོད་བྱུང་།
མཐར་ཁོང་ལ་རྒྱ་གར་ནང་ཡོང་སྟངས་སྐོར་དང་དམིགས་ཡུལ་གང་འདྲ་ཡོད་མེད་དྲིས་པར། “ སྤྱིར་བཏང་ང་ལ་མཚོན་ནང་ནས་ཆུང་ཤོས་ཡིན་ཡང་། ཆུང་དུས་ཕུ་བོ་ཁྱིམ་ཚང་གཞན་དུ་གནས་སྤར་རྗེས་ངས་ཕ་མ་གཉིས་ལ་བདག་སྐྱོང་བྱས་པ་ཡིན་ལ། སྔར་ལོ་ཨ་མ་འདས་གྲོངས་སུ་ཕྱིན་རྗེས་ངས་ཨ་ཕར་བདག་སྐྱོང་བྱས་པ་ཡིན། ངས་འདས་པའི་ལོ་ ༢༡ རིང་དཀའ་ལས་ཅི་ཙམ་བརྒྱབ་ཀྱང་ཕྱུགས་ཟོག་འཚོ་རྒྱུ་ལས་ལྷ་ས་དང་གཞིས་ཀ་རྩེ་ལ་འགྲོ་མྱོང་མེད་ལ། ཐ་ན་འབྲོང་པ་རྫོང་དང་ཞང་ལའང་འགྲོ་མྱོང་མེད་པས། ཨ་ཕ་དང་སྤུན་མཆེད་གཉིས་ལ་གྲོས་བྱས་ཏེ། རྒྱ་གར་ལ་ཕྱིན་ན་༧གོང་ས་མཆོག་ལ་མཇལ་ཁ་དང་། སློབ་སྦྱོང་ཡང་རག་གི་ཡོད་དུས། ལམ་འཁྲིད་པ་ཞིག་ལ་རྒྱ་སྒོར་ ༥༠༠༠ སྤྲད་དེ་བལ་ཡུལ་བར་ཡོང་བ་ཡིན། མ་འོངས་པའི་དམིགས་ཡུལ་ཟེར་ནས་ཆེན་པོ་གང་ཡང་མེད། ཐོག་མའི་དམིགས་ཡུལ་འགྲུབ་ཆེད་ང་རང་ལྷོ་ཕྱོགས་རྣམ་གྲོལ་གླིང་དགོན་པའི་ཁྱབ་ཁོངས་སུ་ཡོད་པའི་གསང་སྔགས་དར་རྒྱས་གླིང་དུ་ཕྱིན་ཏེ་སྔགས་ཆོས་ཀྱི་ཐོག་སློབ་གཉེར་བྱ་རྒྱུ་ཡིན། ཆབ་སྲིད་དང་རྩ་དོན་ཐོག་ང་རང་གིས་ནུས་པ་ཆེན་པོ་འདོན་ཐུབ་པའི་རེ་དེ་འདྲ་མེད” ཅེས་བརྗོད་བྱུང་།
གསར་འགོད་པ། དོན་གོ
༼ བོད་ཀྱི་དུས་བབ་ཚགས་ཤོག་ལས་འདིར་བཀོད། ༽
![Wang made a research tour in Tibet from July 19 to 22. [Xinhua/Liu Bin]](https://tibettimes.net/wp-content/uploads/2026/07/1784796471071092378-360x180.jpg)
ཁ་བྱང་གི་ལན། ༧གོང་ས་མཆོག་སངས་རྒྱས་དངོས་སུ་བྱོན་ཡོད་ན་ཡང་མི་རྒོད་ཚོ་འདུལ་མ་ཐུབ་ན་ལྷ་སྐུ་ཞིག་དང་ཐང་ག་ཞིག་ཕན་གྱི་ཁག་པོ་རེད།
འགྱུར་མེད་བསྟན་འཛིན་འདིའི་ནད་རྙིང་ཡང་འཕར་འདུག་སྙིང་རྗེ། ནོར་བའི་ནོར་ཉམས་དེ་མི་རྣམ་དཔྱོད་ཅན་གྱིས་ཆོད་གྱི་རེད་མ་གཏོགས་སེམས་ཅན་དུད་འགྲོ་ཚོས་ཆོད་ཀི་མ་རེད། དཔེ་དེ་བཞིན་དུ་༧གོང་ས་མཆོག་གི་སྐུའི་གསང་གསུམ་གྱི་ཡོན་ཏན་རྣམས་འཛམ་གླིང་འདིའི་སྒང་གི་མཁས་དབང་ཚོས་ཧ་གོ་ནས་རྟགས་མ་ཕུལ་བ་དང་གདན་འདྲེན་གྱིས་བཀའ་སློབ་ཞུ་ཡ་སོགས་གཡར་གྱི་ཆུ་བོ་ལྟར་རྒྱས་བཞིན་པ་ལ་ལྟོས་དགོས།
དེང་སང་རྡ་ས་ནས་ཆབ་སྲིད་པ་འདི་ཚོས་རྒྱལ་བ་རིན་པོ་ཆེ་འཛམ་གླིང་ཉི་མ་བཞིན་མ་ཁྱབ་ཞིག་མེད་རབ་བཤད་ཀྱི་ཡོད་་་་ང་ཚོས་ཕ་ཡུལ་དང་ས་ཕྱོགས་ནས་རྒྱལ་བ་རིན་པོ་ཆེ་ཟེར་བ་ག་མྱོང་བ་ཙམ་ལས་་་་སུ་ཡིན་ཏག་ཏག་ཤེས་ཀྱི་མེད་་་་་མི་འདིས་སྐད་ཆ་ལྷད་མ་འདྲེས་པ་ཞིག་བཤད་འདུག་་་་་་ང་ཚོའི་ཕ་ཡལ་ནས་རྩ་བའི་བླ་མ་འམ་བླ་མ་ཆེ་ཤོས་དེ་རྒྱལ་བ་རིན་པོ་བརྩི་གི་མ་རེད་་་་་འདི་འདྲའི་ས་ཁུལ་བོད་ལ་མང་་་་་
ས་ཁུལ་སོ་སོའི་གནས་སྟངས་མི་འདྲ་བ་དེ་ས་ཁུལ་སོ་སོའི་མི་དམངས་ཀྱི་ཤེས་ཡོན་དང་བསམ་བློའི་གོ་རྟོགས་སོགས་ལ་ཡང་འབྲེལ་བ་ཡོད། ང་ཚོའི་ས་ཁུལ་སོགས་ལ་མཚོན་ན་ས་ཆ་བགོས་ནས་སྒོ་ཕྱུགས་བགོས་ནས་ཆ་སྙོམ་བྱས་ཡོད། ད་ལྟ་ལ་ལ་སྒོ་ནག་ལ་བུད་པ་དང་ལ་ལ་ཕྱུག་པོ་ཆགས་ཡོད། ལ་ལས་རང་གི་རྩྭ་ས་ཡང་བཙོང་ཚར་ཡོད། འདི་དག་རང་ཉིད་ལ་རག་ལས་པ་ཞིག་རེད།
དེང་སང་འཛམ་གླིང་ཀུན་ལ་ཏཱ་ལའི་བླ་མ་ཞེས་པའི་སྙན་གྲགས་འཕུར་གྱིན་པས་བོད་གངས་ཅན་ལྗོངས་སུ་ཡང་ད་དུང་མ་གོ་མ་ཤེས་པ་ཡོད་དོན་ཅི། འདི་ཡང་ཁག་གཞན་ལ་དཀྲིའམ། ད་དུང་གཉིད་མ་སད་པའི་རྟགས་རེད། གཉིད་འདི་རང་གིས་སད་དུ་འཇུག་པ་ཞིག་ལས་གཞན་གྱིས་གཉིད་ལས་སློང་རྒྱུར་རེ་བ་རྒྱག་མི་རུང། གཞན་གྱིས་གཉིད་བཅུག་ནས་འཆི་རུ་འཇུག་ན་ཡང་ཐང།
སྐད་ཆ་དྲང་པོ་དྲང་ཤག་ལྷ་སྐུས་གསུངས་པ་དང་ཁྱད་མེད་པ་ཅིག་བཤད་འདུག མི་འདི་འདྲའི་རིགས་ལ་ཕན་ཐོགས་དུས་སུ་འདགས་མ་ཐུབ་ན་བཙན་བྱོལ་སྒྲིག་འཛུགས་ཀྱི་དགོས་གཅིག་མ་བསྒྲུབས་པ་རེད་སྙམ་ལགས།