གཟའ་སྤེན་མའི་དགོང་མོར་བོད་གཞུང་ཟློས་གར་ཚོགས་ཁང་དུ་ཊེ་བྷེ་དང་མྱོས་རྫས་སྐོར་གྱི་ཀྱེ་མ་ཞེས་པའི་གློག་བརྙན་ཞིག་མི་མང་ལ་གཟིགས་འབུལ་ཞུས་ཡོད་འདུག
དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག དེ་རིང་ཕྱི་ཚེས་ ༡༠ ཉིན་གྱི་དགོང་མོའི་ཆུ་ཚོད་ ༥ དང་ཕྱེད་ཀའི་སྟེང་། ངྷ་ས་བོད་གཞུང་ཟློས་གར་ཚོགས་ཁང་དུ། གློ་བའི་གཉེན་ཚད་ཊེ་བྷེ་ནད་གཞི་དང་ཐ་མ་ནག་པོའི་ཉེས་དམིགས་སྐོར་གྱི་གློག་བརྙན་༼ ཀྱེ་མ ༽ཞེས་པ་ཞིག་གཟིགས་འབུལ་ཞུས་སོང་། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་བཀའ་བློན་ཁྲི་པ་བློ་བཟང་སེང་གེ་མཆོག་གཙོས་པའི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། དབུས་སྨན་རྩིས་ཁང་དང་བདེ་ལེགས་སྨན་ཁང་གི་འགན་འཛིན་དང་སྨན་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་ས་གནས་མགོ་འཛིན། དེ་བཞིན་བཞུགས་སྒར་ཁུལ་གྱི་བོད་རིགས་སེར་སྐྱ་མང་ཚོགས་ ༡༠༠ ཙམ་འདུ་འཛོམས་བྱུང་ཡོད།
མཛད་སྒོའི་སྟེང་བཀའ་ཁྲི་བློ་བཟང་སེང་གེ་མཆོག་གིས་ཊེ་བྷེ་ནད་གཞི་དང་ཐ་མ་ནག་པོ་གཉིས་བོད་པའི་སྤྱི་ཚོགས་ཀྱི་དཀའ་ངལ་ཆེ་ཤོས་དེ་གཉིས་སྐོར་ངོ་སྤྲོད་གནང་སྟེ། “ སྤྱིར་ཊེ་བྷེ་ནད་གཞི་དེ་སྤྱི་ཚོགས་སྐྱོ་བོའི་ནང་ཡོང་གི་ཡོད་པ་དང་། ཁྲག་ཤེད་ན་ཚ་དང་སྙིང་ནད། ཐ་མ་ནག་པོ་འཐེན་པ་སོགས་སྤྱི་ཚོགས་ཕྱུག་པོའི་ནང་ཡོང་གི་ཡོད་ནའང་། བོད་པའི་སྤྱི་ཚོགས་ནང་སྤྱི་ཚོགས་མཐོ་དམན་གཉིས་ཀྱི་ན་ཚ་ཡོང་བཞིན་པ་དེ་གནས་སྟངས་ཁྱད་མཚར་ཞིག་ཆགས་ཡོད་པ་རེད། ང་ཚོའི་སྤྱི་ཚོགས་ནང་སྤྱི་ཚོགས་གཞན་དང་མ་འདྲ་བར་ཊེ་བྷེ་ན་གཞི་དེ་ཛ་དྲག་གི་ངོ་བོར་འཕེལ་བཞིན་ཡོད་སྟབས། ན་ཚ་དེ་གཞན་ལ་འགོས་སླ་བ་དང་བཅོས་དཀའ་བ་སོགས་ཀྱིས་ཉེན་ཁའི་དུས་སུ་བསླེབས་ཡོད་ ” ཅེས་གསུངས་སོང་། ཡང་བཀའ་ཁྲི་མཆོག་གིས་མུ་མཐུད་དེ་མ་འོངས་པར་བོད་པའི་སྤྱི་ཚོགས་ནང་དཀའ་ངལ་དེའི་རིགས་ཉུང་དུ་འགྲོ་བར་མང་ཚོགས་ཀྱིས་དོ་སྣང་དང་གློག་བརྙན་འདི་བརྒྱུད་མང་ཚོགས་ནང་གོ་རྟོགས་གསར་པ་ཞིག་ཡོང་བའི་རེ་བ་ཡོད་སྐོར་གསུངས་སོང་། དེའི་རྗེས་འཕྲོད་བསྟེན་བཀའ་བློན་ཚེ་རིང་ཕུན་ཚོགས་མཆོག་གིས་ཀྱང་གློག་བརྙན་འདི་ལ་བོད་རིགས་མང་ཚོགས་ཀྱིས་དོ་སྣང་བྱ་དགོས་པའི་འབོད་སྐུལ་བཅས་ཞུས་སོང་།
ཀྱེ་མ་ཞེས་པའི་གློག་བརྙན་འདི་ནི་འཕྲོད་བསྟེན་ལས་ཁུངས་དང་ཟློས་གར་གཉིས་ཐུན་མོང་ཐོག་བཟོ་བསྐྲུན་བྱས་པ་ཞིག་ཡིན་ཞིང་། གློག་བརྙན་དེའི་ནང་གི་འཁྲབ་སྟོན་པ་རྣམས་ཟློས་གར་ཚོགས་པའི་ལས་བྱེད་ཡིན་འདུག
གསར་འགོད་པ། དཔལ་ལྡན།
༼ ཞིབ་ཕྲའི་གནས་ཚུལ་བོད་ཀྱི་དུས་བབ་ཚགས་པར་སྟེང་འགོད་འཆར་ཡོད། ༽
༄༅། །ད་རེ་བོད་གཞུང་འཕྲོད་བསྟེན་ལས་ཁུངས་དང་བོད་གཞུང་ཟློས་གར་གཉིས་མཐུན་མོང་ཐོག་བཟོ་བསྐྲུན་མཛད་པའི་གློག་བརྙན་”ཀྱེ་མ་”་ཞེས་ཞིག་ཐོན་ཡོད་པ་ཧ་ཅང་དགའ་པོ་བྱུང་། ཡུན་རིང་ནས་གུས་རང་གི་བསམ་པར་བོད་གཞུང་ཟློས་གར་དང་ཤེས་རིག དྲིལ་བསྒྲགས་དང་ཆོས་རིག་ལྷན་ཁང་སོགས་མཉམ་རུབ་ཀྱི་བོད་ཀྱི་རྒྱལ་རབས་ལོ་རྒྱུས། ཆོས་དང་འབྲེལ་བའི་ལས་རྒྱུ་འབྲས། ཚེ་འདི་ཕྱི། བོད་ཀྱི་གྲགས་ཅན་དཔའ་བོ་དཔའ་མོ། གཞན་ཡང་དེང་དུས་ཀྱི་མི་ཚེའི་འགྲོ་སྟངས་སོགས་ཀྱི་སྐོར་ལ་གློག་བརྙན་བཟོ་བསྐྲུན་ཐུབ་ན་དེང་དུས་ཀྱི་བོད་ཕྲུག་ན་གཞོན་རྣམས་ལ་ཕན་ཐོགས་ཆེན་པོ་ཡོང་བ་འདུག་བསམ་པའི་བསམ་ཚུལ་ཐེངས་འགའ་ཕུལ་མྱུང་ཡོད། ད་རེ་གོང་གི་གནས་ཚུལ་འདི་དང་འབྲེལ་ཆགས་ཡོད་དུས་ཡང་བསྐྱར་ཞུ་འདོད་བྱུང་། ཐུགས་རྗེ་ཆེ།
ཊི་བྷི་TBལ་ཊེ་བྷེ་འདི་བོད་སྐད་འདི་སུའི་བོད་སྐད་རེད།
སྤྱི་ཚོགས་ལ་ཕན་པའི་ཆེད་ཡིན་ན་ནི་ཡག་པོ་རེད་ལ་རྒྱབ་སྐྱོར་ཡོད། རང་ཉིོད་ཁེ་ཕནགཅིག་པོའི་ཆེད་ཡིན་ན་ཐ་ཤལ་རེད།
གློག་བརྙན་འདི་རིམ་བཞིན་མང་ཚོགས་ལ་རིན་མེད་ཀྱིས་བཏོན་འཆར་འདུག་ཅིང་། དམིགས་བསལ་རྡོར་གདན་དུ་ཁྱབ་བསྒྲགས་ཤུགས་ཆེ་གནང་འཆར་འདུག གློག་བརྙན་དེའི་མིང་ཆ་ཚང་། (ཀྱེ་མ། ལམ་ནོར་གྱི་སྐྱོ་གདུང་།)ཟེར་གྱི་འདུག
གློག་བརྙན་འདི་རིགས་སྟོན་དུས་ཆེ་ཆེ་མཐོ་མཐོ་ཚོ་ལས་མི་དམངས་དང་སློབ་ཕྲུག་གང་མང་མགྲོན་འབོད་གནང་ན་ལོས་བཟང། མི་བརྒྱ་ཐམ་པ་མང་དྲགས་པ་མ་རེད་དམ། གལ་ཏེ་སྐད་འབོད་བཏང་ནས་ཀྱང་འདི་ཙམ་ལས་མ་ཡོང་བ་ཡིན་ན་ད་སྤྱི་ཚོགས་ཁྲོད་ལ་ཁྱབ་སྤེལ་ཅི་ཙམ་འགྲོ་མིན་ཡང་ཚོད་དཔག་ཐུབ་པ་ཞིག་རེད། གང་ལྟར་དུས་ངན་སྙིགས་མའི་རང་མཚང་ལ་འགོག་ཐབས་དཀའ་བའི་རྟགས་མཚན་ལོས་ཡིན།