ད་ལོ་གཅིག་པུར་རྡོ་སོལ་སྐྱེལ་འདྲེན་རླངས་འཁོར་གྱིས་མཚོ་སྔོན་བོང་སྟག་ཚོ་བའི་མི་ ༤ དམར་གསོད་དང་མི་ ༥ ལ་རྨས་སྐྱོན་ཚབས་ཆེན་བཟོས་ཡོད་འདུག
འདས་པའི་ལོ་བཅུ་ལྷག་གི་རིང་རྒྱ་གཞུང་གིས་བོད་མདོ་སྨད་མཚོ་ནུབ་ཐེམ་ཆེན་རྫོང་ཁོངས་སུ་ཡོད་པའི་མུ་རུའི་རྡོ་སོལ་གཏེར་ཁ་བསྔོག་འདོན་རྒྱ་བསྐྱེད་བྱས་ཡོད་པར་མ་ཟད། ལོ་ལྟར་ས་གནས་བོད་མི་མང་པོར་རྡོ་སོལ་སྐྱེལ་འདྲེན་རླངས་འཁོར་གྱིས་བརྡུང་སྟེ་ཤི་རྨས་ཚབས་ཆེན་བཟོ་བཞིན་ཡོད་པ་དང་། ད་ལོ་གཅིག་པུར་རྒྱ་གཞུང་གི་རྡོ་སོལ་སྐྱེལ་འདྲེན་རླངས་འཁོར་གྱིས་བོང་སྟག་ཚོ་བའི་བོད་པ་ཡུལ་མི་ ༤ དམར་གསོད་དང་ ༥ ལ་རྨས་སྐྱོན་ཚབས་ཆེན་བཟོས་ཡོད་འདུག ཡིན་ནའང་། ད་ལྟའི་བར་ས་གནས་རྒྱ་གཞུང་གིས་ཤི་རྨས་དོན་རྐྱེན་དེ་དག་གསང་སྦས་བྱས་སྟབས་གསར་ལམ་ཁག་ཏུ་ཐོན་ཐུབ་མེད་པ་རེད།
ཕྱི་ཚེས་ ༡༡ ཉིན་ཟིན་བྲིས་པ་ཞིག་གིས་དྲ་ཐོག་ཏུ་གནས་ཚུལ་སྤེལ་པ་ལྟར་ན། ད་ལོའི་ཕྱི་ཟླ་ ༤ པའི་ཚེས་ ༣ ཉིན་ཐེམ་ཆེན་རྫོང་གི་ཐེན་མུ་གཞུང་ལམ་གྱི་ལམ་ཐིག་ལེ་དབར་ ༩༠ མཚམས་སུ། ལུང་དམར་རུ་ཁག་གཉིས་པའི་སྐར་མ་ཐུབ་བསྟན་བཟའ་མི་གཉིས་ལ་རྡོ་སོལ་སྐྱེལ་འདྲེན་རླངས་འཁོར་གྱིས་བརྡུང་སྟེ་རྨས་སྐྱོན་ཚབས་ཆེན་བཟོས་ཡོད་པ་དང་། ཕྱི་ཟླ་ ༤ ཚེས་ ༨ ཉིན་ཡང་བསྐྱར་ལམ་ཐིག་ལེ་དབར་ ༩༠ ལྷག་གི་མཚམས་སུ་ལུང་དམར་རུ་ཁག་དང་པོའི་ཨ་ཙོ་དང་། རུ་ཁག་གཉིས་པའི་ཐུགས་རྗེ་གཉིས་ལ་རྡོ་སོལ་རླངས་འཁོར་གྱིས་བརྡུང་སྟེ་དམར་གསོད་བཏང་འདུག ཕྱི་ཟླ་ ༥ ཚེས་ ༡༢ ཉིན་ལམ་ཐིག་ལེ་དབར་ ༨༠ མཚམས་སུ་ལུང་དམར་རུ་ཁག་གཉིས་པའི་རུ་གཙོ་ཟུར་པ་ཀུ་རྒྱ་ལ་རྡོ་སོལ་རླངས་འཁོར་གྱིས་བརྡུང་སྟེ་ད་ལྟ་ཞ་འཁུམ་དུ་གྱུར་ཡོད་པ་དང་། ཕྱི་ཟླ་ ༦ ཚེས་ ༢༠ ཉིན་ལུང་དམར་རུ་ཁག་གཉིས་པའི་གངས་རི་རྒྱལ་ལ་རྡོ་སོལ་རླངས་འཁོར་གྱིས་བརྡུང་སྟེ་རྐང་པ་ཡ་གཅིག་གཏུབ་ཡོད་འདུག ཕྱི་ཟླ་ ༧ ཚེས་ ༢ ཉིན་ལམ་ཐིག་ལེ་དབར་ ༡༠༠ ཙམ་གྱི་མཚམས་སུ་ལུང་དམར་རུ་ཁག་གཉིས་པའི་སངས་འབྲུག་ལ་རྡོ་སོལ་རླངས་འཁོར་གྱིས་རྡུང་སྟེ་དམར་གསོད་བཏང་ཡོད་པ་དང་། ཕྱི་ཟླ་ ༧ ཚེས་ ༩ ཉིན་ལམ་ཐིག་ལེ་དབར་ ༡༠༠ ལྷག་གི་མཚམས་སུ་རུ་ཁག་གཉིས་པའི་ཀླུ་འབྲུག་ལ་རྡོ་སོལ་རླངས་འཁོར་གྱིས་རྡུང་སྟེ་རྐང་བ་ཡ་གཅིག་གཅོད་དགོས་བྱུང་འདུག ཕྱི་ཟླ་ ༧ ཚེས་ ༡༦ ཉིན་ལེ་དབར་ ༦༠ མཚམས་སུ་ལུང་དམར་རུ་ཁག་གཉིས་པའི་མཱི་ཅིན་ལ་རྡོ་སོལ་རླངས་འཁོར་གྱིས་རྡུང་སྟེ་དམར་གསོད་བཏང་ཡོད་འདུག
དེ་སྔོན་བོང་སྟག་ས་ཁུལ་དུ་རྡོ་སོལ་སྐྱེལ་འདྲེན་བྱེད་མཁན་གྱི་རླངས་འཁོར་ཁ་ལོ་པ་ཞིག་གིས། མཚོ་སྔོན་པོའི་མཚོ་ཤར་གྱི་ལུག་གསོ་ར་བའི་ཁྲོམ་ཞིག་རླངས་འཁོར་འོག་གཅིར་ཏེ་གསོད་པ་ལས། ཐེམ་ཆེན་རྫོང་གི་འབྲོག་པ་ཞིག་བསད་པ་ཡིན་ན་དེའི་འགྲོ་སོང་དམའ་བ་འདུག ལུག་རྒྱུད་ལེགས་བསྒྱུར་བྱེད་སྤྱད་ཀྱི་ཁྲོམ་ཞིག་བསད་པ་ཡིན་ན་རྒྱ་སྒོར་ཁྲི་ ༡༨ ཀྱི་སྐྱིན་ཚབ་སྤྲོད་དགོས་པ་དང་། ཐེམ་ཆེན་རྫོང་གི་འབྲོག་པ་ཞིག་བསད་པ་ཡིན་ན། ཐ་ན་སྣོག་བརྒྱབ་སྟེ་སྨན་རིན་ཙམ་དང་སེམས་གསོ་ཙམ་ཡང་མ་བྱས་ན་ཆོག་པ་རེད་ཅེས་བརྗོད་མྱོང་ཡོད་འདུག
ཟིན་བྲིས་དེའི་ནང་ “ དཔལ་ཡོན་སྤྱི་ཚོགས་སྐད་པའི། ཁྲིམས་ལྡན་སྤྱི་ཚོགས་སྐད་པའི། ཞི་བདེའི་སྤྱི་ཚོགས་སྐད་པའི། འཆམ་མཐུན་སྤྱི་ཚོགས་སྐད་པའི། དེ་རིང་གི་སྲིད་གཞུང་གིས་ངའི་ཡུལ་མི་དག་འདི་ལྟར་རྩྭ་མི་ཤིང་མི་རུ་བལྟ་བཞིན་ཡོད ” ཅེས་བཀོད་དེ། ཟིན་བྲིས་སུ་བཀོད་པའི་ཡུལ་མི་ཤི་རྨས་ཀྱི་གྲངས་ཀ་དེ་ནི་ད་ལོ་གཅིག་པུར་ཁོ་ཚོའི་སྡེ་བའི་ནང་བྱུང་བའི་དོན་རྐྱེན་དག་ཡིན་པ་དང་། ཐེམ་ཆེན་རྫོང་ཁོངས་ཀྱི་མུ་རུའི་རྡོ་སོལ་གཏེར་ཁ་བསྔོག་འདོན་བྱས་ཏེ་ལོ་བཅུ་གྲངས་ལྷག་འདས་ཟིན་ཡོད་པ་དང་། ད་ལྟའི་བར་རྡོ་སོལ་སྐྱེལ་འདྲེན་དང་འབྲེལ་བའི་དོན་རྐྱེན་ཁྲོད་ཡུལ་མིར་ཤི་རྨས་ཐེབས་པའི་གྲངས་ཀ་ནི་དེ་བས་ཀྱང་མང་བའི་སྐོར་བརྗོད་འདུག
གཞན་ཡང་། ཟིན་བྲིས་པ་དེས་ཤི་རྨས་དོན་རྐྱེན་གྱི་གནས་ཚུལ་བཀོད་པའི་མཇུག་ཏུ། “ ངའི་ཕ་ས་གཡང་གི་ཟོ་བ་དེ། དམར་ཁྲག་གི་འཁོར་ལོས་བརྫི་ཡིན་ཡོད། ངའི་ཕུ་ནུ་དུང་གི་སོ་ཕྲེང་དེ། འཇིགས་ལྕགས་ཀྱི་སོ་ཁས་གཏུབས་ཀྱིན་ཡོད། ལུས་རིན་ཆེན་གསེར་མཁར་ཡིན་ནོ་ཟེར། གསེར་ས་རུ་བསྲེ་ཚུལ་འདི་འདྲ་རེད། སྲོག་གཅེས་རྒུ་ནོར་བུ་ཡིན་ནོ་ཟེར། ནོར་ཐལ་བར་གཏོང་ཚུལ་འདི་ལ་ལྟོས། ” “ལར་དོ་ཞགས་སྨྲེང་བ་ལྷུག་ལྷུག་འོང་། མིག་ཁྲ་ཆུང་བལྟས་བལྟས་རིག་རིག་ལ། དུང་ཟླ་བ་གཟའ་ཡིས་ཁྱུར་མིད་བརྒྱབ། སྡུག་ཁུར་བོའི་ཁ་སྣོན་མིན་ནམ་ཅི། མཆོད་མར་མེའི་དཔང་བོ་ཡོད་བཞིན་དུ། སྨག་ནག་མོ་ལིང་ཏོག་གློར་བྱུང་འདྲ། སྡུག་ཁུར་བོའི་ཡང་སྣོན་མིན་ནམ་ཅི། ” ཞེས་སོགས་ཤོ་ལོ་ཀ་བརྒྱད་ཅན་གྱི་སྙན་རྩོམ་ཞིག་བྲིས་ཏེ་རང་སེམས་ཀྱི་སྡུག་གདུང་མཚོན་པར་བྱས་འདུག
གཞིས་སྡོད་བོད་མིའི་དཀའ་བསྔལ་འདི་ང་ཚོས་གང་འདྲ་བྱས་ནས་སེལ་དགོས་པ་རེད་བོད་མི་ཚོ།
བོད་གཞོས་སྡོད་པས།
དེ་སྔོན་བོང་སྟག་ས་ཁུལ་དུ་རྡོ་སོལ་སྐྱེལ་འདྲེན་བྱེད་མཁན་གྱི་རླངས་འཁོར་ཁ་ལོ་པ་ཞིག་གིས། མཚོ་སྔོན་པོའི་མཚོ་ཤར་གྱི་ལུག་གསོ་ར་བའི་ཁྲོམ་ཞིག་རླངས་འཁོར་འོག་གཅིར་ཏེ་གསོད་པ་ལས། ཐེམ་ཆེན་རྫོང་གི་འབྲོག་པ་ཞིག་བསད་པ་ཡིན་ན་དེའི་འགྲོ་སོང་དམའ་བ་འདུག ལུག་རྒྱུད་ལེགས་བསྒྱུར་བྱེད་སྤྱད་ཀྱི་ཁྲོམ་ཞིག་བསད་པ་ཡིན་ན་རྒྱ་སྒོར་ཁྲི་ ༡༨ ཀྱི་སྐྱིན་ཚབ་སྤྲོད་དགོས་པ་དང་། ཐེམ་ཆེན་རྫོང་གི་འབྲོག་པ་ཞིག་བསད་པ་ཡིན་ན། ཐ་ན་སྣོག་བརྒྱབ་སྟེ་སྨན་རིན་ཙམ་དང་སེམས་གསོ་ཙམ་ཡང་མ་བྱས་ན་ཆོག་པ་རེད་ཅེས་བརྗོད་མྱོང་ཡོད་འདུག
ཟེར།
བོད་བྱེས་འབྱོར་པས་དེའི་ལན་དུ།
དེའི་ཐད་ལ་ས་གནས་དབུ་ཁྲིད་དང་ཤེས་ཡོན་ཅན་ཚོས་ལམ་སྟོན་དང་ཕྱུག་པོ་ཚོས་རོགས་རམ་གནང་དགོས་ངེས་ཤིག་རེད། ང་ཚོས་འདི་དག་ལ་སྣང་ཆུང་གཏན་ནས་བྱེད་མི་རུང། ཐག་སྣེ་བསྟན་ན་ཁུགས་ལ་ལྡིང་ཟེར་བ་རེད། ཆེ་ས་ནས་གཞཱུང་དང་ཆུང་ས་ནས་རྒྱ་མི་སྒེར་བ་ཚུན་ཆད་མི་རིགས་ལ་མཐོང་ཆུང་དང་བརྙས་བཅོས་བྱེད་མཁན་ཚང་མར་ངོ་རྒོལ་འཐབ་རྩོད་བྱེད་དགོས།
ཟེར།
དོན་གནད་འདི་འདྲའི་སྐབས་སུ་ནང་སོག་མི་དམངས་ཀྱིས་ངོ་རྒོལ་ཅི་འདྲ་བྱས་སོང། དེ་ཚོ་མིག་དཔེ་ལྟ་ས་རེད། མི་སྲོག་དུད་འགྲོ་ལ་ཡང་མི་བརྩི་བའི་ལས་འདི་འདྲ་བྱེད་དུས་མི་དམངས་ཡོངས་ཀྱིས་ངོ་རྒོལ་སྐད་འབོད་རྒྱག་མ་ཐུབ་ན་ཡང་མ་མཐར་ཡང་ཁྲིམས་རྩོད་པ་བཙལ་ནས་ཁྲིམས་གཏུགས་བྱེད་ཐུབ་དགོས། དེའི་ཐད་ལ་ས་གནས་དབུ་ཁྲིད་དང་ཤེས་ཡོན་ཅན་ཚོས་ལམ་སྟོན་དང་ཕྱུག་པོ་ཚོས་རོགས་རམ་གནང་དགོས་ངེས་ཤིག་རེད། ང་ཚོས་འདི་དག་ལ་སྣང་ཆུང་གཏན་ནས་བྱེད་མི་རུང། ཐག་སྣེ་བསྟན་ན་ཁུགས་ལ་ལྡིང་ཟེར་བ་རེད། ཆེ་ས་ནས་གཞཱུང་དང་ཆུང་ས་ནས་རྒྱ་མི་སྒེར་བ་ཚུན་ཆད་མི་རིགས་ལ་མཐོང་ཆུང་དང་བརྙས་བཅོས་བྱེད་མཁན་ཚང་མར་ངོ་རྒོལ་འཐབ་རྩོད་བྱེད་དགོས། ཁྲིམས་ལྟར་བྱེད་མཁས་པོ་ཡང་དགོས། གནད་དོན་འདི་རིགས་རླུང་འཕྲིན་ཁང་དག་ནས་གསལ་བཤད་དང་ལམ་སྟོན་གནང་འོས་པ་ཞིག་རེད། དེ་ཡང་ཐབས་མཁས་པོ་བྱས་ནས་གནད་དོན་དེ་རིགས་ཐད་ལ་བགྲོ་གླེང་གི་ལེ་ཚན་སོགས་བཟོས་ནས་བཤད་ཆོག་གི་རེད། གནས་ཚུལ་འདི་འདྲ་གོ་དུས་ངོ་མ་སྙིང་ན་བ་ཞིག་རེད།
གྲངས་ཉུང་མི་རིགས་ཀྱི་གནས་སྟངས་འདི་འདྲ་རེད། མ་ཟད་རྒྱ་ནག་མི་མང་གི་ནང་དུ་ཡོད་པའི་གྲངས་ཉུང་མི་རིགས་ཚང་མ་ལ་འདི་འདྲ་མིའི་རིན་ཐང་ལ་བརྩི་བཀུར་བྱེད་ཀྱི་ཡོད་པ་མ་རེད། ད་དུང་འདི་འདྲ་ཐབ་སྐྱོ་བོ་མང་པོ་ཡོད་པ་རེད། ཕྱི་ལོ་གཉིས་སྟོང་བརྒྱད་ནས་བཟུང་ད་བར་བོད་མི་གང་མང་ཞིག་དམར་གཞུང་གི་དྲག་གནོན་བྱས་ཡོད་པ་དེ་གསལ་བོ་རེད་བརྗོད་མ་དགོས་པར་ཚང་མའི་ཤེས་ངེས་རེད།