དགུ་ཆུའི་ལང་ཚོ་འབོད་པའི་བོད་མི་ཞིག་གིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། འདི་ལོའི་ལོ་མགོ་ནས་བཟུང་རྒྱ་ནག་གཞུང་གིས་བོད་ཀྱི་ས་ཁུལ་གང་སར་མཉམ་ལས་ཁང་འཛུགས་དགོས་པའི་སྲིད་ཇུས་དྲིལ་བསྒྲགས་དང་ས་ཁུལ་ཁག་ཅིག་ཏུ་དངོས་སུ་སྲིད་ཇུས་ལག་བསྟར་བྱས་ཡོད་པ་ལྟར། ཉེ་སྔོན་རྨ་ལྷོ་བོད་རིགས་རང་སྐྱོང་ཁུལ་རེབ་གོང་རྫོང་གིས་མཉམ་ལས་ཁང་གསར་རྒྱག་གི་ལས་གཞི་དེ་རེབ་གོང་མདོ་བ་ཞེས་པའི་འབྲོག་སྡེ་ནས་མགོ་འཛུགས་བྱས་ཡོད་འདུག་ལ། མཉམ་ལས་ཁང་གསར་རྒྱག་གི་སྲིད་ཇུས་ལག་བསྟར་ཀྱི་ཐད་བཙན་བཀའི་རྣམ་པ་མེད་པར། མི་ཚང་སུ་འདྲ་ཞིག་ཡིན་རུང་འཛུལ་བའི་ཐད་ལ་གདམ་ཀ་སྤྲད་དེ། མཉམ་ལས་ཁང་དུ་འཛུལ་མཁན་རྣམས་ལ་གཞུང་ཕྱོགས་ནས་དངུལ་གྱི་རོགས་རམ་ཤུགས་ཆེན་པོ་སྤྲོད་རྒྱུ་ཡིན་ཚུལ་དང་། འཛུལ་ཞུགས་མི་བྱེད་པའི་རིགས་ལ་དེ་འབྲེལ་གྱི་རོགས་རམ་མེད་པའི་སྐོར་སོགས་བཤད་ཡོད་འདུག ཉེ་ཆར་དེ་སྔ་རིག་གནས་གསར་བརྗེ་དང་མཉམ་ལས་ཁང་གི་དཀའ་སྡུག་མྱང་མྱོང་མེད་པའི་གཞོན་སྐྱེས་ཚོ་དངོས་སུ་མཉམ་ལས་ཁང་དེར་འཛུལ་བཞིན་ཡོད་ཀྱང་། མཉམ་ལས་ཁང་གི་གནས་སྟངས་དང་མཇུག་འབྲས་མཐོང་མྱོང་བའི་མི་རབས་རྒན་པ་རྣམས་ད་ཆར་མཉམ་ལས་ཁང་དེར་འཛུལ་ཞུགས་མ་བྱས་པར་འབྲོག་སྡེ་ཁག་གཉིས་སུ་གྱེས་ཏེ་དཀའ་ངལ་ཆེན་པོ་འཕྲད་ཀྱི་ཡོད་འདུག
ས་གནས་མི་མང་གི་ངོས་ནས། རྒྱ་ནག་གཞུང་གིས་བོད་ཀྱི་ས་ཁུལ་གང་སར་མཉམ་ལས་ཁང་གསར་རྒྱག་གི་སྲིད་ཇུས་ལག་བསྟར་བྱེད་བཞིན་པའི་དམིགས་ཡུལ་གཙོ་བོ། བོད་ཀྱི་འབྲོག་སྡེ་ཁག་རྫོང་དང་ཞང་སོགས་སུ་བསྡུས་རྗེས་རྒྱ་རིགས་མང་པོ་གནས་སྤོར་གྱིས་བོད་མི་རིགས་ཀྱི་སྲོལ་རྒྱུན་འཚོ་བ་དང་གོམས་གཤིས་བསྒྱུར་ཐབས་དང་། བོད་མིའི་དཔལ་འབྱོར་འཕེལ་རྒྱས་ལ་ཚོད་འཛིན། སྒེར་ལ་བདག་པའི་འབྲོག་ས་ཡོངས་གཞུང་བཞེས་གཏོང་རྒྱུ་བཅས་ལ་དམིགས་པའི་སྲིད་ཇུས་ཤིག་ཏུ་ངོས་འཛིན་བྱེད་ཀྱི་ཡོད་འདུག
རེབ་གོང་མདོ་བ་སྡེ་བ་ནི་རོང་བོ་དགོན་ཆེན་གྱི་ལྷ་སྡེ་གཙོ་གྲས་ཤིག་ཡིན་པ་དང་། ད་ལྟའི་ཆར་སྡེ་བ་དེར་འབྲོག་པ་ཁྱིམ་ཚང་ཆིག་སྟོང་ ༡༠༠༠ ལྷག་ཡོད་འདུག
མཉམ་ལས་ཁང་གིས་མཉམ་སྦྲེལ་ཐོག་ཅི་ཞིག་ལས་རྒྱུ་ཡོད་ན. དེ་སྔའི་མཉམ་ལས་ཁང་དང་མི་འབྲ་བ་འདི་དག་ཡོད་ཅེས་འབྲེལ་བཤད་གང་འདྲ་ཡོད་དམ