བོད་མི་མཆོད་མཇལ་བ་འཛིན་བཟུང་།

ཉེ་ཆར་བོད་ནས་གསར་དུ་འབྱོར་ཞིང་ད་ལྟ་རྒྱ་གར་ལྷོ་ཕྱོགས་འབྲས་སྦུངས་དགོན་པའི་ནང་ཡོད་པའི་གྲྭ་བློ་བཟང་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ལོ་ ༢༠༠༨ ལོ་ནས་བཟུང་རྒྱ་ནག་གཞུང་གིས་མདོ་ཁམས་གཉིས་ཀྱི་ས་ཁུལ་ཁག་ནས་ལྷ་སར་མཆོད་མཇལ་དུ་ཡོང་མཁན་ཚོ་དང་། དམིགས་བསལ་གྲྭ་བ་ཚོར་ས་གནས་རིམ་པའི་ཡིག་ཆ་མེད་པར་ལྷ་སར་མཆོད་མཇལ་དུ་ཡོང་བར་དམ་དྲག་ཤུགས་ཆེར་བྱེད་ཀྱིན་པ་ལྟར། ཉེ་ཆར་ལྷ་སའི་ཉེན་རྟོག་མི་སྣས་མདོ་ཁམས་གཉིས་ནས་ལྷ་སར་མཆོད་མཇལ་དུ་ཡོང་བའི་བོད་མི་སྐྱ་སེར་ ༥༠ ལྷག་འཛིན་བཟུང་གིས་ལྷ་ས་དང་རྒྱང་ཐག་སྤྱི་ལེ་ ༧ ལྷག་གི་མཚམས་སུ་ཡོད་པའི་ཚེ་གུང་ཐང་མི་འཁྱམས་ལས་ཁུངས་སུ་བཙོན་འཇུག་བཀག་ཉར་བྱས་ཏེ། བོད་མི་མང་པོ་ཞིག་གིས་ལྟོགས་སྐོམ་གྱི་དཀའ་སྡུག་མྱོང་བཞིན་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། གནས་སྟངས་དེ་ ༢༠༠༨ ལོ་ནས་དངོས་སུ་མགོ་འཛུགས་བྱས་པ་ཞིག་ཡིན་འདུག་ལ། དེ་ཡང་གཙོ་བོ། བོད་མདོ་ཁམས་གཉིས་ནས་མཆོད་མཇལ་དུ་ཡོང་བའི་གྲྭ་བ་ཚོས་དགོན་པ་ཁག་དང་ས་གནས་ནས་མཆོད་མཇལ་དུ་འགྲོ་ཆོག་པའི་ཆོག་མཆན་དང་ངོས་སྤྱོར་ཡི་གེ་ལེན་དགོས་པ་དང་། མི་སྐྱ་ཚོར་ངེས་པར་དུ་ཐོག་ལག་འཁྱེར་དགོས་ཀྱི་ཡོད་ཀྱང་། གྲྭ་བ་དང་མི་སྐྱ་མང་པོ་ཞིག་གིས་གཞུང་གི་འགྲོ་ལུགས་ལྟར་ཡིག་ཆ་དང་ཐོབ་ཐང་ལག་འཁྱེར་སོགས་འཁུར་མེད་པའི་དབང་གིས། ས་གནས་ཉེན་རྟོག་པས་བོད་མི་མཆོད་མཇལ་བ་བརྒྱ་ཕྲག་མང་པོ་འཛིན་བཟུང་བཀག་ཉར་དང་འདྲི་གཅོད་བྱས་ཀྱི་ཡོད་འདུག་ལ།   ལྷག་པར་དུ་ད་ལྟའི་ཆར་ཡང་སེ་འབྲས་དགེ་གསུམ་དང་དགོན་སྡེ་ཁག་ཡོངས་ལ་དམག་མི་འགྲེམས་འཇོག་གིས་མཆོད་མཇལ་བར་དམ་དྲག་བྱས་ཏེ། གྲྭ་བ་ཚོས་དགོན་པ་ལས་གཞན་མཆོད་མཇལ་དང་ཁྲོམ་གཞུང་སོགས་སུ་གྲྭ་ཆས་གྱོན་མི་ཐུབ་པའི་གནས་སྟངས་ཆགས་ཡོད་འདུག