དེ་རིང་༧གོང་ས་མཆོག་དད་ལྡན་ཆོས་ཞུ་བ་འབུམ་ཕྲག་བརྒལ་བའི་ཕེབས་བསུའི་ཁྲོད་གནས་མཆོག་རྡོ་རྗེ་གདན་དུ་ཞབས་སོར་བཀོད་དེ་མཆོད་རྟེན་ཆེན་མོར་མཆོད་མཇལ་དང་། འཛམ་གླིང་ཕྱོགས་མཐའ་ཁག་ནས་ཕེབས་པའི་གསར་འགོད་པ་ཚོའི་དྲི་བར་བཀའ་ལན་གནང་ཡོད།
དེ་རིང་ཉིན་གུང་ཆུ་ཚོད་ ༡།༣༠ སྟེང་དད་ལྡན་ཆོས་ཞུ་བ་འབུམ་ཕྲག་ལྷག་གི་ཕེབས་བསུའི་དབུས་སུ་༧གོང་ས་མཆོག་རྡོ་རྗེ་གདན་དུ་ཞབས་སོར་བཀོད་མ་ཐག རྡོར་གདན་མཆོད་རྟེན་ཆེན་མོའི་ནང་མཇལ་སྐོར་དང་སྨོན་ལམ་གསུངས་ཡོད་པ་དང་། རྒྱ་གར་དང་ཕྱི་རྒྱལ་ཁག་ནས་ཕེབས་པའི་གསར་འགོད་པ་ ༥༠ ཙམ་ལ་ཐེངས་འདིའི་ཆིབས་བསྒྱུར་སྐོར་བཀའ་བསྩལ་དོན། “ང་རང་འཛམ་གླིང་འདིར་མི་དུང་ཕྱུར་ ༧༠ ཡོད་པའི་ནང་གི་གཅིག་ཡིན། མི་ཚང་མར་སྐྱོ་བོ་ནས་ཡར་རྒྱས་འགྲོ་རྒྱུའི་ཐོབ་ཐང་ཡོད་ལ། ཚང་མར་མི་ཚེ་བྱ་བ་ལམ་འགྲོ་དང་བདེ་སྐྱིད་མྱོང་རྒྱུའི་ཐོབ་ཐང་ཡོད། དངོས་པོ་ཡར་རྒྱས་འགྲོ་རྒྱུར་སྨོན་ལམ་བརྒྱབ་སྟེ་ཡོང་ཐབས་མེད་པར་ལག་ལེན་ཐོག་ཡོང་དགོས་པ་ཞིག་ཡིན། རྒྱ་གར་གྱི་ལོ་ངོ་སྟོང་ཕྲག་རིང་གི་འཚེ་མེད་ཞི་བ་དང་ཆོས་ལུགས་མཐུན་སྒྲིལ་གཉིས་ནི། ད་ལྟའི་འཛམ་གླིང་འདིར་ཐུན་མོང་མ་ཡིན་པ་ཞིག་ཆགས་ཡོད། བཅོམ་ལྡན་འདས་ཀྱི་གསུང་ཡོད་ཚད་གནས་འདི་བརྒྱུད་དེ་འཛམ་གླིང་དུ་ཁྱབ་བརྡལ་ཕྱིན་པ་རེད། ད་ཆར་རྒྱ་གར་གྱིས་འཚེ་བ་མེད་པ་དང་ཆོས་ལུགས་མཐུན་སྒྲིལ་གྱི་ཐོག་ཞི་བདེའི་འཛམ་གླིང་བསྐྲུན་རྒྱུར་དམིགས་བསལ་ནུས་པ་འདོན་དགོས་པ་རེད་ཅེས”གསུངས་བྱུང་།
ཡང་༧གོང་ས་མཆོག་གིས་མུ་མཐུད་དུ་ “ང་རང་གིས་བཅོམ་ལྡན་འདས་ནི་བསམ་བློ་སྨྲ་བ་ཞིག་དང་གནའ་རབས་རྒྱ་གར་གྱི་ཚན་རིག་པ་ཞིག་ལ་ངོས་འཛིན་གནང་གི་ཡོད། སྟོན་པས་དགེ་སློང་དག་གམ་མཁས་རྣམས་ཀྱིས། བསྲེགས་བཅད་བརྡར་བའི་གསེར་བཞིན་དུ། ལེགས་པར་བརྟག་ལ་ང་ཡི་བཀའ། བླང་བར་བྱ་བ་གུས་ཕྱིར་མིན་ཞེས་གསུངས་པ་དེ་ཚན་རིག་དང་མཐུན་པ་ཞིག་རེད། ངོས་རང་སྟོན་པའི་རྗེས་མཇུག་པ་ཞིག་ཡིན་པའི་ཆ་ནས། དུས་རྟག་དུ་སྟོན་པའི་བྱམས་དང་སྙིང་རྗེའི་སྐོར་བརྡ་ལན་སྐྱེལ་གྱི་ཡོད། ལྷག་པར་དུ་སྟོན་པའི་རྟེན་འབྱུང་ལྟ་བ་དེ་ཆོས་ལུགས་གཞན་སུས་ཀྱང་བཤད་ཀྱི་མེད་སྟབས། ལྟ་གྲུབ་དེ་ནང་པའི་དམིགས་བསལ་ཁྱད་ཆོས་ཆགས་ཡོད། ལྟ་གྲུབ་དེ་དེང་དུས་ཚན་རིག་གིས་བརྗོད་བཞིན་པའི་རྡུལ་ཕྲ་རབ་ཀྱི་རྣམ་གཞག་དང་། དངོས་ཡོད་སྤྱི་ཚོགས་དང་མཐུན་པ་ཞིག་རེད། རྟེན་འབྱུང་ལྟ་གྲུབ་ཐོག་མར་བཅོམ་ལྡན་འདས་ཀྱིས་གསུངས་ཡོད་ཀྱང་། ལག་ལེན་དེ་རྒྱལ་ཁབ་དང་རྒྱལ་ཁབ་བར་གྱི་དཔལ་འབྱོར་དང་། རྒྱལ་སྤྱིའི་འབྲེལ་ལམ། ས་ཁམས། སྐྱེས་ཁམས། དཔལ་འབྱོར་སོགས་ཕྱོགས་གང་ཐད་ལ་བེད་སྤྱོད་བཏང་ཆོག་གི་ཡོད ” ཅེས་གསུངས།
གསར་འགོད་པས་བོད་ཀྱི་གནད་དོན་ཐོག་བཀའ་འདྲི་ཞུས་སྐབས། ད་ལྟ་ང་ཚོ་དཀའ་ངལ་གྱི་གནས་སུ་ལྷུང་ཡོད་ཀྱང་། ང་ཚོར་བདེན་པ་ཡོད་པ་རེད། མཚམས་རེར་ངས་ང་ཚོའི་འཐབ་རྩོད་ནི་མེ་མདའི་ནུས་པ་དང་བདེན་པའི་ནུས་པ་པ་བར་གྱི་འཐབ་རྩོད་ཅིག་རེད་བརྗོད་ཀྱི་ཡོད། ཕུགས་རྒྱང་རིང་པོའི་ཆ་ནས་བསམ་བློ་བཏང་ན། མེ་མདའ་ལས་བདེན་པའི་ནུས་པ་དེ་ཤུགས་ཆེ་བ་ཡོད་སྐོར་སོགས་གསུངས་བྱུང་།
དེ་རིང་༧གོང་ས་མཆོག་རྡོར་གདན་མཆོད་རྟེན་ཆེན་མོར་མཆོད་མཇལ་དུ་ཕེབས་སྐབས། ལམ་འགྲམ་དུ་མང་ཚོགས་ཁྲི་ཕྲག་མང་པོ་རུབ་རྒྱག་བྱས་ཏེ། ༧གོང་ས་མཆོག་གི་ཕྱག་གཡས་མའི་མཛུབ་ཆུང་སྟེང་རྨ་ཆུང་ཆུང་ཞིག་བཟོས་ཡོད་ཚུལ་གྲགས་སྟབས། གསར་འགོད་པས་བདེ་སྲུང་དྲུང་ཆེ་དངོས་གྲུབ་རྡོ་རྗེ་ལགས་སུ་བཀའ་འདྲི་ཞུས་པར། ༧གོང་ས་མཆོག་གིས་ཕེབས་ལམ་དུ་མང་ཚོགས་ལ་ཕྱག་འཇུ་གནང་སྐབས་མང་ཚོགས་རུབ་བརྒྱབ་སྟེ། ཁོང་གི་ལག་པར་རྨ་བཟོས་པ་རེད། ཡིན་ནའང་རྨ་བཟོ་སྟངས་གསལ་པོ་ཤེས་རྟོགས་བྱུང་མ་སོང་། རྩ་བའི་དུས་དབང་སྐབས་ས་གནས་ཉེན་རྟོག་པ་དང་བདེ་སྲུང་ལས་ཁུངས་ཀྱི་ལས་བྱེད་ཐུན་མོང་ཐོག་འབད་བརྩོན་གནང་བཞིན་ཡོད། ༧གོང་ས་མཆོག་གི་སྐུ་ཕྱཱའི་ཐོག་རྒྱ་གར་གཞུང་གི་ཚད་གཞི་བཟོས་ཡོད་པ་ལྟར། ང་ཚོ་ཚད་གཞི་དེའི་ཐོག་འགྲོ་བཞིན་ཡོད་སྟབས་དམིགས་བསལ་དཀའ་ངལ་འཕྲད་ཀྱི་མ་རེད། ད་ལོར་བོད་ནས་ཆོས་ཞུ་བ་མང་པོ་ཕེབས་པའི་སྐབས་དང་བསྟུན་ཏེ། རྒྱ་གཞུང་གི་གསང་ཉུལ་བ་གང་འཚམ་བཏང་ཡོད་པ་རེད། དེ་ཡིན་དུས་བོད་ནས་ཕེབས་མཁན་ཁྲོད་རྒྱ་མིའི་གསང་ཉུང་བ་ཡིན་པར་དོགས་པ་བྱུང་ན་དུས་ཐོག་བདེ་སྲུང་ལས་ཁུངས་ལ་བརྡ་ལན་གནང་རོགས” ཞེས་བརྗོད་བྱུང་།
དེ་རིང་ཕྱི་དྲོ་༧གོང་ས་མཆོག་གིས་ཕྱོགས་མཐའ་ནས་ཕེབས་པའི་སྐུ་མགྲོན་ཁག་ཅིག་ལ་མཇལ་འཕྲད་གནང་ཡོད་ལ། སང་ཉིན་ཆུ་ཚོད་ ཕྱི་ཚེས་ ༡ དང་སྐར་མ་ ༣༠ ནས་གསུང་ཆོས་ར་བར་དཔལ་དུས་ཀྱི་འཁོར་ལོའི་སྔོན་འགྲོའི་སློབ་མ་རྗེས་འཛིན་གྱི་ཆོས་འབྲེལ་གནང་རྒྱུ་རེད།
གསར་འགོད་པ། དཔལ་ལྡན་གྱིས་རྡོ་རྗེ་གདན་ནས།
བོད་བལ་ས་མཚམས་ཡིད་གཟབ་གནང་དགོས་པའི་གནས་ཚུལ།
ཉེ་འཆར་བོད་ཕེབས་ཆོས་ཞུ་བ་ཞིག་གི་རང་གི་མཐོང་ཐོས་དངོས་བརྗོད། ང་ལ་ལག་ཁྱེར་མ་རགས་སྟབས་འགྲམ་བརྒྱུད་ནས་ཡོང་དགོས་ཐུག་སོང་། འགྲམ་ནས་ཤར་པ་བཀྲ་ཤིས་ཟེར་བ་ནམ་རྒྱུན་འགྲམ་དང་བལ་པོའི་རྒྱལ་ས་དབར་མི་སྐྱེལ་འདྲེན་བྱེད་ནས་འཚོ་བ་བསྐྱེལ་མཁན་ཞིག་འདུག་པ་དེར་རྒྱ་སྒོར་ ༡༠༠༠༠ སྤྲད་ནས་ཡོང་བ་ཡིན། བལ་པོའི་ས་ཆར་འབྱོར་དུས་ང་དང་ཅིག་མཚུངས་ལག་ཁྱེར་མེད་མཁན་བུ་མོ་གཉིས་དང་ཐུག་བྱུང་། ཁོང་གཉིས་ནས་གླ་ཆ་སྤྲད་ཡོད་ནའང་། ཤར་པ་བཀྲ་ཤིས་ནས་ང་དང་མཉམ་དུ་མ་ཉལ་ན་རྒྱ་མིའི་དམར་མིར་རྩིས་སྤྲོད་ཀྱི་ཡིན་ཟེར་ནས་ཉིན་བཞིའི་རིང་མགྲོན་ཁང་ཞིག་ཏུ་ཉར་འདུག། ད་དུང་དེ་འབྲེལ་གྱི་གནས་ཚུལ་མང་པོ་འདུག་པས་མུ་མཐུད་བཀོད་ཆོག
ཨ་མའི་བུ་རྒོད། ཁྱོད་འདུག་ས་སྦྲ་ནག་གྲུ་བཞིའི་ཕ་ཁྱིམ་ཡོད།། ཁྱོད་སྐྱིད་ས་ཡངས་བའི་རྩ་ཐང་ཆེན་མོ་ཡོད།། ཁྱོད་འགྲོ་ས་ལྔ་ཟུང་རིག་པའི་ཐང་ཆེན་ཡོད།།
ཨ་མའི་བུ་རྒོད། ཁྱོད་འདུག་ས་གངས་དཀར་ཨ་མའི་ཕ་ཁྱིམ་ཡོད།། ཁྱོད་སྐྱིད་ས་ཉི་མ་ལྷ་སའི་གྲོང་ཁྱེར་ཡོད།། ཁྱོད་འགྲོ་ས་བྱམས་དང་སྙིང་རྗེའི་ཞིང་ཁམས་ཡོད།།
ཨ་མའི་བུ་རྒོད། ཁྱོད་འདུག་ས་དུང་ཟླ་ལྷ་མོའི་ཞིང་ཁམས་ཡོད།། ཁྱོད་སྐྱིད་ས་ཉི་མ་དམར་པོའི་རྒྱལ་ཁམས་ཡོད།། ཁྱོད་འགྲོ་ས་འཛམ་གླིང་ཞི་བདེའི་ཐང་ཆེན་ཡོད།། གཞིས་བཞུགས་ན་གཞོན་རྡུང་ལེན་པ་ཚེ་རིང་དོན་གྲུབ་ཀྱི་འོད་སྡེར་ལས་ཕབ་སྟེ། མིའི་རིགས་ཀྱི་སྐྱབས་མགོན་ཆེན་པོ་༸རྒྱལ་བ་བསྟན་འཛིན་རྒྱ་མཚོར་ཕུལ་བ་དང་། གནས་མཆོག་རྡོ་རྗེ་གདན་ནས་དཔལ་དུས་ཀྱི་འཁོར་ལོའི་དབང་མཆོག་ལེགས་པར་གྲུབ་ཅིང་(གངས་ལྗོངས་ནས་འོངས་པའི་སྤུན་ཟླ)་རྣམ་བདེ་བླགས་ངང་རང་ཡུལ་དུ་འབྱོར་བ་དང། གཞིས་བྱེས་མཉམ་འཛོམས་ཀྱི་སྐལ་བཟང་མྱུར་ཏུ་འཆར་བའི་ལྷག་བསམ་གཙང་མའི་རྦ་རླབས་དྲག་ཏུ་འཕྱོ་བའི་རེ་སྨོན་བཅས། གཙང་ཞོལ་བདེ་གསལ་གྱིས་རི་བོ་རྡ་རམ་ས་ནས་ཕུལ།།
བཅོམ་ལྡན་འདིར་ནི་བྱོན་པ་ལ། །བདག་ཅགས་བསོད་ནམས་སྐལ་བ་བཟང་། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །
དཔལ་དུས་ཀྱི་འཁོར་ལོའི་དབང་གི་སྟ་གོན་ནས་བཟུང་སྟེ་མཇུག་མ་དྲིལ་ཀྱི་བར་དུ་ཕྱི་ནང་གསང་གསུམ་གྱི་ཉེ་བར་འཚེ་ཐམས་ཅན་ཞི་ཞིང་དོན་གཉིས་ལྷུན་གྱིས་འགྲུབ་པའི་སྨོན་ལམ་དང་མཐུན་འགྱུར་ཞུ་ཞུ་ཞུ།།