ས་རཱ། ཨ་འདུས་མིག་ཆུ།
བོད་ཀྱི་སྐད་ཡིག་ཅེས་འཆད་དུས་དབྱངས་གསལ་སོ་བཞིའི་བདག་ཉིད་དུ་གྱུར་བའི་བོད་མི་རིགས་ཀྱི་བླ་སྲོག་ལ་གོ་དགོས་པ་རེད། བོད་མི་རིགས་ཀྱི་ཚེ་སྲོག་དང་རིག་གནས་སྤྱིའི་དགེ་མཚན་གང་འདྲ་ཞིག་ཡིན་ཡང་བླ་སྲོག་འདི་ལ་མ་བརྟེན་པ་ཞིག་གཏན་ནས་ཡོད་མི་སྲིད་པ་ཞིག་རེད། བོད་ཀྱི་སྐད་ཡིག་རིག་གནས་འདི་ཁོ་ན་འུ་ཚོའི་མེས་པོ་བཀའ་དྲིན་ཅན་དག་གིས་ངག་སྒོ་ལས་རྒྱུན་ཆད་མ་མྱངས་པའི་ཆ་ནས། འུ་ཚོ་འདི་ལྟར་གོ་ལའི་དབུ་རྩེ་ན་གནས་ཐུབ་པ་ཞིག་བྱུང་བ་རེད།
བོད་མི་རིགས་ཞེས་མགོ་མཐོ་མཐོ་བྱེད་པའི་སྤོབས་པ་ཞིག་སླེབས་ཐུབ་པ་འདིའང་བོད་ཀྱི་སྐད་ཡིག་རིག་གནས་འདི་ཁོ་ན་ལ་རག་ལས་པ་ཡིན་པ་སུས་ཀྱང་ཤེས་དགོས་པ་དང་། འཆད་དགོས་པའི་རིན་ཆེན་ནོར་བུ་ཞིག་རེད་ཅེས་བདག་གིས་སྨྲ་ཐུབ་མོད། རིག་གནས་ཀྱི་བསམ་བློའི་དབུལ་བའི་མགོ་སྟོང་འགའ་ཞིག་གིས་བོད་སྐད་ཡིག་རིག་གནས་ཀྱི་དགེ་མཚན་མཐོང་རྒྱུ་ཕར་ཟད། འདིའི་དགེ་མཚན་བརྗོད་པའི་མི་དག་གི་མི་གཤིས་ལ་དམའ་འབེབས་བྱེད་པའི་ཆོ་མེད་ཀྱི་སྐད་ཆ་ཆུ་བོ་བཞིན་བརྡོལ་འོང་གི་རེད།
བོད་ཀྱི་སྐད་ཡིག་རིག་གནས་ཀྱི་དགེ་མཚན་འདི་ཡོད་པས་བོད་པ་ཚང་གི་མཚན་སྙན་ཡོངས་སུ་ཁྱབ་སོང་བ་རེད་ལ། བོད་ཀྱི་ཐ་སྙད་རིག་གནས་ཀྱི་བླ་སྲོག་འདི་ཡོད་པས་ད་གཟོད་འུ་ཚོའི་ཚེ་སྲོག་གི་རླབས་རྒྱུན་ཆད་མེད་པ་རེད། རྒྱུ་མཚན་དེའི་ཕྱིར་ན། བོད་སྐད་ཡིག་རིག་གནས་རྒྱུན་འཛིན་དང་བདག་སྐྱོང་བྱེད་པ་ནི། བོད་མི་རིགས་ཀྱི་ཚེ་སྲོག་གི་རླབས་རྒྱུན་ཆད་དུ་མ་བཅུག་པའི་དགེ་ཕན་ཡོད་ལ། རང་ཉིད་ཀྱི་མིང་ཡིག་ས་སྟེང་ནས་མི་ཡལ་བའི་ཕན་ནུས་བླ་མེད་ཅིག་ཡོད་པ་ནི་བརྗོད་ག་ལ་དགོས་ཨང་།
འུ་ཅག་བོད་པ་ཚང་ཆོལ་གསུམ་སོ་སོ་དང་ཞིང་ཆེན་ཁ་ཁར་བགོས་པ་མ་ཟད། རྒུད་པའི་མཐར་ཐུག་པ་གཞིས་བྱེས་གྱེས་བྲལ་གྱི་གནས་བབ་ལ་ཐུག་ཡོད་ཀྱང་། སྦྲ་ནག་མི་མང་གི་སེམས་དང་བསམ་པ་གཅིག་ཏུ་སྦྲེལ་ཞིང་། ཕུགས་ཀྱི་འདུན་པ་གཅིག་མཚུངས་སུ་གྱུར་ཐུབ་པ་འདིའང་བོད་སྐད་ཡིག་རིག་གནས་གཅིག་ཡིན་པའི་རྒྱུ་མཚན་འདི་ཁོ་ནའོ།།
བོད་སྐད་གཙང་མ་འཆད་དགོས་པའི་རྟིང་སྐུལ་བྱེད་པའམ་བླ་འབོད་བྱེད་པའི་འུ་ཐུག་པའི་སྐད་སྒྲ་ཞིག་གཞིས་ལུས་མི་མང་ལ་ནམ་ཡང་བསྒྲགས་དགོས་དོན་མེད། རྒྱུ་མཚན་ནི། འདི་ཚོས་རང་ཉིད་ཀྱི་ཚེ་སྲོག་གི་དགེ་མཚན་གསལ་གསལ་ཐིང་ཐིང་ཤེས་ཤིང་། ཚེ་སྲོག་སྐྱོབ་པའི་འགུལ་སྐྱོད་ཀྱི་བྱ་འགུལ་ནམ་ཡང་སྤེལ་བཞིན་པས་སོ།། དོན་དུ་བླ་འབོད་བྱེད་དགོས་པ་ནི། བཙན་བྱོལ་བོད་པ་དག་ཡིན་ལ། དེ་ལས་ཀྱང་བོད་སྐད་བོད་ཡིག་ལ་མི་དུངས་པའི་རྩྭ་གཟུགས་ཕུང་པོ་རུ་གྱུར་པའི་བོད་མི་དག། བོད་པ་རྣམ་དག་ཅིག་བཟོ་བསྐྲུན་བྱེད་པའི་ཕྱོགས་ལ་འབད་དགོས་པ་དེའོ།།
ཤ་རུས་དང་ཁྲག་རྒྱུན་བོད་དུ་གཏོགས་པ་ཙམ་གྱིས་བོད་མི་རྣམ་དག་ཅིག་ཡིན་པའི་ངེས་པ་མེད་ལ། བོད་ཡིག་ཆལ་ཆོལ་ཞིག་སྨྲ་ཤེས་པ་ཙམ་གྱིས་བོད་པ་ཞེས་སྨྲས་ན་ག་ལ་འགྲིག མི་ལོ་ལྔ་བཅུའི་ལོ་འཕྲེང་ཁྲོད་བཙན་བྱོལ་སྤྱི་ཚོགས་ནང་བོད་སྐད་བོད་ཡིག་ལ་དགའ་མཁན་ཇེ་ཉུང་ཇེ་ཉུང་དུ་འགྱུར་བཞིན་པ་ལས། བོད་སྐད་བོད་ཡིག་ལ་ཞེན་པའི་མྱི་བུ་ལྷད་མེད་ཅིག་གསོ་སྐྱོང་བྱས་པ་ནི། ཟླ་བ་མར་ངོ་བཞིན་རྒུད་པ་ནས་རྒུད་པའི་ཕྱོགས་སུ་འགྲོ་བཞིན་པ་འདིའོ།།
དེ་ལྟ་ན་གཞིས་བྱེས་ལྷན་དུ་འཛོམས་པའི་གནས་མཆོག་རྡོ་རྗེ་གདན་འདི་ནས་འུ་ཚོ་བཙན་བྱོལ་བོད་པ་དག་གིས་བོད་སྐད་བོད་ཡིག་གཙང་མ་ཞིག་འཆད་པའི་ཕྱོགས་ལ་ཁས་ལེན་དམ་བཅའ་འཇོག་དགོས་པའམ། ཡང་ན་འདིའི་ཕྱོགས་ལ་གང་ཞིག་བྱེད་དགོས་པའི་ལས་འགུལ་གལ་ཆེན་ཞིག་སྤེལ་དགོས་པའང་དུས་ཀྱི་དགོས་མཁོ་ལ་ཐུག་འདུག་གོ།།
བོད་སྐད་ཡིག་རིག་གནས་ཀྱི་ཆག་འཇིག་ནི། མི་རིགས་ཤིག་གི་ཚེ་སྲོག་གསོན་གནས་ཐུབ་མིན་གྱི་འགག་རྩ་ཡིན་ལ། ཐ་སྙད་རིག་གནས་ཀྱི་འཕེལ་རྒྱས་ནི། རྒྱལ་ཁབ་ཅིག་གི་དཔལ་ཡོན་རིག་གནས་ཀྱི་ངོ་བོ་གོང་འཕེལ་དུ་འགྲོ་བའི་རྨང་གཞི་གཙོ་བོའི་ནང་གི་གཙོ་བོ་ཡིན། དེ་ལྟར་ན་བོད་མི་རིགས་ཀྱི་ཚེ་སྲོག་རྒྱུན་གནས་དང་བོད་རྒྱལ་ཁབ་ཆེན་པོའི་ངོ་བོ་བརྟན་བརླིང་འགྱུར་མེད་ཅིག་འདོད་ན། ཅིས་ཀྱང་བཙན་བྱོལ་བོད་པ་དག་གིས་བོད་སྐད་གཙང་མ་ཞིག་འཆད་པའི་ཕྱོགས་ལ་འབད་བརྩོན་ལྷོད་མེད་བྱེད་པའི་དུས་ལ་བབ་འདུག་གོ།
འགྱུར་མེད་བསྟན་འཛིན་ལགས། སྐད་ཆ་འཆད་ན་མི་ལ་ཕན་ནི་ཞིག་བཤད་པའི་རེ་བ་ཡོད། སྤྱིར་བཏང་གི་ཆ་ནས་ཉིད་ཀྱི་སྐད་ཆ་དག་ལོ་དེ་ཙམ་དོ་སྣང་བྱེད་ཀྱི་མེད། རྒྱུ་མཚན་ནི། ཁྱེད་ཀྱི་ཐལ་དྲག་པའི་གཡོན་ལྷུང་གི་ལྟ་བ་ང་ཁྱོན་ནས་མི་དགའ་བས་སོ། གཞན་ཡང་ཉིད་ཀྱི་རང་དོར་གཞན་ལེན་གྱི་གཡམ་རྒྱུག་གི་ཆོ་མེད་ཀྱི་ཀུན་སྤྱོད་ལ་གཏན་ནས་མི་དགའ་བ་ཡིན་ནོ།། ང་ལ་གང་བཤད་ཀྱང་ཁྱད་པར་མེད་མོད། ཉིད་ཀྱིས་སྐད་ཆ་འཆད་དུས་མང་པོ་ཞིག་ལ་བསམ་བློ་གཏོང་དགོས་ས་རེད། དེ་བསམ་ཚུལ་ཙམ་ཡིན།
བོད་ཡིག་ནི་སང་ཤི་གནངས་ཤི། ཛ་དྲག་གི་ནད་པ་ལྟར་གྱུར་ཡོད། དེ་སྐྱོབ་ཐབས་ལ་འབད་དགོས་ཀྱང་། དེ་ལས་ལྡོག་སྟེ། བོད་ཡིག་གི་རིན་ཐང་ཟུར་ཙམ་ཡང་མི་ཤེས་པའི་ཀླད་མེད་འགས། ཨེན་ཡིག་ཐར་ཐོར་ཤེས་དུས་སྤོབས་པ་བྱེད་དེ། རང་གི་སྐད་ཡིག་ལ་མཐོང་ཆུང་བྱེད། བདེ་སྐྱིད་ཐམས་ཅད་ཕྱི་དངོས་ནས་འབྱུང་བར་འདོད།རང་གི་རིག་ལ་སྣང་ཆུང་དང་། ཁྱད་གསོད་བྱེད། ཁོང་ཚོ་རང་ཉིད་ཀྱིས་རང་ཉིད་ལ་མཐོང་ཆུང་བྱེད་ཀྱིན་ཡོད་པ་མ་ཚོར། མ་འོངས་པར་དེའི་རིགས་ཐེར་འདོན་དང་སུན་འབྱིན་དགོས།
བོད་ཡིག་གི་ལས་དབང་དེ་ང་ཚོ་བོད་པའི་ལས་དབང་རེད། བོད་ཡིག་རྫོགས་པའི་ཉིན་དེར་བོད་ཟེར་བ་འདི་མིང་གི་ལྷག་མ་ཙམ་ཞིག་གྱུར། མ་མཐའ་སྐབས་དེར་བོད་ཟེར་བའི་ཡིག་འབྲུ་འདི་སུས་ཀྱང་འབོད་མཁན་མེད། ལོ་རྒྱུས་ཀྱི་ཡིག་ཚགས་ནང་། ཊི་བྷི་ཊི། ཡང་ན། གཤིས་ཙང་། ཙམ་ལས་མེད། བོད་དེབ་འགའ་ཞིག་ལྷག་ནའང་སུས་ཀྱང་ཀློག་མི་ཤེས། བོད་ཀྱི་སྐད་ཡིག་སྐྱོབ་ན་བོད་སྐྱོབ་བཞིན་ཡོད། བོད་ཡིག་སྐྱོབ་བྱེད་ལ་ལས་རིམ་མང་པོ་ཡོད། ངེས་པར་དུ་དགྲ་བོའི་གདོང་དུ་མཆོང་མི་དགོས་པའི་ལས་རིགས་མང་པོ་ཡོད། དམར་མཆོད་ཕུལ་མ་ནུས་ནའང་། བོད་སྐྱོབ་བྱེད་ཀྱི་ལས་རིམ་ལ་འགྲོ་ཞོལ་བསྡད་ཞོལ་དང་། ཉིན་རེ་རེ་ལའང་སོ་སོས་ལས་ཐུབ་པའི་བྱ་བ་མང་པོ་ཡོད། ཕྱི་རྒྱལ་ལ་སློབ་གྲྭ་འགྲོ་སྟེ་བོད་སྐད་མ་ཤེས་པས། སྐུ་དྲག་དང་། སྐུ་ངོ་ཚོའི་ཕྲུ་གུ། ཁྱེད་ཚོ་བོད་པ་མ་རེད་ལ། བོད་པར་ཤ་ཚ་ཅན་ཡང་མིན། ཁྱོད་ཚོའི་ཕ་མ་དག་ཆོས་ཅིག རྒྱལ་ཚོང་ཡིན་ཏེ། དངོས་དངུལ་ཙམ་ལ་བལྟས་ཏེ། སྐད་ཡིག་རྩ་མེད་བཟོ་མཁན་ཡིན་པའི་ཕྱིར། ཁེ་བཟང་ལ་བལྟས་ཏེ། རྒྱལ་ཁབ་རྩ་མེད་ཀྱི་བྱ་བའི་རིགས་ཡིན་ན། རྒྱལ་ཚོང་ཡིན་དགོས་དང་མི་དགོས། ད་དུང་དེ་དག་གིས། ངས་པུ་གུ་སློབ་སྦྱོང་ཡག་པོ་ཡོད་ལབ་པར་ངོ་མི་ཚའམ། ཁྱོད་ཚོ་ནི་བོད་པའི་ཞབས་འདྲེན་རེད་ལ། ཞེ་ཁྲེལ་ཡུལ་རེད། ངས་ཁྱོད་ཚོའི་ཕྲུ་གུ་རྣམས་མཐོང་དུས། ཁོང་ཚོའི་ཕ་མ་དག་ལ་འཚིག་པ་གཏིང་ནས་ཟ་ཡོང་འདུག་གོ། ངོས་ལ་མཚོན་ན། པན་ཆེན་རིན་པོ་ཆེའི་དགོངས་པ་དང་འགལ་ཡོད། ཁོང་གིས་གསུངས་བཞིན། བོད་ཡིག་ཕན་ཐོག་ངེས་ཞིག་མ་ཤེས་པར། ཨིན་ཡིག་རང་མགོ་ཐོན་ལ་མ་ཐོན་ཞིག་ཤེས་པ་འདི། ཞབས་འདྲེན་ཡིན། འོན་ཀྱང་བོད་ཡིག་གི་ཡིག་རྨོངས་ལས་གྲོལ་ཙམ་འདི། ལྟོས་ས་ལྟོས་འཇོག་གིས་ངོ་མནོང་མ་དགོས་པ་ཞིག་ཡིན་བསམ་ཡོད་དོ།།
དབྱིན་ཇི་དང་རྒྱ་སྐད་གང་ཡང་མི་ཤེས་པ་འདི་ཚོས་བོད་སྐད་ཡིག་གལ་ཆེན་པོ་ཡིན་པ་བཤད་བཤད་ནས་རྣ་བ་ཚ་སོང་།
ཨ་འདུས་མིག་ཆུའི་ཆུ་རྒྱུན་བོད་ཀྱི་ཤ་རུས་གསང་དུ་བཞུར་བ་བསྔགས་བརྗོད་དང་ཡུན་རིང་ཡོད།
ཁ་ཞེ་གཉིས་མེད་ཀྱི་བོད་དང་བོད་ཀྱི་རིག་གཞུང་ལ་ཤ་ཞེན་ཡོད་ན་རང་སྐད་གཙང་མ་བཤད་རྒྱུ་འདི་ཧ་ཅང་གལ་ཆེན་རེད།
ཁ་བཤད་ལག་ཏུ་ལེན་འདོད་ན་རང་སྐད་གཙང་མ་གཤད་རོགས། ར་མ་ལུག་གི་བོད་པ་ཞིག་བྱེད་འདོད་ན། སྐད་ཀྱང་ར་མ་ལུག་ཤོད་ཤོག།