༢༠༡༡ ལོའི་དབྱར་དཀྱིལ་དུ། ཨ་རིའི་གཞུང་གིས་ཨབ་གྷན་གྱི་ཊ་ལི་བྷན་ཚོགས་པ་དེ་འཇིགས་སྐུལ་རིང་ལུགས་ཀྱི་མིང་གཞུང་ནས་ཕྱིར་འཐེན་བྱས་པ་རེད། ཨ་རིའི་མཐོ་རིམ་སྲིད་དོན་པའི་ཁོར་ཡུག་ནང་དུ་དེའི་ཐད་རྩོད་གླེང་ཡང་བྱུང་བ་རེད། གང་ལྟར། རྒྱལ་ཁབ་ ༡༥ ལས་གྲུབ་པའི་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱིས་ཀྱང་ཊ་ལི་བྷན་ཚོགས་པ་འཇིགས་སྐུལ་བའི་ཁོངས་ནས་ཕྱིར་འཐེན་བྱས་པར་རྒྱབ་སྐྱོར་བྱས་ཤིང་། འདིའི་ཁྲོད་དུ་རྒྱ་ནག་ཀྱང་ཡོད།
མི་འགྱངས་པར་འཇིགས་སྐུལ་རིང་ལུགས་པ་ཞེས་པ་དེར་ཡང་རྒྱལ་སྤྱི་རང་བཞིན་གྱི་མཚན་ཉིད་དང་ངོས་འཛིན་གསལ་བོ་ཞིག་བྱ་རྒྱུ་ཡིན་པ་འདྲ། དཔེར་ན། ཨ་རིའི་དམག་མི་དང་ས་ཁུལ་གྱི་མང་ཚོགས་ལ་གཏོར་རྒོལ་བྱེད་མཁན་ཐམས་ཅད་ནི་འཇིགས་སྐུལ་བའི་ཁོངས་སུ་བརྩི་མི་ཐུབ་ཅིང་། ལྷག་པར་དུ་སོ་སོའི་ས་གནས་ས་ཐོག་ནས་ཕྱོགས་ཡོང་གི་དྲག་པོའི་སྟོབས་ཤུགས་དང་བྱུས་གཏོགས་ལ་ངོ་རྒོལ་དང་གཏོར་རྒོལ་བྱེད་པ་ནི་ཁྲིམས་མཐུན་དུ་འགྱུར་ཀྱང་སྲིད་པ་རེད། མ་མཐར་འདི་ནི་འཕེལ་ཕྱོགས་ཤིག་ཡིན་ནམ་སྙམ། ཐག་གཅོད་འདིས་མ་འོངས་པར་ང་ཚོར་ཤུགས་རྐྱེན་ཞིག་སྤྲོད་སྲིད་པ་རེད།
བོད་མི་ཚོའི་རང་དབང་འཐབ་རྩོད་ལ་རྦ་རླབས་རིམ་པ་གསུམ་དུ་མི་ལྟ་ཀ་མེད་དུ་ཆགས་འདུག དེ་ཡང་རྦ་རླབས་དང་པོ་ནི། ༡༩༥༩ ལོ་ནས་ ༢༠༡༠ ལོའི་བར་གྱི་ལོ་ངོ་ ༥༡ རིང་གི་ཞི་བའི་ངོ་རྒོལ་ཁྲོམ་སྐོར་དང་། སྦྱར་ཡིག་འགྲེམས་པ། ངག་ཐོག་དང་ཡིག་ཐོག་ནས་ས་གནས་སོ་སོའི་རྒྱ་ནག་གཞུང་ལ་ཞུ་གཏུགས་བྱས་པ་སོགས་རེད། ལོ་ ༥༡ གི་རིང་འདིར་བོད་ཕྱི་ནང་གཉིས་ཀ་ནས་ཁྱོན་སྡོམ་ངོ་རྒོལ་ཐེངས་ཅི་ཙམ་བྱས་པའི་ཚིག་ཐོ་དེ་ད་ལྟའི་ཆར་གསལ་བོ་མི་འདུག་ཀྱང་། མ་མཐར་ཡང་ཐེངས་ ༡༠༠༠༠༠ ཤིག་ལས་བརྒལ་ཡོད་པ་ནི་ཚོད་དཔག་ཐུབ་པ་ཞིག་རེད། ངོ་རྒོལ་འདི་དག་ནི་རྣམ་པ་དང་ངོ་བོའི་ཆ་ནས་བཤད་ན་བོད་མིའི་རང་དབང་འཐབ་རྩོད་ཀྱི་རིམ་པ་དང་པོ་རེད།
ལོ་ ༥༡ རིང་གི་ལས་འགུལ་དེ་དག་ལ་ཐོག་མར་ཉན་མཁན་དང་དང་ལེན་བྱེད་མཁན་ཡོད་པ་ནས་མཐའ་མར་དོན་དམ་གྱིས་ཉན་མཁན་དང་དང་ལེན་བྱེད་མཁན་མེད་པའི་རིམ་པར་འཕོས་པ་རེད། གྲུབ་འབྲས་མངོན་གསལ་ཞིག་མ་སོན་སྟབས་ཨུ་ཐུག་པ་རེད། ད་ནི་གོམ་པ་གཉིས་པ་ཞིག་སེམས་ལ་དྲན་ཞིང་། དེ་ནི་རང་ལུས་མེར་སྲེག་སྟེ། རང་ཉིད་གཅིག་པུས་མི་རིགས་ཀྱི་བདེ་སྡུག་དང་འཐབ་རྩོད་ཅིག་ལ་བདེན་དཔང་བྱེད་པའི་རྣམ་འགྱུར་འདི་རེད།
དེ་ལྟར། ༢༠༡༡ ལོ་ནས་བཟུང་བོད་མིའི་རང་དབང་འཐབ་རྩོད་ཀྱི་རིམ་པ་གཉིས་པ་དེ་མངོན་བྱུང་། ལས་འགུལ་འདི་ནི་ཐ་ན་བོད་མི་ཚོའི་ནང་ཁུལ་ལ་ཡང་ཞི་དྲག་གང་ཡིན་ལ་རྩོད་པ་དང་སོམ་ཉིའི་ངང་ནས་བསླེབས་པ་རེད། ད་ལྟའི་ཆར་ལས་འགུལ་འདི་བོད་ཆོལ་ཁ་གསུམ་གྱི་ནང་དུ་བྱུང་ཡོད། འཛམ་བུའི་གླིང་གི་དོ་སྣང་ཡོད་མེད་ལ་མ་ལྟོས་པར། ལས་འགུལ་དེའི་ཆོད་སེམས་ཀྱི་རང་བཞིན་དང་། ཨུ་ཚུགས་ཀྱི་རང་བཞིན་དེས་བོད་ཀྱི་གནད་དོན་དེ་མི་སེལ་ཐབས་མེད་དང་། དེ་ཡང་༧གོང་ས་མཆོག་སྐུ་བཞུགས་པའི་རིང་འདིར་སེལ་དགོས་པའི་ཆ་རྐྱེན་འདོན་གི་ཡོད་པ་རེད།
ཁ་སང་དེ་རིང་གི་གནས་སྟངས་ལ་བལྟས་ན། འདས་པའི་ལོ་ ༥༡ རིང་རྒྱ་ནག་གཞུང་གཙོས་པའི་འཛམ་བུའི་གླིང་གི་སྲིད་གཞུང་དག་གིས་བོད་ལ་བཟུང་བའི་རྣམ་འགྱུར་དང་ཚོད་དཔག་ལྟར། ད་སྐབས་ཀྱི་ལས་འགུལ་གྱི་རྦ་རླབས་གཉིས་པའི་སྐབས་འདིར་ཡང་ཧ་ཅང་སྣང་ཆུང་དང་། མཐོང་ཆུང་གི་རྣམ་པ་ཞིག་ཤར་འདུག འདི་ནི་བོད་མིའི་རང་དབང་འཐབ་རྩོད་ཀྱི་ལས་འགུལ་དེ་རྦ་རླབས་གསུམ་པ་དེའི་སྒང་ལ་སྐྱོན་བཞིན་པ་ལྟ་བུ་རེད།
ཉེན་ཁ་ཆེ་ཤོས་ཤིག་ནི། ད་ཐེངས་ནི་སྔོན་མའི་ལོ་ ༥༡ རིང་གི་ནར་འགྱངས་ལྟར། དུས་རབས་ཕྱེད་ཀ་ཞིག་གི་རིང་བོད་མི་ཚོས་རང་ལུས་མེར་སྲེག་ནས་འདུག་རྒྱུ་མིན་པར། ལས་འགུལ་དེ་ནི་ངོ་བོ་དང་རྣམ་པའི་ཆ་ནས་དུས་དང་རྣམ་པ་ཀུན་ཏུ་ངོ་བོ་གཞན་ཞིག་ལ་འཕོས་ཆོག་ཆོག་རེད། དེ་ནི་ད་ལྟའི་ལས་འགུལ་འདིའི་རིགས་ནི་སྔར་གྱི་ལོ་ ༥༡ རིང་གི་ལས་འགུལ་ལས་ཀྱང་ཛ་དྲག་ཆེ་བའི་དབང་གིས་རེད། རྦ་རླབས་གསུམ་པ་དེ་ཧ་ཅང་ཐག་ཉེ་ཞིག་ཏུ་ཡོད་པ་ཚོར་ཡོང་གི་འདུག
རྒྱ་ནག་གཞུང་གིས་གཞོན་ནུའི་ལྷན་ཚོགས་ནི་ཊ་ལི་བྷན་ཚོགས་པ་འདྲ་བོ་དང་། འཇིགས་སྐུལ་རིང་ལུགས་པ་ཡིན་པར་བཤད་མྱོང་ཡང་། ད་སྐབས་ཊ་ལི་བྷན་ཚོགས་པ་ནི་རྒྱལ་སྤྱིའི་སྟེང་ཆ་འཇོག་ཡོད་པའི་འཐབ་རྩོད་ཀྱི་རྩ་འཛུགས་ཤིག་ཏུ་གྱུར་ཡོད་པ་རེད། རྒྱ་ནག་གིས་ཀྱང་དེར་ངོས་ལེན་བྱས་ཡོད་པ་རེད། འོན་ཀྱང་། ཊ་ལི་བྷན་ཚོགས་པས་ངོ་རྒོལ་ལས་ཀྱང་གཏོར་རྒོལ་གྱི་ལས་འགུལ་མང་དུ་སྤེལ་གྱིན་ཡོད་པ་རེད། ཨ་རིའི་དམག་མི་གསོད་མཁན་དང་ཐ་ན་ཨ་རིའི་གཞུང་གི་རྒྱབ་སྐྱོར་ཡོད་པའི་ཚོགས་པ་སྒྲིག་འཛུགས་མཐའ་དག་ལ་གཏོར་རྒོལ་བྱེད་མཁན་གཙོ་བོ་ཞིག་རེད། ཡིན་ཡང་། འཛམ་བུའི་གླིང་གིས་འདི་ལ་ངོས་འཛིན་དང་ཁོང་ཚོའི་དགོས་འདུན་ལ་གནས་ལུགས་རང་བཞིན་གྱི་ཁས་ལེན་བྱས་ཡོད་པ་རེད།
རྒྱ་གཞུང་གི་བྱེད་བབས་ལ་གཞིགས་ན་རླབས་གསུམ་པ་དེ་མ་ལངས་རང་ལངས་རེད། མྱི་ནག་ཚང་གི་སྔོན་དཔག་འདི་གནད་ལ་འཁེལ་འདུག་སྙམ།
བོད་ནང་དུ་རྒྱ་དམར་གྱིས་མནར་གཅོད་གཏོངས་སྟངས་དེ་ལ་ས་སྟེང་གི་དམྱལ་བ་ཞེས་བརྗོད་ན་ཆུང་མེད་ན་ཆེ་མེད་དོ
སློབ་དཔོན་ཆེན་པོ་འཕགས་པ་ཀླུ་སྒྲུབ་ཀྱིས།
འདི་ན་ཉིད་གཅིག་མདུང་ཐུང་སུམ་བརྒྱ་ཡིས། །
རབ་ཏུ་དྲག་བཏབ་སྡུག་བསྔལ་གང་ལགས་པ། །
དེས་ནི་དམྱལ་བའི་སྡུག་བསྔལ་ཆུང་ངུ་ཡི། །
འོལ་ཡང་མི་འགྲོ་ཆར་ཡང་མི་ཕོད་དོ། །
དེ་ལྟར་སྡུག་བསྔལ་ཤིན་ཏུ་མི་བཟད་པ། །
བྱེ་བ་ཕྲག་བརྒྱར་ཉམས་སུ་མྱོང་ཡང་ནི།
ཇི་སྲིད་མི་དགེ་དེ་ཟད་མ་གྱུར་པར། །
དེ་སྲིད་སྲོག་དང་བྲལ་བར་མི་འགྱུར་རོ། །
བོ་ཀྱི་གནས་སྟངས་འདི་ལ་༼ས་སྟེང་གི་དམྱལ་བ་༽ཞེས་བརྗོད་ན་ཧ་ཅང་ཐར་ཆེས་པ་རེད།
ཁ་སང་༡༡ཉིན མི་ཆུང་གི་རྗེས་ནས་ངས་བསམ་ཚུལ་ཞིག་བྲིས་ནས་་་ཡར་འཇུག་རོགས་་ནན་ཡིན. དེ་དྲ་ངོས་སུ་སླེབ་མི་འདུག འདི་འདྲ་གང་མང་བྱུང་མྱོང. ད་ཆ་ངའི་དེ་བཀོད་ཀྱི་མེད་པར་འདོད. བཀོད་མི་འོས་པའི་རྒྱུ་མཚན་འདྲ་མེད་འདོད་ཡོད
ཏྲ་ལི་རྦིན་ནང་བཞིན་བྱུང་ཐུབ་རྒྱུ་མ་རེད་མ་གཏོགས ཐུབ་ན་ཡག་ཤོས་རེད་འདོད.
ཕྱི་ནས་དཔའ་བོ་ཐུབ་སྟན་དགོས་གྲུབ་དང་ལྷག་པ་ཚེ་རིང་གཉིས་ཀྱིས་ལུས་སྲེག་བཏང་ཡང་དེ་ཙམ་མང་བོ་མ་རེད. ལྷག་པར་ལོ་གཅིག་གི་ནང་མ་རེད
གསར་ལམ་ཁག་དང་རྩོམ་པ་བོ ཐ་ན་གཞོན་ལྷན་ངོས་ལྟོས་ན. ལྷག་ཚེ་ནི་དཔའ་མེད་ལུས་སྲེག་པ་ཞིག་ཡིན་ཚོད་འདུག
རླབས་གསུམ་པ་ནི་ཡོང་དགོས་ངེས་ཤིག་རེད. མ་ཟད་གང་མགྱོགས་མགྱོགས་ཡོང་དགོས་ཚོད་འདུག ངོ་ནས་ང་ཚོས་གང་བྱེད་དགོས་པ་ཤེས་ཀྱི་ཡོད་ན. ལོ་གཉིས་ནི་འཕྱི་དྲག་པར་འདོད. ཡིན་ན་ཡང་ང་ཚོར་ཀླད་པ་དང་འཁོར་ཡུག་མེད་པས་་་་་་
རླབས་གསུམ་པ་དེ་མ་བྱུང་བའི་སྔོན་ལ་ང་ཚོར་ལས་དོན་གལ་ཆེན་པོ་གཅིག་རང་ལྷག་འདུག དེ་ནི་༧གོང་ས་མཆོག་གིས་ནམ་རྒྱུན་གསུང་བཞིན་པ་ལྟར། བོད་ནང་གི་གནས་སྟངས་ནི་༼ས་སྟེང་གི་དམྱལ་བ་༽ (Hell on Earth) ཞེས་པ་འདི་འཛམ་གླིང་ལ་སྒྲོག་རྒྱུ་དང་། དེ་ཡིན་པའི་གནས་ལུགས་ངོ་འཕྲོད་པ་བྱ་རྒྱུ། དེ་བཞིན། རྒྱ་གཞུང་གིས་བོད་ནང་དུ་ (Genocide) ༼མི་རིགས་སྡེབ་གསོད་དམ། མི་རིགས་རྩ་གཏོར་༽གྱི་སྲིད་བྱུས་ལག་བསྟར་བྱེད་ཀྱིན་པ་འཛམ་གླིང་ལ་ངོ་སྤྲོད་དང་། རྒྱལ་ཚོགས་ཀྱིས་གཙོས་པའི་འཛམ་གླིང་མི་དམངས་ལ་དེར་ངོས་ལེན་བྱ་འཇུག་རྒྱུ་འདི་རེད།
སེར་སྨད་བློ་དགའ་ལགས་ཕེབས་པར་དགའ་བསུ་ཞུ།
རེད། ཉིད་ཀྱིས་བཤད་པ་ལྟར་བཙན་རྒོལ་རྒྱལ་སྐྱོབ་ཀྱི་ལས་འགུལ་དེའི་སྐབས་དྲག་པོའི་གཡུལ་ཀྱང་བཤམས་པ་རེད། ཡིན་ཡང་། ངས་བཤད་ཀྱིན་པ་ནི་སྤྱི་བཤད་ཙམ་ཡིན། ནང་གསེས་རེ་རེ་བྱས་ན་ནི་དྲག་པོའི་ངོ་བོར་ཕྱིན་པའི་རིགས་ཀྱང་མང་པོ་ཡོད་ཀྱི་རེད། ༢༠༡༡ ལོའི་མེར་སྲེག་གི་ཁྲོད་དུ་ཆོལ་ཁ་གསུམ་ཚུད་ཡོད་པར་ངོས་འཛིན་བྱ་དགོས་པར་འདོད། དཔེར་ན། བོད་རང་སྐྱོང་ལྗོངས་ཀྱི་ས་ཁོངས་ནས་ཀྱང་རང་ལུས་མེར་སྲེག་བྱས་ཡོད་པའི་དབང་གིས་མདོ་དབུས་ཁམས་གསུམ་ནས་རང་ལུས་མེར་སྲེག་པར་ངོས་འཛིན་བྱས་ན་ལེགས་པར་འདོད།
མི་ཆུང་ལགས། ཉིད་ཀྱིས་བཤད་པ་ལྟར། དཔའ་བོ་ཐུབ་བསྟན་དངོས་གྲུབ་ཀྱི་རང་ལུས་མེར་སྲེག་ལྟ་བུ་བྱུང་ཡོད་པ་རེད། གོང་དུ་བཤད་པ་བཞིན། ངས་ནི་སྤྱི་བཤད་ཙམ་དང་། རང་ལུས་མེར་སྲེག་གི་ལས་འགུལ་དངོས་གཞིའམ་ཚ་རླབས་དེ་ ༢༠༡༡ ལོ་ནས་མགོ་ཚུགས་པར་ངོས་འཛིན་བྱས་པ་ཡིན།
རླབས་གསུམ་དེ་ད་དུང་བསླེབ་མེད་པའི་ངོས་འཛིན་དང་། དེ་ནི་ལོ་གཅིག་ལོ་གཉིས་རྗེས་ནས་མགོ་འཛུགས་ཉེན་ཆེ་ཚུལ་གྱི་ཚོད་དཔག་བྱེད་བཞིན་པ་ཡིན།
མྱི་ནག་ཚང་གི་དཔྱད་བརྗོད་འདི་ཤིན་ཏུ་ནས་ཡིད་ལ་འཐད་སོང་། བསམ་གཞིགས་ཞིབ་མོ་རེ་བྱས་རྗེས་ཡང་བསྐྱར་སྐད་རེ་འཇོག་ན་ཐང་། ཐུགས་རྗེ་ཆེ།
སྐུ་ཞབས་ལུང་རིག་ལགས། སྐུ་ཉིད་ཀྱིས་རླབས་དང་པོའི་སྔོན་ནས། ༡༩༥༡ ནས་༡༩༥༩ བར་བོད་སྤྱི་དང་ལྷག་དོན་མདོ་ཁམས་སུ་དམངས་གཙོའི་བཅོས་སྒྱུར་སྔོན་དུ་བྱས་ཡོད་སྟབས། དེའི་ཚེ་རྒྱ་ནག་དམར་པོའི་གཞུང་ལ་འཐབ་རྒོལ་ཆེན་པོ་བྱུང་ཡོད།
༢༠༡༡ ཡར་སྔོན་བོད་ཕྱི་ནང་གཉིས་སུ་སྐུ་ལུས་མེར་སྲེག་གི་ལས་འགུལ་བརྩམས་ཚར་ཡོད།
ད་དུང་ཡང་ཉིང་རླབས་གསུམ་པ་དེ་གང་དུ་ངོས་འཛིན་གྱིན་ཡོད་དམ། རླབས་གསུམ་པའི་སྒང་ལ་སྐྱོད་བཞིན་པ་རེད་དམ། ཡང་ན་ཧ་ཅང་ཐག་ཉེ་རེད།
མི་ཆུང་གིས་སྐད་བསྐུར་ཡོད།
མྱི་ལགས། དཔྱད་ཞིབ་ལ་ལྟ་རྒྱུ་བྱུང་། ༡༩༥༩ ལོ་ནས་ ༢༠༡༠ ལོའི་བར་གྱི་ལོ་ངོ་ ༥༡ རིང་གི་ངོ་རྒོལ་ཐམས་ཅད་ཞི་བའི་ངོ་རྒོལ་རེད་གསུང་གི་ཡོད་དམ། དཔེར་ན་ཆུ་སྒང་གི་གཡུལ་འཐབ་དེ་དེའི་ནང་ཚུད་ཡོད་དམ། དེ་གཅིག་ཡིན། གཉིས་ནི། ༢༠༡༡ ནས་རང་ལུས་མར་སྒྲོན་གྱིས་ངོ་རྒོལ་དེར་ཆོལ་ཁ་གསུམ་གའི་མི་སྣ་ཞུགས་ཡོད་པ་རེད་དམ། ཡང་ན། དུས་ཡུན་དེའི་བར་གྱི་ངོ་རྒོལ་ནང་རིགས་མི་འདྲ་བ་འདུག་གམ། དྲི་བ་འདི་ཚོ་ཁྱེད་ཀྱི་གསུང་རྩོམ་དེའི་ཚིག་རིས་ཀྱིས་ཐད་ཀར་འཕངས་པའི་དྲི་བ་འགའ་རེད་ལགས། འདིར་ངེས་པར་དུ་གསུང་ལན་སྐྱོན་ཐུབ་ན་རབ་རེད། དེ་མིན་་་་་་་་་་་་་་་་་་་་་་་་་་་
མི་ནག་གིས་བཤད་ནོ་བདེན་པར་འདུག དེ་འདྲའི་ལམ་ཁར་མི་འགྲོ་ཐབས་མེད་རེད།. དེ་ནི་ཡོང་དགོས་ངེས་ཤིག་ཀྱང་རེད་ལ. རྒྱ་དམར་གྱིས་འདི་ལྟར་བྱས་སྡད་ན་གང་མགྱོགས་མགྱོགས་ཡོང་བར་འདོད།
ད་ནི་ང་ཚོའི་སྡུག་རུས་དང་ལྷག་བསམ་ལའང་ཚད་གཞི་ངེས་ཅན་ཞིག་ཡོད་སྲིད། གལ་སྲིད་ཚད་གཞི་གང་ཡང་མེད་ན་རྒྱ་མི་རིགས་ཆེན་པོའི་ནང་དུ་གོ་མེད་ཚོར་མེད་ངང་འཇིག་པ་དང་ཆ་རེད། འོན་ཀྱང་ང་ཚོ་ལ་མི་རིགས་རིང་ལུགས་དགོས་པ་དང་མི་རིགས་དེ་ཉིད་ལ་རང་ཉིད་ཀྱི་ཡུལ་སྲོལ་གོམ་གཤིས་དགོས་པའི་དབང་གི་ལས་འགུལ་ལ་འགྱུར་བ་འགྲོ་བཞིན་པ་ལྟར། ད་དུང་ཡང་སྔར་མུས་བཞིན་རྒྱ་ནག་ངོས་ནས་བཟང་ངོ་མེད་ན་ངེས་པར་དུ་རྦ་རླབས་གསུམ་པ་ཚེས་དགོས་ལ། རྦ་རླབས་གསུམ་པ་བཞེངས་དགོས། གང་ལྟར་ཉལ་ཁྲིའི་སྟེང་དུ་སྨན་དྲི་ཐུལ་ལེར་འཆི་བ་ལས། མི་རིགས་དོན་དུ་ཁྲག་དྲི་ལྷང་ངེར་ཤི་བ་བདེ།
ང་ཚོའི་ཚོད་དཔག་ལས་བརྒལ་བ་མང་པོ་རེད། དཔེར་ན། ༢༠༠༨ ལོའི་ཞི་རྒོལ་དང་། ༢༠༡༡ ལོའི་མེ་སྲེག་གི་ལས་འགུལ་ལྟ་བུ་རེད། རླབས་གསུམ་པ་དེ་ཡང་ང་ཚོའི་ཚོད་དཔག་ལས་བརྒལ་སྲིད་པ་རེད། ངའི་རེ་བ་ནི་རླབས་གསུམ་པ་དེ་མ་བྱུང་བའི་གོང་ལ་རྒྱ་ནག་གཞུང་དང་རྒྱལ་སྤྱིའི་སྟེང་ནས་བོད་དོན་ལ་བདག་པོ་རེ་རྒྱག་རྒྱུ་དེ་ཡིན།
ཁྱོད་ཀྱིས་བཤད་པའི་ལས་འགུལ་རྦ་རླབས་གསུམ་པ་ཐག་ཉེ་རུ་སླེབས་ཡོད་ན།ལས་འགུལ་དེའི་ངོ་བོ་སྦྱང་གྲུང་འཛོམ་པ་ཞིག་ཡིན་པར་ཤོག
ན་ནིང་དང་ད་ལོའི་སྐུ་ལུས་མེ་ལ་སྒྲོན་མཁན་ཚོ་ཚིག་ཟུར་ཙམ་ཡང་ཞུ་ཕོད་མི་འདུག་མོད།ཡིན་ན་ཡང་ཁོ་ཚོ་བུད་སོང་བའི་རྗེས་ནས་ང་ཚོས་སྡུག་བསྔལ་མ་གཏོགས་ཅི་ཡང་བྱེད་མ་ཐུབ་པ་དེ་རེད།
མྱི་ནག་ཚང་གིས་ཌ་ལི་བྷན་དང་བསྡུར་ནས་ཡོང་ན་ཞེད་སྣང་ཏོག་ཙམ་སྐྱེ་བ་འདྲ་བོ་ཆགས་སོང་།ཡིན་ན་ཡང་ང་ཚོ་དེའི་ཚད་ལ་ད་རུང་སླེབས་ཀྱི་མེད་པ་དང་ཚད་དེ་འདྲ་ཞིག་ལ་སླེབས་རག་བར་དུ་ཐབས་ལམ་གཞན་པ་ཞིག་རྙེད་ཐུབ་པར་སྨོན།
གཞུང་དང་ཚོགས་པ་སྒེར་གང་ཞིག་ཡིན་རུང་། རང་ཉིད་ཀྱིས་རང་ཉིད་ལ་སྲུང་སྐྱོབ་བྱེད་པའི་དབང་ཚད་ཡོད། སུ་ཞིག་ཡིན་རུང་སྟོབས་ཆེན་པོས་ཆུང་ངུའི་རྒྱུ་ནོར་བཙན་འཕྲོག བཙན་འཛུལ་བྱེད་པ། རང་ལ་དབང་ཚད་མེད་པར་གཞན་གྱི་དངོས་པོར་ཧམ་སྤྱོད། རྒོལ་ལན་སློག་ན་འཇིགས་སྐུལ་བའི་གྲས་སུ་མི་འགྲོ་བ་མ་ཟད། དེ་རྒྱལ་སྤྱིའི་ཁྲིམས་དང་འགལ་བར་གླེང་ཙམ་ཡང་མེད་པ་ཡ་རེ་མཚར། དངོས་གནས་བྱས་ན། སྒེར་དང་གཞུང་གང་ཞིག་ཡིན་ནའང་སྲིད་དབང་སྒེར་འཛིན་དང་། ཡང་ན་ཁྲིམས་མཐུན་མིན་པའི་མི་དམངས་ལ་དྲག་གནོན་བྱེད་རིགས་ནི། རྒྱལ་སྤྱི་ཁྲིམས་དང་འགལ་ཡོད། དེ་བས་ཀྱང་མི་རིགས་དང་། ཡང་ན་རིག་གཞུང་རྩ་མེད་བཟོ་མཁན་གཞུང་དང་སྒེར་གང་ཡིན་རུང་། རྒྱལ་སྤྱིའི་ཁྲིམས་དང་འགལ་སྟེ། འཇིགས་སྐུལ་བར་གྱུར་ཡོད།།