ཁ་སང་ཕྱི་ཚེས་ ༡༤ ཉིན། རྒྱ་ནག་སྲིད་བློན་ཝུན་ཇ་པའོ་དཀྱིལ་ཤར་ཡུལ་གྲུའི་རྒྱལ་ཁབ་འགའི་ནང་བསྐྱོད་ཞོར་དུ། དུས་ཐུང་རིང་བལ་ཡུལ་ནང་རྒྱལ་དོན་ལྟ་སྐོར་ལ་སླེབས་ཡོད་པ་དང་། སྐབས་དེར། བལ་ཡུལ་གཞུང་གིས་རྒྱལ་ས་ཀ་ཌི་མཱན་ཊོའི་སྲང་གྲོང་གང་སར་དམག་མི་མང་པོ་འགྲེམས་འཇོག་གིས་ལྟ་རྟོག་ནན་མོ་བྱས་ཡོད་པ་མ་ཟད། གྲྭ་བཙུན་སེར་མོ་རྣམས་གཙོས་བོད་མི་རྣམས་ལ་དམིགས་བསལ་གྱི་བཀག་སྡོམ་བྱས་ཏེ། བོད་མི་ ༢༠༠ ལྷག་འཇུ་བཟུང་བཀག་ཉར་བྱས་ཡོད་འདུག
དེ་སྔོན་ཝུན་ཇ་པའོ་བལ་ཡུལ་ནང་འདས་པའི་ཟླ་གཅིག་སྔོན་ལ་ལྟ་སྐོར་དུ་ཡོང་རྒྱུ་ཡིན་སྐོར་བསྒྲགས་ཡོད་ནའང་། དུས་ཚོད་ཕྱིར་འགྱངས་ཀྱིས་ད་ལྟའི་བར་ཡོང་མེད་པ་རེད། ཐེངས་འདིར་ཝུན་ཇ་པའོ་བལ་ཡུལ་ནང་ཆུ་ཚོད་ ༥ ལ་བསྡད་པའི་རིང་། བལ་ཡུལ་གྱི་སྲིད་བློན་བྷ་ཊ་རཱ་ཡཱི་ལ་ཐུག་འཕྲད་བྱས་ཏེ་ཆིངས་ཡིག་ཁག་ལྔ་བཞག་ཡོད་པ་མ་ཟད། རྒྱ་གཞུང་གིས་འབྱུང་འགྱུར་ལོ་གསུམ་ནང་བལ་ཡུལ་ལ་ཨ་སྒོར་ས་ཡ་ ༡༥༠ བུན་གཏོང་བྱས་ཏེ། བལ་ཡུལ་ནང་འགྲིམ་འགྲུལ་ཡར་རྒྱས་དང་གནམ་ཐང་གསར་འཛུགས། དམག་དོན་ལག་རྩལ་དང་མའོ་དྲག་སྤྱོད་པའི་རྒས་ཡོལ་བ་རྣམས་ལ་རོགས་སྐྱོར། གློག་ཁང་གསར་རྒྱག་སོགས་ཀྱི་ཐད་རོགས་རམ་བྱ་རྒྱུ་ཡིན་པ་ཁས་ལེན་བྱས་ཡོད་འདུག
བལ་ཡུལ་གཞུང་འབྲེལ་མི་སྣས་གསར་ལམ་ཁག་ཏུ་བརྗོད་པ་ལྟར་ན། རྒྱ་གཞུང་གིས་བལ་ཡུལ་ནང་ལོ་ལྟར་རྒྱ་སྒོར་ས་ཡ་ ༡༥༠ རེ་སྤྲོད་བཞིན་ཡོད་པ་དེ། སྤར་ཆ་གནང་སྟེ་ལོ་རེར་རྒྱ་སྒོར་ས་ཡ་ ༢༠༠ རེ་སྤྲོད་རྒྱུ་གཏན་ཁེལ་ཡོད་པ་དང་། ཝུན་ཇ་པའོ་ཡིས་བལ་ཡུལ་གཞུང་གིས་རྒྱ་ནག་གཅིག་གི་ལངས་ཕྱོགས་བཟུང་པར་བསྟོད་ར་བྱས་པ་མ་ཟད། མ་འོངས་པར་ཕྱོགས་གཉིས་དབར་འབྲེལ་བ་གཞི་རྒྱ་ཆེ་རུ་གཏོང་དགོས་པའི་སྐོར་བརྗོད་ཡོད་འདུག
གསར་འགོད་པ། ཚེ་རིང་རྒྱལ།
འདི་ནི་མ་འོངས་ལུང་བསྟན་ཐིག་པའང་ཡིན། །
འདི་ནི་མ་འོངས་ལུང་བསྟན་ཐིག་པའང་སྲིད། །ལ་བཅོས།
གསར་འགོད་པ་ཚེ་རིང་རྒྱལ་ལགས་ཀྱིས།
བུན་གཏོང་བྱས་ཏེ། བལ་ཡུལ་ནང་འགྲིམ་འགྲུལ་ཡར་རྒྱས་་་་་་་་གློག་ཁང་གསར་རྒྱག་སོགས་ཀྱི་ཐད་རོགས་རམ་བྱ་རྒྱུ་ཡིན་པ་ཁས་ལེན་བྱས་ཡོད་འདུག ་་་་་་། འདིའི་ཐད་ཀྱི་བུན་གཏོང་དང་རོགས་ཞེས་པའི་ཚིག་གཉིས་གཅིག་ལྟར་སྟོན་པ་འདི་ནོར་བ་མིན་ནམ།
བོད་མི་༦༠༠ལས་ལྷག་འཛིན་དུས་སུ། །
བོད་རྒྱའི་དབུས་ལམ་གཉིས་སྨན་བྱུང་བའང་སྲིད། །
རྒྱ་སྒོར་ས་ཡ་༦༠༠བརྒལ་འཚམས་སུ། །
བལ་ཡུལ་རྒྱ་ཁོངས་འགྱུར་ནས་ས་ཤོར་སྲིད། །
འདི་ནི་མ་འོངས་ལུང་བསྟན་ཐིག་པའང་ཡིན། །
བལ་ཡུལ་འདི་ནི་ཐ་མ་རྒྱ་ནག་གི་ཁོངས་སུ་འགྲོ་འདོད་དམ། ཡང་ན་རྒྱ་གར་གྱི་ཁོངས་སུ་འགྲོ་རྒྱུ་ལས་ལྷག་ཡོད་མ་རེད།
ད་ལྟའི་བལ་པོའི་མི་རིགས་སེམས་པ་རྒྱ་གར་ཆགས་པ་དང་། དཔལ་འབྱོར་རྒྱ་ནག་ལ་འགྲམ་ཆུ་ལྡང་ནས་བསྡད་ཡོད་པ་གསལ་པོ་ཡིན་པས་བོད་རིགས་ཚོས་ཀྱང་ཁ་ཕྱོགས་མ་ནོར་བྱེད་དགོས་པའི་དུས་ཚོད་ལ་སླེབས་ཟིན་པ་ལྟ་བུར་མཐོང་ལགས།
མ་འོང་པར་བལ་པའི་མི་རྣམས་རྫོགས་རྒྱུ་མེད་པའི་བཀའ་ངལ་ཤིག་གི་ནང་དུ་ལྷུང་ལ་ངེས་སོ།།
མ་འོངས་པ་ན།
བོད་མི་༦༠༠ལས་ལྷག་འཛིན་དུས་སུ། །
བོད་རྒྱའི་དབུས་ལམ་གཉིས་སྨན་བྱུང་བའང་སྲིད། ། ༢༠༠དེ་༦༠༠ལ་བཅོས་པ་ཡིན།
ཡང་རིག་རལ་གྲིས་བལ་རིགས་བོད་རིགས་སྐོར་ཡག་པོ་གསལ་སྟོན་བྱས་འདུག ཐུགས་རྗེ་ཆེ་ལགས།
གོང་གི་གསར་འགྱུར་དུ་ཆིངས་ཡིག་ཁག་ལྔ་ཞེས་པ་ནོར་བ་རེད། འདིའི་སྐབས་སུ་ཆིངས་ཡིག་ཁག་བརྒྱད་འཇོག་ཏུ་བཅུག་པ་རེད།
བོད་མི་ཁྲི་གཉིས་ཀྱིས་གནས་གཞི་བྱས་ཅིང་བར་མཚམས་མེད་པའི་སྐད་འབོད་བྱེད་དུ། ཞུམས་པ་མེད་པའི་སྙིང་སྟོབས་ཀྱིས་རྒྱ་གཞུང་གི་གཞུང་ཚབ་མདུན་ལ་འཆོང་རྐྱང་བྱས་པ་དེ་བལ་བོའི་མོའུ་གཞུང་ལ་མཚོན་ན། རྒྱ་གཞུང་གི་ཨ་སྒོར་དུང་ཕྱུར་ཁ་ཤས་རེག་པའི་མཐུན་རྐྱེན་བལ་ཡུལ་གྱི་ལོ་གཅིག་རིང་གི་ཡུལ་སྐོར་སྤྲོ་འཁྱམས་པ་རྣམས་ལས་ལྷག
་དེར་རྟེན་བལ་བོའི་གཞུང་འདིས་བོད་མི་སྐྱབས་བཅོལ་བ་རྣམས་མ་རྩ་འཇོག་བྱེད་ཀྱི་ཚོང་རྫས། རྒྱ་གཞུང་ལ་ངོ་དགའ་སྤྲེལ་ལད་འཁྲབས་སའི་རྔན་པ་ནང་བཞིན་ཆགས་ཡོད་རེད།
འོན་ཀྱང་བལ་ཡུལ་ཁོངས་གཏོགས་ཤར་པ་དང། རྟ་མང། དོལ་པོ་དང་། གློ་ཡུལ་བ། ད་དུང་གུ་རུང་མང་པོས་ཕ་མེས་ཀྱི་ཡོངས་ཁུང་ལོ་རྒྱུས་དང་། སོ་སོའི་རིགས་གཞུང། སྐད་ཡིག་ཚུན་ལ། བོད་འདི་གལ་ཆེན་པོ་ཡིན་པ་ཤེས་ཀྱི་ཡོད་ལ། ལྷག་པར་སློབ་སྦྱོང་ཅན་གྱི་རིགས་དེ་རྣམས་ཀྱིས་སེམས་གཏིང་ནས་བོད་དོན་ལ་ཐུགས་ཁུར་གནང་གིན་ཡོད། ཡིན་ནའང་དེ་ལྟར་ཤེས་མཁན་ཤིན་ཏུ་ཉུང་།
ཁོངས་རྣམས་ལ་མཚོན་ན། སོ་སོའི་ཕྲུག་གུ་མང་ཆེ་བར་ཡིག་རྨོངས་ལས་གྲོལ་བཅུག་མཁན་བཙན་བྱོལ་བོད་ཀྱི་སློབ་གྲ་དེ་བཞིན། བཙན་བྱོལ་བོད་ཀྱི་དགོན་སྡེ་རྣམས་རེད། དགོན་སྡེ་དང། སློབ་གྲར་སྡད་རིང་། བལ་ཡུལ་ཀྱི་སྤུན་ཕྲུག་དེ་དག་ལ། མཐུན་རྐྱེན་ཆ་ཚང་གྲ་སྒྲིགས་བྱེད་ནས། སོ་སོའི་སྤུན་ཉེ་ནང་བཞིན་ཞབས་ཞུས་ཆ་ཚང་བྱེད་ཀྱིན་་ཡོད་རེད་ལ།
ཁོ་ཅག་འགྲོ་བ་མི་ཞིག་ཡིན་པའི་ཆ་ནས། ནམ་ཞིག་དེ་དག་ལ་བཀའ་དྲིན་བསམ་ཤེས་ཐུབ་ངེས་ཅན་རེད་བསམ་གྱི་ཡོད།
བལ་པོའི་གཞུང་གི་ལས་བྱེད་པ་རྣམས་ལ་མཚོན་ན། རྒྱ་གཞུང་གིས་སྤྲད་ནས་རག་རྒྱུ་མང་། བལ་ཡུལ་མི་མང་ལ་བསམ་ན། བོད་མི་རྣམས་གང་ཐད་ནས་བཀའ་དྲིན་ཆེ་ངེས་ཅན་རེད།
ཡབ་མེས་ཀྱི་ལོ་རྒྱུས་ཤེས་ནས་ལས་འགུལ་སྤེལ་དགོས་ན། ལོ་རྒྱུས་ཆུད་པའི་མཁྱེན་ཡོན་ཡོད་དགོས། མ་འོངས་པར་རྒྱ་གཞུང་བལ་བོའི་བློས་ཐུབ་ཀྱི་གྲོགས་པོར་མུ་འཐུད་ཐུབ་བམ། བོད་མི་རིགས་འདི་དང་བོད་ཡུལ་དེ་བལ་པོར་རྒྱ་གཞུང་ལས་ཀྱང་ཁེ་ཕན་ཆེ་བར་དཔོག་དགོས་ན། འཛམ་གླིང་སྤྱི་འགྲོས། ཁྱད་པར་དུ་རྒྱ་གཞུང་གི་ཁོག་གི་དམིགས་ཡུལ། བལ་ཡུལ་ཚུལ་མཐུན་འབྱོར་ལྡན་བདེ་སྐྱིད་ལྡན་པའི་རྒྱལ་ཁབ་གཅིག་བསྐྲུན་དགོས་ན་ཆ་རྐྱེན་གང་སྒྲིགས་དགོས། འགལ་རྐྱེན་གང་ཞིག་དངོས་ཤུགས་རྒྱུད་གསུམ་ནས་སེལ་ཐུབ་དགོས་མཁྱེན་ཐུབ་པའི་མཁྱེན་རབ་ཡོད་དགོས་ནའང། ད་དུང་བལ་ཡུལ་གཞུང་དམངས་ནི་འཛམ་གླིང་གི་ཟུར་ཁུག་ཞིག་ཏུ། རང་དང་རང་གི་གཟའ་མིར་གནས་སྐབས་ལྟོ་འབྲངས་ཙམ་བྱུང་ན་འགྲིགས་རྒྱུ་བྱས་ནས་སྡོད་བཞིན་པའི་རྐྱེན་གྱིས་གོ་སྐབས་ཤིན་ཏུ་ཕྲ།
དེར་བརྟེན་བལ་ཡུལ་དུ་མཆིས་པའི་བོད་མི་རྣམས་ཀྱིས་གནས་སྤོས་ཀྱི་ཆགས་གཞི་ངེས་པར་ཅན་དུ་གཏིང་དགོས་པར་སྣང་།
མ་འོངས་པ་ན།
བོད་མི་༢༠༠ལས་ལྷག་འཛིན་དུས་སུ། །
བོད་རྒྱའི་དབུས་ལམ་གཉིས་སྨན་བྱུང་བའང་སྲིད། །
རྒྱ་སྒོར་ས་ཡ་༦༠༠བརྒལ་འཚམས་སུ། །
བལ་ཡུལ་རྒྱ་ཁོངས་འགྱུར་ནས་ས་ཤོར་སྲིད། །
འདི་ནི་མ་འོངས་ལུང་བསྟན་ཐིག་པའང་ཡིན། །