པདྨ་རྫོང་དུ་རྒྱ་གཞུང་ལ་ངོ་རྒོལ།

མདོ་སྨད་མགོ་ལོག་པདྨ་རྫོང་དུ་བོད་མི་ཚོས་རྒྱ་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག

ཟླ་འདིའི་ཕྱི་ཚེས་ ༨ ཉིན་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དགའ་བདེ་རྫོང་སྟོང་སྐྱོབ་དགོན་པའི་བླ་མ་བསོད་བྷ་མཆོག་གིས། རྒྱ་ནག་གཞུང་གིས་ཁོང་ལ་དེ་སྔོན་རྒྱ་གར་དུ་སོང་སྟེ་ཆབ་སྲིད་ཀྱི་ལས་ཀ་འདྲ་མིན་བྱས་པའི་ཉེས་འཛུགས་འོག དུས་དབང་ཐེངས་ ༣༢ པར་འགྲོ་བསྐྱོད་ཐོངས་མཆན་མ་སྤྲད་པ་སོགས་ཐབས་ཟད་འུ་ཐུག་གི་གནས་སུ་བསྐྱལ་མཐར། རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་ཏེ་འདས་གྲོངས་སུ་ཕྱིན་ཡོད་པ་ལྟར། ཕྱི་ཚེས་ ༡༥ ཉིན་བོད་ནང་ཆུ་ཚོད་ ༨ པ་ཡས་མས་སུ་མགོ་ལོག་དར་ལག་རྫོང་དུ་ཁོང་གི་སྐུ་ཕུང་ཞུགས་འབུལ་བྱས་ཡོད་འདུག་ལ། སྐུ་ཕུང་ཞུགས་འབུལ་སྐབས་ཉེན་རྟོག་པས་ཁོང་གི་སྐུ་ཕུང་བཙན་འཕྲོག་དང་མི་མང་མཉམ་ཞུགས་ལ་བཀག་འགོག་བྱས་ཡོད་འདུག 

གནས་ཚུལ་དེ་དག་ལ་རྐྱེན་བྱས་ཏེ།   ཉིན་དེར་མགོ་ལོག་པདྨ་རྫོང་གི་སྲང་ལམ་དུ་ཐོག་མར་བོད་མི་ཁག་ཅིག་གིས་སྐད་འབོད་དང་། རྗེས་སུ་བོད་མི་ ༥༠༠ ལྷག་གིས་སྔ་ཕྱི་ཐེངས་གསུམ་རིང་། རླུང་རྟ་གཏོར་བ་དང་༸གོང་ས་མཆོག་གི་སྐུ་པར་འཁྱེར་ཡོད་པ་མ་ཟད།  “ ༸གོང་ས་མཆོག་བོད་ལ་གདན་འདྲེན་ཞུ་དགོས་། ༸གོང་ས་མཆོག་གི་སྐུ་ཚེ་བརྟན་པར་ཤོག ”ཅེས་དུས་ཡུན་ཆུ་ཚོད་ ༡ ལྷག་གི་རིང་སྐད་འབོད་བྱས་ཡོད་འདུག་ལ། ཁ་སང་སྔ་དྲོ་ཉེན་རྟོག་པས་ངོ་རྒོལ་བྱེད་མཁན་གྱི་བོད་མི་ཁག་ཅིག་འཛིན་བཟུང་བྱས་པའི་གནས་ཚུལ་བྱུང་ཡོད་ཀྱང་། མདང་དགོང་ཕྱིར་གློད་གྲོལ་བཏང་ཡོད་སྐོར་ངྷ་ས་གནས་བཞུགས་ཚངས་དབྱངས་རྒྱ་མཚོ་ལགས་ཀྱིས་གནས་ཚུལ་མཁོ་སྤྲོད་བྱས་བྱུང་།

གསར་འགོད་པ། དོན་གོ