མཁས་གྲུབ་བྱེ་བའི་འབྱུང་གནས་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གི་ནང་གསེས་ཉང་པོ་ཁང་ཚན་གྱི་དགེ་བའི་བཤེས་གཉེན་ཆེན་པོ་བློ་བཟང་མཁྱེན་རབ་མཆོག་ཉིད་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་བཀའ་དབང་ཐེངས་སོ་གཉིས་པའི་སྔོན་འགྲོའི་གསུང་ཆོས་གྲུབ་པ་དང་༢༠༡༢ ལོའི་ཕྱི་ཟླ་ ༡ ཚེས་ ༧ ཉིན་སྐུ་ཞི་བར་མནལ་ཚུལ་བསྟན་ནས་ཉིན་གྲངས་ ༩ རིང་ཐུགས་དམ་ལས་མི་གཡོ་བ་བརྟན་པོར་བཞུགས་ཏེ་ཉིན་རེ་ནས་ཉིན་རེ་བཞིན་སྐུ་འཚོ་བཞུགས་ལས་ཀྱང་ཞལ་དཀྱིལ་བརྗིད་ཉམས་ཆེ་རུ་ཕེབས་ནས་སློབ་ཚོགས་རྟག་འཛིན་ཅན་རྣམས་ལ་མཐའ་མའི་མཛད་པ་མི་རྟག་དྲན་བསྐུལ་བླ་ན་མེད་པ་ཞིག་ཏུ་གྱུར། དམ་པ་གང་ཉིད་ཡོངས་གྲགས་སུ་གནས་ཆུང་དགེ་བཤེས་ལགས་སུ་འབོད་ཅིང་ ༡༩༣༢ ལོར་གཙང་དུ་སྐུ་འཁྲུངས། སྐུ་ན་ཆུང་དུས་སུ་ཁུལ་དེའི་པ་སྣམ་དགའ་གདོང་དགོན་དུ་ཆོས་བཞུགས་མཛད་ནས་མཁན་པོ་ཁུ་ནུའི་རྒན་རིག་འཛིན་བསྟན་པ་རིན་པོ་ཆེའི་སློབ་མར་གྱུར་ནས་བསན་བསམ་གང་མཚམས་དང་གསང་བདེ་འཇིགས་གསུམ་སོགས་ཆོས་སྤྱོད་ཀྱི་རིམ་པ་རྣམས་ཐུགས་ཐོག་ཏུ་འཛིན་ཏེ་རྣམ་དཔྱོད་ཕུལ་དུ་ཕྱིན་པ་མངོན། ༡༩༥༧ ལོར་དབུས་ཀྱི་གདན་ས་ཆེན་པོ་དཔལ་ལྡན་འབྲས་སྤུངས་བློ་གླིང་ཉང་པོ་ཁང་ཚན་དུ་ཆོས་བཞུགས་གནང་རྗེས་རྒྱ་དམར་ཀླ་ཀློའི་གདུག་རྩུབ་འོག་ནས་བཙན་བྱོལ་དུ་ཕེབས་ཏེ་སྦག་ས་ཆོས་སྒར་དུ་ལོ་ངོ་ཧྲིལ་པོ་བཅུའི་རིང་མཁན་ཆེན་པདྨ་རྒྱལ་མཚན་དང་ཤག་སྐོར་མཁན་ཟུར་ཉི་མ་རྒྱལ་མཚན་རྣམ་གཉིས་ལས་གཞུང་ཆེན་རྣམས་སུ་མཐིལ་ཕྱིན་གསན་བསམ་མཛད་མཐར་ ༡༩༩༤ ལོར་ལྷོ་ཕྱོགས་མོན་གྷོར་མཁས་མང་འདུས་པ་རྒྱ་མཚོའི་དབུས་སུ་གཞུང་ཆེན་ཁག་ལ་བརྒལ་བརྟག་གི་ལམ་ནས་དགེ་བཤེས་དམ་བཅའ་འཇོག་གནང་མཛད་དེ་ལྷ་རམས་པ་རྩེ་ཕུད་དང་པོའི་སྦྱངས་འབྲས་སོན། དེ་ནས་བློ་གླིང་མཁན་རིན་པོ་ཆེའི་བཀའ་བཞིན་ཐོག་མར་ལོ་གཅིག་རིང་གནས་ཆུང་གྲྭ་ཚང་གི་དཔེ་འཁྲིད་དགེ་རྒན་དུ་ཕེབས། དེ་རྗེས་དཔལ་ལྡན་སྨད་རྒྱུད་གྲྭ་ཚང་གི་ཆོས་ཐོག་འགྲིམས་ནས་སྔགས་ཀྱི་འཆད་ཉན་ལ་ཐུགས་དམ་མཐིལ་དུ་འཛིན་ཏེ་སྔགས་ཀྱི་རྩོད་རྒྱུགས་ཆེན་མོར་༧གོང་ས་མཆོག་གི་སྤྱན་སྔར་འཆད་རྩོད་ཀྱི་མཆོད་པ་འབུལ་གནང་གིས་མཁས་པའི་དབུས་ནས་མཁས་པ་མཛེས་ཞེས་པའི་དཔེ་ལྟར་ཡོངས་གྲགས་སྔགས་ཀྱི་རྒྱུགས་སྤྲོད་རྩེ་ཕུད་དང་པོར་སོན།
དེ་ནས་བཟུང་ ༢༠༡༡ ལོ་མཇུག་བར་གནས་ཆུང་གྲྭ་ཚང་རང་དུ་བཞུགས་ནས་དཔེ་འཁྲིད་ཀྱི་ཐུགས་འགན་བཞེས་གནང་མཛད། དམ་པ་གང་ཉིད་ནང་གི་ཐོས་བསམ་སྒོམ་གསུམ་གྱིས་ཐུགས་བརྒྱུད་བརླན་ཞིང་ཚད་མཐོར་གཤེགས་ཀྱང་ཕྱིའི་རྣམ་པར་འདོད་ཆུང་ཆོག་ཤེས་དཔེར་འོས་པ་ཉམ་ཆུང་ཚུལ་དུ་དམ་ཆོས་འདུལ་བ་གཞིར་བཟུང་སྦྱངས་པའི་ཡོན་ཏན་ཉམས་བཞེས་མཛད་དེ་མཐོ་གོ་ས་སོགས་ཡོངས་སུ་སྤངས་ཏེ་སྦས་པའི་བརྟུལ་བཞུགས་ཚུལ་གྱིས་སྒོམ་སྒྲུབ་ལ་གཞོལ་བའི་འབྲས་རྟགས་སུ་རྒྱུན་དུ་སྙིང་བརྩེ་ལྡན་ཞིང་སྐྱེ་བོ་ཉམ་ཐག་དང་འགྲོགས་འདྲིས་བདེ་བ་སོགས་དམ་པའི་ཡོན་ཏན་དུ་མས་བརྒྱན་ཏེ་ཀུན་གྱི་མཐུན་སྣང་དུ་གྱུར། འོན་ཀྱང་གདུལ་བྱའི་ཚོགས་རྣམས་ཞལ་མཇལ་གསུང་གི་བདུད་རྩིར་ལོངས་སུ་སྤྱོད་པའི་སྐལ་བ་བྲལ་བས་ཤིན་ཏུ་ཡིད་སྐྱོ་བའི་གནས་སོ།
གནས་ཆུང་གྲྭ་ཚང་དང་ཉང་པོ་ཁང་ཚན་ཐུན་མོང་ནས་སྤེལ།།
