བཙན་བྱོལ་བོད་མིའི་སློབ་གསོའི་སྐོར་གླེང་བ།

སྐལ་བཟང་དབང་འདུས་ཀྱིས།

ང་ཚོ་བཙན་བྱོལ་བ་ཆགས་ནས་ད་བར་གྱི་སློབ་གསོའི་གནས་ལུགས་ནི་ཡར་རྒྱས་ཆེན་པོ་བྱུང་བས་དགའ་སྤོབས་བྱེད་ཡུལ་ཞིག་ཡིན་ལ་དེ་བཞིན་འཐུས་ཤོར་ཡང་ཆེན་པོ་བྱུང་ཡོད་པས་སྡུག་སྐད་ཤོར་ས་ཞིག་ཀྱང་ཡིན། བར་ལམ་ བོད་མིའི་ཆབ་སྲིད་ཀྱི་རང་བཞིན་ལ་འགྱུར་བ་ཆེན་པོ་བྱུང་ཡོད་པ་དང་། བཀའ་ཤག་གསར་པས་ལས་འཁུར་དང་ ལེན་ཞུས་ཏེ་ཉིན་གྲངས་བརྒྱ་སྐོར་སོང་བའི་མཚམས་འདིར་སྲིད་སྐྱོང་བློ་བཟང་སེང་གེ་ལགས་ཀྱིས་གནད་ཆེར་བརྩིས་པའི་ཤེས་ཡོན་སློབ་གསོའི་སྐོར་ལ་བསམ་འཆར་འགའ་ཞིག་ཞུ་རྒྱུ་ཡིན།

༡༽ མ་སྐད་ནི་བསླབ་པ་ཐམས་ཅད་ཀྱི་གཞི་རྩ་ཡིན།

ཕྲུ་གུ་ཞིག་ལ་མཚོན་ན་རང་གི་མ་སྐད་ནི་ཤེས་བྱ་མཐའ་དག་སློབ་པའི་བརྒྱུད་ལམ་ལེགས་ཤོས་དེ་ཡིན་པ་སློབ་གསོའི་སྐོར་གྱི་ཞིབ་འཇུག་ཁག་ལས་ར་སྤྲོད་གསལ་པོ་བྱུང་ཡོད། བོད་པའི་སློབ་མ་ཚོར་བོད་ཡིག་གི་བརྒྱུད་ལམ་ནས་ ཨང་རྩིས་དང་། ཚན་རིག སྤྱི་ཚོགས་རིག་གནས་སོགས་བསླབ་པ་ཡིན་ན་སློབ་མའི་སྦྱང་ཚད་དང་གོ་རྟོགས་མཐོ་རུ་ འགྲོ་རྒྱུར་གདོན་མི་ཟ་བ་ཡིན་པ་མ་ཟད། ཐ་ན་སྐད་ཡིག་གཉིས་པ་དང་གསུམ་པ་(དབྱིན་ཇི་དང་ཧིན་དྷི) སོགས་ སློབ་པ་ལ་ཡང་མ་སྐད་ཀྱི་རྨང་གཞི་སྲ་བརྟན་དགོས་རྒྱུ་ཤིན་ཏུ་ནས་ཀྱང་གལ་ཆེ། དེང་སྐབས་འཛམ་གླིང་གི་ཡུལ་ གྲུ་གང་སར་ཡོད་པའི་གྲངས་ཉུང་མི་རིགས་ཁག་གི་སློབ་གསོའི་གནས་སྟངས་སྐྱོ་པོ་ཡོད་པའི་རྒྱུ་མཚན་ཨ་མ་དེ་ནི་ཁོང་ཚོས་སྐད་ཡིག་གཞན་ཞིག་གི་ནང་སློབ་སྦྱོང་བྱེད་དགོས་པའི་དབང་གིས་ཡིན།

ད་བར་བོད་ཁྱིམ་གྱི་འགན་ཁུར་ཐོག་གཞི་རིམ་འོག་མའི་སློབ་གཞི་དང་སློབ་ཁྲིད་རྣམས་བོད་ཡིག་ནང་བྱེད་ཐུབ་པ་བྱུང་བ་དང་། ཟམ་གདོང་རིན་ པོ་ཆེའི་བཀའ་ཤག་གི་སྐབས་གཞི་རིམ་ཤེས་ཡོན་སྲིད་བྱུས་གཏན་འབེབས་དང་ མེས་དབོན་དཔེ་སྟོན་སློབ་གྲྭ་བཙུགས་པ་སོགས་ནི་བོད་མིའི་སློབ་གསོའི་ལོ་རྒྱུས་ནང་ཆེས་རླབས་ཆེན་གྱི་གྲུབ་འབྲས་ཁག་ཡིན། ད་ཆ་སློབ་གསོའི་སྲིད་བྱུས་གསར་པ་གཞིར་བཟུང་གཞི་རིམ་བར་མ་དང་དེ་ནས་རིམ་གྱིས་གཞི་རིམ་ གོང་མ་སོགས་སུ་ལག་བསྟར་བྱ་རྒྱུའི་དུས་ལ་སླེབས་ཡོད།

དེའི་སྐོར་སློབ་དེབ་གྲ་སྒྲིག་དང་། དགེ་རྒན་གསོ་སྐྱོང་། གཞན་མཐུན་རྐྱེན་ཁག་གྲ་སྒྲིག་འཐུས་ཚང་བྱས་ནས་བོད་ ཡིག་ནང་སློབ་ཁྲིད་བྱ་རྒྱུར་ཤུགས་སྣོན་ཚ་འདེད་བྱེད་དགོས། དེ་ནི་ང་ཚོའི་མ་འོངས་པའི་བསྒྲུབ་བྱ་ལྟེ་བ་དེ་ཡིན། བཀའ་ཤག་དང་ཤེས་རིག་ལས་ཁུངས་ནས་ཕུགས་རྒྱང་རིང་པོར་བལྟས་ནས་མ་འོངས་པའི་ལོ་ཉི་ཤུ་སྐོར་ཙམ་གྱི་འཆར་གཞི་འཐེན་དགོས། དེ་དག་ཀྱང་ལོ་ལྔ་ལྔར་བགོས་ནས་ཚད་གཞི་ངེས་ཅན་གྱི་འཆར་གཞི་བཟོ་བ་དང་ལོ་ལྔ་རེ་ རྫོགས་མཚམས་བསྐྱར་ཞིབ་སོགས་བྱས་ན་ཕན་ངེས་ཡིན། དེ་མིན་འདས་པའི་ལོ་ངོ་ཉི་ཤུ་ལྟར་འཐུས་ཤོར་དང་ སྒྱིད་ལུགས་ཀྱི་དབང་དུ་ཤོར་བའི་ཉེན་ཁ་ཡོད།

༢༽ དོན་དམ་གྱི་སྐད་གཉིས་སློབ་གསོ།

འོན་ཀྱང་ང་ཚོ་བཙན་བྱོལ་ལ་ཡོད་པའི་གནས་སྟངས་འོག་གཞན་དབང་སྟབས་བསྟུན་བྱེད་དགོས་པ་དང་། གཞན་ གྱི་ངོས་ལེན་ཡོད་པའི་སློབ་གསོའི་ཚན་པ་(Education board)ལོགས་སུ་མེད་པ། དེ་བཞིན་མཐོ་རིམ་སློབ་གསོའི་ མཐུན་རྐྱེན་བོད་སྐད་ཡིག་ཐོག་མེད་པར་བརྟེན་བོད་ཕྲུག་རྣམས་མཐོ་རིམ་སློབ་སྦྱོང་ཆེད་རྒྱ་གར་དང་ཕྱི་རྒྱལ་ཡུལ་གྲུ་ཁག་ནང་དབྱིན་ཇིའི་སྐད་ལ་བརྟེན་དགོས་པ། ད་དུང་བོད་ཀྱི་སྐད་ཡིག་ལ་དཔལ་འབྱོར་གྱི་ཁྲོམ་ར་དཀོན་པ། དེང་དུས་ཀྱི་ཤེས་བྱ་འདྲ་མིན་བོད་སྐད་ཐོག་ཕབ་བསྒྱུར་ཟིན་པ་ཆེས་དཀོན་པ་སོགས་ཀྱི་རྒྱུ་མཚན་མང་བོ་ཞིག་ལ་བརྟེན། གནས་སྐབས་རིང་གཤམ་དུ་བཀོད་པའི་སློབ་གསོའི་ལམ་ལུགས་ལྟ་བུ་ཞིག་ལ་བསྐྱོད་ཐུབ་ན་བཟང་སྙམ། འོན་ཀྱང་གཞི་རིམ་ཤེས་ཡོན་སྲིད་བྱུས་གསར་པའི་ནང་བཀོད་པའི་ལམ་ལུགས་དེ་ནི་ང་ཚོའི་མཐར་ཐུག་གི་བསྒྲུབ་བྱ་ཡིན་པས་དེའི་ཕྱོགས་སུ་གྲ་སྒྲིག་མུ་མཐུད་ནས་བྱ་དགོས་པ་ཡིན།

·       ཀ༽གཞི་རིམ་འོག་མ་འཛིན་གྲྭ་དང་པོ་ནས་ལྔ་པ་བར་ད་ལྟ་ཡོད་བཞིན་པའི་ལམ་ལུགས་བཞིན་སློབ་ཚན་མཐའ་དག་བོད་ཡིག་ནང་བསླབ་རྒྱུ་དང་སྐད་ཡིག་གཉིས་པ་དབྱིན་སྐད་འཛིན་གྲྭ་གསུམ་པ་ནས་མགོ་བཙུགས་དགོས། རྒྱུ་མཚན་ནི་མ་སྐད་ཀྱི་རྨང་གཞི་སྲ་བརྟན་ཡོད་ན་སྐད་ཡིག་གཞན་སློབ་པར་ཕན་རླབས་ ཆེན་པོ་ཡོད།

·       ཁ༽གཞི་རིམ་བར་མ་འཛིན་གྲྭ་དྲུག་པ་ནས་བརྒྱད་པ་བར་ལ། ༩༠–༡༠་ཅན་གྱི་སྐད་གཉིས་སློབ་གསོ་ (90-10 Dual immersion model)ལག་ལེན་བསྟར་ན་ལེགས་པར་མངོན། དེ་ཡང་སྐད་ཡིག་ཕུད་པའི་ སློབ་ཚན་གཞན་ཁག་སློབ་ ཁྲིད་ཀྱི་དུས་ཡུན་ཆ་ཚང་ལས་བོད་སྐད་ཐོག་བརྒྱ་ཆ་༩༠་དང་དབྱིན་སྐད་ཐོག་ བརྒྱ་ཆ་༡༠་གཏོང་དགོས། སྐད་ཡིག་ མཉམ་བསྲེས་མེད་པར་ལོག་མཚམས་གསལ་པོར་ དབྱེ་དགོས་ པ་ (Language separation)དང། དེ་བཞིན་སྐད་ ཡིག་གསུམ་པ་རྒྱ་སྐད་ཡང་ལོ་གསུམ་གྱི་རིང་བསླབ་རྒྱུ།

·       ག༽གཞི་རིམ་གོང་མ་འཛིན་གྲྭ་དགུ་པ་ནས་བཅུ་པ་བར་ལ། ༥༠–༥༠་ཅན་གྱི་སྐད་གཉིས་སློབ་གསོ་(50-50 Dual immersion model)ལག་ལེན་བསྟར་དགོས། དེ་ཡང་སྐད་ཡིག་ཕུད་པའི་སློབ་ཚན་གཞན་ཁག་ སློབ་ཁྲིད་ཀྱི་དུས་ཡུན་ཆ་ཚང་ལས་བོད་སྐད་ཐོག་བརྒྱ་ཆ་༥༠་དང་དབྱིན་སྐད་ཐོག་བརྒྱ་ཆ་༥༠་གཏོང་དགོས་པ་དང་སྐད་ཡིག་མཉམ་བསྲེས་མེད་པར་ལོག་མཚམས་གསལ་པོར་དབྱེ་དགོས་པ་ཡིན། སྐབས་འདི་ ནས་བཟུང་དབྱིན་སྐད་ཐོག་ཤུགས་སྣོན་འཕར་མ་རྒྱག་དགོས།

·       ང༽གཞི་རིམ་གོང་མ་འཛིན་གྲྭ་བཅུ་གཅིག་ནས་བཅུ་གཉིས་བར་ལ་སློབ་ཚན་མཐའ་དག་དབྱིན་ཡིག་ནང་བསླབ་རྒྱུ་དང་བོད་ཡིག་སློབ་ཚན་ཞིག་གི་ངོ་བོའི་ཐོག་ནས་སློབ་འཁྲིད་བྱ་རྒྱུ།

དེ་ལྟ་བུའི་ལམ་ལུགས་ཞིག་ལ་བརྟེན་ན་བོད་ཡིག་གི་སྦྱང་ཚད་མཐོ་པོ་ཡོང་རྒྱུ་མ་ཟད་དབྱིན་ཡིག་གི་ཤེས་ཚད་ཀྱང་རང་རྐྱ་འཕེར་བ་ཡོང་ངེས་ཡིན། བོད་ཡིག་ནས་དབྱིན་ཡིག་གི་རྒྱུད་ལམ་ལ་འགྱུར་བ་ཡང་གློ་བུར་དུ་མ་ཡིན་པར་ དལ་པོའི་ངང་ནས་ཡིན་སྟབས་སློབ་མ་ཚོ་ལ་ཕན་ཐོགས་ཆེན་པོ་ཡོད། དེ་བཞིན་སློབ་མ་རྣམས་ལ་མཐོ་རིམ་སློབ་ སྦྱོང་གི་གོ་སྐབས་ལེན་རྒྱུར་ཡང་འགོག་རྐྱེན་མེད་པ་ཡིན།

༣༽ བོད་ཀྱི་སྐད་ཡིག་སློབ་ཁྲིད་དེ་དེང་རབ་ཅན་དུ་འགྱུར་དགོས།

ང་ཚོའི་སློབ་གྲྭ་ཕལ་མོ་ཆེའི་ནང་སློབ་ཚན་ཁག་མང་པོ་ཡོད་པའི་ནང་ནས་བོད་ཀྱི་སྐད་ཡིག་སློབ་ཁྲིད་ཀྱི་གནས་བབ་ཐོག་ལ་དུས་དང་མཐུན་པའི་གོམ་པ་སྤོས་མ་ཐུབ་པར་རྗེས་ལུས་ཐེབས་ཡོད། དེ་ནི་དགེ་རྒན་མང་པོ་ཞིག་ལ་སློབ་ མའི་སེམས་ཁམས་དང་མཐུན་པའི་དེང་དུས་སློབ་ཁྲིད་ཀྱི་སྦྱོང་བརྡར་ཉུང་བ་དང་བོད་ཡིག་གི་ཁྲིད་ཆས་ཉུང་པ་སོགས་ཀྱིས་ལན་པ་ཡིན། བོད་ཀྱི་སྐད་ཡིག་སློབ་ཁྲིད་དེ་བརྡ་སྤྲོད་ཀྱི་གཞུང་ལུགས་དང་དགེ་རྒན་གྱི་འཆད་ཁྲིད་ རྒྱབ་ པ་ཙམ་མ་ཡིན་པར་སློབ་མའི་ཉིན་རེའི་འཚོ་བ་འབྲེལ་པའི་འབྲི་ཀློག་སྤྱོད་གསུམ་ལ་ཤུགས་ནོན་རྒྱག་དགོས་པ་ཡིན། དེ་དག་ཡོང་ཆེད་དུ་དགེ་རྒན་ལ་དེང་དུས་ཀྱི་སློབ་ཁྲིད་ཐབས་ལམ་སོགས་ཀྱི་སྦྱོང་བརྡར་གང་མང་སྤྲོད་དགོས་ལ་སློབ་དེབ་དང་མཐུན་རྐྱེན་གཞན་ཁག་ལ་ཡང་ཡར་རྒྱས་ངེས་པར་གཏོང་དགོས་པ་ཡིན།

༤༽སྐད་ཡིག་གསུམ་པར་རྒྱ་སྐད་བསླབ་དགོས།

ད་ལྟའི་བར་བོད་མིའི་སློབ་གྲྭ་ཁག་ནང་ཧིན་དྷིའི་སྐད་དེ་འཛིན་རིམ་དྲུག་པ་ནས་བརྒྱད་པ་བར་རམ། གང་ལྟར་ལོ་ གསུམ་ཙམ་གྱི་རིང་ལ་སློབ་ཀྱིན་ཡོད། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གསར་པ་དེས་ཀྱང་རྒྱ་ གར་དང་མཚུངས་བའི་སྐད་ཡིག་གསུམ་ལྡན་གྱི་ལམ་ལུགས་ལ་མོས་མཐུན་བྱས་ཡོད།
དེར་བརྟེན། ཆབ་སྲིད་དང་ རིག་གནས། འཚོ་བ། དཔལ་འབྱོར་སོགས་ཕྱོགས་གང་ནས་བལྟས་ཀྱང་བོད་ཕྲུག་ཚོར་རྒྱ་སྐད་བསླབ་རྒྱུ་གནད་ ཆེར་མཐོང། ད་བར་ཧིན་དྷི་ལོ་གསུམ་བར་སློབ་བཞིན་པ་དེས་ང་ཚོར་ཕན་རླབས་བྱུང་ཡོད་མེད་ཐེ་ཚོམ་རེད། ང་ ཚོར་མཁོ་བའི་ཟ་འཐུང་ཙམ་གྱི་ཧིན་སྐད་དེ་ནི་རང་བཞིན་གྱིས་ཁྲོམ་ར། བརྙན་འཕྲིན་བརྒྱུད་ལམ། དེ་བཞིན་སྤྱི་ ཚོགས་ཀྱི་འབྲེལ་ལམ་སོགས་བརྒྱུད་ནས་ཤེས་ཐུབ་ངེས་ཡིན།

༥༽དགེ་རྒན་གྱི་སྤུས་ཚད་ནི་སློབ་མའི་སྦྱང་ཚད་གོང་མཐོར་གཏོང་བའི་ཆ་རྐྱེན་ཨང་དང་པོ་ཡིན།

དགེ་རྒན་ཡག་པོ་དང་ཚད་ལྡན་དགོས་ན་འཛིན་རིམ་བཅུ་གཉིས་མཐར་ཕྱིན་སློབ་མ་ལེགས་གྲས་རྣམས་ཀྱིས་སློབ་གསོའི་སྐོར་ཆེད་སྦྱོང་གནང་སྟེ་དགེ་རྒན་གྱི་ལས་ཀར་ཞུགས་དགོས། འཛམ་གླིང་ནང་སློབ་གསོའི་གནས་བབས་ ལེགས་གྲས་ཡིན་པའི་ཡུལ་གྲུ་སིང་ག་པོར་(Singapore)ལྟ་བུར་མཚོན་ན་དགེ་རྒན་རྣམས་གཞི་རིམ་སློབ་གྲྭ་ཐོན་པའི་སློབ་མ་ལེགས་ཤོས་བརྒྱ་ཆ་༣༠་ཡི་ནང་ནས་ཡོང་གི་ཡོད་ལ། དེ་བཞིན་རྒྱལ་ཁབ་ཀྱི་བློ་རིག་བཀྲ་བའི་སློབ་མ་ མང་པོ་ཞིག་ཀྱང་དགེ་རྒན་གྱི་བྱ་བར་ཞུགས་ཀྱིན་ཡོད་། དེ་ལྟར་ཡོང་དགོས་བའི་རྒྱུ་མཚན་ནི་ཡུལ་གྲུ་དེར་དགེ་ རྒན་ལ་དམིགས་བསལ་མཐུན་རྐྱེན་དང་ཕོགས་ཐོབ་སོགས་མི་ཚེའི་མདུན་ལམ་ཡག་པོ་ཡོད། བཙན་བྱོལ་བོད་མིའི་ སློབ་གྲྭ་ཁག་གི་དགེ་རྒན་རྣམས་ལ་མཚོན་ན་ལས་འཁུར་ལྕི་ཞིང་ཕོགས་ཐོབ་སོགས་ཀྱི་ཆ་ནས་མི་ཚེའི་མདུན་ལམ་དམིགས་བསལ་ཞིག་མེད་ན་ཡང་། ལྷག་བསམ་གྱི་ཐོག་ནས་ལས་ཀར་ཧུར་བརྩོན་གནང་བར་བསྔགས་བརྗོད་ཀྱི་ གནས་སུ་གྱུར་ཡོད། འོན་ཀྱང་། བོད་པའི་སློབ་གྲྭ་ཁག་གི་སློབ་མ་ལེགས་གྲས་རྣམས་འཛིན་རིམ་བཅུ་གཉིས་ཐོན་ རྗེས་མཐོ་སློབ་དུ་སློབ་གསོའི་སྐོར་ལ་ཆེད་སྦྱོང་གནང་མཁན་ཆེས་དཀོན་པོ་ཡིན་ལ། དེ་བཞིན་སློབ་གྲྭར་ཡོད་ སྐབས་སློབ་སྦྱོང་གི་གནས་ཚད་སྐྱོ་བ་མང་པོ་ཞིག་གིས་དགེ་རྒན་གྱི་བྱ་བ་གཉེར་བ་དེ་ཡང་དངོས་ཡོད་ཀྱི་གནས་སྟངས་ཤིག་ཡིན། གལ་སྲིད། དེས་ན་མ་འོངས་པར་བོད་མི་ཤེས་ཡོན་ཅན་དང་ཁྱད་ལས་པ་མང་པོ་སྐྱེད་བསྲིང་བྱེད་ དགོས་ན་ཐོག་མར་དགེ་རྒན་གསོ་སྐྱོང་ཡག་པོ་བྱེད་དགོས་པ་ཡིན།

༦༽ སློབ་མ་ཚོར་རྣམ་དཔྱོད་དང་བསམ་བློའི་རང་དབང་སྤྲོད་དགོས།

ང་ཚོའི་སློབ་གྲྭ་ཁག་གི་ནང་དགེ་རྒན་དང་སློབ་དེབ་ལ་མཐའ་གཅིག་དུ་བརྩི་བཀུར་ཞུ་དགོས་པ་དེ་ཡང་སློབ་མར་རང་རྐྱ་འཕེར་བའི་ཤེས་ཡོན་འཇུག་པ་ལ་འགོག་རྐྱེན་ཆེན་པོ་བཟོ་གི་ཡོད། ཤེས་བྱ་ནི་མིའི་རིགསདང་སྤྱི་ཚོགས་ནས་ བསྐྲུན་པ་(Social construction)ཤ་སྟག་ཡིན་པའི་དེ་དག་ལ་མཐའ་ གཅིག་ཏུ་མོས་གུས་དང་ཡིད་ཆེས་བྱེད་དགོས་ དོན་ཅི་ཡང་མེད། དེང་སྐབས་དུས་རབས་ཉེར་གཅིག་ནང་རང་གི་རྣམ་དཔྱོད་བཀོལ་ཏེ་ཤེས་བྱ་ལ་དཔྱད་པ་བྱེད་ པའི་གོམས་གཤིས་(critical thinking)བོད་པའི་སློབ་མ་ཚོར་ངེས་པར་འཇགས་ཐབས་བྱ་དགོས་པ་ཡིན། དེ་མིན་ དགེ་རྒན་གྱི་གང་སླབ་པ་དང་སློབ་དེབ་ཁོ་ན་ལ་སྐྱབས་བཅོལ་ནས་སོ་སོའི་བསམ་བློ་བཀོལ་སྤྱོད་མ་བྱས་ན་གང་ཡང་མ་ཤེས་པ་དང་ཧ་ལམ་མཚུངས་པ་ཡིན། དེས་ན་སློབ་མ་ཚོར་རྣམ་དཔྱོད་ལྡན་པའི་མི་ཞིག་གི་ཆེ་མཐོང་སྤྲད་ནས་ ཁོང་ཚོར་རང་རང་གི་ཆོས་རབ་བྱེད་ཀྱི་བློ་དེ་ངེས་པར་བེད་སྤྱོད་བྱ་རྒྱུའི་གོ་སྐབས་སྤྲོད་དགོས། དེ་འདྲ་ཡོང་བ་ལ་ ཡང་དགེ་རྒན་གྱི་སྤུས་ཚད་དང་སྦྱང་ཚད་ནི་ཤིན་ཏུ་ནས་གལ་འགངས་ཆེ། ང་ཚོའི་སློབ་མ་ཚོ་ངེས་པར་དུ་བསམ་ ཕོད་པ། བྲིས་ཕོད་པ་དང། ཤོད་ཕོད་པ་ཞིག་ཡོང་རྒྱུར་རང་དབང་དང་གོ་སྐབས་སྤྲོད་དགོས་པ་ཡིན།

མདོར་ན་ད་ལྟའི་བཀའ་ཤག་གི་སྲིད་བྱུས་གཞིར་བཟུང་མ་འོངས་པར་བཙན་བྱོལ་བོད་མིའི་སྤྱི་ཚོགས་ཀྱི་འཁྲོད་དུ་ཁྱད་ལས་པ་ཁྲི་ཚོ་མང་པོ་བསྐྱེད་བསྲིང་བྱེད་དགོས་ན་སྔོན་འགྲོ་ནས་འཛིན་རིམ་བཅུ་གཉིས་བར་གྱི་གཞི་རིམ་སློབ་གསོའི་གནས་བབ་ལ་ཤུགས་སྣོན་ཚ་འདེད་བྱེད་དགོས་པ་ཡིན།

༼སྐལ་བཟང་དབང་འདུས་ནི་གོ་པལ་པུར་བོད་ཁྱིམ་གྱི་དགེ་ཆེ་ཟུར་པ་དང་ད་ཆ་ཨ་རིའི་ཀོ་ལོམ་བིཡ་སློབ་གྲ་ཆེན་མོའི་ནང་སློབ་གཞི་རྩ་འཛིན་དང་སྐད་གཉིས་སློབ་གསོའི་སྐོར་ལ་ཞིབ་འཇུག་སློབ་གཉེར་གནང་བཞིན་ཡོད།༽