ཨ་རིར་བོད་མིས་ངོ་རྒོལ་བྱས་འདུག

ཁ་སང་ཨ་རི་དང་ཁེ་ཎ་ཌའི་ས་གནས་ ༢༠ ནང་བོད་མི་དང་བོད་དོན་རྒྱབ་སྐྱོར་བ་ཚོས་རྒྱ་གཞུང་ལ་ངོ་རྒོལ་དང་རྒྱལ་སྤྱིའི་སྟེང་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུས་འདུག

ཁ་སང་ཕྱི་ཚེས་ ༨ ཉིན་བྱང་ཨ་རི་དང་ཁེ་ཎ་ཌའི་ས་གནས་ཁག་ ༢༠ ཙམ་གྱི་ནང་། བོད་མི་དང་བོད་དོན་རྒྱབ་སྐྱོར་བ་བརྒྱ་ཕྲག་མང་པོ་འདུ་འཛོམས་ཐོག བོད་ནང་འདས་གྲོངས་སུ་ཕྱིན་པའི་བོད་མི་ཚོར་གདུང་སེམས་མཉམ་སྐྱེད་མཚོན་ཆེད་མེར་མེ་ཁྲོམ་སྐོར་དང་མཆོད་འབུལ་སྨོན་ལམ། ཟས་བཅད་ངོ་རྒོལ། གློག་བརྙན་གཟིགས་འབུལ། ངོ་རྒོལ་སྐད་འབོད་སོགས་བྱས་ཏེ། རྒྱ་གཞུང་ལ་ངོ་རྒོལ་དང་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུས་འདུག ཉིན་དེར་ཨ་རིའི་གྲོས་ཚོགས་ཚོགས་གཙོ་ཟུར་བ་ལྕམ་ནན་སི་པི་ལོ་སི་མཆོག་དང་གྲོས་ཚོགས་འཐུས་མི་སྐུ་ཞབས་ཕེ་རེང་ཝུལ་ (Frank Wolf) རྣམ་གཉིས་ཀྱིས་བོད་མི་ཚོར་གདུང་སེམས་མཉམ་སྐྱེད་ཆེད་བསྒྲགས་ཡིག་ཅིག་སྤེལ་ཡོད་འདུག་ལ། དེ་བཞིན། ཉིན་དེར་ཨི་ཊཱ་ལིའི་གྲོས་ཚོགས་འོག་མའི་ (Chamber of Deputies) ནང་དུའང་བོད་དོན་རྒྱབ་སྐྱོར་གྱི་གྲོས་ཆོད་བཞག་སྟེ། རྒྱ་གཞུང་གིས་བོད་ནང་དྲག་གནོན་མཚམས་འཇོག་གིས་ཏཱ་ལའི་བླ་མའི་སྐུ་ཚབ་མཉམ་གྲོས་མོལ་གནང་དགོས་པའི་ནན་སྐུལ་ཞུས་འདུག

ཨ་རིའི་གྲོས་ཚོགས་འཐུས་མི་སྐུ་ཞབས་ཕེ་རེང་ཝུལ་ལགས་ཀྱི་གསལ་བསྒྲགས་དེའི་ནང་འཁོད་དོན། དེ་རིང་རྒྱལ་ས་ཝ་ཤིང་ཊོན་དང་འཛམ་གླིང་གྲོང་ཁྱེར་འདྲ་མིན་ནང་། བོད་མིའི་གྲོགས་པོ་ཚོས་དཀའ་སྡུག་མྱོང་བཞིན་པའི་བོད་ནང་བོད་མི་ཚོར་གདུང་སེམས་མཉམ་སྐྱེད་ཀྱི་ལས་འགུལ་སྤེལ་བར་ངས་རྒྱབ་སྐྱོར་ཞུ་རྒྱུ་ཡིན། ཁྱེད་ཚོས་རྒྱ་ནག་གཞུང་ཚབ་མདུན་དུ་ཞི་རྒོལ་བྱས་པ་དེ་ཤིན་ཏུ་འོས་འཚམ་ཞིག་རེད། རྒྱ་གཞུང་གིས་དྲག་གནོན་བྱས་པར་བརྟེན་བོད་ནང་བོད་མིའི་འགྲོ་བ་མིའི་ཐོབ་ཐང་ཐོག་དཀའ་ངལ་འཕྲད་བཞིན་ཡོད། དགེ་འདུན་པ་དང་བཙུན་མ་གཙོས་པའི་བོད་མི་ཚོས་སྔ་ལོ་ནས་རང་ལུས་མེར་བསྲེགས་གཏོང་བཞིན་པ་དེར། རང་དབང་ལྡན་པའི་རྒྱལ་ཁབ་ཁག་གི་མང་ཚོགས་ཀྱིས་སེམས་འཚབ་དང་འཇིགས་སྣང་བྱེད་ཀྱི་ཡོད། ཞི་བདེ་ལ་དགའ་བའི་བོད་མི་ཚོས་རྒྱ་ནག་གི་དྲག་གནོན་སྲིད་བྱུས་ལ་བཟོད་ཐབས་བྲལ་ཏེ། རང་ལུས་མེར་བསྲེགས་བཏང་བ་ཞིག་རེད། ང་རང་བོད་ནང་འགྲོ་མྱོང་ཡོད་པ་མ་ཟད། གྲྭ་བཞི་བཙོན་ཁང་དུ་བོད་རིགས་ཆབ་སྲིད་བཙོན་པ་གྲྭ་བཙུན་སོགས་ལ་ཐུག་འཕྲད་བྱས་མྱོང་ཡོད། ངས་ཐུག་འཕྲད་བྱས་བའི་ཆབ་སྲིད་བཙོན་པ་རྣམས་འཇིགས་སྣང་འོག་གནས་ཡོད་ཀྱང་། འགའ་ཤས་ཀྱིས་བཙོན་ཁང་དུ་གསང་བའི་ཐོག་ང་ལ་༧ཏཱ་ལའི་བླ་མ་མཆོག་གི་སྐུ་པར་སྟོན་གྱི་འདུག  ཉེ་ལམ་བོད་ནང་བོད་མི་མང་པོའི་ཚེ་སྲོག་ཤོར་བར་ང་རང་ཧ་ཅང་བློ་ཕམ་ཡོད། ཁོང་ཚོས་བཟོད་ཐབས་བྲལ་ཏེ་འཛམ་གླིང་མི་མང་ལ་རྒྱབ་སྐྱོར་གནང་རོགས་ཞེས་སྨྲེ་ངག་འདོན་བཞིན་པ་ང་རང་གིས་བསམ་ཤེས་ཐུབ་ཀྱི་འདུག  ཕྱི་རྒྱལ་གསར་འགོད་པ་ཁག་ཅིག་བོད་དུ་བསྐྱོད་སྐབས་རྒྱ་མིའི་ཉེན་རྟོག་པ་དང་དྲག་ཆས་དམག་མིས་བཀག་འགོག་བྱས་ཡོད་ལ། འདས་པའི་ལོ་གཅིག་ནང་རྒྱ་ནག་དམག་མིས་མེ་མདའ་བརྒྱབ་སྟེ། བོད་མི་ཞི་རྒོལ་བ་ ༡༡ རྐྱེན་ལམ་དུ་བཏང་ཡོད། ད་ཆ་འབྲེལ་ཡོད་ས་ཁུལ་ཁག་ཏུ་རྒྱ་མིའི་དམག་མི་ཁ་སྣོན་བྱེད་བཞིན་ཡོད་པ་མ་ཟད། ས་ཁུལ་དེ་དག་ཏུ་དྲ་རྒྱར་དམ་བསྒྲགས་དང་། འབྲེལ་ཡོད་བོད་རིགས་མགོ་ཁྲིད་ཁག་ལ་བརྟན་ལྷིང་སྲུང་སྐྱོབ་མ་བྱས་ཚེ། ལས་ཀ་ནས་གནས་དབྱུང་གཏོང་རྒྱུའི་སྡིགས་ར་སོགས་སྐུལ་བཞིན་ཡོད་ཅེས་འཁོད་འདུག