ཁ་སང་ཕྱི་དྲོ་བོད་ནང་གི་ཆུ་ཚོད་ ༦ ཙམ་རྔ་པ་རྫོང་རྭ་རུ་བའི་མདོ་ཤིས་སྐལ་རྒྱམ་ཚང་གི་མ་མའི་བཙུན་དགོན་གྱི་བཙུན་མ་བསྟན་འཛིན་ཆོས་སྒྲོན། རང་ལོ་ ༡༨ ། ཕ་མིང་ལ་བློ་པེ་དང་། མ་མིང་ལ་ཚེ་པོ་ཡིན་པ་ཁོང་མོས་བཙུན་དགོན་ཞོལ་གྱི་བསུ་མདོའི་ཟམ་ཁ་ནས་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་ཤིང་། སྐབས་ཐོག་དེར་གྲོངས་མེད་ནའང་། དེ་མ་ཐག་དམག་མི་དང་ཉེན་རྟོག་པ་སླེབས་ནས་འབར་ཁམས་སུ་ཐད་ཀར་ཁྱེར་ཡོད་འདུག
ཁོང་མོ་ཆུང་ཆུང་སྐབས་གཅའ་ཞང་ཐོག་ནས་ལོ་ ༣ ཙམ་རིང་སློབ་གྲྭར་སོང་ཞིང་། དེ་རྗེས་རྔ་སྟོད་མ་མའི་བཙུན་དགོན་དུ་བཙུན་མ་བྱས་འདུག ཁོང་མོར་ནང་མི་ ༡༢ ཡོད་པ་དང་། མིང་སྲིང་བཞི་ཡོད་པའི་ཆེ་ཤོས་ཁོང་མོ་ཡིན་འདུག རྒྱུན་ལྡན་སྨྲ་བ་ཉུང་ཞིང་དགོན་པའི་སྒྲིག་ལམ་ཚུལ་བཞིན་སྲུང་ནས་སློབ་སྦྱོང་ལ་དོ་སྣང་ཆེན་པོ་དང་སློབ་སྦྱོང་གི་གྲུབ་འབྲས་ཧ་ཅང་ཡག་པོ་ཡོད་མཁན་གྱི་དཔའ་འཛངས་གཉིས་ལྡན་གྱི་བུ་མོ་ཡ་རབ་ཞིག་ཡིན་འདུག
དེ་རྗེས་དམག་མི་དང་ཉེན་རྟོག་པས་མ་ མའི་བཙུན་དགོན་ཡོངས་སུ་བསྐོར་ནས་དམ་དྲག་ཆེན་པོ་བྱས་ཡོད་པས་བཙུན་དགོན་ནང་གི་གནས་ཚུལ་ཤེས་རྟོགས་མ་བྱུང་། མ་མའི་བཙུན་དགོན་ནི་བདེ་ཆེན་ཆོས་འཁོར་གླིང་ ནི་རྔ་པ་རྫོང་དང་བར་ཐག་སྤྱི་ལེ་གསུམ་ལྷག་གི་ས་ན་ཡོད་པའི་རྔ་པའི་བཙུན་དགོན་ ཆེ་ཤོས་དེ་ཡིན་ཞིང་། དེང་སྐབས་བཙུན་མ་ ༣༥༠ ལྷག་ཡོད། ལོ་སྔོན་མའི་ཕྱི་ཟླ་ ༡༠ ཚེས་ ༡༧ ཉིན་བཙུན་དགོན་འདིའི་བཙུན་མ་བསྟན་འཛིན་དབང་མོ་ལགས་ཀྱིས་རང་ལུས་མེར་སྲེག་གིས་ངོ་རྒོལ་སྐད་འབོད་གནང་ཞིང་། དེ་མ་ཐག་འདས་གྲོངས་སུ་གྱུར་ཡོད། ཕྱི་ལོ་ ༢༠༠༨ ལོར་བཙུན་དགོན་གྱི་བཙུན་རྣམས་ཀྱིས་ནང་པའི་ཆོས་དར་དང་༸གོང་ས་མཆོག་གི་སྐུ་པར་ བཟུང་ནས་རྔ་པའི་ཁྲོམ་ས་ཡོངས་ལ་ཞི་བའི་གོམས་བགྲོད་གནང་ཞིང་དེ་རྗེས་བཙུན་མ་མང་པོ་འཛིན་བཟུང་བཀག་ཉར་དང་། བཙུན་མ་ཁག་ཅིག་ལ་དུས་བཀག་བཙོན་འཇུག་གི་ཁྲིམས་ཐག་ཀྱང་བཅད་མྱོང་ཡོད།
གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
ད་ཡིན་ན་གུང་ཁྲན་དཔོན་ངན་ཚོའི་སྙིང་གས་དགོས་ཚོད་ཡིན། སྔར་༸གོང་ས་མཆོག་ནས་དངོས་ཡོད་ནས་ལན་རྒྱག་དགོས་བྱུང་ན་ངོ་ཚ་ཁ་སྐྱེངས་ཡོད་རྒྱུ་ཡོང་ངེས་རེད་ཅེས་ལོ་བཅུ་བཅོ་ལྔའི་སྔོན་ནས་གསུངས་པ་དེ་མ་འོངས་ལུང་བསྟན་མངོན་སུམ་དུ་གྱུར་སོང་བས་རྒྱ་ནག་དཔོན་ངན་ཚོར་ཁྱེད་ཚོར་རང་མདོག་འཛམ་གླིང་དུ་ཕྱི་གསལ་ནང་གསལ་དུ་བཏང་སོང་ངོ་། །སྙིང་སྟོབས་ཡོད་ཟེར་བ་བཙུན་མ་ཁོང་ལྟ་བུ་ལ་ཡིན་པས། སྙིང་ཉེ་བའི་བཙུན་མ་ཁྱོད་ལ་འཕགས་མཆོག་ཐུགས་རྗེ་ཆེན་པོ་དང་འོད་དཔག་མེད་རྣམ་གཉིས་ཀྱིས་རྗེས་སུ་བཟུང་བར་ཤོག །
གནས་ཚུལ་མཁོ་སྤྲོད་བྱེད་པ་པོ་ལགས་ ཁྱེད་ལ་སྐད་ཆ་ཞིག་འདྲི་རྒྱུ་ཞིག་ལ་ མ་མའི་བཙུན་དགོན་ནི་བདེ་ཆེན་ཆོས་འཁོར་གླིང་ ནི་ ཞེས་པ་ནི་དགོན་པ་གཅིག་ཡིན་ནམ་གཉིས་ཡིན།
ཨོ་ཡང་བརྗེད་སོང་པ་ཞིག་ལ་དགོན་པ་དེ་གཉིས་ཁ་ཁ་ཡིན་ན་གང་གང་དུ་ཡོད་མེད་ཁ་གསལ་ཞིག་གསུངས་རོགས་ཞུ།
བཙུན་མ་ཆུང་ཆུང་སྙིང་སྟོབས་ཆེན་པོ་ཅན།ཁྱེད་ཀྱི་རྣམ་ཤེས་བདེ་བར་སྨོན།ང་ཚའི་ནམ་ཡང་ཁྱེད་རང་རྣམས་ཀྱི་སྙིང་སྟོབས་དང་ལྷག་བསམ་བརྗེད་མི་སྲིད།
བསྟན་འཛིན་ཆོས་སྒྲོན་ལགས་དང་། བསོད་ནམས་རབ་ཡངས་ལགས་གཉིས་ཀྱིས་སྔ་ཕྱིར་དགོང་དྲོར་སྐུ་ལུས་མེར་བསྲེགས་གནང་ཚུལ་ལ་བལྟས་ན། དེང་སང་རྒྱ་ནག་གིས་ཉིན་དཀར་ཧ་ཅང་གིས་དམ་དྲག་བྱེད་བཞིན་ཡོད་པའི་རྟགས་རེད། དམ་དྲག་དེ་ལྟར་བྱེད་མིན་ལ་མ་ལྟོས་པར་འདི་ལྟར་སྐུ་ལུས་བོད་དོན་དུ་འབུལ་གྱིན་འདུག ད་བོད་པ་ཚང་གི་སྐྱེས་ཕོ་གཉིས་ཀ་སྙིང་སྟོབས་དང་། ལ་རྒྱ་ཅི་ཙམ་ཡོད་པ་འཛམ་གླིང་མི་མང་གིས་ཤེས་ན་ཆོག
བདུན་ཕྲག་འདིའི་ནང་དུ་སྡེ་དགེ་དང་དཀར་མཛེས་སུ་བོད་པ་ཚོས་རྒྱ་གཞུང་གི་ཁང་བརྩེགས་གཉིས་མེ་ལ་སྒྲོན་འདུག་པའི་གནས་ཚུལ་ཞིག་གོ་སོང་། བདེན་པ་ཡིན་མིན་གསལ་བོ་ཤེས་མཁན་ཡོད་དམ།
དྲ་བདག་ལགས།ངའི་མཆན་དེ་བསབས་དགོས་དོན་གང་ཡིན་ནམ།
གཉནལག་གོ ཡང་བྲིས་ནོར་ཤོར་སོང་ཟིག
༼བོད་ནང་ན་བལྟས་ནས་༽ཟེར་བ། བོད་ནང་ལ་བལྟས་ནས་་་་ལ་བཅོས་རོགས།
དགོངས་དག
རང་དབང་ལུང་པར་སྡོད་པའི་རང་རིགས་སྤུན་ཟླ་ཡོངས་དང་། ལྷག་པར་གཞིས་ལུས་བོད་རྒྱ་ཆེའི་མི་མང་གིས་རེ་བའི་ཞིང་ས་བཙན་བྱོལ་བོད་གཞུང་དང་ཆབ་སྲིད་ཀྱི་ཚོགས་པ་ཁག
བོད་ནང་ནས་རྒྱལ་ཁབ་དང་མི་རིགས་ཀྱི་ཆེད་བསྟུད་མུར་སྐུ་ལུས་མེར་བསྲེགས་དང་སྐུ་སྲོག་འབེན་དུ་བཙུགས་ནས་རྒྱ་དམར་ལ་ཞི་རྒོལ་འདི་འདྲ་གནང་བཞིན་པའི་སྐབས་འདིར། རང་དབང་ལུང་པར་སྡོད་པའི་གཞུང་མང་གཉིས་ངོས་ནས་ཉིན་གཅིག་དུས་གཅིག་ལ་སྤེལ་བའི་བསྔོ་སྨོན་མཆོད་འབུལ་ཙམ་གྱིས་འགན་འགྲུབ་སོང་པ་དང་ཁྲལ་འཇལ་ཟིན་པའི་བཟོ་དང་ཚོར་སྣང་གིས་བོད་ནང་ན་བལྟས་ནས་བཞུགས་མ་གནང་རོགས། སྐུ་མཁྱེན། ཐུགས་མཁྱེན། མ་མཐའ། ཉུང་མཐར་ཡང་ལོ་གཅིག་ཙམ་རིང་ལ་རང་དབང་ལུང་པ་སོ་སོ་ནས་མུ་མཐུད་དེ་རྒྱུན་མ་ཆད་པའི་སྒོ་ནས་ལས་འགུལ་སྣ་སྣང་སྤེལ་རོགས། ང་ཚོའི་དཀའ་ངལ་གྱི་གནས་སྟངས་འདི་རྒྱ་ནག་མི་མང་གཙོས་འཛམ་གླང་མི་མང་ཚང་མས་ཧ་གོ་ཡ་ཅིག་དང་དོ་སྣང་ཡོད་པ་ཅིག་གནང་རོགས།
ལས་འགུལ་སྤེལ་སྟངས་ཡང་བོད་པ་ཡོད་སའི་རང་དབང་ལུང་པ་ས་གནས་རྣམས་པང་སྒྲིགས་ནས་ལོ་གཅིག་གི་ཟླ་བ་བཅུ་གཉིས་དེ་བདུན་ཕྲག་དང་ཉི་མ་ཁག་བགོས་ཀྱིས་ལས་འགུལ་གོ་སྒྲིག་གནང་ན་མི་ཆོག་གམ། ཆབ་སྲིད་པ་དང་བསམ་བློ་བ་ཚོས་བསམ་ཚུལ་རེ་གསུང་དང་།
རྗེས་སུ་ཡིད་རང་དང་།
ད་ལོའོ་ལོ་གསར་སྐབས་ཟས་བཅད་ངོ་རྒོལ་བྱེད་མཁན་གང་མང་ཡོང་བའི་རེ་བ་ཞུ་།
ང་དང་མཉམ་དུ་འཆི་འདོད་པ་ཚོས་།
སྐུ་ལུས་མེར་བསྲེགས་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་འདོད་དོན་ཡིད་བཞིན་འགྲུབ་པ་དང་། མཛད་རྗེས་ལ་བསྔགས་བརྗོད་དང་རྗེས་སུ་ཡི་རང་ཞུ།
ཁོང་མོ་ཞེས་པའི་འབྲི་སྟངས་འདི་ག་དུས་ནས་དར་བ་རེད། ཕོ་མོ་ཁྱད་མེད་ཀྱིས་ཁོང་ཞེས་འཇུག་གི་ཡོད་པ་རེད། དེའི་སྒང་ལ་མོ་དང་ཕོ་གང་རུང་སྦྱར་དགོས་དོན་མེད་པ་རེད།
རྒྱལ་གཅེས་དཔའ་བོ་དཔའ་མོ་རྣམས་ཀྱི་རང་གི་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་ཀྱང་བློས་བཏང་བྱས་པ་དེ་ལ་གུས་པས་སྙིང་ཁོང་རུ་པའི་གཏིང་ནས་ཐུགས་རྗེ་ཆེ་ལན་བརྒྱར་ཞུ་རྒྱུ་ཡིན་། འོན་ཀྱང་ད་ནས་བཟུང་རང་སྲོག་དོར་བའི་ལས་འགུལ་གཅིག་ཀྱང་མ་གནང་རོག་གནང་། གང་ཡིན་ཞེ་ན་རྒྱ་ནག་པོའི་སྲིད་ཇུས་ལ་འགྱུར་བ་སྤུ་ཙམ་གཏང་གི་མི་འདུག་ལ། མཉམ་སྒྲེལ་རྒྱལ་ཚོགས་དབུས་པའི་རྒྱལ་སྤྱིའི་སྤྱི་ཚོགས་སུས་ཀྱང་རྒྱ་ནག་ལ་གནོན་ཤུགས་སྤྲོད་ཐུབ་ཀྱི་མི་འདུག དེ་དོན་རྒྱལ་གཅེས་པ་རྣམས་ཀྱི་ཐུགས་ལ་འཇག་པར་འཚལ། ཐུགས་རྗེ་གཟིགས།
རང་ལུས་མེ་སྲེག་གནང་བས་སྙིང་སྟོབས་དེ་ཧ་སང་ཡག་རེད་དེ། བྱ་ཐབས་དེ་ཡག་པོ་མི་འདུག་པའི་མཚམས་འཇོག་བྱས་ན་ཡག་ཀ ཐབས་ལམ་གཞན་གྱི་ཐོག་ནས་ལས་འགུལ་སྤེལ་ན་བཟང་བར་སེམས།
བྱེས་བསྡོད་སྤུན་ཟླ་ཚོ། གཞིས་ལུས་མི་མང་གི་སྐྱིད་སྡུག་མཉམ་མྱོང་དང་གཞིས་ལུས་མི་མང་གི་ཚབ་བྱེད་པར་འདོད་མོས་ཡོད་མཁན་དག་གིས་བདག་གི་ལས་འགུལ་སྤེལ་ཕྱོགས་ཀྱི་བསམ་ཚུལ་དང་འཐབ་རྩོད་ཀྱི་ལས་འཆར་ཞིག་ང་ཡི་ཟིན་བྲིས་སུ་བྲིས་ཡོད་པ་དེ་ལ་གཟིགས་ནས། འབྲེལ་ཐུག་བྱོས་དང་། ཉི་མ་དང་དུས་ཚོད་གཏན་འཁེལ་བ་དང་མཉམ་དུ་རང་གི་ནང་དུ་ལོག་འགྲོ
འདི་ཚོའི་སྙིང་སྟོབས་ཧ་ལས་པ་རེད། ང་འདི་འདྲའི་སྙིང་སྟོབས་ཤིག་ཡོད་ན་ཅི་རུང་སྙམ་བཞིན་ངུ་ཤུབ་ངང་ཕྱིར་ནང་དུ་ལོག་སོང་།
དྲ་གྲོགས་ཤིག་གིས་བཤད་པ་ལྟར་ན་ཁོ་མོ་ད་སྐུ་གྲོངས་ཟིན་འདུག་ཟེར།
བཙུམ་མའི་སྙིང་སྟོབས་ལ་བསྔགས་བརྗོད་དང་ཡི་རང་གུས་འདུད་བཅས་ཡོད།
གཞན་དོན་མེར་བསྲེགས།
12-02-2012
རང་ལུས་རིན་ཆེན་རྩུབ་པའི་མེ་ལྕེར་སྦྱོར། །
ལ་རྒྱའི་སྙིང་སྟོབས་མེ་སྟག་ནམ་འཕངས་འཕྱོ། །
ཀ་དག་དྲི་མེད་འོད་མདངས་མུན་གཉིད་བཀྲོལ། །
གཞན་འཚེ་མེད་པས་རང་ལུས་མེའི་མཆོད་འབུལ། །
དལ་འབྱོར་མི་ལུས་རིན་ཆེན་གཞན་དོན་བསྙེགས། །
རང་གཞན་གཅེས་པའི་སྲོག་དེ་མེ་ཡིས་བསྲེགས། །
བཟོད་མེད་ཚ་ཟུག་ངུ་དངགས་ཡོངས་སྤང་ནས། །
ཆོལ་གསུམ་རང་དབང་བདེའི་དོན་མཁའ་དབྱིངས་བསྒྲགས། །
ས་ཡ་དྲུག་གིས་བདེའི་དོན་རང་ལུས་བསྲེགས། །
ཆོལ་གསུམ་བོད་ལ་འགྲོ་འདུག་རང་དབང་མེད། །
དམར་པོའི་ཁྱི་སྤྱང་བཙན་གནོན་ཇི་བྱས་ཀྱང་། །
མདའ་མཚོན་མེད་པའི་རང་ལུས་མེ་ལ་མཆོད། །
རང་གཞན་ཀུན་ལ་བདེ་འདོད་ཚོར་སྣང་གཅིག །
ཚ་གཟེར་སྡུག་བསྔལ་མི་འདོད་མ་ལུས་པ། །
རང་སྒེར་དོན་བསྙེགས་དམར་པོའི་རིང་ལུགས་ཀྱིས། །
ཉམས་ཆུང་བོད་ཕྲུག་འགའ་ནི་མེ་ལ་བསྲེགས། །
མི་རིགས་སྐད་ཡིག་བཀོལ་བསྐྱོད་རང་དབང་མེད། །
རང་ས་རང་གིས་འཛིན་པའི་ཐོབ་ཐང་མེད། །
རང་ཆོས་རང་གིས་བསྒྲུབ་པའི་བདག་འཛིན་མེད། །
མེད་པ་དེས་གསུམ་བོད་འབངས་གཉའ་གནོན་ཡོད། །
རང་ལུས་མེས་ལྕེ་མཁའ་དབྱིངས་འཕྱོ་ཐེངས་རེར། །
ཕྱིས་བཞུགས་བོད་ཕྲུག་སྙིང་རྨ་གས་ལ་ཁད། །
མེ་ཡིས་གྲངས་འཕྲེང་བ་གམ་བརྩེགས་ཐེངས་རེར། །
གདོང་དམར་སྟོང་བའི་སྡུག་བསྔལ་མིག་ཆུ་གཞོལ། །
གཞིས་ལུས་དོན་གྱི་བདག་པོ་མིང་སྲིང་རྣམས། །
རང་ལུས་མཆོད་མེའི་ལམ་དུ་མ་སྦྱོར་བར། །
གདོད་མའི་ཕ་ཆོས་མི་རིགས་སྐད་ཡིག་སྲུང་། །
ང་ཚོའི་སྐད་ཡིག་དང་ནི་མི་རིགས་དགོས། །
བྱེས་བྱོལ་ལ་བ་གངས་ཅན་གདོང་དམར་ཚོ། །
འདྲེན་ཟུང་ཞལ་ཁ་མཁའ་དབྱིངས་ཡོངས་ཕྱེ་ནས། །
གཞིས་ལུས་བོད་ཀྱི་བདེ་སྡུག་མིག་ཟུང་གཟིགས། །
མཐོ་པོའི་ཁྲི་ལ་གཟི་བརྗིད་ངོམ་རན་མེད། །
བྱེས་གཞུང་གཞིས་ལུས་བོད་ཀྱིས་མིག་ཅེར་ཡོད། །
བྱེས་གཞུང་ལས་དཔོན་གཞིས་ལུས་སྙིང་རེས་བཅོལ། །
བྱེས་གཞུང་ཁྲིམས་ལུགས་གཞིས་ལུས་མ་འགལ་བརྩོན། །
བྱེས་གཞུང་ལས་དཔོན་དེ་གསུམ་མ་བརྗེད་དགོས། །
རང་གི་ལུས་སྲོག་གཅིག་པུ་དེ། སྤྱི་དོན་དུ་འབུལ་བ་ལས། བོད་མི་ལུས་སྲོག་གཞན་གྱི་རྒྱུད་ལ། ཞི་བའི་ལས་འགུལ་གཞི་རྒྱ་ཆེ་ལ། གཏིརང་རིང་བ། རྒྱུན་རིང་བའི་ལས་འགུལ་དེ་འདྲ་བརྩམས་ནས། བཙོན་དུ་ཕེབས་ན་མི་ལེགས་སམ། ད་ང་ལ་ཡང་ཤོད་པའི་ཚིག་ཀྱང་རྫོགས་ནས། དེ་ལས་ལྷག་མི་འདུག་གོ །བོད་རྒྱལ་ལོ། །བདེན་པ་རྒྱལ་ལོ། བདེན་པ་ཉིད་རྒྱལ་ལོ། །