རྒྱ་ནག་གཞུང་གིས་ཁམས་དཀར་མཛེས་རྫོང་དུ་ངོ་རྒོལ་སྐད་འབོད་བྱེད་མཁན་བོད་མི་ཞིག་དང་གཞན་བོད་མི་ཚོང་པ་གཅིག་བཅས་འཛིན་བཟུང་བཙན་འཁྲིད་བྱས་འདུག
ཨེ་ཤ་ཡ་རང་དབང་རླུང་འཕྲིན་ཁང་ལ་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༡༡ ཉིན་གྱི་བོད་ནང་གི་ཞོགས་པའི་ཆུ་ཚོད་ ༡༡ ཡས་མས་སུ་ཁམས་དཀར་མཛེས་རྫོང་གི་ཁྲོམ་གཞུང་དུ་རང་ལོ་ ༢༡ ཡིན་པའི་བོད་མི་བཀྲ་ཤིས་དཔལ་ལྡན་ཞུ་བ་ཞིག་གིས། “ ༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག བོད་རང་བཙན་གཙང་མ་ཡིན། ”ཞེས་སྐར་མ་ཁ་ཤས་རིང་སྐད་འབོད་ཁྲོམ་སྐོར་བྱེད་སྐབས། ཉེ་འཁོར་དུ་ཡོད་པའི་དམག་མིས་གློག་རྒྱུགས་དང་མེ་མདའ་སོགས་ལག་ཆ་འདྲ་མིན་བེད་སྤྱོད་ཀྱིས་གཅར་རྡུང་དྲག་པོ་བཏང་རྗེས་བཙན་འཁྲིད་བྱས་ཡོད་པ་མ་ཟད། སྐབས་དེར་ཉེན་རྟོག་པས་བཀྲ་ཤིས་དཔལ་ལྡན་ལ་གཅར་རྡུང་བྱེད་ཀྱིན་པར་ལྟ་བཞིན་པའི་བོད་མི་ཚོང་པ་ཞིག་གི་སྐེ་རུ་ཡོད་པའི་བྱུ་རུ་དང་ལག་གི་ཕྲེང་བ་སོགས་འཕྲོག་པ་དང་། གཅར་རྡུང་བཏང་སྟེ་དྲན་པ་འཐོར་རྗེས་བཙན་འཁྲིད་བྱས་ཡོད་འདུག
ཐེངས་འདིའི་གནས་ཚུལ་འདི་མ་བྱུང་བའི་ཡར་སྔོན་དུ་ཁམས་དཀར་མཛེས་རྫོང་གི་ས་གནས་གང་སར་བོད་རང་བཙན་དང་འབྲེལ་བའི་སྦྱར་ཡིག་མང་པོ་བཀྲམས་ཡོད་པ་མ་ཟད། གངས་ལྗོངས་བོད་མི་གསུམ་གྱིས་བོད་བསྟན་སྲིད་དང་རང་དབང་ཆེད་རང་ལུས་མེར་བསྲེག་གཏོང་རྒྱུ་ཡིན་ཞེས་འཁོད་ཡོད་པའི་སྦྱར་ཡིག་ཆེན་པོ་ཞིག་ཉེན་རྟོག་ཁང་གི་སྒོ་འགྲམ་སོགས་སུ་སྦྱར་བའི་གནས་ཚུལ་བྱུང་ཡོད་སྟབས། རྒྱ་ནག་གཞུང་གིས་ཁམས་དཀར་མཛེས་ཁུལ་དུ་དམག་མི་སྟོང་ཕྲག་མང་པོ་འགྲེམས་འཇོག་གིས་སྔར་ལས་ལྷག་པའི་དམ་དྲག་ཁྲོད་གནས་ཡོད་འདུག
བཀྲ་ཤིས་དཔལ་ལྡན་ལགས་ནི། དཀར་མཛེས་བོད་རིགས་རང་སྐྱོང་ཁུལ་དཀར་མཛེས་རྫོང་ཁོག་རྩེ་ཞང་ཨ་རུ་ར་གྲོང་ཚོ་ནས་ཡིན་པ་དང་། ཁོང་གི་ཕ་མིང་ལ་བསྟན་པ་ཉི་མ་དང་མ་མིང་ལ་ཚེ་རིང་གཡང་མཚོ་འབོད་ཀྱི་ཡོད་འདུག ཉེ་ལམ་ཁོང་འཛིན་བཟུང་བྱས་རྗེས་ནང་མི་གཉེན་འབྲེལ་ཚོས་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
བཙན་བྱོལ་ནང་གི་གྲྭ་བ་ལོ་གཞོན་ཚོས་དེང་དུས་ཀྱི་ཤེས་བྱ་དག་ལ་དོ་སྣང་འདྲེན་ཐབས་སུ་དགོན་པའི་ལས་ཀྱི་སྣེ་མོ་བ་ཚོས། དེ་ཕྱོགས་ལ་ཤུགས་གནོན་མི་དམན་ཙམ་བྱ་དགོས་པ་གལ་ཆེན་དུ་སྣང་བ་ཙམ་དུ་མ་ཟད། དེ་སང་བཙན་བྱོལ་ནང་གི་དགོན་པ་མང་དག་ཤིག་གི་ནང་གྲྭ་བ་ལོ་གཞོན་ཚོས་བོད་སྐད་མི་ཤོད་པར། བལ་སྐད་དང་ཧིན་སྐད་ར་མ་ལུག་གི་སྐད་ཆ་ཤོད་སྟངས་དར་ཁྱབ་ཆེན་པོ་འགྲོ་བཞིན་ཡོད་པ་དག་ལའང་། ལུགས་མཐུན་གྱི་བཅོས་འགྱུར་དགོས་པ་དེ་ཡང་། ལས་ཀྱི་སྣེ་མོ་བ་ཚོས་བསམ་གཞིག་བྱ་དགོས་པ་ཞིག་ཏུ་མཐོང་།
མདོ་སྟོད་སྨད་ནས་དཔའ་བོ་གྲངས་མེད་བྱོན་ཙང་། རྗེས་སུ་ཡི་རང་ཞུ་མ་ཚར་བའི་དུས་ལ་སླེབ་འདུག བདག་གིས་དཔའ་བོ་ཁྱེད་ཚོའི་རྗེས་སུ་སྙེག་ཐུབ་ཀྱི་མི་འདུག་པས། དཔའ་བོ་རྣམས་ལ་དགོངས་དག་ཞུ་རྒྱུ་ཡིན། ཡིན་ནའང་། ཁྱེད་རྣམས་ངས་དུས་ནམ་ཡང་བརྗེད་སྲིད་ཀྱི་མ་རེད། དཔའ་བོ་ཁྱེད་ཅག་ལ་གུས་འདུད་ཞུའོ།།
བཙན་བྱོལ་ནང་གི་གྲྭ་བ་ཚོར་དམིགས་བསལ་གྱིས་དེང་རབས་དྲ་རྒྱའི་སློབ་སྦྱོང་སྤྲད་མེད། ཡིན་ནའང་ཁོང་ཚོས་རང་འགུལ་གྱིས་སྦྱང་བ་གནང་སྟེ་ད་ཆ་གང་ཅིའི་ཐད་ཡར་རྒྱས་སུ་སོང་ཡོད་པ་དང་། དེ་རིང་ཁ་སང་བོད་ནང་གི་གནས་ཚུལ་ཀྱང་མང་ཆེ་བ་གྲྭ་བས་ལེན་གྱི་ཡོད། འདི་ལས་གྲྭ་བ་ཚོར་ངེས་པར་དུ་དེང་རབས་ཀྱི་སློབ་གསོ་སྤྲོད་དགོས་ཀྱི་ཡོད་པ་དང་། གྲྭ་བ་ཚོས་ཀྱང་ངེས་པར་དུ་གང་ཅིའི་ཐད་འགན་ཆེ་ཙམ་ལེན་དགོས།