སེ་ཌི་ནེ་ནས་བཀྲ་ཤིས་རྒྱ་མཚོས།
ཕྱི་ལོ་ ༡༩༤༩ ལོ་ནས་མགོ་བཙུགས་ནས་ཕྱི་ལོ་ ༡༩༥༩ བར་ལོ་ངོ་བཅུའི་རིང་ལ་རྒྱ་གཞུང་གིས་མངོན་ལྐོག་ནས་བོད་ས་ཡོངས་རྫོགས་བཙན་འཛུལ་བྱས་བ་རེད། ལོ་ངོ་དེ་དག་གི་རིང་ལ་བོད་ནང་ཆོས་ལུགས་ཁག་གི་བླ་ཆེན་དང་ཆོས་བ། མི་ཆེན་དཔོན་ཆེན་ནས་མཐའ་མའི་སྤྲང་བོ་བར་ལ་ཆེས་བློ་ཡུལ་ལ་མི་ཤོངས་བའི་མནར་གཅོད་དང་བཙོན་འཇུག་ཁྲིམས་གཅོད་བཏང་ནས་མཐར་ཕྱི་ལོ་ ༡༩༥༩ ལོར་བོད་ས་ཡོངས་རྫོགས་བཟུང་བ་རེད། དེའི་རྗེས་སུ་རིག་གནས་གསར་བརྗེ་ཟེར་བའི་སྙིང་རྗེ་མེད་པའི་གཏུམ་དྲག་སྲིད་ཇུས་ཤིག་སླེབས་ནས་བོད་ཀྱི་དགོན་པ་གྲྭ་ཚང་ཁག་གཙོས་བོད་ཀྱི་རིག་གནས་རྣམས་རྩ་མེད་དུ་བཟོ་མགོ་བརྩམས། དེ་ལྟར་ལོ་དང་ཟླ་བར་སྦྲེལ་ཏེ་བོད་ཁམས་ཡོངས་ལ་གཏོར་བཅོམ་འཕྲོག་གསུམ་བྱས་བས་བོད་མི་རྣམས་ཀྱི་སེམས་ལ་ཆེས་བརྗེད་དུ་མི་རུང་བའི་རྨ་ཁ་དང་ན་ཟུག་ཆེན་པོ་ཞིག་བཞག་ཡོད། འདི་ནི་རྒྱ་ནག་གིས་བོད་ཁམས་ཡོངས་སུ་བཙན་འཛུལ་བྱས་བའི་དུས་རིམ་རེད།
དེར་བརྟེན་ཕྱི་ ༡༩༥༩ ལོར་༧གོང་ས་མཆོག་དང་བཀའ་ཤགས་སྲིད་གཞུང་རྒྱ་གར་ལ་བཙན་བྱོལ་ཏུ་ཕེབས་དགོས་བྱུང་བ་རེད། ༡༩༨༩ ལོ་ནས་ ༢༠༡༡ བར་བོད་ས་ཡོངས་ནས་བསྟུད་མུར་བོད་མི་རིགས་ཀྱིས་རང་ཉིད་ལ་ཐོབ་འོས་བའི་རྒྱལ་ཁབ་དང་འགྲོ་བ་མིའི་རིགས་ཀྱི་ཐོབ་ཐང་དེ་རྩོད་ལེན་བྱེད་མགོ་རྩམས་ནས་རྒྱ་གཞུང་ལ་ངོ་རྒོལ་གྱི་ལས་འགུལ་རྒྱུན་མ་ཆད་པར་སྤེལ། དུས་སྐབས་དེའི་ནང་༧གོང་ས་མཆོག་གིོ་སྐུ་ཚབ་ཚོ་ཡང་ཐེངས་གང་མང་པེ་ཅིན་ལ་ཕེབས་པ་རེད། འོན་ཀྱང་འབྲས་བུ་བཟང་བོ་ཞིག་མ་ཐོན་པ་རེད། བོད་མི་དམངས་ཀྱི་ངོས་ནས་མུ་མཐུད་དུ་རྒྱ་ནག་གཞུང་ལ་ངོ་རྒོལ་སྐད་འབོད་བོད་ས་ཡོངས་ནས་བྱས་བ་རེད། རྒྱ་ནག་གཞུང་ཕྱོགས་ནས་ད་དུང་མིག་ཡ་གཅིག་ལོང་བ་དང་རྣ་ཡ་གཅིག་འོན་པའི་ཚུལ་གྱིས་ཏྰ་ལའི་རུ་ཚོགས་ཀྱི་ངན་འབྲེལ་ལ་རྡུང་རྡེག་ཚ་ནན་བྱེད་དགོས་བའི་བཙན་བཀའ་རེ་ཕབ་སྟེ་ད་བར་དུས་ཚོད་བསྐྱལ་ཐབས་བྱས་པ་རེད། ད་དུང་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ནང་ཁུལ་གྱི་སྲིད་ཇུས་ལ་ཐེ་གཏོགས་བྱས་ཚེ་རྒྱལ་ཁབ་ཕན་ཚུན་བར་གྱི་ཚོང་འབྲེལ་ལ་དོ་ཕོག་ཡོངས་བར་བསྙད་ཏེ་རྒྱལ་སྤྱིའི་སྤྱི་ཚོགས་ཀྱི་ཁ་འགོག་གང་ཐུབ་བྱས། འདི་ནི་དུས་རབས་ཉེར་གཅིག་པའི་རྒྱ་ནག་གི་སྲིད་ཇུས་འཛིན་སྟངས་རེད།
ཕྱི་ ༢༠༡༡ ནས་མདོ་སྟོད་སྨད་གཉིས་ཀྱི་བོད་མི་རྣམས་འུ་ཐུག་ཐབས་ཟད་ཀྱི་ངོ་བོ་མཚོན་བྱེད་རང་ལུས་སྒྲོན་མེར་སྦར་ནས་རྒྱ་ནག་གཞུང་ལ་ངོ་རྒོལ་ཀྱི་ལས་འགུལ་རྒྱུན་མ་ཆད་པ་རེད། འདས་སོང་གི་དཔའ་བོ་དཔའ་མོ་རྣམས་ཀྱི་སོ་སོའི་མཛའ་བཤེས་གཉེན་ཉེ་དང་འཇིག་རྟེན་འདིའི་སྟེང་གི་འདོད་ཡོན་ལོངས་སྤྱོད་ཡོངས་རྫོགས་བློས་བཏང་ཏེ་བོད་རྒྱལ་ཁབ་དང་མི་རིགས་ཀྱི་མ་འོངས་བའི་བདེ་སྐྱིད་ཆེད་དུ་རང་ལུས་རང་སྲོག་སྒྲོན་མེར་ཕུལ་བ་འདི་ཆེས་གཟི་བརྗིད་ཞིག་ཏུ་བགྲང་ཆོག བོད་ཀྱི་ལོ་རྒྱུས་ཐོག་བོད་ལ་དཔའ་རྟུལ་གྲངས་ལས་འདས་བ་བྱུང་ཡོད་ལ་དུས་ད་ལྟ་ཡང་རྒྱ་ནག་གི་གདུག་རྩུབ་འོག་བོད་མི་རིགས་ཀྱི་དཔའ་སྟོབས་ལ་ཞུམ་པ་ནམ་ཡང་མེད། བོད་མི་རིགས་འདིའི་རྒན་གཞོན་ལ་དབྱེ་བ་མེད་པར་གཅིག་རྗེས་གཉིས་མཐུད་ཀྱིས་དགྲ་ཕྱོགས་སུ་མཚོན་ཆ་མི་གཏོད་པར་རང་རྒྱུད་ལ་ཡོད་པའི་བྱམས་སྙིང་རྗེ་ཁོ་ན་སྤྱད་དེ་བདེན་དོན་དང་གནས་ལུགས་བཤད་ས་མེད་པའི་རྒྱ་གཞུང་གི་ལས་ཁུངས་དག་གི་སྒོ་འགྲམ་ནས་རང་སྲོག་བདེན་པའི་དཔང་བོར་བཙུགས་ནས་གཅེས་སྲོག་གཅིག་རྗེས་གཉིས་མཐུད་དུ་གཏོང་གི་ཡོད། དི་ནི་ང་ཚོའི་དཔའ་བོ་དཔའ་མོ་རྣམས་ཀྱི་རང་རང་གི་ལྟོ་གོས་གཏམ་གསུམ་ཆེད་མ་ཡིན་པར་མ་འོངས་བོད་ཀྱི་རྒྱལ་ཁབ་དང་མི་རིགས་ཀྱི་ཆེད་དུ་ཕུལ་བའི་ཆེས་རིན་བྲལ་གྱི་ལེགས་སྐྱེས་རེད།
བོད་པའི་ལོ་རྒྱུས་སྟེང་བོད་ཀྱི་ཆོས་སྲིད་འདི་དར་རྒུད་གང་མང་ཞིག་བརྒྱུད་ནས་ཡོང་ཡོད་ལ་སྐབས་དེར་བོད་ཀྱི་ནང་ཆོས་སུ་བསྟན་པའི་མེ་རོ་མདོ་ཁམས་སྨད་ནས་སོས་ཞེས་བསྟན་པ་ཕྱི་དར་ཟེར་བ་ཞིག་བྱུང་ཡོད་པ་ལྟར། ལོ་ངོ་གཉིས་ཀྱི་ཡར་སྔོན་ནས་བཟུང་བོད་ཀྱི་ཆབ་སྲིད་ཀྱི་བསྟན་པའི་མེ་རོ་འདི་ཡང་མདོ་ཁམས་སྨད་ནས་སོས་བཞིན་འདུག་ཅེས་བཤད་ན་མི་ཆོག་པ་མེད། འགའ་ཤས་ཀྱིས་མདོ་ཁམས་ཀྱི་མི་ལ་གླེན་རྟགས་ཆེ་ཟེར་ཡང་དེ་ནི་ཕྱོགས་ཞེན་གྱི་འཆལ་གཏམ་ཁོ་ནར་ངོས་འཛིན་བྱེད་ཆོག གང་ལྟར་ལོ་ངོ་འདི་དག་གི་རིང་ལ་མདོ་ཁམས་སྨད་ནས་ཆབ་སྲིད་ཀྱི་མེ་ལྕེ་མཁའ་རུ་མཆེད་ནས་ད་དུང་ཡང་འབར་བཞིན་འདུག འདི་ནི་མདོ་ཁམས་ཀྱི་དཔའ་རྒོད་དག་གིས་བོད་ཁམས་ཡོངས་ལ་བཞག་པའི་མཛད་རྗེས་བླ་མེད་དེ་རེད། །
ཐབས་ལམ་སོགས་གང་ཡང་མེད་པའི་སྡུས་བསྔལ་བརྗོད་པའི་ཡིག་ལ་རྒྱབ་སྐྱོར་གྱི་ཚུལ་དུ་བདེན་པ་ཉིད་རྒྱལ་གྱུར་ཅིག་ཟེར་བ་མ་གཏོགས་ཅི་ཡང་མི་འདུག
མདོ་ཁམས་ཡུལ་གྱི་དཔའ་རྒོལ་རྣམས་རྒྱ་ནག་གིས་གནང་བའི་ལྟོ་གོས་གཏམ་གསུམ་ལ་མགོ་འཁོར་མེད་ལ་རང་གི་རྒྱལ་ཁབ་དང་མི་རིགས་ཡང་བརྗེད་མི་འདུག་ཟེར་བ་ཡིན།
ད་དུང་ཞུ་རྒྱུ་ཞིག་ལ་མིང་རྫུན་འོག་ནས་ཁྱི་ལབ་རྒྱག་མཁན་དག་ཡང་རྒྱ་ནག་གི་རྒྱུགས་ཁྱི་ངོ་མ་དེ་ཡིན་ཚོད་རེད།
བོད་ནང་ནས་རང་སྲོག་བློས་གཏོང་གིས་བོད་སྤྱི་པའི་ལ་རྒྱ་སྙིང་བཅངས་གིས་ལས་འགུལ་མུ་མཐུད་སྤེལ་སྐབས་བཙན་བྱོལ་བ་རྣམས་ཀྱིས་ཕྱོགས་ཞེན་གྱི་རྩོམ་རིགས་འདྲ་མིན་སྤེལ་ནས་བོད་མི་ནང་ཁུལ་ལ་ཕར་འཐེན་ཚུར་འཐེན་དང་རང་བསྟོད་གཞན་སྨད་ཁོ་ནས་དུས་འདའ་བཞིན་འདུག ཨ་ཁ། བྱེད་སྟངས་འདི་ལ་བལྟས་ན་བོད་མི་རྣམས་ད་དུང་རྒྱའི་འོག་དང་བཙན་བྱོལ་དུ་ད་དུང་ལོ་མང་སྡོད་ཁོ་ཐག་རེད་འདུག ཆིག་སྒྲིལ་ཟེར་བ་འདི་རྩོམ་རིགས་དང་མི་མང་གཏམ་བཤད་དང་གཞས་ཚིག་ནང་ཁོ་ན་མ་ཡིན་པར་ཁ་ཞེ་གཉིས་མེད་ཅིག་དགོས་ཀྱི་འདུག
དེ་རིང་བྲེལ་བའི་དབང་གིས་ཡག་པོ་ཞིག་ཀློག་ཚར་མ་སོང་། རྗེས་ལ་བཀླག་རྒྱུ་ཡིན།
ཚང་མའི་སེམས་ཀྱི་ན་ཟུག་གང་སར་འཕྱོ་ཐུབ་ན་ཧ་ཅང་བཟང་གི ལྷག་པར་སྐད་གཉིས་སྨྲ་བ་ཚོས་ཆབ་སྲིད་ཀྱི་དཀའ་གནད་རྒྱ་ནག་གཙོས་ཕྱི་རྒྱལ་གྱི་རྩོམ་པ་པོ་དང་མཁས་དབང་དག་གིས་བྲིས་པ་བོད་ཡིག་ཏུ་བསྒྱུར་རྒྱུ་གལ་ཆེའོ།།
རེད་རེད། ཁ་བརྡ་བསྡུས་བ་ཞིག་བྲིས་འདུག དེ་ལས་ཀྱང་མཐའ་མའི་ཐིག་ཕྲེང་དེ་མཐོང་དུས་ཅིག་མ་བཤད་རང་བཤད་ཆགས་སོང་། བོད་ཀྱི་བླ་དང་རྣམ་ཤེས་ཁ་སྟབས་དང་བཅས་པ་དབུས་ཕྱོགས་ནས་བསྐྱལ་སར་བསྐྱལ་ཚར་ཡོད། དེ་གླེང་ནས་ཕན་གྱི་མ་རེད། ལོ་རྒྱུས་དེབ་ཐེར་གྱི་སྐད་རེད་མོད། མདོ་ཁམས་ཡུལ་ནས་ཆབ་སྲིད་མེ་རོ་གསོ་སྟངས་འདིར་ཉི་མ་ལྷ་སའི་ཕྱོགས་ནས་ཐུགས་དང་སྤྱན་གྱིས་ཚོར་གྱི་ཡོད་ཚོད་མི་གདའ་ལ། གཅིག་བྱས་ན་སྲོང་བཙན་ངའི་རུས་པ་ཉམས་སོང་ནས། མགོ་བདེ་དྲན་འཁྲུལ་གྱི་རྦ་རླབས་འཁྲུག་དྲག་ནས་ཀྱང་མིན་འགྲོ་བསམས་ཀྱང་། མགོ་རུལ་རྣ་བས་མ་ཚོར་ན་གཏན་ནས་འགྲིག་ཐབས་ཤིག་ག་ལ་ཡོད།