རྒྱ་ནག་གཞུང་གིས་ན་གཞོན་རྩོམ་པ་པོ་ཚེ་རིང་ནོར་བུ་ལགས་ལ་ལོ་གཉིས་ཀྱི་ཁྲིམས་ཐག་བཅད་དེ་ལྷ་སའི་ཆུ་ཤུལ་བཙོན་ཁང་དུ་བཙོན་འཇུག་བྱས་འདུག
ཟླ་འདིའི་ཕྱི་ཚེས་ ༡༢ ཉིན་རྒྱ་ནག་གཞུང་གིས་ལྷ་ས་གྲོང་ཁྱེར་གྱི་ཁྲིམས་ཁང་ཞིག་ཏུ། བོད་ཀྱི་ན་གཞོན་རྩོམ་པ་པོ་ཚེ་རིང་ནོར་བུ་ལགས་སུ་ཆབ་སྲིད་དང་འབྲེལ་བའི་རྩོམ་ཡིག་སྤེལ་བའི་ཉེས་མིང་འོག དུས་ཡུན་ལོ་ ༢ ཀྱི་ཁྲིམས་ཐག་བཅད་དེ་ཆུ་ཤུལ་བཙོན་ཁང་དུ་བཙོན་འཇུག་བྱས་འདུག རང་ལོ་ ༢༨ ཡིན་པའི་ཚེ་རིང་ནོར་བུ་ལགས་ནི། ཁམས་སྡེ་དགེ་དཔལ་ཡུལ་རྫོང་ར་ཆབ་ཤང་དུ་ཕ་ཚེ་འདས་རིག་འཛིན་གྱི་ཁྱིམ་དུ་སྐྱེས་ཡོད་ཅིང་། ཆུང་དུས་དཔལ་ཡུལ་རྫོང་ར་ཆབ་ཤང་ར་ཆབ་དགོན་པའི་ཆོས་སྒོར་ཞུགས་ཏེ་སློབ་གཉེར་གནང་བ་དང་། ཞོར་དུ་རྩོམ་ཡིག་འབྲི་སྦྱོང་ལ་དོ་སྣང་བྱས་ཏེ་བོད་ནང་གི་དྲ་རྒྱ་དང་དུས་དེབ་སོགས་སུ་རྩོམ་ཡིག་མང་པོ་སྤེལ་མཁན་ཞིག་ཡིན་འདུག་ལ། ༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས་ཁོང་གིས། ༼ ཁྱོད་ལ་གདུག་རྩུབ་དང་དྲག་གནོན་ཡོད་ན་ང་ལ་བྱམས་བརྩེའི་བདེན་པ་ཡོད ༽ རྩོམ་དེབ་ཅིག་དཔར་བསྐྲུན་བྱས་ཏེ། སྡེ་དགེ་དཔལ་ཡུལ་གཙོས་པའི་ས་གནས་ཁག་མང་པོའི་ནང་འགྲེམས་སྤེལ་དང་། རྗེས་སུ་ལྷ་སར་དོན་གཉེར་ཅན་གྱི་བོད་མི་ཚོར་བཀྲམས་སྐབས། ལྷ་སའི་སྤྱི་བདེ་ཉེན་རྟོག་ཚན་པས་ཤེས་རྟོགས་བྱུང་སྟེ་འཛིན་བཟུང་བཙོན་འཇུག་བྱས་ཡོད་པ་དང་། ཉེ་ལམ་ཁོང་ལ་དུས་བཀག་བཙོན་འཇུག་གི་ཁྲིམས་ཐག་བཅད་འདུག
གསར་འགོད་པ། དོན་གོ
