བསྟན་འཛིན་ཟླ་བ།
འགྲོ་བ་གཞན་དང་སེམས་ཅན་གཞན། ཡང་ན་རྒྱལ་ཁབ་དང་མི་རིགས་ཀྱི་ཆེད་དུ། བསྟན་པ་ཆབ་སྲིད་ཀྱི་དོན་དུ། བྱང་ཆུབ་སེམས་དཔའི་མཛད་པ་རླབས་ཆེ་ཤོས་ཤིག་དང་། འཚེ་མེད་ཞི་བའི་ལག་ལེན་ཚད་མཐོ་ཤོས་ཤིག་སྟེ། ཐུ་བྷོད་བཙན་པོའི་སྙིང་སྟོབས་ཀྱི་དྲོད་མ་ཉམས་ཤིང་། སྙིང་རྗེ་རྩ་བ་ཅན་གྱི་བསྟན་པའི་རྩི་མ་ཡལ་བའི་བོད་པ་མེ་ཡིས་རྒོལ་མཁན་འདི་ཚོ། ཕྱི་ལོ་ ༡༩༩༨ ནས་ད་བར་བོད་ཕྱི་ནང་གཉིས་སུ་མེ་ཡིས་རྒོལ་མཁན་ཉི་ཤུ་རྩ་གྲངས་ཤིག་གིས་རྒྱ་གཞུང་གི་དྲང་བདེན་མིན་པའི་སྲིད་ཇུས་ལ་མེ་རྒོལ་བྱས་ཏེ་མིའི་རིགས་ཀྱི་འཚེ་མེད་ཞི་བའི་ལོ་རྒྱུས་ནང་མེ་རྒོལ་གྱི་ལམ་བུ་ཆེས་ཆེར་ཕྱེ་སོང་། རང་དབང་དང་བདེན་པའི་དོན་དུ་ཅི་སྙམ་པར་གཅེས་པའི་ཚེ་སྲོག་དྲོན་པོ་མེ་ལྷའི་ཞལ་དུ་བསྟབས་སོང་། གཅེས་པའི་ཕ་མ་དང་དུང་བའི་གཉེན་གྲོགས་ཐམས་ཅད་ལ་སྡུག་གི་ཁུར་བོ་བཀལ་ནས་ཕྱི་མའི་འཕྲང་རིང་འགྲིམས་སོང་། ད་དུང་མེ་ཀློང་ནས་ཞི་བའི་སྐད་འབོད་འདོན་ཞིང་། ཤི་ཁུང་ན་རེ་བའི་མིག་ཟུང་ཅེར་བཞིན་དམག་དང་མཚོན་ལ་རྒོལ་སོང་།
དེ་བས་དེ་རིང་བདག་ཀྱང་ལས་དབང་གཅིག་པའི་རིགས་རྒྱུད་འདི་ལ་གཏོགས་ཕྱིེར་མེ་རྒོལ་བ་འདི་ཚོར་གདུང་སེམས་མཉམ་སྐྱེད་ཞུ་ཞིང་། ནང་མི་ཉེ་འབྲེལ་ཚོར་སྐྱོ་བའི་སེམས་གསོ་ཞུ་བ་དང་འབྲེལ་ནས་རེ་འབོད་ཅིག་ཞུ་སྙིང་བྲོ་སོང་། ངའི་རེ་འབོད་གཅིག་ནི་རྒྱ་ནག་གི་མཁས་པ་ཚོ་དང་ལྷག་པར་དེང་གི་དམར་ཤོག་གི་དབང་འཛིན་པ་ཚོ་ཡིན་ལ། གཅིག་ཤོས་ནི་རང་རེ་བཙན་བྱོལ་བོད་མི་ཚོར་ཡིན། ད་ནི་ཅིས་ཀྱང་རྒྱ་ཕྱོགས་ནས་ཤེས་དགོས་པ་ནི་བོད་དོན་འགྲིག་འཇགས་ཀྱི་བསམ་བློ་གཏོང་བའི་དུས་ལ་བསླེབས་ཡོད་ཅིང་། ས་གནས་ཀྱི་ལས་བྱེད་པ་བླུན་པོ་ཚོའི་ཁར་ཉན་ནས་མུ་མཐུད་དེ་མགོ་བོ་ནག་ཁུང་ནང་བཅུག་ནས་བསྡད་ན་དེ་ནི་བོད་རྒྱ་མི་རིགས་གཉིས་ཀའི་མ་འོངས་པའི་ལོ་རྒྱུས་ཁྲག་དང་མིག་ཆུའི་ནང་དུ་འཁྲིད་བཞིན་པ་སྟེ། མེ་ཡིས་རྒོལ་མཁན་འདི་ཚོས་རང་གི་ལུས་སྲོག་ལ་ཅི་མི་སྙམ་པར་འབར་བ་མེ་ཡི་ཞལ་དུ་བསྟབ་ཐུབ་པ་ལ་བསམ་ན། ད་ལྟའི་ཆར་སྔར་དང་མི་འདྲ་བར་ཆ་རྐྱེན་ཅི་ཡང་འཛོམས་པས་ལུས་ལ་འབར་རྫས་ཐོགས་ཏེ་རང་སྲོག་བློས་གཏོང་གི་དྲག་རྒོལ་ནི་དེ་ལས་ཀྱང་བྱ་ཐུབ་ངེས་ཡིན་པར་སྙམ།
དེའི་ཕྱིར་རང་ཉིད་ནི་མི་དཀྱུས་མ་ཞིག་ཡིན་མིན་ལ་མ་ལྟོས་པར་མི་རིགས་འདི་གཉིས་ཀྱི་མ་འོངས་འདུན་ལམ་ལ་བསམ་ན་འཇིགས་སྣང་སྐྱེས་འོང་གི་འདུག དེ་ལྟ་ནའང་ད་སྔ་དེ་ལྟར་བྱུང་མེད་པ་ནི་ཏཱ་ལའི་བླ་མའི་འཚེ་བའི་ཞི་བའི་ལམ་སྟོན་ཁོ་ནས་བསྲུངས་པ་བྱས་ཡོད་པ་འདི་རྒྱ་གཞུང་གིས་ཤེས་དགོས་པ་གལ་ཆེ་བར་སྙམ་པ་མ་ཟད། བོད་རྒྱ་ཕྱོགས་གཉིས་ཀའི་ངོས་ནས་གཟབ་གཟབ་མ་བྱས་ན་མི་རིགས་འདི་གཉིས་ཀྱི་ལས་དབང་ཡོངས་རྫོགས་སྐབས་འཚོལ་བ་ཚོའི་ལག་ཏུ་ཤོར་ཉེན་ཡོད་པར་འདོད། རྒྱ་གཞུང་གིས་རང་དབང་རང་ལག་ལ་ཡོད་དུས་ངེས་པར་དུ་བསམ་གཞིག་བྱ་དགོས་པ་ལས་རྒྱ་ནག་འཐོར་ཞིག་གི་ལེ་ཚན་གྱི་མགོ་བཙུགས་པ་ནས་ཚར་སོང་བར་སྙམ།
དྲག་པོ་མཚོན་གྱིས་མི་ཐུལ་ཅིང་། ཞི་བ་རྒྱུ་ཡིས་མི་འབྲིད་པའི་ཐུ་བྷོད་མི་རིགས་འདི་ལས་སླ་བོར་ཁྱུར་མིད་གཏོང་མི་ཐུབ་པའི་གནས་ལུགས་ར་འཕྲོད་ཡོད་པར་འདོད་ལ། ད་ནི་རང་མགོ་རང་གིས་མ་བསྐོར་བར་རྒྱ་གཞུང་ལ་གོ་སྐབས་གཅིག་ཡོད་པ་ནི་མི་རིགས་འདིའི་སེམས་ལ་ན་ཚ་གསར་བ་མི་སློང་རྒྱུ་རང་ཡིན་པར་སྙམ་ལ། དེ་ནི་བོད་རྒྱ་གཉིས་ཀའི་མ་འོངས་བདེ་སྐྱིད་ཀྱི་ལམ་བུ་ཡིན་པར་སྙམ།
མ་གཞི་ནས་འདི་ག་བཙན་བྱོལ་ནང་ནས་ལས་འགུལ་སྤེལ་ན་བོད་ནང་གི་བོད་མི་ཚོར་མི་བཟང་བར་བཤད་མཁན་དང་། ཡང་མ་སྤེལ་ན་བོད་ནང་བློ་ཕམ་འབྱུང་རྒྱུ་ཡིན་པའི་བསམ་ཚུལ་ཕྱོགས་གཉིས་ཤིག་ཡོད་མིན་ལ་མ་ལྟོས་པར་ང་རང་ལ་འདོད་པ་མི་ཚིམ་ས་ཞིག་ཡོད་པ་ནི་བོད་གཞུང་དང་ཚོགས་པ་ཁག་གི་ཁྱབ་བསྒྲགས་འདི་ཚོ་ཡིན། ཁོང་ཚོ་ཚང་མས་མགྲིན་གཅིག་དབྱངས་གཅིག་གིས་བོད་མི་མེ་རྒོལ་བ་ཚོས་འ་ཆད་འུ་ཐུག་གིས་རང་ལུས་མེ་རུ་བསྲེགས་ཚུལ་གསུང་གིན་པ་ལས། འདིའི་འགན་སུ་ལ་ཡོད་མེད་དང་། ལས་འགུལ་འདི་གང་འདྲ་ཞིག་ཏུ་འགྱུར་གྱིན་ཡོད་མེད་སོགས་ལ་གསུང་བཤད་གནང་མཁན་སུ་གང་མི་འདུག འདི་ཅི་ཞིག་ཡིན་ནམ།
ངའི་བསམ་ཚོད་ལ་ང་ཚོས་ངེས་པར་དུ་རྒྱ་གཞུང་ལ་ར་སྤྲོད་བྱ་དགོས་པ་ནི་ལས་འགུལ་འདིའི་འབྱུང་རྩ་རྒྱ་གཞུང་གི་དྲང་བདེན་མིན་པའི་སྲིད་ཇུས་ལ་ཐུག་ཡོད་པ་དང་། གལ་སྲིད་འདི་དྲག་སྤྱོད་ཅིག་ཏུ་མི་འགྱུར་བའི་ངེས་པ་མེད་ན་དེའི་འགན་ཡོངས་རྫོགས་རྒྱ་གཞུང་རང་གིས་ཁུར་དགོས་པ་འདི་ཅིས་ཀྱང་གསལ་སྟོན་གནང་དགོས་བསམ། ང་ཚོས་དམག་དང་མཚོན་གྱིས་མི་ཁེགས་པའི་དཀྱིལ་ཤར་ཡུལ་གྲུའི་གསར་བརྗེའི་འོས་ལངས་དང་། རུལ་སུངས་སུ་གྱུར་ཟིན་པའི་དམར་བོའི་སྲིད་གཞུང་ཁག་ལ་བསམ་ན་ད་ནི་དངོས་གནས་བོད་རྒྱ་མི་རིགས་གཉིས་ཀའི་ལོ་རྒྱུས་ཀྱི་འགག་མདོ་ཞིག་སྟེ། གཉེན་དང་གྲོགས་ཀྱི་ལག་འཇུ་བྱས་ཏེ་འཛམ་གླིང་ཤར་ཕྱོགས་ཀྱི་སྟོབས་ལྡན་རྒྱལ་ཁབ་ཅིག་གི་ངོ་བོར་གནས་རྒྱུ་ཡིན་ནམ། འཁོན་དང་འགྲས་ཀྱི་ཞེ་རྩ་བཅད་དེ་སྟོབས་ལྡན་གཞན་ཞིག་གི་གཡོག་པོར་འགྲོ་རྒྱུ་ཡིན་པའི་ལམ་གྱི་གཞི་མདོ་ཏག་ཏག་དེར་སླེབས་འདུག་སྙམ། ལོ་རྒྱུས་ཀྱི་འགན་ལྕི་མོ་འདི་བསམ་ཤེས་གཏན་ནས་མེད་པའི་རྒྱ་གཞུང་ལ་ཡོད་པའི་གནས་ཚུལ་ཅིས་ཀྱང་འཛམ་གླིང་གི་གཟུར་གནས་ཚོར་ཤེས་སུ་འཇུག་དགོས་པ་ཡིན།
ང་ཚོའི་སྨྱུ་གུ་ཐོགས་མཁན་ཡིན་ཟེར་མཁན་ཚོ་ཡང་འདིའི་ཕྱོགས་ལ་ལྐུགས་པའི་རྟུལ་ཞུགས་འཛིན་གྱི་འདུག ནང་ཁུལ་ནས་ཉོག་དྲ་མེད་ས་ནས་བཙལ། ཡོད་ས་ནས་ཆེ་རུ་གཏོང་བ་སོགས་ལ་ཁྱོད་མཁས་ང་མཁས་རེད་ལ། གནད་ཡོད་མི་སྣ་ཞིག་གམ་གྲྭ་བ་ཞིག ཡང་ན་ཚོགས་པ་ཞིག་གི་སྐྱོན་རེ་མཐོང་ན་དེའི་ཡོན་ཏན་ཐམས་ཅད་བསྒྲིབས་ནས་དེ་ལ་ཉེས་སྐྱོན་ལུང་བ་གང་བགྲང་རྒྱུ་ཡོད། ད་འདི་ལྟ་བུའི་གནས་སྐབས་སུ་ཡོད་དགོས་པ་ལ་གོ་མེད་ཚོར་མེད་དུ་འདུག ངས་སྐུར་བ་བཏབ་པ་དེ་འདྲ་གང་ཡང་མིན། གནད་འགག་འདི་ཚོ་རྩོམ་པ་པོ་ཡིན་ཟེར་མཁན་ཚོས་ཤེས་དགོས་པར་མ་ཟད། རྒྱ་ཆེ་མང་ཚོགས་ཀྱིས་དེ་བས་ཀྱང་ཤེས་དགོས་ཀྱི་འདུག་སྙམ།
དེ་བཞིན་དུ་སྲིད་དོན་ཤེས་ཟེར་མཁན་དང་ནམ་རྒྱུན་གཞུང་དང་༸རྒྱལ་བ་རིན་པོ་ཆེར་ཁ་བཏང་ནས་སྡོད་མཁན་ཚོས་ཀྱང་ད་ནི་ཅི་ཞིག་བྱེད་ཀྱི་ཡོད་དམ། ཕྱི་དགྲ་བོར་ཐུག་ན་ཝ་འབྲོས་འབྲོས། ནང་ཕུ་ནུར་ཐུག་ན་སྟག་ངར་ངར་བྱེད་པའི་མི་འདི་ཚོའི་གཤིས་ཀ་ཞིག་ལྟོས་དང་། བོད་མི་ག་ཚོད་ཅིག་གིས་རང་ལུས་མེ་ལ་བསྒྲོན་སོང་། སྤུན་ཟླ་ག་ཚོད་ཅིག་ལ་རྒྱ་མིས་མནར་གཅོད་བཏང་སོང་། ད་ནི་དངོས་གནས་རུས་པའི་ནང་ན་རྐང་ཡོད་ན་སྟོབས་ཤུགས་གཅིག་ཏུ་སྤུངས་པའི་དུས་ལ་བབ་ཡོད་སྙམ། འདི་ནི་ངས་བོད་ཕྱོགས་ལ་ཞུས་པའི་རེ་བ་དང་འབོད་པ་ཡིན།
ངས་འདི་ལ་དུས་རབས་ཉེར་གཅིག་པའི་ཤེས་རབ་ཀྱི་མེ་ལྕེ་ཟེར་བཞིན་ཡོད། སྤུན་ཟླ་ཁྱེད་ཅག་གིས་ག་རེ་འདོད་མིན་ངས་མི་ཤེས། གང་ལྟར། ཤེས་རབ་ཀྱི་མེ་ལྕེ་ནི་ཤེས་རབ་ཀྱི་དུས་རབས་ཉེར་གཅིག་པའི་ནང་དུ་བོད་ལ་བྱུང་གི་ཡོད་པ་དེ་རེད། མུ་མཐུད་དུ་འབར་ནས་སོང་ན་་་་ ད་བཤད་དཀའ་ནི་རེད།
ངས་བསམ་ན་རྩོམ་ཡིག་འདིའི་ནང་དུ་སྐད་ཆ་གསར་བ་ཞིག་དང་། ཐབས་ལམ་གསར་བ་ཞིག་གང་ཡང་མེད་མོད། རང་ཉིད་ཀྱི་སེམས་པའི་ནང་དུ་ཇི་ཡོད་པ་ཐད་ཀར་བརྗོད་འདུག་པའི་ཚོར་སྣང་ཞིག་ངང་གིས་སྟེར་ཀི ཡིན་ནའང་། ཁོ་རང་གི་བསམ་ཚུལ་དེ་བསམ་ཚུལ་ཡིན་པའི་ངོས་ཐད་ནས་བལྟས་ན་རིན་ཐང་ཡོད་ཀི ཁོ་བའང་བོད་མི་ཞིག་གི་གྲལ་མཐའ་ནས་ལངས་ཏེ་ཁ་སང་དེ་རིང་གི་ཆེས་ཛ་དྲག་གི་གནས་བབ་འདིའི་ཐད་ནས་སྐད་ཆ་ཁ་ཤས་བརྗོད་ཡོད་པས་སོ། ཐད་ཀར་དུ་རྩོམ་པ་པོའི་སྐྱོན་ཆ་ཐེར་འདོན་མ་གནང་བར་རང་ཉིད་ཀྱིས་ཀྱང་རྣམ་དཔྱོད་ཀྱི་སྒོ་མོ་ཕྱེས་ཏེ་ཐབས་ལམ་དང་དཔྱད་གཏམ་སྤེལ་ཚེ་མཉམ་རུབ་ཀྱི་འདུ་ཤེས་ཤིག་སྐྱེས་ཡོང་རྒྱུ་རེད། དེ་མིན་རང་གཞན་གཉིས་ཀྱི་ཁོར་ཡུག་ནས་མ་འདའ་ན་སྐྱོ་ཞིང་སྐྱོ་ཞིང་སྡོད་དགོས་པ་ཞིག་གོ
ངས་བསམ་ན་རྩོམ་ཡིག་འདིའི་ནང་དུ་སྐད་ཆ་གསར་བ་ཞིག་དང་། ཐབས་ལམ་གསར་བ་ཞིག་གང་ཡང་མེད་མོད། རང་ཉིད་ཀྱི་སེམས་པའི་ནང་དུ་ཇི་ཡོད་པ་ཐད་ཀར་བརྗོད་འདུག་པའི་ཚོར་སྣང་ཞིག་ངང་གིས་སྟེར་ཀི ཡིན་ནའང་། ཁོ་རང་གི་བསམ་ཚུལ་དེ་བསམ་ཚུལ་ཡིན་པའི་ངོས་ཐད་ནས་བལྟས་ན་རིན་ཐང་ཡོད་ཀི ཁོ་བའང་བོད་མི་ཞིག་གི་གྲལ་མཐའ་ནས་ལངས་ཏེ་ཁ་སང་དེ་རིང་གི་ཆེས་ཛ་དྲག་གི་གནས་བབ་འདིའི་ཐད་ནས་སྐད་ཆ་ཁ་ཤས་བརྗོད་ཡོད་པས་སོ། ཐད་ཀར་དུ་རྩོམ་པ་པོའི་སྐྱོན་ཆ་ཐེར་འདོན་མ་གནང་བར་རང་ཉིད་ཀྱིས་ཀྱང་རྣམ་དཔྱོད་ཀྱི་སྒོ་མོ་ཕྱེས་ཏེ་ཐབས་ལམ་དང་དཔྱད་གཏམ་སྤེལ་ཚེ་མཉམ་རུབ་ཀྱི་འདུ་ཤེས་ཤིག་སྐྱེས་ཡོང་རྒྱུ་རེད། དེ་མིན་རང་གཞན་གཉིས་ཀྱི་ཁོར་ཡུག་ནས་མ་འདའ་ན་སྐྱོ་ཞིང་སྐྱོ་ཞིང་སྡོད་དགོས་པ་ཞིག་གོ
དྲ་གྲོགས་ལགས་ཁྱོད་ཡང་རང་སྐྱོན་གླེང་ན་ཧ་ཅང་མི་དགའ་བའི་གྲལ་ཏེ་རེད་འདུག་ག བཙན་བྱོལ་ནང་ནས་བཙན་བྱོལ་བའི་སྐྱོན་གླེང་དགོས་དཱ་དགོས། ལྷག་པར་ཞབས་འདྲེན་གང་ནས་ཞུ་ན་དེ་དག་ཞིབ་མོར་གླེང་དགོས་བ་དཔེར་ན་ཁྱོད་ཀྱི་(དེ་ལྟ་ནའང་ད་སྔ་དེ་ལྟར་བྱུང་མེད་པ་ནི་ཏཱ་ལའི་བླ་མའི་འཚེ་བའི་ཞི་བའི་ལམ་སྟོན་ཁོ་ནས)འདི་ཟོ་བཅོས་ན་མི་བཟང་གི་ནས་ཧཧཧཧཧཧཧ
དྲ་གྲོགས་ལགས་ཚིག་འདི་ཟོ་བཅོས་ན་མི་བཟང་ངམ་(དེ་ལྟ་ནའང་ད་སྔ་དེ་ལྟར་བྱུང་མེད་པ་ནི་ཏཱ་ལའི་བླ་མའི་འཚེ་བའི་ཞི་བའི་ལམ་སྟོན་ཁོ་ནས)བལྟ་ཡག་བྱས་ན་བཟང་གི་རེད་པ།
བཙན་བྱོལ་ནང་ན་དཔའ་བོ་ཡོད་ཀྱི་མ་རེད། གལ་སྲིད་ཡོད་ན་བཙན་བྱོལ་བྱེད་ཀྱི་མ་རེད། སྔར་ནས་རང་ལུས་འབེན་ལ་འཇོག་པའམ་ཡང་ན་མེ་ལ་སྒྲོན་ཚར་ཡོད་པ་རེད། ད་ནི་དཔའ་བོ་བོད་ནང་ནས་སྐྱེས་གིན་ཡོད་དུས་བཙན་བྱོལ་ནང་ན་དཔའ་བོ་སུ་དང་སུ་ཡོད་ལབ་ན་ལན་སྐྱོན་ཤེས་ས་མ་རེད། གང་ལྟར་ང་ནི་དཔའ་བོ་ཞིག་མིན། ལོ་རེ་ཟུང་ཞིག་ནས་མི་ཁ་ཤས་ཀྱིས་བཙན་བྱོལ་བ་ཚོས་མ་འཇོན་མ་བྱུང་བའི་སྐོར་མང་པོ་བགྲང་གི་འདུག བཙན་བྱོལ་བ་ཚོ་བཙན་བྱོལ་བ་ཡིན་པའི་ངེས་ཤེས་དེ་ཙམ་ཡང་མི་འདུག འོན་ཀྱང་། སོ་སོས་གང་འཇོན་ཚོད་དང་ནུས་ཚོད་ཀྱི་ལས་ཀ་རེ་བྱེད་ཀྱིན་འདུག་སྙམ།
སྤྱིར་བཏང་བོད་མིའི་འཐབ་རྩོད་འདི་ལ་གོ་བ་མ་ལོན་མཁན་བརྒྱ་ཆ་ ༧༠ ཙམ་ཟིན་གྱི་ཡོད་པ་འདྲ། འགྲེལ་བཤད་བརྒྱབ་ཀྱང་མི་གོ་མཁན་བརྒྱ་ཆ་ ༤༠ ཡིན་ས་རེད། དེ་ནས་ལས་འགུལ་སྤེལ་སྟངས་མ་ཤེས་མཁན་ནི་བརྒྱ་ཆ་ ༩༩ ཡིན་པ་འདྲ། འདི་འདྲ་བའི་དཀའ་རྙོག་གི་འོག་ནས་ནང་ཁུལ་དུ་དམའ་འབེབས་དང་ཁྱད་གསོད། ཕུད་རྒྱག གཡོ་བཙོང་སོགས་མང་པོ་ཡོང་གི་འདུག
རྩོམ་ཡིག་སྤེལ་དང་མ་སྤེལ་ལ་ད་ནི་ཁྱད་པར་མི་འདུག དེང་སྐབས་སྤེལ་བཞིན་པ་དེ་ཚོ་སྔར་ནས་སྤེལ་་ཟིན་པ་རྐྱང་རེད། བློ་སྐྱེད་གསར་པ་ཞིག་མི་འདུག ཐབས་ལམ་མ་འདྲ་བ་ཞིག་མི་འདུག སྡུག་སྨྲེ་མང་པོ་བཏོན་རུང་འབབ་རྒྱུ་ནི་གཅིག་པ་རེད།
གནས་སྐབས་རིང་ཕྱི་རྩོམ་མ་གཏོགས་བོད་རྩོམ་རིགས་མཚམས་བཞག་ན་ཡག་པོ་ཡོད་ས་རེད། གནས་སྐབས་རིང་དེ་ཙམ་ཡིན།
བཙན་བྱོལ་ནང་ན་དཔའ་བོ་མང་ནི་རེད། དྲག་སྤྱོད་བྱེད་ན་འདྲ་རང་ལུས་བསྲེགས་ན་འདྲ། ཅིག་གནོང་དང་ང་ཚོས་ལྟ་ཆོག
ད་ལྟ་བོད་མིའི་ཞི་བའི་ངོ་རྒོལ་ལ་རྒྱ་གཞུང་གིས་ཡ་ལན་བྱེད་སྟངས་ལ་གཞིགས་ན། ཟིང་འཁྲུག་དང་གཏོར་རྒོལ།གཞུང་དང་མི་མང་བར་འཐབ་འཛིང་ཡོང་ངེས་ཀྱི་ཉེན་ཁ་རྒྱ་གཞུང་གིས་ཁྲིད་ཡོང་གི་འདུག་་་དེ་དག་ཡོང་སྲིད་པ་རེད།
ཡིན་ནའང་དེ་དག་ལ་འཇིགས་སྐུལ་དྲག་སྤྱོད་ཅེས་བརྗོད་ཐབས་མེད།ད་ལྟ་གཏོར་རྒོལ་དང་གཏུབ་རེས་གསོད་རེས་རང་བྱེད་བཞིན་པའི་སི་རི་ཡ་སོགས་ཨ་རབ་ཀྱི་ལུང་པ་དག་གི་མི་མང་ཡར་ལངས་ཀྱི་ངོ་རྒོལ་ཚང་མར་འཇིགས་སྐུལ་དྲག་སྤྱོད་པ་རེད་ཟེར་གྱི་མེད།བྱས་ཙང་ཚིག་འདི་ཚོ་གང་བྱུང་དུ་གསུང་རྐྱང་མ་གནང་རོགས།
རྩོམ་ཡིག་འདི་ནི་བྱིས་པ་གཉིད་ལོག་གི་གཏམ་དུ་གྱུར་བ་དང་སྔ་འདང་ཕྱིར་འདང་རྒྱབ་ནས་བོད་དོན་ལ་ལས་དོན་བསྒྲུབ་རྒྱུ་ནི་དུས་ལ་བབ་པའི་འོས་འགན་ཡིན།
གྲོགས་པོ་ལགས། ཁྱེད་ཀྱིས་རང་རིགས་ཆེད་སེམས་ཁུར་ལྩི་མོ་དང་ཀུན་སློང་གཙང་བྲིས་པར་ཡིད་ཆེས་ཡོད། འོན་ཀྱང་། འཇིགས་སྐུལ་དྲག་སྤྱོད་པ་ཞེས་པར་གོ་དོན་ཟབ་མོ་ཞིག་མ་ལོན་ན་འོད་ཚོད་ཀྱིས་མཆོང་རྒྱུགས་མ་གནང་རོགས། ཕན་པ་ལས་གནོད་པ་ཡོང་སྲིད།
[ཐུ་བྷོད་བཙན་པོའི་སྙིང་སྟོབས་ཀྱི་དྲོད་མ་ཉམས་ཤིང་། སྙིང་རྗེ་རྩ་བ་ཅན་གྱི་བསྟན་པའི་རྩི་མ་ཡལ་བའི་བོད་པ་མེ་ཡིས་རྒོལ་མཁན་འདི་ཚོ]
ཐ་སྙད་འདིར་ལྟོས་དང་། གོ་བརྡ་འཕྲོད་ཀི་མི་འདུག་མོད། ད་དུང་ཆེན་པོ་བཤད་ཀྱིན་འདུག
མེ་ཡིས་རྒོལ་མཁན་ཞེས་པ་འདི་ནི་ཇི་འདྲའི་ཐ་སྙད་རྣ་ལ་གཟན་ཞིང་སྐྱུག་མེར་ལངས་པ་ཞིག་རེད་ཨང་། མེ་ཡིས་སུ་ལ་རྒོལ་གྱིན་ཡོད་པ་རེད། མེ་ཡིས་རང་གི་རིན་ཆེན་མི་ལུས་ལ་དང་དོན་ལྔ་སྣོད་དྲུག་ལ་རྒོལ་གི་ཡོད་པ་ཨེ་རེད། ་སྤྱིར་བཏང་དཔྱདང་གཏམ་སྤེལ་ན་ཐ་སྙད་རེ་རེ་བཞིན་ཁུངས་དང་རྒྱུན་མཚན་དགོས་པ་རེད། མགོ་ཆག་གིས་སྐད་ཆ་བཤད་བཤད་བྱས་ན་འགྲིག་ནི་མ་རེད།
དྲང་མོར་བཤད་ན། རང་རེའི་མེ་རྒོལ་འདི་དག་འཇིགས་སྐུལ་དུ་འགྱུར་བའི་ཉེན་ཁ་ཞིག་ཡོང་སྟངས་མེད། དགྲ་བོའི་ལུས་ཀྱི་བ་སྤུ་གཅིག་ཀྱང་མ་བསྲེགས་པར་རང་གི་ཚེ་སྲོག་སྐྱེས་སུ་ཕུལ་ན་འཇིགས་སྐུལ་དུ་འགྱུར་བའི་ཉེན་ཁར་མཐོང་བ་ནི་དགོད་བྲོ་བ་རང་རེད།
དགྱ་ནག་གིས་འཇིགས་སྐུལ་རེད་ཅེས་ཟེར་ངེས་ལ། ཐ་ན་ཏཱ་ལའི་བླ་མའི་ངན་སྐུལ་རེད་ཀྱང་ཟེར་ངེས། དེར་འཛམ་གླིང་མི་མང་གིས་ཡིད་མི་ཆེས་ལ། དགྱ་རིགས་མི་མང་གིས་ཀྱང་ཡིད་ཆེས་བྱེད་ཀྱི་མ་རེད། དགྱ་ནག་གུང་ཁྲན་ཏང་གིས་ཚུར་འཇིགས་སྐུལ་རེད་ཟེར་ན། ང་ཚོས་ཀྱང་དེ་དང་ཐག་ཉེའི་སྐད་ཆ་བཤད་མཁན་འདིའི་རིགས་ལ་ཧང་སངས་སོང་།
འཇིགས་སྐུལ་ཟེར་བའི་དོན་དག་མགོ་མ་ཚེས་པར་སྐད་ཆ་འདིའི་རིགས་དུས་ནམ་ཡང་མ་བཤད་ན་ཡག
བོད་རིགས་འཇིགས་སྐུལ་དྲག་སྤྱོད་པ་མེད་ན། མེད་པ་ཡང་ཡག་བགྱིད་རེད་དོ། གཞོན་སྐྱེས་ཚོ། ང་རྒད་པོའི་ཁ་འཆེམས་ཡང་འདི་ལྷག་མེད་དོ། བོད་རིགས་ཚོ།
དྲ་གྲོགས་བསྟན་འཛིན་ཟླ་བ་ལགས་ དངོས་ནས་ཡག་པོ་བྲིས་འདུག་ མུ་མཐུད་དུ་ཕྲིས།