མདོ་སྟོད་སྤྱི་འཐུས་འཇམ་དབྱངས་བཟོད་པ་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༡༥ ཉིན་གྱི་ཉིན་གུང་ཡས་མས་སུ་ཡུལ་ཤུལ་ཁྲི་འདུ་རྫོང་ས་གནས་ཉེན་རྟོག་པ་གླུ་བུར་དུ་ཉ་མཚོ་ཟིལ་དཀར་དགོན་ཡོང་སྟེ། མཁར་རོང་སྡེ་བའི་ཕ་ཕུན་ཚོགས་དབང་རྒྱལ་ལགས་ཀྱི་བུ་བསོད་ནམས་དགེ་བ་དང་འབྲི་སྨད་སྡེ་བའི་ཕ་བཀྲ་ཚེའི་བུ་བློ་བཟང་བསམ་གཏན། གེ་ཤ་སྡེ་བའི་ཕ་གཏེར་ཁུའི་བུ་བློ་བཟང་ཉི་མ་བཅས་ཉེ་མཚོ་ཟིལ་དཀར་དགོན་པའི་གྲྭ་པ་ ༣ འཛིན་བཟུང་བཙན་འཁྲིད་བྱས་ཏེ། ཉེ་བའི་ཆར་ནང་མི་གཉེན་འབྲེལ་ཚོས་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
ཉ་མཚོ་ཟིལ་དཀར་དགོན་ནི། ཡུལ་ཤུལ་བོད་རིགས་རང་སྐྱོང་ཁུལ་ཁྲི་འདུ་རྫོང་རྫ་སྟོད་གྲོང་རྡལ་དང་བར་ཐག་སྤྱི་ལེ་ ༡༢ ལྷག་གི་མཚམས་སུ་ཆགས་ཡོད་ཅིང་། ཟླ་འདིའི་ཕྱི་ཚེས་ ༨ ཉིན་ཉ་མཚོ་ཟིལ་དཀར་དགོན་པའི་གྲྭ་པ་ ༤༠༠ ཡས་མས་ཤིག་དང་དེར་ཡོད་སེར་སྐྱ་ ༡༤༠༠ ཙམ་གྱིས། “ ༧རྒྱལ་བ་ཡིད་བཞིན་ནོར་བུ་བོད་ལ་གདན་འདྲེན་ཞུ་དགོས། པཎ་ཆེན་རིན་པོ་ཆེའི་གཙོས་ཉེས་མེད་བཙོན་པ་རྣམས་བཙོན་གྲོལ་གཏོང་དགོས། བོད་མིའི་སྐྱིད་སྡུག་མཉམ་མྱོང་དང་། བོད་མིའི་ཚེ་སྲོག་ལ་བརྩི་བཀུར་བྱ་དགོས། བོད་མིའི་སྐད་ཡིག་ལ་མཐོང་ཆེན་བྱེད་དགོས་སོགས་བྲིས་པའི་འཕྲེད་དར་འཕྱར་བ་དང་། ཆུ་ཚོད་ ༣ ལྷག་ལ་སྐད་འབོད་བྱས་ཡོད།
གསར་འགོད་པ། དོན་གོ
ཁོང་མྱུར་དུ་བཙོན་གྲོལ་ཡོང་བར་སྨོན་ལམ་ཕུར་ཚུགས་སུ་འདེབས་སོ།།
བོད་བཞུགས་སྤུན་ཟླ་རྣམས་ཀྱི་འགྲན་ཟླ་བྲལ་བའི་སྙིང་སྟོབས་ལ་རྗེས་སུ་ཡི་རངས་ཡོད། ཡང་གནས་ཚུལ་མཁོ་གཏོང་བའི་དུས་ལྟར་གནས་ཚུལ་ཕྱི་ཕྱོགས་སུ་གནང་བར་ཐུགས་རྗེ་ཆེ་ཞུས།