བོད་
སྤྱིར་ལོ་གསར་རྙིང་གཉིས་ཀྱི་བར་མཚམས་འདིར་བོད་ཀྱི་དུས་བབ་ཀློག་པ་པོ་ཡོངས་ལ་ཆུ་འབྲུག་ལོའི་གནམ་ལོ་གསར་བཞད་ལ་བཀྲ་ཤིས་བདེ་ལེགས་ཀྱི་ཁ་གཡང་རེ་དང་། དེང་གི་བརྡ་འཕྲིན་བརྒྱུད་ལམ་ནས་ངོ་ཤེས་གྲོགས་པོ་དང་དགའ་བོ་ཉེ་བོ་ཚོར་ལོ་སར་ལེགས་སྐྱེས་ཀྱི་ཤིས་ཚིག་རེ་བསྐུར་རྒྱུར་འོས་འགན་ཡོད་ལ། ལམ་སྲོལ་འདི་འུ་ཅག་བོད་པ་ཙམ་དུ་མ་ཟད། འཛམ་གླིང་གི་མི་རིགས་ཚང་མར་གདོད་ནས་དར་བའི་སྤྱི་སྲོལ་ཞིག་ཡིན་མོད། ཁ་སང་དེ་རིང་བོད་ནང་གཅིག་རྗེས་གཉིས་མཐུད་དུ་རང་ལུས་མེར་བསྲེགས་གཏོང་བཞིན་པ་དང་། རྒྱ་དམར་གྱི་མེ་མདའི་འོག་ཏུ་གཞིས་སྲུང་སྤུན་ཟླ་སྡེབ་གསོད་བྱེད་བཞིན་པའི་གནས་ཚུལ་རིམ་བསྟུད་དུ་ཐོས་ཡོང་སྐབས། མིའི་ལུང་པ་ཞིག་ནས་ལོ་སར་བཏང་སྟེ་དགའ་མགུར་རོལ་རྒྱུའི་སྤྲོ་བ་སེམས་རྩ་ནས་བརླགས་སོང་ལ། ལོ་སར་ལེགས་སྐྱེས་གཏོང་རེས་ཀྱི་ཡི་ག་དེ་ཡང་ཞེ་གཏིང་ནས་འགག་སོང་།
ལོ་དགའ་རབ་ཅིག་གི་གོང་ནས་བོད་ནང་གི་བོད་མི་ཚོར་ལོ་གསར་གྱི་དང་དོད་རྨང་ནས་ཡལ་ཏེ། “ཁ་དང་ཁ་སྤུ་ཁ་ཁ་དང་གྲི་དང་སྡེར་མ་སོ་སོ” བོད་རྒྱ་མི་རིགས་ཐ་དད་དང་། ཡུལ་གོམས་གཤིས་ལུགས་སོ་སོ་ཡི་མངོན་འདོད་ཅིག་གིས་ཀུན་ནས་བསླངས་ཏེ། བོད་པའི་ལོ་སར་གཅིག་གྱུར་བཟོ་དགོས་པའི་གླེང་སློང་ཞིག་བྱུང་ཡོད་ལ། ས་བྱི་ཞི་རྒོལ་ཆེན་མོའི་རྗེས་སུ་མངོན་འདོད་དེ་ཤུགས་ཇེ་དྲག་ཏུ་ཕྱིན་ཏེ་ཨ་མདོའི་ས་ཁུལ་མང་པོ་ཞིག་གིས་རྒྱ་ནག་དང་ལྷན་དུ་ལོ་སར་གཏོང་མཚམས་བཞག་ཡོད། ལྷག་པར་དུ་ད་ལོའི་དཔྱིད་གསར་དུས་ཆེན་སྐབས་བོད་ནང་གི་ས་ཁུལ་མང་པོ་ཞིག་ཏུ། ལོ་སར་ལ་སྤྲོ་སྐྱིད་གཏོང་བའི་ཚབ་ཏུ་རྩམ་སྐྱ་འགམ་ཞིང་གོས་ཧྲུལ་གྱོན་ཏེ་རྒྱ་གཞུང་ལ་ངོ་རྒོལ་བྱས་ཡོད་ལ། ས་གནས་རེ་ཟུང་ནང་ཕྱག་མཆོད་སྨོན་ལམ་གསུངས་ཤིང་མར་མེ་ཁྲོམ་སྐོར་བྱས་ཏེ་འདས་ལོར་མྱ་ངན་ཞུས་ཡོད།
བོད་ཀྱི་གཞོན་ནུ་ལྷན་ཚོགས་ཀྱིས་ཟླ་བ་འགའི་གོང་ནས་ད་ལོའི་ལོ་སར་མེད་པ་དང་། ལོ་སར་སྐབས་སུ་རྩ་དོན་ཐོག་ལས་འགུལ་སྤེལ་དགོས་པའི་གསལ་བསྒྲགས་བསྐྱངས་ཡོད་ལ། བཀའ་བློན་ཁྲི་པ་དང་སྤྱི་འཐུས་ཚོགས་གཙོ་གཉིས་ཀྱིས་ཀྱང་བཙན་བྱོལ་བོད་མི་ཡོངས་ཀྱིས་བོད་ཆུ་འབྲུག་ལོའི་ལོ་སར་སྐབས། སྲོལ་རྒྱུན་ཆོས་ཕྱོགས་ཀྱི་བྱེད་སྒོ་ཙམ་ལས་སྤྲོ་སྐྱིད་མི་གཏོང་རྒྱུར་འབོད་སྐུལ་ཞུས་ཡོད། བོད་ནང་གི་གནས་སྟངས་སྔར་བས་ཇེ་སྡུག་ཏུ་ཕྱིན་མ་ཐག་བཀའ་སྤྱི་ལྷན་རྒྱས་ཛ་དྲག་གི་ཚོགས་འདུ་ཚོགས་ཏེ། ལས་འགུལ་སྤེལ་ཕྱོགས་གང་དགའ་ཅི་ལེགས་ཀྱི་གྲོས་ཁ་བསྡུར་རབས་འདུག་མོད། ལོ་སར་ཚེས་གཅིག་ཉིན་ངྷ་ས་གཙུག་ལག་ཁང་དུ་སྤྱི་འཐུས་ལྷན་ཚོགས་ཀྱིས་ཟས་བཅད་ངོ་རྒོལ་གནང་རྒྱུའི་གསལ་བསྒྲཊ་ནང་། འཛིན་སྐྱང་བཀའ་ཤག་དང་གཞུང་ཞབས་ལས་བྱེད་ཀྱི་མིང་ཙམ་ཡང་མི་འདུག
གངས་ཅན་སྐྱིད་གཤོང་ན་གཞུང་འབྲེལ་གུང་གསེང་དང་སྒེར་གྱི་ཐོབ་གསེང་ཁག་ཡར་འདེད་མར་འདེད་ཀྱི་མིག་མང་གི་རྩེ་མོར་ལེགས་པར་བྱང་བའི་གཞུང་ཞབས་ལས་བྱེད་རེ་ཟུང་གིས་ཉིན་གསུམ་གྱི་ལོ་སར་གུང་གསེང་གི་ཐོག་ལ། གཟའ་ཉི་མ་དང་སྤེན་པ་བཞི་བ་བསྣན་ཏེ། ད་ལོའི་ལོ་སར་ལ་ཉིན་ལྔ་ཡི་སྤྲོ་སྐྱིད་དུས་ཚོད་རག་པར་སྤྲོ་འཛུམ་གྱིས་ཁེངས་འདུག བདུན་ཕྲག་གཅིག་གཉིས་གོང་ནས་གཞུང་གི་ལས་ཁུངས་ཁག་ཏུ་ལས་བྱེད་ཇེ་ཉུང་དང་། ཕྱོགས་སྐྱོད་རླངས་འཁོར་དང་མེ་འཁོར། གནམ་གྲུ་སོགས་སུ་གཞུང་ཞབས་ལས་བྱེད་འཚང་ཁ་ཤིག་ཤིག་གུང་གསེང་ལ་ཕེབས་བཞིན་ཡོད་རབས་འདུག་ལ། བཀའ་བློན་ཁྲི་པ་མཆོག་ཀྱང་གཞུང་འབྲེལ་ཕྱོགས་སྐྱོད་ཅིག་དང་སྟབས་བསྟུན་ཨ་རིར་ཉིན་འགར་སྒེར་གྱི་གུང་གསེང་ལ་བཞུགས་འཆར་ཡོད་རབས་ཐོས།
