གསེར་རྟར་དམར་གསོད་དང་འཛིན་བཟུང།

ཉེ་ལམ་བོད་ནས་འབྲེལ་ཡོད་མི་སྣ་ཞིག་གིས་མགོ་ལོག་དམ་ཆོས་དཔལ་བཟང་ལགས་སུ་གནས་ཚུལ་མཁོ་སྤྲོད་བྱས་པ་ལྟར་ན། ཟླ་སྔོན་མའི་ཕྱི་ཚེས་ ༢༤ ཉིན་གསེར་རྟ་རྫོང་གི་ཁྲོམ་གཞུང་དུ་བོད་མི་ཚོས་རླུང་རྟ་གཏོར་བ་དང་འབོད་ཚིག་འདྲ་མིན་སྒྲོག་བཞིན་རྒྱ་གཞུང་ལ་ངོ་རྒོལ་སྐད་འབོད་བྱས་སྐབས། དྲག་ཆས་དམག་མིས་བོད་མི་ཞི་རྒོལ་བའི་ཁྲོད་གང་བྱུང་མེད་མདའ་བརྒྱབ་ཏེ། གསེར་རྟ་བསེར་བའི་རང་ལོ་ ༢༦ ཡས་མས་ཡིན་པའི་ཟླ་བ་གྲགས་པ་ལགས་དང་གཞན་བོད་མི་ཁག་ཅིག་དམར་གསོད་དང་། གསེར་རྟ་ཆུ་སྟོད་ཀྱི་བླ་མ་ཞིག་དང་གནུབ་ཟུར་ཡུལ་ཚོའི་པདྨ་བཅས་བོད་མི་ ༤ ལ་རྨས་སྐྱོན་ཚབས་ཆེན་བཟོས་ཡོད་པ་མ་ཟད། ཉིན་དེའི་དགོང་མོའི་ཆུ་ཚོད་ ༩ པ་ཡས་མས་སུ་ས་གནས་ཉེན་རྟོག་པས་ས་གནས་ཀྱི་དགེ་རྒན་ཨ་སྒང་ཚུལ་ཁྲིམས་འབོད་པ་གློ་བུར་འཛིན་བཟུང་བཙན་འཁྲིད་བྱས་པ་དང་། ཕྱི་ཉིན་ཕྱི་ཚེས་ ༢༥ ཉིན་གྱི་ཞོགས་པའི་ཆུ་ཚོད་ ༨ པ་ཡས་མས་སུ་བོད་རིགས་ཉེན་རྟོག་པ་ ༡༠ ལྷག་ཁོང་གི་ཁྱིམ་དུ་ཡོང་སྟེ་ཁྱིམ་གྱི་ཅ་དངོས་ཡོངས་ལ་བསྔོག་བཤེར་གྱིས། གློག་ཀླད་དང་པར་ཆས། དེབ་སོགས་བཙན་འཁྱེར་བྱས་འདུག

ཨ་སྒང་ཚུལ་ཁྲིམས་ལགས་ནི། རྔ་པ་ཁུལ་གྱི་མི་ཡིན་ཞིང་། ད་ལྟའི་བར་གསེར་རྟར་དགེ་རྒན་གྱི་ཕྱག་ལས་གནང་བཞིན་ཡོད་འདུག  ༢༠༠༨ ལོར་ཁོང་གི་སྣེ་འཁྲིད་འོག་གསེར་རྟ་རྫོང་གི་རོང་འབྲོག་ཁུལ་གྱི་སློབ་མ་མཉམ་རུབ་ཐོག་༼ཕ་སྐད་མདུན་ལམ་ཚོགས་པ༽ཞེས་པ་གསར་འཛུགས་གནང་བ་དང་།  སློབ་གྲྭའི་དབྱར་དགུན་གྱི་གུང་གསེང་སོགས་སུ་ས་གནས་ཞིང་འབྲོག་མང་ཚོགས་ཁྲོད་ཕྱིན་སྟེ། ཡིག་རྨོངས་སེལ་བའི་བྱ་འགུལ་སྤེལ་རིམ་པ་སྤེལ་ཡོད་འདུག་ལ། ད་ལྟའི་བར་རང་ནུས་ཅི་ལྕོག་གིས་དཀའ་ངལ་ཅན་གྱི་སློབ་མར་རོགས་སྐྱོར་དང་བོད་སྐད་ཡིག་སྲུང་སྐྱོབ་ཐད་ཕྱག་ལས་གནང་མཁན་ཞིག་ཡིན་འདུག  ཁོང་འཛིན་བཟུང་བྱས་རྗེས། རྒྱ་ནག་གཞུང་གིས་གསེར་རྟ་རྫོང་གི་བརྙན་འཕྲིན་ནང། ཁོང་༸གོང་ས་མཆོག་དང་བཙན་བྱོལ་བོད་གཞུང་གི་ཚོགས་པ་ཞིག་དང་འབྲེལ་བ་ཡོད་ཚུལ་དང་། ནམ་རྒྱུན་ཆབ་སྲིད་དང་འགལ་བའི་ལས་ཀ་བྱས་ཡོད་པའི་སྐོར་སོགས་ཁྱབ་བསྒྲགས་བྱས་འདུག   ཉེ་ལམ་ཁོང་གི་གྲོགས་པོ་ཞིག་གིས་ཟ་མ་འཁྱེར་ཏེ་ཉེན་རྟོག་ལས་ཁུངས་དུ་ཕྱིན་སྐབས། ཉེན་རྟོག་པས་ཁོང་ལ་ཟ་མ་སྤྲོད་མི་ཆོག་ཚུལ་དང་ཐུག་འཕྲད་རྩ་བ་ནས་བྱེད་མི་ཆོག་ཚུལ་བཤད་དེ་ཕྱིར་བཏང་འདུག   ཕྱིས་སུ་ཁོང་གསེར་རྟ་རྫོང་ནས་དར་མདོར་འཁྲིད་ཡོད་ཚུལ་གྱི་གནས་ཚུལ་ཙམ་ལས་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག  

ཡང་གནས་ཚུལ་མཁོ་སྤྲོད་པས་བརྗོད་དོན་ལྟར་ན། ཉེ་བའི་དུས་ནས་རྒྱ་ནག་གཞུང་གིས་བོད་ཀྱི་དགོན་སྡེ་ཁག་ཙམ་མིན་པར་སློབ་གྲྭ་ཁག་གི་སློབ་དེབ་དང་སྒྲིག་གཞི་ཕྱོགས་ཡོངས་ལ་དམ་དྲག་བྱས་ཏེ། སི་ཁྲོན་དར་མདོ་སློབ་གྲྭའི་ནང་ནམ་རྒྱུན་སློབ་མ་ཚོར་མི་རིགས་དང་སྐད་ཡིག་གི་བདག་དབང་། མི་རིགས་ཀྱི་ལར་ཞེན་སོགས་བརྗོད་བྱ་བྱས་པའི་སྐད་ཆའི་རིགས་བཤད་པ་ཡིན་ན། སློབ་མ་ཚོར་འདྲི་གཅོད་བྱེད་ཀྱིན་པ་མ་ཟད། ཉེ་ཆར་སློབ་གྲྭའི་བོད་རིགས་སློབ་མ་ ༥ ཡིས་རྫོང་གི་ཁྲོམ་གཞུང་དུ་ཡོད་པའི་གསོལ་ཇ་ཁང་ཞིག་ཏུ་བསྡད་ཡོད་སྐབས། ཉེན་རྟོག་པ་གློ་བུར་ཡོང་སྟེ་ཁོང་ཚོའི་ཁ་པར་ནང་པར་འདྲ་མིན་ཡོད་ཚུལ་དང་སྐེ་རུ་༸གོང་ས་མཆོག་གི་སྐུ་པར་ཡོད་པའི་མཚོན་སྲུང་བཏགས་ཡོད་ཚུལ་བཤད་དེ་གསེར་རྟ་རྫོང་དུ་འཛིན་བཟུང་བཀག་ཉར་བྱས་ཡོད་འདུག་ལ། ས་གནས་མི་མང་ལ་མཚོན་ནའང་། ངོ་རྒོལ་ལས་འགུལ་བྱུང་བ་ནས་བཟུང་དམག་མི་སྟོང་ཕྲག་ ༥ ཡས་མས་ཤིག་འགྲེམ་འཇོག་གིས། རྫོང་གི་ཁྲོམ་གཞུང་དང་ལམ་བར་སོགས་སུ་དམ་དྲག་བསྔོག་བཤེར་བྱེད་བཞིན་པ་མ་ཟད། བོད་པའི་ཚོང་ཁང་ཁག་ལ་དགོང་དྲོའི་ཆུ་ཚོད་ ༧ པ་ནས་བཙན་གྱིས་སྒོ་རྒྱག་ཏུ་བཅུག་པ་སོགས་དམ་དྲག་ཤུགས་ཆེར་བྱེད་ཀྱི་ཡོད་འདུག