ཉེ་ལམ་བོད་ནས་འབྲེལ་ཡོད་མི་སྣ་ཞིག་གིས་མགོ་ལོག་དམ་ཆོས་དཔལ་བཟང་ལགས་སུ་གནས་ཚུལ་མཁོ་སྤྲོད་བྱས་པ་ལྟར་ན། ཟླ་སྔོན་མའི་ཕྱི་ཚེས་ ༢༤ ཉིན་གསེར་རྟ་རྫོང་གི་ཁྲོམ་གཞུང་དུ་བོད་མི་ཚོས་རླུང་རྟ་གཏོར་བ་དང་འབོད་ཚིག་འདྲ་མིན་སྒྲོག་བཞིན་རྒྱ་གཞུང་ལ་ངོ་རྒོལ་སྐད་འབོད་བྱས་སྐབས། དྲག་ཆས་དམག་མིས་བོད་མི་ཞི་རྒོལ་བའི་ཁྲོད་གང་བྱུང་མེད་མདའ་བརྒྱབ་ཏེ། གསེར་རྟ་བསེར་བའི་རང་ལོ་ ༢༦ ཡས་མས་ཡིན་པའི་ཟླ་བ་གྲགས་པ་ལགས་དང་གཞན་བོད་མི་ཁག་ཅིག་དམར་གསོད་དང་། གསེར་རྟ་ཆུ་སྟོད་ཀྱི་བླ་མ་ཞིག་དང་གནུབ་ཟུར་ཡུལ་ཚོའི་པདྨ་བཅས་བོད་མི་ ༤ ལ་རྨས་སྐྱོན་ཚབས་ཆེན་བཟོས་ཡོད་པ་མ་ཟད། ཉིན་དེའི་དགོང་མོའི་ཆུ་ཚོད་ ༩ པ་ཡས་མས་སུ་ས་གནས་ཉེན་རྟོག་པས་ས་གནས་ཀྱི་དགེ་རྒན་ཨ་སྒང་ཚུལ་ཁྲིམས་འབོད་པ་གློ་བུར་འཛིན་བཟུང་བཙན་འཁྲིད་བྱས་པ་དང་། ཕྱི་ཉིན་ཕྱི་ཚེས་ ༢༥ ཉིན་གྱི་ཞོགས་པའི་ཆུ་ཚོད་ ༨ པ་ཡས་མས་སུ་བོད་རིགས་ཉེན་རྟོག་པ་ ༡༠ ལྷག་ཁོང་གི་ཁྱིམ་དུ་ཡོང་སྟེ་ཁྱིམ་གྱི་ཅ་དངོས་ཡོངས་ལ་བསྔོག་བཤེར་གྱིས། གློག་ཀླད་དང་པར་ཆས། དེབ་སོགས་བཙན་འཁྱེར་བྱས་འདུག
ཨ་སྒང་ཚུལ་ཁྲིམས་ལགས་ནི། རྔ་པ་ཁུལ་གྱི་མི་ཡིན་ཞིང་། ད་ལྟའི་བར་གསེར་རྟར་དགེ་རྒན་གྱི་ཕྱག་ལས་གནང་བཞིན་ཡོད་འདུག ༢༠༠༨ ལོར་ཁོང་གི་སྣེ་འཁྲིད་འོག་གསེར་རྟ་རྫོང་གི་རོང་འབྲོག་ཁུལ་གྱི་སློབ་མ་མཉམ་རུབ་ཐོག་༼ཕ་སྐད་མདུན་ལམ་ཚོགས་པ༽ཞེས་པ་གསར་འཛུགས་གནང་བ་དང་། སློབ་གྲྭའི་དབྱར་དགུན་གྱི་གུང་གསེང་སོགས་སུ་ས་གནས་ཞིང་འབྲོག་མང་ཚོགས་ཁྲོད་ཕྱིན་སྟེ། ཡིག་རྨོངས་སེལ་བའི་བྱ་འགུལ་སྤེལ་རིམ་པ་སྤེལ་ཡོད་འདུག་ལ། ད་ལྟའི་བར་རང་ནུས་ཅི་ལྕོག་གིས་དཀའ་ངལ་ཅན་གྱི་སློབ་མར་རོགས་སྐྱོར་དང་བོད་སྐད་ཡིག་སྲུང་སྐྱོབ་ཐད་ཕྱག་ལས་གནང་མཁན་ཞིག་ཡིན་འདུག ཁོང་འཛིན་བཟུང་བྱས་རྗེས། རྒྱ་ནག་གཞུང་གིས་གསེར་རྟ་རྫོང་གི་བརྙན་འཕྲིན་ནང། ཁོང་༸གོང་ས་མཆོག་དང་བཙན་བྱོལ་བོད་གཞུང་གི་ཚོགས་པ་ཞིག་དང་འབྲེལ་བ་ཡོད་ཚུལ་དང་། ནམ་རྒྱུན་ཆབ་སྲིད་དང་འགལ་བའི་ལས་ཀ་བྱས་ཡོད་པའི་སྐོར་སོགས་ཁྱབ་བསྒྲགས་བྱས་འདུག ཉེ་ལམ་ཁོང་གི་གྲོགས་པོ་ཞིག་གིས་ཟ་མ་འཁྱེར་ཏེ་ཉེན་རྟོག་ལས་ཁུངས་དུ་ཕྱིན་སྐབས། ཉེན་རྟོག་པས་ཁོང་ལ་ཟ་མ་སྤྲོད་མི་ཆོག་ཚུལ་དང་ཐུག་འཕྲད་རྩ་བ་ནས་བྱེད་མི་ཆོག་ཚུལ་བཤད་དེ་ཕྱིར་བཏང་འདུག ཕྱིས་སུ་ཁོང་གསེར་རྟ་རྫོང་ནས་དར་མདོར་འཁྲིད་ཡོད་ཚུལ་གྱི་གནས་ཚུལ་ཙམ་ལས་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
ཡང་གནས་ཚུལ་མཁོ་སྤྲོད་པས་བརྗོད་དོན་ལྟར་ན། ཉེ་བའི་དུས་ནས་རྒྱ་ནག་གཞུང་གིས་བོད་ཀྱི་དགོན་སྡེ་ཁག་ཙམ་མིན་པར་སློབ་གྲྭ་ཁག་གི་སློབ་དེབ་དང་སྒྲིག་གཞི་ཕྱོགས་ཡོངས་ལ་དམ་དྲག་བྱས་ཏེ། སི་ཁྲོན་དར་མདོ་སློབ་གྲྭའི་ནང་ནམ་རྒྱུན་སློབ་མ་ཚོར་མི་རིགས་དང་སྐད་ཡིག་གི་བདག་དབང་། མི་རིགས་ཀྱི་ལར་ཞེན་སོགས་བརྗོད་བྱ་བྱས་པའི་སྐད་ཆའི་རིགས་བཤད་པ་ཡིན་ན། སློབ་མ་ཚོར་འདྲི་གཅོད་བྱེད་ཀྱིན་པ་མ་ཟད། ཉེ་ཆར་སློབ་གྲྭའི་བོད་རིགས་སློབ་མ་ ༥ ཡིས་རྫོང་གི་ཁྲོམ་གཞུང་དུ་ཡོད་པའི་གསོལ་ཇ་ཁང་ཞིག་ཏུ་བསྡད་ཡོད་སྐབས། ཉེན་རྟོག་པ་གློ་བུར་ཡོང་སྟེ་ཁོང་ཚོའི་ཁ་པར་ནང་པར་འདྲ་མིན་ཡོད་ཚུལ་དང་སྐེ་རུ་༸གོང་ས་མཆོག་གི་སྐུ་པར་ཡོད་པའི་མཚོན་སྲུང་བཏགས་ཡོད་ཚུལ་བཤད་དེ་གསེར་རྟ་རྫོང་དུ་འཛིན་བཟུང་བཀག་ཉར་བྱས་ཡོད་འདུག་ལ། ས་གནས་མི་མང་ལ་མཚོན་ནའང་། ངོ་རྒོལ་ལས་འགུལ་བྱུང་བ་ནས་བཟུང་དམག་མི་སྟོང་ཕྲག་ ༥ ཡས་མས་ཤིག་འགྲེམ་འཇོག་གིས། རྫོང་གི་ཁྲོམ་གཞུང་དང་ལམ་བར་སོགས་སུ་དམ་དྲག་བསྔོག་བཤེར་བྱེད་བཞིན་པ་མ་ཟད། བོད་པའི་ཚོང་ཁང་ཁག་ལ་དགོང་དྲོའི་ཆུ་ཚོད་ ༧ པ་ནས་བཙན་གྱིས་སྒོ་རྒྱག་ཏུ་བཅུག་པ་སོགས་དམ་དྲག་ཤུགས་ཆེར་བྱེད་ཀྱི་ཡོད་འདུག
རང་གིས་གཅེས་པའི་རང་གི་ཚེ་སྲོག་དེ།།
རང་རིགས་སྤུན་ཟླ་ཆེད་དུ་གཏོངས་ཟིན་པའི།།
རིགས་ཞེན་ལ་རྒྱལ་ཅན་གྱི་དཔའ་རྒོད་ཚོ།།
ནམ་ཡང་མི་བརྗེད་སེམས་ལ་དམ་བཅའ་ཡོད།།
ཁྲག་གི་འཁོར་ལོ་སྐོར་བ་དམར་དམག་གི་བྱེད་ལས། །
བདེན་པ་བདེན་པར་བརྡལ་བ་ཆོས་ལྡན་པའི་བགོ་སྐལ། །
འགལ་བ་ཁ་རུ་འཐབ་པའི་མི་ཡུལ་གྱི་ཞིང་ན། །
དྲང་པོའི་མི་ལ་ཕྱོགས་པ་ག་ཚོད་ཙམ་ཡོད་དམ། །
གསར་འགོད་པ་དང་རིག་འདོན་པ་སུ་ཡིན་ཡང་གནད་འགག་གི་སྐབས་དག་ནོར་གྱིས་བརྡ་ལོག་མི་སྟོན་པའི་རེ་བ་ཞུ།
རྒན་དམ་ཆོས་ལགས་ཀྱིས་གནས་ཚུལ་ཡག་པོ་སྤེལ་འདུག གོང་ཚེས་ཉིན་གྱི་གནས་ཚུལ་ད་རུང་ཁ་གསལ་ཨེ་གོ་བལྟ་དགོས་པ་རེད། ཉིན་དེར་མི་བཞི་བཅུ་ཙམ་འཛིན་བཟུང་བྱས་པ་ལས་ཕལ་ཆེར་བཏང་ཚར་ཡོད་ས་རེད།
དེའི་ནང་ནས་བཙོན་འཇུག་སུ་་སུ་བྱས་ཡོད་མིན་མི་ཤེས།
སེམས་སྐྱོ་བ་གངས་ཅན་ལྗོངས་ལ་སོང་།།
གངས་དཀར་པོ་སྐྱོ་བས་ཞུ་ལ་ཁད།།
ལུས་རྒྱལ་ཁབ་མེད་པས་ས་མཐར་འཁྱམས།།
ས་སེར་པོ་མྱ་ངན་ཚ་བས་རྐམས།།
དཔའ་བོ་དང་དབའ་མོ་རྣམ་པ་རྒྱལ་ཁབ་སླར་གསོའི་ཆེད་དུ་བཞུད་ཀྱང་ང་ཚོ་ནམ་ཡང་ཕམ་མི་རུང་།རྒྱ་གཞུང་གི་རྒྱ་དར་མེ་བསྲེགས་བཏང་བ་ཡག་པོ་མཐོང་སོང་གཞོན་ནུ་ལྷན་ཚོགས་ནས་ལས་འགུལ་འདྲ་མིན་སྤེལ་རྒྱུའི་འབོད་སྐུལ་ཞུ་རྒྱུ་ཡིན།
ངོ་མ་བོད་ནང་གི་སྤུན་ཟླ་ཚོའི་བདེ་སྡུག་འདི་སེམས་ཀྱིས་མི་བཟོད་ཀྱང་བྱ་ཐབས་མི་འདུག
གུས་འོས་གསར་འགོད་པ་དོན་ཁོ་ལགས།
གཞན་བོད་མི་ཁག་ཅིག་དམར་གསོད་བཏང་འདུག་ཟེར་བ་སུ་དང་གང་རེད། གསེར་རྟ་ཁུལ་གྱི་མི་གསུམ་བསྲེགས་པའི་གནས་ཚུལ་ལྟར་ང་ཚོས་དེང་སང་དོན་དམ་པས་གཟབ་དགོས་བའི་དུས་ལ་སླེབས་འདུག། ཁག་ཅིག་དམར་གསོད་བཏང་བ་དོན་ཆུང་མ་རེད། ཟླ་བ་གྲགས་པའི་འདྲ་པར་དང་བཅས་བ་འབྱོར་ས་ན་གཞན་ཁག་གཅིག་དམར་གསོད་བཏང་བ་སུ་ཡིན་མི་ཤེས་ས་མི་འགྲོ་བ་ཞིག་འདུག།
རྩོམ་སྒྲིག་པ་ལགས། རྒྱ་ནག་གཞུང་གིས་དམར་གསོད་བཏང་བའི་ཟླ་བ་གྲགས་པ་ལགས་གསེར་རྟ་བསེར་བ་ནས་ཡིན་པ་ལས། གཟེར་བ་ནས་མ་རེད། དེ་བཞིན་གནུབ་ཟུར་དགོན་པ་རེད་མ་གཏོགས། ནུབ་གཟེར་མ་རེད།
ཀློག་པ་པོ་རྣམས་ཀྱིས་ནོར་བཅོས་གནང་རོགས།
དེ་ནས་བསམ་ཚུལ་ཞུ་རྒྱུ་ཞིག་ལ། ས་གནས་རྫོང་གི་མིང་འབྲི་སྐབས་བོད་ཀྱི་ས་གནས་ཤིག་ཡིན་པ་གསལ་པོ་དགོས་ཀྱི་འདུག ས་ཁྲ་བརྒྱུད་ནས་ས་ཆ་དེ་འཚོལ་སྐབས་སྟབས་བདེ་པོ་རེད། དཔེར་ན་གསེར་རྟ་གཅིག་པུ་བྲིས་ན། མང་པོ་ཞིག་གིས་ཤེས་རྟོགས་མི་འདུག རྒྱ་ནག་གི་ས་ཁྲའི་ནང་བཙལ་ན་རག་པ་དང་། བོད་ཀྱི་ས་གནས་ཡིན་པ་ར་འཕྲོད་པ་ཞིག་ཕྱི་རྒྱལ་ཁག་ལ་དགོས་ཀྱི་འདུག
དཔེར་ན། གསེར་རྟ་ལྟ་བུ་ཡིན། རྒྱ་ནག་གཞུང་གིས་བོད་ཀྱི་ས་ཆ་བཅད་བགོས་ལྟར་ན། སི་ཁྲིན་ཞིང་ཆེན་གྱི་བོད་ཀྱི་ས་ཁུལ་དཀར་མཛེས་ཁུལ། གསེར་རྟ་རྫོང་ཞེས་བྲིས་ན་འགྲིག་གམ། ལྷན་རྒྱས་ཀྱིས་བསམ་གཞིག་གནང་རོགས། གང་ལྟར་ས་གནས་དེ་མི་སུས་བལྟས་ཀྱང་གསར་པོ་ཤེས་ཐབས་དགོས་ཀྱི་འདུག
སྔོན་མ་བོད་ཀྱི་ས་ཆ་འབྲི་སྟངས་བྱས་ན་ཡང་ས་ཁྲ་ནས་རག་གི་མིའདུག