གཟའ་མིག་དམར་ཉིན་བོད་ཀྱི་བྱམས་བརྩེ་ཁང་གིས་ཧྥ་རན་སིའི་གྲོས་ཚོགས་འཐུས་མི་སྐོར་ཞིག་གདན་འདྲེན་ཞུས་ཏེ། བོད་ནང་གི་ཛ་དྲག་གནས་ཚུལ་ངོ་སྤྲོད་གནང་ཡོད་འདུག
གནས་ཚུལ་བཏང་འབྱོར་ལ། ཟླ་འདའི་ཚེས་ ༢༡ ཉིན་ཕ་རན་སིའི་རྒྱལ་སར་རྟེན་གཞི་བྱས་པའི་བོད་ཀྱི་བྱམས་བརྩེ་ཁང་གི་ངོས་ནས་ཧྥ་རན་སིའི་གྲོས་ཚོགས་བོད་དོན་རྒྱབ་སྐོར་ཚོགས་པའི་འཐུས་མི་སྐུ་ཞབས་ཇོན་སྤོན་སོ་བ་མཆོག་དང་། བོད་དོན་རྒྱབ་སྐྱོར་བ་གྲོས་ཚོགས་འཐུས་མི་རྣམ་པ། ཕ་རན་སིའི་ཕྱི་སྲིད་ལྷན་ཁང་གི་ཤར་ཨེ་ཤ་ཡའི་དམིགས་བསལ་སྐུ་ཚབ་སྐུ་ཞབས་དཱོ་སི་ཁན། ནང་སྲིད་ལྷན་ཁང་གི་གྲངས་ཉུང་མི་རིགས་ཀྱི་ཉམས་ཞིབ་པ། བལ་ཡུལ་བཅའ་བཞུགས་ཕ་རན་སིའི་གཞུང་ཚབ་ཆེན་མོ་བཅས་གདན་འདྲེན་ཞུས་ཏེ། བོད་ཀྱི་བྱམས་བརྩེ་ཁང་གི་འགན་འཛིན་སུམ་གྱང་རིན་པོ་ཆེ་མཆོག་གིས་ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་ཡིག་ངག་གཉིས་དང་། གློག་བརྙན་བཅས་ཀྱི་ལམ་ནས་འབུལ་ལམ་ཞུས་ཡོད་འདུག
སྐབས་དེར་ཧྥ་རན་སི་གྲོས་ཚོགས་འཐུས་མི་ཇོན་སྤོན་སོ་བ་མཆོག་ཧྥ་རན་སིའི་གཞུང་དང་གྲོས་ཚོགས། མི་མང་བཅས་ཀྱི་ངོས་ནས་བོད་ཀྱི་དཀའ་སྡུག་གི་གནས་སྟངས་རྣམས་གསལ་བོ་ཤེས་ཀྱི་ཡོད་པ་དང་། ཧྥ་རན་སན་སིའི་གྲོས་ཚོགས་ཀྱི་ངོས་ནས་རྒྱ་གཞུང་གི་དཔོན་རིགས་ཚོར་མཇལ་འཕྲད་གནང་སྐབས་བོད་རྒྱའི་གནད་དོན་དེ་༧གོང་ས་ཏཱ་ལའི་བླ་མའི་དབུ་ཁྲིད་པའི་བོད་ཀྱི་སྐུ་ཚབ་ཚོ་དང་ལྷན་དུ་གྲོས་མོལ་གྱི་ལམ་ནས་ཐག་གཅོག་བྱ་དགོས་པའི་འབོད་སྐུལ་ཞུས་ཡོད་པ། བོད་རྒྱའི་དཀའ་རྙོག་སེལ་ཐབས་སུ་ཨ་རིའི་གྲོས་ཚོགས་དང་མཉམ་འབྲེལ་ཐོག་དངོས་ཤུགས་བརྒྱུད་གསུམ་ནས་གནོན་ཤུགས་སྤྲོད་དགོས་པའི་རེ་འདུན་བཏོན་ཡོད་སྐོར་བཅས་བརྗོད་ཡོད་འདག
ཁོང་གིས་མུ་མཐུད་དུ་བརྗོད་དོན། “ ང་ཚོའི་གྲོས་ཚོགས་ཀྱི་འཐུས་མི་སྐོར་ཞིག་བོད་ནང་དུ་འགྲོ་རྒྱུར་རྒྱ་ནག་གཞུང་དང་འབྲེལ་བ་ཞུ་བཞིན་ཡོད། ང་ཚོའི་ངོས་ནས་བོད་ནང་དུ་རང་ལུས་མེར་བསྲེགས་ཀྱིས་མཚོན་པའི་ཛ་དྲག་གི་གནས་ཚུལ་ནམ་བྱུང་སྐབས། ཐད་ཀར་ཧྥ་རན་སིར་བཅའ་བཞུགས་རྒྱ་ནག་གཞུང་ཚབ་ཁང་ལ་ཡིག་ཐོག་ནས་འགྲེལ་བཤད་དང་མཚམས་འཇོག་དགོས་པའི་འབོད་སྐུལ་རབ་དང་རིམ་པའི་དགོས་འདུན་བཏོན་པ་ཡིན། ད་རུང་། རྒྱ་ནག་དང་ཡུ་རོབ་མནའ་འབྲེལ་བར་དུ་ཚོང་དོན་གྱི་ཆངས་ཡིག་འཇོག་པ་སོགས་ཀྱི་སྐབས་སུའང་ཧྥ་རན་སིའི་གྲོས་ཚོགས་ཀྱི་ངོས་ནས་བོད་ཀྱི་གནད་དོན་དེ་གལ་ཆེན་དོན་ཆེན་དུ་བརྩི་བཞིན་ཡོད” ཅེས་དང་། “ དེ་རིང་ཁྱེད་ཅག་གིས་བོད་ནང་གི་ཛ་དྲག་གནས་ཚུལ་ངོ་སྤྲོད་གནང་བའི་སྙན་ཐོ་འདི་ཧྥ་རན་སིའི་སྲིད་འཛིན་ལས་ཁུངས་དང་གྲོས་ཚོགས་འཐུས་མི་རྣམས་ལ་འབུལ་ངེས་ཡིན། མཐའ་དོན། ང་ཚོ་ཧྥ་རན་སིའི་གཞུང་དམངས་གཉིས་ཀྱི་ངོས་ནས་གོང་ས་ཏཱ་ལའི་བླ་མ་གཙོས་བྱས་པའི་བོད་མི་ཡོངས་ཀྱི་རྒྱབ་རྩར་ནམ་ཡང་ཡོད་ལ། ཁྱེད་ཅག་བོད་མི་རིགས་ཀྱི་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་བྱེད་ཀྱིན་ཡོད” ཅེས་བརྗོད་ཡོད་འདུག
དེ་རྗེས་བལ་ཡུལ་བཅའ་བཞུགས་ཕ་རན་སིའི་གཞུང་ཚབ་ཆེན་མོས། “ངས་བོད་ཀྱི་དངོས་ཡོད་གནས་ཚུལ་རྣམས་ཤེས་ཀྱི་ཡོད་ལ། ལྷག་པར་དུ་བལ་ཡུལ་འདི་རྒྱ་གཞུང་གིས་གནོན་ཤུགས་འོག་ཡོད་དུས། བལ་ཡུལ་དུ་ཡོད་པའི་བོད་མི་སྐྱབས་བཅོལ་བ་རྣམས་ལ་དམིགས་བསལ་གྱིས་དཀའ་ངལ་མང་པོ་ཞིག་འཕྲད་བཞིན་ཡོད་སྟབས། དེའི་ཐད་བལ་ཡུལ་གཞུང་དང་གནད་ཡོད་མི་སྣ་རྣམས་མཇལ་འཕྲད་ཀྱི་སྐབས་སུ་ཡུ་རོབ་མནའ་འབྲེལ་བརྒྱུད་གནོན་ཤུགས་གང་ཐུབ་སྤྲད་པས་མ་ཚད། ད་རུང་ཡིན་རུང་གང་ཐུབ་ཅི་ཐུབ་བྱེད་ཀྱི་ཡིན” ཞེས་སོགས་བརྗོད་བྱུང་།
དངོས་གནས་ཤེས་ཡོན་པའི་ལས་ཀ་ཞིག་དང་ལས་འགུལ་ཅིག་ཏུ་ཚོར་བས་དགའ་བསུ་ཞུ། བོད་ཀྱི་ཚོགས་སྡེ་ཁག་གིས་འདི་ལྟར་ལས་འགུལ་རེ་སྤེལ་ན་རྒྱལ་སྤྱིའི་མཐོང་དང་མཐུན་ལ་བོད་ནང་གི་གནས་སྟངས་ལ་མཐུན་པ་ཞིག་རེད།
བོད་ཀྱི་གཞོན་ནུ་ལྷན་ཚོགས་ཀྱིས་ཀྱང་འདི་ལྟར་ཞལ་འདེབས་ཀྱི་དངུལ་ཕོན་ཆེན་པོ་དེ་རྒྱ་དར་ཁག་ཅིག་མེ་བསྲེགས་ཀྱི་སླད་དུ་གཏོང་བ་ལས་རང་གིས་ངོས་ནས་འདི་འདྲ་གནང་རྒྱུ་གལ་ཆེ་ལ། གལ་སྲིད་དེ་མི་འཇོན་ཡང་ཚོགས་སྡེ་འདི་ཚོ་ལ་རྒྱབ་སྐྱོབ་ཀྱི་སླད་དུ་མི་མང་གི་ལག་གི་བསྔུ་བའི་ཞལ་འདེབས་དེ་ཕུལ་ན་ཅི་མ་རུང་།
འདི་འདྲའི་སྡིངས་ཆ་ཞིག་གོ་སྒྲིག་གནང་མཁན་ལ་ཐོག་མར་བཀའ་དྲིན་ཆེ་ཞུ།
ངོ་མ་རེད། ཕྱོགས་གཅིག་ནས་བོད་ཀྱི་གནས་བབ་བོད་རང་གི་སེལ་དགོས་པ་ཡིན་རུང་། ཕྱོགས་གཞན་ཞིག་ནས་ང་ཚོ་ལ་རྒྱབ་སྐྱོར་དགོས་པ་ནི། ཁ་ཚ་དགོས་གཏུགས་ཤིག་རེད། དེ་འདྲ་ཡིན་དུས། ཕ་རན་སིའི་གཞུང་དང་གྲོས་ཚོགས། མི་མང་བཅས་ཀྱི་ངོས་ནས་འདི་ལྟར་རྒྱབ་སྐྱོར་བྱས་པ་ནི། བོད་མི་རིགས་ལ་མཚོན་ན། འཐབ་རྩོད་གསོན་ཤུགས་རྒྱས་སྤྱད་ལྟ་བུ་ཞིག་རེད། འདི་འདྲའི་རྒྱབ་སྐྱོར་བྱེད་དགོས་དོན་ཡང་། བོད་མི་རིགས་ལ་བདེན་པའི་སྟོབས་ཤུགས་དང་དབུ་ཁྲིད་བླ་ན་མེད་པ་ཞིག་ཡིན་པས་ན། འདི་ལྟར་རོགས་འདེགས་བྱས་པ་ཞིག་རེད། ད་རུང་ཡིན་ཡང་། ང་ཚོའི་ངོས་ནས་གོ་སྐབས་དམ་འཛིན་བྱེད་ཤེས་དགོས་པ་གནད་ཀྱི་དོན་པོ་ཞིག་རེད།
བོད་ནང་གི་གནས་བབ་འདི་ལ་མྱུར་སྐྱོབ་བྱེད་དགོས་ཟེར་མཁན་མང་ནའང་དོན་གལ་ཆོད་པ་གཅིག་ཀྱང་མེད་ཡ།