དེ་རིང་ཞོགས་པར་ཕ་ཡུལ་ཁམས་སྡེ་དགེ་ནས་ཡིན་ཞིང་། ད་ལྟ་བཞུགས་སྒར་ངྷ་སར་གནས་སྡོད་དཔའ་ཆེན་ལྷུན་གྲུབ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཁ་སང་ཕྱི་ཚེས་ ༢༦ ཉིན་སྟེ། བོད་ཆུ་འབྲུག་ལོའི་ལོ་སར་ཚེས་ ༥ ཉིན་ཁམས་སྡེ་དགེ་རྫོང་དང་བར་ཐག་སྤྱི་ལེ་ ༡༠༠ ཡས་མས་སུ་ཡོད་པའི་དབོན་ཐོག་ཞང་གླིང་ཚང་རིན་ཆེན་གླིང་གྲོང་ཚོའི་གཞོན་སྐྱེས་ཤིག་གིས། རྒྱ་གཞུང་གིས་གསར་རྒྱག་བྱས་ཡོད་པའི་གྲོང་ཚོའི་ལས་ཁུང་མདུན་དུ་རང་ལུས་མེར་བསྲེགས་ཀྱིས་ངོ་རྒོལ་སྐད་འབོད་བྱས་ཏེ་འདས་གྲོངས་སུ་ཕྱིན་ཡོད་ཚུལ་བརྗོད་བྱུང་།
ཁོང་གིས་མུ་མཐུད་དུ་བརྗོད་པར། འགའ་རེས་ས་དེ་གར་རྒྱ་མིའི་བཙོན་ཁང་ཞིག་ཡོད་པ་དེར་བོད་མི་དེས་འབར་རྫས་གཡུགས་ཏེ་ཁོ་རང་གྲོངས་ཡོད་སྐོར་ཡང་འདུག་མོད། ད་ཆར་ས་གནས་དེར་དམ་དྲག་ཆེན་པོ་བྱས་ཡོད་པའི་དབང་གིས་ཁོང་གི་མིང་དང་ལོ་ཚོད། མེར་བསྲེགས་གཏོང་དགོས་པའི་རྒྱུ་མཚན་སོགས་གསལ་པོ་ཤེས་ཐུབ་ཀྱི་མི་འདུག་ཟེར།
གླིང་ཚང་རིན་ཆེན་གླིང་གྲོང་ཚོ་ནི། སི་ཁྲོན་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང་དབོན་ཐོག་ཞང་དང་སྤྱི་ལེ་ ༡༥ ཡི་མཚམས་སུ་ཡོད་པ་དང་། ད་ལྟའི་ཆར་གྲོང་ཚོ་དེར་ཁྱིམ་ཚང་ ༨༠ ཡས་མས་ཤིག་ཡོད་འདུག
ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། གོང་གསལ་གྱི་གནས་ཚུལ་དེ་མ་བྱུང་བའི་ཡར་སྔོན་སྟེ། འདི་ལོའི་ལོ་སར་གནམ་གང་དགོང་མོར་ཁམས་སྡེ་དགེ་རྫོང་གླིང་ཚང་ཚ་ཚ་དགོན་པའི་ནང་སྦྱར་ཡིག་ཅིག་བཀྲམས་པའི་ནང་། “ བོད་ནང་རང་དབང་མེད་པའི་དབང་གིས་བོད་མི་ཚོས་རང་ལུས་མེར་བསྲེགས་གཏོང་གི་ཡོད་པ་དང་། ༸གོང་ས་མཆོག་བོད་ལ་ཕེབས་ཏུ་འཇུག་དགོས་པ། ང་ཚོས་ཁོང་རྣམ་པར་གདུང་སེམས་མཉམ་སྐྱེད་ཆེད། ལོ་སར་ཚེས་ ༡ ཉིན་རང་ལུས་མེར་བསྲེགས་གཏོང་རྒྱུ་ཡིན། ” སོགས་བཀོད་ཡོད་སྟབས། ཕྱི་ཉིན་ནས་བཟུང་རྫོངཉེན་རྟོག་པ་དང་དྲག་ཆས་དམག་མི་རླངས་འཁོར་ ༢ ལྷག་འབྱོར་ཏེ། ལོ་སར་སྐབས་དགོན་པའི་ཆོས་ལུགས་ཀྱི་བྱེད་སྒོ་ཁག་ལ་དམ་དྲག་ནན་མོ་བྱེད་བཞིན་ཡོད་འདུག
གླིང་ཚང་ཚ་ཚ་དགོན་པ་ནི། བཤད་གྲྭ་ ༡ དང་སྒྲུབ་གྲྭ་ ༣ བཅས་ཡོད་པའི་ཀརྨ་ཀམ་ཚང་གི་དགོན་པ་ཞིག་ཡིན་པ་དང་། ཉེ་བའི་ཆར་དགོན་པ་དེར་གྲྭ་བ་ ༣༠༠ ཡས་མས་ཤིག་ཡོད་འདུག
གསར་འགོད་པ། དོན་གོ
བཀུར་འོས་པའི་གསར་འགོད་པ་ལགས། གསར་འགྱུར་འདི་ཚད་ལྡན་ཞིག་མ་རེད། ཁུངས་གསལ་བོ་ཞིག་མེད་ན་བསུབ་རོགས་ཞུ་གི་ཡོད། གནས་ཚུལ་གསལ་བོ་ཆགས་ན་རིམ་གྱིས་གསར་ལམ་ཁག་ཏུ་འགོད་ཆོག་གི་རེད། འདི་ལ་ཁུངས་ལུང་ཅི་ཡང་མེད་པར་མ་ཟད། གནས་ཚུལ་སྐོར་ཞིག་འདིར་འབྲི་ཐབས་མི་འདུག་མོད། གང་ལྟར་གནས་ཚུལ་གསལ་བོ་མ་ཆགས་བར་དུ་གསར་འགྱུར་འདི་གསར་ཁང་གཞན་པས་ལུང་འདྲེན་སོགས་མི་བྱེད་པར་འཚལ།